ایٹمی بھس کاری انت ئسے
نوشتکار: مزدک بلوچ
دی بلوچستان پوسٹ
کالونی دنیا نا ہرا سند آ مرے اونا قدر و قیمت غلام نا مریک۔گڑا حاکم تینا ہر آزموندہ ءِ اونا جون آن بناء کیک اونا ڈغار اسکان ہم تینا پلویڑ اٹ اتیک۔
اندن کہ سنگت برزکوئی لکھیک کہ داڑے اِرا طبقہ ءُ اسٹ “حاکم” ایلو “محکوم”۔ گڑا حاکم تینا جند ئنا سواد آتیکن ہمو گڈیکو ہند اسکان کائک۔اندن کہ نُمے سما ءِ ۲۸۔۵۔۱۹۹۸ اٹ چاغی ٹی پیشن نا بروکو دژمن ئس تینا ایٹمی ازموندہ آتے کرے دا ازموندہ تیان بلوچ راج اٹ اسہ ناجوڑی تا مدامی ءُ چرک اس بناء مس ہرا ٹی کلان بلا پِن کینسر نا ءِ۔ دا امو نانجوڑی ءِ ہراڑان لکھی آ جون تا بچینگ باز کمتر ءِ۔
اندن کہ آسٹریلیا نا اِرا زانتکار نا محفل ئسیٹی ہیت گپ دا مس کہ مُچا جہان ئٹی ایٹمی تراک آتا ازموندہ تیان پد کینسر آن مروک بیرانی تا چرک ئس بناء مریک، گڑا دا زانتکار آک دافتا حساب کتاب ءِ بِناء کیرہ ہرا نا حساب کم و ود ۲۰ لکھ آن ۲۴ لکھ اسکان مریک داڑان بیدس پدا ہم دا حساب آن گیشتر مننگ کیک۔
اندن کہ دا ازموندہ غان پد ایلو ڈیہہ تا زی آ ہیت مس ہرا ٹی امریکہ فرانس برطانیہ و ایلو ڈیہک اسر ہرافتا جوہری شعبہ ٹی کاریم کروک آتا زی آ ازموندہ ئس کریر ہراڑان دا ہیت پک مس کہ ہرا وخت بندغ تباہ کروک انگا گڑا تا ذی آ کاریم نا سبب آن است ئنا ناجوڑی تیان ہم کہینگ نا بِناء مریک۔
ہرا وخت (۱۶۔۷۔۱۹۴۵ ) ئٹی امریکہ تینا ایٹمی ازموندہ غاتے کرے میکسیکو ٹی گُڑا اوڑے اسہ لُمہ ئسے نا پڈ اٹ چناس مریک، دا نیاڑی کائک ہمو ازموندہ کروک آ درتی آ ایکان بریک داڑے منہ دے مریک چنا ودی مریک ہریرہ چنا نا خنک افس۔
میکسیکو نا اِرا جاگہ غا دا ازموندہ آک مسر ہموڑے ودی مروکا چنا تیٹی اندنو پین وڑ ءُ ناجوڑی مسکہ ہرافک زہن آن پیشن اسر۔ ولے او جاگہ نا مخلوق اندا سرپند مسکہ کہ دا ناجوڑیک لُمہ نا پڈ اٹ ناجوڑی نا سوب آن مریرہ۔ ولے مریسہ مریسہ ازمودئے ہلکر (۱۰۰۰)چنا ودی مسر ہرافتیٹی (۱۰۰ )چنا کسکر۔
تو دا ئس میکسیکو اندن نن داسا برینہ جاپان نا پڑ آ۔ جہان نا ارٹمیکو بلا جنگ ئٹ امریکہ (۶ اگست ۱۹۴۵) آ جاپان نا شار ہیروشیما و (۹اکست ۱۹۴۵) ناگاساکی آ ایٹمی بم آتیٹ جلہو کیک۔ دا ایٹمی جلہو نا نُسخان آتا حساب کتاب دا مس ہیروشیما ٹی رہنگوک آ بندغاک کُل (۳ لکھ ۵۰ ہزار) اسر دافتیٹی (۱ لکھ ۴۰ ہزار )بندغ کسکر ایلو ناگاساکی ٹی کل (۷۵ ہزار )بندغ کسکر۔
ایمیکو اوکادا ہیروشیما نا نیاڑی ئسے بم آتا جلہو آتیٹی زندہ بچوک ہرا وخت بم آتا جلہو کاری بناء مریک ہمووخت آ ایمیکو نا سن (۸ سال) مریک دا نیاڑی ورندی تریسٹ گپ کیک کہ کنا لُمہ باوہ ہیڑ سیال آک کل دا جلہو نا گواچی مسر۔ اندن پارسٹ کرے کہ ہی ہراتم بھلن مریسٹ کریٹ گُڑا کنے اندن لگا کہ کنا پژہ غاک تمگ بناء کرینو و کنا دندان تیان دیتر وہنگ بناء کرے و کنے ہندن محسوس مسکہ کہ کنا جان بحال مریسٹ ءِ و ای مدامی استان آ خاچاٹہ و (۱۲سال ) آن پد کنے زڑدوہی نا ناجوڑی مس۔ دا نیاڑی پائک کہ ہرا وخت جلہو کاری مس او وخت دے کیہلینگ نا وخت ئس۔ ایمیکو پاہک کہ کنے اینو اسکان دے کیہلینگ نا وخت آن بد بریک دا مس ایمیکو اوکادا ہیروشیما آن۔
