بنگلہ دیش ئٹ بشام نا پِر تیان زیات آباتی والا علاقہ تا زیمی مننگ آن ڈینگی ہڷ نا کیس آتیٹ ودکی مننگ ءِ و ملک ئٹ دا مرض آن برجاء سال دائسکان 426 بندغ مرگ ئنا گواچی و کم و وَد 90 ہزار زیمی مسونو۔

جہانی ادارہ جانجوڑی نا اسہ تیدری ئسے نا رِدئٹ ڈینگی نا زیات تدینیک زیات پِر، باسنی ئٹ ودکی و زیات نمبی نا سوب مننگ ءُ انتیکہ دا حالیت آتیٹ تیوہ غا بنگلہ دیش ئٹ پشہ غاتا آباتی ئٹ ودکی مسونے۔

پٹ و پول کروک و جانجوڑی چاہندار آتا پاننگ ءِ کہ ڈینگی نا ناجوڑ آتا گواچنی کچ سرکاری حساب آن بھاز زیات ءِ۔

احوال تا رِدئٹ برجاء سال اگست نا نیمہ اسکان 18 آن 81 سال ئنا سن ئنا نیامٹ کم آن کم 426 بندغ دا ہڷ آن کسکنو۔

بنگلہ دیش نا ڈائریکٹوریٹ جنرل آف ہیلتھ سروسز نا رِدئٹ سال 2000 ئٹ اولیکو نوشت مروک ڈینگی دین آن گڈ برجاء سال تیوہ غاتیان زیات بھُس کاری کروک مونا بسونے۔

ڈینگی نا چار ڈول ءُ، ہرافتیٹ تیوہ غاتیان زیات ساہ ہلوک، ہیمرج ڈینگی اوار ءِ۔ واہم بیرہ زیات زیمی مروک ناجوڑ آک ہستپال آتیا آتیٹ بریرہ، ہراڑے حکومت حساب آتے مُچ کیک۔

بنگلہ دیش ئٹ خدو ڈینگی آن 281 مرگ و 62 ہزار نود و ہشت کیس نوشت مسوسر۔

ڈینگی وائرس زیمی مادہ ایدڈیس پشہ نا کُننگ آن تالان مریک، ہرا پوشکن ہڷ و زیکا انفیکشن ءِ ہم پین تیا دیک۔

بشام نا مُد ئٹ بنگلہ دیش ئٹ دا مرض وار وار مریک۔ واہم، دا سال نا دین تُرند مننگ ءِ، ہرانا کیس آتا کچ ئٹ شاری و خلقی علاقہ غاتیٹ اسہ ڈول ئٹ بھاز ودکی خننگ ئٹ بسونے۔

بلوچستان نا بنجاہی شار کوئٹہ ئٹ پاکستانی لشکر نا پوسٹ آ مروک جلہو نا ذمہ واری ءِ بی ایل اے ارفے۔

استو پی ایم ڈی سی آن خڑک ژڑی نا ہند آ سلہہ بند بندغ آک پاکستانی لشکر نا اسہ پوسٹ ئسے راکٹ و ایلو سلہہ تیٹ ٹک کریر۔

پولیس کوالخواک جلہو ءِ پک کریسہ پاریر کہ کوئٹہ، اسپن کاریز ئٹ پولیس و ایف سی نا اوار انگا زرغون چیک پوسٹ آ مارٹر گولہ خلنگا۔ پولیس جلہو ئٹ ہچ وڑ نا نسخان تا پک کتنے۔

پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک کوئٹہ ئٹ کوزہ گیر پاکستانی لشکر نا اسہ پوسٹ ئسے سلہہ بند جلہو ئٹ ٹک کریر، ہرا نا سوب اِرا دژمن کارندہ مرگ ئنا گواچی مسر۔

او پارے کہ سرمچار آک استو ننکان 8 بجہ نا وخت آ پی ڈی ایم سی سائٹ آن خڑک ژڑی نا ہند آ کوزہ گیر پاکستانی لشکر نا اسہ پوسٹ ئسے آ راکٹ و ایلو بھلا سلہہ تیٹ جلہو کریر ہرا نا سوب اِرا دژمن کارندہ جاگہ غا مرگ ئنا گواچی مسر۔

کوزہ گیر لشکر نا پوسٹ آ راکٹ تمنگ آن دژمن ءِ گیشتر جانی و مالی نسخان تیتون مون ایتوئی تما۔

ترجمان پارے کہ بلوچ لبریشن آرمی دا جلہو نا ذمہ واری ءِ ارفک و دا پک گمان کیک کہ کوزہ گیر پاکستانی لشکر نا تیوہ پیش تمنگ اسکان ننا کاروائیک برجاء مرور۔

