بلوچ یکجہتی کمیٹی نا گوادر تولوک برانز ایسر، قافلہ جتا علاقہ تیٹ مننگ آن پد کوئٹہ ءِ سر مرو۔

بلوچ یکجہتی کمیٹی نا سروکی ٹی اڈ تروک گوادر جلسہ و ولدا تولوک برانز ئٹ بدل مروک مُچی نا درو حکومتی کمیٹی تون گپ و تران سر سہب مننگ آن پد تنظیم گوادر ئٹ تولوک برانز ءِ ایسر کریسہ اینو تربت کن رادہ مس۔

بلوچ یکجہتی کمیٹی پڑو کرینے کہ بلوچ راجی مُچی نا قافلہ گوادر آن قافلہ تا دروشم ئٹ پیشتمسہ جتا علاقہ تیٹ مریسہ کوئٹہ ءِ سر مرو۔ قافلہ جتا علاقہ تیٹ اڈ کننگ وخت آ راجی مُچی نا شہید آتا یات ئٹ دیوان اڈ ایتو۔

بیان نا ردئٹ قافلہ 10 اگست آ سہب مالو تون تربت آن گریشہ کن سر ہلو۔ گریشہ ئٹ بیگہ نا راجی مُچی نا شہید آتا یات ئٹ دیوان مرو۔ 10 اگست نا ننکان کاروان گریشہ غان سوراب آ ہِنو۔ 11 اگست آ کاروان سوراب آن نوشکے کن رادہ مرو۔ نوشکے ٹی راجی مُچی نا شہید آتیکن دیوان اس اڈ تننگو و 12 اگست آ بلوچ راجی مُچی نا کاروان نوشکے آن شال اکن رادہ مرو۔ شال ئٹ راجی مُچی نا شہید آتیکن دیوان مرو۔

یاتی مرے درو حکومتی گپ و تران کروک کمیٹی تون گپ و تران مننگ آن پد بلوچ یکجہتی کمیٹی اِرا ہفتہ اسکان برجاء مروک گوادر ئٹ تینا بنجاہی تولوک برانز ءِ ایسر کریسس اندن دا وخت نوشکے، کوئٹہ، تربت تون اوار ایلو علاقہ تیٹ تولوک برانز آک برجاء ءُ و گوادر آن بروک قیادت نا ودار کننگ ءُ۔

غدار آ السی تحریک آک – ٹی بی پی سرگپ

پاکستانی لشکر نا حوالکاری تلہ (آئی ایس پی آر) نا ڈائریکٹر جنرل میجر جنرل احمد شریف چوہدری دوبہ خلکنے کہ ”بلوچ یکجہتی کمیٹی تخریب کار آتا پراکسی ئسے، اونا پِن ئنا لیڈرشپ کرمنل مافیا نا پراکسی ءِ، دا پراکسی ءِ ایجنسی تے ملامت کننگ نا کاریم تننگانے، پیشن نا فنڈنگ و بیانیہ غا ٹولی مُچ کننگ دافتا کاریم ءِ۔“

پاکستان ئٹ ہراتم ہم راجی حق و راجی ویل آتیا گواچن السی تحریک آک ودی مریرہ، گڑا ریاستی ادارہ غاک اوفتیا پیشن ملکی فنڈ ہلنگ و انتشار تالان کننگ نا دوبہ خلیرہ۔ بلوچ یکجہتی کمیٹی آن مالو دن انگا دوبہ غاک برجاء سال تیٹ پشتون تحفظ موومنٹ آ خلنگاسر، داڑان بیدس پاکستان ئٹ ”غداری“ نا دوبہ غاک اسٹیبلشمنٹ مخالف السی تحریک و بندغ آتیا خلنگسہ بسنو ولے ریاستی ادارہ غاک طاغت و وسائل مننگ آن پد ہم محکوم راج آتا تحریک آتیا خلوک دوبہ غاتے پاش کننگ ئٹ بے سہب مسنو۔

