یورپی دیہاڑ نوشتئی

 نوشت: ڈاکٹر مبارک علی
مٹ: برناز بلوچ

دی بلوچستان پوسٹ

یورپ نا مؤرخین آک دیہاڑ نوشتئی (تاریخ نویسی) ءِ تینا نقطہ نظر ئٹ نوشتہ کرسا ایشیا و افریقہ نا دیہاڑ ءِ تینا گرفت ئٹ ہیسر۔ دیہاڑ نوشتئی ئٹ مٹّیک برسا کیرہ۔ اسلامی مورخین آک دیہاڑ ءِ حضرت آدمؑ آن بناء کرسا شاہی خاہوت آتا زکر اسکان ہیسرہ۔ مثیل ئسے نا طبری نا پنی آ دیہاڑ ”الرّسول و ملکوک“ ءِ ۔ ابنِ خلدون ہمو اسٹ انگا مؤرخ ئس، ہراد دیہاڑ نا زی آ مقدمہ کرسا دا دود آن نمن کرے ہراٹی او دیہاڑ نا فلسفہ ءِ بیان کریسُس۔ ولے مسلمان مورخین آک اونا مقدمہ ءِ نئے کڑمبی اسکان خواننگ نا کوشست کریر و نئیکہ اونا نظریہ آتے تینا کریر۔ ابنِ خلدون نا مقدمہ پوسکنا وخت ئٹ اول عثمانی سلطنت ئٹ پاش کننگا تاکہ اوفک تینا زوال نا سوب آتے پہہ مننگ کیر۔ اوکان پد یورپ نا مورخین آک مقدمہ نا اہمیت آ زور تسر۔

یورپی مورخ آک ہم عہد وسطی ٹی دیہاڑ ءِ بائبل نا بنیات آ نوشتہ کرسا کریرہ۔ او دیہاڑ ءِ اسہ چرجوئی اسیٹ بیان کریرہ۔ ہرا جہان نا بنائی و ایسری نا نیامٹ عمل پذیر ءِ۔ ولے عمل تون اوار اوفتا سوچ ئٹی مٹّی بس و اوفک دیہاڑ نا دا چرجوئی ءِ پرغسہ ہفتادمیکو کرن ئٹ اودے مسہ بشخ کریر۔ یعنی متکنا عہد وسطی و پوسکنا۔ دا وخت آتا بشخ مننگ ءِ او تینا دیہاڑی عمل ئٹ اُرار کہ ارا وخت آ داٹی مٹّی بس و چاگڑد نا پوسکنا ساخت تدوکا وخت نا دروشم ءِ بدل کرسا اسہ پوسکنو دروشم اس ہلک۔ مؤرخ آک دا مسٹ انگا وخت نا خصوصیت آتے گچین کریر۔

متکنا عہد آن اوفتا مطلب تہذیب نا بناء و دیمروی ئس۔ عہد وسطی ئٹ یورپ نا زی آ کیتھولک چرچ نا تسلط مس ہرانا سوب آن زند نا ہر اسہ تلہ ٹی مذہبی اڑاند ودی مس۔ مذہبی عقیدہ آتیان نمن، بغاوت نا بریبر ئس۔ ہندا سوب ئس کہ ریناساں وخت نا ہیومنسٹ (Humanist) آک عہد وسطی ءِ تارمہ پاریر و دا گڑا زور شاغار کہ داڑان خلاصی المی ءِ۔ انتئیکہ دا دیمروی نا کسر ٹی اڑاند ئسے۔ ولے عہد وسطی نا باروٹ مؤرخین آتا رویہ غاک چپ ءُ۔ رومانوی وخت نا مؤرخ آک عہدِ وسطی ٹی سکون و جارات خنار۔ اوفک ہمو وخت نا دود و ربیدہ غاتیا ہم تینا خیال آتے بیان کریر۔ ولے ریناساں وخت نا مفکرین آک عہدِ وسطی نا دو آن پیشتمسا یونان و روم نا کلاسیکل کلچر ئٹ سیکولر ءُ سوچ اس خنار و اونا بنیات آ پوسکنا وخت نا بناء مس۔

