بلوچستان نا دریابی شار گوادر ئٹ حوالکاری نظام بند، غٹ موبائل فون نیٹ ورک آک بند کننگار۔
شابیتی حوال تا ردئٹ گوادر ئٹ موبائل فون نیٹ ورک آک بند، حوالکاری ذرائع تا بند مننگ و موبائل فون نیٹ ورک آتا بند مننگ آن شاریک بھاز سختی تیتون مون تننگ ءُ۔
یاتی مرے گوادر ئٹ بلوچ یکجہتی کمیٹی برجاء سال 28 جولائی آ بلوچ راجی مُچی اڈ تننگ ءِ، ہرادے توننگ کن حکومت نا پارہ غان جتا پابندیک خلنگانو۔
بلوچستان نا بنجاہی شار کوئٹہ غان پاکستانی لشکر اِرا بندغ ءِ دزگیر کریسہ بیگواہ کرینے اندن کراچی ٹی پاکستانی لشکر ننکان چھاپہ خلسہ بلوچ یکجہتی کمیٹی نا باسک ءِ دزگیر کننگ آن پد زوراکی ئٹ بیگواہ کرینے۔
بلوچستان نا بنجاہی شار کوئٹہ غان پاکستانی لشکر نا دو آن بیگواہ مروک بندغ نا چاہنداری نواز رودینی نا مار حافظ اسلم و عامر رودینی نا پِن تیٹ مسنے۔
پن کروک بندغ آتے استو کوئٹہ نا علاقہ سریاب لوڈ کاریز ئٹ اوفتا اُرا غان دزگیر کننگانے ہراڑان پد او بیگواہ ءُ۔
ایلو پارہ غان کراچی ٹی پاکستانی لشکر ننکان چھاپہ خلسہ بلوچ یکجہتی کمیٹی نا باسک ءِ دزگیر کننگ آن پد زوراکی ئٹ بیگواہ کرینے۔
شابیتی حوال تا ردئٹ کراچی نا علاقہ ملیر ئٹ پاکستانی لشکر اُرا غا چھاپہ خلسہ بالاچ پنی ءُ بندغ ئسے دزگیر کریسہ نادرست ہند آ درینے۔ بیگواہ مروک بندغ بی وائی سی نا باسک ئسے ہرا بلوچ راجی مُچی نا تیاری تیٹ مونا ئس۔
خیال ئٹ مرے بلوچستان و کراچی آن اندنو کیہی حوال رسینگانے ہراڑے بلوچ راجی مُچی نا تیاری تیٹ اختہ غا بندغ آتے فورسز آک بھیم نا گواچی کننگسہ ءُ۔
تدوکا دے تیٹ کراچی آن پاکستانی لشکر پنچ بندغ ءِ دزگیر کریسس ہرا دائسکان آجو کننگتنو۔ ارٹمیکو پارہ غان تدوکا دے تیٹ خضدار ئٹ ہم بی وائی سی نا باسک آتے پمفلٹ بشخنگ نا وخت آ فورسز آک پلویڑ کریسہ دزگیر کننگ نا کوشست کریر واہم السی ردعمل آن پد فورسز آک اوفتے دزگیر کننگ ئٹ بے سہب مسر۔
بالاچ نا زوراکی ئٹ بیگواہی نا بابت بی وائی سی نا پاننگ ءِ کہ راجی مچی نا برخلاف ریاستی فورسز آتا بی وائی سی نا برخلاف کریک ڈاؤن برجاء ءِ۔ اوفک پک کرینو کہ بالاچ ءِ اُرا غان دزگیر کننگ آن پد بیگواہ کننگانے۔
بلوچستان نا ضلع کیچ نا علاقہ بلیدہ ئٹ پاکستانی لشکر اینو ارٹمیکو دے ہم لشکر کشی ٹی اختہ ءِ۔
