عبدالرؤف نا خوࣿن؛ دینی تُرندی ئٹ ودکی نا اشارہ

ٹی بی پی تیدری

نوشت: فرید بلوچ

بلوچستان نا علاقہ ضلع کیچ ئٹی اسہ اسکول استاد عبدالرؤف نا کسفنگ بھلو کچ اسیٹ فریشانی ودی کرینے۔ گمانی وڑ ئٹ مذہبی دوبہ آتا رد ئٹ کسفنگوک، عبدالرؤف نا مرگ دا علاقہ، بلوچستان ئٹی ودوکا مذہبی چک و تاڑ ئنا پیدواری ئسے ہرا دیہاڑی وڑ ئٹ تینا سیکولر اقدار کن چاننگک۔

عبد الرؤف اسہ “مذہبی جرگہ” ئسے کن ہِننگ ئس، اودے جرگہ نا کسر آ خون کننگا ہرا وخت او جرگہ ٹی تینے آ لگوکا دوبہ آتا ایسری کن ہِننگ ئس۔ دا دوبہ آتا شابیت سوب آک داسکان پاش افس، ولے دا مہلک بھرم ناقابل تردید ءِ۔

ردعمل:

عبد الرؤف نا گمانی خون ئنا برخلاف جتا تپہ آتا کنڈ آن دمدستی ردعمل مونا بس۔ ہراڑے بی این ایم نا بندغی حق آتا شعبہ، پانک بد حالیتی آ درشانی کرے، ہرا ٹی پاکستانی لشکر نا کنڈ آن ڈیتھ اسکواڈ اڈ تننگ و بلوچستان ئٹی مذہبی انتہا پسند آتا ودنگ آ فریشانی نا درشانی کننگا۔

بلوچ باسک، نیاز بلوچ تاریخی سیکولر اقدار و بلوچ چاگڑد آ تبصرہ کرسا پارے کہ بلوچ قوم پرستی نا مسخت آن پام ءِ مُر کننگ کن پاکستان نا کنڈ آن مذہبی انتہا پسندی ءِ کاریم ئٹ ہتنگ فریشانی نا ہیت ئسے۔

بندغی حق آتا باسک ماہ رنگ بلوچ بھلو کچ اسیٹ نسخان آتیا روشنائی شاغسا پارے “مذہبی مسخت آتیکن اسہ بلوچ ورنا سے نا ریاستی مخ تفی ٹی خون ننا سیکولر چاگڑد کن اسہ پوسکنو چیلنج ئسے۔ وا ہم ریاست نا کنڈ آن دا ’مذہبی ہیت‘ پوسکنو ہیت اس اف۔ ریاست کیہی سال آن بلوچ آتا سیاسی شعور ءِ توننگ کن ڈیتھ اسکواڈ آتے کاریم ئٹ ایسنے۔

بلوچ نیشنل موومنٹ (بی این ایم) نا کماش ڈاکٹر نسیم بلوچ ٹویٹر آ افسوز نا درشانی کریسہ پارے کہ ”کیچ ئٹ عبدالرؤف بلوچ نا خون اسہ اُست ہسون و خار ئنا لائخ کاریم ئسے۔ سال آتیان، پاکستان نا پارہ غان مذہب ءِ کاریم ئٹ ہترنگ نا ذریعت ئٹ بلوچ آتے مظلوم تخنگ آ خبڑدار کریسہ کرینو، ولے بلوچ تینا سیکولر اقدار ءِ برجاء تخانے۔“

صحافی کیّا بلوچ اسہ دیہاڑی سیاق و سباق اس تس: اونا پاننگ ئس کہ ”مکران ٹی مدرسہ آتے راج دوست آ جوزہ آتا مونتس کن درستی راستی کرفنگاسس۔ ہرانا سوب آن دن انگا ادارہ غاک پنجگور، کیچ و گوادر ٹی شابیت کچ اسیٹ تالان مسر۔“

اندا علاقہ غان تعلقداری تخوک اسہ پین صحافی علی جان مقصود نا پاننگ ئس کہ ”رپورٹس آک پارہ کہ عبدالرؤف ءِ اونا کہنگ آن مالو تینا مذہبی عقیدہ آتا رکھ ءِ کننگ کن اسہ مذہبی جرگہ اسیٹی رادہ کننگاسس۔ دن انگا تدینیک بلوچستان ٹی برجاء نسل کشی ءِ پاش کیرہ۔“

بلوچ یکجہتی کمیٹی مفتی شاہ میر کون آ مذہبی شخصیت آتیا بھاز نغدکاری کرے۔ اوفتیا دوبہ خلک کہ ذاتی سواد کن او رسالت نا بے شرفی نا دعویٰ تا ٹیک ءِ ہلنگ ءُ، اندا وڑ تعلیمی ادارہ آتیا اوفتا بے سوب اثر و رسوخ ارے۔ او مذہبی بنداو آتیا بلوچ آباتی ءِ گیشتر ونڈ کننگ نا گمان آتیا زور تریسہ دن انگا ریاستی مُخ تف مذہبی چم آتا برخلاف خبڑدار کرے۔

تربت سول سوسائٹی تربت ئٹ مذہبی بے شرفی نا دوبہ آتا رد کاریم ئٹ ہترنگ آ افسوز نا درشانی کرے، ہرانا سوب عبدالرؤف نا بھیم بش کروک مرگ مس۔ او مکران خطہ نا ڈیہاڑی مذہبی امنائی ءِ پاش کریسہ ضلعی بست و بند نا بے عملی نا نشاندہی ءِ کرے۔

دیہاڑی رِد:

بلوچستان مدام تینا سیکولر تشخص ءِ برجاء تخانے۔ دیہاڑی وڑ ئٹ اسہ زیات زنکی علاقہ، دا ڈیہہ ئنا اوار زندہ ئی نا اسہ نشان ئسے، ہراڑے بھاز ڈول نا قبائل، دود و ربیدہ و عقیدہ غاک جتا دور باری ٹی بیدس اڑاند آن اوار رینگسہ بنگو۔ بلوچ آک ساندہ تینا سیکولر ثقافت آ ناز کرینو، داڑ اسکان کہ جتا دینی رنگ تیٹ ڈُب ہلوک پد ندارہ ئٹ ہم۔

واہم، دا ہم رنگ ٹیپسٹری زوت دہائی تیٹ چِک و تاڑ نا گمان تے نشان تننگ ءِ بناء کرینو اسہ بھلو مثال ئس 2014 ئٹ گوادر ئٹ دی اوسس سکول نا سروک زاہد آسکانی نا خون ءِ۔ ریاستی سروکی ٹی شبکر مذہبی انتہا پسند آتا دو آن اونا مرگ دیہہ نا تعیلم نا چاہندار و راج دوست آتے بھیم تون مون تننگ نا درشانی ءِ کرے۔

مذہبی انتہا پسند آتا تعلقداری:

اینو، ریاستی طاغت آتا مذہبی پولرائزڈ چاہنداری ءِ مونی دننگ نا بابت خلیس زیات مننگ ءِ، ہرا عبدالروف نا خون نا وڑ انگا تدینی تیان پاش مننگ ءِ۔ دا وڑ ئنا تدینیک ترندی ئٹ بھیم بش کروک کچ اسکان تینا زیم تے شاغیرہ۔ دا بدلی 2001 ئٹ خاص وڑ ئٹ سُر پُر ئٹ بس ہراتم اوغانستان آ امریکہ نا جلہو آن پد، ہمسایہ ملک آن اسلام پسند ٹولیک بلوچستان ئٹ باہوٹی مسر و مدان مدان آ بلوچستان نا چاگڑدی و مذہبی چاگڑد آ زیمی مسر۔

مستی، کیہی چمشانک دار آک پارہ کہ بلوچستان ئٹ آجوئی نا منوک راج دوستی آ جوزہ ءِ تورنگ کن ریاست نا انسداد بغاوت حکمت عملی نا نتیجہ غاک ہم مونا بسونو۔ اگہ کہ دانا مسخت بلوچ راج دوست جوزہ نا مون تس ءِ کننگ ئس، ولے اس نے پہ رضا یا ناسرپدی وڑ ئٹ مذہبی بے سگی و کُڑدئی چک و تاڑی ءِ شابیتی تسونے۔ اینو مذہبی و نسلی اقلیت دنکہ ہزارہ، بخال و ذگریک دا حکمت عملی نا گندہ غا زیم تیتون مون تننگ ءُ۔

دا ڈیہہ ئٹ بدل مروک ندارہ غاک ہم انتہا پسند کڑدہ آتیکن جوان ءُ ماحول اس ودی کرینو۔ ٹی ٹی پی کون آ ٹولیک تینا نظریہ نا بِج ءِ کڈ کننگ و تینا اثر ءِ ودفنگ کن ڈغار پٹرہ، ہرا ڈیہہ ئنا دودی ڈول سیکولر اخلاق ءِ چیلنج کیرہ۔

مذہبی بنیاد پرستی نا رجحان تیٹ انفرادی دروشمک ہم ہر وخت خننگرہ۔ اسہ پِن اس ہرا ہر وخت بش مریک او شفیق مینگل نا ءِ، ہرا ریاستی سروکی ٹی “ڈیتھ اسکواڈ” نا و ‘مسلح دفاع تنظیم’ (MDT) نا راہشون ءِ۔ شفیق مینگل 2008 ئٹ ایم ڈی ٹی ءِ جوڑ کرے و گمان کننگک کہ اونا ایلو مذہبی انتہا پسند ٹولی تیتون خڑک تعلقداری ارے۔

گمانی وڑئٹ شفیق مینگل نا تعلقداریک کراچی ٹی دیوبندی مدرسہ و لشکر طیبہ کون آ مذہبی شدت پسند کڑدہ آتیتون ءُ۔ اسہ ملامت ‘ڈیتھ اسکواڈ’ ئسے نا راہشون نا دروشم ئٹ، او راج دوست و قبائلی مخالف آتا برخلاف ساندہ ظالم مسنے۔ واہم، اوڑتون مُخ تفی کروک ڈھانچہ دنکہ آئی ایس آئی، بیرہ پن ئنا دولت اسلامیہ و لشکر جھنگوی العالمی اونا کماشی و آئی ایس آئی نا مُخ تفی ٹی وڈھ کیمپ ئٹ تربیت ہلیسہ کرینو ہرا بھلو بھیم ئسے۔

گیشتر غنجل آ بندغ آک مفتی شاہ میر عزیز کون آ بندغ آک ءُ، ہرافتا بابت گمان کننگک کہ او عبدالرؤف نا خون ئٹ براہ راست اوار ءُ۔ شاہ میر عزیز دینی مدرسہ تا کمک ئٹ مذہبی انتہا پسند ٹولی تا سروکی ءِ کیک۔ دن انگا ادارہ غاک خاص مذہبی عقیدہ تا ہیت ءِ کیرہ و فوج ئنا مسخت آتے مونی دیرہ، بلوچستان آ تینا وس ءِ برجاء تخنگ کن ریاست نا پارہ غان دو مونہ عمل نا درشانی ءِ کیرہ۔

اینو بلوچستان ویل آتا گواچی ءِ، ریاستی اثر و رسوخ، ڈیتھ اسکواڈ و مذہبی انتہا پسندی نا اسٹ ایلو تون ہمکوپہ مننگ آن بلوچستان نا دیہاڑی سیکولر اقدار ءِ خُلیس ارے، ہراڑان بلوچ آتا متکنا اقدار نا بروک آ وخت بے باوری ءِ۔

کراچی آن خضدار گریشہ نا ورناس پاکستانی لشکر نا دو آن زوراکی ئٹ بے گواہ، بے گواہ مروکا ورنا نا چاہنداری داد شاہ شاشانی ولد صبر خان نا پن ئٹ مسونے، ہرادے استو 2 بجہ نا وخت آ پاکستانی لشکر کراچی ہاکس بے ٹی ٹہیفوک اوفتا ہرا غان بے گواہ کرے۔

ایلو پارہ غان داد شاشانی نا ہیڑ فوزیہ شاشانی کراچی ٹی پریس کانفرنس کریسہ پارے کہ کنا ایلم ءِ استو دو بجہ نا وخت آ فورسز نا بھلو کچ ئس ہرا غا چھاپہ خلیسہ زوراکی ئٹ بے گواہ کرے ہندن بے گوائی آن گڈ نن خڑک تھانہ غا ایف آئی آر کن انان تھانہ والاک ایف آئی آر کتور و پاریر نن تینا ادارہ تا بر خلاف ایف آئی آر کپنہ۔

او مستی پارے کہ کنا ایلم ءِ پیر انگا باوہ نا ساڑی گری ٹی دزگیر کریر و دزگیر کننگ آن گڈ اونا موبائل، چارجز، سوٹ کیس ٹی تخوک پچ آتے اوار دریر و فورسز کارندہ غاک کنا باوہ ءِ پاریر نن سی ٹی ڈی والا کن و نا مار ءِ سونج رونج کن دینہ۔

او مستی پارے کہ داد شاشانی اسہ خوانندہ سے و او انٹرمیڈیٹ آن گڈ زرگزرانی حالیت آتا سوب آن تینا خواننگ نا لڑ ءِ برجاء تخنگ کتو و او تینکن دکان ئس ملاسس ہندن او بلوچی بولی و ادب نا بابت نوشتہ کریکہ و اونا زوت ئٹ نوشتوک ءُ تصانیف ئس شینک مننگ ئس۔

گڈ سر ئٹ او پارے کہ نن ملکی ادارہ تیان خواست کینہ ننے انصاف فراوان کیر و ننے پاننگے کہ نن انصاف فراوانی کن ہرانگ کان؟ اسہ پارہ غان نیم نن ئٹ غیر کانودی چھاپہ خلنگ ایلو پارہ غان ایف آئی آر درج کپننگ گڑا نن ہرا وڑ انصاف نا امیت تخن؟

یاتی مرے ریاستی ادارہ تا پارہ غان بلوچ ورنا و زالبول تے بے گواہ کننگ ہڑدے نا ہیت ئس جوڑ مسنے، داکان مست تدوکا دے شال، تربت، خضدار و بلوچستان نا ایلو ضلع تیان کیہی ورناک بے گواہ کننگانو۔

