شِرِوخی دُر پِلِک ڈَنگّا تِٹِی ئَسّو
بِڑی بَانگا دُرَائِی سُوب ئَنا مسّو
تَفار تِیرس سَرکّولہ ہَمو نوشاک
بِسَند مَشّی بَٹاری آ تَہو نوشاک
کُرود ھاتَئے جُمُر کاپوئِی آ تیتون
زِرار آھرّ ئَتو تسّر ءُ خاکے شون
پِڑینگی بیدَمٹ ریسَاءِ دُن پلٹن
اَگہ گورگَم مَفک ہِچبر وَسم پالَن
شُبُکّ جاغنّ ئَتو بِینٹآ گَمر تیٹی
زِروکو اُستُمان نا ھو نَظر تیٹی
ئَرا آجوئی نا سنگت اُمید اَکو
شہید آکو وَتَن نا ھو شہید آکو
ئَرا نِجساتہ پوغاکے تِخانو برف
زَمِن گَنڈنگ اَتو ھوتا مریرہ ئرف
ئَرا میخوار اَتا اسلم کِہ ساقی ءِ
ہَمو تا ڈیھ ئتو رشتہ ریحانی ءِ
شَمی پِلکو پُٹی ٹوٹیک پِڑی اَسّر
اَپُڑس آتا کِہ سیخا تیٹی ءُ رُسّر
پِری جاغَنّ ئَتو چیدہ دتر تیٹی
ئَریر ننکے وَدی ٹِنبوں کَسر تیٹی
ئَرا مَشّی کو مِش پَکّی دُروتی آ
ئَرا جَنگّوڑو جَنگی کو کُرودی آ
گُرو سَردو فَتح کِنگو فرید آکو
شہید آکو وَتَن نا ھو شہید آکو
ہَمو پَلٹن کِہ بَندرکی نَا اڑکا ئَس
مُجا سیاٹِی کِہ بامیّآ ءُ تڑکا ئَس
ہَمو پَلٹن کِہ ھونا شال قبلہ ئے
ہَمو پَلٹن ھونا بولان قعبہ ئے
سَری بانو ئَکے مسّور ئَرا شادُر
مَشی ڈِیلیک خَنا مادر نے آ ٹکُّر
غَشُمبّی آ نُساہ بھانڑ ءُ خوجاتے
لٹو اَڑبنگ ھواڑ مِیدانی دوداتے
شِوا کورکی اَٹی امّل ہمو بّرار
پِرا خَنٹی ئَرا نا آجوئی پادار
مُصور ھو ئَرا بُزگر نَہ دید اَکو
شَہید آکو وَتَن نا ھو شہید آکو
مصّور بلوچ