گوادر جلسہ ٹی اوار مروکا تیا ریاستی بےدادی آن پد شار ئٹی چک و تاڑ نا حالیت برجاء ءِ۔

گوادر ئٹی ریاستی لشکر نا کریک ڈاؤن آن پد کیہی بندغ آک راجی مُچی نا سروک سمی دین بلوچ، ڈاکٹر صبیحہ بلوچ و بلوچ یکجہتی کمیٹی نا شاہ جی صبغت اللہ تون اوار بیگواہ ءُ، ہرافتا بارو ئٹ دائسکان اوفتا سنگت و خاہوت آتے ہچو حوال رسینگتنے و نئے درو آن اوفتتون حوال مسنے۔

شار ئٹ انٹرنیٹ و موبائل سروس بند مننگ نا سوب آن بیگواہ غا سروک و باسک آتا بابت ئٹ ہچو پک ءُ حوال رسینگتنے و فوجی کریک ڈاون نا وختا سمی دین بلوچ نا ٹپی مننگ نا بے پک ءُ حوال ہم ارے۔

پاکستانی لشکر و پولیس گوادر نا کل کسر تے بند کرینے۔

وزیر داخلہ بلوچستان ضیاء لانگو درو گوادر ئٹی اس، او میڈیا ءِ پارے کہ بی وائی سی جلسہ نا برخلاف کاروائی آن بیست و پنچ ئنا کچ بندغ دزگیر کننگانو۔

بلوچ یکجہتی کمیٹی نا راہشون ماہ رنگ بلوچ ہم گوادر ئٹی ءِ و اوڑتون ہچو حوال مننگ کتنے ولے درو او تینا اسہ ویڈیو کلہو ئسیٹی گوادر ئٹی حکومتی لشکر نا جلسہ ٹی اوار مروکا تیا بےدادی نا بابت ئٹ ہئت کرسا تیوہ بلوچستان ئٹی برانز و ہڑتال نا کال تسس و پاریسس کہ اودے یا بی وائی سی نا ایلو سروک آتے گڑاس مس تو اونا ذمہ وار ریاست پاکستان مرو۔

بلوچ راجی مچی آ حکومتی کریک ڈاؤن نا برخلاف الس ئنا برانز برجاء ءِ و حکومت نا کنڈ آن کسرک چھارمیکو دے ہم بند۔

مستونگ، گڈانی و تلار نا ہند آ بلوچ راجی مچی ٹی اوار مننگ کن ہنوکا تا تولوک برانز برجاء ءِ، ایلو کنڈ آن حکومت نا نیمہ غان ہڑاند آک برجاء ءُ۔

گڈیکو حوال تے اسکان پاکستانی لشکر تولوک برانز آ شیلنگ، سم کاری آن پد بندغ آتے بکتر بند گاڑی تیٹ لتاڑانے واہم برانزیک دوارہ پدی زر ئٹ مُچ مننگ بناء کرینو۔

دے آن نا برانز جاہ آ مون پہ مون سم کاری آن کیہی بندغ آک ٹپی مسنو۔ انڈس اسپتال پاکستانی لشکر نا کنٹرول ئٹی ءِ۔ ہرا نا سوب آن بیران و ٹپی مروکا تا سہی کچ خبر تمتنے۔ ایلو کنڈ آن پدی زر ئٹ کریک ڈاؤن آن پد دوارہ مخلوق مُچ مننگ بناء کرینے۔

اندن بلوچ یکجہتی کمیٹی نا کنڈ آن اینو سریاب روڈ آ بلوچستان یونیورسٹی نا مونا اسہ برانزی ریلی ئس کشنگا ہراٹی بلوچ الس بھلو کچ ئسیٹی اوار مس۔

