قطبی وزیرستان ئٹ فورسز کیمپ نا مونا برانز نا وخت پاکستانی لشکر سم کاری کرے، پشتون راہشون محسن داوڑ تو اوار چنا و کیہی بندغ آک ٹپی، اندن اسہ بندغ اس کسکنے۔

حوال تا ردئٹ محسن داوڑ نا مخ تف آک میران شاہ کینٹ ئنا بنجاہی در ئنا مونا برانز کننگ ئسر، قطبی وزیرستان ئٹ گچین کاری نتیجہ تا اُرے مننگ آ برانز مننگ ئس کہ اندا وخت ئٹ فورسز آک سم کاری کریر ہرانا سوب آن محسن داوڑ تون اوار چنا و کیہی بندغ آک ٹپی مسر، اسہ بندغ اس کسک اندن محسن داوڑ ءِ جانجوڑی کمک کن اسپتال آ دننگا۔

جماعت اسلامی نا سینٹر مشتاق احمد پارے کہ گچین کاری دروہ نا برخلاف قطبی وزیرستان ئٹ برانز آ پولیس نا سم کاری آن محسن داوڑ تون اوار ایلوفتا ٹپی مننگ نا حوال آک اریر، دا کاریم بھاز افسوز و مذمت نا لائخ ءِ، محسن داوڑ و اونا سنگت آتیکن دعا کننگ اُن۔

او پارے کہ شانگلہ آن پد دا ارٹمیکو تدینی ءِ ہرا ٹی گچین کاری کمیشن نا دروہ تا برخلاف قانودی برانز آ سم کاری کننگا و بے ڈوہ تا دتر وہفنگا۔ سپریم کورٹ آف پاکستان دا حکومتی دہشتگردی نا نوٹس ہلے۔

داکان مالو تدوکا توہ جنوری ٹی ہم گچین کاری مہم نا وخت میران شاہ تپی نا علاقہ ئٹ محسن داوڑ نا قافلہ غا سم کاری کننگاسس، سُمک گاڑی نا مون ئنا و ایلو شیشہ آتیا لگاسر، محسن داوڑ گاڑی ٹی سوار ئس واہم بلٹ پروف گاڑی نا سوب آن جلہو ئٹ رکھوک مس۔

چیہانٹ

نوشت: ارسلان بلوچ

دی بلوچستان پوسٹ

خنک ملوک چھت ئنا پارہ غا خلوک ئسر، چھت ئنا ٹِک ٹِک ءِ خننگ ئس، پھنکہ، پنکھہ نا مسہ پرہ ءِ ہم خننگ ئس، خنتے تر کرے پدا دیوال نا پارہ غا ہُرا دیوال ءِ ہم خننگ ئس، دیوال آ جوکہ لیپ آتیا خنک تہ تمار، لیپ آتا نیام ئٹ اسہ خلکن ءُ لیپ ئسے آ نظر تہ تما، ہندا لیپ ءِ خننگ آن گڈ بے توارو چیہانٹ ئس خلک، چیہانٹ ءِ کس بنتو ولے او چیہانٹ ہندن ترند ئس ہرا اونا ہُزبہ ہُزبہ ءِ سرفسہ گڈ سر ئٹ اونا اُست ءِ جٹکہ ئس تس، اوکان گڈ اونا خنک مالو آن زیات ملنگار ولے او داسا ہچس خننگ ہلو او داسا ہمو ہند آ لیٹا ہرا ہند آ اونا سیری نن ئنا ہُرے آ دم درینگوک بسکہ و ہمو ہند آ اسہ خلکن ءُ بوپ اسہ کمبل و اسہ بڑزی سے آ لیٹاکہ تنگان ہناکہ۔

لُمہ مار ئنا بوپ سوپ آتے خڑتی ئٹ ہرسہ خسکنگ ءِ بناء کرے و دڑدی آ سوچ آک اودے دارہ ایرہ غان گھیڑ کریر او ٹک خلنگ ءِ بناء کرے اونا ملی ٹی منہ ندارہ جوڑ مس۔

