ضلع خضدار نا تحصیل وڈھ آن حوال رسینگانے کہ دراکھالہ نا ہندی ئس وت کشی کرینے ۔
حوال آتا رد ئٹ اقبال ولد کریم شیخ پنی ءُ بندغ اس وت کشی کرینے واہم وت کشی نا سوب سما تمننگ اف۔
یاتی مرے کہ تیوہ بلوچستان ئٹ وت کشی نا تدینیک ہڑدے نا بنیات آ نوشت مننگ ءُ۔
تدوکا ارا ہفتہ ٹی وت کشی نا دا چارمی تدینی ءِ داڑان مست ضلع گوادر،اواران و کوئٹہ ٹی ام مسہ وت کشی نا حوال دی بلوچستان پوسٹ ءِ رسینگانے۔
بلوچ اسٹوڈنٹس ایکشن کمیٹی نا سروکی ٹی پروفیسر صباء دشتیاری نا یات ئٹ کلچرل سینٹر پنجگور ئٹ صباء لٹریری مجلس اس ہڈ تننگا، ہرا ٹی خوانندہ تیتون اوار ایلو فکر آتیتون گنڈوک بندغ تا بھلو کچ اس اوار مس۔
تران کروک آک صباء دشتیاری نا زند نا بابت تینا خیال آتا درشانی ءِ کریر و اونا بلوچی بولی، ادب و دود و ربیدہ کن ایتوک قربانی و خذمت آتے جوان لوز آتیٹ دروت ندر کننگا و زند ئنا ساہت آتے اسہ ڈاکومنٹری فلم ئسے نا دروشم ئٹ مونا ہتنگا۔
مجلس نا وخت آ کتاب مُچی ہم لگاسس، بلوچ فنکار آک ہم تینا کشوک عکس آتا نمائش کریر، مجلس ئٹ اوار مروک آک عکس و کتاب اسٹال تیٹ اُست خواہی نا درشانی کریر۔ مجلس ئٹ جتا دود و ربیدئی شوک ہم مونا ہتنگار۔
مجلس ئٹ اوار مروک آتیان ڈاکٹر ماہ رنگ بلوچ، پروفیسر اکبر غمشاد، فوزیہ بلوچ، الطاف بلوچ، طاہر حکیم، بالاچ بالی و ایلوفک تران کریسہ پاریر کہ صباء دشتیاری بلوچ بولی، ادب و دود و ربیدہ کن اسہ چیدہ ئسے ہرا نا تیوہ غا زند بلوچی بولی نا دیمروی و تالانی ٹی تدینگا۔
اوفک پاریر کہ اینو اگہ او جسمانی دروشم ئٹ ننے ٹی ساڑی اف ولے ہرا فکر و فلسفہ ءِ او تریسہ ہنانے او قیامت اسکان بندغ آتا اُست آتیٹ زندہ مرو اینو دا مجلس دا ہیت ئنا شاہدی ءِ کہ صباء فکری دروشم ئٹ زندہ و ننے ٹی ساڑی ءِ صباء نا پِن آ مجلس ہڈ تروک آک داد ئنا لائخ ءُ ہرا تینا ہیرو تے گیرام کتنو۔
اوفک پاریر کہ اسہ راج ئسے نا زندہ مننگ کن اونا بولی، ادب و دود و ربیدہ نا زندہ مننگ الّمی ءِ دا علمی وخت ئٹ ننے خواننگ نا پارہ غا ہم پام کروئی ءِ ہراتم نن باعلم مسون گڑا تینا بروک وخت ئنا فیصلہ ءِ کننگ کرون علم آن بیدس نہ اسہ راج اس دیمروی کرینے و نئے کہ دانا گمانک اریر۔
اوفک پاریر کہ ہر بندغ نا ذمہ واری ءِ کہ او تینا وس ئنا ردئٹ علم و زانت شعور و چاہنداری نا عمل ءِ ہلیسہ مونی کائے غلام حسین صباء دشتیاری اسہ استاد و فکر و چاہنداری نا خواجہ ءُ بندغ اس ئس و اودے گیرام کننگ مننگ کپک۔
