راشد حسین نا زوراکی ئٹ بیگواہی و آجو مفننگ نا برخلاف بلوچستان نا بنجاہی شار کوئٹہ ئٹ اینو خاہوت نا پارہ غان اسہ ریلی اس کشنگا، ہراٹی زوراکی ئٹ بیگواہ بندغ تا خاہوت آتیان بیدس سیاسی باسک آتا بھلو کچ اس اوار ئس۔

برانز کروک آک دو تیٹی بیگواہ بندغ تا عکس و بینر ارفسہ زوراکی نا بیگواہی و بلوچ زنک ایسری نا برخلاف نعرہ خلکر۔

راشد حسین نا لمہ پارے کہ کنا مار سال 2018 نا 26 دسمبر آ متحدہ عرب امارات آن ہمو جاگہ نا ڈھکوک ادارہ تا دو آن دزگیری آن پد پاکستان ءِ تننگانے۔

او پارے کہ پنچ سال مالو راشد حسین ءِ پاکستان نا پاننگ آ متحدہ عرب امارات آن زوراکی ئٹ بیگواہ کریسہ پاکستان آ ہتنگا دا زوراکی نا بیگواہی ئٹ پاکستانی ادارہ و متحدہ عرب امارات نا ڈھکوک ادارہ غاک اوار ئسر۔

راشد حسین نا خاہوت پارینے کہ او تدوکا پنچ سال آن ریاست آن انصاف نا امیت ئٹ عدالت و بیگواہ بندغ تا کمیشن آتیٹ اوار مریسہ ءُ اوفتے انصاف تننگ نا جاگہ غا گیشتر بھیم نا گواچی کننگا و عدالت آتیان کیس کشنگا و دائسکان اندا حالیت ءِ، ہائی کورٹ اوفتا کیس ئنا پیشی تے بند کرے و تاریخ ءِ پین مونی کرینے۔

اوفک بندغی حق آتا ادارہ و جہانی راج آتیان خواست کرینو کہ اوفک ریاست آن راشد حسین نا بابت سوج کیر و راشد حسین نا یلہ کننگ ئٹ کڑد سر تریسہ اوفتا پنچ سال ئنا مرغنا ودار ءِ ایسر کیر۔

بلوچستان ئٹ منکی پاکس نا تالان مننگ نا خلیس آن محکمہ جانجوڑی ہائی الرٹ شینک کرے۔

محکمہ جانجوڑی کوئٹہ، کیچ، گوادر، حب، چمن و چاغی نا ضلعی جانجوڑی افسر آتے چٹھی رادہ کرے۔ دا چٹھی ئٹ سیم سری ضلع تا تہہ ئنا غٹ کسر تیا گامگیج کننگ نا پنت تننگانے۔

اندا وڑ ایئر پورٹ آک، گوادر، تربت، چمن، تفتان سیم تیکن ہم ہائی الرٹ شینک کننگانے۔ چٹھی ئٹ تہہ ئنا غٹ کسر تیا منکی پاکس نا شکبر کیس تا دروشم ئٹ ذمہ وار کوالخواہ تے پاننگ نا پنت تننگانے۔

یاتی مرے جہانی ادارہ جانجوڑی (ڈبلیو ایچ او) منکی پاکس نا بابت الرٹ شینک دانا تالان مننگ ءِ جہانی تلہ غا بندغ آتا جانجوڑی نا ایمرجنسی گوندانے۔ جہانی ادارہ اِرا سال ئٹ ارٹمیکو وار ءِ دا دین ئنا دا وڑ درجہ بندی کرینے۔

ڈی ڈبلیو ایچ اولیکو وار 2022 ئٹ منکی پاکس ءِ جہانی ایمرجنسی گونداسس، ہراتم دا 70 آن زیات ڈیہہ تیٹ تالان مسوسس۔

منکی پاکس نا دین خڑک ئنا حوالکاری آن لگک و اونا سوب آن اول ہِڷ مریک و پدان بدن آ دانہ پیشتمنگ بناء مریک۔ لس وڑئٹ دا چنکو ناجوڑی ئسے واہم بھاز آ کیس تیٹ دا دین بھیم بش کروک ہم مننگ کیک۔