اسہ بھلو حال ئسے حال ئنا تہٹی بھاز کوٹی ءُ ہندا کوٹی تان اسہ کوٹی سے نا تہٹی اسہ کڑسی اس تخوک ءِ کڑسی آ اسہ بندغ ئس تولوک ءِ، اونا پُٹ آک ہندن بھلن ءُ ارافتا سوب آن اونا اڑزانی ئٹ چاہنداری مننگ کپک، مچھٹ شیف اونا جون ئٹ بینوکو ارنگوکو پچ ءُ پُچ آتا ہر ٹِک لپ لپی ءِ جاگہ ئس خید آن و جاگہ ئس دتر آن، اونا پیہن آ دوک خیسن خیسن شُرنگوک ءُ شرنگوکا ہند آتیا بارنو دتر ءُ، دیخس شیف اونا نَک ءُ نَک تہ ام شرنگوک ءُ اسہ اِرا جاگہ غان زیل آک تہ ٹپ ءُ اسہ وار ولدا اونا خنک تیوہ کڑسی و بندغ آ تمار، کڑسی نا شیف آ فرش ئسے اراڑے وہوکا خشک انگا دترک تیوہ فرش ءِ خیسن خیسن کرینو۔ کڑسی نا ٹانگ آتیا اونا ٹانگ آک دتر آن چڑوکو زمزیر اسیٹی ترند پیڑوک ءُ ہندا زمزیر اونا تیوہ جون ئٹ دوشہ غان بار ویڑوک ءِ اونا مخ و سینہ کڑسی نا پدان ویڑوک ءُ اونا دوک ام ہندا زمزیر ئٹ ترند ویڑوک ءُ۔

اونا جون ئٹ ہچ ساہ اف، او تینے ہچ سرفنگ کپک، ہر جاگہ غا اونا جون آ زمزیر نا رند آکو دیر و ارغ نہ کننگ و بھازی بیدادی تا سوب آن اونا کلک آک کڈ و تیوہ جون آٹی آن بار ءِ، سال ئس بیرہ سپاہی تا سوج و ورندی آن بیدس کس ئتون ہیت نہ کننگ نا سوب آن او داسا ہیت کننگ ءِ ہم دیخس گیرام کرینے، و اولی دے آن اینو دے اسکان ہمو حال و کوٹی آن بیدس او پین ہچو ہند ئس خنتنے، او گیرام کرینے نن و سہب ءِ، دے و طوبے ءِ، جمھر و پر ءِ۔

لمہ ترند ساہ کشسہ دیخس ٹک خلنگ ءِ پین ترند کرے او تینا خیال ئٹ ہمو چنا نا دروشم ءِ ہننگ ءِ بناء کرے، اونا اُست ئنا دگ دگارہ پین ترند مس او تینتون ہیت کننگ ءِ بناء کرے۔۔۔دا۔۔۔دا۔۔۔دا تو تینا سے، دادے۔۔۔دادے۔۔۔دادے تو ای چاوہ، اونا خنک ہمو چنا نا دروشم آ ترندی ئٹ خلوک ئسر، او ہمو چنا نا خزمی آ خنتے ہننگ ءِ بناء کرے خنتے ہننگ آن گڈ اونا خنک پین ملنگار اونا خنک ترندی ئٹ وارس کلک آتیا تہ تمارہ وار ئس پیشانی و وار ئس خنتا لمہ رست کرے۔۔۔لمہ رست کرے ہمو خزمی آ خن تے و تینتون مدان آ کوکار کریسہ پارے کنا مڷ۔۔۔کنا مڷ۔۔۔۔کنا سیری ہنداڑے چیہانٹ ئس کریسہ پارے کنا مَڷ۔۔۔ و ہڑدے نا وڑ بے سار مرسہ سار آن ہنا۔