یکجہتی کمیٹی نا ترجمان پارے کہ دا وختا تیوہ بلوچستان، حب چوکی آن شال و گوادر اسکان بند ءِ، تیوہ گوارر ئٹ کرفیو ءِ۔ ریاست نا نہاری و دہشتگردی آن بیدس بلوچ الس ہر علاقہ ٹی کسر تیا پیشتمنگ ءِ و دا نظام آن تینا خار ئنا درشانی کننگ ءِ۔

او پارے کہ نن بلوچ الس آن خواست کینہ کہ او برانز و ریلی تیٹ زیات آن زیات اوار مریر و ریاست ءِ کلہو ایتر کہ داسا بلوچ راج پین ظلم و زوراکی سگوف۔

راجی مچی آ ریاستی زوراکی

ٹی بی پی اداریہ

پاکستان نا ذمہ وار تاغت آک کیہی وار بلوچ راجی آزادی کن جہد کروکا جہدکار تتون مذاکرات نا دعوت ترسا اوفتے پُرایمن جہد ئنا پنت ایترہ، ولے بلوچستان ئٹی ہرا گل آک پُرایمنی ئٹ جہد آ باور کرسا او سیاسی مزاحمت نا زریعت ئٹ تینا حق کن توار بڑز کننگ ءُ، ریاست تاغت نا زریعت ئٹ اوفتا سیاست ءِ توننگ نا کوشست کننگ ءِ۔

بلوچ راجی مچی آ ریاستی تاغت نا کارمرز نا بابت ئٹ ہرا خلیس نا درشانی مننگ اس، او راست مس و دود ئنا ردئٹ ریاستی ادارہ غاک زوراکی ئٹ بلوچ راجی مچی ءِ توننگ نا کوشست کریر، بلوچستان نا کُل کسر تیا ہڑاند تخِسہ چار دے آن کسر تے بند کننگا، مخلوق آ لٹ کُٹ و سم کاری برجاء ءِ، راجی مچی ٹی اوار مروکا تیا بلوچستان نا جتا ہند آتیا مون پہ مون سم کاری کننگا، ہرا نا سوب آن کیہی بندغ آک ٹپی و کیہیک شہید مسنو۔

بلوچ یکجہتی کمیٹی و ایلو سیاسی جماعت آتا راہشون و کیہی باسک آتے زوراکی ئٹ بیگواہ و دزگیر کننگانے، ہرا دائسکان بندی ءُ، ہرافتا آجوئی کن تیوہ بلوچستان ئٹ برانز برجاء ءِ۔

بلوچستان ئٹ حکومت و پاکستانی لشکر نا ترجمانک دا ویل ءِ ایسر کننگ نا جاگہ غا تاغت کارمرز کننگ ءِ جواز تننگ ءِ، ہرا نا سوب آن حالیت گیشتر چک و تاڑ نا کنڈ آ ہِننگ ءِ و بلوچ یکجہتی کمیٹی نا خواست آتے پورو کرسا حالیت ءِ جوان کننگ نا جاگہ غا اوفتا راہشون تے کھسفنگ نا کوشست مننگ ءِ۔ ہرا نا سوگو ءُ ثبوت ئس ملٹری انٹیلجنس نا اسہ ٹارگٹ کلر ئسے نا الس ئنا دو آن دزگیر مننگ آن گڈ تینا ڈوہ ئنا مننگ ءِ۔

بلوچ یکجہتی کمیٹی نا راہشونک بلوچ راجی حق کن پُرایمن جہد کننگ ءُ، اوفتا کُشت و خون ئنا کوشست بلوچستان ئٹ لگوک خاخر ئٹی تیل شاغنگ نا بریبر ءِ۔ ریاستی ادارہ غا تا سیاسی جماعت آتیا تاغت کارمرز کننگ بلوچستان نا سیاست ءِ تشدد نا کنڈ آ دننگ ءِ و ذمہ وار تاغت آتا دا گھام تیان بلوچستان ئٹ مُست آن خراب حالیت پین خرابی نا کنڈ آ ہِننگ ءُ، ہرا نا ذمہ واری ریاستی ادارہ غا تیاٹے۔