ہفت تلار

نہار انگا کڑدارک کوٹنگا نیئت تو تینا
بریرہ اگہ داڑے سینکُٹ مریرہ
کس ئس پارو گوبَٹ مریرہ

توار ئس بریک اوفتا سَت کرسّہ
گُڑا اوفتا ہڈّہ باء خف تا کائک
ہخس بَش مرے چھول چَٹ ٹبّفوکو

پدا ہم!
ہموڑے مَنہ پُھل بریرہ خَلیئو جمن بُھٹ مریرہ، اخس ڈڈّی ئٹ جِھک سلیرہ
نہ اُست ئٹ تَا دنیا نا رنگاتا شونخ ائے
نہ تینا چکار ائے

ندارہ، ندارہ ارے چُپّ داڑے
ولے جوڑ ہنداڑے ہاٹی مریک ہکّل آتا
دا زیبائی ئے دُو دُو کننگ کِن، چھٹّفنگ کِن بریرہ
بروکاک گھرپینگرہ، مین ہلیرہ

شاعر: وحید انجم

زوراکی ئٹ بیگواہ آصف و رشید بلوچ نا بیگواہی ءِ پنچ سال پوروْ مننگ آ اوفتا خاہوت نا پارہ غان 29 اگست آن 31 اگست اسکان پاکستان نا بنجاہی شار اسلام آباد ئٹ مُسہ دے ئی برانزی کیمپ اس ٹہفنگو اندن 31 اگست آ بیگہ نا 4 بجہ غا دپدرشانی اس کننگو۔

خاہوت نا ردئٹ آصف و رشید نا زوراکی ئٹ بیگواہی ءِ 31 اگست 2023 آ پنچ سال پوروْ مرو، دا نیام ئٹ نن اوفتا رکھ یلہ کننگ کن ہر مننگ کروک کوشست ءِ کرین ولے اوفتے یلہ کننگپک۔

اوفک پاریر کہ زوراکی نا بیگواہی آن گڈ اوفتا جعلی دزگیری ءِ پاش کننگانے۔ اوفتیتون اوار دزگیر مروک اوفتا ایلو سنگت آک یلہ مسر آصف و رشید نا بابت ننے اینو اسکان ہچو معلومداری تننگپک، اوفتا دا وڑ نا بیگواہی خاہوت کن اذیت ئسے۔

خاہوت نا پاننگ ءِ کہ آصف و رشید نا یلہ مننگ کن 29 اگست 2023 آ بنجاہی شار اسلام آباد پریس کلب نا مونا مُسہ دے ئی کیمپ اس خلنگ آن گڈ 31 اگست بیگہ نا 4 بجہ غا دپدرشانی اس کننگو۔

31 اگست 2018 آ پاکستانی لشکر نوشکے ئٹ زنگی ناوڑ پکنک آ ہنوک دئے بندغ ءِ دزگیر کریسس، فورسز آتا پارہ غان پن کروک بندغ تا دزگیر ئٹ عکس آک ہم شینک کننگار اندن میڈیا غا دا بابت احوال ہم تننگا۔

واہم پدان پن کروک بندغ تے بیگواہ کننگا۔ بیگواہ مروک ایلوفتے اِرا سال نا نیام ئٹ جتا وخت آتیٹ یلہ کننگا اندن اوفتیتون اوار بیگواہ مروک آصف و رشید بلوچ دائسکان بیگواہ ءُ۔

بیگواہ آصف و رشید نا یلہ مننگ کن اوفتا خاہوت کوئٹہ، کراچی، اسلام آباد ئٹ تینا برانز آتے ریکارڈ کرفینے اندن دا بابت بیگواہ بندغ تا کمیشن ئٹ ہم ہنانے واہم اوفتا دوستخواک دائسکان یلہ کننگتنو۔

یاتی مرے 31 اگست آ زوراکی نا بیگواہی تیان زیمی مروک آتا جہانی دے نا ردئٹ وی بی ایم پی نا سروکی ٹی کوئٹہ ئٹ بیگواہ بندغ تا ویل آ اسہ دے ئی سیمینار اس اڈ تننگو۔

وائس فار بلوچ مسنگ پرسنز سیمینار نا مہمان خاص بلوچستان نیشنل پارٹی نا سروک سردار اختر مینگل مرو اندن سیمینار نا سروکی ءِ وی بی ایم پی نا کماش نصراللہ بلوچ کرو۔

بلوچستان نا ضلع سوراب و کیچ ٹی سلہہ بند بندغ آک سم کاری کریسہ زالبول تون اوار مسہ بندغ ءِ مرگ ئنا گواچی کریر اندن اسٹئسے ٹپی کریر ۔

سوراب ٹی سم کاری نا تدینی کلی رودینی بالینہ نا ہند آ  مس، ہرافتا چاہنداری محمد حیات و ( ن ) نا پن آن مسنے۔