سیاسی نعرہ و اُست آن دروکا وعدہ غاک
گچین کاری مہم کن بلوچ بیگواہ تا دیہاڑی وڑ

انگریزی نوشت: ہزاران رحیم
براہوئی بدل: سعید نور

دی بلوچستان پوسٹ

مُچ پاکستان ئٹ 8 فروری نا دے گچینکاری اڈ تننگو ہندن وفاق نا سیاسی جماعت آک دُنکہ پاکستان مسلم لیگ (پی ایم ایل -این) و پاکستان پیپلز پارٹی (پی پی پی)، بلوچستان اٹ پوسکنو است خوائی درشان کریسہ سیاسی نشست اڈ تننگو و مخلوق نا حمایت ءِ دوئی کننگو۔ دا درشانیک ہمو وخت بنا کریر ہرا وخت پاکستان مسلم لیگ ن نا راہشونک تدوکا سال شال نا دورہ ءِ کریر ہندن نومبر نا تُو اٹ شال نا دورہ نا وخت بیس 20 آن زیات گچین کاری نا امیت وار آتا حمایت ءِ دوئی کرے۔ ہندن بلاول بھٹو زرداری و آصف علی زرداری ہم بلوچستان نا دورہ ءِ کرینو۔ امر کہ گچین کاری تا مُد خڑک بریسہ کننگے بلوچستان نا چیلنج آتے ایسری نا پارہ غا دننگ نا وعدہ غاک ہم زیات مننگو ہرافتیٹ زوراکی نا بیگواہی تا ایسری، و ایلو ویل آک اوار ءُ۔

پاکستان اٹ ہر جمہوری جماعت و اپوزیشن، گچین کاری مہم نا وخت، زوراکی نا بیگواہی تا لڑ ءِ ایسر کننگ نا گپ ءِ کیک ولے اقتدار اٹ بننگ آن گُڈ دا بھاز اہم و نازرک ویل آن خن تے تینا تر کیک۔

2018 نا گچین کاری تیٹ سرسہبی دوئی کننگ و پاکستان نا وزیر اعظم نا عہدہ ءِ سنبھالنگ آن گڈ پاکستان نا مسکوہی وزیر اعظم و پی ٹی آئی نا کماش عمران خان بلوچ بیگواہ بندغ تا بابت تران کریسہ دلیری اٹ دا پڑو ءِ کرے کہ اگہ اونا حکومت اٹ اسہ بندغ ئس ہم بیگواہ مس گڑا او سیکیورٹی ادارہ غاتا خلاف جِک مرو و توار بڑز کرو۔ دا باوری ترفنگ آن پد ہم، اونا دور حکومت 2021 ئٹی، بلوچستان آن بلوچ بیگواہ بندغ آتا خاہوت آتا پارہ غان ڈی چوک اسلام آباد اٹ اسہ برانز ئس مس، ہرا ٹی بیگواہ بندغ آتا بابت عمران خان نا مالو نا کروکا دعویٰ غاتیان چپ اونا کڑد پاش مس۔

بیگواہ کننگوک آ طالب علم شبیر بلوچ نا ہیڑ سیما بلوچ بے امیتی نا درشانی ءِ کریسہ پارے کہ عمران خان اسلام آباد نا ڈی چوک اٹ 2021 نا تولوک برانز نا وخت نہ تو اسٹی نا درشانی ءِ کرے و نئے دا ویل آ پام تس۔ اونا دا کڑد اونا اقتدار اٹ بننگ آن مُست ئنا، یقین دہانی تیان چپ ئس۔

داڑان بیدس خان نا حکومت نا وخت، مسلم لیگ (ن) نا نائب صدر مریم نواز بلوچ بیگواہ تا خاہوت آتا 2021 نا تولوک برانز ٹی بس و ڈکھ ئنا درشانی ءِ کریسہ و آرمی چیف و آئی ایس آئی نا سروک آتون ہیت کننگ نا گرج ءِ مونا تخیسہ دا ویل نا بابت پارے کہ ببو اوفتیتون ہیت گپ کین۔ ہرا ویل آک ایسر کننگ مریرا اوفتے ایسر کبو۔ ہرا بندغ آک زندہ ءُ یا زندہ افس اوفتا باروئٹ عدالت آتے پار اوفتے عدالت اٹ ہتیر و کم آن کم اوفتا خاہوت آتے اوفتا باروئٹ پار کہ اوفک انت حالیت ئٹی ءُ۔