بلوچ راجی مچی نا دروشم ئٹ ہراڑے گوادر ئٹی اسہ دیئی جلسہ ئس مروئی اس، اودے ریاستی ادارہ غاک تینا مون تاغت کارمرز کرسا اسہ تحریک ئس جوڑ کرینو، ہرا تیوہ بلوچستان ئٹی غم و غصہ نا اسہ چھول ئس ودی کرینے، ہرانا مرغنو زہم ئس الم سخت گیر ریاست مخالف جذبہ غا تا دروشم ئٹ خننگ کن رسینگو۔

بلوچ یکجہتی کمیٹی نا راہشون ڈاکٹر ماہ رنگ بلوچ تینا بیان ئس شنگ کرسا پارینے کہ اسہ ہزار آن زیات بی وائی سی نا مُخ تف تے دزگیر کننگانے۔

او پارے کہ اگہ کنے یا بی وائی سی نا ایلو باسک آتے گڑاس مس تو دا نا ورندی پاکستانی ریاست آن ہلنگ مرو۔”

او پارے کہ 28 جولائی آ گوادر ئٹی بلوچ راجی مچی نا رد ئٹ پرایمن جلسہ کروئی اس، ریاست نا کنڈ آن تاغت کارمرز کرسا دادے توننگ نا کوشست کننگا۔ مُسہ دے ئٹی ننا اسہ ہزار نا کچ سنگت دزگیر کننگانے و اوفتا ہچو حوال اف کہ او اراڑے و امر ءُ۔

او پارے کہ 4 دے آن گوادر ئٹی کرفیو خلنگانے و نیٹ ورک بند ءِ۔ ڈیتھ اسکواڈ نا بندغ آک ہر گلی کوچہ ٹی لس مخلوق ءِ ہلِسہ خلنگ ءُ۔ گوادر تولوک برانز ئٹی ارٹمیکو وار ریک ڈاﺅن کننگانے۔ پاکستانی لشکر پرایمن برانزی تتون مذاکرات نا جاگہ غا اوفتیا بےدادی کرینے۔ ننے ہچ خبر اف کہ اخس بندغ دزگیر کننگانے و اخس ٹپی ءُ۔ برانز نا وختا بیران مروکا تا جونک جتا اسپتال آتیٹ تمانو ننے اوفتے ہُننگ نا ہم موکل اف۔

او پارے کہ ای خواست کیوہ کہ دا بلوچ زنک ایسری نا برخلاف مونا برسا بلوچ یکجہتی کمیٹی تون اوار سلر۔

جلہو کار آتے واپس کننگ کن پاکستانی لشکر نن نیمہ غا برانزی تیا زور شاغا، اینو جلسہ ٹی اوار مروکا تیا سم کاری کننگا و کیہیک ٹپی مسر۔ علاقہ تیوہ بند ءِ۔

شابیتی حوال تا رد ئٹ درو بلوچ راجی مچی نا وختا جلسہ ٹی اوار مروکا بندغ آک اسٹیج نا خڑک آن اِرا مشکوک سلہہ بند بندغ ہلکر ہرافتتون اسہ نائن ایم ایم پسٹل و کیہی گولی اس۔

دی بلوچستان پوسٹ ءِ رسینگوکا ایم آئی کارندہ غا تا ویڈیو ٹی ڈوہدار آک منیرہ کہ اوفتے پاکستان نا ایم آئی ڈاکٹر ماہ رنگ تون اوار بلوچ یکجہتی کمیٹی نا راہشون تے کھسفنگ کن راہی کریسس۔

تولوک برانز ئٹ اوار بندغ آتا دو آن جلہو کار آتا دزگیر مننگ آن گڈ پاکستانی سیکورٹی فورسز آک بلوچ یکجہتی کمیٹی نا سروک آتے دڑکو تسر کہ او جلہو کار آتے اوفتا دوٹی ایتر۔

