چینی وزیر خارجہ درو بلوچستان ئٹ مروکا جلہو آتا مذمت ءِ کرینے۔
حوال آتا رد ئٹ چین درو بلوچستان نا جتاء جتاء ضلع غاتیٹ مروکا جلہو آتا مذمت ءِ کرسہ پارینے کہ پاکستان نا پھبی کمک کرون۔
چینی وزیر خارجہ نا پارہ غان شینک کروک بیان ئٹ چین بلوچستان ئٹ سلہہ بند گًل آتا برخلاف کاروائی تیٹ پاکستان نا مخ تفی نا پڑو ءِ کرینے۔
یاتی مرے کہ اینو پاکستانی وزیر اعظم بنجاہی وزیر آتا دیوان ئسے نا وخت آ بلوچستان ئٹ آپریشن نا پڑو ءِ کریسس وختس کہ پاکستانی حکومت نا بڑزکو وفد ئس ہم دا وخت آ کوئٹہ ٹی ساڑی ءِ۔
ضلع کیچ نا علاقہ تربت ئٹ سم کاری نا اسہ تدینی اسیٹی زوراکی نا بیگواہی آن پد آجو مروک ورنا ٹپی مس۔
پولیس نا ردئٹ آپسر مہرے ہوٹل آن خڑک درو نادرست سلہہ بند بندغ آک سم کاری کریسہ اسہ بندغ ئسے بھاز ٹپی کریر۔
پولیس نا ردئٹ ٹپی مروک ورنا نا چاہنداری وشدل نا مار عابد ہند آپسر نا پن ئٹ مسنے ہرا پنکچر نا دکان آ کاریم کریکہ۔
یاتی مرے پن کروک ورنا ءِ 2023 ئٹ پاکستانی لشکر زوراکی ئٹ بیگواہ کریسس ہرا دئے توہ آن آجو مریسہ تینا اُرا ءِ سر مسوسس۔ ہندی بندغ تا ردئٹ جلہوکار آتا تعلق حکومتی مُخ تف ٹولی آن پاننگک۔
یاتی مرے تدوکا اِرا توہ ئٹ کیچ آن دا مسٹمیکو تدینی ءِ کہ زوراکی نا بیگواہی آن پد آجو مروک بندغ یا چاگڑدی بابت کاریم کروک ورنا تے ٹارگٹ کلنگ نا گواچی کننگسہ ءُ۔
جیونی ٹی کوسٹل ہائی وے آ سلہہ بند بندغ آتا ناکہ بندی، پولیس چیک پوسٹ آ جلہو کریسہ کارندہ دزگیر کننگ تون اوار سلہہ تے دوئی مسر، اندن مڈی دروک گاڑی تے بھن تسر۔
بلوچستان نا ضلع گوادر نا علاقہ جیونی ٹی سلہہ بند بندغ آتا بھلو کچ اس کوسٹل ہائی وے گبد کراس نا ہند آ ناکہ بندی کریسہ گاڑی تے پَٹنگ ءُ۔
حوال تا ردئٹ سلہہ بند بندغ آک پولیس چیک پوسٹ آ جلہو کریسہ ہموڑے ساڑی غٹ کارندہ تے دزگیر کریر و اوفتا سلہہ و گولہ بارود آتے ہم کوزہ کرینو۔
ہندی حوالکار تا ردئٹ ناکہ بندی نا وخت آ پن کروک بندغ آک مڈی دروک کم آن کم چار گاڑی ہم ہُشانو۔
حوالکار تا ردئٹ اسہ گھنٹہ ئسے آن زیات کوسٹل ہائی وے آ ناکہ بندی برجاء ءِ۔ کوالخواک دائسکان دا بابت ہچو ہیت اس مونا ہتنو۔
برجاء سال بلوچ لبریشن آرمی نا سرمچار آک نوشکے ٹی اندا ڈول نا اسہ کارروائی اسیٹ شار آن خڑک بنجاہی کسر آ ناکہ بندی کریسہ بس آتیٹ سفر کروک نو بندغ ءِ چاہنداری آن پد مرگ ئنا گواچی کریسر۔
بی ایل اے نا ترجمان جیئند بلوچ نا پاننگ ئس کہ پن کروک بندغ آک پاکستانی ڈھکوک ادارہ تا کارندہ ئسر ہرافتے ڈھکوک حوال آتیا کارروائی اسیٹ مرگ ئنا گواچی کننگا۔
اسہ پین کارروائی اسیٹ بی ایل اے نا سرمچار آک برجاء سال کوئٹہ آن خڑک شعبان ئٹ دئے بندغ دزگیر کریسر۔