داڑان بیدس شال ئٹی پی ڈی ایم نا 2020 نا جلسہ ٹی مریم نواز بلوچی پُچ بینیسہ ساڑی مس و اوڑے بلوچ بیگواہ تا خاہوت آتیتون وعدہ کرے کہ اونا حکومت اٹ اسہ بلوچ ہیڑ ئسے ہم روڈ آتیا اوغنگ کن ہِلنگ پرو۔ او مُستی تینا سوشل میڈیا پروفائل آ بیگواہ ئسے نا خاہوت تون است اُسونی نا درشانی نا وخت بلوچ مسڑ ئسے خُمب اٹ الوکو عکس ئس ہم تخا۔ ہندن ہرا وخت عمران خان نا حکومت نا تختہ چپی مس تو اوکان پد اوفتا پارٹی اقتدار اٹ بس ولے ولدا ہم، مریم نواز بیگواہ تا خاہوت آتا گڑتی تے ایسر کننگ کتو۔

2024 نا برجا گچین کاری مہم اٹ مسلم لیگ ن نا راہشون نواز شریف بیگواہ تا بندغ آتا کیس ئنا حمایت ءِ کریسہ قومی اسمبلی ٹی دا بابت قرار داد پیش کننگ نا قول ءِ کرے و دا دے ”جہاد“ گوندیسہ بیگواہ تا آجو مننگ اسکان دادے برجا تخنگ نا درشانی ءِ کرے۔

2024 نا ساڑی گچین کاری نا چرجوئی اٹ پی پی نا چئیرمین بلاول بھٹو زرداری بلوچ زالبول آتیتون اسٹی نا است خوائی کریسہ دا باوری کریفے کہ اگہ او وزیر اعظم مس گڑا او دافتا ایلم و چُنا تے قومی اسمبلی ٹی نمائندگی رسینگو۔ او دلیری اٹ دا پارے کہ اودے دا بابت کس تورنگ کپرو او پارے کہ اگہ وزیر اعظم مریوا گڑا بلوچ بیگواہ تا برجا ویل ءِ ایسر کروٹ و سوگو گام گیج ہرفوٹ۔

بلوچستان اٹ زوراکی نا بیگواہی و بندغی حق آتا لتاڑنگ نا برخلاف بلوچستان آن اسلام آباد اسکان لانگ مارچ نا کماشی ءِ کروکا بلوچ بندغی حق آتا باسک ڈاکٹر ماہرنگ بلوچ دا ہیت آتے پارے کہ 2013 اٹ ہرا وخت پی پی پی نا حکومت ئس، ماما قدیر و بلوچ بیگواہ تا خاہوت آک کوئٹہ آن اسلام آباد اسکان پند آ مارچ کریر، داڑان پد ہم دا ویل ایسر متو۔ حیرانی نا ہیت دادے کہ بلوچستان اٹ پیپلز پارٹی نا ساڑی امیت وارک سرفراز بگٹی و جمال رئیسانی بلوچ بیگواہ تا ویل ءِ دروغ سرپند مریرا۔ داڑان دا گڑتی ودی مریک کہ بلاول بھٹو سرسُہب مس گڑا دا ویل ءِ او امر جوان وڑ اٹ حل کرو۔

2023 نا ایسر و 2024 نا بِنا ٹی MarchAgainstBalochGenocide#
نا نعرہ ءِ بڑز کریسہ 100 آن۔زیات بلوچ بیگواہ تا خاہوت آک ڈاکٹر ماہ رنگ نا سروکی اٹ تربت آن مارچ کریسہ اسلام آباد کن رادہ مسر و اسلام آباد اٹ نیشنل پریس کلب نا مونا کیمپ خلکر ولے بدبختی نا ہیت دادے کہ 62 دے تیر کننگ آن گڈ ہم اوفتے اسلام آباد اٹ ہچو ہمکوپئی ئس دوئی متو حکومت نا پارہ غان چُپی دا بلوچ خاہوت آتیکن پین بے امیتی نا سوب جوڑ مس۔