اوفک پاریر کہ صباء دشتیاری ءِ بلوچی بولی آ لائخی دوئی ئس بلوچی ادب ءِ زندہ تخنگ کن اونا کڑد آخبتی و بے گیرام کروک ئسے بلوچ بیرہ اسہ راج ئسے نا پِن آخہ بلکن دا تینا اسہ دیہاڑ اس تخک عزت و شرف دانا زند ئنا فلسفہ ءِ صباء بلوچ مسخت ءِ تاغت تس ہچو راج اس تینا بولی و دود و ربیدہ غان دو ارفپک بلوچ ہم تینا بولی و دود و ربیدہ غا ناز کیک۔ بولی و ادب نا تالانی غلام حسین جوان ءُ کڑد اس سر تس ہراڑان ننا زنک ءِ بلوچ بولی و ادب نا بابت سما تما او اسہ بندغ دوست شخصیت اس ئس ساندہ بندغی کن جہد کریکہ بندغی اقدار و بندغی آزاتی آ باور کریکہ۔ شہید صباء دشتیاری علم و چاہنداری نا غرض ئٹ ملیر ئٹ اسہ لائبریری ئسے نا بنماس ءِ ہم تخاسس ہرا ٹی بلوچ بولی و ادب ءِ رکھا۔
اوفک گیشتر پاریر کہ ننا وجود ہمو وخت اسکان زندہ سلو ہراتم نن تینا بولی و دود و ربیدہ نا رکھ ءِ کرون تینے منّفنگ کن علم سوگؤ ءُ سلہہ ئسے علم ءِ اشتماعی سوچ نا شیف آ کروئی تمک، ہرا وڑ صباء دشتیاری دا مڈی ءِ ایلوفتے اسکان سر کریسہ ننے آن جسمانی دروشم ئٹ رخصت کرے اندا وڑ ننے ہم تینا بولی، ادب و دود و ربیدہ کن کڑد سر ایتوئی ءِ، اینو اگہ بلوچی نصاب ساڑی ءِ گڑا دا صباء دشتیاری نا صدخہ غان ءِ او تینا تہہ ئٹ اسہ ادارہ اس ئس ہرادے گیرام کننگ مفک، کرن آتیان گڈ دا ڈول نا شخصیت آک ودی مریرہ، اونا شہادت آن اسہ بھلو نسخان اس مس۔
تران کروک آک پاریر کہ سیاست نا مسخت مرے گڑا مٹ و بدلی نا وسیلہ جوڑ مریک سیاست ئٹ خوانندہ تیا رکھ ئنا مسخت شعور و فکر ءِ گُٹو کننگ ءِ اسہ خوانندہ اس ہی تینا راج ءِ بدلی نا پارہ غا دیک احساس کمبوتی نا گواچی راج آک ہچبر شرحال آ زند نا پارہ غا ہننگ کپسہ اندا خاطران ننے انفرادیت نا پارہ غا دھکہ تننگانے ہر اسٹ تینا سوچ ءِ خلنگ ءِ ہراتم نن سیاست ءِ راج ئنا اشتماعی دیمروی و زند نا مسخت جوڑ کرین ہموتم گڑا نن بامسخت سیاست نا دعویدار جوڑ مننگ کینہ بلوچ چاگڑد ئٹ زالبول تے ننگ ئنا پِن آ چار دیوالی ٹی بند کننگا، دیمروی و مونی ہننگ کن زالبول تا کڑد الّمی ءِ داڑا نن کل ءِ اوار مریسہ کاریم کروئی تمک، مجلس ئٹ زالبول تا بھلو کچ اسیٹ اوار مننگ اُست بڈی ئسے۔
او پاریر کہ کلچر امپریل ازم ننے آ مسلط کننگانے ادب اسہ عکس ئسے ہرا دود و ربیدہ و بولی نا درشانی ءِ کیک، بلوچ کوزہ گیر اس اف تینا ڈغار آ آبات ءِ نرینہ آتیتون اوار زالبول تے ہم بلوچ ادب، بولی و دود و ربیدئی مڈی نا رکھ اکن کاریم کروئی ءِ۔
مجلس نا وخت آ پنجگور نا پنی آ فنکار آک پروفیسر عبدالحفیظ گوہر جی، نور فاطمہ، رابعہ، ماہین، سعید، مہیم، ہدایت و ملیحہ کلچرل سینٹر نا دیوال آتے تینا عکس و فن پارہ تیٹ زیبدار کریسر۔
