بلوچستان نا علاقہ بلیدہ، ریکو ٹی ایف سی نا سم کاری آن زبیدہ پنی ءُ اسہ زالبول اس ٹپی مس۔
زالبول ءِ دو و نت آ سم لگانے۔ زالبول ءِ درمان کن تربت نا سرکاری اسپتال ئٹ داخل کننگا، ڈاکٹر آتا ردئٹ اونا حالیت خُلیس آن پیشن ءِ۔
ٹپی آ زالبول نا خاہوت نا ردئٹ ایف سی رضا ئٹ ٹک کریسہ سم کاری کرے۔
پاکستانی لشکر و ڈھکوک ایجنسیک آپریشن ھیروف نا بلوچ جند ندر آتا خاہوت آتیا زور شاغنگ ءُ کہ او بلوچ لبریشن آرمی نا برخلاف مہم چلفر۔
دی بلوچستان پوسٹ ءِ رسینگوکا حوال تا رد ئٹ آپریشن ھیروف ئٹی اوار جند ندر آتا خاہوت آتیا ریاستی ادارہ آک زور شاغنگ ءُ کہ او بی ایل اے نا برخلاف ویڈیو جوڑ کیر۔
حوال تروکا تا پاننگ ءِ کہ دائسکان خاہوت آک داڑان نمن کننگ ءُ ولے اوفتے تڑی تننگ ءُ کہ اگہ او ویڈیو جوڑ کتور تو اوفتا خاہوت نا ایلو بندغ آتے زوراکی ئٹ بیگواہ کننگو یا کھسفنگو۔
ایلو کنڈ آن باوری ءُ حوال تروک ئسے نا پاننگ ءِ کہ فورسز آک آپریشن ھیروف ئٹی اوار زالبول فدائی ماھل بلوچ نا باوہ و ایلو خاہوت نا مال و مڈی نا معلومداری ہلنگ ءُ۔
بلوچستان نا ضلع کیچ آن نادرست آ سلہہ بند بندغ آک اسہ بندغ ئسے برمتہ کرسا تینتو درینو۔
برمتہ مروکا بندغ نا چاہنداری رسول بخش نا مار سلیم نا پن ئٹ مسنے ہرادے بلیدہ مزن کور آن برمتہ کننگانے۔
حوال تروکا تا پاننگ ءِ کہ پن کروک بندغ نا تعلقداری سرکاری مخ تف ٹولی ڈیتھ اسکواڈ آن ءِ واہم تدینی نا سوب دائسکان سما تمتنے۔
کیچ ئنا علاقہ زامران ئٹی کٹگان زامران پاکستانی لشکری کیمپ ئنا میجر زامران نا ہندی تے خواہفِسہ تڑی تسنے کہ او داکان ہمپر و علاقہ ءِ ہورک کیر انتئے کہ فورسز آتے ہندی بندغ آتیا باور اف کہ او سرمچار آتے فورسز آتیا جلہو ئٹی کمک کیرہ۔
حوال تروکا تا رد ئٹ پن کروک میجر معزز آتے ہیت ئنا وار تتنے و تڑی ترسا مخلوق ءِ علاقہ ءِ خالی کننگ نا پارینے۔
ہندی بندغ آتا پاننگ ءِ کہ میجر زامران نا ہندی تے تینا باوہ پیرئی علاقہ ءِ النگ آ بیوس کننگ ءِ و پاننگ ءِ کہ اگہ زامران ہورک متو تو ای سختی کننگ آ بیوس مروٹ۔
ہندی مخلوق پارینے کہ میجر نا جاگہ غا اگہ آرمی چیف، وزیر اعلی یا پین وزیر اعظم ئس ہم برے نن تینا علاقہ ءِ الوفن و ایسری ساہ اسکان تینا علاقہ ٹی مرون، چائے او ننے زوراکی ئٹ بیگواہ کیر یا دروغ ئنا مونتس ئٹ کھسفر۔
ہندی مخلوق نا پاننگ ءِ کہ پاکستانی لشکر توفنک نا زور آ بے قانودی ہرا وڑ مخلوق ءِ بیگواہ کیک اوفتے کھسفک ننے دا قبول ءِ ولے ظلم ئنا مونا کاٹم ءِ شیف کروفن۔
او بندغ دوست پارٹی و تنظیم آتیان خواست کرینو کہ او دو ہورک آ شاری تے بے اُرا مننگ آن رکھنگ کن توار بڑز کیر۔
بلوچستان حکومت کوئٹہ پریس کلب ءِ نوٹیفیکیشن تسونے کہ حکومت نا موکل آن بیدس ہچو سیاسی جماعت، تنظیم کوئٹہ پریس کلب ئٹی سیمینار، کانفرنس یا برانز کروف۔
دا رد ئٹ سیاسی چاگڑدی تنظیم آک دادے سیاسی و پرامن برانز و درشانی نا آجوئی آ رکھ ئنا بریبر پارینو۔