تاریخی حوالہ اٹ اُننگے تو پاکستانی سیاست اٹ، پارٹیک و ادارہ غاک اقتدار اٹ بننگ کن سوگو ءُ نعرہ تا کمک ءِ الیرہ۔ بلوچستان اٹ بلوچ بیگواہ تا دا اہم انگا ویل ہم سیاسی مہم آتا مرکزی سرحال جوڑ مسونے۔ عمران خان آن الیس نواز شریف و بلاول بھٹو اسکان، داخس کہ بلوچستان نا صوبائی جماعت آک دُنکہ اختر مینگل و ڈاکٹر مالک، کل، گچین کاری ٹی سر سہبی نا بابت ہمکوپئی دوئی کننگ کن بلوچ بیگواہ تا نعرہ نا کمک ءِ الیرہ۔ دا تاریخی رجحان ذوالفقار بھٹو نا یات ءِ پوسکن کیک، ہرا تینا دور حکومت اٹ، ہمو وخت غریبی نا ساڑی ویل آتا ایسری کن ”پُچ، اِرغ و کوٹی“ (روٹی، کپڑا اور مکان) نا نعرہ غا زور تریسہ زمیندار آتیتون اوار مریسہ اسہ اہم ءُ اتحاد ئس جوڑ کرے۔ ولے، ہرا وخت اسہ پارٹی ئس اقتدار سنبھالک گڑا اونا دُن انگا وعدہ غاک ایسر مریرہ۔

پشتون تحفظ موومنٹ نا سروک منظور پشتین آجو مننگ آن گڈ اسہ بیان ئسیٹی پارے کہ زوراکی نا دزگیری آن کنا آجوئی کن توار بڑز کروک و کوشست کروکا کُل بندغ آتا منت وار اُٹ۔

او پارے کہ کنے دزگیر کننگ و دزگیری ٹی بے بندغی روشت کروکا تیان دا گواچن ولدا ہم مٹ مننگ کپرو کہ دا ہرا غنڈہ گردی، دہشتگردی، و چک و تاڑ ءِ دا نا پدا فوجی جنرل و استعماری جنرل آتا استعماری پالیسی و الس دشمن کاریمک ءُ۔

او پارے کہ ایسکان کنا ساہ ارے ظلم ئنا برخلاف مزاحمت برجاء تخون۔ نن ساندہ کن بیوس و مظلوم مفرون، اسہ دے الم ننا دوک نُما زنچخ اسکان سر مرور۔

خیال ئٹ مرے کہ منظور پشتین ءِ خدو دسمبر نا تُو ئٹی بلوچستان نا شار چمن آن پولیس دزگیر کننگ آن گڈ بندی کریسس۔

منظور پشتین ءِ ہمو وخت دزگیر کننگا ہرا وخت چمن ئٹ اسہ تولوک برانز ئس مننگ اس، ہرا نا برانزیک پاک اوغانستان سیم ئنا دامون ہیمون آجوئی ئٹ ہن و بر نا خواست کننگ اسر۔

منظور پشتین اوڑے اواری نا درشانی کن ہنا و اوفتتون تران کننگ آن گڈ دوارہ بلوچستان نا شار تربت ئٹی سی ٹی ڈی نا دو آن دروغ ئنا مونتس ئٹ کھسفنگوک بالاچ بلوچ کن برجاء تولوک برانز ئٹ اواری نا درشانی کن تربت نا کنڈ آ رادہ مس تو اودے پولیس دزگیر کرے۔

آپریشن درہ بولان

ٹی بی پی سرگپ

برجاء سال تیٹ بلوچ انسرجنسی نا ترندی ٹی ودکی مسنے و آجوئی کن کاریم کروک سلہہ بند گل آک پاکستانی لشکر و معاشی بنجاہ تیٹ بھلا ہدف آتیا جلہو کننگ ءُ۔ بلوچ لبریشن آرمی نا مجید بریگیڈ، فتح اسکواڈ، انٹیلیجنس یونٹ و اسپیشل ٹیکٹیکل آپریشنز اسکواڈ (ایس ٹی او ایس) نا سئے سد و پنجاہ آن زیات سرمچار آتا بلوچستان نا بنجاہی شار آن بیرہ منہ کلو میٹر مُر اہم کسر و مچھ شار آ کوزہ کریسہ اِرا دے اسکان کوزہ ءِ برجاء تخنگ آن پاش مریک کہ گل ئنا عسکری لائخی تیٹ بھلو کچ ئسے آ ودکی مسنے۔