بلوچستان نا ضلع آواران آن پاکستانی لشکر اسہ بندغ ئسے دزگیر کریسہ بیگواہ کرینے۔

بیگواہ کننگوک بندغ نا چاہنداری واحد بخش نا مار خان محمد نا پن ئٹ مسنے۔

ہندی حوالکار تا ردئٹ پن کروک ورنا ءِ پاکستانی لشکر پانزدہ اگست آ آواران نا علاقہ جھاؤ کوہڑو آن دزگیر کرینے۔

خاہوت نا ردئٹ فورسز آک پن کروک ورنا نا بابت ہچ وڑ ئنا معلومداری تننگ افس۔

اوفک سیاسی، چاگڑدی و بندغی حق آتا ادارہ تیان خواست کرینو کہ او خان محمد نا یلہ کننگ کن کڑد سر ایتر۔

بلوچستان نا ضلع کیچ نا جتا علاقہ تیٹ لشکر کشی نا حوال آک ءُ۔ اندن جتا علاقہ تیٹ پند آ فوجی کارندہ تا ہن و بر و کسر تے بند کننگ تون اوار گن شپ ہیلی کاپٹر آتا بال برجاء ءِ۔

رسینگوک حوال تا ردئٹ اینو سہب آن ناصر ئٹ بھلو کچ اسیٹ فوجی کارندہ تا ہن و بر برجاء ءِ اندن ایلو پارہ غا دشت نا جتا علاقہ تے فورسز آک پلویڑ کریسہ ناکہ بندی کریسہ ءُ۔

ایڑے بلیدہ غان ہم حوال آک رسینگانو کہ اینو سہب آن گن شپ ہیلی کاپٹر آتا بال برجاء ءِ، واہم لشکر کشی نا وخت آ دائسکان ہچو وڑ ئنا دزگیری یا جانی نسخان تا حوال رسینگتنے۔

علاقائی حوالکار آک پن کروک لشکر کشی ءِ پک کرینو واہم کوالخواہ تا ہیت دائسکان مونا بتنے۔

بلوچستان نا جتا ضلع تیٹ بشام نا پر تا لڑ بروکا اِرا دے آن مُسہ دے اسکان برجاء مننگ نا گمان ءِ۔

پی ڈی ایم اے نا ترجمان نا ردئٹ تدوکا 24 گھنٹہ ئٹ خضدار، لورالائی، سبی، ژوب، و مسلم باغ ئٹ پِر مس۔ لورالائی ٹی 16، سبی 13، خضدار 6، مسلم باغ 3 و ژوب ئٹ 2 ملی لیٹر پِر ریکارڈ کننگا۔ اندن زیارت، بارکھان، کوہلو، نصیر آباد، جھل مگسی، جعفر آباد و اوستہ محمد ئٹ ہم مدان آ پِر ریکارڈ کننگانے۔

ترجمان پارے کہ بروکا 24 گھنٹہ ئٹ ژوب، بارکھان، زیارت، لورالائی، ہرنائی، سبی، قلات، خضدار، و جعفر آباد ئٹ پِر تا لڑ بروکا اِرا دے آن مُسہ دے اسکان برجاء مننگ نا گمان ءِ۔

بلوچستان نا ضلع چمن ئٹ است و پڈ ئنا دین تالان مسنے 350 بندغ نا جتاء اسپتال آتیٹ دارو درمان مننگ ءِ اندن اسپتال آتیٹ ایمرجنسی ٹہفنگانے۔

ایم ایس ڈاکٹر رشید ناصر پارے کہ چمن ئٹ است و پڈ ئنا دین نا تالان مننگ آن سرکاری اسپتال و بنداوی جانجوڑی مرکز آتیٹ دارو درمان تا بھاز نیستی ءِ سول اسپتال نا وارڈ آتیٹ جاگہ تا کمبوتی نا سوب آن ناجوڑ آتے اسپتال آن پیشن ڈرپ خلنگ برجاء ءِ۔

شاری تا پاننگ ءِ کہ متکنا ڈی ایچ کیو اسپتال ئٹ ہم آسراتی تا نیستی ءِ ناجوڑ آتے ڈرپ ہم رسینگپک۔

