لُمہ – بالی بلوچ

الّمی خوانبو

لُمہ

نوشت: بالی بلوچ

دی بلوچستان پوسٹ

لمہ گپ اس چاسہ؟
وختس کہ دا تہار آ کوٹی پین ہم تہار مریک گڑا نن نا سیاہی کُننگ کن بریک گڑا ہمو وخت ای بھاز بیوس مریوہ۔ ای خن تے تر کیوہ نا زہیری آن کور مریوہ نا مہر آتے یات کیوہ۔
ولے لمہ ہراتم نا خیال بریک ای بھاز بیوس مریوہ خُلیوہ کہ کنا لمہ نا انت مرو ءِ؟
او ہوغنگ ءِ، مخنگ ءِ، پیسکنگ ءِ، سوچنگ ءِ، خاچوک ءِ یا نن نیمہ اسکان تولوک کنا کسر آ ہُننگ ءِ؟
کنا روح لمبہ ہلیک لمہ نا خیال کنے پرغک، کنا اُست ءِ چیرک لڑزہ اس جون ئٹی تمک، کنا جون ٹکر ٹکر مریک۔
ولے لمہ ای نے تنیا دا پاوہ کہ کنا گم مننگ نا چُرت ءِ خلپیس، نی پنپیس نئے کہ تینے مونجا کیس، بیرہ سوگو مریس، پختہ مریس، تینا دے تے خوشی ٹی گدارس، تاکہ ایلو بیگواہ تا لمہ و ایڑک نے خنر اُست کیر، نے آن رنگ ارفر، نا وڑ سوگو مریر و ہمت کیر۔
اگہ کس اس کنا ہرفے نے گڑا مخسا پاس تہ کنا مار ئنا بالاد گم مسنے ولے جند تہ متنے، کنا مار ئنا سوچ و فکر اونا سنگت آتیٹ، اونا راج، اونا راج ئنا باگل و نازینک آتیٹ، لمہ تا لولی تیٹ، شوان تا شوکار تیٹ، شاعر تا عنوان تیٹ، مجلس و دیوان تیٹ، چلتن و بولان ئٹ، راسکوہ و کاہان ئٹ، مکران و رخشان ئٹ، دڑدی آ تران آتیٹ ہر جاگہ غا ساڑی ءِ، کنا مار ئنا کار و کڑد گم اف دن چا کنا مار گم اف۔
او لمہ ہراتم کنا ٹپی و ٹکر آ جون بس گڑا ہوغنگ و کوکار نا جاگہ غا شئیر و باگل ئٹ کنا ٹکر آ جون ءِ بخیر کیس، اوکان گڈ کنے کنا ہمو لمہ نا دوٹی ایتس ہرا کہ نا ہم لمہ ءِ، ہرا ننا بلسمی آ لمہ ڈغار ءِ۔ ای دا ہم خواپرہ کہ ای ہر مجلس نا زینت مریو، لمہ ای خواوہ کہ کنا وطن ٹی سہب اس برے۔ او امر ءُ سہب ئسے نے سماء ءِ لمہ؟
او سہب ئٹی پرک آک رقص کرور، سمُل کنے تینا پِن آ بیرفو، کنا قبر آ دشت ئنا گواڑخ آتے شاغو، گواڑخ آک با ءِ ملور، کنا خلق آن ڈکھ و دڑد آک انداخہ در مُر مرور ہراخس داسہ ننے آن خوشیک مُر مسنو۔ سمی و سیما، ذاکر جان نا لمہ و راشد نا لمہ سڑک آتیا مفرور، او تینا اُرا تیٹ گودی مرور۔
لمہ ای ہمو سہب ئنا گپ کننگ اُٹ ہراٹی ذاکر اس بیگواہ مفک، ہراٹی راسکوہ تباہ مفک، ہراٹی بالاچ اس خیربخش نا جغر ءِ ٹکر کپک اوڑان مُر مفک، ہراٹی شئے اس ڈیہہ ئنا ڈکھ آن ملنگ و ابدال مفک، ہراڑے ڈینڈ و جنجال مفک، ہڑدے بے برم ءُ نہال مفک۔ لمہ او سہب ہمو جنت آن ہم بے کچ زیبا مرو ہرانا گپ ءِ مُلاک کیرہ۔ گڑا لمہ نی پار امر ای گوری مفر ہمو سہب اکن؟
گڈسر ئٹ لمہ اندا پاننگ خواوہ نے کہ کنا تغ ئٹی الم بریس، ای نیکن بھاز زہیری اُٹ، کنا اُست نا خننگ کن ٹکر مسنے۔

اوارُن لمہ!


دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

پروفیسر غمخوار حیات نا انشائیہ غاتا کتاب ‘ملگزار’ شینک مس

بلوچستان نا پنی آ ادیب و شاعر، ایماندار پروفیسر غمخوار حیات نا انشائیہ غاتا ارٹمیکو کتاب ملگزار شینک مس۔ ملگزار...