گدان ادبی دیوان بلوچستان نا پارہ غان سوراب ئٹ مشاعرہ اس ہڈ تننگا ہراٹی، نوشتکار، چاہندار و قلم کار آک اوار مسر۔
چاگڑدی خذمت، چاگڑدی ویل، خواننگ نا نظام تون اوار ایلو معاملہ تا بابت شاعر آک تینا شاعری تے پاریر۔
درو گدان ادبی دیوان بلوچستان مالو نا وڑ مشاعرہ نا دیوان ٹاؤن ہال سوراب شار ئٹ ہڈ تننگا، دا مشاعرہ نا مہمان خاص براہوئی اکیڈمی نا بنجاہی پریس سیکرٹری امان صابر براہوئی اوڑتون اوار اعزازی مہمان نوشتکار و چاہندار گدان ادبی دیوان بلوچستان نا فنانس سیکرٹری حاجی فرید فراق مہر، محسن بسمل محفل ادب و محفل مشاعرہ غان حاجی فرید فراق مہر، امان صابر براہوئی، چیئرمین سلام الفت، صادق ندیم، سراج احمد بلوچ، صدف بلوچستانی، رجب ساگر، نوید صابر، عنایت ساغر، استاد خنجری، استاد جان علی، غفار عاطف، صادق صادقی، الطاف راجا، محی الدین بلوچ، صلاح الدین مرزا، میر میر احمد عمرانی، زبرین زیرک، اقبال سحر، جاوید فراز ریکی، ستار ساقی، ابوبکر الفت، سنگت الیاس و ایلو شاعر آک تینا شاعری تے پاریر۔
اندن مجلس ئٹ مہمان خاص امان صابر براہوئی، کماش گدان ادبی دیوان بلوچستان سلام الفت شاعر آتا پارہ غان مونا ہتروک شاعری تے داد تریسہ پارے کہ اینو ننے بھاز خوشی مس کہ سوراب ڈغار آن مہری ءُ و سوگوْ خیال نا ورنا ءُ شاعر ننے دا مجلس ئٹ رسینگا۔
مہمان خاص امان صابر براہوئی گیشتر پارے کہ داد گدان ادبی دیوان بلوچستان نا کماش سلام الفت و اونا کمپنی آ کاہک کہ اوفتا سوب اینو دا پرمغز آ مشاعرہ ہڈ تننگا۔
دا وخت آ کماش سلام الفت پارے کہ ورنا تا خواننگ تون اوار ادبی جہان نا بابت گدان ادبی دیوان بلوچستان نا باسک آک کسر شونی کرور۔
مجلس ئٹ شونکار نا کاریم تے عنایت ساغر سر تس اندن دا مجلس ئٹ سوراب آن ادبی دوست بندغ آک ہم بھلو کچ اسیٹ اوار مسر۔
بلوچ لبریشن آرمی نا راہشون بشیر زیب بلوچ تینا اسہ پوسکن ءُ ویڈیو بیان اسیٹی جہانی طاغت خاص وڑ ئٹ چین ءِ پامدار کریسہ پارینے کہ چین پاکستان و پنجابی نا وسیلہ ئٹ اسہ دیہاڑ تخوکو راج، دیہاڑی حیثیت تخوکا بلوچ راج نا مال و مڈی تا لٹ و پل ءِ بند کے۔
بلوچ لبریشن آرمی نا آفیشل میڈیا چینل ہکّل آ شینک مروک ہشت منٹ آ تالان ویڈیو کلہو ئٹ بی ایل اے نا راہشون بشیر زیب بلوچ چین، عرب ملک و ایلو تیتون اوار بلوچ راج تون تران کیک۔ بی ایل اے راہشون فوجی وردی بینوک ءِ اندن اوڑتون اوار بلوچ لبریشن آرمی نا جتاء یونٹ آتیا تالان باسک آک پوسکنو سلہہ ارفوک خننگرہ۔ ہمو باسک آتا وردی و بیج آتیان سماء تمک کہ اوفتیٹی وت کش جلہو کار آتیا تالان بی ایل اے مجید برگیڈ نا “جند ندر” آتتون اوار بی ایل اے نا اسپیشل ٹیکٹیکل آپریشنز اسکواڈ، بی ایل اے فتح اسکواڈ نا باسک آک اوار ءُ۔