ہنوک وخت ئٹ کوسٹل ہائی وے آ بلوچ سلہہ بند گل آتا سیوت براس اِرا جتا کارروائی تیٹ پاکستانی لشکر، تیل و گیس کمپنی تا کارندہ تیتون اوار پاکستان نیوی نا کارندہ تے ترند حالیت نا جلہو تیٹ ٹک کرینے۔
کوسٹل ہائی وے آ اینو نا مروک دا کارروائی نا ذمہ واری ءِ دائسکان کس ارفتنے۔
بلوچستان نا ضلع نوشکی ٹی سم کاری نا تدینی ٹی اسہ بے ہندی بندغ اس مرگ ئنا گواچی مس اندن پن کروک جلہو نا ذمہ واری ءِ بی ایل اے ارفے۔
حوال تا ردئٹ ضلع نوشکی نا بازار مل اڈہ نا ہند آ سلہہ بند بندغ آک سم کاری کریسہ اسہ بندغ ئسے مرگ ئنا گواچی کرینو۔
حوال تروکا تا پاننگ ءِ کہ مرگ ئنا گواچی مروک بندغ نا تعلقداری سندھ آن ءِ ہرا نوشکی ٹی ٹوپ بہا کننگ نا کاریم کریکہ۔
پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ ننا سرمچار آک اینو نوشکی ٹی کوزہ گیر پاکستانی لشکر نا اسہ کمکار ئسے سم کاری کریسہ مرگ ئنا گواچی کریر۔
ترجمان پارے کہ سرمچار آک نوشکی شار ئٹ مَل اسٹاپ نا ہند آ سم کاری کریسہ پاکستانی لشکر نا کمکار عبداللہ بابر نا مار عبدالوحید ہند سندھ ءِ مرگ ئنا گواچی کریر۔
او پارے کہ بی ایل اے نا سرمچار آک پن کروک بندغ آ بھلو وخت ئسے آن نظر تخوک مسنو ہرا دروشم بدل کریسہ نوشکی شار ئٹ مخبری نا کاریم سر تننگ ئس۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر پاکستانی لشکر و اوڑتون اوار مروک آتیا ننا جلہوک برجاء مرور۔
بلوچ یکجہتی کمیٹی نا سروک ڈاکٹر ماہ رنگ بلوچ جمعہ نا دے کوئٹہ ئٹ ہیومن رائٹس کمیشن پاکستان نا سروکی ٹی مروک مجلس ئٹ تران کریسہ پارے کہ سیاسی پڑ اسہ پارٹی، یونین نا آخہ بلکن تیوہ راج ئنا مریک، دانا پاش مثیل بلوچ راجی تحریک ءِ، ہراتم نیپ جوڑ مسوسس یا اوکان مالو دا پیشن گوئی کننگاسس کہ ہرا حکومتی ڈول ئٹ دا ریاست کاریم کننگ ءِ دا ریاست چلنگ کپرو۔ او وخت اوفک بیرہ بلوچ نا ہیت ءِ کتوسر بلکن دا ریاست ئٹ رہینگوک ہر بندغ نا ہیت ءِ کریسر۔ اینو دا ہیت پاش مسنے کہ بلوچ او وخت ہم راست ئس و داسہ ہم راست ءِ۔ دا ریاست ہرا غاو و تادی تے بلوچستان، سندھ یا خیبر پختونخواہ ٹی کرے او اینو پنجاب اسکان سر مسنو۔
او پارے کہ نن بلوچستان تون اوار ہر مظلوم تحریک تون ہمکوپئی کینہ نن دا فرخ کپنہ کہ دا کنا تحریک ءِ، دا ہزارہ، پشتون تحریک یا مزدور تحریک ءِ نن کل ءِ اوار مریسہ جہد کروئی تمو داڑے ہر مظلوم راج ئتون اوار لس بندغ نا بنداوی حق آک پُلنگانو۔
ماہ رنگ بلوچ پارے کہ ریاست آک دا خاطر جوڑ کننگانو کہ او شاری تے رکھ تننگ کیر، اگہ ریاست آتون مخلوق نا تعلق ایسر کننگہ گڑا ہچ اس رکھنگوف، الس ہی ریاست ءِ برجاء تخک طاغت الس ئنا مریک۔ ویل دادے کہ ہرا الس اینو چپ کرفنگانے اودے دا سماء اف کہ طاغت اودے۔