بلوچ یکجہتی کمیٹی درو پڑو کریسس کہ پاکستانی لشکر و ضلعی انتظامیہ پارٹی لیڈر و خاص وڑ ئٹ ماہ رنگ بلوچ و سمی بلوچ ءِ کھسفنگ نا دڑکو تسوسر و دا بارو ئٹ ڈپٹی کمشنر گوادر نا اسہ آڈیو ئس ہم مونا بسس۔

بلوچستان نا دریابی شار گوادر ئٹی پاکستانی لشکر بلوچ یکجہتی کمیٹی نا برانز آ جلہو کرے، حالت آک خراب مسر۔

حوال تا رد ئٹ دا وختا تولوک برانز نا جاگہ غا پاکستانی لشکر چارمہ کنڈ آن گھیرہ کرسا تاغت نا زور آ ڈاکٹر ماہ رنگ و سمی دین ءِ دزگیر کننگ نا کوشست کننگ ءِ۔

دا وختا تولوک برانز نا جاگہ غا چارمہ کنڈ آن پاکستانی لشکر بھلو کچ ئسیٹی ساڑی ءِ و برانزی تے اربشی کننگ کن آنسو گیس و سم کاری کننگ ءِ۔

بلوچ یکجہتی کمیٹی استو پڑو کریسس کہ بلوچ راجی مُچی ءِ برانز ئٹی مٹ کننگانے و دا برانز گوادر پدی زر ئٹی برجاء مرو۔

اینو سہب ئنا صوبائی وزیر داخلہ ضیاء لانگو ہم گوادر آ سر مسنے، ضیاء لانگو نا گوادر آ سر مننگ تون حالت آک خراب مسنو برانزی تیا پاکستانی لشکر سم کاری کننگ ءِ و آنسو گیس کارمرز کننگ نا حوال ہم ارے۔

‏ڈاکٹر ماہ رنگ “بلوچ راج” ئنا پنا اسہ کلہو ئس شنگ کرسا پارے کہ کُل آن مُست ای نُما دا ہمت، دلیری، نظم و ضبط، حوصلہ و شعور ءِ اُست ئنا کڑمبی ئٹ سلام کیوہ۔ اینو نُم نہ بیرہ ریاست پاکستان بلکہ تیوہ جہان ءِ کلہو تسنُرے کہ ریاستی توفنک و تاغت الس ئنا مونا مِش ئنا ڈھیر اسے۔ اینو نُما دلیری و حوصلہ غاک دا ریاست نا غرور ءِ کھڈ کرینو۔ اینو نن پدی زِر گوادر سمندر نا کنارہ غا اسہ السی سمندر ئس خنانُن، ہرا نا خن تیٹ جوش و جذبہ ارے۔ او دو ہورک و پرایمن ءُ ولے دا ریاست نا ایٹم بمب آن زیات تاغت تخرہ۔ و اینو نن دا الس ئنا خن تیٹ سرسوبی نا جذبہ خننگ اُن و دا جذبہ ظالم، جابر و خونی تا بےسوبی کن بس ءِ۔

‏او پارے کہ بلوچ راجی مچی دا وختا پدی زِر گوادر ئٹی تولوک برانز نا دروشم ئٹ برجاء ءِ و داڑے اسہ کنڈ آن ہزار آ توفنکی آ ریاستی لشکر ءِ و ایلو کنڈ آن دو ہورک پرایمن بلوچ الس ءِ۔ و توفنکی آتا مونا بلوچ الس ئنا حوصلہ و جذبہ کوہ باتیل آن بار بڑز ءِ۔ای دا وختا نُمے اسہ چنکو کلہو ئس تننگ خواہوہ کہ زیات آن زیات کچ ئٹ گوادر آ سر مبو۔ راجی و بندغی حق آک بیرہ اسہ عظیم الشان السی مزاحمتی جہد ئسے آن دوئی مننگ کیرہ۔گوادر ننا سرزمین ءِ، ننے تینا سرزمین نا ہر کنڈ آ راجی مُچی اڈ تننگ نا حق ارے، دا حق ءِ ننے آن جہان نا ہچو تاغت ئس پُھلنگ کپک۔

