مڈی
(کسہ و تدینی تا تجربہ غاتیان شپ انگا لوز آک)
کتاب بشیر زیب بلوچ
جاچ: حمّل بلوچ ( کمالان)
دی بلوچستان پوسٹ
بلوچ تحریک ئٹ ہر اسہ تجربہ، سلہہ و مڈی دتر نا پڑی تیٹ ہلنگیسہ ہیل کننگانے۔ تحریک نا داڑسکان سر مننگ نا کل آن بھلا سوب ہمو راجی مڈی (شہید آتا) تا زگر انگا دتر آک ءُ گڑا اوفتا قربانی و قربانی ئٹ رسینگوک آ ہر گڑا نا قدر بائد کہ مروئی ءِ۔
مڈی کتاب ءِ خواننگ آن پد ہندا ہیت ملی ٹی بریک کہ بلوچ ڈیہہ اکن شہید آتا دتر پوک متنے و اینو ہم اوفتا دتر تون انصاف مننگ خننگ ئٹ بریک۔ اینو ہم تحریک ئٹی ساڑی مڈیک و تجربہ غاک اوفتا دتر نا ہر پڑی نا حساب ئٹ خیالداری مریسہ کیرہ۔
دنکہ ہندا کتاب ئٹی کماش جہس لکھک کہ:
”تنظیم ئٹی مڈی تا ہر اسہ دانہ، ہر اسہ رائفل و ہر اسہ سم شہید آتا پاک انگا دتر و سرمچار آتا بے کچ سختی سوری تے سگنگ نا برم ءِ۔“
دا کتاب مسہ بشخ ئٹی بیرہ لوز آتا مچی اس افک بلکن شہید آتا دتر تا پد آن تنظیمی سرسہبی نا مستاہی، اوفتا دتر تون انصاف نا کلہو و بلوچ تحریک نا سوگوی نا پڑو ءِ۔ دا کتاب بلوچ تحریک نا پوسکنا ارواہ نا سَند ءِ کہ تحریک داسا روایتی سوچ آتیان پیشن مریسہ تینے جہان نا ایلو سوگو و سرسہب مروک آ تحریک آتیتون مقابلہ تننگ نا سیم و حد آتیا سر مسنے۔ دنکہ کماش تینا تحریک نا مڈی و ایلو وادانی تے مون آ تخسہ کتاب ئٹی چین ئنا ماؤزے تنگ و ژو دے، ویتنام نا جنرل گیاپ، ریف جنگ ئنا عبدالکریم، آئرلینڈ نا کوارٹر ماسٹر جنرل کارپس، لاطینی امریکہ نا گوریلہ کمانڈر ارنسٹو چی گویرا و دائے تا مثیل تریسہ بلوچ راجی تحریک نا مڈی تے رکھنگ نا تنظیمی پڑو کیک۔ کتاب نا اولیکو بشخ ئٹی مڈی نا اہمیت، مڈی نا جند انت ئسے و بی ایل اے نا مڈی رکھنگ نا پالیسی تا سوب آتون اوار گڑاس جہانی انقلابی تنظیم آتا مثیل ساڑی ءُ۔ ہندا بشخ ئٹی کماش بلوچ راجی تحریک نا موکش نا دروشم ئٹ دا پڑو ہم کیک کہ بی ایل اے داسا روایتی جنگی چم آتے رد کریسہ پوسکن دور ئنا جہانی جنگ آتا ڈٹ ڈول آتیٹی ہمگرنچ مریک ہراڑے اسہ پوسکن، ادارہ جاتی و سائنسی عسکری نظام اس ہتنگ مرو۔
کتاب نا ارٹمیکو بشخ ئٹی مواد آتے مینوئل یا تنظیمی ہدایت نامہ پان ہم رد مفرون کہ ہراٹی تنظیمی مڈی تے رکھنگ کن بیست و یک (21) ٹک نوشتہ ءُ کہ مڈی تے کاریم ئٹ ہتنگ نا چم گُر آن ہلیس مڈی تا بابت اسہ بندغ ءِ تیوہ غا معلومداری مفرنگ نا حکمت عملی اسکان ساڑی ءُ۔
ہندا بشخ ئٹ نوشتہ کیک کہ ہر جنگی کاروائی آن پد مڈی تا نوشتہی دروشم ئٹ حساب کتاب مننگے، ہر مسہ تُو نا زی آ ریجن و کیمپ آتا حساب کتاب و جاچ ہلنگ مرے و بنجاہ ءِ رادہ کننگ مریر، مال غنیمت ءِ تنظیم نا مڈی تکیسہ ایمانداری نا کلہو تننگانے کہ دن مف دادے ہرکس دوئی کریسہ تینا میرات تکے و ہندن ہر سرمچار تون تُد اونا تنظیم نا پارہ غان تروک سلہہ و وادانی تے تنظیم نا مننگ نا حکمت عملی کہ ہر بندغ تون تنظیم نا گڑا تد مریسہ اودے دا مارشت ایتے کہ اوڑتون راج ئنا اسہ بھلو انامت اس تد ءِ ہراڑتون خیانت راج اتون غداری نا بریبر مننگ کیک۔