دیہاڑ نوشتئی نا دا مٹّی نا سوب نوزدہ میکو کرن نا یورپی مفکرین و فلاسفر آک دانا باروٹ ہرا نظریہ آتے تسر، او ایشیا و افریقہ و دیہاڑ نوشتئی ءِ رد کرسا تینا زوراکی ءِ برجا تخرہ مثیل ئسے نا جرمن فلاسفر ہیگل تینا اسہ دود و ربیدہ اسیٹی پارے کہ ہندوستان نا ہچو دیہاڑ اس اف و ایلو دا کہ افریقہ تارمہ ءُ براعظم ئسے۔ ہندا خاطران یورپ ہمو اسٹ انگا جغرافیائی علاقہ ءِ ہرانا دیہاڑ اس ارے۔ ہیگل نا دلیل دادے کہ غیر یورپی راج آک دیہاڑ نا حاشیہ غاٹو۔ دا بستار ئٹ اوفک ہچو تخلیقی کاریم کننگ کروفس۔ اوفتا اہمیت ہمو وخت آ مرو ہراتم اوفک یورپ نا دیہاڑی عمل ئٹ اوار مرور و تینے اوٹی اوڑدہ کرور۔

غیر یورپی مورخ آتیکن دا اسہ کبین ءُ ویل اس ئس کہ اوفک تینا دیہاڑ نا دور آتے یورپ نا روشنی ٹی ہُرر یا اوفتا سرجاچ ءِ تینا دیہاڑ نا مناسبت ئٹ کیر۔ مثیل ئسے نا اسلامی دیہاڑ نا متکنا وخت اسلام آن مست ئنا ءِ۔ اونا عہدِ وسطی ٹی امیّد و عباسی سلطنت آتا بنداو مس و اندا ہمو وخت ئس کہ ہراٹی بغداد ئٹ بیت الحکمت و قاہرہ ئٹ دارالحکمت جوڑ کننگا، ہراڑے فلسفہ و سائنس نا زی آ پٹ و پول مسکہ۔ ہندا خاطران اسلامی دیہاڑ ئٹ عہدِ وسطی تارمہ الّو۔ ہندا حالیت برصغیر ہندوستان نا ہم ئس۔ دانا متکنا وخت ئٹ وادی سندھ نا تہذیب آریا آتا بننگ و ہندومت نا جوڑشت و فلسفہ نا دیمروی ءِ۔ دانا عہدِ وسطی ئٹ ترک آتا بننگ و مغل حکومت نا ٹہفنگ ءِ ہرانا وخت ہندوستان صنعت و ٹیکنالوجی ٹی دیمروی کرسا چاگڑد نا رویہ و خیال و افکار آتے بدل کرے۔ دا تومکا تا پوسکنا عہد کالونیل ازم یعنی نوآبادیت نا عہد ءِ۔ ہرا اوفتا دود و ادارہ آتے مٹ کرے و اوفتے یورپی تہذیب نا گرفت ئٹ ہتیسہ اوفتا تخلیقی ذہن ءِ چٹفے۔

یورپی کالونیل ازم نا چُٹنگ آن پد ایشیا و افریقہ نا سیاستدان و زانتکار آتیکن دا سوج ءِ کہ: انت ننے دیمروی کن ہمو ہی ادارہ و دود آتے تینا کننگ مرے ہرافتا کمک ئٹ یورپ جہان نا زی آ تینا زوراکی ءِ برجا تخا؟ انت ایشیا و افریقہ نا ڈیہہ تے ریناساں ریفریشن و فرانسیسی صنعتی و سائنسی انقلاب آتے ہتنگ مرو؟ ہرا اوفتا کڑدار ءِ مٹ کرسا اوفتیٹی جدیدیت ءِ ودی کے۔ ولے اسہ سوج اس داہم ارے کہ انت غیر یورپی راج آتے یورپ نا وڑ سامراجی جوڑ مرسا تینکن کالونی جوڑ کروئی مرو و اوفتا وسیلہ و مڈی تے لٹ و پل کرسا اوفتے تینا دیمروی کن کاریم ئٹ ہتنگ مرو۔

