سمّی دین بلوچ چاگڑدی حوالکاری ویب سائیٹ آ پوسٹ ئس کرسا پارے کہ درو جناح انٹرنیشنل ایئرپورٹ آ اودے سفر کننگ آن توننگ نا برخلاف سندھ ہائی کورٹ ئٹی آئینی خواست ئس تسنے۔

او تینا کلہو ئٹی پارے کہ اینو سہب ئنا نن سندھ ہائی کورٹ ئٹی پٹیشن تسن کہ درو کنتو کراچی ایئرپورٹ آ انت کننگا و کنا ہن و بر آ ہرا وڑ رکھ خلنگانے، محکمہ داخلہ و بلوچستان حکومت نا کنڈ آن کنا پن ایگزٹ کنٹرول لسٹ (ای سی ایل) ئٹی شاغنگ نا حکم نا بارو ئٹ خواست ئس تسن، ہراڑان کنے سفر کننگ آن توننگا۔

او پارے کہ عدالت ئٹی کنا کیس پگہ سہب ئنا بِننگ مرو۔ او ودیک پارے کہ نن ہر وار ریاستی جبر نا برخلاف قانودی جنگ کرینن ولے داکان بیدس ہم ننتو اسل انصاف متنے ہراڑان ننا تیوہ باور بحال مرے ولے اسہ شاری ئسے نا حیثیت ئٹ نن ساندہ عدالت آتیا ہنانن و دا وار ہم دا بارو ئٹ قانودی جنگ کرون۔

بلوچستان نا ضلع کیچ ئنا تربت یونیورسٹی نا خوانندہ ئس خودکشی کرینے۔

پولیس نا رد ئٹ بشیر احمد نا مار ندیم احمد خود کشی کرینے ہرا تربت یونیورسٹی نا خوانندہ و گیشکور نا ہندی اس ئس۔

پن کروک ورنا استو ننکان چوگان کنڈ تربت ئٹی کوارٹر ئسیٹی خودکشی کرینے۔

جون ءِ ٹیچنگ اسپتال تربت آ رادہ کننگانے۔ واہم خودکشی نا سوب دائسکان سما تمتنے۔

پیپلز یونائیٹڈ ریوولیوشنری موومنٹ استنبول ئٹ اسہ جلہو اسیٹی شیلی پلازہ ئٹ سروس گاڑی تے ٹک کرے و تیوہ غا پلازہ ءِ خاخر تس۔

ترکش میڈیا نا ردئٹ سلہہ بند بندغ آک اسہ سرکاری ماڑی اسیٹی پترینگسہ ہموڑے سلوک گاڑی و ایلو گڑاتے بھس کننگ آن پد نرّانو۔

کرد و ترک چپ دو نا گروپ آتا سیوت ”ایچ بی ڈی ایچ“ نا پارہ غان شینک کروک بیان ئٹ تنظیم نا کنڈ آن دا آپریشن نا ذمہ واری ارفنگا، دا ہیت پاش کننگانے کہ دا کارروائی ریاستی تادی و کرد راہشون عبداللہ اُجلان نا دزگیری نا برخلاف اونا شابیت مزاحمت نا بشخ ئسے۔

دا گروپ پاش ڈول ئٹ دا جلہو ءِ بلوچستان ئٹ متحرک آجوئی دوست سلہہ بند گل بلوچ لبریشن آرمی نا پن آ کریسہ بلوچ لبریشن آرمی نا جندندر ماہل بلوچ عرف زیلان کرد و رضوان بلوچ عرف حمل نا قربانی تے دروت ندر کرینے۔

پیپلز یونائیٹڈ ریوولیوشنری موومنٹ نا دا آپریشن اندنو وخت ئسے آ مونا بس ہراڑے تدوکا توہ بلوچ لبریشن آرمی اسہ بھلو آپریشن ئسے نا ردئٹ بلوچستان ئٹی آپریشن ھیروف ئٹ پاکستانی لشکر و تنصیبات آتے ٹک کریسس۔