بلوچ لبریشن آرمی راہشون بشیر زیب بلوچ ویڈیو کلہو ئٹ پاہک کہ سیندک مرے یا گوادر یا ایلو بلوچ مڈی تے پاکستان چین و ایلو طاغت آتے نیلام کننگ ءِ۔ چینی راج ہرا تینے جمہوریت دوست، شرفدار و انقلابی پاہک و تینا رکھ اکن بھلو بھلو جنگ کرینے اونا فرض جوڑ مریک کہ او پنجابی ہٹکل تا وسیلہ ئٹ بلوچ راجی مڈی تا لٹ و پل ءِ بند کے، او ہمو وخت بلوچ تون تعلقداری تخے ہراتم پنجابی ننا ڈیہہ ءِ ہلیسہ کائے۔
او پارے کہ بلوچ مڈی تا خواجہ غاک ہمو بلوچ آک افس ہرافتے پنجابی و پاکستان ایجنٹ جوڑانے و اوفتے کوالخواہ، وزیر و بست و بند نا پن ایتک دا کل فوج ئنا ایجنٹ ءُ۔ بلوچ نا کوالخواک ہمود ءُ ہرا راجی آجوئی نا جنگ ءِ مونا دننگ ءُ و بلوچ ڈغار نا بقاء کن مزاحمت کننگ ءُ۔
او پارے کہ چین تون اوار عرب ملک آک، یورپ، کینڈا و ننا ہمسایہ ملک آتے سماء مرے کہ بلوچ تینا راجی مڈی تا لٹ و پل ءِ ہچو دروشم اسیٹ سگپرو، ننا ایلو راج آتتون ہچو دژمنی ئس اف اگہ کس بلوچ راجی مڈی تا لٹ و پل کرے، زنک ایسری ٹی پنجابی و پاکستان تون کمک مسر گڑا ولدا بلوچ دا اُرپرو کہ او اخس ءُ بھلو طاغت ئسے، دا طاغت آتے گوریلا جنگ و راجی جوزہ نا جوان وڑ ئٹ گمان ارے، بلوچ نا مزاحمت و جوزہ بھاز بھیم بش کروک مرو اگہ کس داڑے سرمایہ کاری کرو گڑا ہر گڑا زوال مرو۔
اونا پاننگ ئس کہ بلوچ اسہ دیہاڑ تخوک ءُ راج ئسے و ایلو راج آتا بابت بے وس مریسہ گام ارفو۔
بشیر زیب بلوچ ویڈیو کلہو ٹی بلوچ راج تون تران کریسہ پارے کہ رکھوک جنگ ٹی بلوچ مڈی، چاہنداری گم گار مننگے ۔ بلوچ کہنگ ءِ و درپدر ءِ۔ ہڑدے ئنا کہنگ، درپدری، خوار مننگ و فریشانی آن جوان ءِ کہ او بریر و دا راجی جنگ ئٹی اوار مریسہ دادے مونا دیر۔
بی ایل اے راہشون نا گیشتر پاننگ ئس کہ بلوچ ہزار آتا کچ ئٹ (مزاحمت کن) پیشتمر، گْوادر، ریکوڈک، سیندک کل ئنا رکھ مرو، پاکستان اخس خلو؟ کہنگ کل ءِ ارے ولے بروک آ زنک دا پاروف کہ دا غٹ ءِ خنارہ و ننا مڈی تا لٹ و پل مننگ ئس، چاہنداری ایسر مس۔
اونا پاننگ ئس کہ تینے آن و تینا ضمیر آن سوج کروئی ءِ کہ اینو بلوچ ورناک انت اسیکن تینا ساہ تے تننگ ءُ۔ دافتا ہم زند ئس ارے، اُرا چُنا، لمہ و غٹ اریر، دا انتئے ندر مننگ ءُ۔ دا انتئے پاکستان و چین نا برخلاف جنگ کننگ ءُ ۔
اونا پاننگ ئس کہ ماتم و ہوغنگ آن جوان ءِ کہ دا جنگ ئٹی اوار مریسہ جہان و چین ءِ دا ثابت کین کہ بلوچ تینا رکھ اکن مزاحمت ءِ سرپد مریک، کہنگ و خلنگ ءِ ہم سرپد مریک۔