بلوچستان یونین آف جرنلسٹس این او سی ءِ المی کننگ نا فیصلہ آن نمن کرسا پارینے کہ ضلعی انتظامیہ نا کنڈ آن پریس کلب ئٹی مداخلت قابل مذمت ءِ۔
بلوچستان نا ضلع کیچ آن پاکستانی لشکر اسہ بندغ ئسے دزگیر کریسہ بیگواہ کرینے۔
بیگواہ کننگوک بندغ نا چاہنداری عبدالواحد نا مار جاوید نا پن ئٹ مسنے۔ ہرا تربت نا علاقہ گوکدان نا ہندی ئسے۔
بیگواہ کننگوک بندغ نا لمہ نا پاننگ ءِ کہ کنا مار، ہرا مزور ئسے، تینا کاریم ئٹ سیٹلائٹ ٹاؤن ہناسس ہراکان اودے دزگیر کننگانے و اوکان پد او بیگواہ ءِ۔
لمہ نا پاننگ ءِ کہ کنا مار ءِ آجو کننگہ اگہ اوڑا اسہ دوبہ اس ارے گڑا اودے عدالت ئٹ ہتنگہ دا وڑ اودے بیگواہ کریسہ ننے اذیت تننگ مف۔
حوال تا رد ئٹ گوادر آن پاکستانی لشکر اسہ ورنا ئسے دزگیر کننگ آن گڈ بیگواہ کرینے۔ اندن کراچی نا لی مارکیٹ آن ڈھکوک ادارہ و پولیس نا دو آن اِرا ورنا دزگیری آن گڈ بیگواہ کننگانو۔
شابیتی حوال تا رد ئٹ بلوچستان نا دریابی شار گوادر آن پاکستانی لشکر و کاؤنٹر ٹیررزم ڈپارٹمنٹ دکان آن اسہ ورنا ئسے دزگیر کننگ آن گڈ بیگواہ کرینے۔
بلوچ یکجہتی کمیٹی خاران نا بیان نا رد ئٹ خاران نا ہندی نصیب اللہ ولد حاجی نذیر احمد کلی چبی آن تعلقداری تخک ہرادے گوادر آن پاکستانی لشکر گوادر گرائمر اسکول نا مونا پرچون نا دکان آن دزگیر کرسا بیگواہ کرینے۔
بی وائی سی خاران نا رد ئٹ نصیب اللہ اسہ مسکین ءُ دکاندار ئسے و اودے تدوکا دے تیٹ راچی مچی نا وختا دکان ءِ ملنگ نا سوب آن بیگواہ کننگانے۔
تنظیم و خاہوت تا پاننگ ءِ کہ نصیب اللہ بلوچ ءِ دمدستی آجو کننگ مرے نہ تو سخت برانز کننگ نا پڑو کرون۔
ایلو کنڈ آن کراچی نا ہند آٹھ چوک آن درو شام ئنا نُہہ بجہ نا وختا کراچی پولیس و پاکستانی ڈھکوک ادارہ غاتا کارندہ آک اِرا ورنا ئے زوراکی ئٹ بیگواہ کرینو۔
بیگواہ کننگوک ورنا تا چاہنداری بلوچ آباد مند کیچ ئنا ہندی خالد نا مار حسنین و دے کہی بلوچستان پیشین نا ہندی اسلم نا مار رحمان نا پن ئٹ مسنے۔
خاہوت آتا پاننگ ءِ کہ نن دزگیر مروک ورنا تا بارث ئٹ معلومداری کن ہندی تھانہ غا ہنان ولے پولیس نا پاننگ ءِ کہ ورنا تے ڈھکوک ادارہ آک دروک مرور۔
خاہوت آتا پاننگ ءِ کہ تومکا تا فون نمبر آک جھٹ ئس یلہ مریرہ ولدا بند مریرہ۔
بیست و پنچ اگست نا نن بلوچ لبریشن آرمی جیونی ٹی گبد نا ہند آ کسر آ کوزہ کریسہ آپریشن ھیروف نا بناء ءِ کرے، ہراڑان پد چین پاکستان اقتصادی راہداری نا مین کسر ءِ ہیرونک نا ہند آ، کراچی آن کوئٹہ آر سی ڈی ہائی وے ءِ قلات و بلوچستان ءِ پنجاب تون گنڈوک کسر ءِ راڑا شم نا ہند آ کوزہ کریسہ دوانزدہ گھنٹہ اسکان کسر تیا ناکہ بندی برجاء تخنگا، دا وخت آ بلوچستان ءِ سندھ، پنجاب و ایران تون گنڈوک اہم کسرک بی ایل اے نا کنٹرول ئٹ مسر، ریلوے پول آک بھس کننگار، عسکری چوکیک ٹک کننگار و لسبیلہ ٹی فوجی کیمپ آ مجید بریگیڈ نا جند ندر آک جلہو کریسہ بیست گھنٹہ اسکان فوجی کیمپ ئٹ جنگ برجاء تخار، ہراڑان پاکستانی لشکر بھلو نسخان ئسے نا گواچی مس۔