حوال تا ردئٹ فوجی کارندہ غاک جتا ہند آتیا کسر بند کننگ تون اوار علاقہ تیٹ پترینگنگ ءُ اندن گردانک و شورما کور نا ہند آتیا فورسز آتا نفری ساڑی ءُ۔
دا وخت آ پاکستانی لشکر چار بندغ ءِ زوراکی ئٹ بیگواہ کرینے ہرافتا چاہنداری عبداللہ نا مار مراد، شوکت، حمید نا مار حفیظ و اسماعیل نا مار داد جان نا پِن تیٹ مسنے گڈیکو اِرا بندغ نا تعلقداری گردانک آن ءِ۔
اسہ پین بندغ ئسے نا ہم زوراکی ئٹ بیگواہ کننگ نا حوال آک اریر واہم دا بابت شابیتی حوال آک دائسکان بتنو۔
حوال تا ردئٹ استو گیشتگ، گردانک نا ہند آتیا پاکستانی لشکر نا کارندہ غاک اسہ زمباد گاڑی ئسے آ سم کاری کریر۔
ہندی بندغ تا ردئٹ سم کاری نا سوب اِرا بندغ نا جانی نسخان تا حوال آک اریر اندن پن کروک گاڑی ہرا ہند آ سلوک ئس ہموڑے گاڑی ٹی دتر نا نشانک خننگانو۔
پاکستانی لشکر نا ’آپریشن عزم استحکام‘ نا پڑو آن پد تیوہ بلوچستان ئٹ فوجی ہن و بر ئٹ ودکی خننگ ئٹ بسنے تدوکا دے تیٹ مستونگ، نوشکی و قلات ئٹ بھلو کچ ئسے آ جنگی سامان تا سر کننگ ہم خننگ ئٹ بسنے۔
واہم عسکری کوالخواک دا بابت ہچو حوال فراوان کتنو۔ خیال ئٹ مرے ہنوک وخت ئٹ بلوچستان نا جتا علاقہ تیٹ بیدس پڑو کروک لشکر کشیک چرجوئی تون برجاء مسنو۔
بروکا نسل ئنا داسہ بقاء راجی آ مچی
مزاحمت نا کنا چیدہ وفاء راجی آ مچی
ببو داسہ ہوار تمن مرینک نن اسے جاگہ
ننا ہر دڑدئنا دارو شفاء راجی آ مچی
ننے کسفے ہشا پرغا کرے بزگ ننے خلق ئٹ
مڑے نک دشمن ء داکہ صفاء راجی آ مچی
گوا کینہ گوادر نا ملاسی ء اسے رنگٹ
ببو ہر رنگ ئٹی داسہ نما ء راجی آ مچی
تفے باڑے کرے بندی ننا دا حملی شارے
شعورو علم ئنا رژن ئٹ سماء راجی آ مچی
اگہ بسوس ہواری مس کچاری ئس کرون آسی
ننا صحرا سمندر تخت ئنا ء راجی آ مچی
شاعر: آسی بلوچ
کراچی ٹی جنگ، نواب اکبر بگٹی نا ایلم نا مار فہد بگٹی تون اوار پنچ بندغ کسفنگار۔
کراچی ڈفینس نا علاقہ خیابان نشاط ئٹ اِرا ٹولی نا نیام ئٹ سم کاری و جنگ ئنا سوب نواب اکبر خان بگٹی نا ایلم نا مار و بلوچستان اسمبلی نا مسکوہی باسک میر احمد نواز بگٹی نا مار فہد بگٹی تون اوار پنچ بندغ مرگ ئنا گواچی مسر۔
ڈی آئی جی ساؤتھ اسد رضا نا ردئٹ کراچی نا علاقہ ڈفینس خیابان نشاط آ اِرا ٹولی تا جنگ و سم کاری آن فہد بگٹی و نصیب اللہ تون اوار پنچ بندغ کسفنگار۔
