اگست و بلوچستان

ٹی بی پی تیدری

نوشت: زارین بلوچ

اگست نا تُوہ ئنا غنجل معاملہ غاتا نیامٹ ہراتم پاکستان تینا آزاتی دے آ تینے جوزہ تون بیرفنگ تون زندہ تخک، ہموڑے بلوچستان آن اسہ جتا و گوڑیفوک ءُ شرہ اس مونا بریک۔ دا ڈیہہ ئنا مخلوق کن دا تُوہ جشن کننگ نا جاگہ غا دیہاڑی جدوجہد و مون ہڑسنگ نا نشان تس ءِ کیک، و بیرک و بیرفنگ پاکستان نا سڑک آتا زیبائی جوڑ مریرہ گڑا ایلو پارہ غان بلوچستان اسہ جتا ءُ جوزئی ندارہ اس نشان ایتک ہرا مزاحمت، جُہد، یاتگاری و حق خودارادیت نا داستان ءِ زندہ تخک۔

دا تُوہ ئٹ پاکستان نا راجی دے ئنا پدندارہ ئٹ بلوچستان تینا اسہ جتا و گچین کروک بیانیہ اس مونا ہتیک ہراڑے “آزاتی نا دے” پاکستانی راج ئنا پامداری نا بنجاء مریک، ہموڑے بلوچستان دا مجلس ءِ تینا چمشانک تون یات کیک، دنکہ اسہ اندنو دے اس ہرا زوراکی نا حکمرانی نا برخلاف مزاحمت ءِ ودی کیک۔ دا تُوہ برابری رِدئٹ ہم گچین ءِ ہرا اِرا ڈیہہ تیکن جتا مِزل و کسر تیا پام کننگ آ بیوس کیک، انتیکہ دا ڈیہک سیم تو ونڈ کیرہ ولے اسٹ ایلو آن اسُل ناولد و جتا ءُ۔ ہراتم پاکستان اشتماعی ڈول آ جشن آ پامداری تے کیک گڑا بلوچستان نا غنجل آزموندہ و اونا سوب آن سوختہ شورش نا برجاء پنچمیکو لہر دا جاغہ نا مخلوق ءِ جتا چاہنداری ءِ نشان تریسہ ورندی ٹِک آتے مونا ہتیک۔

اگست نا تُوہ بلوچستان نا اُلس کن بھاز اہمیت تخک ہراٹی بلوچ راج دوست آک ہم اوار ءُ، ہرا بلوچستان ءِ پاکستان نا اسہ حقی بشخ اس آخہ بلکن “زوراکی نا حکمرانی” نا دو شیف کالونی اس سرپد مریرہ۔ بلوچ راج دوست آتا پاننگ ءِ کہ 11 اگست 1947 ئٹ برصغیر آن برطانوی استعمار نا پیشن مننگ تون بلوچستان جہان نا نشخہ آ اسہ ملک ئسے نا حیثیت اٹ بس و بلوچ راج تینا وطن و بخت آ اسیکہ وا تینا وس دوئی کرے ولے سختی تیتون ہلنگوک دا آزاتی منہ وختی ئس۔

پاکستانی نا سرکماش و اولیکو گورنر محمد علی جناح بلوچستان نا راہشون خان آف قلات آ پاکستان تون اواری کن زور شاغا۔ نمن مننگ آ پاکستانی لشکر 27 مارچ 1948 ئٹ بلوچستان تون زوراکی ئٹ الحاق کرے۔ او وخت آن بلوچستان شورش آتا پنچ لہر خنانے، ہرافتیان ایلو زیات بھُس کاری کروک ئس۔ بلوچ راج دوست آتا دلیل ءِ کہ پنچمیکو لہر، ہرا دا وخت برجاء ءِ، دانا پلویڑ ئٹ بلوچستان نا شابیتی و گشادئی ءِ و دا تدینگوک چار لہر آتیا زیات غنجل، بھلن و شابیت ءِ۔