دا تجزیہ غان دا پاش مریک کہ ایشیا و افریقہ نا ڈیہک یورپ ءِ تینکن ماڈل اس جوڑ کننگ کپسہ۔ اوفتے تینا ہنوکا و ساڑی آ وخت ءِ ہریسہ دیہاڑ نوشتئی کن سوچ و خیال تخلیق کروئی مرو و یورپی دیہاڑ نوشتئی نا گرفت آن تینے آزات کروئی مرو۔ اگہ غیر یورپی مؤرخ آک یورپ نا نقل ءِ کرسا مسر گڑا اوفک کالونیل ازم نا گرفت آن تینے آجو کننگ کروفس و دیہاڑ ہمو اہم انگا علم ءِ، ہرا بیرہ چرجوئی ئٹ مٹّی نا نشاندہی ءِ کپک بلکن دا راج آتیٹی اوفتا پجار ءِ ہم سوگو کیک۔

ٹی بی پی نیوز ڈیسک ءِ رسینگوکا احوال آتا رد ئٹ ضلع کیچ ئنا علاقہ تحصیل بلیدہ ٹی بھلو کچ ئسیٹ فوجی کارندہ غاک سر پُر کننگو۔

ہندی احوال آتا رد ئٹ چِل آن زیات ٹرک و ایلو گاڑی تیا تالان فوجی کارندہ غاک سلہہ و جنگی مڈی تتون اوار بلیدہ نا پارہ غا سُر پر کننگو۔

کالخواک دائسکان دا باروٹ ہچو ہیت ئٹ مونا ہتتنو۔

بلوچستان نا جتاء علاقہ غاتیٹ فوجی آپریشن آتا لڑ تدوکا اِرا دہائی آن برجاء ءِ واہم پاکستانی لشکر آپریشن ضرب استحکام نا پڑو آن گڈ داکان مست مستونگ، نوشکی، قلات ئٹ جنگی ساز و سامان تا سر کننگ ئٹ ودکی خننگانے۔

یک شمبے نا ننکان مستونگ ئٹ تراک نا توار بننگا۔

مستونگ شار ئٹ میجر چوک آ پاکستانی لشکر نا پوسٹ آ چغلی بمب جلہو کننگا۔ چغلی بمب پوسٹ ئنا خڑک آ تمسہ ترند توار ئٹ ترخا۔

پولیس نا رد ئٹ تراک ئٹ ہچو جانی نسخان متو۔ فورسز ہمو ہند ءِ بند کرسہ ایب کیب علاقہ غاتیٹ سخت پٹ و پول ءِ بناء کرینے۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ ننا سرمچار آک بولان نا علاقہ مچھ، گیشتری ٹی قوضہ گیر پاکستانی لشکر نا اسہ مخبر لال جان مری ءِ اسہ کاروائی اسیٹی سم کاری کرسہ مرگ ئنا گواچی کریر۔

ترجمان پارے کہ لال جان مری 2017 غان قوضہ گیر پاکستانی لشکر نا ڈھکوک ادارہ ایم آئی نا پاننگ آ مخبری کننگ ئس۔ بی ایل اے نا سرمچار آک دسمبر 2023 ئٹ مچھ ئنا علاقہ درنجین ئٹ اسہ کاروائی ئسے نا وخت آ پاکستانی لشکر نا مخ تف آسمانی پن کروک اُوتھے ولد تنگو مری ءِ دزگیر کریسر، ہرا سونج رونج نا وخت آ منا کہ لال جان مری اوفتا نیٹورک تون تفوک ءِ و علاقہ ٹی مخبری نا کاریم کننگ ءِ۔

او پارے کہ لال جان مری گیشتری تون اوار بولان نا ایلو علاقہ غاتیٹی فوجی آپریشن آتیٹی بندغ آتا زوراکی ئٹ بیگواہی تیٹ دژمن نا مون پہ مون کمک کریسہ کرینے وختس کہ پن کروک علاقہ ٹی ایلو بندغ آتے جوفہ و بیوس کرسہ ایم آئی کن مخبری نا کاریم ہلنگ ئٹ ہم اوار ئس۔

ترجمان پارے کہ قومی غداری نا ڈوہدار مننگ آ لال جان مری ءِ کھسفسہ اودے عبرت تروک ایسری اسکان سر کننگا۔ بلوچ لبریشن آرمی قومی غداری نا ڈوہدار مروکا بندغ آتے ہچبر بشخوف و اوفتے لال خان مری نا وڑ اوفتا ایسری اسکان سر کننگو۔

