بلوچ سلہہ بند جہدکار و نواب خیر بخش مری نا خڑک ئنا سنگت بالیل مری نا مار شری حمد مری 75 سال نا سن ئٹ درو دا کوڑی آن رخصت کرے۔
شری حمد مری مُسہ شہید سرمچار تل خان مری، شیر علی مری، بالیل مری نا باوہ اندن شہید گہاور خان مری نا اِلہ ئس۔
شری حمد مری نواب خیر بخش مری نا خڑک سنگت اس ئس و دہائی تیان بلوچ راجی جنز ئتون تفوک ئس۔
زند ئنا گڈیکو دے تیٹ او تینا خن تیان ہم ہناسس ولے پدا ہم 75 سال نا سن اسکان جہد ئتون تفوک مس۔
بلوچستان نا ضلع خاران آن پاکستانی لشکر اسہ بندغ ئسے دزگیر کریسہ نادرست ہند آ درے۔
شابیتی حوال تا ردئٹ 6 فروری آ خاران ئٹ پاکستانی فورسز ایف سی اسہ بندغ ئسے کیمپ آ خوائفیر و ہموکان اودے دزگیر کریسہ بیگواہ کرینو۔
حوالکار تا ردئٹ بیگواہ مروک بندغ نا چاہنداری نظر محمد نا مار اسداللہ نا پن ئٹ مسنے ہرا پیشہ نا ردئٹ میونسپل کیمٹی نا ملازم اس ئس۔
حوالکار تا ردئٹ فورسز آتا دو آن زوراکی ئٹ بیگواہی آن پد اونا بابت ہچ وڑ نا معلومداری اس رسینگتنے ہرانا سوب آن اسداللہ نا خاہوت بھاز پریشان ءِ۔
یاتی مرے کہ برجاء سال فروری ٹی دائسکان دئے ئنا کچ بندغ نا زوراکی ئٹ بیگواہی نا کیس آک رپورٹ مسنو اندن مچھ دروغ نا مونتس ئٹ پنچ بندغ کسفنگار ہرافتیٹ چار ئنا چاہنداری مالو آن زوراکی ئٹ بیگواہ بندغ تیان مس۔
بلوچ اسٹوڈنٹس آرگنائزیشن آزات نا بنجاہی کماش درپشان بلوچ پارے کہ کوزہ گیر پاکستانی ریاست ہرا بلوچستان آ بے قانودی، بے اخلاقی و بے بندغی ڈول ئٹ زوراکی، بیدادی و طاغت نا زور آ کوزہ گیر نا دروشم ئٹ ساڑی ءِ و طاغت و بیدادی نا وسیلہ ئٹ بندغ آتے چپ و غلام کرینے داڑان جمہوریت، جمہوری و بندغی اقتدار و سول سپریمیسی نا بڑزی نا امیت تخنگ آمخ آتا جنت ئٹ مننگ نا ہیت ئسے۔ پاکستانی ریاست بنجاہی تلہ غا ہراڑے جمہوریت ءِ کسفینے و تدوکا ہفتاد سال آتیان فوج وختس سیدھا تو وختس پدی حکومت کریسہ بننگ ءِ ہموڑے بلوچستان نا منہ مفاد پرست بندغ جمہوریت و پارلیمنٹ نا رٹہ ءِ خلوک توسنو و الس ءِ دروغ تغ نشان تننگ ءُ۔ اوفک بایدے الس ءِ دا بیرہ پن ئنا جمہوریت و ریاستی بست و بند ئتون تفنگ کن خوار کننگ نا جاگہ غا راجی بقاء و جہد آجوئی نا عمل و فکر ئتون گنڈارہ تانکہ زوت آن زوت دا ناسور آن بلوچ نا جان خلاس مسکہ۔