آزاتی خواہوک سیاسی گل بلوچ نیشنل موومنٹ اسہ بیان اسیٹی یانزدہ اگست ءِ بلوچستان نا “آزاتی دے” نا ڈول ہڈ تس۔ بی این ایم نا سرکماش ڈاکٹر نسیم بلوچ نا رِدئٹ دا دے بلوچستان آ برطانوی نوآبادیاتی حکومت نا اسہ صدی ئسے نا ایسری نا علامت ءِ۔ اوفک پاریر کہ دا ہمو دے ءِ ہراتم بلوچ راج تینا وطن و تینا اوار بخت آ اسیکہ وا وس دوئی کرے۔ بی این ایم نا چیئرمین دیہاڑی تدینی تیان برصغیر ئٹ بلوچستان نا جتا حیثیت نا نشاندہی ءِ کرے۔ او پارے کہ 4 اگست 1947 آ بلوچستان نا حکمران خان قلات برصغیر نا برطانوی راہشون و مسلم لیگ نا سرکماش محمد علی جناح تون اسہ دستاویز ئسے آ دستخط کریسہ بلوچستان ءِ اسہ آجو و خودمختار راج اس پِن کرے۔ ہفت دے آن گڈ یانزدہ اگست آ بلوچستان نا آزاتی نا باقاعدہ پڑو وائسرائے ہاوس دہلی آن جہان ءِ تس۔ اوفک افسوز نا درشانی کریسہ پاریر ولے آزاتی چُنک وخت اکن ئس، انتیکہ انگریز آک جناح تون اوار مریسہ بلوچستان آ پھبی جلہو کریر، و سوگوْ ڈول ئٹ اوڑا کوزہ کریر۔

او پارے کہ اینو اسکان، بلوچستان زوراکی نا حکمرانی نا پلویڑ ئٹی ءِ۔ تینا تہار آ بخت ءِ مننگ نا جاگہ غا، بلوچ آزاتی خواہوک آک دلیری تون تینا آزاتی کن جدوجہد کرینو، جتا سختی تیان گڈ ہم بلوچ آک تینا وطن آ کوزہ کروک نا مونا ہچبر کاٹم شیف کتور۔ او پارے شورش نا اسہ بے مثل لہر اس مُستی ہننگ ءِ، ہراتم اسکان بلوچستان تینا آزاتی ءِ اسیکہ وا دوئی کننگ کپک۔

بی این ایم نا مشکے ہنکین یانزدہ اگست نا یات ئٹ اسہ اشتماعی مجلس اس ہڈ تس۔ دا اشتماع ئٹ تران کروک آک جوزئی ڈول ئٹ تینا باوہ پیرہ تا ندر مننگ نا ہیت ءِ کریر ہرافک “بلوچستان نا خودمختاری کن تینا دتر وہیفیر۔” مُچی تون تران کریسہ بی این ایم نا راہشون شے بلوچ پارے “دا شہداء بلوچستان نا خودمختاری کن بے زوال جہد نا شاہدی ءِ، منٹ قربان مسر، و ایلوفک بے وطنی ءِ گچین کریر، واہم کس اس ہم دا مسخت آن تینا ہمگرنچی ءِ یلہ کتو۔ دا ثابت آ جیرت دہائی و صدی تا سختی تے سگانے، ہرا یات تریفک کہ گواچنی آزاتی ئٹ وخت لگک۔ بلوچستان نا کسر سخت الّم ارے، ولے خودمختار قومیت نا پارہ غا سفر بیدس لڑزنگ آن ءِ۔

بلوچ اسٹوڈنٹس آرگنائزیشن (آزات) ہم 11 اگست ءِ دیہاڑ نا اہم ءُ ہند اس گوندیسہ ہڈ تس، ہرا بلوچستان آ برطانوی حکومت نا سد سالہ ایسری نا چیدہ ءِ۔ گل پارے بد بختی آن دا آزاتی اسہ سال آن ہم کم وخت ئٹ پاکستان نا جلہو ئٹ تیوہ پُلنگا۔ بلوچستان 75 سالہ محکومیت و کوزہ نا مونتس ئٹ پدا ہم کاٹم ءِ شیف کتو۔ واہم محراب خان، نورا مینگل، و خلیل کون آ دلیر آ بلوچ شخصیت آک بلوچستان نا آزاتی کن کوزہ گیر تا برخلاف دلیری ئٹ جنگ کریسہ، غلامی ءِ مننگ آن نمن مسر۔ گل پارے اوفتا شہادت برطانیہ نا تیوہ وس ءِ بے سہب کرے۔

سلہہ بند ٹولی تا ہیت:

آزاتی دوست بلوچ سلہہ بند گل آتا جوزہ تا بازگشت ہم بلوچستان نا ”آزاتی دے“ ءِ زندہ تخک۔ دا ٹولیک اگست نا تُوہ ئٹ تینا کاریم تیٹ ترند رفتاری ءِ ہم دوئی کیرہ۔ دا تُوہ ئٹ بے دادی نا تدینی تیٹ ودکی مریک، ہرا ٹی نئے بیرہ پاکستانی لشکر بلکن پاکستان نا ”آزاتی دے“ اکن بیرک بہا کروک آتے ہم ٹک کننگک۔ سلہہ بند ٹولی تا پارہ غان 14 اگست ءِ ”مون آ دے“ تکنگک، و بندغ آتیان خواست کننگک کہ جشن ہڈ تننگ آن مُر مریر۔ بلوچستان ئٹ مالو نا وڑ اگست ئٹ بے دادی نا تدینی تیٹ ودکی خننگا۔ پاکستان نا آزاتی دے آن بیرہ اِرا دے مالو سلہہ بند ٹولیک اِرا جتا جلہو تیٹ پاکستانی بیرک بہا کروک اسٹال آتے ٹک کریر۔ دا جلہو تیان اسٹال خواجہ غاک و پین کیہی بندغ آک ٹپی مسر۔

اندا وڑ منہ دے آن گڈ 13 اگست، آ بلوچ لبریشن آرمی (BLA) گوادر ئٹ پاکستانی لشکر تون تد چینی انجینئرز آتا قافلہ آ جلہو کرے۔ بی ایل اے دا جلہو نا ذمہ واری ءِ ارفیسہ اسہ بیان اس شینک کرے، ہرا ٹی درشانی کننگا کہ دا جلہو ءِ مجید بریگیڈ تون تعلقداری تخوک اِرا ”جند ندر“ سر تسر، ہرا بی ایل اے نا اسہ خاص و بھیم بش کروک کڑدہ ئسے۔ مجید بریگیڈ جند ندری جلہو آتیٹ تینا لائخی تیکن چاننگک۔ جلہو آن پد زو پاکستانی سکیورٹی فورسز آک علاقہ ءِ گھیرہ کریسہ سرچ آپریشن بناء کریر۔ دی بلوچستان پوسٹ ءِ ہندی احوالکار تیان سما تما کہ فورسز آک کیہی چھاپہ تے خلکر و کیہی بندغ تے ”زوراکی ئٹ اودیم“ کریر۔

بی ایل اے شابیتی حوال ءِ شینک  کرے۔ ہراٹی پاکستانی سیکورٹی فورسز و پاکستان نا ”آزاتی دے“ نا مجلس آتے ٹک کننگ، اونا جنگجو تا پارہ غان بولان، تربت، پنجگور، قلات، و مستونگ ئٹ تفوک جلہو تا ذمہ واری ءِ ارفنگا۔ دا جلہو تا سوب مرگ ئنا گواچی و کیہیک ٹپی مسر۔ بی ایل اے ”بلوچ لمہ وطن نا آزاتی“  اسکان ”کوزہ گیر طاغت“ آتے ٹک کننگ نا پک گمان کرے۔ بی ایل اے نا جلہو تا لڑ داڑے سلتو بلکن دا تُوہ ئٹ او پین کیہی جلہو تے کرے۔

آزاتی دوست اسہ پین گل بلوچستان لبریشن فرنٹ اگست نا اولیکو ارا ہفتہ ٹی پاکستانی فورسز آتے ٹک کروک کیہی جلہو تا زمہ واری ءِ ارفے۔ بی ایل ایف دعویٰ کرے کہ دا جلہو تیٹ پاکستانی فورسز نا کیہی کارندہ غاک مرگ ئنا گواچی و ٹپی مسر، داڑان بیدس، فورسز کارندہ آتے پین ہم نسخان ارفوئی تما۔

معلومداری تا ردئٹ تیوہ بلوچستان ٹی بلوچ سلہہ بند ٹولی تا پارہ غان کم و ود 81 سلہہ بند جلہو کننگا۔

سکیورٹی فورسز نا ردعمل

ودوکا خراب حالیت ءِ ماریسہ پاکستانی فورسز آک بلوچستان نا علاقہ زامران ئٹ 11 اگست انسداد بغاوت آپریشن ءِ بناء کریر۔ ہراٹی زمینی لشکر ءِ گن شپ ہیلی کاپٹر و ملٹری ڈرون آتا کمک دوئی ئس۔ سیاسی، چاگڑدی و بندغی حق آتا باسک آک لشکری کاروائی تیا بھیم نا درشانی کریسہ دعویٰ کریر کہ دا کاروائیک ”زوراکی نا بیگواہی“ و ” خون “ ئنا اسہ دروشم ئسے۔ آپریشن نا نیام ئٹ پاکستانی فورسز کارندہ و بی ایل ایف نا جنگجو تا نیام ئٹ جھڑپ ہم مس ہرانا سوب آن بی ایل ایف نا ارا جنگجو خلنگار۔ گل میڈیا ٹی اسہ بیان اس شینک کریسہ پارے کہ: شہید مروک  سرمچار آک ارا پاکستانی فورسز کارندہ آتے مرگ ئنا گواچی و کیہی تے ٹپی کریسہ تینٹ شہادت ءِ گچین کریر۔

