خضدار آن خوانندہ گل سیو اسٹوڈنٹس فیوچر نا مسکوہی کماش فضل یعقوب بلوچ پاکستانی لشکر نا دو آن بے گواہ۔

حوال آتا رد ئٹ استو 1:30 نا وخت آ سی ٹی ڈی و ایف سی کھنڈ ئٹ ٹہیفوک اوفتا اراغان چھاپہ خلنگ نا وختا پن کروک ورنا ءِ دزگیر کننگ آن گڈ بے گواہ کرے۔

ہندی حوال کار تا رد ئٹ استو سی ٹی ڈی و ایف سی تون اوار سلہہ بند بندغ تا 7 ویگو گاڑی پن کروک ورنا نا تیوہ ارا ءِ گھیڑ ئٹ الکر، چھاپہ نا وخت آ ارا نا زالبول تیا بیدادی کننگ آن گڈ اودے بے گواہ کریر۔

یاتی مرے فضل یعقوب نا خوارزادہ شمس بلوچ ءِ مسہ دے مست سلہہ بند بندغ آک بے گواہ کریر، اندن پن کروک ورنا منہ دے مست تینٹ پک کریسس کہ خضدار نا ایس ایچ او ایف آئی آر نوشت نا جاہ کنے تڑی تننگ ءِ۔

تدینی نا برخلاف خاہوت و ایلو مخلوق نا پارہ غا بھلا کسر آ برانز برجاء ءِ۔

بلوچ اسٹوڈنٹس آرگنائزیشن آزات نا بنجاہی کماش درپشان بلوچ گل ئنا مسکوہی سیکرٹری جنرل رضا جہانگیر و بی این ایم نا بنجاہی راہشون امداد بجیر نا دہمیکو سال دے آ اوفتے دروت ندر کریسہ پارے کہ رضا جہانگیر و امداد بجیر سوگوْ سیاسی راہشون و راجی جہدکار ئسر اوفتا سوگوْی، سیاسی چاہنداری و قربانی تا سوب اینو بلوچ سیاسی ٹولیک سخت حالیت آتیان بیدس ہم تینا راجی و نظریاتی اساس تون اوار سیاسی عمل ءِ مُستی دننگو۔ امداد بجیر و رضا جہانگیر 2014 نا بھاز سخت و مشکل حالیت آتیٹی ہم سیاسی جہد ءِ برجاء تخار و الس تون مریسہ اوفتا راجی و فکری تربیت ءِ کریسہ کریر۔ ہرا حالیت آتیٹی اوفک سیاسی عمل ءِ گراؤنڈ ئٹ برجاء تخار ہمو وخت ئٹ سد آتا کچ ئٹ سیاسی باسک آک تینے ڈھکار و بھاز آ بندغ آک جلا وطنی نا زند ءِ گچین کریر ولے رضا و امداد ڈغار ءِ ہلینگ نا جاگہ غا گراؤنڈ ئٹ مریسہ سیاسی جہد ءِ سوگوْ کننگ کن تینا تاغت آتے خڑچ کریر۔ رضا جہانگیر و امداد بجیر کون آ سیاسی راہشونک بلوچ سیاست نا آئیڈیل کڑد آک ءُ ہرافک علمی و فکری بنداو آتیا بلوچستان ئٹ سیاسی شعور و چاہنداری تالان کریر و بلوچ ورنا تے ریاستی کوزہ آن چاہندار کریر ہرانا بدل ئٹ ریاست اوفتے ٹک کریسہ شہید کرے۔