اونا پاننگ ئس کہ امر کہ جہان نا گیشتر راج آک تینا رکھ ءِ کریسہ ثابت کریر، ننے ہم دا جنگ ئٹی اوار مریسہ راج ءِ جوڑ کروئی ءِ ۔
بی ایل اے راہشون بشیر زیب بلوچ نا پاننگ ئس کہ نن مش تیا تولوک تینا زند ءِ تننگن دا غٹ ءِ راج ئکن کننگ ان و ننا پین ہچو مسخت و سواد ئس افک۔ ننے غلامی ٹی ہر گڑا رسینگنگ کیک ولے شرف آخہ ہراڑان ننا ضمیر و سوچ اُست جم افس، اندا خاطر نن مزاحمت نا کسر ءِ ہلکن، ننے سما ءِ کہ دا کسر بھاز بھیم بش کروک ءِ سخت ءِ ولے ننا حوصلہ بڑز ءِ، و ننا یخین ءِ کہ حوصلہ آتا جنگ ءِ نن کھٹون۔
بلوچستان ئٹ زوراکی نا بیگواہی تیان زیمی مروک آتا جہانی دے
ٹی بی پی سرگپ
زوراکی نا بیگواہی تیان زیمی مروک آتا دے تدینگا ولے بلوچستان ئٹ ہمو دے آ ہم زوراکی نا بیگواہی تا لڑ سلتو۔ بیست و ہشت اگست آ بلوچستان نا بنجاہی شار کوئٹہ آن سبی نا ہندی زالبول نور خاتون و اونا چناتے یونائیٹڈ ہوٹل آن زوراکی ئٹ بیگواہ کننگا و سی اگست آ اسہ سال اس مالو مستونگ آن زوراکی ئٹ بیگواہ غلام فاروق زہری نا جون کوئٹہ آن خننگا۔
بلوچستان ئٹ زوراکی نا بیگواہی تیان زیمی مروک آتا جہانی دے برانز ئٹ تدینگا۔ سائرہ پنچ سال آن زوراکی ئٹ بیگواہ ایلم تا یلہ مننگ کن اوفتا چنا تیتون اوار اقتدار نا بنجاہ اسلام آباد ئٹ برانز کننگ ءِ تانکہ بنجاہ نا ایوان آتیٹ اونا توار بِننگے۔
سمی دین، حمیدہ، فوزیہ، و سیما بلوچ کیہی زوراکی ئٹ بیگواہ بندغ تا خاہوت آتیتون اوار کراچی ٹی تینا دوستخواہ تیکن پریات کننگ ءُ ولے ریاستی ادارہ غاک اوفتا توار ءِ بِننگ نا جاگہ غا اوفتا توار ءِ تاغت نا وسیلہ ئٹ ایسر کننگ نا کوشست کننگ ءُ۔
کوئٹہ ئٹ راشد بلوچ نا لُمہ انصاف نا تیوہ غا در آتیا ہنانے ولے انصاف نا علمبردار آک چھپ ءُ۔ سعیدہ بلوچ نا ایلم تے یلہ کننگ نا جاگہ اودے تڑی تننگک و ماما قدیر زوراکی نا بیگواہی تا ایسری نا امیت ئٹ پنچ ہزار دے آن زیات تینا برانز ءِ برجاء تخانے۔
جنگ زدہ بلوچستان ئٹ زوراکی ئٹ بیگواہ بندغ تا یلہ مننگ کن برانز مریسہ بسنے ولے داسہ زوراکی ئٹ بیگواہ بندغ تا خون مننگ آن گڈ اوفتا جون تیکن ہم برانز نا کمک ءِ ہلوئی تمک۔ جہانی بندغی حق آتا ادارہ تا چھپی و پاکستانی آن بلوچستان ئٹ زوراکی نا بیگواہی تیا ورندی خواہنگ آن پاہناد کننگ بلوچستان ئٹ ہزار آ بندغ تا زوراکی نا بیگواہی تیان بندغی نیستی ودی مسنے۔
بلوچستان نا ضلع کیچ نا بنجاہی شار تربت ئٹ استو گمانی وڑ ئٹ پولیس نا سم کاری آن زالبول بیران مس۔
تدینی تربت نا علاقہ صلالہ بازار آبسر ئٹ مسنے، پولیس نا ردئٹ پولیس ٹولی عبید پنی ءُ دوبہ دار ئسے نا دزگیری کن ہناسس ولے دوبہ دار دزگیری آن تینے رکھنگ و نرنگ کن پولیس آ سم کاری بنا کرے ہراڑان دوبہ دار نا توفک آن سم اونا زائیفہ ءِ لگا و او کسک۔