اگست نا توہ ئٹی بلوچستان ئٹ زوراکی نا بیگواہی تیٹ ہم نا گمان ولے ترندی خننگ ٹی بسونے۔ دی بلوچستان پوسٹ تیوہ تُو ئٹ زوراکی نا بیگواہی تا کم و ود 56 کیسز درج کرینے، ہرا کہ خلیس نا کچ اسکان زیات ءُ۔ دزگیر مروک بندغ آتیان منہ بندغ  پدا بسونو، ولے بھاز آک بیگواہ ءُ۔ مجید بریگیڈ نا جلہو آن گڈ گوادر ٹی سرچ آپریشن و زمرہ انسداد بغاوت آپریشن ہم زوراکی نا بیگواہی تا کچ ئٹی ودکی کرینے۔

ایلو پارہ غان، بلوچ باسک آک سکیورٹی فورسز آتا مہم آ ہم روشنائی شاغار۔ بندغی حق آتا باسک و وائس فار بلوچ مسنگ پرسنز نا آرگنائزر حوران بلوچ کوئٹہ ئٹ اسہ پریس کانفرنس اسیٹ پارے کہ ہرا وڑ اونا خاہوت ءِ اونا کاریم تا سوب آن بھیم و تڑی تیتون مون ایتوئی تما۔ گمانی ڈول سکیورٹی فورسز آک اوفتا اُرا ٹی پترینگسہ اونا خاہوت ءِ تڑی تریسہ اونا کاریم تے توننگ نا کوشست کریر۔

ٹی بی پی دا ہم مُچ کرے کہ اگست نا تُوہ ئٹ تیوہ غا بلوچستان ئٹ پاکستانی سلہہ بند لشکر آتا پارہ غان کم آن کم 54 چھاپہ، ناکہ بندی و لشکر کشی کننگا۔ دا بے داد تدینی تیان 7 جون ئنا احوال ہم رسینگا۔

اگست نا تُوہ ئٹ اسہ اہم بلوچ راہشون نواب اکبر خان بگٹی نا سال دے ہم ہڈ تننگک۔ 26 اگست 2006 ئٹ کوہلو ٹی پاکستانی لشکر نا دو آن اونا خون بلوچستان نا دیہاڑ ئٹ اسہ اہم ءُ ساہت ئسے۔ نواب بگٹی بلوچستان نا بندغ آتیتون مروک نا انصافی و بلوچ الس ءِ اوفتا تینا قدرتی مڈی تیٹ زیات بشخ تفننگ نا سوب پاکستانی ریاست آن سوختہ ئس۔ سوئی، ڈیرہ بگٹی ٹی گمانی ڈول پاکستانی لشکر نا کارندہ تا دو آن اسہ زالبول ڈاکٹر ئسے نا عصمت دری ہم اسہ اہم ءُ ٹک اس ئس۔

نواب بگٹی ہمو وخت سلہہ ارفے ہراتم ہمو وخت ئنا آمر پرویز مشرف تون اوار پاکستانی کوالخواک اسہ زالبول ڈاکٹر ئسے نا عصمت دری نا گمانی ڈوہدار ءِ دوٹی تننگ آن نمن کریر۔ پاکستانی لشکر بگٹی ءِ گھیرہ کننگ کن ڈیرہ بگٹی ٹی جُوان لشکر کشی کرے، ولے او مَش تا پارہ غا ہنا و او گوریلا جنگ ءِ گچین کرے۔ نواب بگٹی ہموتم شہید مس ہراتم گمانی ڈول پاکستانی لشکر ہمو غار ءِ اوڑا بٹے ہرا ٹی او رہینگاکہ۔ بلوچستان نا بندغ آتیکن نواب بگٹی مزاحمت نا چیدہ جوڑ مس و پاکستانی ریاست نا خڑک آ او اونا اختیار ءِ ہکل تروک اسہ ڈوہدار اس ئس۔