پاکستان ئٹ سیاسی کڑدہ غاک، بنگلہ دیش نا السی تحریک نا بیدادی مزاحمت نا ذریعت ئٹ حکومت نا ایسری نا مخ تفی کننگ ءُ ولے بلوچستان ئٹ ریاستی تادی آ چُپی دوئی کرینو و ریاستی بیانیہ ءِ پاریسہ بلوچ یکجہتی کمیٹی ءِ عسکری پراکسی گوندنگ ءُ، ہراڑان پاش مریک کہ او بلوچستان نا گواچن حالیت آتیان بے سماء ءُ و ریاستی بیانیہ ءِ بس تکانو۔

بلوچ راجی مُچی ءِ توننگ کن ریاست طاغت ءِ بے کچ کاریم ئٹ ایس و راجی مچی نا قافلہ تیٹ اوار مروک بندغ آتا ٹپی و شہید مننگ آن پد ہم گوادر، کوئٹہ و نوشکے نا تولوک برانز آتیٹ ہزار آتا کچ ئٹ بندغ آتا اوار مننگ آن پاش مریک کہ بلوچ یکجہتی کمیٹی اسہ ٹولی اس اف بلکن السی ہمکوپئی آ ٹہفوک ریاستی تادی تا برخلاف سوگو تحریک ئسے، ہرانا قیادت بیدس متنازعہ ورنا تیا تالان ءِ۔

گوادر ءِ پلویڑ کریسہ بلوچ راجی مچی نا کسر ءِ توننگ و تخریب کار و کرمنل مافیا تا پراکسی گوندنگ آن راجی ویل آتیا بش مروک تحریک ءِ متنازعہ جوڑ کننگ مفک و سیاسی مزاحمت ءِ ریاستی تادی ئٹ توننگ نا دروشم ئٹ بلوچ الس تون بیداد آ مزاحمت آن بیدس پین کسر سلپرو۔

بلوچ یکجہتی کمیٹی کراچی اینو بیگہ نا ”بلوچ راجی مچی“ نا شہید آتے دروت ندر کرے و اوفتا یات ئٹ کینڈل واک و شمع روشن کننگا۔

دا وخت آ کراچی نا بلوچ اکثریتی علاقہ لیاری آٹھ چوک آن کینڈل واک نا بناء مس و بلوچ چوک چاکیواڑہ اسکان ایسر مس ہراٹی زالبول و چنا تا بھلو کچ اس اوار ئس۔

اوار مروک بندغ آک دو تیٹی روشن شمع ارفیسر شہید مروک باسک آتے جوان وڑئٹ دروت ندر کننگا داکان بیدس ”راجی سوغندی دیوان“ ہم اڈ تننگا۔ کینڈل واک نا سروکی ءِ بلوچ یکجہتی کمیٹی کراچی نا راہشون فوزیہ بلوچ و بنجاہی ڈپٹی آرگنائزر لالا وہاب کننگ ئسر۔

دا وخت آ تران کروک آک پاریر کہ نوشکے ٹی پاکستانی لشکر پرامن برانزی تیا سم کاری کریسہ حمدان بلوچ ءِ شہید کرے اندن بلوچستان نا جتا علاقہ تیٹ ریاستی فورسز آک تادی کریسہ راجی مُچی ٹی اوار مروک باسک آتے ٹک کریر ہراڑے اسہ سد آن زیات ٹپی و 3 بندغ بیران مسر۔

اوفک پاریر ک بنجاہی تولوک برانز گوادر ئٹ برجاء ءِ اندن تربت، نوشکے، کوئٹہ، تون اوار بلوچستان نا ایلو علاقہ تیٹ تولوک برانز آک برجاء ءُ۔

تران کروک آک پاریر کہ راجی مچی تیوہ وڑئٹ پرامن و جمہوری جہد ئنا چرجوئی ءِ ولے ریاست ہڑاند بش کریسہ بلوچ الس ءِ راہبند و قانود نا تہٹی مریسہ ہم توار بڑز کننگ کن اِلیپننگ نا بے سہب کوشست کرے، ولے گوادر و بلوچ الس شان تسر کہ بلوچ تینا ڈغار کن اوار ءِ۔

بنگلادیش ئٹی السی بغاوت و شیخ حسینہ نا حکومت نا ایسری آن پد پوسکنا کابینہ سوغند ارفے۔