او پارے کہ اینو بلوچستان ئٹ ہر تپہ تادی نا گواچی ءِ، چاہے او راجی تحریک تون تفوک مرے یا نہ اودے چپ کرفنگسہ ءُ ولے دا ہیت ءِ کس کپرو انتئے کہ کل ریاست نا کنٹرول ئٹی ءُ دا میڈیا ہم ریاست نا کنٹرول ئٹی ءِ۔
”السی تحریک آتیکن المی ءِ کہ او صلہ کپس، بلوچ یکجہتی کمیٹی دا ریاست کن اندا خاطر کاٹم نا خڷ جوڑ مسنے کہ نن تینا سیاسی اصول آتیا ہچو سودا بازی اس کتنون و مُستی ہم کپرون۔“
ماہ رنگ بلوچ پارے کہ نن ریاست نا ہر تادی ءِ جہان نا مونا تخانن۔ ریاستی تادی اسہ برانز ئسے تحریک اس جوڑ کرینے۔ بلوچستان ءِ اسہ فوجی قانود ئسے نا ردئٹ دریسہ ءُ، ہرا وڑ بلوچستان ءِ بند کننگا ہرا وڑ گوادر شار ءِ 27 جولائی آن دئے اگست اسکان پلویڑ کریسہ سیل کننگا، گوادر ئٹ اسہ زالبول اس ہوغسہ ننے آ بس کہ فورسز آک اوفتا اُرا ٹی پترینگسہ اونا مسڑ نا برام نا زیور، پیسہ و فریج اسکان ارفینو درینو۔ ننے بلوچ، پشتون، و ہزارہ ہر مظلوم راج ئنا نیام ئٹ گیشتر ہمکوپئی بکار ءِ۔ بلوچ یکجہتی کمیٹی جمہوری سیاست و آئینی جہد آ باور کیک ولے ریاست آن دا سوج ءِ کہ او اراتم جمہوری جوڑ مرو یا او ننے پائے کہ راہبند نا ہرا شق ءِ ہراڑا بلوچستان ئٹ عملدرآمد مننگ ءِ۔
او پارے کہ گوادر ئٹ ایف سی بیدادی نا کسر ءِ دوئی کرے، بندغ آتے خلک، ایف سی آ ایف آئی آر ہم کننگتو اوفتا کوشست ءِ کہ نن بیدادی نا کسر ءِ دوئی کین اینو ہم ننا سنگت و دوستخواہ تے جتا ڈول تیٹ تنک کریسہ ءُ۔ نن کل ءِ جہد کروئی تمو اینو بلوچستان ئٹ مزاحمت مننگ ءِ و دادے الس لیڈ کننگ ءِ۔ طاغت ریاست تون آخہ الس تون مریک۔
بلوچستان نا ضلع نوشکی و کیچ ئنا بنجائی شار تربت ئٹ سم کاری نا اِرا تدینی ٹی اسہ بے ہندی بندغ اس مرگ ئنا گواچی و اسٹ ٹپی مس۔
حوال تا رد ئٹ ضلع نوشکی نا بازار بل اڈہ نا ہند آ سلاہ بند بندغ آک سم کاری کرسا اسہ بندغ ئسے کھسفینو۔
حوال تروکا تا پاننگ ءِ کہ کہوکا بندغ نا تعلقداری سندھ آن ءِ ہرا نوشکی ٹی ٹوپ بہا کننگ نا کاریم کریکہ۔ واہم تدینی نا سوب دائسکان سما تمتنے۔
ایلو کنڈ آن تربت ئٹی سلاہ بند بندغ آک سم کاری کرسا اسہ بندغ ئسے ٹپی کرینو۔
شابیتی حوال تا رد ئٹ تربت نا علاقہ آپسر مہرے ہوٹل نا خڑک آ سلاہ بند بندغ آک سم کاری کرسا اسہ بندغ ئسے ٹپی کریر ہرا نا چاہنداری وشدل نا مار عابد سکنہ آپسر نا پن ئٹ مسنے۔
پولیس نا رد ئٹ پن کروک بندغ پنکچر نا دکان آ کاریم کریکہ۔ واہم تدینی نا سوب دائسکان سما تمتنے۔
بلوچستان نا جتا ضلع تیٹ مروک تدینی تیٹ پنچ بندغ کسکر و اسہ بندغ اس ٹپی مس۔
شابیتی حوال تا ردئٹ بلوچستان نا ضلع خضدار نا تحصیل وڈھ ئٹ باران جھل ئٹ غسل کریسہ کوئٹہ نا ہندی وقار احمد پنی ءُ بندغ اس ٹبیسہ کسک، کمکار کوالخواک جون ءِ دوئی مریسہ اسپتال آ دریر ہراڑے المی کارروائی آن پد جون خاہوت ءِ تننگا۔