کوئٹہ آن زوراکی ئٹ بیگواہ ظہیر احمد نا زوراکی نا بیگواہی نا ایف آئی آر سی ٹی ڈی نا برخلاف نوشتہ کننگا اندن دزگیر کننگوک 15 برانزی یلہ کننگار۔ پانزدہ دے ئٹ کمیٹی ظہیر احمد ءِ یلہ کرو۔

استو کوئٹہ برانز کروک و حکومتی وفد نا نیام ئٹ گپ و تران سر سہب مس۔

ڈاکٹر ماہ رنگ بلوچ پارے کہ ظہیر بلوچ نا یلہ کننگ کن برجاء تولوک برانز ئٹ حکومتی وفد و بست و بند تون گپ و تران مس ہراٹی ظہیر بلوچ نا زوراکی ئٹ بیگواہی نا ایف آئی آر سی ٹی ڈی نا برخلاف نوشتہ کننگا، 11 جولائی آ دزگیر کننگوک برانزی تیان، 21 برانز کروک پولیس نا دزگیر ئٹ ئسر، 15 ءِ دا وخت یلہ کننگانے اندن 6 ءِ دو شمبے آ عدالت آتا ملنگ آن پد یلہ کننگو و 11 جولائی آ پرامن برانز کروک آتا برخلاف غٹ مقدمہ غاک ایسر کننگور۔

ماہ رنگ بلوچ پارے کہ ظہیر بلوچ نا یلہ کننگ کن اونا خاہوت تون اوار اسہ کمیٹی اس ٹہفنگو ہرا 15 دے اسکان ظہیر بلوچ ءِ یلہ کننگ ئٹ تینا کڑد سر ایتو و 15 دے آن پد اگہ کمیٹی ظہیر بلوچ ءِ یلہ کننگ کتو گڑا اونا خاہوت تینا برانز ءِ دوارہ برجاء تخو۔

امریکہ نا مسکوہی صدر ڈونلڈ ٹرمپ گچین کاری ریلی نا خونی جلہو ئٹ ٹپی مسنے واہم اونا ساہ رکھوک ءِ اندن ٹرمپ آ سم کاری کروک بندغ ءِ مرگ ئنا گواچی کننگانے۔

امریکی میڈیا نا ردئٹ تدینی ٹی ریلی ئٹ ساڑی اسہ پین بندغ اس مرگ ئنا گواچی و اِرٹ بھاز ٹپی مسر، ڈونلڈ ٹرمپ جوان ءِ و اودے ہندی جانجوڑی مرکز ئٹ اُننگانے۔

مسکوہی صدر ٹرمپ قانود ٹہفوک آتا منتواری کرے کہ اوفک دا عمل نا وخت آ دمدستی رکھوک گامگیج کرے۔

امریکی حوال تروک ایجنسی نا ردئٹ ڈونلڈ ٹرمپ امریکی صوبہ پنسلوینیا نا علاقہ بٹلر ئٹ اڈ تروک ریلی ئٹ تران کننگ کن اسٹیج آ ئس ہرا وخت سم کاری نا تدینی مس۔ ٹرمپ تران نا وخت آ سم کاری مننگ تون شیف مس و ریلی ٹی توار توار اس بش مس۔

کاؤنٹی پراسیکیوٹر نا ردئٹ مسکوہی امریکی صدر ٹرمپ ءِ اسہ سُم اس لگاسس۔

امریکی پٹ و پول کروک ادارہ ایف بی آئی مسکوہی صدر ڈونلڈ ٹرمپ آ جلہو کروک بندغ نا چاہنداری ءِ کرینے۔ ایف بی آئی کوالخواہ تا پاننگ ءِ کہ ٹرمپ آ جلہو کروک پنسلوینیا نا ہندی 20 سالی ورنا میتھیو کروکس ءِ۔ دا تدینی نا گیشتر پٹ و پول برجاء ءِ۔

امریکی میڈیا نا دعویٰ ءِ کہ ریلی ٹی سم کاری نا تدینی ٹی مسکوہی امریکی صدر دیخس ٹپی مسنو، اونا خف آ دتر نا نشان خننگانے واہم دا ٹپ آک ہرا وڑ ئنا ءُ و ہرا سوب آن مسر دا پاش مننگ کتو اندن ٹرمپ آ سم کاری کروک جلہو کار ءِ کسفنگانے۔