‏ماہ رنگ بلوچ پارے کہ ننا برانز ننا کُل کاروان تا گوادع اسکان رکھوک سر مننگ و ننا کُل دزگیر مروکا بندغ آتا آجوئی اسکان برجاء مرو۔ داڑکن نن ہر وڑ ئنا تکلیف سگنگ و قربانی تننگ کن تیار اُن۔ ای ہمو کُل بندغ، انجمن، سیاسی تنظیم و جماعت آتیان خواست کیوہ ہرا بلوچ راجی مچی نا اخلاقی مخ تفی ءِ کننگ ءُ کہ او تینا مخ تفی ءِ عملی دروشم ئٹ ثابت کیر۔

بلوچ راجی مُچی نا کاروان تیا سم کاری و بےدادی نا تدینی تا برخلاف بلوچستان نا جتا علاقہ مستونگ، ہنگول، گوادر، نوشکی و شال ئٹی برانز برجاء ءِ و استو ننکان شال ئٹی تولوک برانز کروکا تے دزگیر کننگانے۔

استو ننکان سئے بجہ نا وختا پاکستانی لشکر شال ئٹی تولوک برانز کروکا تیا ارش کرسا بیست بندغ دزگیر کرینے ہرافتیٹی زالبول ہم اوار ءِ۔

بلوچستان یونیورسٹی نا مونا تولوک برانز کروکا تیا پولیس استو ننکان سئے بجہ غا ارش کرسا برانزی تیا بےدادی کننگ آن گڈ دزگیر کرینے۔

پولیس بیست برانزی دزگیر کرینے ہرافتیٹی 12 زالبول ہم اوار ءِ۔ دزگیر مروکا بندغ آتے جتا تھانہ آتیٹ راہی کننگانے۔

خیال ئٹ مرے کہ درو اڈ ہلوک بلوچ راجی مُچی ٹی اوار مننگ کن تیوہ بلوچستان آن بروکا کاروان تے پاکستانی لشکر تورینے و اوفتے گوادر آ ہِننگ کن النگ افس۔

کوئٹہ آن فورسز آتا ہڑاند آتے سر کروکا بنجائی کاروان آ مستونگ ئٹی نواب ہوٹل نا خڑک فورسز آک مون پہ مون سم کاری کریر ہرا نا سوب آن 14 بندغ ٹپی مس ہرافتیان چھار ئنا حالیت بد ءِ۔

اندن ہنگول ئٹی کراچی آن بروکا کاروان ءِ سم کاری و بےدادی تون مون تروئی تما۔

گوادر ئٹی ہم فورسز آتا سم کاری آن اِرا بندغ بیران و ہفت ٹپی مسنو، بھاز ٹپی مروکا تیٹ چار زالبول و اسہ چُناس اوار ءِ۔

بلوچ یکجہتی کمیٹی استو پڑو کریسس کہ بلوچ راجی مُچی ءِ تولوک برانز ئٹ مٹ کننگانے و دا برانز گوادر پدی زر ئٹ برجاء مرو۔