راج دوستی انت ئسے؟

نوشت: شمس بلوچ

دی بلوچستان پوسٹ

راج ئنا گمان

اگہ نن نودہمیکو صدی آن مالو نا تاریخ آ نظر شاغن گڑا نن خنینہ کہ مالو بندغ آک دیہات و خلق آتیٹ جتا جتا ونڈ آ بشخ ئسر اوفتے اسٹ ایلو تون تولنگ و اواری ئٹ رہینگنگ نا شعور الو دا شعور اوفتے مدان مدان آ رسینگیسہ کرے اگہ نن ہرن گڑا عہد وسطیٰ ٹی ہم فرانسیسی راج آک ئسر ولے اوفتیٹی راجی شعور الو اینو نن ہرا معنہ تیٹ راج ئنا لوز ءِ کاریم ئٹ ہتینہ دا مالو الو انتئے کہ لوز آتا معنہ آک چاگڑدی دیمروی و بدلی تون اوار اوار بدل مریسہ کیرہ عہد وسطیٰ نا وخت چاگڑد امیر و غریب ئٹ بشخ کروک ئس ولے ہراتم اوفتیٹی راجی شعور بسک گڑا او الس یا بندغ آک ئسے راج ئس جوڑ مسر۔

کوہن دا بابت نوشت کیک کہ یونانی و یہودی تیٹ اسہ ٹولی ئسے نا مننگ نا احساس و شعور ئس، اندن یونانیک تینے آن بیدس ایلو راج آتے باربیرین یا غیر مہذب پاریرہ، یہودیک تینے خدا نا دوست انگا و ایلو بندغ آتے تینے آن جتا سرپد مسرہ انتئے کہ اوفتا تعلق اسہ زنک ئسے آن ئسک اوفک تدوکا وخت ئٹ ہم اوار ئسر و مستی کہ تینا اوفتے اسہ راجی مسیحا ئسے نا ودار ئس ہرانا بننگ نا امیت ئٹ اوفک ہر فریشانی و سختی تے سگنگ کریرہ اندا سوب آن اوفتیٹ اسٹ مننگ نا سیوتی نا قدر زیات ئس ۔

یورپ نا دانشور فریڈریش لسٹ راج ئنا صفت ءِ نوشت کریسہ پائک کہ اسہ راج اسیکن المی ءِ کہ اوڑتون اسہ بھلو کچ ئسیٹ ڈیہہ/زمین مرے اوڑتون قدرتی ءُ گڑا ہم مرے اوڑتون مون پہ مون اگہ اسہ راج ئسیتون کم علاقہ مس اونا بولی ٹی ہم کم لائخی مس اونا ادبی وچاگڑدی ادراک آک سوگو مسر گڑا دا سوب ئٹ دا چنکا راج آک اسل سرسہبی ءِ دوئی کننگ کپسہ اندا سوب آن اسورٹ مل پاہک کہ بھاز آ راج آک ہرا ایلو راج آتیتون اوڑدہ مسر اوفتیکن سواد مس ہرافتیٹی ویلز، اسکاٹ لینڈ و آئرلینڈ نا انگلستان ٹی اوار مننگ اوفتیکن گچین مس ۔

راج ئنا تعارف نا بابت اسٹالن دن نوشت کیک کہ دانا تعلق سرمایہ دارانہ بست و بند نا ودکی آ مسونے۔ دا اسہ سوگو ءُ کمیونٹی ئس مریک کہ ہراٹی بھاز آ ٹولیک اوار مریسہ اسہ راج ئنا دروشم ئس جوڑ کیرہ۔ سٹالن مستی دا پاہک کہ راج نا اسہ بولی ئس مریک و اسہ خاص ءُ علاقہ ئس دا اسٹ ایلو تون زرگزرانی حوالہ ئٹ گنڈوک مریرہ ہرا راجی کڑدار یا جوانی تے جوڑیسہ کیک ولے دا تعرف نمن ہم ارے انتئے کہ بھاز آ راج آتا اسٹ آن زیات بولی ہم اریر ہرافتیٹ او ہیت و گپ کیرہ۔

ہابس ہوم نوشت کیک کہ راج تاریخ نا رد ئٹ ریاست تون سیالداری تخک او گدرینگوکا وخت ئتون گنڈوک مریک و ساڑی زمانہ تون تینے گنڈیسہ کیک اوڑتون بھلو تپہ ئسینا جوڑ کروک دود و ربیدگ ئس مریک و اوفتیٹ اواری و اتفاق کن اسہ بولی ئس مریک ۔

بینے ڈک اینڈرسن راج ئنا دروشم ٹی چھاپہ خانہ نا ایجاد ءِ اہمیت ایتک۔ او دا پائک کہ مالو راج ئنا دروشم خیالی اس ئسک انتئے کہ وڑ وڑ ئنا ٹولیک و ایلمیک ہرا پدا راج جوڑ مسر اوفک اسٹ ایلو آن واخف الوس، ہراتم کہ یورپ نا چاگڑد ٹی دیمروی ودیسہ کرے پرنٹ میڈیا یورپ نا چاگڑد ٹی جوانو انقلابی بدلی ئس ایسک۔

1500 ء ٹی یورپ ٹی اِرا کروڑ کتاب چھاپ مسر او وخت یورپ نا آباتی دہ کروڑ ئس او وخت لاطینی اوڑے علمی آ بولی ئسک و بھاز آ مخلوق لاطینی زبان ءِ خواناکہ و سرپد مسکہ اوکان گڈ ریفاریشمن مسک و ہندی بولیک بہا مسر اوکان گڈ دا مس کہ علم وختس ہندی بولی تیٹ مٹ مسک تو اوڑے سیاسی و راجی شعور بسک انتئے کہ الس تینا بولی ءِ جوان وڑ ئسیٹ سرپد مسکہ و خواناکہ۔

اندا علم ءِ ہندی بولی تیٹ مٹ کننگ آن و کتاب آتے لمئی بولی ئٹ نوشت کننگ آن ہرا لٹریچر اوڑے بشخنگا اونا سوب آن ہرا بندغ آک کہ اسہ بولی نا جتاء لہجہ ئٹ ہیت کریرہ او اسہ ایلو تون واخف مسر اندا سوب آن اسہ بولی ئٹ ہیت کروکا تے راجی شعور رسینگا۔

ہژدہمی و نوزدہمیکو کرن ٹی یورپ نا بھاز آ ہند آتیٹ ہندی بولی ئٹ بھاز آ علمی و ادبی پٹ و پول نا بنا مس ہرافتیٹ اخبار، رسالہ، کتاب و پمفلٹ آتا شینک آن ہندی یا لمئی بولیک پنی مسر ہرانا سوب آن الس نا سیالی تینا بولی تون سوگو مس اسہ راج ئسے نا جوڈشت ٹی تاریخ، یاداشتاک و دود و ربیدگ آتا بھاز بھلو دو ئس ارے ہرا گپ و تران ئٹ مخلوق ءِ اسہ ایلو آن خڑک کیک و اوفتیٹ اسٹ مننگ نا احساس ودی مریک دانا اسہ مثیال ئس ننا مونا سوئزرلینڈ نا ءِ ہراڑے چار آن زیات بولیک کاریم ئٹ ہتنگیرہ ولے زیات احوالکاری ہیت و گپ نا سوب اوفتا دیہاڑ، آرٹ و نشانیک اسٹ مسونو اوفتا الس اسہ ایلو آن بھاز خڑک بسونے واہم پین ہم دنو استان اریر ہراڑے اسٹ آن زیات بولی تیٹی ہیت مریک ولے اوفتا الس داخہ تین پہ تین خڑک افس اوفتیٹی احوالکاری گپ بھاز زیات ءِ۔