‏‎بنگلہ دیش نا عبوری حکومت نوبل داد کٹوک ڈاکٹر محمد یونس نا کماشی ٹی سوغند ارفے، صدر محمد شہاب الدین 15 باسکی عبوری کابینہ آن سوغند ارفے، بنگلہ دیش ئٹی 17 سال آن پد عبوری حکومت جوڑ مننگ ءِ۔

‏‎بنگلہ دیش نا آرمی چیف جنرل وقار الزمان پڑو کریسس کہ عبوری حکومت نا سوغند ارفنگ نا مجلس پنچ شمبے نا شام 8 بجہ غا مرو۔

‏‎بنگلہ دیش نا عبوری حکومت نا کماش نوبل داد دوئی کروک ماہر زرگزران محمد یونس پنچ شمبے نا دے ڈھاکہ غا سر مسس۔

‏‎خبر تروک ایجنسی اے ایف پی نا رد ئٹ بنگلہ دیش آ واپس بننگ آن اسہ دے مُست محمد یونس تینا بیان ئٹی پاریسس کہ ’ای باز اُست ہسونی ئٹ ہر اسٹ ءِ پاوہ کہ جارات تون مبو، ہر وڑ ئنا بیدادی آن مُر مبو سگ ئٹ ڈیہہ ئنا تعمیر کن تیار مبو۔

بھلو کچ ئسیٹی السی برانز آتا سوب آن دو شمبے نا دے شیخ حسینہ واجد وزیراعظم نا عہدہ آن استعفیٰ تننگ آن گڈ محمد یونس عبوری حکومت نا کماش گچین مسنے۔

بلوچ یکجہتی کمیٹی نا ترجمان پارینے کہ تدوکا دے اوتھل زیروپوائنٹ آن گوادر آ ہنوکا ہندی بندغ آتے انتظامیہ نا کنڈ آن توننگ و اجازت نامہ ہلنگ نا حکم بلوچستان نا کالونیل حیثیت ءِ پاش کیک۔ ریاست و اونا کُل ادارہ غاک ہر بروکا دے تینا ہر اسہ گھام ئٹ ہندی بندغ آتیا پاش کیرہ کہ بلوچستان ئٹی اوفتا حیثیت مسٹمیکو درجہ نا شاری یا غلام نا ءِ۔ دا ریاست نا راہبند نا ارا شق ئٹ نوشتہ ءِ کہ ہندی بندغ آتے تینا اُرا تیان ہِننگ کن اجازت نامہ ہلوئی تمو؟ بلوچ راج ءِ تینا سرزمین آ مُست آن سیاسی اشتماع اڈ تننگ نا موکل اف، ہیت ئنا آجوئی اف، پریس کلب ئٹی اوفتیکن کلف خلنگک، میڈیا بلیک آؤٹ ءِ، قانودی جنگ ئنا اجازت اف۔ داسا بلوچ راج ءِ تینا اُرا تیا ہِننگ کن شاہی انتظامیہ آن اجازت ہلوئی تمو۔ دننگا قانود آک بلوچستان ئٹی برٹش کالونیل نا وخت ئٹی ہم الور۔ نن سرپند مرینہ کہ داسا ریاست دا فیصلہ کرینے کہ بلوچ راج ءِ تینا سرزمین آن تیوہ کشنگ مرے، انداسوب آن او بربریت و ظلم ئنا کُل سیم تی سر کننگ ءُ۔