سم کاری تیٹ پنچ آن شش بندغ نا ٹپی مننگ نا حوال ارے۔ جون و ٹپی آتے جناح اسپتال آ دننگا، ڈی آئی جی ساؤتھ نا ردئٹ غٹ ٹپی آتا حالیت نازرک ءِ۔
ہڑتوم آ ٹولی تا نیام ئٹ مُست ئنا شرہ ئسے نا سوب جنگ مس۔ تدینی نا بابت وزیر داخلہ سندھ اے آئی جی کراچی آن رپورٹ خواہس۔
مرگ ئنا گواچی مروک پنچ بندغ نا چاہنداری احمد نواز نا مار 50 سالی فہد بگٹی، سور بگٹی نا مار نصیب اللہ، شے میر محسم بگٹی، میر عیسیٰ بگٹی، و علی نا پن تیٹ مسنے، بھاز ٹپی آتیٹ میر علی، حیدر بگٹی و قائم بگٹی اوار ءُ۔
پنجگور ئٹ سرکاری مُخ تف ٹولی و بلوچ سرمچار آتا نیام ئٹ کیہی گھنٹہ آتیسکان جھڑپ، علاقہ ئٹ فورسز آتا نفری و ہیلی کاپٹر آک ہم سلہہ بند ٹولی نا کمک کن سر مسر۔
اینو سہب ئنا پنجگور نا علاقہ کیلکور ئٹ بلوچ آجوئی دوست آک سرکاری مُخ تف سلہہ بند ٹولی یعنی ڈیتھ اسکواڈ آتا کارندہ تیا جلہو کریر ہراڑان پد علاقہ ئٹ جھڑپ آتا بنا مس۔
علاقائی حوالکار آک ٹی بی پی ءِ پاریر کہ جھڑپ آتا بنا سہب ئنا یانزدہ بجہ نا وخت آ مس اندن دا جھڑپ آک بیگہ نا چار اسکان برجاء مسر۔
حوالکار تا ردئٹ سرمچار آک ڈیتھ اسکواڈ کارندہ تے کیہی گھنٹہ آتیسکان گھیرہ ٹی تخار اندن مُسہ ڈیتھ اسکواڈ کارندہ تا مرگ و اِرٹ نا ٹپی مننگ نا حوال آک اریر واہم دا بابت شابیتی حوال آک بریسہ ءُ۔
سرکاری مُخ تف ٹولی نا کمک کن پدان پاکستانی لشکر نا نفری تون اوار گن شپ ہیلی کاپٹر آک سر مسر۔ علاقائی حوالکار تا ردئٹ ہیلی کاپٹر آتیٹ جتا ہند آتیا شیلنگ کننگا۔
جھڑپ آتیٹ آجوئی دوست آتا پارہ غان دائسکان نسخان تا ہچو حوال اف۔ دا جلہو نا ذمہ واری ءِ ہم دائسکان ہچو تنظیم اس ارفتنے۔
تیوہ بلوچستان ئٹ پاکستانی مُخ تف سلہہ بند ٹولیک متحرک ءُ ہرافتے لس بولی ئٹ ڈیتھ اسکواڈ نا پن ئٹ چائنگک۔
پن کروک ٹولی تیا دوبہ خلنگک کہ او نشہ بہا کننگ، داڑیلی و ایلو چاگڑدی گندئی تیٹ اوار ءُ ہرافتیکن اوفتے پاکستانی لشکر و ڈھکوک ادارہ غاک موکل تسنو۔
بلوچ راجی مُچی انتئے المی ءِ؟
نوشت: ڈاکٹر ماہ رنگ بلوچ
مٹ: درناز رحیم
دی بلوچستان پوسٹ
