بی ایل اے نا کالخواہ تیٹی بھلو مٹی و بدلی – ٹی بی پی سرگپ
بلوچ لبریشن آرمی (بی ایل اے) 3 نومبر آ تینا تنظیمی ہاٹی ٹی اسہ بھلو مٹ و بدلی ئسے نا پڑؤ کرسا پارے کہ تنظیم نا بنجاہی کمانڈ کونسل نا فیصلہ غان پد بشیر زیب بلوچ داسا کمانڈر ان چیف نا اوغدہ غا سلتو۔ تنظیم نا پارہ غان شینک مروک پڑؤ نا رد ئٹ پوسکنا کالخواہ نا گچین کاری اسکان موکشی نا تیوہ غا واک و اختیار آک سپریم کمانڈ کونسل ءِ تننگانو ہراکہ دا وختی آ ساعت آتیٹی تنظیمی معاملہ و کالخواہ نا بابت فیصلہ کننگ نا زمہ وار مریک۔
بی ایل اے نا کالخواہ تیٹی دا مٹ بدلی ءِ بیرہ اوغدہ ئسے نا بدلی آن بیدس تنظیم نا تہٹی برجا ادارہ جاتی و تنظیمی ارتقا نا وڑ ئٹ ہُننگنگ ئٹی ءُ۔ تدوک آ ہشت سال نا وخت ئٹی دا مسٹمیکو وار ءِ کہ تنظیم نا موکشی کروک آتیٹی بھلو مٹ بدلی اس مون آ بسنے۔ مست ئنا تدینی تیا نظر اس شاغنگے گڑا بی ایل نا کالخواہ تیٹی مٹ و بدلی تیان پد تنظیم نا سیاسی بیانیہ، تنظیمی است خواہی و کاریم تیٹی بھلو بدلی خننگانے۔
مالو ہراتم ہم بی ایل اے نا کالخواہ تیٹی بدلی مسنے، اوکان پد تنظیم نا کاریم تیٹی ترندی و اٹکل آتیٹی پوسکن پوسکن ءُ گڑا مون آ بسنو۔ خاص وڑ ئٹ کالخواہ تا تہوکی مٹ بدلی و پدا استاد اسلم بلوچ نا خون مننگ نا وڑو تدینی تیان پدتنظیم نا رخ و کاریم تیٹی بھلو مٹ بدلی اس خننگا۔ داسہ نا بدلی نا اسہ دروشم دادے کہ بشیر زیب آن پد اختیار آک اسہ عبوری سروک ئسے تننگ نا جاگہ غا سپریم کمانڈ کونسل نا دوٹی تننگانو۔ داڑان دا سماء تمک کہ تنظیم تینا اہم معاملہ تے بندغی کالخواہی نا جاگہ اشتماعی ادارہ جاتی نظام نا وسیلہ ئٹ مستی دننگ ءِ۔
مجموعی وڑئٹ بی ایل اے نا ساڑی کالخواہ تا مٹ بدلی تے اونا تدوکا ہشت سال نا تنظیمی دیہاڑ نا پدریسہ ئسے نا وڑ ئٹ ہُرنگ نا گرج ءِ۔ مسہ وار بڑزکو تلہ نا کالخواہ تا بدلی، بھاز انگا وخت آتیٹی بھلا اہمیت تخوک بندغ آتا مفرنگ و داکان پد ہم ڈھانچہ نا اسہ وڑ برجاء مننگ دا ہیت ئنا شاہدی ایتک کہ تنظیم ءِ داسا اسہ بندغ ئسے نا آئری کننگ نا جاگہ غا اسہ بھلن کڑمب ءُ تہوکی نظام ئسے نا وڑئٹ مستی کاریم کرسا ءِ۔ بشیر زیب آن پد اختیار آتے سپریم کمانڈ کونسل ءِ تننگ نا فیصلہ ہندا ریسہ نا اسہ پوسکنو مثیل ئسے۔ دا پوسکن آ گامگیج اسہ وار پدا دا پک کرینے کہ تنظیم نا بروک آ وخت اونا سروک نا پِن آن آخہ بلکن اونا تہہ ئنا نظام، کالخواہ تا بدلی و ادارہ جاتی ہاٹی آن ہم ہلنگ مرے تو جوان ءِ۔