اندن کہوکا نا خاہوت نا دوبہ ءِ پولیس نا سم آن زالبول بیران مسنے۔
ہندی بندغ آتا پاننگ ءِ کہ تدینی نا غیر جانبداری ئٹ و صاف پٹ و پول مرے۔
کوئٹہ آن رسینگوک حوال تا ردئٹ پاکستانی لشکر نا دو آن زوراکی ئٹ بیگواہ مروک بلوچ زالبول، نور خاتون تینا چنک سن چنا تیتون اوار آجو مس۔
وائس فار بلوچ مسنگ پرسنز اوفتا یلہ مننگ ءِ پک کرینے۔
یاتی مرے 28 اگست آ پاکستانی سکیورٹی فورسز آک کوئٹہ نا یونائیٹڈ ہوٹل آ چھاپہ خلیسہ ہموڑے ساڑی سبی بدرا نا ہندی بلوچ زالبول نور خاتون ءِ اونا مار عبدالغفار و مسڑ بانڑی تون اوار دزگیر کریسہ نادرست ہند آ دریسر۔ ہرافتا یلہ مننگ کن اینو تربت ئٹ برانز کننگاسس۔
28 اگست آ بلوچستان نا بنجاہی شار کوئٹہ نا اسہ ہوٹل ئسے آن سی سالی آ نور خاتون ءِ اونا ارا چنکو چنا؛ مسڑ بانڑی و مار عبدالغفار تون اوار پاکستانی فورسز و ڈھکوک ادارہ تا کارندہ غاک دزگیری آن گڈ زوراکی ئٹ بے گواہ کریر۔
نور خاتون بلوچستان نا ضلع سبی نا علاقہ بدرا نا ہندی ئسے و دارو درمان نا ردئٹ شال آ بسوسس ہراکان اودے دزگیری آن گڈ بے گواہ کننگانے۔
پن کروک زالبول نا خاہوت بلوچستان نا سیاسی حالیت نا پد ندارہ ئٹ سال 1992 اسکان جلا وطن مسونے ہراڑان گڈ اونا خاہوت ایلو باہوٹی تیتون اوار پدا وطن آ بسر گڑا بلوچ راہشون خیر بخش مری نا نظریہ تون ہمگرنچی نا سوب آن اونا خاہوت ءِ ریاستی ادارہ غاک ٹک کریر، اُرا تیا چھاپہ خلنگا و خاہوت نا کیہی بندغ آک زوراکی ئٹ بے گواہ و کسفنگار۔
2008 ئٹ اندا خاہوت نا بندغ ئس مزار خان ولد گھرام ءِ زوراکی ئٹ بے گواہ کننگا ہرا دائسکان بے گواہ ءِ و وی بی ایم پی نا زوراکی ئٹ بے گواہی نا لڑ ئٹ اوار ءِ۔
عارف ولد سعیدان، یوسف ولد بنگل ہم ہندا خاہوت تون تفوک ئسر ہرافتے زوراکی ئٹ بے گواہی نا اسہ توہ ئسے آن پد دروغ نا مونتس ئٹ کسفسہ اوفتا جون تے خسنگا۔ نور عالم ولد دلشاد 2016 آن زوراکی ئٹ بے گواہ ءِ و عرض محمد ولد پیر محمد ءِ اوغانستان ئٹ ٹک کریسہ کسفنگا ہرا اوڑے باہوٹی نا زند تدیفنگ ئس۔
سیاسی و چاگڑدی کڑدہ غاتا پاننگ ءِ کہ دا خاہوت آ ریاستی ظلم آتیان پاش ءِ کہ ریاست نور خاتون و اونا چنا تے اشتماعی سزا تننگے۔
بلوچ زالبول تا زوراکی ئٹ بے گواہی و دزگیریک:
بلوچستان ئٹ دا اولیکو تدینی اف کہ ہراڑے زالبول و چنا تا زوراکی ئٹ بے گواہی نا تدینیک رپورٹ مسونو، برجاء سال بلوچستان ئٹ زوراکی نا بے گواہی تا دا مسٹمیکو تدینی ءِ ہراڑے زالبول و چنا تے پاکستانی فورسز آتا پارہ غان زوراکی ئٹ دزگیر کریسہ بے گواہ کننگانے۔
