“زندان آن اسہ چِٹی ئس”
نوشت: شہید سلمان کمبرانی | مٹ: بیربل بلوچ
دی بلوچستان پوسٹ
کنا ہُرا خاہوت ئٹی ای کنا زیبا غا لُمہ کنا مہرئنا کائنات، معصوم و شفیق آ باوہ، کنا مہر کروکا چار اِیڑ تون اوار کنا ایلم حسان، ہنینا کنا فرزند نادر جان و کنا گچینا مسڑ بانڑی ءِ پروردگار کنے تسنے ۔۔
کنا ودی مروکا خلق کلی کمبرانی شال، کنا بے مٹ آ زیباغا خلق، کنا چُنکی، کنا ورنائی
کنا گچینا سنگتاک کنے نُما یات باز بریک۔۔۔
کنے جوان یات ءِ شام نا وخت کلی کمبرانی ٹی دکان تا تڑہ آ تیا نن کُل سنگتاک توسُنہ مجلس و کچاری کرینہ علی احمد ءِ تنگ کرینہ، خواجہ مزمل تینا شاعری آن محفل نا چس ءِ زیات کریکہ، ہر کُنڈا واہ واہ نا توارک مسورہ، اسہ کڑک و چاہ ئس جوڑ مسکہ ہرادے کُل سنگتاک کُنگورہ، مون مقابل کماش ماما دُران، ماما سیلانی ہم مجلس ئٹی بشخ الکورہ ۔۔۔
ہر سال کہ یخ ئنا مُد بسکہ شال ئٹی برف بٹیکہ گڑا نن کُل سنگتاک چلتن آ مون کرینہ چنگیزے ہم تینتو اوار تُد کرینہ مَش ئنا ٹُل آ لگِنگ بھاز ڈُکھیہ ئس مخانہ، مُخے توریسہ بڑزا لگانہ، ندارہ کرینہ تینا ڈیہہ ئنا زیبائی ءِ ہُرانہ گل حسن تون اوار ارا نا دھول آ چھاپ خلکُنہ گڑا ننے تُرندا یخ ئنا سما تمیتوکہ۔۔۔
نن پیر و مرشد آ تا مُرید ہم اسُن ہندن کلی کمبرانی ٹی ہراتم کہ جشن عید میلاد النبی مسکہ نن کُل سنگتاک کاریم تیٹی مون مونی اسُن تینا خلق ئنا مسیت ءِ زیبا کننگان ال تہ دیگ آ تے تیار کنِنگ ٹی مُچا نن گٹ مسُنہ ننا اسہ گچینو سنگت ئس عدنان دا دے تیٹی دبئی آن بسوسُس محفل ئٹی دبئی نا کسہ آک مسُرہ نن غور ٹی بنگونہ تا گڑاس مخِنگ ٹاکو ٹی محفل آن پیشتمارہ ۔۔۔
کنے یات ءِ ہراتم کہ فٹبال ٹورنامنٹ نا میچ آ تا بِنا مسکہ، شہید صدیر فٹبال کلب ہرانا سرپرستی ءِ ای کریٹہ۔۔
کنے جوان یات ءِ سہب وختی پریکٹس کن پیشتمانہ شام آ ہُرے آ ہُرا غا بسُنہ۔
ننا ٹیم ئٹی علی احمد، پرویز، بابر، واجد ، کاشف حسنین کُل اسور بھاز محنت کریرہ انتئے کہ گڑاس فٹبال نا جہان ٹی بلوچستان آن گچین مننگ کہ پیشن اننگ کہ کوشست کریرہ ۔۔
کنے جوان یات ءِ نیزگار اسُن ای و علی احمد سوچ خلکُن بے کاری ٹی وخت تدینگپک بر کاروبار ئس کین گُڑا ای منیر احمد نا جاگہ ئس کرایہ ٹی الکُٹ ہراٹی موٹر گاڑی سروس ئس ملان۔۔
مزہ نا ہیت دادے کہ پنچ دے آن پد ماما ننے جاگہ آن تینا کشا ھاھاھا۔۔۔