اِرا دہائی تیٹ اولیکو وار بلوچ سلہہ بند گل اس ہشتاد کلومیٹر علاقہ و شار آ کوزہ کرینے، ہرا بلوچ انسرجنسی نا دیہاڑ ئٹ اسہ اہم کارروائی ئسے۔ مالو بلوچ سلہہ بند گل آک روایتی گوریلا ڈول ئٹ جہد کننگ ئسر ولے مچھ کون آ جلہو تیان پاش مریک کہ بلوچ گل آک، پاکستانی لشکر تون روایتی جنگ کننگ کن تینے سوگوْ کننگ ءُ۔ بلوچ لبریشن آرمی نا جند ندری و بھیم بش کروک جلہو تیان پاننگ مریک کہ بروک وخت ئٹ دا وڑ نا جلہوک پین ترندی تون بلوچستان و پاکستان نا بھلا شار تیٹ مننگ کیرہ۔

منہ سال آن بلوچ لبریشن آرمی تینا گل ئنا کارروائی تیٹ پوسکنی ایسنے و روایتی گوریلا جلہو تیتون اوار اوار بھلو کچ ئسے آ جند ندری و کمپلیکس جلہو کریسہ بلوچ جنگ ئنا دروشم ءِ بدل کننگ ءِ۔ بی ایل اے نا آپریشن درہ بولان، بلوچ راجی آجوئی سنگر نا بلوچستان، سندھ و پنجاب ئٹ اِرا دے ئنا وخت ئٹ شست آن زیات جلہو تیان و سلہہ بند گل آتا سیوتی عمل آن پاش ءِ کہ بروک وخت ئٹ بلوچستان ئٹی جنگ ئٹ ودکی مرو۔

تدوکا دے تیٹ نادرست آ بندغ آتا دو آن ایران نا بست و بند ئٹ بلوچستان نا شار سراوان ئٹ کسفنگوک 9 پاکستانی شاری تا جون تے داسکان ایرانی کوالخواک تورینو۔

خلنگوک بندغ آتا جون تے واپس ہتنگ ئٹ بے سوب مننگ آ پاکستانی کوالخواہ تا برخلاف کہوکا بندغ آتا خاہوت آک پنجاب نا جتا شار بہاولپور و مظفر گڑھ ئٹ برانز کرسا بنجائی کسر تے بند کریر۔

بہاولپور ئٹ برانز کروکا ذخیرہ اوور ہیڈ برج نا خڑک بنجائی کسر ءِ بند کریر، برانز نا سوب آن احمد پور شرقیہ روڈ ہم بند مس، مظفر گڑھ ئٹی ہم خاہوت آک کراچی روڈ آ سخت برانز کریر و روڈ آ ٹائر ہُشِسہ روڈ آ اُلاخ آتا ہن و بر ءِ بند کریر۔

دا بارو ئٹ برانز کروکا تا پاننگ اس کہ جون تے واپس ہتنگ نا بست و بند کننگ متنے اندا سوب آن نن برانز کننگ آ بیوس اُن۔

خاہوت آک خواست کریر کہ حکومت ایران ئٹ خون مروک شاری تا جون تے واپس ہتے۔

یاتی مرے کہ دے کہی بلوچستان نا شار سراوان ئٹ نا درست آ سلہہ بند بندغ آک اسہ کواٹر ئسے آ جلہو کرسا 9 بندغ کھسفیر و سلہہ بند بندغ آتا سم کاری آن 3 پاکستانی ٹپی مسوسر۔

ایران و پاکستان تومکا دا جلہو ئٹ پاکستانی شاری تا کہنگ ءِ پک کریسر۔ واہم ہڑتوما حکومت آتا کنڈ آن تدینی نا سوب و تدینی ٹی تُد بندغ آتا شابیتی حوالک تننگ متنو۔

پاکستانی میڈیا نا کنڈ آن جلہو ءِ بلوچستان نا بلوچ آزادی دوست سلہہ بند گل بلوچ لبریشن آرمی آ شاغار، ہراڑان بی ایل اے نا ترجمان جیئند بلوچ بیان ئس شنگ کرسا ترندی ئٹ نمن کرے۔