او پارے کہ ہراڑے دا ڈیہہ ئٹ کوزہ گیر پنجابی حاکم آتے لاہور و اسلام آباد ئٹ فوج نت ئنا شیف آ تخانے ہموڑے بلوچستان ہرا ریاست نا کالونی ئسے و داڑے اسکول آن ہلیس واٹر سپلائی نا معاملہ تے اسکان فوج اُریک انداکان منہ بیرہ پن ئنا جمہوریت دوست وختی مفاد آتا خاطر بلوچ الس ءِ اسہ دروغ امیت اس تننگ نا بے سہب کوشست کننگ ءُ و داخس وفاداری کننگ آن پد ہم فوج ئنا پارہ غان اوفتے رد کننگا تو داسہ پوہاڑ بناء کرینو کہ گچین کاری تیٹ دروہ مسنے۔ ہرا ڈیہہ بلوچستان ئٹ دروہ نا بنداو آ ساڑی ءِ اوڑان صاف گچین کاری نا امیت تخننگ تینے آمخ جوڑ کننگ نا بریبر ءِ۔
درپشان بلوچ پین پارے کہ بلوچستان ئٹ السی ردعمل و گچین کاری تیان بائیکاٹ اوفتیکن سبخ ئسے کہ او دا بے سہب کوشست ءِ یلہ کیر ہرا پارلیمنٹ آن ننا باوہ و پیرہ غاک ہچس دوئی کننگ کتور داکان ڈاکٹر مالک و بی این پی کون آ بندغ آک ہرا اسہ پارہ غان بلوچ آتے پارلیمنٹ کن بچ ایترہ اندن ارٹمیکو پارہ غان اندا نا برخلاف نعرہ خلیسہ بلوچ راج ءِ دروہ تننگ نا کوشست کیرہ او ہچس دوئی کننگ کپسہ۔ بلوچ راج ہراڑے اینو کوزہ گیر پاکستان نا اصلیت و گواچنی آن واخب مسنے ہموڑے اینو او بلوچ راج ئٹ ساڑی دا مفاد پرست بندغ تے ہم چائسنے ہرا اسہ پارہ غان جمہوریت، پارلیمنٹ و ریاست نا ہیت ءِ کیرہ اندن گواچن ئٹ او ریاست نا مہرہ نا ڈول کاریم کیرہ ہرا بلوچ ڈغار آ کوزہ کرینے۔ داسہ تو پنجابیک ہم دا بے سہب آ جمہوریت آ ملنڈ کننگ ءُ ولے بد بختی آن منہ بندغ ریاست نا منہ مفاد نا خاطر بلوچ مفاد آتے چرجوئی ئٹ سودا کریسہ بندغ تے بچ تننگ ءُ و منہ مراعات آتا خاطر راج دژمنی نا کاریم سر تننگ ءُ ولے دا ریاست ہرا تینا بندغ آتیتون وفادار اف گڑا اسہ غلام ئسے نا دروشم ئٹ نم امر اوڑان امیت تخنگ کیرے۔
بی ایس او آزات نا کماش ایسر ئٹ پارے کہ بلوچ راج اوفتیان حساب ہلے ہرا چرجوئی ئٹ دروغ گوئی و راجی مفاد آتے نسخان تننگ کن کاریم کننگ ءُ۔ اسہ پارہ غان اوفک الس نا اُست خواہی تیان پد ہم علاقائی، قبائلی و سیالی و ایلو حکمت عملی تے کاریم ئٹ ہتریسہ منہ بندغ ءِ ووٹ تننگ کن بیوس کریر تانکہ تینا آقا تے خوش کننگ ئٹ سر سہب مریر اندن داسہ ہراتم ریاست تینا گواچن دروشم ءِ نشان تریسہ اوفتے رد کرے گڑا اوفتے بلوچیت و جمہوریت یات بس و داسہ بندغ تے جمہوری جہد ئنا پن آ رد شاغنگ نا کوشست کننگ ءُ۔ بلوچ الس اوفتا گواچنی آن واخب مرے بلوچستان ئٹ پارلیمنٹ دوست ءُ اسہ بندغ اس ہم بلوچ دوست مننگ کپک انتئے کہ دا بندغ آک پارلیمنٹ ئٹ مریسہ بلوچ دژمنی سر تریسہ بننگ ءُ و بلوچ راجی مڈی تا سودا بازی ٹی کل آن مون ئٹ ءُ۔