اگست بلوچستان کن دتر و چیدہ نا دروشم ئٹ چاننگک۔ انتئے کہ دا تُوہ ئٹ بلوچ راج دوست و ”آجوئی دوست“ ٹولیک جشن و ماتم نا اسہ جتا ءُ اوار شاغنگ اس تخرہ۔ دا اسہ اندنو تُوہ ئسے ہرا بلوچستان ءِ چنک وخت آجوئی نا چس ئنا یات ایتک۔ دا ہمو تُوہ ہم ارے ہراتم ”کوزہ گیر“ پاکستان جہان نا نشخہ غا اسہ ڈیہہ اس جوڑ مس۔ اگست بلوچستان ئٹ خرین و ہنین مارشت آتا تُوہ ئسے، ہرا خرین پالو تا پارہ غا زیات شیف مریک۔ جوزہ غاتا شرہ دا شیف مفروک آ ڈغار نا کسہ ءِ جوڑ کیک، ہرا گواچنی خودمختاری ءِ پٹوک بندغ تا سوگوْ جوزہ تا ثبوت ءِ۔

بلوچستان ئٹی مقتدر تپہ آتا نمائندہ نگران حکومت

ٹی بی پی سرگپ

بلوچستان ئٹی حکومت و سیاست نا فیصلہ ساز ادارہ آک پاکستان نا مقتدرہ لشکری طاغت آکو و او بلوچستان ءِ اسہ سیاسی آزموندہ جاہ اس جوڑ کرینو۔ مالو نا گچین کاری آن مُست بلوچستان عوامی پارٹی ءِ جوڑ کرسا اوفتے حکومت ءِ تسُر و داسنا نا گچین کاری آن مُست ذمہ وار تپہ آتا کمک ئٹ نگران حکومت جوڑ کننگا تاکہ گچین کاری ئٹی اندافتا پالیسی تے عمل ئٹ ہتنگ مرے۔

بلوچستان ئٹی بلوچ راجی سیاست و سیاسی عمل آ بے پڑو کروک رکھ ارے ولے دا حالیت ئٹی ہم کم کچ آ سیاسی مزاحمت برجاء ءِ۔ پاکستان نا ذمہ وار تپہ آتا کوشست ءِ کہ بلوچستان ئٹی عملی وڑ آ نیشنلزم نا سیاست ءِ ایسر کننگ مرے ہراڑکن مصنوعی سیاسی شخصیت و پارٹی بلوچستان آ چٹی کننگ مننگ ءِ۔

بلوچستان ئٹی راجی آجوئی نا سیاست کروکا ادارہ آتیا رکھ خلوک ءِ ولے راج دوستی نا سیاست نا دعویٰ کروکا تپہ آتا مصنوعی سیاسی شخصیت آتا بلوچستان نا سیاست آ چٹی کننگ آ چُپی سوج ئنا نشان ئسے۔ نیشنل پارٹی نا ذمہ وار تپہ آتا نمائندہ انوار کاکڑ ءِ پاکستان نا نگران سروزیر گچین کننگ ءِ خوش آئند پاننگ بلوچستان و اوفتا سیاست کن زہر خون ثابت مننگ کیک۔

بلوچستان نیشنل پارٹی نا مقتدر تپہ آتا نمائندہ آتا بلوچستان نا سیاست آ چٹی کننگ آ توار بڑز کننگ خوش آئند ءِ ولے بلوچستان نیشنل پارٹی قدوس بزنجو نا بلوچستان عوامی پارٹی نا حکومت ءِ ساہ بشخنگ ئٹی اوار ءِ۔ بلوچستان نیشنل پارٹی ءِ پُہہ مروئی ءِ کہ قدوس بزنجو و صادق سنجرانی کون آ شخصیت آتا مُخ تفی کرسا او بلوچستان نا سیاست ئٹی مقتدر طاغت آتا کسر ءِ توننگ ئٹی سرسہب مننگ کپسہ۔

بلوچستان ئٹی راجی سیاست نا کسر نا بند مننگ آن بیرہ اسہ فکری تپہ اس زیمی مروف بلکہ داڑان نیشلزم نا بنداو آ سیاست کروکا تا کسر بند مرو۔ بلوچستان ئٹی کاریم کروک سیاسی پارٹی تے اسٹ ایلو نا برخلاف محاذ ملنگ نا جاگہ غا مقتدر تپہ آتا کنڈ آن بلوچستان آ چٹی کننگ آ مصنوعی سیاسی شخصیت و تپہ آتا کسر ءِ توننگ کن اوڑدئی گھام ہرفوئی ءِ۔