ماما بھاز خرینو بندغ ئس اسک ہرا نا کس تون لگیتوکہ۔
منہ دے آن پد ماما مراد تون اوار کیبل نا دفتر ٹی کاریم ءِ بناء کریٹ تُو ئنا پانزدہ سد روپئی تنخواء مرسینگاکہ ۔
اسُل بیکارو کاریم ئس اسکہ اسہ دے چاہ جوڑ کریٹہ چادان اڑتومہ دُوکے کنا ہُشا بے پیسئی نا وجہ غان ڈاکسر آ ہم اِننِگ متو منہ تُو دُوک کنا عذاب اسُر۔
سنگتا تیٹی پرویز کنا باز خیالءِ ریکہ کنے پیسہ ہم تسکہ ڈاکسر آ ہم دریکہ ۔۔۔
بھاز یخ مسَکہ گُڑا کنا دُوک تفیرہ لُمہ جان دِیر باسِفیکہ اسیکہ ہراٹی ای تینا دُو کے تِخاٹہ کنے جارت ملاکہ۔
کنا سنگت آ تیٹی اسہ سنگت ئس طارق ہم اسَکہ ہرا اُوستہ محمد آن سال ئٹی اسہ وار لازمی بسَکہ ۔
اوڑتون محفل کرینہ دعوت کُنگُنہ ۔۔
لُمہ جان کنے زندان ئٹی نا باز یات بریسہ کیک باز بے جیرت مریوہ ۔
ہرا وخت ہموڑے اسُٹ شام ئنا ہُرے آ ہرا غا بسوٹہ نی مچا نن تُغ کتویسہ کنے کہ خناسہ گڑا غصہ کریسہ۔۔
ہراتم کہ لُمہ آرام کریکہ گُڑا ای اِرا گھنٹہ اونا نت آ شیف کاٹمے تخاٹہ توسُٹہ ۔۔۔۔
لُمہ کنا ہر اسہ گڑا ءِ سھنبال کریکہ تخاکہ ۔۔۔
بھلا عید (عید الحضیٰ) آ کنکے غُربہ ( سُو تے لار تِنِنگ آن پد اوفتا ہڈ آ کے جتا کیرہ اوڑان پد دُو نا سی ٹی جوڑ کیرہ تا) تخاکہ ۔۔
کنا لُمہ عید آن مالو کنکے تینٹ پُچ گچین کریکہ الککہ۔ ۔
ننا ہُراٹی وخت وختس کُنِنگ کہ ہچ متوکہ بیرہ بارونہ اِرَغ آ تے کُنگُنہ۔۔
ای نُمے ڈکھ تکلیف ئٹی خَننِگ خواپرہ۔۔
کنے نُما کُل ئنا یات بننِگ ءِ ای نُمے ہر ساعت یاد کیوہ۔
کنے یات ءِ کہ ہراتم 12 دوانزدہ جولائی ننا ہرا آ فوج نا چھاپہ بس تو کنا لُمہ بے گُد ءُ نت شپاد فریاد کریسہ افسر آ تے رندٹ نرِسا پارے کنا فرزند نا انت قصور ءِ انتئے کہ دننِگورے تا؟
کنا چُنکا ایڑ بتول گاڑی نا رندئٹ بھاز مُر اسکان نریسہ بسک۔۔
ای گڈیکو وار نُمے کُل ءِ تینا خن تئٹ خناٹ ہراڑے کنا لُمہ جان کنا مُسہ بے وس آ اِیڑک کنے ظالم آن بچیفنگ کن ہمسایہ تا دروازہ تے ٹکیفیسہ ناکام و کوشست ئس کریرہ۔۔
لُمہ جیجا کنے نُم کُل تون باز مہر و مابت ءِ ای چاوہ کہ نی داسہ ہم کنا انتظار ٹی کنا کُننگ نا بشخے تخیسہ ، داسہ ہم عید آ تیا کنکے پُچ و بلوچی و ٹوپ ئس جوڑ کریفیسہ ۔ ابا سہب شام ہر نماز ٹی کنکہ دعا کریسہ کرو، ہمو ماسی ماہ گنج ہرا کنے آن تینا ہرا کن پیسہ الککہ اِناکہ داسہ ہم بریسہ کرو۔
کنا چُناک کنا انتظارے کرور ،