کنا ڈائری
نوشت: نوید احمد
دی بلوچستان پوسٹ
گڑاس سوج ءُ ہراتے عقل اُست ئنا لار آن مُر تخیسہ، خفتیٹی کرار ءُ توار اسیٹ پائک ”نی زندہ اُس“ داکان گڈ اسہ دریہو ئس کنا دامون ایمون تموک خیسن آ گلاب آتیان ہمو ذباد ءِ تا گوہک، مگہ دا دریہو چاہنداری ءِ؟ دیچا تا۔ ہمو ای کہ اِستو خاچاسٹ، خن پٹنگ آ، ای ہمو سلتنٹ۔ دا سوب! امرو سوب ئسے۔ ای امود اُٹ یا کنے کنا تغک مَٹ کرینو۔ گواچنی کا بندغ ءِ تدینی، خوائش و تغک مٹ کیرہ۔ ولے دافتیان ہرا اسٹ؟ لاتمائی ٹی زند اخس گچین ءِ، لاتمائی ٹی خوشی ہم اخس چُنک ءِ۔ اندا سوج بھازیکا مغز آتیا لگوک چُنکا چنکا خوائش و خوشی تے سگریٹ نا ہِس آنبار چنڈیک۔ پاننگ کن تو ”چاہنداری“ بھلو نعمت ئسے ولے دا خوڑتی ئٹ ہننگ آ بھلو ازیت ئسے۔ ولے زند ئنا چائنگ و مسخت ءِ گچین کننگ بھلو گڑتی ءُ۔ انداڑان چندی فلسفیک دا گمان کریسر کہ مرگ راست ئسے ولے دا زندہ مننگ آن کس ءِ تورپک۔ زند خوائش، تُغ، و خوشی تا نیام اٹ خن پٹنگ نا اسہ مسلسل سفر ئسے۔ دافتا نیام اٹ مسخت ءِ گچین کننگ کیرہ ولے بھاز آک اسل تپسہ تا۔ نن نیمہ ٹی تینا ڈائری آ دا لکھیسہ خلقی تا توار توار آن او تینا کوٹی آن پیشتما۔
پیشن خلقی تا بھلو مچی ئسے، بھاز انگا توار توار آن دا مُچی نا سوب ءِ پہہ مننگ سخت ئس۔ ولے پدا ہم او خف توننگ ءِ نوا سماء تمے۔ دا ہمو شار نا گلی کوچہ غاک خُفتن نا نماز آن پد ویران مریرہ۔ ولے اینو اوہن اف۔ دا مچی، دا کوک و پاہوڑ نا سوب گڑاس تو ارے۔ انداڑتون ماما سفر پائک: ”ننے دا خلق آن پین خلق ئسے آ انوئی مریک انتئے کہ پیر انگاک پارینو سفر نا تُو اٹ ہرا شار اٹ کس ئس کسک او شار آ بھلو ویل ئس بریک پیر انگا تا ہیت آک خل ئنا چِشخ مریرہ۔“ دا پاریسہ او تینا ہیت ءِ چُٹیفے۔ نَبل ہرادے خلق اونا زمینداری آن چائک، توار کرے کہ: ”شیف بُٹ ئنا ڈغار تیٹی، سنجد نا درخت آ، مُسہ دے ئنا ءِ بُومب ئس خنیوہ تولوک ءِ بس دا شار ئنا کنڈا ہریک۔“ او او پیر انگاک پارینو: ”بُومب ہرا خلق آ نظر تخا اوٹی نیستی بریک۔“ ”دانگان گلزار نا دن کہنگ سفر نا تو اٹ، و سنجد نا درخت آ بومب۔ ای تو پاوہ نن زوت زی ئنا شار اٹ ہندی مرین۔“ ماما سفر تینا پیہن آ ریش تو گوازی کریسہ پارے۔ انداڑتون خلقیک غٹ او کریر۔