راج دوستی نا جوڈشت

ڈاکٹر مبارک علی نوشت کریسہ پاہک کہ راج دوستی نا بابت بھاز آ مفکرین و دانشور آتا جتاء ءُ نظریہ ءُ انتئے کہ راج دوستی اسہ شابیت ءُ نظریہ ئسے دا رد ئٹ دانشور آک ہمو گڑا تا پک ءِ کیرہ کہ ہرا کُڑدہ، ٹولی یا بندغ آتے تین پہ تین اسٹ کیک اوفتے اوار کیک و اوفتیٹ نیشنل ازم یا راج دوستی نا جوزہ ءِ ودی کیک۔

مان ٹسکو ہرا بھاز گچینو دانشور اس مسونے دا عمل ءِ جغرافیہ و ہندی توڷ و بش پاہک و جرمن مفکر ہرافتیٹ ہرڑر و فٹشے اوار ءُ، او دادے اسہ بولی، دیہاڑ و دود و ربیدگ نا سوب آن پائک۔ ہندن برک و ممازی دا عمل ءِ خدا نا منشائی پائک و دادے اسہ فطری ءُ گڑاس سرپد مریرہ، و بھاز آ دانشور آک راج دوستی نا لیکہ ءِ اسہ پوسکنو لیکہ اس پوہ مریرہ۔

ولے راج دوستی خاص انگا دیہاڑ آتا سوب آن اسہ لیکہ یا نظریہ اس جوڑ مسونے دنکہ امریکہ نا جنگ آجوئی امریکہ نا غٹ ریاست آتے اوار کرے و برطانیہ تون جنگ نا وخت آ اونا بھاز آ ریاست آک اوڑتون اوار مسر ہندا حالیت 1789 نا وخت ہم خننگا ہرا وخت کہ فرانسیسی انقلاب بسک کہ انقلاب الس ءِ شہنشاہیت آن آجو کرے دا بندغ آک تینا حق آتا رکھ اکن یورپ نا جلہو آتا برخلاف اوار مسر اندا پد ندارہ ٹی کل آن مست 1789 ٹی راج دوستی یا نیشنلزم نا پن کاریم ئٹ ہتنگا اوکان گڈ 1830 نا یورپی انقلاب دا لوز ءِ پدا مونا ایسر داکان مالو دانا مطلب الس نا راج ئتون وفاداری ئس ریاست تون الو ولے داسا دا لیکہ آن گڈ ہڑتوما راج و ریاست تون وفاداری نا درشان مس۔

کوہن راج دوستی نا بابت دلیل تریسہ پاہک کہ ہرا استان تیٹی الس یا الس نا باسک آک طاغتور ئسر دنکہ امریکہ، برطانیہ و فرانس اوڑے نیشنل ازم سیاسی و معاشی طاغٹ تون زور ہلک و ہراڑے الس نزور ئس دنکہ جرمنی، اٹلی و دے ٹکی یورپ نا گڑاس استان آک اوڑے راج دوستی نا درشان دود ربیدگ ئٹ مس۔

دنکہ راج دوستی نا بنیات عقل آن بیدس جوزہ آتیان مریک اندا سوب آن دا جوزہ آتے ودیفنگ کن او ملی تے راجی گمر و عظمت آن زیمی کننگ کن دود و ربیدگ و راجی دود آتے بھاز اہمیت رسینگیک ہرافتیٹ راج آک تینا راج دے تے بھاز خوشی ئٹ ہڈ ایترہ و بروکا وخت اکن تینا ڈٹ ٹہیفرہ و تینا تدوکا وخت نا راہشون تے یات کریسہ کیرہ کہ ہرا تینا راج اکن ندر مسر دانا سوب آن تیوہ راج ئٹ ہم اواری نا احساس ودی مریک و راج دوستی نا لیکہ مخلوق نا است ئٹ ہمو وخت زیات مریک کہ ہرا وخت پین راج اس اوفتیا کوزہ کیک و اوفتا بخت نا فیصلہ آتے کیک۔

راج دوستی نا اہمیت دا سوب آن ہم زیات ءِ انتئے کہ دانا مسہ بنیاتی گڑا ءُ ہرافتیٹ خود مختار مننگ، اواری و پجار دا مسہ گڑا اسہ راج ئسے نا کڑدار ءِ مستی دریسہ کیرہ دا چاگڑد ءِ ذہنی بابت منیفرہ کہ او اسہ آزات ءُ استان و چاگڑد اسیکن جہد کے، اگہ بکار مس گڑا داڑکن ہچو قربانی آ پد چک خلنگ مف۔

دا بابت ہرڑر دلیل تریسہ نوشت کیک کہ بندغی تہذیب زند تیری تیوہ جہان نا توڷ و بش ٹی مفک بلکن راجی توڷ و بش اونا کڑدار ءِ جوڑ کیک چاگڑد تینا جوڑ کروک لائخی تا درشان ءِ تینا لمئی بولی ئٹ کننگ کیک ہندا سوب جرمن ادیب، شاعر و محقق آک جرمن بولی ءِ خرُن کریر مستنا کسہ غاتے جوڑار اوفتے شینک کریسہ کریر جرمن بولی نا اہمیت چاگڑد نا جوڑ کروک روح ءِ بیدار کرے و بندغ آتے اوار کریسہ اوفتیٹ چاہنداری نا احساس ءِ ودی کرے۔

ہرڈر” نا لیکہ نا ردئٹ بولی بندغ ءِ بندغ جوڑ کیک ہرا وخت اسکان او تینا بولی ئٹ ہیت و گپ کپک اونا ہچو حیثیت ئس مفک و ہر بولی ایلو بولی آن جتا مریک انتئے کہ ہر کمیونٹی نا فکر جتاء مریک بولی ٹی بدلی بننگ کیک دانا لوز آک بدل مریسہ کیرہ ولے فکر ہمو رہینگک ہندا سوب آن اسہ بولی اس بھلن یا چنک مفک بولی ءِ ہیل کننگ ئٹ نی اونا روح اسکا سر مننگ کیسہ۔

نیشنل ازم نا بابت اسٹالن نا تعریف باز گچین ءِ و اونا نوشت ءِ باز آ بندغ آک خوانیرہ او دا پارے کہ “اسہ راج اس دیہاڑ نا رد ئٹ ردوکو اسے کوالخواہ (stable) ءُ ٹولی اس مریک ہرانا اسہ اوار مروک بولی، علاقہ، زرگزرانی زند ئس و نفسیاتی ءُ دروشم اس مریک ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ ننا سرمچار آک کوئٹہ، تربت و تمپ ئٹ کوزہ گیرپاکستانی لشکر و اونا مخ تف تے چار جتاء جتاء جلہو تیٹی ٹک کریر، جلہو تیٹی ارا دژمن کارندہ مرگ ئنا گواچی و یانزدہ ٹپی مسروختس کہ بیرہ پن ئنا آجوئی نا خوشی کن ٹہیفوک دکان بھس مس۔