بیان ئٹی پاننگا کہ ریاست نا دا کالونیل نظام و قانود نا برخلاف بلوچ راج ئتون داسا اسہ منظم مزاحمتی جہد ئسے آن بیدس پین کسر اف۔ اگہ دا فاشسٹ نظام نا برخلاف نن پین چُپ مسون یا چنکو چنکو ٹولی تا دروشم ئٹ جہد کرین تو دا سرزمین آن ننا پن و نشان ڈھرفنگ مرو۔ ننا راجی بقاء بیرہ اتحاد و یکجہتی و منظم مزاحمتی جہد ئٹی ءِ۔ ریاست ءِ دا وختا کُل آن زیات تکلیف بلوچ راج ئنا سیوتی و یکمشتی آن ءِ، ہرا نا مثیل بلوچ راجی مچی ءِ۔ دا راجی مُچی ٹی ارا وڑ بلوچ راج سیوتی و یکمشتی نا درشانی کرے، داڑان ریاست ءِ بلوچستان ئٹی تینا ظلم و زوراکی نا نظام ءِ برجاء تخنگ نا بابت ئٹ خلیس محسوس مس۔ اندا سوب آن نن خنان کہ اسہ راجی سیاسی مُچی ئسے توننگ کن ریاست اخس تاغت و بےدادی کاریم ئٹ ہیس، بھازی آن ریاست تینا تیوہ دیہاڑ ئٹی اسہ سیاسی اجتماع ئسے توننگ کن داخس تاغت کاریم ئٹ ہتنے۔ ننا دلیر و باشعور ورنا تا قربانیک راجی تلہ غا ہمو شعور و چاہنداری ءِ ودی کریر ہرا نا بھرم بحیثیت راج ننگ بروکا وخت ئٹ خننگ کن رسینگو۔ ننے اندا شہید آتا قربانی تے نظر ئٹ تخِسہ تینا نیام ئٹ سیوتی و یکمشتی ودی کروئی تمو و دا جہد ءِ پین منظم و ترند کروئی تمو۔

گوادر ئٹ بلوچ یکجہتی کمیٹی نا سروکی ٹی تولوک برانز یانزدہمیکو دے ہم برجاء، ارٹمیکو پارہ غا بی وائی سی نا سروکی ٹی کوئٹہ، نوشکے، پنجگور و تربت ئٹ ہم تولوک برانز و ریلی تا لڑ برجاء ءِ۔

بلوچستان نا دریابی شار گوادر ئٹ بلوچ یکجہتی کمیٹی نا بلوچ راجی مُچی تولوک برانز تدوک یانزدہ دے آن برجاء ءِ۔ انٹرنیٹ و موبائل سروس آتیتون اوار شار ئٹ دیر ئنا سپلائی ہم بند ءِ۔ شار ئنا تہہ و پیشن نا کسر تا بند مننگ آن خوراک و ایلو گِڑا تا نیستی ودی مسنے۔

بی وائی سی تولوک برانز نا درو نا حوال ءِ چاگڑدی حوالکاری تلہ غا شینک کریسہ پارے کہ بلوچ راجی مُچی آ ظلم ئنا برخلاف بنجاہی تولوک برانز دا وخت گوادر ئٹ برجاء ءِ۔ گوادر تولوک برانز ئٹ درو السی دیوان اڈ تننگا ہراٹی بلوچ یکجہتی کمیٹی نا قیادت و مخلوق نا نیام ئٹ ساڑی آ حالیت آتیتون اوار جتا سرحال آتیا ہیت و گپ مس۔ بلوچ راجی مُچی ٹی اوار مروک آک غٹ ریاستی ظلم و تادی تیان پد ہم حوصلہ مند ءُ۔

بی وائی سی نا ردئٹ تدوکا دئے دے آن گوادر تون اوار تیوہ مکران ئٹ قیامت ءِ، دائسکان گوادر تون اوار مکران نا بھاز آ علاقہ تیٹ انٹرنیٹ و نیٹ ورک آک بند ءُ، مکران نا بھاز آ علاقہ تا کسرک ہم دائسکان بند ءُ ہرافتا سوب آن خوراک و دوا تا نیستی ودی مسنے۔ داڑان بیدس گوادر ئٹ دیر نا سپلائی ہم بند کننگانے۔ اوفتا پاننگ ئس کہ گوادر ئٹ بلوچ راجی مُچی آ ظلم و تادی نا برخلاف دا وخت گوادر آن بیدس کوئٹہ، نوشکے، پنجگور و تربت ئٹ ہم تولوک برانز آک برجاء ءُ۔