اوڑکن دا غٹ عجیب ءُ گپ ئسر، ولے دا ہیت گواچن ءِ کہ زند تدینی، خوائش و تغ تا سفر ءِ۔ اندا سوج کریسہ پارے ”خیر دا اسہ تدینی ئس تو ارے۔“ مننگ کیک دا ہیت آک راست مریر، مننگ کیک دا غٹ دروغ مریر۔ ولے خلقی تیتون خلقی تا وڑ مروئی مریک۔
پنچ شمبے نا نن ءِ، خلق غٹ آ تینا اُرا تے اِلیسہ ءِ۔ زی ئنا شار والا تیتون ماما سفر گپ کرینے کہ ننے منہ وخت ئکن امو شار اٹ باہوٹ النگ کن البو۔ اسٹ اسٹ آ کُل آ شار ہجرت کرے۔ داسہ داڑے چُک ئس ہم چِڑپک۔ اندنو چُپی ئس تالان ءِ کہ پن ریچ آن تموک آ پن ئنا توار ہم بننگ مریک۔
او ہم خلقی تیتون، تینا اسٹ آ میراث؛ ڈائری، دوٹی ہجرت کرے۔
جمعہ نا نن ءِ، وخت و پاس خفتن نا نماز نا ءِ، او تینا ڈائری نا ارٹ میکو پنہ ءِ ملانے قلم دوٹی سوج کننگ ءِ، درو نا ہجرت و ماما سفر و نَبل نا گپ آک اونا چاہند آ اثر کرینو۔
بومب، سفر نا تُو و زوال!!! پین چندی سوج آک ودی مسر، ولے دا غُٹ آ خلق امہ یخین کرینے دا غٹ آ۔ مگہ دیہاڑ اٹ اندنو تدینی ئس مسنے ہراڑان دا خاہوت نا زند مٹ مسونے۔ مننگ کیک اندن مرے، پیر انگاک ہر تدینی ءِ چاہنگ نا سخت تخانو۔ داڑے زندہ مننگ کن زوال ءِ علامت آتیٹی پٹانو و زندہ مننگ نا خوائش اٹ دا علامت آتے خننگ تو گو ئس لگیک زندہ مننگ کن۔ ولے مگہ دافک مرگ ءِ گچین کننگ کپسہ، اگہ واقعی اندنو گپ ئسے بومب و انجیر نا گڑا پدا ہم مرگ آن نرنگ مفک! نا مسونے۔ بندغ نا جہد دنکہ زندہ مننگ نا ءِ، ہراڑان او قدرتی آفت آتے چاہنگ نا خوائش اٹ علامت آتے معنہ تسونے۔ دا غٹ چاہنداری انتئے یخین نا پلو اٹ پلویڑ مننگ ءِ۔
مُسٹمیکو پنہ غا ”زند“ لکھا و خالی الا تے بش مس۔
قانود نا مونا
نوشت: فرانز کافکا | مٹ: انیس بلوچ
دی بلوچستان پوسٹ
قانود نا مونا اسہ دربان اس سلِک۔ وطن نا باتی ئس بریک و قانود نا مونا پیش مننگ نا خواست کیک۔ ولے دربان اودے پاہک کہ دا وخت آ ای نے قانود نا مونا پیش مننگ کن اِلنگ کپرہ۔ بندغ پش اس ٹک خلیک پدا سوج کیک کہ بروک وخت اٹ کنے قانود نا مونا پیش مننگ نا وار رسینگو یا آخا۔
دربان پارے ”نے وار ملو ولے داسہ آخا“۔ انتئے کہ بھلا در تو ساندہ یلہ ءِ، دربان مچے مُر مس و دا بندغ کاٹم ءِ شیف کرے تہٹی اُننگ کن۔ انداڑتون دربان ٹاکو اس خلک و پارے: ”اگہ داخہ در گچین لگک نے گڑا کنے تَک اٹ اتپہ تہٹی اِن۔ ولے دا پاو نے کہ ای بھاز طاغتور اُٹ۔ و ای کُل آن کم زوراک آ دربان اُٹ۔ ہال آن پد ہال نا تہٹی ایلو دربان آک سلوک ءُ اوفتیان ہر اسٹ ایلو آن زیات زوراک ءِ۔ بیرہ مسٹمیکو دربان نا بصارت انداخس تیز ءِ ہرا کہ کنا وس آن تیر ءِ۔“