اسہ پین تدینی اسیٹ جھل مگسی نا علاقہ بستی کمال شاہ ئٹ 4 سالی عیان علی اُرا غان پیشن سلوک نوکاپی دیر ئٹ ٹبیسہ کسک۔ کمکار و ہندی بندغ آک چنا نا جون ءِ کشیسہ اسپتال آ دریر۔
ایڑے شیرانی نا علاقہ کومانی خواہ آن خڑک اسہ جون اس خننگانے ہرانا کاٹم تڑوک مسنے۔ پن کروک بندغ نا چاہنداری پانزدہ سالی عیسیٰ خان نا پِن ئٹ مسنے گیشتر کارروائی ہندی بست و بند کننگ ءِ۔
اسہ پین تدینی اسیٹ بلوچستان نا علاقہ دکی ہندی کولا کانڑ ئٹ مِش ئنا ڈھیر اس تمنگ آن اوغانستان نا ہندی عبدالکریم نا مار سید محمد پنی ءُ کانکن اس کسک، کمکار حوالکار تا ردئٹ جون ءِ المی کارروائی آن پد اونا باوہ پیرئی علاقہ اوغانستان آ رادہ کننگانے۔
اندا وخت ئٹ بلوچستان نا ضلع خضدار نا تحصیل زہری نا زمینی جیڑہ ئسے آ موسیانی قبیلہ نا اِرا ٹک آتیٹ جنگ و سم کاری آن محب اللہ ولد سردار زادہ منیر موسیانی پنی ءُ بندغ اس کسکنے اندن تدینی ٹی اسہ پین بندغ اس ٹپی مسنے۔
ایران دے کہی بلوچستان آن تعلقداری تخوک بلوچ نیاڑی ئسے اسہ سال نا سزا بنفے۔
نیاڑی نا چاہنداری الہام ولد محمد نا پن ئٹ مسنے ہرا دے کہی بلوچستان نا علاقہ ایرانشہر نا ہندی ئسے۔
پن کروک زالبول ءِ فورسز دزگیر کریسس ہرادے اسہ توہ ئس بندی کننگ آن گڈ ضمانت آ یلہ کننگاسس واہم داسا نیاڑی ءِ زاہدان نا انقلاب نوری عدالت اسہ سال ئنا سزا بنفینے۔
پن کروک نیاڑی ءِ 16 ستمبر 2022 ئٹ چابہار ئٹ ایرانی فورسز نا اسہ آفیسر ئسے نا دو آن چنک سن مسڑ ئسے نا ننگ آ دو بٹنگ آن گڈ مروکا برانز آتا دوبہ ئٹ دزگیر کریسر۔
ہراڑا ایرانی عدالت دوبہ خلکوسس کہ او ایران نا برخلاف سوشل میڈیا پلیٹ فارم آ انسٹاگرام آ بندغ آتے بچ تسکہ۔
الہام نا باروٹ پاننگو کہ او انگریزی نا ٹیچر ئسے۔ چاگڑدی کڑدہ غاتا پارہ غان اونا سزا غا کاوڑ نا درشان کننگو۔
بلوچستان نا ضلع ڈیرہ بگٹی نا ہندی نظر علی بگٹی نا مار بندہ خان کوئٹہ غان زوراکی ئٹ بیگواہ کننگا۔
خاہوت نا ردئٹ اودے سیٹلائٹ ٹاؤن آن پانزدہ اگست آ دزگیری آن پد بیگواہ کننگا۔ بندہ خان بگٹی سیٹلائٹ ٹاؤن ئٹ ٹہیفوک بگٹی ہاؤس نا بج ئنا پارہ غا مسیت ئٹ نماز خواننگ آن پیشتماسس کہ اودے پاکستانی فورسز کارندہ دزگیر کریسہ بیگواہ کریر۔
یاتی مرے بلوچستان ئٹ زوراکی نا بیگواہی تا تدینی تیٹ بھیم بش کروک ہد اسکان ودکی مسنے۔
بلوچ سیاسی و چاگڑدی کڑدہ غاتا پارہ غان زوراکی نا بیگواہی تا تدینی تے اشتماعی سزا پن کننگانے۔ اوفتا ردئٹ بیگواہ بندغ تون اونا تیوہ خاہوت ءِ اذیت تننگک۔