ایلو پارہ غان بلوچ یکجہتی کمیٹی پنجگور نا تولوک برانزحق دو تحریک نا کماش ملا فرہاد و ایلوفتا سروکی ٹی ڈپٹی کمشنر پنجگور آفس نا مونا بنجاہی کسر آ برجاء ءِ۔ تولوک برانز ئٹ اوار مروک آتا ردئٹ برانز بنجاہی کال اسکان برجاء مرو۔

ایڑے تربت ئٹ ہم تولوک برانز برجاء ءِ۔ درو تربت تولوک برانز ئٹ ”بلوچ راجی مُچی آ تادی و ساڑی آ حالیت“ نا سرحال آ سیمینار اس اڈ تننگا۔ ہراڑے سیاسی، چاگڑدی و ادبی تپہ تون تعلقداری تخوک جتا بندغ آک تران کریر۔ تران کروک آک بندغی حق آتا برجاء لتاڑنگ و بلوچ راج ئتون مروک ناروا سلوک آ روشنائی شاغار۔

ایلو پارہ غان کوئٹہ ئٹ ہم بلوچ یکجہتی کمیٹی نا سروکی ٹی تولوک برانز برجاء ءِ، تولوک برانز ئٹ اوار مروک آک میڈیا تون ہیت کریسہ پاریر کہ پرامن برانز کن حوصلہ مند اُن، اوفک گپ و تران نا وخت آ دزگیر کننگوک بندغ تا دمدستی یلہ کننگ نا خواست کریر و ریاست آ زور شاغار کہ او اوفتا خواست آتے پورو کے و بلوچ آتا برخلاف ظلم ءِ ایسر کے۔ اوفتا پاننگ ئس کہ انصاف فراوانی و بلوچ الس نا حق آتا منّنگ اسکان تولوک برانز برجاء مرو۔

کوئٹہ غان دزگیر مننگ آن پد زوراکی ئٹ بیگواہی نا گواچی مروک بلوچ خوانندہ تنظیم نا کماش دائسکان آجو کننگتنے۔

26 جولائی آ اسپنی روڈ کوئٹہ غان زوراکی ئٹ بیگواہی نا گواچی کننگوک بلوچ اسٹوڈنٹس آرگنائزیشن نا اِرا بنجاہی راہشون تیان اسٹ اینو آجو مسنے واہم تنظیم نا کماش دائسکان آجو متنے۔

پاکستانی لشکر تدوکا توہ گوادر ئٹ اڈ تروک بلوچ راجی مُچی نا تیاری تیٹ اختہ بی ایس او نا کماش جیئند بلوچ و کمک کماش شیرباز تون اوار اوفتا کیہی سنگت آتے دزگیر کریسس ہراڑے پدان ایلوفتے یلہ کننگا واہم جیئند و اوفتا پین مُسہ سنگت ءِ نادرست ہند آ دننگاسس۔

درو جیئند بلوچ و شیرباز نا خاہوت آک کوئٹہ ئٹ پریس کانفرنس کریسہ خواست کریر کہ اگہ اوفتا بندغ آتے بروکا چار دے ئٹ آجو کریسہ مونا ہتنگتو گڑا اوفک برانز نا پڑو کرور۔

اندا وخت ئٹ بی ایس او نا سینئر وائس چیئرمین شیرباز بلوچ اینو آجو مریسہ تینا اُرا ءِ سر مسنے واہم جیئند نا بابت دائسکان ہچو شابیتی حوال اس مونا بتنے۔

کوئٹہ آن زوراکی ئٹ بیگواہ کننگوک جیئند بلوچ و شیر باز بلوچ نا خاہوت آک بلوچ یکجہتی کمیٹی و وی بی ایم پی نا سروک آتتون اوار پریس کانفرنس کرسا پاریر کہ 26 جولائی نا نن اسپنی روڈ کوئٹہ آن بلوچ اسٹوڈنٹس آرگنائزیشن نا بنجائی چیئرمین جیئند بلوچ و سینئر وائس چیئرمین شیر باز بلوچ ءِ منَہ پین سنگت تون اوار پولیس و سادہ پُچ بینوک بندغ آک زوراکی ئٹ بیگواہ کریر و قائد آباد تھانہ غا دیر۔ ہراکان پد ایلو دے اوفتا ایلو سنگت آتے یلہ کننگا و منَٹ ئسے جیل آ راہی کننگا ولے جیئند بلوچ و شیر باز بلوچ ءِ نادرست ءُ جاگہ ئسے آ دننگانے و اوفتا بارو ئٹ ننے ہچو حوال رسینگتنے۔