وطن ئسے نا دا باتی داخہ در خواری خنتویسس۔ او ٹک خلک کہ باہد ءِ قانود اسکان رسائی تو ہر وخت و ہر بندغ ءِ مرے۔ ولے ہراتم کہ او دربان نا فرکوٹ، بھلا بامُس و موننگا تاتاری آ ریش آ خوڑتی اٹ اُرا تو اودے لگا کہ تہٹی اننگ کن اجازت نا ودار کننگ جوان مرو۔
دربان اودے کرسی اس ایتک در ئنا رہی آ تولنگ کن۔ دا بندغ اموڑے کیہی دے و سال آتسکان تولک۔ او تہٹی اننگ کن وس آتے تینا خلیک و تینا مِنت کننگ آتیٹ دربان ءِ بیزاری کیک۔ دربان ہر وخت اوڑتون گپ شپ کیک و اوڑان اونا اُرا و بھازا گڑا تا باروٹ سوج کیک۔ ولے ہرا وڑ اٹ کہ ہرفوڑ آک سوج کننگارہ۔ اندُن لگاکہ کہ بھلو افسر اس سوج کننگے۔ او ہر وار آ گڈ سر اٹ اندا پاریکہ کہ ای نے قانود نا مونا پیش کننگ کپرہ۔
او بندغ ہرا کہ ہر گڑا غان سنج تینا سفر آ پیشن مسوسس وس کیک، دربان ءِ رشوت تننگ کن تینا ہر نہادی آ گڑا ءِ کاریم اٹ ہتیک۔ دربان اونا ہر گڑا ءِ ہلیک ولے دا پاہک: ”ای دا گڑا تے دا سوب آن قبول کننگ اُٹ کہ نی دا ٹک ءِ خلپیس کہ نی اچ کوشست اس کتویس۔“
او دا کیہی سال آتیٹجاچ ہلیک کہ دربان اسہ جاگہ غا امو وڑ اٹ سلوکے۔ او ایلو دربان آتے اُستان دیک و اندا اولیکو ءِ تینا و قانون نا مون اٹ اسہ بھلو مش اس سرپند مریک۔
او اول نا سال آتیٹ تینا شومئی قسمت ءِ چیہانٹ اٹ بد رد کیک ولے پدان، اندن کہ او پیر مرسا کیک گڑا بیرہ چپی اٹ تینے پٹ و ملامت کیک۔ اودے پام اِلیک، او دربان ءِ کیہی سال آتا اُننگ آن گڈ اونا فر کالر نا جوجک آتیان خواست کیک کہ نم کنا کمک ءِ کبو و دا دربان ءِ منفبو۔
مرسا مرسا اونا خنک کاریم ءِ الیرہ او اچ تپک کہ دا ای خنتیان کور مسوٹ یا داڑے تارمہ زیات مننگ ءِ۔ ولے او تینا دڑد و بیوسی آن اسہ گروشک اس خنک ہرا کہ قانود نا کسر آن خلسہ پرغسہ بننگ ءِ۔ اونا زند ئنا گڈیکو کو ساہت آک مریرہ۔
کہنگ آن مُست اونا کیہی سال آتا آزموندہ غاک اونا خنتا مونا بریرہ و بیرہ اسہ سوج اس جوڑ کیرہ کہ ارادے کہ او دربان آن ہرفتنے۔ او دربان ءِ کتی کیک انتئے کہ داسہ او تینا یدغہ مروکا جون ءِ اچ سرفنگ کپک۔ دربان تینے شیف کیک انتئے کہ دا نیام اٹ اوفتا بالاد اٹ بھلو فرق اس بسونے، ہراڑان دا بندغ ءِ بھلو نسخان مسونے۔
”داسہ ہمو ہرا گڑا ءِ کہ نی اودے چاہنگ خواسہ؟“ دربان سوج کیک۔ ”نے منفنگ اندن ءِ دُنکہ تلف آن پٹ ئنا خرفنگ۔“ ”یخین اٹ ہر اسٹ قانود آ سر مننگ خواہک۔“ اندا بندغ پاہک: ”گڑا دا وڑ امہ مننگ کیک کہ کنے آن بیدس پین کس ام قانود نا مونا پیش مننگ کن دانگ مون کتنے۔“