نن “بلوچ” نہ جہان نا اولیکو راج اُن و نئے گڈیکو ہرا تینا راجی ٹیوار نا بنداؤ آ زنک ایسری تون مون تننگ ءِ۔ جہان ئٹ تاغت تخوکا ٹولی، تپہ، ریاست و حکومت آک ہزار آ سال تیان نزور آ چاگڑد، مذہبی و نسلی اقلیت و راج آتا استحصال و لس کُشت و خون ئے کرسا بسنو۔ اینو ہم دا زمین آ بلوچ آتا وڑ کیہی راج آک اریر، ہرا تینا سرزمین آ ظلم و زوراکی تتون مون تننگ ءُ۔ ہمو کُل راج آک ہرا زنک ایسری تون مون تننگ ءُ، اوفتیٹی اسہ گڑاس اسہ ڈول ءِ کہ او جہان نا سیاسی آرڈر ئٹ بھاز نزور ءُ حیثیت ئس تخرہ و فاشسٹ و جابر تاغت آک ہرا زنک ایسری کننگ ءُ، او اسہ تاغت و سوگوْ ءُ حیثیت ئس تخرہ۔ مظلوم آ راج آک تینا زنک ایسری ئے بیرہ اسہ بنداؤ آ توننگ کیرہ، ہرا وخت او تینا نزور حیثیت ئے مٹ کننگ آ امنا کیرہ۔ داکان بیدس نہ اوفتے غیبی تاغت ئس کمک کننگ کیک و نئے جہان نا پین راج، ڈیہہ و قانود یا ادارہ ئس اوفتا رکھ ئے کننگ کیک۔
بھازی آن دا بندغی چاگڑد نا فطرت ءِ کہ داڑے تاغت و نزور اسٹ ایلو تون اِرا انتہا نا تضاد نا دروشم ئٹ وجود تخرہ و انتئے کہ دا تومکا تینتو تضاد ءُ، اندا سوب آن تومکا تیان اسٹ نا ایسر مننگ فطری ءُ ہیت اسے۔ اندا سوب آن ساندہ دا تومکا تضاد آک اسٹ ایلو نا برخلاف اسٹ ایلو تون انتہائی درجہ اسکان ڈک کُنیرہ و دا ڈک کُننگ نا سوب آن تومکا تیان اسٹ تینا فطری توازن ءِ گوئک و ایسر مریک و ایلو اسہ پوسکنو گواچن ئسے نا وڑ بناء آن وجود ئٹ بریک۔
اینو نن بلوچ آک بحیثیت راج اندا تضاد آن گدرینگ اُن۔ نن تینا نزور حیثیت نا سوب آن اسہ بیم تروک زنک ایسری ئسیتون مون تننگ اُن و تینا ڈغار آ بھاز بے شرفی تون مون تننگ اُن۔ اسہ پیر زال ءُ بلوچ لمّہ ئسے نا ورنا غا مار تدوکا پانزدہ سال آن ریاست نا ٹارچر سیل آتیٹ بلوچ مننگ نا ڈوہ ئنا سزا کُننگ ءِ و اونا لمّہ ئے دا ہیت ئنا جوانیکا اندازہ ارے کہ او نہار تا ٹارچر سیل آتیٹ بندغ تون ہمو روشت مریک ہراڑان بندغی نا مون شیف مریک۔ ولدا اُرا ٹی یکہ ہمو لمّہ نا انت حالیت مرو، ہرا دے و نن تینا مار ئنا بارو ئٹ سوچک، دا پانزدہ سال آن کیہی دے و نن او تہارمئی ٹی یکہ گدریفینے، دا دڑد، تکلیف، اذیت تینا جاگہ غا، ہراتم او تینا ورنا غا مار ئنا آجوئی کن کسر تیا پیشتمک، توار ہرفک، برانز کیک تو ریاست پاکستان نا سپاہیک ہمو لمّہ ئے کسر تیا گریسہ دیرہ، اونا کاٹم نا چادر ئے چھکِسہ ڈغار آ خسِرہ و دڑدی آ خڑینک آک ہار آن بار اونا خن تیان وہیرہ۔ دا بیرہ ہمو لمّہ نا آخہ بلکہ بلوچ نا اشتماعی بےشرفی ءِ۔