مستی ہندا بشخ ئٹی کم وادانی تیٹی گیشتر کاریم نا بابت لکھک کہ کم وخت و کم مڈی تیٹی دژمن ءِ بھلو نسخان تننگ ننا انقلابی ورنا تا امتحان ءِ کہ ہچ اف ہم دژمن نا زی آ امر کانڈہ مریرہ۔ ہندن مڈی ہلوک عسکری کمانڈر نا زمہ واری تے بیان کریسہ لکھک کہ اخدر مننگ کیک کم نہاد ئٹ بھاز مڈی دوئی کننگ مرے و پدا ہندا مڈی تا رکھ ئنا گچین ءُ تربیت جوڑ کننگ مرے کہ اسہ کیمپ ئنا مڈی رکھوک آ سنگت ایلو کیمپ والا تینا ہم اوغدہ سنگت تون ہم تینا مڈی تا کچ و جاگہ نا پاپرو و نئے کہ لافی گری ئٹ ہر مجلس دیوان و میڈیا غا شینک و تالان کرو۔ مڈی تا بابت دا رازداری دژمن نا جہاز و ڈرون آن مڈی تے پوک مننگ آن رکھنگ نا اسہ گچین ءُ عمل ئسے۔ ہندن پین جہس ہر جنگ ئٹی شہید مروک آ سنگت نا جون اتون اوار اونا تنظیمی مڈی سلہہ و دائے تے ہم دژمن آن مالو دوئی کننگ و تینا کیمپ آ سر کننگ نا ہدایت تریسہ کماش اسہ گچین ءُ ہیت اس پارینے کہ دژمن نا عکس کشنگ و پروپیگنڈا نا کسر تے بند کننگ نا اسٹ انگا چم ہندادے کہ اودے ننا سنگت آتا جون و مڈیک دو بفس۔ ہندا بابت مڈی تا رکھ و سرمچار آتے جانی نسخان آن رکھنگ کن دا ہدایت تننگانے کہ مڈی تا کوڑ آتے کمیپ آتیان اسہ بھلو مری ئسے ٹی ڈھکنگ مرے تانکہ مڈی کہ ہرافتیٹی گیشتر سلہہ شورہ مننگ کیرہ، ترخنگ و کیمپ ئٹ ساڑی سنگت آتے نسخان تننگ کیرہ۔ مڈی تے جوجک آتیان رکھنگ کن مڈی ماسٹر ءِ مڈی تا کوڑ تیا وار وار چکر پیری خلنگ نا حکمت عملی تننگانے تانکہ مڈی تا رکھ ئنا نفسیات ہر سرچار تون تد مرے۔ ہندن مستی مڈی تا ہڑدیئی کاریم ئٹ ہتنگ، مڈی تا رکھ و استعمال آن غافل مننگ، مڈی تا بریبر بشخ و چانٹ، مڈی تا اہمیت نا بابت نفسیاتی علم تننگ، سلہہ پٹنگ و ٹریک کننگ کن مڈی تا رکھ ئنا سائنسی وڑئٹ چم کننگ، ریجن و کیمپ آتے اسٹ ایلو تون کمکار مریسہ مڈی تننگ ءِ رواج تننگ، تینا سنگت سرمچار آتیٹی خراب مروک آ مڈی تے جوڑ کننگ نا تربیت تانکہ پیشن آن بروکا مستری تیا مڈی تا راز پاش مف، بریبری و انصاف ئٹ مڈی تے بشخ و چانٹ کننگ نا کانود نا پڑو، کڈ کروک مڈی تا خیالداری و مڈی تا بابت معلومداری تننگ ئٹ اسہ کمانڈر یا بندغ نا زی آ آسرہ کپننگ نا کلہو آک ساڑی ءُ۔
دا بیست و یک ہدایت نامہ یا کہ اصول آتیٹی اسٹ ہم دنو افک کہ بی ایل اے نا سرمچار آک ہرادے تجربہ کتنو۔ ہر ہیت، ہر اسہ کلہو مست ئنا تجربہ تا بنیات آ پاننگسہ بسنے۔ ہر اسہ ٹک ئنا پد ئٹی اسہ کسہ اسہ تدینی اس ارے ہرافتے بیان کریسہ دا جاچ کتاب آن ہم بھلن مننگ نا خلیس مریک۔ ہندا خاطران نن نوشت ئٹ دا کسہ تدینی تے ہتپنہ ولے خوانوک آ ہر سنگت دا کتاب ءِ لوز آتا مچی اس تکپ بلکن تجربہ تدینی و کسہ غاتیان شپ ءُ اسہ کڑمب ءُ دیر اس تکے ہرانا کیرغ آن کیہی گڑاتا کوڑ آک مریرہ۔
کتاب نا گڈیکو بشخ مڈی نا نفسیات براہوئی نا ہمو متل نا وڑئٹ ءِ کہ پائک ”دژمن تیلی ئسے تمبو اس سمجھاتے“ گڑا دا ہمو نفسیاتی سبخ ءِ کہ مڈی امر و ہراتم دژمن تون بھاز مریسہ ہم اونا حوصلہ تے نزور کیک و سرمچار اس کہ دو ہورک تینا ٹنٹی ءُ توفک ئسے تون ہم دژمن نا زی آ کانڈہ مریک۔ مڈی نا نفسیاتی جیڑہ دادے کہ اسہ سرمچار اس گوریلہ جنگ ئنا وخت مڈی دزی، ڈھکنگ یا راج ئنا مڈی تے تینا پاننگ نا نفسیات آن پیشن مس تو پگہ اسہ ریاست ئسے نا وڑئٹ ہم کرپشن، دزی و ریاستی و راجی گڑا تے دزی نا نفسیات ہچبر مفرو ءِ۔ دا کتاب دن چا ریاستی جوڑشت نا اسہ حکمت عملی ئسے کہ اینو نا مخلص آ سرمچار پگہ نا آزات انگا ریاست نا ہر چنا نا نفسیات ءِ مخلص و راج دوست جوڑ کننگ کیک۔ اینو نا جنگول پگہ نا ریاستی جوڑشت نا عکس ئسے کہ ریاست امر انگا بندغ آتا دتر تیان جوڑ مسنے و دادے امر مروئی ءِ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