دربان درست کیک کہ دا بندغ آخیر آ سر مننگ ءِ او تینا گوہنگوک آ سار ئٹ بننگ کن کوکار کیک پاہک: ”پین کس ہم داڑے قانود نا مونا پیش مننگ کپک انتئے کہ دا در آن مونا اننگ بیرہ نیکن ئس۔ داسہ ای دادے آخبتی بند کیوہ۔“
تربت نا ہند دشت کنچتی کراس آ وی ایٹ گاڑی موٹر سائیکل تون ڈک لگا ہراڑان باوہ و مار کسکر، اندن مسڑ ٹپی مس۔
حوال تا ردئٹ دشت کنچتی کراس آ ترند رفتار آ وی ایٹ گاڑی موٹر سائیکل تون ڈک لگا ہرانا سوب نزیر ولد نصیر ہند دشت کسر، اونا مار میرک ولد نزیر ہند آ کسکر اندن اونا مسڑ سہار بنت نزیر بھاز ٹپی مس۔
حوالکار تا پاننگ ءِ کہ سہار بنت نزیر بھاز ٹپی مسنے اندن دا وخت توسینگوک حالیت ئٹ دارو درمان مننگ ءِ۔
سبی آن پاکستانی فورسز ارا بندغ ءِ زوراکی ئٹ بیگواہ کرے ہرافتیٹ اسٹ نا باوہ ءِ 14 سال مالو زوراکی ئٹ بیگواہ کننگاسس۔
ٹی بی پی نیوز ڈیسک ءِ دوئی مروک حوال تا ردئٹ پاکستانی فورسز خادم حسین ولد مزار خان مری و فیض محمد ولد جلاؤ مری ہند جھالڑی سبی ءِ 6 فروری 2024 آ ٹیپل نا ہند آ ہمو وخت زوراکی ئٹ بیگواہ کننگا ہرا وخت او سبی آن گاڑی اسیٹ سفر کننگ ئس۔
بیگواہ خادم حسین نا باوہ مزار خان مری ہم تدوکا 14 سال آن زوراکی ئٹ بیگواہ ءِ۔
حاجی مزار خان ولد گہرام 28 مئی 2010 آ پین چار بندغ تون اوار بیگواہ کننگا۔ مزار خان نا خاہوت نا ردئٹ سبی نا علاقہ جالڑی ٹی لشکری آپریشن نا وخت پاکستانی لشکر مزار خان تون اوار پنچ بندغ ءِ دزگیر کریسہ بیگواہ کریسس۔
مزار خان نا خاہوت اونا آجو مننگ کن توار ارفیسس واہم داسا مزار خان نا مار ءِ ہم پاکستانی فورسز زوراکی ئٹ بیگواہ کرے۔
برجاء سال فروری ٹی دائسکان بلوچستان نا جتاء علاقہ آتیان دہ بندغ نا زوراکی ئٹ بیگواہی تا کیس آک رپورٹ مسونو۔
پاکستانی فورسز آک مستونگ آن ٹک ٹاکر ورنا ءِ نوشکی آن اسپورٹس گولڈمیڈلسٹ ورنا تون اوار کوئٹہ و گیشتر علاقہ آتیان بندغ تے زوراکی ئٹ بیگواہ کرینو۔
بلوچستان ئٹ گچین کاریک
ٹی بی پی سرگپ
بلوچستان ئٹ گچین کاریک بلوچ سلہہ بند گل آتا جلہو و تراک آتا سیخا ئٹ مسر۔ سلہہ بند گل آتا سیوت بلوچ راجی آجوئی سنگر بھلو کچ ئسے آ گچین کاری تیٹ بشخ ہلوک امیت وار، اوفتا دفتر، پولنگ اسٹیشن و پاکستان نا لشکر آ جلہو کرے، ہراڑان بلوچستان ئٹ گچین کاریک بھاز زیمی مسر و کیہی علاقہ تیٹ گچین کاریک مننگ ہم کتور۔