امریکی میڈیا نا ردئٹ تدینی ٹی جلہو کار تون اوار اِرا بندغ مرگ ئنا گواچی اندن اِرٹ ٹپی مسنو۔

امریکی صدر جو بائیڈن مسکوہی صدر ڈونلڈ ٹرمپ آ گچین کاری ریلی ٹی خونی جلہو نا مذمت کریسہ پارے کہ ٹرمپ جلہو ئٹ رکھوک ءِ دا بِننگ آن خوشی مس، دا وڑ ئنا بیدادی نا ہچو گنجائشت اس اف۔

داڑان بیدس مسکوہی امریکی صدر بارک اوباما ہم تدینی نا مذمت کریسہ پارینے کہ امریکی جمہوریت ئٹ بیدادی نا ہچو جاگہ اف، دا اُست جم ہیت ئسے کہ ٹرمپ رکھوک ءِ، ای و مشل ٹرمپ ئنا جانجوڑی کن دعا کینہ۔

راسکوہ نا پِراد

نِوِشت:آشوب بلوچ

راسکوہ نا مش رخشان ڈویژن لُمہ وتن نا پِنی آ شارچاغی ٹی پِنی ءُ مش ئسے۔ لُمہ وتن نا شار چاغی کُدرت نا بے مُل آ خُدائی آ خیسُن تا سوب آن پِنی ءِ ولِہ بلوج راج ئنا دا خلک راسکوہ نا اسِہ پین سوب ئس ارے کہ ہر بندغ چائِک تَہ۔
لئوزاک پِنوک،گُمان مودہ خلسہ ءِ،ہیتاک نیمہ ءُ ،اکل آمخ مسونے،جون لڑزہ ٹی ءِ،ءُ دُوی نا کیرغان بیرہ کپ ءُ ہیت پیش تمِنگ ءِ اگہ نن دا کُل گِڑا تِہ خوڑتی ئٹ ہُرِن کہ او ارا سوب ءِ کہ دا کُل نیم پُورو ءُ تو ننے دا غُٹ سوج آتا ورندی ہنا دروشُمٹ دُو بریک کہ نن اسِہ ہندونو ڈے ئسینا باتی ئُن ہرا نا سینہ ٹی اسِہ نُمروُدی ءُخاخر ئس لگانے ہرانا سوب آن نہ کہ نِلا بلوچ خاہوت ناکُل باتیک فریشان ءُ بلکہ ہمو زیبا غا چوٹول آک ئم مُونجھا ءُ ہراتا ہنکین راسکوہ ءِ زالِم ءُدُژمن ئس 28مئی 1998 ٹی بُن تِس۔
ایٹمی بمب آن بیدِس ننا دُژمن ہروڑئنا اٹکل خوندی کرینے ءُ اونا مسخت ہنا مسونے کہ بلوچ راج ئنا وُجوُد ءِ کوڑی آن ایسر  کے۔ 28مارچ1948 آن ہلیس اینو اِسکان متلب 76 سال نا ءِ دُشمن وڑ نہ وڑ ئسے ٹی بلوچ نا بدریچ ءِ ایسر کننگ کہ تینا ہر وڑ ئنا مشینریءُ ڈالرخوندی کرینے۔ او زالم آ پاکَستانی آمِر جرنل ایوب نا دورئنا کلات ءُ کاہان آ لشکر نا دروش مٹ جُلہو مرے یا نام نِہاد بُھٹو دور نا 1973 ٹی بلوچ پدریچ ایسری نا کِسہ مرے ہرانا گواہ لُمہ وتن نا پِنی آ مش بُزگر اتِک۔ زیبل آ راسکوہ آنبار لُمہ وتن نا ہر خلک گلی کُوچہ شار دا بے رحم آ سامِراج آ دُژمن نا زُلم ئنا آماچ مسونے۔
ہراتم زالم آ دُژمن راسکوہ نا زیبا غا مش ہرا کہ مالو٘خلزاد تاسنگرءُ چُک آتا ہنکین ئس پدا ایٹم بمب نا سوب آن رخشان نا او پِنی آ مش بیرہ ہِس مس۔ اینو آن 26 مالو ہراتم دُژمن راسکوہ نا سینہ غا اسرافیل نا سُور تما تو او سُور ئناسوب آن چاغی تو اوار اوار دالبندین خاران ءُ نوشکی رخشان ڈویژن نا ہد ہویل ئٹ ساڑھی ہر خلک ءُ شار ایٹم بمباتاکیمیکل ریڈیئیشن نا سوب آن باز نُسخان خنا۔ زرمبش لٹریری فورُم نا اسِہ رپورٹ ئسینا مُطابق ہراتم راسکوہ نا مشا ایٹمی بمباتا  ٹیسٹ مس تو او بمب آتا سوب آن چاغی نا ہمو کُل دُھون تا دِیر بارِس ہراکہ سد سال آتیان برجا اسُرہ۔ ہمو چشمہ غاک ہراتیان بزگا چاغی نا مخلوق تینا جمارے چلیفیکہ ہراتیان او مخلوق کِشت ءُ کِشار کریکہ ولہ ارمان سد ارامان سامِراج نا زُلم ئنا انتہا مس کہ او بلوچ راج ئنا ہمو چشمہ غاتہ تینا بمب آتا گواچی کرے۔