او پارے کہ بلوچ لبریشن آرمی نا سرمچار آک اینو شال ئٹ موتی رام کسر آ کوزہ گیر پاکستانی لشکر نا سروکی ٹی ٹہیفوک پاکستانیبیرک تا اسہ دکان ئسے  ریموٹ کنٹرولڈ آئی ای ڈی نا وسیلہ ئٹ ٹک کریر۔تراک ئٹ دکان چلفوکا دژمن لشکر نا ارا مخ تف ہمو ہند آ مرگئنا گواچی و چار ٹپی مسر وختس کہ تیوہ دکان بھس مس۔

او پارے کہ بیرہ پن ئنا پاکستانی آجوئی نا خوشی کن ٹہیفوک دکان تا رکھ ئکن ساڑی دژمن لشکر و ڈکھوک ادارہ تا کارندہ غاکہربشی مرسہ ہرے اسکان تینا مون سم کاری کریر و میڈیا غا ہڑدے نا وڑ تینا بے سہبی ءِ ڈکھنگ نا کوشست کریر۔

ترجمان پارے کہ ایلو پارہ غان بی ایل اے نا سرمچار آک اینو کوئٹہ ٹی دے کہی بائی پاس ہزارہ ٹاؤن آن خڑک کوزہ گیر پاکستانیلشکر نا حیدر کرار پوسٹ 104 ونگ نا رکھی چوکی ءِ چغلی بمب ئٹ ٹک کریر، تراک ئٹ ارا دژمن کارندہ ٹپی مسر۔تراک آن گڈپاکستانی لشکر سم کاری کرسہ اسہ کسری ءُ بندغ ئسے کھسفے۔

جیئند بلوچ پارے کہ بلوچ لبریشن آرمی نا سرمچار آک اینو مسٹمی جلہو ءِ تربت نا علاقہ ناصر آباد ئٹ شام ئنا وخت آ کریر۔سرمچارآک کوزہ گیر پاکستانی لشکر نا چوکی آ تخفوک کارندہ تے سلہہ بند جلہو آن گڈ چغلی بمب ئٹ جلہو کریر، جلہو ئٹ ارا دژمن کارندہٹپی مسر وختس کہ چوکی ءِ بھاز نسخان رسینگا۔

او مستی پارے کہ بی ایل اے نا سرمچار آک اسہ پین جلہو ئسے ٹی استو کیچ نا علاقہ تمپ ئٹ کلاھو نا ہند آ کوزہ گیر پاکستانیلشکر نا پوسٹ آ گرنیڈ لانچرز ئٹ کہیی گولہ تے خلکر،ت راک ئٹ ود کم مسہ دژمن کارندہ ٹپی مسر وختس کہ دژمن ءِ پین مالی نسخانتون مون تروئی تما۔

گڈ سر ئٹ او پارے کہ بلوچ لبریشن آرمی پن کروک جلہو تا ذمہ واری ءِ ارفک و نن پک کینہ کہ کوزہ گیر پاکستانی لشکر نا تیوہپیشتمنگ اسکان ننا کاروائیک برجاء مرور۔

بلوچستان نا بنجائی شار کوئٹہ نا علاقہ موتی رام کسر آ تراک نا سوب کیہی بندغ آک ٹپی مسر۔

پولیس نا رد ئٹ شار نا پنی آ بازار موتی رام کسر آ ٹہیفوک پاکستانی بیرک سودا کروکا دکان نا تہٹی ترند ءُ تراک ئس مس ہراڑان گڈ دکان ئٹ خاخر لگا۔ خاخر ءِ کسفنگ کن فائر بریگیڈ ءِ خواہفنگا ہرا دکان نا تہٹی لگوکا خاخر ءِ کسفے۔

تراک نا سوب آن کیہی بندغ آک ٹپی مسر ہرافتے سیول ہسپتال نا ٹراما سینٹر آ سر کننگا۔

تدینی آن گڈ پولیس و سکیورٹی فورسز آک علاقہ ءِ گھیڑ ئٹ الکر پولیس کوالخواہ تا پاننگ ءِ کہ تراک حالیت نا تعین مننگ ءِ۔

ایلو پارہ غان وزیر اعلی عبدالقدوس بزنجو تدینی آ سوختئی نا درشانی کریسہ ایڈیشنل چیف سیکریٹری داخلہ و آئی جی پولیس آن سکیورٹی گامگیج تا باروئٹ رپورٹ خواہا۔

وزیر اعلیٰ پارے کہ الس و شار ءِ دا وڑ دہشت گرد آتا دوٹی تننگ کپنہ، تراک آتیان بلوچستان نا بابت بھاز گندہ ءُ اثر ودی مننگ ءِ، فورسز و الس نا ندری تیان ٹہفنگوکا امن ءِ بھس مننگ کہ الپنہ۔

وزیر اعلی ہمو کوالخواہ تے پارت کرے کہ کوئٹہ کن فل پروف سکیورٹی پلان ٹہفنگے بیدس خلیس و بھیم آن آجوئی کن خوشی کننگ لس الس نا حق ءِ۔

اندن پن کروک جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک اینو کوئٹہ ئٹ موتی رام کسر آ کوزہ گیر پاکستانی لشکر نا سروکی ٹی ٹہیفوک پاکستانی بیرک نا اسہ دکان ئسے ریموٹ کنٹرول آئی ای ڈی ئٹ ٹک کریر۔ تراک نا سوب دکان ءِ چلفوک آ دژمن لشکر نا اِرا کمکار ہند آ مرگ ئنا گواچی و چار ٹپی مسر اندن دکان تیوہ بھس مس۔

مخبر آتا جہان و رچرڈ برٹن

نوشت: ڈاکٹر مبارک علی
مٹ: برناز بلوچ

دی بلوچستان پوسٹ

ہندوستان ئٹ ہراتم کمپنی نا حکومت ترند مس گڑا روس نا وسطی ایشیا ٹی ودوکا تاغت آن خلیس ہم ودی مننگ بنا مس۔ کمپنی نا کُڑدہ آتیٹی دا گمان لس ئس کہ روس وسطی ایشیا نا زی آ کوزہ کرسا ایران نا کمک ئٹ اوغانستان آ برو و داکان ہندوستان نا زی آ جلہو کرو۔ گڑا کمپنی نا حکومت بخارا، خیوائی، یارکندہ، ہنزہ، ایران و اوغانستان ئٹ مخبر و سفارتکار آتا کمک ئٹ علاقہ آتیٹی سیاسی حالیت، ڈغار آتا کچ و کسر تا پٹ و پول اکن معلومات مچ کننگ بنا کرے۔