بلوچ یکجہتی کمیٹی نا بیان ئٹی پاننگا کہ نن ریاست ءِ پاش پانہ کہ نُما بے لائخی و آمخی اسہ دے ئنا راجی مچی ءِ داسا تولوک برانز ئٹ مٹ کرینے و دا بلوچ راجی مچی برانز نا دا وختا اِرا خواست ءُ۔ اسٹ دا کہ ہراڑے ہم ننا کاروان تے زور ئٹ توننگانے، کُل کسر تے ملِسہ ننا کاروان تے گوادر آ بننگ نا موکل تننگ مرے۔ ایلو دا کہ ننا ہخس بندغ دزگیر کننگانے اوفتے 48 ساعت ئٹی یلہ کننگ مرے نہ تو دا برانز بے چاننگوک وخت اسکان برجاء مرو، و نن دا خواست آتیا ریاست تون پدی زِر گوادر نا ہند آ مذاکرات کننگ کن تیار اُن۔

ودیک پاننگا کہ اگہ ریاست داسا ہم عٹکل و ہوش ئٹ گھام ہرفنگ نا جاگہ غا پرایمن السی مُچی تون مون تننگ کن تاغت کارمرز کرے تو گوادر تون اوار تیوہ بلوچستان ئٹی حالیت ریاست نا کنٹرول آن پیشتمو۔

ایمنسٹی انٹرنیشنل بلوچ راجی مچی ٹی اوار مننگ کن بروکا تیا تاغت کارمرز کننگ آ فریشانی نا درشانی کرسا پارے کہ فورسز آتا کنڈ آن درو آن بلوچ راجی مُچی ٹی اوار مننگ کن ہنوکا تا برخلاف بےقانودی و بے المی تاغت کارمرز فریشانی نا ہیت اسے۔

ایمنسٹی انٹرنیشنل پارے کہ دا مخلوق نا پرایمن مُچی نا آجوئی نا حق ئنا پاش لتاڑ ءِ۔

او پارے کہ 27 جولائی آ، بلوچستان نا علاقہ مستونگ ئٹی دو ہورک و پرایمن برانزی تیا فرنٹیئر کور نا کنڈ آن سم کاری کننگانے، ہرا نا بھرم ئٹی 14 بندغ ٹپی مسنو، ہرافتیٹ کیہی بندغ آتا حالیت بیم تروک ءِ۔

ایمنسٹی انٹرنیشنل نا پاننگ ءِ کہ گوادر ئٹی ہم انٹرنیٹ تیوہ بند کننگانے ہراڑان علاقہ نا تہہ ئنا و پیشن نا حوال تے اسکان رسینگ ئٹی ہڑاند تون مون تروئی تمنگ ءِ۔

ایمنسٹی انٹرنیشنل پاکستانی نا کوالخواہ تیان خواست کرینے کہ او بلوچستان ئٹی انٹرنیٹ نا بندش ءِ دمدستی مُر کیر، و بندغی حق آتا ڈیہی و جہانی قانود نا رد ئٹ تینا ذمہ داری تے پورو کیر تاکہ مخلوق نا پرایمن برانز نا حق ئٹی آسراتی تننگ مرے، گوادر آ ہنوکا کسر تا ہڑاند آتے مر کرسا مخلوق ءِ ہن و بر نا آجوئی تننگ مرے۔

بلوچستان نا دریابی شار گوادر ئٹی بلوچ راجی مچی کن تیوہ بلوچستان آن کیہی کاروانک ہڑاند آتی سر کرسا گوادر آ سر مسنو، و شار ئٹ شٹرڈاؤن ہڑتال برجاء ءِ۔

انٹرنیٹ بند مننگ نا سوب آن حالیت نا بابت ئٹ شابیتی حوال رسینگتنے، واہم خڑک ئنا علاقہ آتیان ہندی مخلوق حوال تسنے کہ پدی زر ئٹی ہزار آتا کچ ئٹ بندغ آک مُچ مسنو۔

گوادر نا سید ظہور شاہ ہاشمی چوک آ پاکستانی لشکر سم کاعی کرسا اسہ بندغ ئس کھسفینے و کیہیک ٹپی مسنو۔ انڈس اسپتال آن رسینگوکا حوال تا رد ئٹ اسہ جون ئس و ٹپی مروکو بندغ اسپتال آ ہتنگانے۔