ہندی حوال تا رد ئٹ کسفنگوک آک واشک نا علاقہ بسیمہ نا ہندی ءُ، ہرافک منہ وخت مالو اُرا آن نریسہ دوستی نا برام کرینو۔

ذرائع نا دعویٰ ءِ کہ مسڑ نا باوہ گیشتر بندغ آتون اوار مریسہ سم کاری کریسہ اوفتا خون ءِ کرینے، پولیس جون تے ارفیسہ ڈی ایچ کیوآ درے اندن علاقہ ءِ گھیرہ کریسہ ڈوہدار آتا پٹ و پول ءِ بناء کریر۔

ایلو پارہ غان تربت آن حوال رسینگانے کہ درو شام ئنا یک بجہ نا وخت تجابان ئٹی نا درست بندغ تا سم کاری آن میر دلاور ولد واحدبخش پنی ءُ بندغ ئسے مرگ ئنا گواچی کننگانے۔

واہم تدینی تا سوب آک دائسکان معلوم متنو۔

انڈیا نا پارہ غان رادہ کروک چندریان تھری خلائی جاز سر سہبی ئٹ طوبے آ دڑنگانے۔

چندریان تھری اینو بیگہ نا کم و ود شش بجہ غا طوبے نا جاندمی بشخ آ دڑنگا۔

دا نا سوب آن انڈیا طوبے نا دا بشخ آ خلائی جاز دڑفوک اولیکو و امریکہ، مسکوہی سوویت یونین و چین آن گڈ سافٹ لینڈنگ کروکچارمیکو ڈیہہ جوڑ مسنے۔

انڈیا نا خلائی ایجنسی تینا ہیڈ کوارٹر ئٹ دا مشن نا آپریشن سینٹر نا اینو عکس آتے ہم شینک کریسس ہراڑے سائنسدان و ٹیکنیکلاسٹاف تیوہ غا حالیت آ پامداری ئٹ نظر تخانو۔

چندریان 3 مشن نا بھلا مسخت آتیان اسٹ ’دیر ئٹ جوڑ مروک برف‘ نا پٹنگ ءِ، سائنسدان تا پاننگ ءِ کہ اگہ چندریان دا برف نا پٹنگئٹ سر سہب مریک گڑا بروک وخت ئٹ طوبے آ بندغ آتا رہینگنگ ئٹ کمک رسینگ کیک۔

چندریان 3 نا خلائی مشن 14 جولائی آ انڈیا نا جاندمی ریاست آندھرا پردیش آن بنا مسوسس و 40 دے ئنا مرغنا سفر آن گڈ اینو داطوبے نا قطب جاندمی آ دڑنگانے۔

اسرو داڑان مالو ہم اِرا وار طوبے نا جاندمی قطب کن مشن رادہ کریسس ہرا بے سہب مسوسر واہم چندریان 3 نا او خطہ ئٹ دڑنگ سرسہب مس۔

دے کہی بلوچستان نا علاقہ سراوان گوشت آن اِرا دے مالو رسینگوک ہڑتوما بندغ تا جشوک جون تا چاہنداری ءِ اوفتا خاہوت ہانی گل وسمیر جان نا پن ئٹ کرینے۔

پاننگک کہ ہڑتوما تا جون تے مردہ خانہ ٹی تخنگانے۔

یاتی مرے تدوکا ہفتہ غا ہڑتوما اَرغ و زائیفہ ءِ دے کہی بلوچستان نا علاقہ پہرہ محمد آباد آن نادرست سادہ پُچ بینوک اِرا گاڑی ٹیسوار سلہہ بند بندغ آک برمتہ کریسر دا وخت ئٹ او ہوائی سم کاری کریسہ اوفتے دریر ہراڑان گڈ او بیگواہ ئسر۔

سمیر بلوچ برجاء تُوہ تربت ئٹ گمانی وڑ ئٹ رسالت نا بے شرفی نا دوبہ ٹی کسفنگوک رؤف بلوچ نا ایلم ئس۔

ہانی گل بلوچ بلوچستان ئٹ بندغی حق آتا بابت کاریم کریکہ و او زوراکی نا بیگواہی تا برخلاف کراچی و بلوچستان ئٹ کیہی برانز آتیٹاوار مس۔ اونا دعویٰ ئس کہ اودے پاکستانی ڈھکوک ادارہ غاک اونا مسکوہی دشتار نسیم بلوچ تون اوار بیگواہ کریسر و اودے کیہیتُوہ تا بے دادی آن گڈ یلہ کننگا واہم نسیم بلوچ دائسکان بیگواہ ءِ۔