بھازی آن ننا بدبختی ءِ کہ نن بندغ اُن، محسوس کینہ، احساس تخنہ، اندا سوب آن ہراتم نن تینا اشتماعی بےشرفے ئے خنِنہ تو ننا روح لڑزِک۔ اسہ معصوم ءُ چُناس ہرا نا ودی مننگ تون اونا باوہ ئے زوراکی ئٹ بیگواہ کننگا و اونا ذہن و تصور ئٹ ہم اونا باوہ نا ہچو یات ئس اف، ہمو چُنا اسہ مچی ئسیٹی توفنک ہرفوک وردی والا تے تینا لمّہ غا بےدادی کننگ آ خنک، او معصوم آ چُنا نا بیوسی ننا بندغی وجود ئے چانکر ایتک و بلوچ آتا بیوس مننگ نا سخت احساس ایتک۔
ہراتم بیوس آ بلوچ لمّہ غاک تینا جغر نا ٹکر آتا یات ئٹ عرش ئے لڑزفوکو فریاد کیرہ تو دا اذیت تروکا پاس اسہ زندہ ءُ بندغ ئسے نا ضمیر ئے ٹوہیک۔ ہراتم ہمو ورنا غا مسڑ نا کسہ ئے بنِنہ ہرا نا دشتار ئے دہ سال مُست زوراکی نا بیگواہی تا گواچی کننگاسس و او اینو اسکان تینا زند ئٹی نہ اسہ گھام ئس مونی ہِننگ کیک و نئے گھام ئس پدی، او تینا زند ئنا ہمو ہند آ سلوک ءِ ہرا پاس آ اونا دشتار ئے اونا خن تا مونا رکھوک آتا پن آ خوْنیک بےگواہ کرسا دیر، ہمو مسڑ نا زند نن کن ہمو اشتماعی دڑد ءِ ہرادے نن درشان ہم کننگ کپنہ۔
بلوچستان نا کسہ غاک بیرہ زوراکی نا بیگواہی اسکان افس، بلکہ ای سوچِوہ ننا سرزمین آ نن کن انت رکھوک تخنگانے؟ چاغی آن ہلیس پروم اسکان نا ڈرائیور آک بھاز اذیت، باسُن و بھاز سختی تیٹ بارڈر آ گاڑی چلِفرہ، تاکہ اُراٹی اوفتا چُناک اِرا وخت ئنا عزت نا اِرغ ئس کُننگ کیر، ولے ہمو ڈرائیور آتے باسُن آ سلانسر آ سزا ٹی نت تخنگ آ بیوس کننگک، ٹاک نیمروچ آ پیدل ہِننگ آ بیوس کننگک، ریگستان ئٹی گاڑی تا انجن تیٹ مِش شاغِنگک و کیہی کلومیٹر نا ہمو ریگستان ئٹ بلوچ ڈرائیور آک ملاسی آن کہیرہ، دا اَرا زند ءِ ہرادے نن کننگ اُن؟
ڈی جی خان ئٹ کینسر نا سوب آن ننا مخلوق کہنگ ءِ اندن کہ اسہ دین ئس تالان مرے، ہر ارٹمیکو دے اسہ حوال ئس مونا بریک کہ ڈی جی خان ئٹ فلان بلوچ کینسر آن کذیت کرے۔ روڈ شکست آتیٹ ہر سال ہزار آ بندغ آک کھسفنگرہ، جی ہئو! کھسفنگرہ، دا اسہ قدرتی موت یا تدینی ئس اف بلکہ باقاعدہ کھسفنگ اسے ہراٹی ننا چاگڑد نا خوانندہ غا و لائخ آ بندغ آک کہیرہ۔
کراچی ٹی ہزار آ بلوچ ورناک گینگ وار و منشیات نا پنا کھسفنگانو و لیاری، ملیر تون اوار ایلو بلوچ علاقہ آتیٹ ریاستی فوج ئنا بدمعاشی و غنڈہ گردی ننا بندغ آتا زند آتے ڈکھیائی کرینے۔ گوادر ئٹ شونداری نا پنا ننا مچھی ہلوکا تیان اوفتا سمندر ئے پُھلنگ مسنے، پدی زِر ئے میرین ڈرائیو نا پنا ترسا ہزار آ سال تیان اوڑے رہینگوکا مچھی ہلوکا تیکن اودے ریڈ زون جوڑ کننگانے، بلوچ مچھی ہلوکا تا معاشی لس خون کن ٹرالر مافیا ئے پاش یلہ النگانے، ہرا بحر بلوچ ئٹی دیری زند (آبی حیات) ئنا زنک ایسری ئے کننگ ءُ۔