ولڈ ہیلتھ اورگِنائِزیشن نا ریسرچ نا مطابق ہراتم اسِہ ہندئسے آ ایٹم بمب ئس ترخِک تو ایٹم بمب ئنا سوب آن ہمو ہند ءُ شار ئٹی بازا مرز آک ودی مریرہ دُنکہ کینسر،سِل ئنا بیماری خنتا کوریءُ چُنا تا مازور ودی منِنگگ۔بولان میڈی کالج (ہِسپتال ) نا ڈاکٹر زابِد محمود نا بقول 2015 ٹی مُچا بلوچستان آن 3500 بندغ کینسر نا گواچی مسونو۔ہنُن سالک مُستی ہِنانو تو کینسر نا ناجوڑیک ودانو ولِہ اوفتیٹی کمبوتی بتہ نے۔ ہنا کینسر نا سوب آن ہزارا بلوچاک مرگ ئنا گوچی مسرِسا داکوڑی آن رخصت کرینو۔ بازا ورناک ہوش سنبھالانو تو تینا جمار ءِ مُستی دنِنگ کہ ہنین ءُ تُغ ہُرانو ولِہ ہراتم خن ملانو کہ تینا بزہ گا راج ئکہ گِڑا ئس کین ولِہ کینسر نا وڑّنگا مرز آتا آماچ مسونو پدا ہمو ارمان تِتو رخصت کرینو۔
بلوچ راج وڑ نہ وڑ ئسیٹی سامراج نا زُلم ئنا آماچ مسونے ہر دور ئٹی سختی ؤ سوری خنانے۔ پاکِستان وزیر آزم محمد علی بوگرا نا دور ئٹی تینا ایٹمی پروگرام نا بنا ءِ کرے تو ہمو وختا وڑ نہ وڑ ئسیٹی تینا سنگتی ءِ امریکہ تو گنڈا۔کوڑی نا مونا امریکہ پاکِستان ءِ بد پاریکہ ولِہ پردہ نا پدان پاکِستان نا کُمک ءِ کریکہ انتئکہ 1984 ٹی امریکہ دیر ہرفے کہ اگہ رُوس ہرا ہمووختا USSR نا پِنٹ پِنی ئس کہ او اعوغانِستان آن گِدریساسمندر نا باسُنا دیر (گوآدر)آ سر مس تو امریکہ نا آخوبت کہ سہی اف او ہنا ہمو سوب ءِ ہرانا سُوب آن امریکہ پاکستان ءِ ایٹم بمب جوڑ کنِنگ نا موکل تِس۔
مون مُستی اگہ نن ایٹم ئنا تباہی تِہ خوڑتی ئٹ ہُرِن تو ننے کینسر او ایلو بے ھِسابا ناجوڑی تیان بیدِس اسِہ پین گِڑا ئس ئم نزر بریک۔ زرمبش لِٹریری فورم نا اسِہ رپورٹ ئسینا مُتابِک چھتر نا باتی محمد نور پائِک ہراتم ایٹم بمب آک ترخار تو اوکان پد نن باز سختی سہان ، او مُستی ہیت کرِسا پارے کہ ہراتم ننا مخلوق چاغی نا دیر ءِ کنیک تو گُٹ آن دِتر اُلٹی بریک۔
ہنُن راسکوہ نا باتی علی جان پائِک کہ ایٹم بمبا تا ترِخِنگ ناسوب آن اِرا سال ئٹی ننا ہِلار نا باغک بارِسُر ، ہراتا بھرم تِہ سودا کرِسا تینا جمار ءِ تدیفینہ ولِہ ایٹم نا ترخنگ آن گُڈ ننا ہمو باغک ہِنار بارِسُر بیرہ اوفتا پاٹک ننا شین ئٹی سلیسُر۔چاغی ہرا کوڑی ٹی تینا خیسُن اِنگا مش تا سوب آن پِنی ءِ ولہِ اُست ٹُکُر مریک کہ نن خیسُن تا مالک آک بزہ گی نا جمار ءِ گدرفنگ ئُن۔ ہنُن ہرا وختا کہ راسکوہ نا سینہ ءِ زالِم ہُشا تو گُڑا او ہند ئنا مخلوق اوکان تینا گِدان تِہ مُچ کرے ءُ لُمہ وتن نا ایلو شار ئتا کُنڈا ہمپیر۔ دا ہمپِنگ ئم او بزہ گا مخلوق کہ ازاب آن گٹ الو انتئے کہ ہرا ہندا او باوہ پیرئی آن رہینگارہ تو کزائی ایٹم بمباتا سوب آن تینا ہنکین ءِ الِار ءُ پین شار تیٹی بلو خوآری ئسیان پد ہندی مسُر۔ ہندا سوب آن اینو اسکان دا لمہ مش راسکوہ ٹی خلک ہشنگو، پیٹ ؤ زاری کننگ او کہ نن دا آسی آ خل ئنا آماچ انتئی کننگ آن؟

