شہید یاسر زہری، بہادر ءُ جنگجو اس
نوشت: بارگ بلوچ
دی بلوچستان پوسٹ
جہان ٹی انقلابی جہد و تنظیم آتیٹی بھاز بہادر، دلیر ءُ جنگجو ارے ولے بلوچ راج نا تنظیم راجی فوج بی ایل اے ٹی بہادر ءُ سپاہی بھاز ءِ، دنو مثال ننتو بھاز ارے دنکہ شہید امیرالمک یا دلجان زہری دلیر و جنگجو مسونو او دا جہد جنگ ءِ زیبا ءُ رنگ اس تسونو اوفتا کڑدار ننا لوز آتیٹ بیان مفک ولے ای اندا بہادر آ سپاہی تیٹی شہید یاسر زہری عرف ماسٹر سفر خان نا ذکر ءِ کننگ خواوہ۔
شہید یاسر تون کنا اوڑدئی ہموتم مس ہراتم ای پوسکُن مش آ بسوسُٹ، کنے یات ءِ منہ سال مالو ای منہ سنگت پین مش آ بننگ ئسون تو ننے سنگت آک دوئی کریر تو نن منہ گھنٹہ پند خلکُن تو دمدرینگان، شام آ ہموڑے نن آرام کرین تو سہب ئتو نن پدا روان مسون گڑا نن منہ گھنٹہ ٹی وتاخ آ سر مسون اوڑے کنا اوڑدئی شہید ماسٹر سفر خان تو مس، منہ گھنٹہ ماسٹر نا وتاخ آ مسون پدا ننے پین مونی ہنوئی اس، ماسٹر تون نن سفر آ راہی مسون گڑا نن ایلو وتاخ آ سر مسون تو ماسٹر ننتو اسے دے ہموڑے مس گُڑا نن شام دیوان کچاری کرین نن پوسکُن بسوسُن ہر سنگت ننے پوہ کریسہ دیوان کریکہ، شہید سفر خان ہم بھاز ہیت کرے ننے پوہ کرے ولے شہید سفر نا اسے ہیت اس ای اسُل اُستان دپرہ۔ ماسٹر پارے کہ بندغ مش آ بریک او داخسو بھلو فیصلہ اس ارفک تینا اُرا لمہ باوہ عزیز سیالاتے کُلے اِلک بریک گُڑا او داڑے بریک منہ پند خلیک دا مش و ٹیڑ آتے خنیک بے حوصلہ مریک کہ ای دا مشتے آ امہ لگوٹ دڑوٹ یا مش ٹی بھاز خواری ارے ای کننگ کپرہ۔
ولے دُن اف بندغ بریک اولی ٹی واکی سوچِک ولے ای پاوہ نُم اسُل بے حوصلہ مفیرے ننے پارے بندغ اول پند اٹ مریک مش و ٹیڑ آتے آ لگیسہ دم دیک ولے ہراتم او مش ئنا زیہا آ لگا تو دا کُل پند اُستان تہ کائک کہ ای داخسو بھلو پند اس خلکونُٹ باور کبو ننا جند آک اندُن ءُ بھلو پند خلکونن ولے ہراتم وتاخ آ سر مسونُن تو دا کُل پند ءِ است آن درینُن انتیکہ نن رضا کار اُن نن شہید ئسے نا فکر اسیتو روان اُن ننتو پختہ ایمان ارے نن اسلمی چُنا اُن نن بے حوصلہ ءُ بندغ افن نن بلوچ اُن و بلوچ اسُل لغور مفک و کنا نمے آن خواست ءِ اسُل بے حوصلہ مفیرے دا خواری تے آن خُلپیرے۔
اسے دے سنگت منٹ ہنار رینج آ ڈیہہ بلوچستان نا حال حوال ءِ ہلنگ کن تو او پدا بسور اسے سنگت اس پارے کے نن نیوز منٹ خنانُن کہ بی ایل اے ترجمان جیئند بلوچ بیان اس تسونے کہ نوشکی شار ٹی پاکستانی لشکر آ جلہو کرینُن دژمن نا دئے کارندہ مرگ ئنا گواچی کرینن، جھڑپ آتیٹ اِرا سرمچار شہید مسونو۔
گڑا ای ہکّل نا پیج ءِ خواناٹ تو اوڑے ای ہمو شہید مروکا سرمچار آتا فوٹو تے خناٹ ہمو اِرا شہید سرمچار آتیٹی اسٹ شہید سفر خان اس، ای خناٹ ماسٹر پھل نا تصویر ءِ پریشان مسوٹ کہ ماسٹر پھل امر ننے آن جتا مس۔
ماسٹر پھل بھاز ہنینو سنگتس اس ماسٹر پھل نا جنگ ءِ پورا بلوچستان خنا امر بہادری اٹ جنگ تِس فدائی عزیز نا وڑ ٹپی آ جان ئتو جنگ تس۔
اینو ای بھلو پند اس خلیوہ یا بھلو مش ئسے نا زی آ لگیوہ یا دمدرینگیوہ تو ای ماسٹر پھل نا ہندا ہیت ءِ یاد کیوہ کہ ننے بے حوصلہ مروئی اف۔ ماسٹر نا دا ہیت کنکن حوصلہ ءِ پین ودیفک ایلو دا ہیت حقیقت ءِ بندغ بھلو پند اس خلیک آخر او وتاخ آ سر مس نی پاروس کُل دمدری تہ ہِنا۔
شہید یاسر بہادر ءُ جنگجو اس ئس شہید ماسٹر بھاز جاگہ دژمن تو مون پہ مون جنگ تسونے و دژمن ءِ شکست تسونے۔ ماسٹر پھل کوئٹہ ولی تنگی جنگ ئٹی بہادری اٹ سنگت آتا مون ہلمہ کریسہ دژمن تو بہادری اٹ جنگ تیک مالو نوروز نا فرزند اس اندن شہید شاہویز پوسٹ آ ہلمہ کریسہ اول اٹ دژمن تو مون پہ مون مریک دژمن ءِ تینا سبخ اس تیک ہندا وڑ شہید یاسر ہم ولی تنگی نا جنگ اٹ بہادری اٹ اول کائک جنگ تیک۔
شہید یاسر ہر جاہ تینا بہادری ءِ نشان تِس آپریشن گنجل نا جنگ اٹ فدائی عزیز نوشکی اٹ ٹپی جان اتو جنگ تس دژمن فوج نا ہر تنخواہ خور آ فوجی تے حیران کرے۔
ماسٹر پھل ڈکھ خور ءُ سنگتس اس ماسٹر سنگت آتو مہر و مابت اٹ پیش مسکہ ماسٹر پھل جنگی سپائی اس ئس بہادر دلیر ءُ سنگت اس ئس۔ شہید ماسٹر نا کڑدار ای چاوہ کنا لوز آتا محتاج اف ولے کنتو ماسٹر نا اخس یاٹ ئسر ای ہموفتے پیش کنینگ نا کوشست کریٹ ولے شہید ماسٹر نا بھلو کڑدار ئسے شہید کن ای کتاب لکھیو ہم انگہ کم ءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