کماش درپشان بلوچ پارے کہ ہر راجی جنز ءِ الس نا تہٹی تینا روتہ غاتے سوگوْ کننگ کن اندن انگا سیاسی و فکری راہشون تا خواست مریک ہرا بیدس اسہ خُلیس و بھیم ئسے آن راجی مسخت ءِ ہلیسہ مخلوق اسکان سر مریر و تینا کڑد و علمی و فکری چاہنداری ئٹ مخلوق ءِ اوفتا غلامی نا احساس ایتر۔ بلوچ سیاست ئٹ دن انگا بھلا کڑد آتا لڑ بھاز مرغن ءِ ہرافک تیوہ بلوچستان ئٹ سیاسی کاریم کریسہ لس مخلوق ءِ راجی آجوئی نا جہد ئنا اہمیت آن چاہندار کریر و ریاست نا کوزہ و اونا نسخان تا بابت اوفتا تربیت ءِ کریر۔ ہرانا سوب آن اینو بلوچ ورناک راجی جہد آن چاہندار و اوٹی تینا اواری ءِ یخینی جوڑ کننگ ءُ۔ بلوچستان نا بندغ آتیت و خاص وڑ ئٹ ورنا تیٹ دا راجی و فکری شعور رضا جہانگیر و امداد بجیر کون آ سیاسی راہشون تا سوب آن ءِ ہرافک ذاتی زند ءِ پد پشت شاغیسہ راجی خواست آتے نظر ئٹ تخیسہ فکری و شعوری بنداو آ ورنا تا تربیت نا فرض ءِ سر تسر۔ یخین ئٹ سیاسی نظریہ تخنگ و مخلوق نا تہٹی اوفتا ہیت ءِ کننگ نا حق ہر مہذب چاگڑد ئٹ کل ءِ دوئی ءِ ولے بلوچستان کون آ مقبوضہ علاقہ ئٹ ہراڑے کوزہ گیر ریاست بیدادی و زوراکی ئٹ تینا کوزہ ءِ برجاء تخانے ہموڑے راجی فکر تخوک ہر ورنا ریاست کن بھیم اس مریک۔ رضا جہانگیر ءِ ہمو وخت ٹک کننگا ہراتم او گل ئنا کاریم تا سر تننگ کن کیچ ئنا دورہ غا ئس ہموتم ریاست موقع غان سواد ارفیسہ شہید امداد بجیر نا اُرا غا جلہو کریسہ شہید رضا جہانگیر و اونا نظریاتی سنگت امداد بجیر ءِ شہید کرے۔ بڑز شخصیت مننگ نا حیثیت ئٹ اوفتا شہادت گل و جنز اکن نسخانی مسنے ولے تاریخ شاہد ءِ کہ شہادت و قربانی تیان ہچو جنز اس نزور متنے بلکن شہادت آتیان جنز آک نظریاتی دروشم ئٹ سوگوْ مریرہ۔

کماش درپشان بلوچ، بلوچ ورنا تے پامدار کریسہ پارے کہ اینو نن تینا ہمو سنگت آتا وامدار اُن ہرافک عظیم انگا راجی مسخت کن تینا زند آتے ندر کرینو۔ بلوچ ورنا نا حیثیت ئٹ اینو ننے ٹک خلوئی تمو کہ نن راجی جنز ئٹ انت کڑد سر تننگ کینہ۔ انتئے کہ بلوچ راجی جنز اسہ بندغ یا خاص ءُ ٹولی ئسے نا مفاد آتیکن آخہ بلکن تیوہ بلوچ راج ئنا بروک آ وخت اوڑتون گنڈوک ءِ ہراڑکن نن کل ءِ تینا راجی ذمہ واری تا احساس کریسہ تینا ذمہ نا کاریم ءِ سر ایتوئی مریک۔

بلوچستان نا دریابی شار و سی پیک بنجاہ گوادر ئٹ درو چینی انجینئر آتیا بلوچ سلہہ بند گل بی ایل اے نا جند ندری جلہو آن گڈ بھلو کچ ئسے آ تیوہ شار ئٹ سرچ آپریشن برجاء ءِ۔

چینی انجینئرز آتا قافلہ ءِ بلوچ لبریشن آرمی نا مجید بریگیڈ نا اِرا جلہو کار آک ٹک کریسر، ترند حالیت نا دا جلہو اِرا گھنٹہ اسکان برجاء مس۔

ہندی بندغ تا پاننگ ءِ کہ جلہو آن گڈ گوادر شار ءِ سکیورٹی فورسز آک تیوہ سیل کرینو و تہہ و پیشن نا کسر تیا سخت چیکنگ و خیالداری کننگک۔

حوالکار تا پاننگ ءِ کہ چینی انجینئرز آتیا مروک جلہو نا ہند و ایب کیب نا غٹ خلق فقیر کالونی، نیا آباد، جی ڈی کالونی ٹی پاکستانی لشکر چادر و چار دیوالی ءِ لتاڑیسہ اُرا اُرا ءِ پٹنگ ءِ۔

ہندی بندغ تا پاننگ ءِ کہ فورسز آک اُرا، خلق و کسر تیٹ سرچ آپریشن نا وخت آ زالبول و چنا تے بیدادی، زوراکی و بے شرفی نا گواچی کننگ ءُ۔