دا دڑد، تکلیف، سختیک، اذیت و بےشرفی آن پُھر آ زند ئٹی ننے انت کروئی ءِ؟ ننتو اسہ کسر چُپی و درگزر نا ءِ ہراڑکن ننے تینا بندغی، بلوچیت، مارشت کُل ئے ایسر کروئی تمو، تینا ضمیر نا مڑدہ مننگ نا پڑو کروئی تمو، دا بےشرفی نا زند ئے تینائی کروئی تمو۔ ایلو کسر بیدس ہچو نیمون ئسے آن مزاحمت و جہد ئنا کسر ءِ، ظلم و زوراکی نا برخلاف ہیت کننگ نا کسر ءِ، زندہ ضمیر مننگ نا کسر ءِ، تینا راجی بےشرفی نا برخلاف جہد ئنا کسر ءِ، تینا راج کن بش مننگ نا کسر ءِ۔ داسا دا ننے آٹے کہ نن اَرا کسر آ کان۔
بلوچ راجی مچی ننا اشتماعی راجی بابت ئٹ ارٹمکو کسر ءِ۔ بلوچ راجی مچی پاکستان نا انسانیت کش ٹارچر سیل آتیٹ بند ننا ورنا تا آجوئی کن ءِ، بلوچ راجی مچی پاکستانی لشکر نا دو آن خون مروک ننا ہزار آ بندغ آتا انصاف کن اسہ جہد ئسے نا بناء ءِ، بلوچ راجی مچی زامران آن ہلیس ماشکیل اسکان ننا ڈرائیور آتا حق کن ءِ، بلوچ راجی مچی بلوچ مچھی ہلوکا تا معاشی حق کن ءِ، بلوچ راجی مچی نصیر آباد نا بلوچ بزغر تیکن ءِ، بلوچ راجی مُچی کراچی ٹی ہزار آ بلوچ آتا خون ئنا برخلاف اسہ تحریک اسے، بلوچ راجی مچی ڈی جی خان ئٹی ہامدیکا تالان کروکا کینسر نا برخلاف اسہ جنگ اسے، بلوچ راجی مچی دے کہی بلوچستان ئٹی بلوچ ورنا تے پاہو تننگ نا برخلاف اسہ توار اسے، بلوچ راجی مچی بولان نا سرمئی مَش تیان ہلیس مکران دشت ئنا پِڑ اسکان بلوچ آتیکن اسہ امیت اسے۔ بلوچ راجی مچی بلوچ آتا نزور حیثیت ئے وخت ئنا زوراک و ظالم تا برخلاف اسہ تاغت ئسیٹی مٹ کننگ کن اسہ السی جہد ئسے نا بناء ءِ۔ اندا سوب آن بلوچ راجی مچی المی ءِ و داسا ہر بلوچ کن کوہ سلیمان آن ہلیس کرمان اسکان راجی مچی ٹی اوڑدئی اونا فرض جوڑ مسنے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
امریکہ نا سیکریٹ سروس نا سروک کمبرلی چیٹل مسکوہی صدر ڈونلڈ ٹرمپ آ خونی جلہو ءِ توننگ ئٹ بے سہبی نا سوب تینا اوغدہ غان استعفی تس۔