پن کروک جلہو ئٹ بشخ ہلوک جندندر رضوان بلوچ و زالبول جندندر ماہل بلوچ عرف زیلان کرد اوار ئسر، بلوچ لبریشن آرمی نا ردئٹ ماہل بلوچ زیلان کرد نا پِن ءِ کرد آجوئی دوست زینپ قناسی آن زیمی مریسہ گچین کریسس۔

یاتی مرے پیپلز یونائیٹڈ ریوولیوشنری موومنٹ کرد و ترکش چپ دو نا گروپ آتا اسہ سیوت ئسے ہراٹی ترکی تون اوار شام و عراق ئٹ متحرک کرد آجوئی دوست پارٹی و ترکی نا چپ دو نا سوشلسٹ تنظیم آک اوار ءُ۔

اینو کوئٹہ ئٹ زوراکی ئٹ بیگواہ جہانزیب بلوچ نا آجو مفننگ نا برخلاف خاہوت نا پارہ غان برانز کننگا۔

برانز ئٹ وائس فار بلوچ مسنگ پرسنز، بی وائی سی، خوانندہ تیتون اوار بلوچ بیگواہ بندغ تا خاہوت آک ہم اوار مسر۔

برانز کروک آک بینرز، پلے کارڈ و بیگواہ بندغ تا عکس آتے ارفسہ شار نا کسر تیا چرینگسہ زوراکی نا بیگواہی تا برخلاف نعرہ خلکر۔

دا وخت آ خاہوت پارے کہ جہانزیب بلوچ ءِ 3 مئی 2016 ئٹ کوئٹہ آن بیگواہ کننگاسس۔ او درزی اس ئس۔ جہانزیب بلوچ تون اوار غٹ بیگواہ تا آجوئی نا خواست کننگا۔

خاہوت پارے کہ زوراکی ئٹ بیگواہ جہانزیب بلوچ کوئٹہ شار ئٹ سریاب نا ہندی ئسے و پیشہ ٹی درزی ئسے۔ او برامی ءِ و اونا مسڑ اس ہم ارے ہرا ودی مننگ تون برانز کننگ ءِ۔

جہانزیب نا لمہ پارے کہ معصومہ اونا مار مار ئنا اسٹ آ چنا ءِ، ہرا وخت جہانزیب ءِ بیگواہ کننگا تو او وخت معصومہ نا سن بیرہ شش توہ ئس۔

گل سیمہ پارے کہ تدوکا ہشت سال آن نہ بیرہ او بلکن اوفتا خاہوت نا غٹ بندغ آک اسہ تادی ئسے نا گواچی ءُ۔

’ننے آن تُغ پُلنگانے، نن ناجوڑ مسونن و داسہ بس دارو تا وسیلہ ئٹ زندہ اُن۔‘

ایسر ئٹ برانز کروک آک پاریر کہ اگہ او ڈوہ اس کرینے گڑا اودے عدالت ئٹ ہتنگ مرے۔

بلوچستان ئٹ ٹرین آتا بند مننگ آن ریلوے کوالخواہ تے ہڑدے 15 لکھ روپئی نا نسخان مننگ ءِ۔

کوئٹہ آن بلوچستان نا تہہ ئتون اوار پاکستان نا ایلو شار تیکن ٹرین سروس 14 دے آن بند ءِ، ٹرین سروس دوزان پول نا تمنگ آن بند ءِ۔

ریلوے کوالخواہ تا ردئٹ سبی ہرنائی کن ٹرین سروس 23 جولائی آن بند ءِ، ہرنائی ٹی ریلوے ٹریک نا جوڑ کننگ یک و نیم توہ ئٹ ہم مننگ کتو، کوئٹہ تفتان ریلوے سیکشن ہم 15 دے آن بند ءِ اندا وڑ چاغی ئٹ وہوکا ریلوے لائن جوڑ کننگتنے۔

کوئٹہ چمن ٹرین سروس ءِ بند مروک 10 دے مسنے، شیلا باغ سرنگ نا جوڑ کننگ ئٹ پین 15 دے لگنگ کیرہ ریلوے کوالخواہ تا ردئٹ ٹرین آتا بند مننگ نا سوب ریلوے ءِ ہڑدے 15 لکھ روپئی نا نسخان مننگ ءِ۔