نادر جان داسہ سکول ٹی خواننگ نا بناء کرو۔
ای ہچس اُستان دتنُٹ کنے کُل یات ءُ۔۔۔۔۔
لُمہ داڑے زندان ئٹی ڈُکھ آک سخت باز ءُ، لُمہ جان ای تپرہ کہ ای وا پدی بروٹ یا نہ۔
کنے نُمتون باز مہر و مابت ءِ ای ہر رشتہ نا حق ءِ پورو کننگ نا کوشست کریٹ ولے ہراتم کہ ای وطن تون مہر کننگ نا بناء کریٹ گڑا ایلو مہر آک دا مہر ئنا مونا کم مسُر۔
ای نُمے کُل آن زیات تینا خاک تون مہر کریٹ۔
اگہ ممکن مسکہ گڑا ای نُمے نُما تُغ تیٹی نشان تِسُٹہ کہ زندان ئٹی ہراتم کہ کنا اڑتوما نتے اِرا فوجی تفیرہ و ترندی ٹی تینا کُنڈا چِکارہ کنے چپی ٹنگارہ کنے تکلیف نا احساس متوکہ۔
کنا پام ئٹی کہ ای تینا خاک ئنا زبادے گند کشنگُٹ و ہرا کنا مچا جان ئٹی اسہ تاغت ئسے آنبار پلویڑ کننگ ءِ۔۔
اندن لگاکہ کہ ای چلتن و بولان نا گٹ و گر تیٹی پھیری خلنگٹ۔۔
کنا نت تے باسُنا پوغ تیٹی تِخنگ یا برف ئنا بھلا بلاک آ تیا کنے خاچفنگ کنا ننگے ہکل تننگ، شیشہ نا ٹکر تیا شپاد آ نت تو چریفنگ، کنا زِیل آ تے کشنگ، دُو تیٹی میخ خلنگ تیزاب آن کنے خلیفنگ ءُ کنے جتا جتاو اذیت تننگ اندن اس دن کہ زندہ ءُ بندغ ئس ہر سیکنڈ ٹی کہیک و زندہ مریک،،
دا ظلم ءِ سہوکا تو تینا جاگہ دادے خنوکا نا روح بال کریکہ ۔۔۔
ولے کنے ہچو ظلم و اذیت ئس پِرغنگ کتو کنا ہمت شُور ئنا درنگ آ تا وڑ کنا حوصلہ کنا ٹھپ آ تے ملم کریرہ ۔۔
ای پنِتوٹ، نہ کہ دشمن نا مونا کاٹُمے شیف کریٹ۔۔
ای ہر وخت تینا باوہ آن تینا پیرہ نادر جان نا دلیری نا کسہ آتے بنگوٹہ ارا کنے ابا ڈاڈائی نا مول ٹی ملاسوس ، کنے حق نا باروٹ سبخ تننگاسوس، ای زندان ٹی ہچ خاچتویسُٹ ولے تینا قوم کن تُغ خناٹہ ہرا تغ تیٹی نسل آ تا بروکا زیباغا وختے خناٹہ کنے اندن لگاکہ کہ کس کنا خازہ آ ٹھپ آ تیا ملم تخننگ ءِکنے آرام ملاکہ ۔۔
کنے تینا ڈکھ و دڑد آ تا پرواہ اف کنے دا پروا ہم اف کہ کنا چُنا نادر جان چوری مریک، کنا لُمہ تینا اولاد نا بلا ءِ ارفک۔
ای تینے اوفتے ٹی الانٹ زوت یا ہُرے کنا گوری مننگ نا احساس کنا قوم ءِ مرو ، ای تینا خاک تون مہر کریٹ کنے یخین ءِ کہ کنا مہر کامل مرو۔
زندان آن چُنکو روشنائی ئس خناٹہ کنے اومیت مسکہ کہ ننا گوری مننگ آک گوہنگپرور داسہ مہر مابت چوری مفرو۔
ای نُما کُل نا کاٹُم تے چلتن و بولان نا مش آمبار بُڑزا کروٹ ۔
ای سلمان زندہ سلوٹ
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