او پاریر کہ بلوچ چاگڑد ئٹی بی ایس او بلوچ خوانندہ و ورنا تیکن سیاسی و چاگڑدی علم ئنا درسگاہ نا حیثیت تخک ہرا تاریخی وڑ ئٹ خوانندہ و الس ئنا اوڑدئی ویل و محکومیت نا برخلاف جمہوری و ترقی پسند اصول آتیا ساڑی نمائندہ تنظیم ئس رہینگانے۔ ولے بدبختی ئٹ تدوکا کیہی دہک آن بلوچ چاگڑد آ چَٹی مروک زوراکی و استحصال آ ساڑی پالیسی تا ذریعت ئٹ ہر وڑ ئنا سیاسی و جمہوری جہد آ قدغن خلنگانے۔ حق ئنا ہیت ءِ کننگ آ یا برانز تیا الس آ سم کاری کننگک و ورنا تے زوراکی ئٹ بیگواہ و دروغ ئنا کیس آتا گواچی کرسا ظلم ئنا برخلاف ہر توار ءِ توننگ نا کوشست کننگک۔ نن سرپند مرینہ کہ جیئند بلوچ و شیر باز بلوچ تون اوار ہزار آ بیگواہ غا ورناک راج ئنا توار مننگ نا سوب آن زوراکی نا بیگوائی تا گواچی کننگانو۔

او پاریر کہ تدوکا کیہی سال آن ننا خاہوت چرجوئی ئٹ زوراکی نا بیگواہی و دروغ ئنا کیس آتون مون تننگ ءِ۔ 29 نومبر 2018 آ نن نیمہ غا ننا اُراغان پاکستانی لشکر جیئند بلوچ، اونا باوہ و چُنکا ایلم حسنین بلوچ ءِ زوراکی ئٹ بیگواہ کرے۔ جیئند بلوچ ءِ 8 تُو اسکان ٹارچر سیل ئٹ بیدس ڈوہ آن بندی کننگا و اونا چُنک سن ایلم حسنین بلوچ آ دروغ ئنا کیس خلِسہ کراچی جیل آ رادہ کننگا ہرا داسکان جیل ئٹی بندی ءِ۔ دا تدینی تیان ننا خاہوت ءِ چرجوئی ئٹ ذہنی بے دادی و سختی تا گواچی کننگانے ہرا داسکان برجاء ءِ۔ ننا خاہوت آ چَٹی مروک دا ظلم آن ننا گُٹ خلاصی و انصاف نا خواست کینہ۔

او پاریر کہ یاتی مرے کہ 28 جولائی آ گوادر ئٹ مروک راجی مچی نا برخلاف حکومتی کریک ڈاؤن نا سوب آن کوئٹہ و تیوہ بلوچستان ئٹی کیہی ورنا تے دزگیر کننگانے ہرافتیٹی جیئند بلوچ و شیر باز بلوچ ہم اوار ءُ و اوفتے ہچو عدالت ئسے ٹی نہ ہتنگانے نہ جیل آ رادہ کننگانے۔ پولیس تھانہ غا تیان ورنا تا بیگواہی خاہوت کن خلیس نا سوب و الس ئنا رکھ ئنا پنا جوڑ مروک ریاستی ادارہ غا تیا سوالیہ نشان ءِ۔