برجاء سال مسہ فروری نا نن بلوچستان نا بنجاہی شار کوئٹہ غان پاکستانی فورسز آک ننکان سریاب نا علاقہ گیشکوری ٹاؤن ئٹ اسہ ارا ئسے آ چھاپہ خلیسہ زالبول و چنا تتون اوار پنچ بندغ ءِ زوراکی ئٹ بے گواہ کریر۔
زوراکی ئٹ بے گواہ مروک آتتون اسہ پیر ءُ زالبول، ارا چنکو چنا، رحیم زہری و اونا زائیفہ رشیدہ اوار ئسر۔
داڑان بیدس برجاء سال پاکستانی پولیس نا کاؤنٹر ٹیررازم ڈیپارٹمنٹ (سی ٹی ڈی) کوئٹہ نا علاقہ سیٹلائٹ ٹاؤن آن اسہ بلوچ زالبول ماہل بلوچ ءِ اونا ارا غان دزگیر کریسہ اسیکہ نا درست ءُ ہند ئسے آ سر کرے واہم ولدا ترند السی ردعمل آن گڈ فورسز اوڑا ترند دوبہ خلیسہ اودے مون آ ایس۔
داکان مست خدو نومبر ئٹ بولان نا ایب کیب نا علاقہ تیٹ پاکستانی لشکر بھلو کچ اسیٹ فوجی آپریشن نا بناء ءِ کرے ہرا ارا ہفتہ اسکان برجاء مس۔ آپریشن نا وخت آ پاکستانی فورسز آک اوچ کمان نا ہند آ ہندی زالبول و چنا تے دزگیر کریر ہرافتیٹی زرگل مری،حنیفہ مری، در خاتون مری، ماہیسو سمالانی، گل بی بی سمالانی، سمو سمالانی، زر بخت سمالانی، بانج سمالانی، راجی سمالانی و چار سال آن بے گواہ رکھیہ سمالانی نا زائیفہ مہنا سمالانی و مار کلیم سمالانی اوار ئسر۔
بولان آپریشن ئٹ دزگیر مروک زالبول تے پدان سانگان نا ہند آ فورسز آک یلہ کریر۔
ساڑی آ زالبول و چناء تا زوراکی ئٹ بے گواہی نا تدینی نا بلوچ راج دوست و بندغی حق آتا ادارہ غاک مذمت ءِ کرینو اندن تربت سول سوسائٹی و وائس فار مسنگ پرسنز نا پارہ غان برانز نا پڑو کننگا و چاگڑدی احوالکاری تلہ تیا جتاء کڑدہ غاک دا عمل نا مذمت ءِ کننگ ءُ۔
کاؤنٹر ٹیررازم ڈپارٹمنٹ واشک و کوئٹہ ئٹ اِرا جتا کارروائی تیٹی مونتس ئٹ 8 بندغ ءِ کسفنگ نا دعویٰ کرینے۔
کاؤنٹر ٹیررازم ڈپارٹمنٹ تینا بیان اسیٹ دعویٰ کرینے کہ بلوچستان ئٹ اِرا ڈھکوک حوال تا ردئٹ آپریشن آتیٹ 8 دہشت گرد ءِ کسفین۔
ترجمان سی ٹی ڈی بلوچستان نا ردئٹ اولیکو آپریشن ضلع واشک نا علاقہ بسیمہ ئٹ ترند سم کاری آن گڈ 5 بندغ ءِ کسفنگا اندن پن کروک بندغ تا نرّوک مُسہ سنگت نا دزگیری کن سرچ آپریشن برجاء ءِ۔
ترجمان دعویٰ کرینے کہ کوئٹہ ئٹ مروک ارٹمیکو آپریشن ئٹ ترند سم کاری آن گڈ کالعدم گل داعش نا مُسہ باسک ءِ کسفنگا اندن دہشت گرد آتا جاگہ غان اسہ تُوہ اس مالو برمتہ مروک بندغ ابوبکر ءِ ہم رکھوک یلہ کننگا۔ کسفنگوک بندغ تا جاگہ غان بھلا کچ ئٹ سلہہ و گولہ بارود خنیسہ پٹ و پول بنا کننگا۔
واشک ئٹ کسفنگوک بندغ آتیان چار ئنا چاہنداری محمد یاسین، فہد علی، جمال دین و عبداللہ نا پن تیٹ مسنے اندن اسٹ ئسے نا چاہنداری مننگ کتنے۔