دا مخبر آک مسافر و تاجر آتا دروشم ئٹ ہمو علاقہ آتیٹی ہنار۔ اوفتیٹی گڑاس سرسہب مسر بسر ولے چندی تے جاسوس مننگ نا ڈوہداری ٹی بخارا، خیوا و ہنزہ نا حکومت آک دزگیر کریر و کھسفیر۔ کمپنی نا حکومت داڑا چھپ مس انتئے کہ او دا لائخ الو کہ فوجی جلہو کرسا بدلہ ہلنگ کے۔ کمپنی نا حکومت خاص وڑ ئٹ ایران و اوغانستان ٹی سفارتکار آتا مشن مون تس، تاکہ دا ڈیہہ تا حکومت آتتون سنگتی ءُ حال احوال نا کسر اس ودی کرسا روس نا سیاسی مسخت آتے توننگ کے۔

 ہندا وخت آتیٹی کمپنی نا حکومت سندھ ئٹی ہم سفارتکاری نا مشن مون تس تاکہ سندھ آن واخب مننگ کے۔ ہندا بنیات آ کمپنی نا حکومت 1843ء ٹی سندھ ئنا زی آ جلہو کرسا اودے کوزہ کرے۔

دا جاسوس آتیٹی اسٹ رچرڈ برٹن ئس، ہرادے عربی و فارسی آن بیدس پین کیہی بولیک ہم بسرہ۔ گڈ اٹ اونا پنی مننگ اسہ مٹ کروک، دے ٹک علم نا ماہر و جاسوس نا سوب آن مس۔ اونا کیریئر نا بنا کمپنی نا فوج آن مس ہرانا کماندار چارلس نیپیر ئس، و ہراتم چارلس نیپیر سندھ آ جلہو کرے گڑا اود ہم اوڑتون اوار ئس۔ سندھ نا باروٹ تینا چمشانک آتے اود Unhappy vallay of sindh ئٹ ٹھٹھہ نا خڑک شار جھڑک نا ذکر ءِ کرینے، ہراڑے اسماعیل آتا امام ایران آن ہجرت کریسس و رہینگاکہ۔ دا یورپین آتیکن بھلو خاتر و ہمدڑدی اس تخاکہ۔ رچرڈ برٹن ہم اونا مہمان نوازی آن خوند ارفیسس۔ او کراچی نا ہم ذکر ءِ کرینے ہرا او وخت آ ماہی گیر تا اسہ خلق اس ئسک و داڑے بخال تا تاجر تپہ بھاز تاغتور ئس۔

 رچرڈ برٹن نا کیریئر نا اسہ اہم ءُ بشخ اس 1853ء ٹی حج ئنا سفر ئس، ہندنکہ مکہ مدینہ ٹی مسلمان آتیان بیدس کس ءِ موکل الو۔ ہندا خاتران اود مسلمان نا دروشم ئٹ اول تینے ایرانی و پدان اوغان باتی اس پارے۔ ہندنکہ اودے فارسی بولی تیوہ وڑ ئٹ بسکہ ہندا سوب آن کس ءِ اونا یورپین مننگ آ شک متو۔ تینا حج نا سفری معلومات آتے اود نوٹس آتا کمک ئٹ رکھاسس۔ حج ئنا باروٹ یورپین آک دا چاہنگ خوائسرہ کہ اوڑے انت دود مریک و ہرا وڑ ئٹ مریرہ۔ رچرڈ برٹن آن مست ہم کیہی مسافر آک دروشم مٹ کرسا حج کریسر و اوفک تینا آزموندہ و چمشانک آتے شینک ہم کرفیسر۔ ہندافتیان اسٹ اس John Burk Hardt 1817 ئس، ہراد ابراہیم نا پن اٹ مکہ مدینہ نا سفر ءِ 1814ء ٹی کریسس۔

رچرڈ برٹن ہندا یورپین مسافر آتا سفرنامہ آتے خواناسس، تاکہ اود تینے مسلمان اس ثابت کرسا حج ئنا مذہبی دود آتے کننگ کے۔ او وخت آ حجاز و نجد نا علاقہ غاک ترک آتا حکومت ٹی ئسر۔ و مکہ مدینہ غا ہنوکا کسرک حاجی تیکن وے رکھوک ئسر۔ کسر ئٹ عرب بدو قبیلہ غاک حاجی تا قافلہ آتے لٹ و پل کریرہ۔ رچرڈ برٹن سفر نا تیوہ معلومات آتے مچ کرسا قاہرہ غان بحری جہاز نا کمک ئٹ جدہ غا روانہ مس۔ او جہاز ٹی ہنوکا مسافر تا حالیت ءِ ہم نوشتہ کرینے کہ اوفک ہرا وڑ سختی تے مون تریسہ جدہ ءِ سر مسوسر۔

جدہ غان مدینہ اسکان نا سفر ءِ ہُچ ئنا زی آ کرے۔ دا سفر ٹی اوفتا اسہ ہندوستانی نوکر اس ہم اوفتون اوار ئس۔ برٹن بھاز زوت عرب آتتون خڑک ءُ تعلق جوڑ کرے و اوفتا عادت و دود و ربیدگ آتے گچین کرے۔ خاص وڑ ئٹ او وار وار نوشتہ کیک کہ عرب آتیٹی کافی کننگ و چلم کشنگ نا رواج بھاز لس مسوسس و اود تینٹ ہم اوفتون اوار دافتے ٹی بریبر ئس۔ برٹن اول مدینہ غا ہنا و ہڈ کرسا روضہِ رسولؐ نا زیارت ءِ کرے و پدان حضرت حمزہ نا مزار آ ہم ہنا۔ او وخت اود پابندی ئٹ نماز ہم خواناکہ و مسلمان تا وڑ و ڈول آتیا عمل کریکہ۔ مدینہ ٹی رہینگ آن پد او حج نا وختا مکہ آ ہنا و اوڑے حج ئنا غٹ دود آتے ایسری تس و کس ئسے ہم تینے آ شکبر مننگ ہلیتو کہ اود مسلمان اس اف۔

حج آن بننگ نا وخت او تینا سفر نا حالیت آتے اِرا جلد ٹی نوشتہ کیک۔ خاص وڑ ئٹ او شابیتی تون ہمو مناسک آتا ذکر ءِ کرینے، ہرافتے حج ئنا وختا ادا کننگک، ہندا سفرنامہ نا وسیلہ ئٹ یورپ نا بندغ آتے مسلمان آتا حج نا باروٹ گچینو معلومات دوئی مسر۔

رچرڈ برٹن نا ارٹمیکو اہم تصانیف آتیٹی پنی مروک عربی کسہ الف لیلہ نا عربی مٹ One Thousand and One Night ءِ ۔ او ہندوستانی جنسیات نا زی آ نوشتہ مروک کتاب کاماسوتر و عربی اٹ نوشتہ مروک ءِ Perfumed Garden نا پن ئٹ مٹ کرینے۔ اونا خذمت آتا بدل ٹی رائل سوسائٹی آف جیوگرافی اودے تینا باسک جوڑ کرے و برطانوی حکومت اودے Knighthood یا سر نا داد پِن ءِ تس۔ دا تصانیف آتیان بیدس او کیہی سرحال آتیا کتاب نوشتہ کرینے۔ اوفتیان اسٹ زمغ نا دیہاڑ ءِ ۔ داڑان بیدس ہم برٹن کیہی مواد مچ کریسس، ہرافک دستاویزات تا دروشم ئٹ اونا خاہوت تون ئسر۔ 1890ء ٹی اود کذیت کرے و اونا قبر ءِ خیمہ نا دروشم ئٹ جوڑ کننگا۔