بلوچ راجی آجوئی سنگر ( براس ) نا ترجمان بلوچ خان میڈیا غا شنگ کروک تینا بیان ئٹ پارے کہ آواران نا علاقہ مشکے ٹی کوزہ گیر پاکستانی لشکر تون جھڑپ آتیٹ بلوچ راجی آجوئی سنگر نا سرمچار آک دشمن لشکر نا ہفت 7 کارندہ مرگ ئنا گواچی و کیہی تے ٹپی کریر۔

او پارے کہ مشکے نا علاقہ گُرانڈی زیرہ کوْر ئنا ہند آ 30 دسمبر 2023 آ کوزہ گیر پاکستانی لشکر نا اسہ ڈرون جلہو ئسے آن پد ہیلی کاپٹر آتیٹ کمانڈو دھڑفِسہ ”براس” نا کیمپ ءِ گھیرہ کننگ نا کوشست کریر۔ سرمچار آک گوریلا حکمت عملی نا رد ئٹ جتا ٹولی تیٹ بشخ مرسا دشمن لشکر ءِ مونی گھام خلنگ آن توننگ کن اوفتیا جلہو کریر و دشمن ءِ سخت نسخان تسر۔

ترجمان پارے کہ دشمن نا اسہ ڈرون جلہو ئسیٹی بلوچ راجی آجوئی سنگر نا مُسہ سرمچار سرور عرف درک، اعظم عرف باسط و عبدالستار عرف معراج شہید مسر و اِرا جاگہ غا سرمچار آک جلہو ئٹ پاکستانی لشکر نا کم آن کم 7 کمانڈو مرگ ئنا گواچی کریر۔

بلوچ خان پارے کہ دا وختا ‘براس’ نا اِرا سرمچار کینگی عرف مسلم، علی عرف عطاء کوزہ گیر لشکر آ جلہو کرسا اودے مونی بننگ آن توریر و تینا سنگت آتے رکھوک کسر ترسا تومکا جانباز سنگت آک کیہی ساعت اسکان، تینا گڈیکو سم اسکان دشمن تون مون تسر و اوفتے مونی بننگ آن توریر۔ ہڑتوما سنگت آک سُم تا کُھٹنگ نا سوب آن تینا دو ئٹ شہیدی نا بڑز انگا ہند ءِ تینا پنا کریر۔

او پارے کہ شہید مروکا ہر پنچ سنگت نا تعلقداری براس نا جتا سیوتی گل آتیان اس۔ شہید سرور عرف درک ولد محمد خان سکنہ مشکے، گجر 2012 آن راجی آجوئی کن بلوچستان لبریشن فرنٹ تون تفوک اس۔ تینا وے دمدروکا خواری و لائخی نا سوب آن او کیپٹن نا رینک آ تینا خذمت آتے سر تننگ اس۔

او ودیک پارے کہ شہید اعظم عرف باسط ولد غلام رسول سکنہ مشکے، آچڑین 2013 آن بلوچ قومی آزادی کن بلوچستان لبریشن فرنٹ تون تفوک اس۔ او کیہی جنگ آتیٹ سنگت آتون ہم کوپہ اس و دلیری نا اسہ مثیل ئس جوڑاسس۔

ترجمان پارے کہ شہید مروک سنگت شہید عبدالستار عرف معراج ولد احمد نا تعلقداری مشکے نا علاقہ نوکجو آن اس۔ او بلوچ ڈیہہ ئنا آجوئی کن سلہہ بند مزاحمت 2016 ٹے بلوچ لبریشن آرمی نا محاذ آن کرے۔ او کیہئ اہم تنظیمی کاریم تیٹ اوار اس۔

ترجمان ودیک پارے کہ شہید مروک سنگت سرمچار شہید علی عرف عطا ولد خیر بخش نا تعلقداری مشکے نا علاقہ گجلی آن اس۔ او 2013 آن بی ایل ایف تون تفوک اس و بلوچ راجی آجوئی کن جہد کننگ اس۔ دا نیام ئٹ او کیہی اہم کاریم تیٹ بشخ ہلِسہ دشمن ءِ مِش تا کرے۔

او پارے کہ شہید کینگی عرف مسلم ولد شہید شہیک جان سکنہ مشکے، میہی 2021 آن بلوچستان لبریشن فرنٹ تون تفوک اس۔ او آئی ای ڈی ایکسپرٹ نا وڑ چاننگاکہ۔ اونا باوہ تون اوار خاہوت نا پین کیہی بندغ راجی آجوئی نا جہد ئٹ شہید مسنو۔