حوال تروک ادارہ ’اے پی‘ نا ردئٹ ملخدو کمبرلی چیٹل تینا اسٹاف نا پِن آ نوشتہ کروک ای میل اسیٹ پارے کہ او مسکوہی صدر ٹرمپ آ مروک جلہو نا تیوہ ذمہ واری ءِ ارفک۔
داڑان مالو دو شمبے آ امریکہ نا ایوان نمائندگان آتا اوور سائٹ کمیٹی نا بننگ نا وخت آ کمبرلی چیٹل ترند سوج آتیتون مون تسوسس۔ سیکریٹ سروس نا سروک مسکوہی صدر ٹرمپ آ مروک جلہو ءِ دہائی تیان سیکریٹ سروس نا بھلا بے سہبی گونداسس۔
مسکوہی صدر و ری پبلکن پارٹی نا صدارتی امیت وار ڈونلڈ ٹرمپ آ 13 جولائی آ ہمو وخت جلہو مس ہراتم او پینسلوینیا ٹی اسہ گچین کاری ریلی اسیٹ تران کننگ ئس۔
ڈونلڈ ٹرمپ آ پینسلوینیا ٹی ری پبلکن پارٹی نا گچین کاری ریلی ٹی سم کاری کروک جلہوکار ءِ سکیورٹی کارندہ غاک ہمو ہند آ مرگ ئنا گواچی کریسر و پدان اونا چاہنداری بیست سالی تھامس میتھیو کروکس نا پن ئٹ مسوسس۔
یاتی مرے کمبرلی چیٹل اگست 2022 آن امریکہ نا سیکریٹ سروس نا ڈائریکٹر نا دروشم ئٹ خذمت سر تننگ ئس۔
بلوچستان نا ضلع گوادر و آواران آن حوال آک ءُ کہ اِرا ورنا خودکشی کرینو۔
شابیتی حوال تا ردئٹ گوادر نا علاقہ پیشکان ئٹ اللہ بخش نا مار فرید پنی ءُ ورنا اس خودکشی کرے، واہم خودکشی نا سوب آک سماء تمتور۔
اندا وخت ئٹ ضلع آواران آن تعلقداری تخوک دادو نا مار امید جان خضدار سنی ٹی خودکشی کرینے۔ ہرانا جون خضدار ٹیچنگ اسپتال آ دننگانے، اندن پن کروک بندغ نا خودکشی نا سوب آک ہم سماء تمنگ کتنو۔
بلوچستان پولیس نفری و برانز کروک آتے جتا کننگ کن سامان خوائفے اندن جتا علاقہ تیٹ ہزار آ پولیس کارندہ تے ڈیوٹی آ تخنگ برجاء ءِ۔
ٹی بی پی ءِ رسینگوک حوال تا ردئٹ پسنی ٹی شش سد، جیونی ٹی دو سد و تربت آن گوادر کسر ءِ تلار نا ہند آ توننگ کن دو سد کارندہ تخسہ ءُ۔
حوالکار تا ردئٹ تلار نا ہند آ فورسز کارندہ تخنگانے اندن ایلو علاقہ تیٹ نفری سر کریسہ ءُ۔
ایلو پارہ غان بلوچستان کانسٹیبلری کوئٹہ ئٹ جتا ہند آتیا اسہ ہزار کارندہ ڈیوٹی آ تخنگ کن خوائفینے۔
بلوچستان کانسٹیبلری دا بابت فورسز کارندہ تے جتا ہند آتیا ڈیوٹی آ تخنگ نا پنت شینک کننگ تون اوار برانزی تے یکہ کننگ کن کاریم ئٹ ہتوک اینٹی روٹ سامان ہم خوائفینے۔
خیال ئٹ مرے بلوچ یکجہتی کمیٹی نا سروکی ٹی 28 جولائی آ گوادر ئٹ اڈ تروک راجی مُچی نا خڑک بننگ تون تیوہ بلوچستان ئٹ مُچی نا تیاری تیٹ اختہ سیاسی باسک آتا برخلاف کارروائی خننگ ئٹ بسنے۔