احوالکار تا ردئٹ پن کروک بندغ آک گمانی وڑئٹ مالو آن دزگیر مروک بندغ ءُ ہرافتے سی ٹی ڈی دروغ نا مونتس ئٹ کسفینے۔ واہم دا حوال دائسکان پک متنے۔
سی ٹی ڈی و دروغ نا مونتس آک:
بلوچستان ئٹ سی ٹی ڈی نا کاروائی تے شکبر پن تننگک اندن کیہی کاروائیک میڈیا و زیمی مروک خاہوت نا وسیلہ ئٹ دروغ پن کننگانو واہم حکومتی وزیرک و کوالخواک دا کارروائی تا دفاع ءِ کیرہ۔
برجاء منہ وخت آن بلوچ راج دوست کڑدہ و بندغی حق آتا گل آک سی ٹی ڈی آ دوبہ خلیرہ کہ ہنوک وخت ئٹ ہرا کاریم تے بلوچستان ئٹ پاکستانی ڈھکوک ادارہ و فوج کریکہ ہمو کاریم تے اینو سی ٹی ڈی کننگ ءِ۔ دانا درشانی ءِ بلوچستان نیشنل پارٹی نا سروک و اسمبلی نا باسک سردار اختر مینگل کرینے۔
اِرا دے مالو خضدار نا علاقہ زہری نا ہندی غلام فاروق نا جون کوئٹہ نا علاقہ کلی قمبرانی ٹی کسر نا کرّک آن خننگاسس ہرادے خدو 27 اکتوبر آ مستونگ بنجاہی کسر آن پاکستانی لشکر و سادہ پُچ بینوک کارندہ غاک دزگیر کریسہ نادرست ہند آ دریسر۔
خدو جولائی ٹی پاکستانی لشکر زیارت آن خڑک اسہ مونتس اسیٹ بلوچ لبریشن آرمی تون تعلقداری تخوک 9 بندغ ءِ کسفنگ نا دعویٰ کریسس واہم پدان اوفتا چاہنداری مالو آن دزگیر مروک بیگواہ بندغ تا پن ئٹ مسوسس۔
زیارت تدینی نا برخلاف بلوچ بیگواہ بندغ تا خاہوت آک پنجاہ دے اسکان گورنر ہاؤس نا مونا تولوک برانز کریسر پدان بنجاہی وزیر رانا ثناء اللہ نا باوری ترفنگ آ کوئٹہ ریڈ زون ئٹ برانز ایسر کننگا ہراڑے برانزی تے کمیٹی باوری ترفے کہ زوراکی نا بیگواہی تا توننگ کن گامگیج کننگو و دروغ نا مونتس تیٹ دزگیر مروک بیگواہ بندغ تا خون کننگپرو۔
برجاء تدینی تیان گڈ بیگواہ بندغ تا خلیس تیٹ ودکی مسنے اندن بندغی حق آتا گل آتیتون اوار سیاسی ٹولیک حکومت آ نغدکاری کننگ ءُ۔
کیچ نا علاقہ مند ئٹ جمعہ نا نن نا درست پارہ غان راکٹ ئس خسار ہرا اسہ ارا سے آ تما راکٹ نا اراٹی تمنگ آن ارا زالبول تون اوار مسہ بندغ ٹپی مسر۔
حوال آتا رد ئٹ کیچ نا علاقہ مند ئٹ نا درست پارہ غان خسوک آ راکٹ اسہ ارا سے آ تما، راکٹ نا اراٹی تمنگ آن ارا زالبول تون اوار مسہ بندغ ٹپی مسر۔
حوال آتا رد ئٹ کیچ نا علاقہ مند ئٹ نا درست پارہ غان خلوکا راکٹ اسہ ارا سے آ تمنگ آن ارا زالبول تون اوار مسہ بندغ ٹپی مسر۔
ہندی حوال کار آتا رد ئٹ فورسز نا کیمپ آ جلہو نا وخت آ گمانی وڑ ئٹ ورندی کاروائی نا وخت آ اسہ گولہ ئس اراٹی تما۔
یاتی مرے کہ دا تدینی آن مست اندا علاقہ ٹی سلہہ بند بندغ تا پارہ غان پاکستانی فورسز نا کیمپ آ ترند جلہو کننگاسس۔