یاتی مرے اِرا ہفتہ مُست بلوچ لبریشن آرمی آپریشن ہیروف ئٹ مروک جلہو تیٹ بلوچستان نا کیہی بنجاہی ریلوے لائن آتے بولان، مستونگ، ڈیرہ مراد جمالی، نوشکے، و کوئٹہ ٹی ٹک کریسس۔ جلہو تیٹ بولان ئٹ دوزان نا ہند آ بنجاہی پول ءِ ہم بھس کننگا۔

ریلوے کوالخواہ تا پاننگ ئس کہ جلہو آتیان پد چاغی و ایلو ہند آتیا ریلوے لائن ءِ پِرک ہم زیمی کرینو ہرانا بحال مننگ ئٹ وخت لگو۔

پاکستانی لشکر نا دو آن زوراکی ئٹ بیگواہ کننگوک ورنا آجو مس۔

شابیتی حوال تا رد ئٹ برجاء تُو ئنا مسہ ستمبر آ بلوچستان نا ضلع کیچ ئنا علاقہ تربت، شاہی تمپ آن دزگیری آن گڈ بیگواہ کننگوک ورنا آجو مسنے۔

آجو مروکا ورنا تا چاہنداری داد شاہ بلوچ ولد ماسٹر سلیم نا پن ئٹ مسنے ہرادے نن نیمہ غا آجو کننگانے۔

ورنا نا آجوئی ءِ اونا خڑک ئنا بندغ آک پک کرینو۔

بلوچستان نا ضلع کوہلو ٹی مسن کا کالج نا بے فعالی نا برخلاف خوانندہ الائنس کوہلو نا کنڈ آن اسہ دپ درشانی ئس کننگا، ہرا ڈگری کالج کوہلو آن بناء مرسا نیشنل پریس کلب نا مونا ایسر مس۔

ریلی نا وختا خوانندہ غاک مسن تا کالج نا بحالی نا حق ئٹی نعرہ خلکر و تینا خواست آتا حق ئٹی بینرز ہرفیر۔

برانز کروک آتا پاننگ اس کہ ضلع کوہلو ٹی تعلیمی آسراتی تا کاختی بھاز افسوس نا ہیت ئسے۔ 76 سال گدرینگ آن پد ہم داڑے مسڑ خوانندہ غا تیکن اسہ کالج ئس اف۔ ہرا کہ حکومتی بے سہبی نا ثبوت ءِ۔

نیشنل پریس کلب نا مونا دپ درشانی نا ایسر ئٹی خوانندہ تنظیم اسہ پریس کانفرنس ئس کرے۔

دا وختا خوانندہ سروک آک ودیک پاریر کہ مسن تا ہائی اسکول کوہلو ٹی سرکاری استانی تا جاگہ غا میٹرک پاس چُنا تے خوانفنگ نا ذمہ واری تننگانے، ہرا خوانندہ غا تا بروک وخت اکن اسہ بیم تروک گھام اسے۔

اوفتا پاننگ اس کہ خوانندہ غا استاد آتا مفننگ آن کوہلو نا چُنا تا تعلیمی کارکردگی آ منفی زہم تمک، داکان بیدس خوانندہ سروک آک دعویٰ کریر کہ کیہی مسن تا اسکول تیات نرینہ غاک کاریم کننگ ءُ، ہرا نا مسخت کلسٹر بجٹ ءِ کُننگ نا ءِ۔

او دا کاریم تے خوانندہ غا تا تعلیم تون اسہ بھلو ملنڈ ئس پاریر و حکومت آن دمدستی دا بے قانودی بے اخلاقی گھام تا ایسری نا خواست کریر، خوانندہ غاک ساڑی آ ایم پی اے نواب چنگیز خان آن خواست کریر کہ او دا ویل آ دمدستی کڑد آ تینا سر تیر و مسن تا کالج نا جوڑ کننگ و اسکول تیٹ معیاری تعلیمی نظام ءِ یخینی جوڑ کیر تاکہ ضلع کوہلو نا خوانندہ غا تے اوفتا حق رسینگِہ۔