بندغ تا پاننگ ءِ کہ دا وخت اسکان فورسز آک کیہی بندغ تے دزگیر کریسہ بیگواہ کرینو ہرافتا دائسکان چاہنداری مننگ کتنے۔

بلوچستان نا ضلع خضدار و کوئٹہ آن پاکستانی فورسز کارندہ آک ارا ورنا ءِ دزگیر کریسہ نا درست ہند آ دریر ۔

بیگواہ مرروک آتا چاہنداری کامران ولد سومرو خان و کمبر بلوچ ولد محمد کریم نا پن آن مسونے ۔

ذرائع تا پاننگ ئس کہ کامران نا تعلق خضدار نا علاقہ مولہ آن ءِ ہرادے استو یک بجہ آ اوفنا اُرا باذگیر خضدار آن سلہہ بند بندغ آک زوراکی ئٹ بیگواہ کریر ۔

خاہوت نا ردئٹ اونا بابت دائسکان ننے ہچس پاننگ متنے کہ او ہرانگ ءِ۔ خاہوت نا پاننگ ءِ کہ غٹ تفوک آفسر و ادارہ آتیان خواست کینہ کہ او کامران نا یلہ کننگ ءِ یخینی کیر ۔

بیگواہ کروک کمبر بلوچ ہرا کہ کیچ نا علاقہ کولواہ نا ہندی ئسے و ایف ایس سی نا خوانندہ ئسے ہرادے درو شام یک بجہ آ شارجہ ہوٹل کوئٹہ آن فورسز کارندہ آن زوراکی ئٹ بیگواہ کریر ۔

بلوچستان نا ضلع خضدار نا ہند کھنڈ آن خوانندہ ئس پاکستانی لشکر نا دو آن زوراکی ئٹ بے گواہ کننگانے۔

بے گواہ مروک ورنا نا چاہنداری شمس بلوچ ولد ابراہیم نا پن ئٹ مسونے پن کروک ورنا جامعہ سرگودھا ٹی شعبہ زراعت نا خوانندہ ئسے۔

ہندی حوال کار تا رد ئٹ استو 1:30 بجہ نا وخت آ شمس ءِ کھنڈ آن اوفتا ہراغان پاکستانی لشکر زوراکی ئٹ بے گواہ کرے ہرانا دائسکان ہچو حوال ئس اف و شمس بلوچ منہ دے مست یونیورسٹی نا چھٹی تے تیر کننگ کہ تینا ہراغا بسوسس۔

یاتی مرے ارا دے مست کھنڈ آن سعید پنی ءُ لیویز کارندہ ئسے ریاستی کارندہ غاک دزگیر کریسہ بے گواہ کریر و پدان اودے یلہ کننگا، ہندن خضدار گریشہ نا ہندی داد شاہ ولد صبر خان ءِ ریاستی ادارہ غاک کراچی آن اونا ہراغان دزگیر کننگ آن گڈ بے گواہ کریر۔

بلوچستان نا دریابی شار گوادر ئٹ چینی کمپنی نا گاڑی تا قافلہ ءِ سلہہ بند جلہو ئٹ ٹک کننگا، اندن جلہو نا ذمہ واری ءِ بی ایل اے ارفے۔

گوادر نا علاقہ فقیر کالونی ٹی اینو سہب ئنا نہہ و نیم نا وخت آ سلہہ بند بندغ آک گوادر نا فقیر کالونی پول آن خڑک پاک چائنہ پنی ءُ کمپنی ئسے نا قافلہ غا جلہو کریر۔

علاقائی احوالکار تا ردئٹ اِرا گھنٹہ تدینگ آن گڈ ہم ترند سم کاری و تراک آتا توار خف تیٹ بریسہ ئس اندن علاقہ ئٹ کسر تے بند کریسہ شاری تے اُرا تے اسکان کننگانے۔ بھاز ہند آتیا انٹرنیٹ نا بند مننگ نا حوال آک ہم رسینگانو۔

پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ مجید بریگیڈ نا ارا جانباز جند ندر نوید بلوچ ولد خدا بخش عرف اسلم بلوچ ہند دشت نگور، تربت و مقبول بلوچ ولد پھلان عرف قائم بلوچ ہند آواران گیشکور اینو سہب نا مالو گوادر ٹی چینی انجینیئر آتا اسہ اہم قافلہ ئسے گھیرہ کریسہ جلہو کریر۔ دا آپریشن زرپہازگ ارا گھنٹہ برجاء مس، ہراٹی دائسکان نا معلومداری تا ردئٹ کم آن کم چار چینی شاری و نہہ فوجی کارندہ مرگ ئنا گواچی و کیہیک ٹپی کننگانو۔