ترجمان پارے کہ بلوچ راجی آجوئی سنگر دا جانباز بلوچ سرمچار آتے اوفتا عظیم انگا شہیدی آ دروت ندر کرسا تینا دوارہ سوگو ارادہ کیک کہ شہید سنگت آتا مشن ءِ ہر حال ئٹ پورو کرو و اوفتا آزات بلوچستان نا تُخ ءِ پورو کرو۔

تجابان آن درو پاکستانی لشکر نا دو آن زوراکی ئٹ بیگواہ مروک بہادر چاکر یلہ کننگا۔

ضلع کیچ ئنا علاقہ تجابان نا ہندی بہادر چاکر ءِ پاکستانی لشکر نا پارہ غان زوراکی ئٹ بیگواہی نا برخلاف خاہوت نا پارہ غان M-8 سی پیک کسر ءِ تجابان نا ہند آ تفسہ تولوک برانز کننگاسس۔

بہادر چاکر نا خاہوت و کیچ آن پین ارا بندغ زوراکی ئٹ بیگواہ ورنا تا خاہوت آک درو سی پیک کسر آ تولوک برانز کریر۔

سی پیک کسر ءِ تفنگ نا سوب آن ایم 8 کسر آ اُلاخ آتا ہن و بر بند مس وختس کہ ہندا وخت آ بست و بند و برانزی تیٹ کہی وار گپ و تران مس واہم برانزیک بیگواہ آ ورنا تا یلہ مننگ اسکان تولوک برانز ءِ برجاء تخنگ نا پڑو کریر۔

اینو رسینگوکا حوال آتا رد ئٹ دزگیری آن گڈ بیگواہ مروکا یونیورسٹی نا خوانندہ بہادر چاکر یلہ مرسہ اُرا ءِ سر مسنے۔

فورسز آتا دو آن دزگیری آن گڈ زوراکی ئٹ بیگواہی نا گواچی مروکا ایلو ارا خوانندہ تا باروٹ ہچو احوال ئس رسینگتنے وختس کہ خاہوت آتا تولوک برانز گڈی احوال اسکان برجاء مس ہراڑے جتاء فکر ئنا بندغ آک تولوک برانز ئٹ ساڑی مرسہ ورنا تا یلہ مننگ نا خواست کننگ ءُ۔

بلوچستان لبریشن فرنٹ نا ترجمان میجر گہرام بلوچ تینا اسہ بیان اسیٹی پارینے کہ سرمچار آک 28 جنوری یک شمبے نا دے آواران نا علاقہ لباچ و کولواہ ٹی پاکستانی فورسز آ ارا جلہو کریر، ارافتیٹی مسہ کارندہ مرگ ئنا گواچی و مسٹ ٹپی مسر۔

او پارے کہ سرمچار آک شش بجکہ پانزدہ منٹ آ آواران نا علاقہ لباچ کور ئٹ فوجی چوکی آ بھلا سلہہ تیٹ جلہو کریر ہراٹی اسہ کارندہ ئس مرگ ئنا گواچی و ارٹ ٹپی مسر۔

او پارے کہ ہندا وخت آ سرمچار آک آواران، کولواہ کنچی ئٹ آرمی کیمپ آ انسائپر، ایل ایم جی و ایلو سلہہ تیٹ دژمن لشکر ءِ ٹک کریر ارافتیٹی ارا کارندہ مرگ ئنا گواچی و اسٹ ئس ٹپی مننگ تون اوار قوضہ گیر لشکر ءِ مالی نسخان رسینگا۔

ترجمان پارے کہ بلوچستان لبریشن فرنٹ دا جلہو آتا ذمہ واری ءِ ارفک و نن اسہ وار ئس پدا بلوچ اُلس آن خواست کینہ کہ اوفک قوضہ گیر ریاست نا گچین کاری مہم تیٹی بشخ ہلپس۔ دژمن لشکر تون اوار اونا مخ تف آک ننا سرمچار آتا ٹک ئٹ مرور۔