حوال تا رد ئٹ پاکستانی لشکر تربت نا ہندی ئسے کراچی آن دزگیر کرسا بے ڈس ءُ جاگہ سے آ درے، تربت آن بالگتر نا ہندی اِرا ورنابیگواہ کننگار و برجاء تُو بیگواہ مروکا چار ایلم آجو مسر۔

ضلع کیچ ئنا علاقہ شے کہن نا ہندی محکمہ جانجوڑی ٹی کاریم کروک رفیق احمد ڈاکٹر ولد مراد محمد کراچی آن بیگواہ کننگا۔

خاہوت آن رسینگوک حوال تا رد ئٹ ڈاکٹر رفیق احمد چُنا تا علاج کن کراچی آ ہناسس، ہرادے 11 اگست آ کراچی نا علاقہ صدر آنبیگواہ کننگانے۔

حوال تا رد ئٹ ڈاکٹر رفیق احمد نا تعلقداری نیشنل پارٹی آن ءِ و بیگواہ مروکا نا خاہوت ءِ داسکان ہچو حوال یا معلومداری تننگتنے، نئےنیشنل پارٹی نا موقف داسکان مونا بسنے۔

اندن کیچ ئنا علاقہ تربت آن اِرا ورنا نا زوراکی ئٹ بیگواہ مننگ نا ہم حوال رسینگانے۔

بیگواہ مروکا ورنا تا چاہنداری زہیر لشکران و پیر جان نا پن آ مسنے۔

حوال تا رد ئٹ تومکا ورناک بالتگر نا ہندی ءُ و اینو تربت ئٹی اسپتال آن بیگواہ کننگانو۔ تومکا ورناک زہیر نا ناجوڑی نا سوب آن اسپتال آہناسر، ہرا میٹرک نا خوانندہ اس پاننگک۔

ایلو کنڈ آن شش اگست آ ضلع کیچ ئنا علاقہ تمپ آن بیگواہ مروکا شش ایلم آجو مرسا اُراغا سر مسنو۔

خیال مرے کہ 6 اگست آ تمپ ئنا علاقہ پل آباد ئٹی برکت مراد، شوکت مراد، بابت مراد و ایاز مراد ءِ پاکستانی لشکر اوفتا اُرا غا چھاپہخلسا دزگیر کننگ آن گڈ بیگواہ کریسس ہرا آجو مرسا اُرا غا سر مسنو۔

شیرانی نا علاقہ شرن پائے محمد ئٹ دئے دے ٹی سورک آن دائسکان اِرا چنا بیران مسر اندن درزن آک زیمی ءُ۔

ضلعی بست و بند شیرانی و محکمہ جانجوڑی دائسکان زیمی علاقہ تیٹ ٹیم رادہ کتنے، بست و بند نا بے پامداری نا سوب گیشتر چناتا زیمی مننگ نا خُلیس ارے۔

ہندی بندغ آک حکومت و محکمہ جانجوڑی آن دمدستی کمک رادہ کننگ نا خواست کریسہ پاریر کہ ایلو چنا تے رکھنگ کن دمدستینوٹس ہلنگ مرے۔

اینو سہب ئنا پاکستانی لشکر آ جاندمی وزیرستان نا علاقہ آسمان منزہ نا ہند آ مروک اسہ جلہو اسیٹ کم آن کم یانزدہ کارندہ مرگ ئنا گواچی اندن کیہیک ٹپی مسنو۔

دا جلہو پاکستانی لشکر نا 30 بلوچ رجمنٹ آ مسنے ہرا نا سوب پن کروک کارندہ غاک مرگ ئنا گواچی مسنو۔

تحریک طالبان پاکستان (ٹی ٹی پی) سلیمان خاصوار نا علاقہ ئٹ مروک جلہو نا ذمہ واری ءِ ارفیسہ دعویٰ کرینے کہ دا جلہو ئٹ 18 کارندہ مرگ ئنا گواچی مسنو۔

سکیورٹی کوالخواک پن پاش کپننگ نا شڑط آ ہندی میڈیا ءِ پارینو کہ جھڑپ ئٹ 11 فوجی کارندہ مرگ ئنا گواچی و مُسٹ ٹپی مسر اندن کوالخواک علاقہ ئٹ سرچ آپریشن بنا کرینو۔

پاکستانی لشکر نا احوالکاری تلہ آئی ایس پی آر تدینی ءِ پک کریسہ شش کارندہ نا مرگ ئنا گواچی مننگ ءِ پک کرینے۔

آئی ایس پی آر نا ردئٹ چار جلہو کار سم کاری ٹی کسفنگانو اندن اِرٹ ٹپی مسنو۔ پاکستانی لشکر نا احوالکاری تلہ مرگ ئنا گواچی مروک کارندہ تا چاہنداری ءِ دائسکان پاش کتنے۔