ترجمان پارے کہ واہم مرگ ئنا گواچی مروک آتا کچ ئٹی ودکی نا امیت ارے۔ آپریشن نا پورو مننگ آن گڈ مجید بریگیڈ نا جند ندر آک سم تا ایسر مننگ آن گڈ تینا گڈیکو سم تیان تینٹ شہادت ءِ گچین کریر۔

او پارے کہ بی ایل اے نا پارہ غان شابیتی بیان زوت میڈیا غا شینک کننگو۔

بلوچستان نا جتا ضلع تیٹ مونا بروک کسر شکست آتیٹ چنکو مسڑ اسیتون اوار پنچ بندغ بیران اندن 7 بندغ ٹپی مسنو۔

شابیتی حوال تا ردئٹ بلوچستان نا ضلع جعفر آباد نا علاقہ ڈیرہ اللہ یار آن خڑک کسر آن ایپار مننگ وخت آ ترند رفتار آ ٹرک چنا ءِ شیڑتلیفے۔ تدینی ٹی اوار مروک آ ٹرک ڈرائیور ءِ پولیس دزگیر کریسہ جون ءِ اسپتال آ درینے۔

ایلو پارہ غان بلوچستان نا علاقہ لورالائی کوئٹہ کسر آ ٹرک ئنا ڈک لگنگ آن موٹر سائیکل آ سوار بندغ کسک۔ کمکار کوالخواک جون ءِ دوئی مریسہ اسپتال آ دریر۔

لورالائی بست و بند نا ردئٹ شکست ئٹ کہوک آ بندغ نا چاہنداری مننگ کتنے اندن جون اسپتال ئٹی ءِ۔

اندا وخت ئٹ حب نا علاقہ ساکران کسر آ ترند رفتار آ ڈمپر نا ڈک لگنگ آن اِرا موٹر سائیکل سوار بھاز ٹپی مسر۔ ٹپی آتے حب اسپتال آ دننگا و بنائی جانجوڑی کمک آن گڈ اوفتے کراچی آ رادہ کننگانے۔

پنجپائی مشوانی ٹاؤن آن خڑک لندن روڈ آ ٹو ڈی کار نا موٹر سائیکل اسیتون ڈک لگنگ آن اسہ بندغ اس کسک و 3 چنا ٹپی مسر۔ کہوک آ بندغ نا چاہنداری حاجی در محمد سمالانی و ٹپی آ چناک اونا نواسہ پاننگرہ۔

قلات آن رسینگوک حوال تا ردئٹ مغلزئی نا ہند آ اے ٹی سی گاڑی نا بریک فیل مننگ نا سوب آن ٹرالر تون ڈک لگنگ نا سوب کنڈیکٹر اے ٹی سی عطاء اللہ ہند کوئٹہ جاگہ غا کسک اندن کوئٹہ نا ہندی ڈرائیور وزیر خان نا مار روزی خان قوم اچکزئی ٹپی مس۔

جون و ٹپی آ بندغ ءِ قلات پولیس ڈی ایچ آ درے ہراڑے محکمانہ کارروائی آن گڈ ٹپی و جون ہڑتوم آتے کوئٹہ غا رادہ کننگا۔

بلوچستان نا ضلع خضدار ئٹ سلہہ بند بندغ آک پولیس کارندہ آ جلہو، پولیس نا  سم کاری آن جلہو کروک آک نرنگ ئٹ سرسہب مسر ۔

ذرائع تا ردئٹ تدوکا نن خضدار نا علاقہ محمد شئی کھٹان پولیس چیک پوسٹ نا ہند آ نادرست بندغ آک پولیس کارندہ جلیل احمد آ جلہو کریر، پولیس کارندہ آتا  سم کاری آن جلہو کروک آک نرنگ ئٹ سرسہب مسر ، واہم ہچو جانی نسخان متنے ۔

پولیس نا پارہ غان جلہو کروک آتا تیوہ شار ئٹ پٹ وپول مننگ ءِ ۔

علاقئیک تدینی نا برخلاف برانز کریسہ کوالخواہ تیان خواست کریسہ پاریر کہ او پولیس کارندہ آتا رکھ ئتون اوار اوار نفری کچ آ ہم پام ایتر ۔