جتا وخت آتیٹ جہانی و ہندی بندغی حق آتا گل آتا پارہ غان بلوچستان ئٹ زوراکی نا بیگواہی تیا خُلیس نا درشانی کننگانے واہم دا وڑ نا تدینیک ہڑدے ئی بنداو آ رپورٹ مریسہ ءُ۔
زوراکی ئٹ بیگواہ کننگوک ظہیر احمد نا خاہوت کوئٹہ ٹی صحافی تے بریفنگ ترسا پارے کہ ہڑدیئی بنداو آ دا پریس کلب ئٹی زوراکی نا بیگواہی تیان زیمی خاہوت آک نُما ذریعہ ئٹ تینا دڑد و ڈکھ ءِ جہان اسکان سر کننگ نا کوشست کیرہ کہ نوا کیہی سال تیان زوراکی ئٹ بیگواہ اوفتا بندغ آک اُرا تیا بریر۔ نن ہم ہمو زیمی آ خاہوت آتیان اسٹ اُن۔
او پاریر کہ ظہیر احمد ولد ڈاکٹر حاجی عبداللہ اسہ سرکاری ملازم ئسے و تدوکا 15 سال آن پاکستان پوسٹ آفس ئٹی کلرک نا حیثیت ئٹ ڈیوٹی کننگ ءِ۔ او 27 جون آ پنچ شمبے نا دے 2 بجہ نا وختا تینا دفتر ئٹی جی پی او کوئٹہ ٹی زرغون روڈ آن تینا اُرا کلی بنگلزئی سریاب روڈ آ بننگ اس تو اودے اُراغا سر مننگ آن مُست بیگواہ کننگا۔
ظہیر احمد نا خاہوت نا پاننگ اس کہ ظہیر احمد اسہ سرکاری ملازم ئسے و اونا ہچو سیاسی بیک گراؤنڈ اس اف بیرہ خاہوتی و خونی سیالی تا سوب آن ظہیر احمد تون اوار ایلو سیال آتے ہر وخت بیم ئنا گواچی کننگک و اُرا تیا نن ئنا تہاری ٹی کیہی وار چھاپہ خلنگانے۔
صحافی تے بریفنگ ئٹ خاہوت نا پاننگ ئس کہ ظہیر احمد بلوچ ءِ پاکستانی لشکر سی ٹی ڈی و ڈھکوک ادارہ آتا کارندہ غاک کوئٹہ آن زوراکی ئٹ بیگواہ کریر دا رد ئٹ نن پریس کانفرنس ئٹی اونا آجوئی نا خواست کرین و ظہیر احمد نا آجو مفننگ نا دروشم ئٹ نن بیوس مرسا برانز نا کسر ءِ ہرفین۔
او پاریر کہ ظہیر احمد نا آجوئی کن نن کوئٹہ ٹی چھانڑدہ دے اسکان تولوک برانز تون اوار دپ درشانی کرین و دا نیامٹ پولیس نا کنڈ آن پرایمن برانزی تیا تاغت کاریم ئٹ ہتنگ مس، بیست ئنا کچ برانزی تے دزگیر کننگا و ہرافتیٹ پنچ زالبول ہم اوار ئس، پدان 14 جولائی آ ریڈ زون ئٹی حکومت تون ہیت و تران ئٹی برانزی تا آجو مننگ، سی ٹی ڈی آ ایف آئی آر کننگ و پانزدہ دے ئٹی ظہیر احمد ءِ یلہ کننگ نا گپ آتیا امنائی مس۔
اوفتا پاننگ ئس کہ حکومتی کمیٹی نا باسک آتا باور ترفنگ آن پد نن پانزدہ دے کن تینا برانز ءِ ایسر کرین ولے اسہ تُو اس گدرینگ آن گڈ ہم کوالخواہ تا کنڈ آن ہچو گامگیج متنے و دا وخت ئٹی حکومتی کمیٹی بیرہ نیمون ئٹ کاریم ہلکنے۔
ظہیر احمد نا خاہوت نا ودیک پاننگ ئس کہ دا پریس کانفرنس ئٹ نن پاش پانہ کہ کوالخواہ تا کنڈ آن ودیک اسہ ہفتہ نا تہٹی ظہیر احمد بلوچ ءِ آجو کننگتو تو نن سخت برانز نا کسر ہرفون ہراٹی تولوک برانز آتتون اوار دپ درشانی اوار مرو۔
آخر ئٹ اوفتا پاننگ ئس کہ نن بلوچستان ئٹی سیاسی و چاگڑدی تنظیم آتون اوار جہانی بندغی حق آتا تنظیم آتیان خواست کینہ کہ او ظہیر احمد نا آجوئی کن تینا کڑد ءِ سر ایتر۔