او خبردار کریر کہ اگہ اوفتا خواست آک پورو متور تو او کوئٹہ پریس کلب نا مونا بھلو کچ ئسیٹی برانز کرون، خوانندہ الائنس نا دا ریلی و پریس کانفرنس ضلع کوہلو نا تعلیمی پد ماندگی آ اسہ بھلو سوالیہ نشان اسے و حکومت آن دمدستی و سوبر گھام ئنا خواست کیک۔

قلات ئٹ پاکستانی لشکر نا بنجاہی کیمپ و پاکستانی لشکر آ اسنائپر ئٹ مروکا جلہو تے آجوئی دوست گَل یو بی اے و بی ایل ایف ارفیر۔

شاہ مردان ئٹ مروکا اسنائپر جلہو نا ذمہ واری ءِ بی ایل ایف وختس کہ نرمک تخت ئٹ مروکا جلہو نا ذمہ واری ءِ یو بی اے ارفے۔

بلوچستان لبریشن فرنٹ نا ترجمان میجر گہرام بلوچ میڈیا غا شینک کروک بیان ئٹ پارینے کہ سرمچار آک 4 ستمبر نا دیگر نا 6 بجہ غا قلات نا علاقہ شاہ مردان ئٹ ٹہیفوک قوضہ گیر پاکستانی لشکر ایف سی نا چیک پوسٹ نا کارندہ غاتے ہمو وخت آ اسنائپر ئٹ ٹِک کریر ہراتم اوفک تینا ڈیوٹی تے بدل کننگ ئسر، ہرانا دک ئٹ برسہ اسہ ایف سی کارندہ ئس مرگ ئنا گواچی مس۔

او پارے کہ جلہو آن گڈ سرمچار آک پوسٹ آ راکٹ گولہ خلکر ہرا چیک پوسٹ نا ٹہٹی تمار اراڑان فورسز ءِ پین جانی و مالی نسخان رسینگا۔

ایلو پارہ غان قلات ئٹ پاکستانی لشکر نا بنجاہی کیمپ آ مروکا جلہو نا ذمہ واری ءِ یو بی اے ارفے۔

یونائٹڈ بلوچ آرمی نا ترجمان مزار بلوچ میڈیا غا شینک کروک تینا بیان ئٹ پارینے کہ یو بی اے نا سرمچار آک درو دیگر نا شش بجہ نا وخت آ ضلع قلات نا علاقہ نرمک تخت نا ہند آ ٹہیفوک قوضہ گیر پاکستانی لشکر نا بنجاہی کیمپ آ کہیی BM12 نا گولہ خلکر ہرا پاکستان نا بنجاہی کیمپ ئٹ تمسہ ترند تراک ئٹ ترخار و بنجاہی کیمپ ئٹ خاخر لگا، ہرانا سوب قوضہ گیر پاکستانی لشکر ءِ بھاز جانی و مالی نسخان ارفوئی تما۔

او پارے کہ جلہو آن گڈ پن کروک کیمپ آ کوئٹہ نا پارہ غان شش ہیلی کاپٹر آتا ہلہلی بننگ و تولنگ آن گڈ ولدا کوئٹہ نا پارہ غا ہننگ دا پک کیک کہ ننا سرمچار آتا جلہو نا سوب قوضہ گیر لشکر ءِ بھاز جانی و مالی نسخان ارفوئی تما و دا ہیلی کاپٹر آتا بننگ دا پک کیک کہ قوضہ گیر پاکستانی لشکر تینا کہوک و ٹپی آ کارندہ غاتے ہیلی کاپٹر آتا وسیلہ ئٹ کوئٹہ آ سر کننگو۔

ندر فدائی ماہل عرف زلان کرد کن

شاعر: زراب بلوچ

بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
ارفے او سخت ءُ گام ئس
شعوری ءُ فیصلہ ئس
لرزہ ٹی اینو تما
ظالم ءُ سامراج ئس
ہنینا دا وطن کن
آجوئی کن امن کن
او عشقٹی وطن نا چٹ مسنے خماری
دشمن کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
بیلہ نا شارے اُربو
فکری آ سوچے خلبو
اولی مجیدی وارے
زیبا آ ماہلی ہم ایلم تیتون اوارے
قربان شارلی مس
مابت ئٹ ڈیہہ ئنا او
بولان رقص ئٹی ءِ چلتن کرے سلامی
دشمن نا کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
عشق ئٹ وطن نا وختس
بش کیرہ زلزلہ ئس
دا اسلمی آ رندے
دا اسلمی آ عشقے
ایڑس گروک مسک
دشمن خُلیس پد مس
قربان ایڑ ہنینا برگیڈی آ سپاہی
دشمن نا کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی

بلوچ لبریشن آرمی نا ترجمان جیئند بلوچ میڈیا غا شنگ کروک تینا بیان ئٹی پارینے کہ بی ایل اے نا سرمچار آک تربت، نوشکی، پنجگور و بارکھان ئٹی چار جتاؤ کاروائی ٹی کوزہ گیر پاکستانی لشکر، معدنیات دروکا گاڑی، دشمن نا کمکار و حال حوالی ٹاور ئس ٹک کریر۔

او شابیتی حوال ترسا پارے کہ بلوچ لبریشن آرمی نا سرمچار آک جمعہ نا نن تربت شار ئٹی پاکستانی لشکر نا 168 ونگ ئنا پوسٹ آ ساڑی کارندہ تے چغلی بمب جلہو ئٹ ٹک کریر ہرا نا سوب آن مُسہ دشمن کارندہ ٹھپی مسر۔

ترجمان پارے کہ اسہ پین جلہو ئسیٹی، 3 ستمبر 2024 آ ننکان بلوچ لبریشن آرمی نا سرمچار آک نوشکی ٹی راجی مڈی دروکا گاڑی تیا جلہو ئٹ ٹک کریر۔

او پارے کہ سرمچار آک نوشکی نا علاقہ سر مَل ئٹی معدنیات دروکا اِرا گاڑی آ جلہو کرسا اسٹ ءِ ہُشار و ایلو نا ٹائرز آتیا سم کاری کرسا بھس کریر۔

جیئند بلوچ ودیک پارے کہ اِرا ہفتہ مُست ننا سرمچار آک پنجگور نا علاقہ گچک آن کوزہ گیر پاکستانی لشکر نا مخبر مراد عرف ڈولی ءِ دزگیر کریر۔ مراد عرف ڈولی ولد بہرام سکنہ گچک، لاٹیار تدوکا کیہی سال آن کوزہ گیر پاکستانی لشکر کن مخبری نا کاریم کریکہ۔

“سر و سوج نا وختا پن کروک بدغ تینا ڈوہ ءِ منِسہ پارے کہ او گچک، گوارگو، دراسکی ٹی فوجی زورکی ئٹی کوزہ گیر لشکر نا کمک ئٹ تُد اس، لشکر کشی نا وختا لس بلوچ آتا اُرا تے ہُشنگ کون آ ڈوہ تیٹ ہم تُد مسنے۔”

“مراد عرف ڈولی تینا ڈوہ ءِ منِسہ پارینے کہ او سردار علی حیدر محمد حسنی نا نائب غلام سرور ساجدی نا مُخ تفی ٹی ڈیتھ اسکواڈ نا بشخ مسنے و بلوچ آجوئی دوست آتا کسر تا پیدواری کرینے۔”

ترجمان پارے کہ کارندہ منانے کہ اگست 2020 ٹی پنجگور، گچک و ہیب کھیب ئٹی ہشت دے برجاء سلوکا لشکر کشی ٹی او کوزہ گیر پاکستانی لشکر تون تُد مسنے و دا وختا بی ایل اے نا سرمچار آصف عرف فدا ولد لال جان اور گلاب عرف وحید ولد پھلان نا شہیدی ٹی تُد مسنے۔

جیئند بلوچ پارے کہ مراد عرف ڈولی ءِ راجی غداری نا ڈوہ ئٹی بلوچ راجی عدالت مرگ ئنا تس ہراڑا درو بی ایل اے نا سرمچار آک عمل کریر۔

ترجمان پارے کہ بلوچ لبریشن آرمی نا سرمچار آک اسہ پین کاروائی ئسیٹی 4 ستمبر 2024 آ بارکھان نا علاقہ چھودی ٹی یوفون کمپنی نا موبائل ٹاور ءِ بھس کریر۔