بلوچستان نا جتا علاقہ تیٹ مسہ جتا جتاؤ جلہو نا حوال مون آ بسونے، ہرافتیٹی تربت ئٹی پاکستانی لشکر نا لاری تے تراک ئٹ ٹک کننگ، ہرنائی ٹی پولیس چیک پوسٹ ءِ بمب ئسے ئٹ بھس کننگ و مستونگ ئٹی وزیر داخلہ بلوچستان ضیاءلانگو نا کاروان آ سلہہ بند جلہو اوار ءُ۔
مستونگ نا علاقہ کنڈ عمرانی نا خڑک بلوچستان نا وزیر داخلہ ضیاء لانگو نا کاروان آ سلہہ بند بندغ آک جلہو کریر، بنداوی حوال آتا رد ئٹ ضیاء لانگو جلہو آن بچا، ولے کاروان ئٹی اوار مسہ بندغ ٹپی مسر۔
ضلع کیچ ئنا بنجاہی شار تربت ئٹی شہید فدا چوک نا خڑک پاکستانی لشکر نا لاری تے آئی ای ڈی نا وسیلہ ئٹ ٹک کننگا، بنداوی حوال آتا رد ئٹ تراک آن پد جانی نسخان نا خلیس نا درشانی کننگانے، واہم دا رد ئٹ سرکاری حوالہ ئٹ کہوک و ٹپی تا کچ کساس نا بابت امنائی مننگ کتنے۔
تراک آن پد زوت پاکستانی لشکر علاقہ ءِ گڑگیس کریر، سروک آتا پارہ غان دائسکان جلہو نا ترندی و جانی نسخان تا بابت ئٹ خاص وڑ ئنا شابیتی حوال شینک کننگتنے۔
داکان ضلع ہرنائی ٹی استو ننکان نادرست سلہہ بند بندغ آک پنچ میل پولیس چیک پوسٹ ءِ شورہ غاتیٹ ٹک کریر۔ بنداوی حوال آتا رد ئٹ تراک ئٹی چیک پوسٹ نا ماڑی ءِ سخت نسخان رسینگا، واہم دائسکان ہچو جانی نسخان ئسے نا حوال رسینگتؤ۔
ہر مسہ تدینیک اسہ ہندنو وخت ئسے ٹی مسنو کہ ہراتم بلوچستان نا جتا جتا انگا علاقہ تیٹ پاکستانی لشکر، پولیس و سرکاری مڈیک سلہہ بند جلہو و تراک آتا گواچی ءُ۔ واہم تربت، ہرنائی و مستونگ نا پوسکنا تدینی تا حوالہ ئٹ زمواری کس ئسے نا دائسکان ارفنگ نا حوال مون آ بتنے۔