لس ڈول ئٹ بلوچ راج بھلو کچ ئسے آ گچین کاری تیان بائیکاٹ کرے، خاص وڑ ئٹ کیچ و لس وڑ ئٹ بلوچستان نا کیہی علاقہ تیٹ گمانی ریاستی ظلم و بیدادی تا برخلاف بلوچ زالبول آک برانز نا دروشم ئٹ پولنگ اسٹیشن آتے ہُشار، اوفتا مونا تولوک برانز کریر و گچین کاری تا کاریم ءِ برانز ئٹ ایسر کریر، ہراڑان دا علاقہ تیٹ گچین کاریک مننگ کتور و آجوئی دوست کڑدہ غاک گچین کاری تیان بائیکاٹ ءِ بلوچ راج ئنا ریاستی کوزہ ءِ رد کننگ گوندرہ۔
بلوچستان ئٹ ووٹ شاغنگ نا کچ بھاز کم مس، کیہی علاقہ تیٹ ووٹ آتا پیشتمنگ مُسٹ آن پنچ درسد مس و ہر وخت ئنا ڈول بھلو کچ ئسے آ دروہ نا وسیلہ ئٹ مقتدر طاغت آتیتون خڑک تکوک بندغ آتے سر سہب کننگا۔ ہراڑان دا گمان گیشتر سوگوْ مسنے کہ ریاست پارلیمان ئٹ بلوچ راجی ویل آتے بِننگ کن تیار اف و ہمو بندغ آتے بلوچستان نا سیاست ئٹ ہتنگ ءِ ہرا مقتدر طاغت آتا مسخت آتے پوروْ کننگ ءُ۔
بھلو کچ ئسے آ گچین کاری تیان بے تعلقی و بائیکاٹ آن بلوچ راج درشانی کرینے کہ او پاکستان نا پارلیمان ءِ بلوچ ویل آتا ایسر کننگ نا وسیلہ تکپک و بلوچستان ئٹ بیدس پارلیمانی و مزاحمتی سیاست نا وسیلہ ئٹ بلوچ راجی حق آتے دوئی کننگ نا گمان ودنگ ءِ۔
بلوچستان نا بنجاہی شار کوئٹہ آن پاکستانی لشکر اسہ بندغ ئسے دزگیری آن پد بیگواہ۔
حوالکار تا ردئٹ محمد عالم نا مار ناصر دینارزئی ہند کلی بنگلزئی سبزل روڈ ءِ 7 فروری نا بیگہ کن اونا اُرا غان پاکستانی لشکر بیگواہ کرینے۔
خاہوت تدینی ءِ پک کریسہ اونا یلہ کننگ نا خواست کرینے۔
یاتی مرے برجاء سال فروری نا اولیکو و ارٹمیکو ہفتہ نا ایسری اسکان بلوچستان نا جتاء علاقہ تیان ہشت بندغ نا زوراکی ئٹ بیگواہی نا کیس آک رپورٹ مسنو۔
بلوچستان نا شار تربت ئٹ ڈی بلوچ نا ہند آ بیگواہ بندغ تا یلہ مننگ کن اِرا ہفتہ آن برجاء تولوک برانز گپ و تران نا سوب ایسر کننگا۔
پولیس افسر و زیمی مروک خاہوت آتا نیام ئٹ مُسہ بندغ نا یلہ کننگ و ایلو مُسٹ نا بابت معلومداری فراوان کننگ نا شڑط آ تولوک برانز ایسر کننگا۔
ایس ایس پی کیچ و پولیس افسر آتیتون گپ و تران آن پد ڈی بلوچ پوائنٹ آ تدوکا اِرا ہفتہ آن برجاء تولوک برانز ایسر کننگا، پولیس افسر آک دمدستی مُسہ بیگواہ بندغ تا یلہ کننگ و ایلو مُسٹ ءِ عدالت آتیٹ ہتنگ نا سَلاہ ءِ مونا ہیسر ہرادے برانزیک منار و اندا شڑط آ تولوک برانز ءِ ایسر کریر۔