محکمہ جانجوڑی نا ردئٹ صوبائی حکومت آن علاقہ ئٹ گیشتر دارو درمان تا فراوانی نا خواست کننگانے ولے دائسکان کوئٹہ آن دوائی رادہ کننگتنے۔

ضلع چمن نا ڈی ایچ او ڈاکٹر عصمت اچکزئی پارینے کہ تیوہ ضلع نا غٹ پرائیوٹ و سرکاری اسپتال آتیٹ ایمرجنسی ٹہفنگانے۔ دا وخت 350 آن زیات است و پڈ آن زیمی بندغ آتا جتا اسپتال آتیٹ دارو درمان مننگ ءِ۔ او مخلوق آن خوراک آتیٹ خیالداری کننگ نا خواست کرینے واہم دائسکان کہنگ نا ہچو حوال اس مونا بتنے و ناجوڑ آتا دارو درمان برجاء ءِ۔

ہفتہ نا دے بلوچستان نا بنجائی شار کوئٹہ نا علاقہ سریاب روڈ آ بلوچستان یونیورسٹی نا خڑک تراک ئس مسنے ہراٹی مُسہ بندغ ٹپی مسنو۔

ٹپی مررکا تے بنداوی شعبہ تدینی بی ایم سی ہسپتال کوئٹہ ٹی جانجوڑی کمک کن رادہ کننگانے ہرافتا چاہنداری محمد علی مار احسان اللہ، عبدلرشید نا مار عبداللہ، عالم گل نا مار رحیم اللہ حوالدار نا پن ئٹ مسنے۔

فورسز آک ودیک پت و پول کننگ ءُ۔ تدینی آن گڈ فورسز آک علاقہ ءِ گھیرہ کرسا سخت چیکنگ بناء کرینو۔

ہفتہ نا دے خاران آن پاکستانی لشکر اسہ بندغ ئس دزگیر کننگ آن گڈ بیگواہ کرے۔

خاہوت نا رد ئٹ محبوب ملازی نا مار شہزاد ملازی ءِ اینو سہب ئنا فورسز آک گدان ہوٹل خاران آن دزگیر کرسا بیگواہ کرینو۔ او ورنا نا رکھوک آجوئی نا خواست کرینو۔

خیال ئٹ مرے کہ بلوچستان ئٹی زوراکی نا بیگواہی تا تدینی تیٹ بھلو کچ ئسیٹی ودکی مسنے۔

بلوچ سیاسی و چاگڑدی تپہ آتا کنڈ آن زوراکی نا بیگواہی تا تدینی تے اشتماعی سزا پاننگانے۔ اوفتا رد ئٹ بیگواہ مروکا بندغ تون اونا تیوہ خاندان ءِ ازیت تننگک۔

بلوچ یکجہتی کمیٹی نا آرگنائزر ڈاکٹر ماہ رنگ بلوچ پارینے کہ زوراکی نا بیگواہی ظلم ئنا گندہ غا دروشم ءِ و دا بلوچ زنک ایسری ءِ گیشتر لمبہ ایتک۔

او اسہ زالبول ئسے نا دوٹی 9 بندغ نا عکس ارفوک عکس ءِ چاگڑدی حوالکاری تلہ تیا تریسہ پارے کہ قلات ئٹ 2016 ئٹ اسہ لشکر کشی اسیٹی اسہ خاہوت نا 9 بندغ برمتہ کننگاسر و اوفک دائسکان ہم بلوچ جہد آ سوج ارفرہ؟

یاتی مرے قلات آن اسہ خاہوت نا زوراکی ئٹ بیگواہ بندغ آتیٹ علی جان نا مار پکار خان، پکار خان نا مار امام داد، پکار خان نا مار عبدالنبی، پکار خان نا مار میر محمد، پکار خان نا مار داد محمد، علی جان نا مار مصطفیٰ، مصطفیٰ نا مار میر جان، زمان خان نا مار سبز علی، زمان خان نا مار تاج محمد اوار ءُ ہرا دائسکان بیگواہ ءُ۔