رچرڈ برٹن نا شخصیت دا خاطران اہم ءِ کہ او جتا جتا انگا ڈیہہ تا سفر ءِ کرے و جاسوسی ہم۔ برڈن دروشم مٹ کرسا حج ہم کریسس۔ او اسہ بندغ تینا چنکا زند ئٹ اسہ وخت ٹی کیہی منصوبہ آتے پورو کننگ کیک۔

کنا گُڈیکو چِٹی

نوشت: دیدگ بہار | مٹ: بیربل

دی بلوچستان پوسٹ

دا کنا گُڈیکو چِٹی ءِ ہراتم کہ نُم دادے خُوانارے گڑا دا بھلو وخت ئسے آن مالو لکھوک تخوک مرو۔ ای امیت تخیوہ کہ نُم کُل جوڑ خیر ئٹ مرورے و خدا نُمے کُل ءِ جوڑ خیر ئٹ و سلامت تِخے۔ ہراتم دا چِٹی نُما دُوٹی مرو او وختا ای تینا مسخت ٹی سر سوب مروٹ۔

ای دا پاننگ کپرہ کہ کنا مرگ آن پد نما خاہوت ٹی خوشی و گل و بال آک مرور ولے ای ٹپی آ اُست نا دتر نا ہر پُڑی تون نُم تون ساڑی مروٹ۔ کنے یقین ءِ کہ ای مریو یا مفر ولے نُما کُل نا فکر و خیال ئٹی گنڈوک مروٹ۔ اگہ مننگ کیک گڑا کنا گڈیکو چِٹی ءِ الم خوانیرے انتئے کہ دا کنا زند نا ایسری چِٹی ءِ۔

سرزمین نا گواڑخاک

ای نُما افسانا غاتا امو کارست اُٹ ہرا ہر وخت بغاوت ئٹی مرو ءِ ولے ہرا فرض نا پورو کننگ کن ای پیشتمانُٹ ای جوان چاوہ کہ دا کنا عمل فرض ءِ پورو کننگ کن گیشتر اف۔

سرزمین نا گواڑخاک

ای چاوہ کہ نُم ہزار آ غم ڈُکھ تکلیف، بلوچ فرزند آ تا بیگواہی، شہیدی و دشمن نا زوراکی و بے انصافی تیان بیدس ہم ہر وخت نُم تینا توارے بُڑز کننگ کن سوگو سلیسنرے۔ ای بے وسی ٹی نُمے ہر وخت ہریسہ کرینوٹ۔

سرزمین نا گواڑخاک

نُم کنے دا سوب آن دوست اُرے کہ نُم کنا اولیکو و گُڈیکو مہر و مابت اُرے۔ نُما مہر و مابت کنے دا فکر تون گنڈا کنے عبادت کننگ نا وڑ و ڈول ءِ ہیل تِس۔

سرزمین نا گواڑخاک

داسہ نُم کنا عشق جوڑ مسونُرے و نُما زیبائی کنا عبادت جوڑ مسنے نُما مونا پین ہچ ئس اہمیت تخپک اندا سوب آن ای پاوہ کہ نُم اسُل کسپیرے ہر اسہ گڑا ٹی نُما فکر ساندہ سلوک مرو۔

نُم و نُما کسہ نا ہر اسہ گڑا کنے ٹی چمبڑینگوک مرو۔

ای نا بلکن دا زمین آ وجود تخوکا ہر اسہ گڑا و دا بُڑز و بالا آ مَشک نُمے مخنگ ئٹ بنیسہ کرور و نُما مہر ئٹی بغاوت کرسا کرور۔

کنے یقین ءِ کہ نا عشق ٹی اسہ بندغ ئس ام فنا مننگ کن ہُرے کپرو انتئے کہ ہراتم ارادہ غاک سوگو مریر تو شاہد نامنکن نا ہچو گمان ئس بندغ نا ذہن ئٹ مفرو و کنا ایمان ءِ کہ شکست ہر وخت باطل نا مرو۔

نی کنا ہستی اُس کنا مقدر اُس نا اُست نا درپ درپ بولان کنا ساہ نا باپوٹ کنا روح تون پیوند ءِ۔

بولان ای شرمندہ اُٹ کہ ای نیکن ہچ ئس کننگ کتوٹ و نے تینا سینہ ٹی خلنگ کتوٹ۔

بولان ای مُرید تو جوڑ متوٹ ہرا نیکن 15 گوپشان آ مُرغنو چِٹی ئس نوشتہ کرے ہرانا شاعری نے و ہانل تون گنڈوک ءِ۔

ولے نی دا گلہ ءِ کپیس کہ ای نے یاد کتنُٹ نی تو کنا اُست نا بند اُس اگہ نے یقین اف گڑا کنا لائخ آ سنگت آ تیان ارِف ای ہر اسہ مجلس ئٹی نا پن ءِ ہلکنُٹ و کنے یقین ءِ کہ کنا مرگ آن پد ہم نی کنا اُست ئٹی زندہ سلوس۔

لُمہ باوہ نا پِنا

کنا زِند آن دوست گچین آ لُمہ و باوہ جان اومیت کیوہ کہ نُم جوڑ خیر ئٹ مرورے و اللہ غان دعا ءِ کہ نُمے جوڑ خیر ئٹ و سلامت کے۔

باوہ جان سال آک تدینگار نا و کنا اسہ ایلو ءِ خنِنگ متو و نہ ای نیتون فون آ ہیت کننگ کریٹ۔ ای چاوہ کہ نی کنے آن خر اُس باوہ جان و کنے سما ءِ کہ دا کسر بھاز سخت ءِ ولے سوگو آ حوصلہ آک مش تے ہم سُریفیرہ۔ کنے یخین ءِ کہ ای تینا مسخت ئٹی سر سہب مننگ آن پد شاید نُم است ٹی فخر محسوس کرسا کرورے۔

نُمے مارشت مرو کہ ننا چُنا ننا کاٹم ءِ شیف کتو بلکن ہندن بڑز و بالا کرے دُنکہ چلتن ءِ و غصہ کننگ نُما حق جوڑ مریک کہ ای اسہ اندنو کسر سے نا مسافر اُٹ ہراڑان پد مننگ اسُل مفک۔

ای تینا دا عشق ٹی اندن گم گار مسونُٹ کہ کنے دا ام سما تمیتنے کہ  کنا پیرو لُمہ باوہ ئس ہم ارے ہرا کنا کسر ءِ ہروک ءُ۔ ای نُما کُل نا لکھ منت وار اُٹ کہ نُم کنے تینا یات آ تیٹی ہر وخت تخارے ولے کنے بشخیرے کہ نُما اُستخواہی تا پورو مننگ کتوٹ۔

نُما استخواہی ئس کہ ای برام کیو، اُرا خاہوت تون اسہ اُلس مخلوق آمبارو زند ئس گدریفیو۔