کوئٹہ نا علاقہ قمبرانی روڈ آ مسن تا بھلا اسکول نا ہند آچغلی بمب ئس دوئی کننگا ۔

بمب ڈسپوزل اسکواڈ چغلی بمب ءِ نا کارہ کریر ۔ ایس ایچ او سریاب نا ردئٹ گورنمنٹ گرلز ہائی اسکول کلی قمبرانی نا پیشن آن چغلی بمب دوئی کننگا ۔

حوال رسینگنگ تون پولیس کارندہ آک و بمب ڈسپوزل اسکواڈ موقع آ رسینگیسہ دوئی کروک چغلی بمب ءِ ناکارہ کریر ، دا بابت گیشتر سر و سوج مننگ ءِ ۔

وزیراعظم شہباز شریف تون اوڑدئی آن گڈ قائد حزب اختلاف راجا ریاض میڈیا ٹی ہیت کریسہ پارے کہ سینیٹر انوارالحق کاکڑ نگراں سروزیر پِن کننگا۔

ہفتہ نا دے سروزیر ماڑی ٹی مروک اوڑدئی ٹی نگراں سروزیر کن تننگوک پن تیا پام تننگا ہراڑان گڈ سینیٹر انوارالحق کاکڑ نا پن آ امنائی مس۔ سروزیر و قائد حزب اختلاف اوار مریسہ دستخط کریر۔ سروزیر نا بابت پنت صدر مملکت آ رادہ کننگانے ۔

راجا ریاض میڈیا ٹی ہیت کریسہ پارے کہ سروزیر اوفتیکن تروک پن تیا امنائی کننگانے۔ سینیٹر انوارالحق کاکڑ نا تعلق بلوچستان عوامی پاٹی آن ءِ۔

داکان مالو پنچ شمبے آ سروزیر شہباز شریف و اپوزیشن لیڈر راجا ریاض نا نیام ئٹ اوڑدئی مسوسس ہراڑان گڈ راجا ریاض نا پاننگ ئس کہ ایسکان کہ اسہ پن آس پَک متنے پاش کننگ مروف۔

اوڑدئی آن گڈ میڈیا ٹی ہیت کریسہ راجا ریاض نا پاننگ ئس کہسروزیر تون اوار مسہ پن او تسونے اندن شہباز شریف ہم مسہ پن ہی تسونے ہرافتیان اسٹ ایلو تون سلہ مس۔

راجا ریاض نا پاننگ ئس کہ دا معاملہ آ اسہ پین دیوان ئس مرو ہراٹی اسٹ ایلو نا پارہ غان تروک پن تا پام تننگو۔

قائد حزب اختلاف نا پاننگ ئس کہ اسہ بندغ ئس (سروزیر) جوڑ مریک۔ نن فیصلہ کرینن ہراتم اسکان اسہ پن ئس فائنل مفک نن پاش کروفن۔ شش پن مونا بسر۔ مننگ کیک کہ پھلمے اسکان منہ پین پن پک مریر۔

چار شمبے آ قومی اسمبلی نا اوار مروک اجلاس آن ہیت کریسہ وزیراعظم شہباز شریف نا پاننگ ئس کہ راجا ریاض آن پنچ شمبے آ اوڑدئی کروٹ۔ قانود مسہ دے نا وخت ایتک۔ اگہ نن فیصلہ کننگ کتون گڑا معاملہ ءِ ہاؤس آ رادہ کرون۔

ہیت نا وخت سروزیر نگراں سروزیر نا پڑو نا بابت آن منشا تسس کہ اگہ اوڑدئی ٹی راجا ریاض آن امنائی کننگ متو گڑا دُن آ حالیت ٹی معاملہ اسہ وار پین ایوان نا پارہ غا برو۔

حکومت و اپوزیشن نا نیام ئٹ مثیالی تعلق آتے مونا تخیسہ دا امیت کننگاسس کہ راجی اسمبلی ایسر کننگ آن مالو نگراں سروزیر نا پڑو کننگو، واہم دن مننگ کتو۔

سروزیر شہباز شریف نا ہیت ئس کہ نن اسٹ ایلو تون سلہ آن اندنو بندغ نا پن ترون ہرا کل ئکن قابل قبول مریر۔