او پاریر کہ نن دا پریس کانفرنس نا ذریعت ئٹ ریاستی ادارہ غاتے ہم دا کلہو تننگ خواہنہ کہ جیئند بلوچ و شیر بلوچ زمہ وار و پرایمن سیاسی باسک ءُ ہرا اگہ ڈوہ ئس کرینو اوفتے شرف ئٹ یلہ کرسا ریاستی عدالت آتیٹ ہتیر۔ نہ تو ننا خاہوت نا بے ڈوہ ورنا تے بیدس عدالت عقوبت خانہ غا تیٹ بندی تخنگ ننے ہچ وڑ آ قبول اف۔ اگہ جیئند بلوچ و شیرباز بلوچ ءِ 11 اگست اسکان آجو کننگ متو گُڑا ننا خاہوت نا کنڈ آن 12 اگست آ ہدہ منو جان روڈ آب اسہ پر ایمن ریلی ئس کشنگ مرو نن غٹ ترقی پسند سیاسی و چاگڑدی تپہ غا تیان خواست کینہ کہ جیئند بلوچ و شیرباز بلوچ نا رکھوک آجوئی کن تعاون کیر و ریلی تون اوار چاگڑدی حوالکاری میڈیا غا ٹرینڈ آتیٹ بشخ ہلیر۔

اِرا دے ئٹ بلوچستان آن خوانندہ تا خودکشی نا اِرا تدینی رپورٹ مسنو۔

پسنی نا علاقہ سردشت ئٹ کلانچ آن میٹرک نا خوانندہ صمد نا مار جنید لخ ئٹ چِٹ اس شاغسہ خودکشی کرے، واہم خودکشی نا سوب آک مونا بتور۔

حوال تا ردئٹ خودکشی نا تدینی درو شام نماز آن پد مس۔ المی کارروائی آن پد جون خاہوت نا دوٹی تننگا۔

اِرا دے ئٹی بلوچستان ئٹ خوانندہ تا خودکشی نا اِرا تدینی مونا بسنو، درو بلوچستان نا بنجاہی شار کوئٹہ ئٹ تربت نا ہندی خوانندہ چراغ بلوچ جامعہ بلوچستان نا ہاسٹل نا کوٹی ٹی لخ ئٹ چِٹ اس شاغسہ خودکشی کریسس۔

بلوچستان ئٹ خودکشی نا تدینیک اسہ بھیم بش کروک حالیت اس دوئی کرینو ہڑدے خودکشی نا تدینیک رپورٹ مریسہ کیرہ داکان مالو بیست و ہفت جولائی آ ہم ضلع کیچ نا علاقہ ئٹ اسہ کیس اس رپورٹ مسوسس ہراڑے حاجی محمد عمر نا مار ناصر ہند دشت شولیگ خودکشی کریسس اندن اونا ہم خودکشی نا سوب آک ہم سماء تمتور۔

بلوچ یکجہتی کمیٹی نا ترجمان تینا اسہ بیان اسیٹی پارے کہ ریاستی ڈھکوک ادارہ و پِن ئنا صوبائی اسمبلی نا باسک آک بلوچ راجی مُچی نا شہید آتا خاہوت آتے ایف آئی آر کننگ نا معاملہ ٹی بھیم نا گواچی کننگ ءُ۔

او پارے کہ نن ریاستی ڈھکوک ادارہ و بیرہ پِن ئنا صوبائی اسمبلی نا باسک آتیا پاش کینہ کہ تینا گندہ غا حرکت آتے یلہ کبو۔ نن تکنہ کہ دا وخت آ ریاست ہرا وڑ بلوچستان ئٹ ظلم و تادی تا گندہ غا مثیل آتے سر تننگ ءِ، بھاز زو دا ظلم و تادی تا برخلاف مخلوق نا سگ جواب ایتو و دا ظلم و تادی تا برخلاف لکھ آ بندغ آک کسر تیا پیشتمور و دا ظلم و زوراکی نا زی آ ٹہفوک نظام ءِ روتہ غان کشور خسور۔

او تینا بیان ئٹ پارے کہ پِن ئنا صوبائی اسمبلی نا باسک آتیا ہم پاش کینہ کہ ہرا وڑ اسہ سیٹ و منہ مراعات کن نم شاہ آن زیات شاہ ئنا وفادار جوڑ مننگ نا کوشست کننگ اُرے و تینا مخلوق آ ظلم و تادی نا مخ تفی کننگ اُرے، دا چاگڑدی ڈوہ ئنا سوب آن نمے ہم چاگڑدی ردعمل تون مون تروئی تمو۔