نظم

شاعر : فدا

کنے بولان پارے دن، کنے بولان پارے دن،

کنا خڑکٹ بفیسک نی
کنا دا جلک ٹپی ءُ
ہرا دِیتے خننگس نی
ترندا دا وہوکنگا
دا دیر افس
دترکو دا
کنا خنتا جغر ناہم
تلشپنگا کنا خلتے
چڑہ لتاڑسہ کاسہ
زرس خیال کہ
مرک پامٹ
زدہ اٹ باز ہسون اٹ ای
سفا زوران پارے دن، کنے بولان پارے دن
کنے بولان پارے دن

کنے آن خُل کنے پہ مہ
ای وختس کیدوہ بندغ
کنے آنی عیاشی کن
بریسہ شرم بفک نے اچ
ولے نی بے خدی تیٹی
تینا دلدار یادٹ تخنگس
جوڑتیا جام ءِ

پدا ٹاکو خلسا وا
نی کیسہ سہب دن شام ءِ
اسل تپیسہ آرام ءِ

کرے حیران پارے دن، کنے بولان پارے دن
کنے بولان پارے دن

کنے آ تو نمے رب ءِ
کنا سجدہ کروئی ئس
ہرا تسک دنو زیبائی ئس مشتے کنا
جلتے
کنے بشخا دنو منظر
ہرا کشمیرٹی افس
ہرا نارانٹی افس
ہمو کاغانیٹی افس
سفت کیسہ شیرازے
مفیسہ پہہ کنا رازے

بنک مہمان پارے دن، کنے بولان پارے دن
کنے بولان پارے دن

کنا مشتا کہ بڑزی آ
ہرا تولو کو زیباؤ
ہموتیکن ای زم زم اٹ
شفا اٹ ای دوا اٹ ای
کنا رک ءِ تخانو او
کرینو چیٹ آہوتے
خنانو لنگڑی کنکن
اریٹ اوتا کنا ءُ اوک ۔۔۔
اوتا خواریک افس پوک
کنے نازے امو فتیا
بشہ نادان پارے دن، کنے بولان پارے دن
کنے بولان پارے دن

بریسہ سیلکن بیرہ
کنا دڑداتے خنپیسہ
کننگے خاچنگے چاسہ
ولے پین اچ ءِ تپیسہ
خلیسہ تار نی تینا
کڈمبا خرنا کمبٹ
ہرا ٹی نے نظر بف تو
کنا ہچو دنو دڑدس
ای نم کہ جو اسے اٹ بس
دتر نا پومریرے دا
فدا ارمان پارے دن
کنے بولان پارے دن