ریکو ہادا ناگاساکی نا نیاڑی ئسے ہرا نا سن ۹ سال ئس ہرا وخت ناگاساکی آ بمب آتا جلہو کااری مس۔ ریکو گپ و تران کریسہ پاہک کہ ای ہمو دے پیشن آن تینا اُراغا بننگ اسُٹ کنا اولی گھام اُرا نا تہٹی ئس انداڑتون بمب آتا زمبارہ مس۔ کنے اندن لگا کہ گروک تما، کنا رہی آ اسل پوشکن مشی خیسون رنگ آک اوار سوار مسر اسی ابکہ اسٹ کہ کُل گڑاک کنے پیہون نظر بسر، کنے اندن محسوس مس کنے کُل یکہ الار انداڑ تون اسہ باز گیشتر ءُ توار ئس مس ہی تُسینگاٹ۔
او پائک کہ ای گھنٹہ یک ءُ نیم آن پد سماہ کریٹ کنا اُستاد کنے نصیت ئس کریسس کہ ہرا وخت آ بمب آتا جلہو مس گڑا ہمو وخت نا وخت باہوٹی آ جاگہ غا کاس، گڑا ای اسہ وار اُراٹی اناٹ تینا لُمہ ءِ ہراٹ نن اڑتوماک امو باہوٹی آ جاگہ غا ہنان۔ کنے اسہ ٹپ ئس ہم متؤ انتئے کہ ہنداڑے اسہ مش اس ئس ہمو نا سوب آن بلے دا مش ئنا ایلو پارہ غا ایٹمی بمب باز گیشتر نسخان کریسس۔ اوفتا زی آ باز خراب ءُ وخت ئسے نا بناء مسس۔ گیشتر بندغ آک ہندا مش آ لگیسہ ننا نیمہ غا بریسٹ کریرہ ہرافتا خنک پشتموک اسر بدن آ تا پُچ الؤ بدن نا تا سِلک الوس کل تا لوشت اسُر کل ئنا تا جونک ہوشنگوک اسر گڑا ئسے نا تا سِلک جون آن لُڑونج اسُر۔ دافک کنے آن دیر خواہیسر ای ہم زو بش مسٹ اسہ رزان ئس ارفیٹ اناٹ ہمو خڑک ئنا چشمہ آ ہموکان دیر ہیسوٹ دیر تسوٹ تا گڑاس دیر کونیسٹ کریر ہو کہیسٹ کریر گیشتر تا کسکُر گُڑا گرمی نا مُد ئس لاش آک تخنگ متوسہ ہنداڑے کالج ئسے نا تلاف ئس انداٹی دفن کرین تا۔ دا ئس ناگاساکی۔
داندن کہ سنگت مہر جان نوشتہ کیک کہ کالونائزر و کالوناہزڈ نا اخہ زو تفریق مریک دا تفریق کالونائزر نا مرگ ئنا سوب جوڑ مریک۔ ولے ارٹمیکو نیمہ غا جمہوریت، ریاستی راہبند، قانود، خیرخواہی نا پڑدہ ٹی کالوناہزر و کالوناہزڈ نا تفریق نا ایسر مننگ کالوناہزڈ نا مرگ ئنا سوب ءِ۔
اندن دنیا ٹی ظالم نا ہچو مذہب و قوم ئس اف اونا مذہب ہم ظلم ءِ اونا قوم ہم ظلم ءِ۔ اندن پُہہ مبو کہ ظالم نا ظلم ئنا مظلوم کن ہچو تور ئس اف او انت ظلم کے کننگ کیک۔ بس دانا مظلوم تون اسہ حل ئس ارے، او دادے کہ مزاحمت۔۔۔ بیرہ مزاحمت۔
اندن کہ فینن لکھیک کہ ظلم ئنا پڈ آن مزاحمت ودی مریک۔ اندن کہ نُمے سماہ ءِ بلوچستان اسہ کالونی ئسے۔ ہراڑے ریاست تینا ایٹمی ازموندہ غاتے کرے بلوچ راج ءِ کینسر آن الیس پین باز آ ناجوڑی تا گواچی کرے ہراکان بلوچ زنک کشی نا بنا مس دادےپارہ ایٹمی بھس کاری۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