برجاء بلوچ آجوئی نا جہد ئنا دیہاڑ آن واخب جاچ ہلوک آتا ردئٹ بلوچستان ئٹ اِرا دہائی آن زیات برجاء آجوئی نا تحریک ئٹ آپریشن ھیروف سلہہ بند گل بلوچ لبریشن آرمی نا کل آتیان بھلا آپریشن ءِ، ہراٹی مکران آن کوہ سلیمان اسکان اہم کسرک دوانزدہ گھنٹہ اسکان بی ایل اے مجید بریگیڈ، ایس ٹی او ایس و فتح اسکواڈ نا کوزہ ٹی مسر۔
دا منہ سال ئٹ بلوچ لبریشن آرمی نا چین و پاکستان نا زرگزرانی مفاد آتیا جلہو و آپریشن ھیروف آن پاش ءِ کہ بی ایل اے جدت دوستی نا پارہ غا روان ءِ و تینا حکمت عملی تیٹ بدلی ہتیسہ روایتی گوریلا جنگ ئتون اوار اوار اہم عسکری و زرگزرانی ہدف آتے ٹک کننگ کن ڈٹ بند کمپلیکس جلہو کننگ نا لائخی تخک۔
بلوچ لبریشن آرمی تینا بیان ئٹ پارینے کہ آپریشن ھیروف بلوچ ڈغار آ دوارہ کنٹرول دوئی کننگ نا تیاری تا اولیکو بشخ ئس، ہراڑان نتیجہ پیشتمنگ کیک کہ بروک وخت ئٹ بی ایل اے آپریشن ھیروف آن ہم بھلو عسکری ہدف دوئی کننگ نا ارادہ تخک۔
عسکری نسخان آتیان چپ بلوچ لبریشن آرمی نا آپریشن ھیروف بلوچستان نا آجوئی نا جنگ ئٹ کمپلیکس جلہو تیٹ ودکی نا سوب جوڑ مرو۔ بلوچ سلہہ بند گل آک تینا لائخی و طاغت ئٹ ودکی کننگ ءُ و دن انگا بھلا جلہو تے توننگ ئٹ پاکستانی لشکر نا بے سہبی بروک وخت ئٹ آپریشن ھیروف آن ہم بھلن جلہو تا کسر ءِ مَلو، ہراڑان بلوچستان نا آجوئی نا جنگ ئنا ترندی ٹی ودکی خننگ کن رسینگو۔
بلیدہ گردانک ئٹ سلہہ بند بندغ آک اسہ بندغ ئسے برمتہ کننگ آن گڈ کھسفیر۔
ہندی حوال تا رد ئٹ 26 اگست نا نن 9 بجہ نا وخت آ سلہہ بند بندغ آک بلیدہ گردانک ئٹ دکان ئٹ پترینگسہ حکیم ولد علی مراد ءِ توفک نا زور آ برمتہ کرسہ تینتون اوار دریر وختس کہ بیست منٹ آن گڈ سم تیان بروے اونا جون خننگا۔
ہندی بندغ آک ہمو ہند آ جون ئنا احوال ءِ ہندی بست و بند ءِ تسر وختس کہ کھسفنگوک نا جون ءِ اسپتال آ سر کرینو۔
ہندی بندغ آتا رد ئٹ حکیم بلوچ اسہ خوانندہ و کاروباری ءُ بندغ ئس اس ہرا تدوکا دہ سال آن دکانداری ئٹ آختہ ئس، پاکستانی لشکر نا سروکی ٹی چلوکا ہندی ڈیتھ اسکواڈ نا کارندہ غاک اودے برمتہ غان گڈ کھسفیر۔
ہندی بندغ آک خواست کرینو کہ کالخواہ حکیم بلوچ نا کھسفوکا تان حساب ہلسہ خاہوت ءِ انصاف تے و علاقہ ٹی گندہی تالان کروک بندغ آتا برخلاف کاروائی کہ۔
بلوچستان نا جتاء علاقہ غاتیان چار بندغ نا جونک خننگار۔
حوال آتا رد ئٹ بلوچستان نا بنجاہی شار کوئٹہ نا علاقہ دشت سپیزنڈ ئٹ بھٹے نا خڑک آن چار بندغ نا جونک خننگانو۔ ہرافتان اسٹ نا چاہنداری 22 سالی آ جواد علی ولد محمد گل استا محمد نا ہندی ئسے نا پن ئٹ مسنے۔
کوئٹہ اسپتال حوالی نا رد ئٹ پن کروک ورنا ءِ سم کاری کرسہ کھسفینو۔
ایلو پارہ غان بلوچستان نا ضلع نصیر آباد نا علاقہ مانجھو شوری آن ہندی بست و بند ءِ سم تیٹ کھسفوک مسہ بندغ نا جون رسینگانے ہرافتے چاہنداری کن اسپتال آ سر کرینو۔
نصیر آباد آن رسینگوکا جون آتا چاہنداری نا عمل برجاء ءِ وختس کہ تدینی تا سوب آتا باروٹ شابیت حوال مستی برو۔
