دلجان بلوچ نا ایڑ تینا ایلم نا آجوئی اسکان ڈپٹی کمشنر آواران نا دفتر نا مونا کہنگ اسکان بین برانز بنا کننگ نا پڑو کرینے۔
شابیتی حوال تا ردئٹ آواران آن زوراکی ئٹ بیگواہ کننگوک دلجان بلوچ بست و بند و کوالخواہ تا باوری ترفنگ آن پد ہم دائسکان آجو متنے، ہرانا سوب آن دلجان بلوچ نا ایڑ کہنگ اسکان بین برانز نا پڑو کرینے۔
یاتی مرے دلجان بلوچ ءِ 12 جون 2024 آ آواران ئٹ اونا اُرا غان پاکستانی لشکر دزگیر کریسس، اوکان پد او بیگواہ ءِ۔ 18 نومبر آ اونا خاہوت ڈپٹی کمشنر نا دفتر نا مونا برانز بنا کریسس و بنجاہی کسر تے بند کریسس۔
بست و بند نا وعدہ تیا برانز کروک آک ایلو تولوک برانز آتے ایسر کریسہ بیرہ ڈپٹی کمشنر دفتر نا مونا برانز ءِ برجاء تخانو۔
اینو تولوک برانز نا ہند آن پریس کانفرنس کریسہ دلجان بلوچ نا ایڑ کہنگ اسکان بین برانز نا پڑو کریسہ پارے کہ اوفک بست و بند نا دروغ وعدہ تیان تنک مسنو۔
برانزیک خواست کریر کہ دلجان بلوچ ءِ دمدستی مونا ہتنگہ، و تولوک برانز نا وخت آ برانز کروک آتیا خلوک مقدمہ تے پدا ہلنگہ۔
برانز کروک آک گیشتر پاریر کہ اگہ دا وخت آ اوفتے اسہ نسخان اس رسینگا گڑا دانا ذمہ وار ضلعی بست و بند مرو۔