باوہ جان کنے کنا کم علمی اینو بھاز سختی ٹی محسوس مننگ ءِ کہ ہرا علمی ادبی و مقالہ خواہنگ تون ہم ہچس قلمبند کننگ افٹ۔

تینا عظیم آ ہستی تیکن جاگہ سے آن ہمو لوز آتے ہتنگ کتوٹ ہرافتے بِننگ نا او حقدار ءُ۔

باوہ جان و لُمہ جان ای ہر گڑا آن واخب اُٹ کہ نُما زِند نا  گُزران امر مننگ ءِ ولے لُمہ جان و باوہ جان نُمے دا ہم خبر مرے کہ انتس کہ نن سوچ خلینہ زند امو وڑ مفک بلکن نن تون انتس کہ مریک امو زند ءِ۔

باوہ جان لُمہ ہمو ہستی مریک ہرانا پیشانی آن نور چلیشک ایتک و اونا خن تیٹی ای ہر وخت نے خنانُٹ اونا لوز آتیٹی مہر و جہان نا سکون ءِ خنانُٹ، دُو تیٹی شفقت و نت تیٹی سرزمین نا زباد تون اوار جنت نا دروشم ءِ خنانُٹ، ای ہرانگ کہ کاوہ اونا ہنینا زباد کنا روح نا رنگ آ تیٹی اوِڑدہ مرسا کیک۔

و دا ہم سما ءِ کنے کہ ہڑتوما جوڑتے اوار کننگ آن بیدس لُمہ پاننگ مفک۔

 او آئی جان

ای تینا مُچا زند ءِ نا پنا کیو پدا ہم نا حق ادا مفک۔ حق تو تینا جاگہ اسہ نن ئنا بے تُغی نا حق ہم ادا مفک۔

دانشورآک جوان پارہ کہ لُمہ مہر نا کُڑمبو سمندر ئسے ہرادے اینو اسکان کس ناپ کتنے نہ کہ کس ناپ کننگ کرو تے۔

لُمہ نا مہر ہمو ساندہ آ پُھل آمبارے ہراٹی سُہیل نا ھچ ڈس و پد مفک۔۔۔

لُمہ جان

نی کن کہ جنت نا مثیل اُس ولے زمین نا گواڑخاک ہرا نا زی آ آسمان و گوادر نا ساحل ہرانا چھول آک اینو ہم سربلند نا گواہی ایتیرہ، چاغی نا ہشنگوکا سینہ، شال نا گچینا موسم، شاپک نا یاداک، کنا سرزمین نا ہر اسہ خل دا دشت و دامان آک، دا مَشک، چمن، کنا دود و ربیدگ کنا وطن نا ہر اسہ گڑا کنے مُچا جہان نا ہر اسہ گڑا آن عزیز ءِ۔

لُمہ جان

ہراتم کہ لُمہ یاسمین کنا مونا بریک تو کنے جہان نا پنی آ سپہ سالار نپولین بوناپارٹ نا ہمو ہیت آک اُستا بریرہ کہ پاریکہ “نُم کنے عظیم ءُ لُمہ ایتبو ای نُمے عظیم ءُ راج اس ایتیوہ”

لُمہ جان

اینو ای اسہ اندنو عمل ئس کننگ نا کوشست ٹی اُٹ ہراڑان پد مننگ نا ہچو گمان ئس مفک۔ اگہ مس تو کنا باوہ جان کنا ایلم و ہیڑک کنا دا عمل آن خوش مفرور ولے ای تینا دا فیصلہ ءِ تینا مرضی او منشاء ٹی کرینُٹ دا مسخت ٹی سرسہب مننگ آن پد نُمے فخر کروئی ءِ نہ کہ فریشان مروئی ءِ۔

“تل مس تہاری چُٹھا انا نن ولدا برینہ”

“کنا مابت”

گُلی کنا ساہ ئنا بند نا خلق کن کہ مُچا کائنات آن کم الو کنے وخت وخت اندن گمان مسکہ کہ کنا ودی مننگ بیرہ نیکن ئس ای نے آن زند ءِ تدیفنگ ہیل کریٹ بلکن پین کس آن کننگ کتوٹہ۔

گُلی کنا لاڈی نا دا مون انگا زُلف آتیٹ تینا مون ءِ ڈھکنگ ٹی ای اسہ بے پِن ءُ سپاہی ئس مننگ نا زند ءِ خواہسوٹہ۔۔۔۔۔۔

ای نا رُخسار آ تیٹی اندن گم گار مننگ خواہسوٹہ کہ نے آن بیدس پین ہچ اس مف بیرہ نی مریس گُلی۔۔۔۔۔۔

نا بادامی آ خنک خننگ ئٹ چشم ءِ ساغر مننگ خواہسوٹہ گُلی۔۔۔۔۔۔

گُلی ہراتم کہ نا بشخندہ ءِ خناٹہ تو اندن گمان مسکہ کہ مچا کائنات نا زیبائی نا رخسار تیا شادکام کننگ ءِ۔۔۔۔۔

اندن لگاکہ نی ہم عشق کریس شاید او عشق نا مقدر ئس او ای تو نا پنا ئسوٹ گُلی کنا ساہ ئنا بند۔۔۔

گُلی کنے جوان یات ءِ کہ ہراتم ای نے اولیکو وار خناٹ نی آواران نا بیگانہ آ دامان ٹی ئسوس و ای سوچ خلکوٹہ کہ دامان بیگانہ و

کسرک بھینگ ءُ ولے نی انتئے بِدر لگیپیسہ ۔۔۔۔

اینو کنا اسہ کُنڈ نا مہر ءِ منہ سال گدرینگانے ولے اینو ہم نی کنا اُست ٹی جہی اُس و ای نے ہر ساعت و ہر جاگہ یات کرسا کروٹ

انتئے کہ نا دا ٹمیکوکہ بند مروکا، بند مروکا ٹمیکوکہ خنتیٹی سما اف فطرت نا اخہ رنگ خنانُٹ او اندا رنگا تیٹی ای مچا بلوچستان ءِ پھیری خلِسا کرینُٹ ۔۔۔

دا یخین ئس کہ نی کنا مابت اُس ولے کنا عشق تو پین ئس اس گُلی ۔۔۔

کنا عشق وطن کن اسُل اسہ کُنڈ الو۔۔

بس ایسر ٹی تینا پِنوکا شاعری نا مصرعہ اسیتو نے رخصت کیوہ۔۔۔۔۔

عشق جدائی کی آتش میرے بدن کو جلا دے یکطرف

طلوع نشان سے تیرے لطف کا آگ بجھا دے یکطرف

  کنا سنگتاک ۔۔۔

کنا ہمفکر آ سنگتاک ہرا فرض ءِ نُم پورو کننگُرے شاید اونا اہمیت ءِ درشان کننگ کن کنتون لوز اف بلکن ہچو کتاب اسیٹی اف۔

ہراتم نُما یات بریک ای فخر محسوس کیوہ کہ دا سخت انگا حالیت ئٹی لنگڑی و ملاسی آن ہلیس تینا ذاتی اُست خواہی تے ہم گوری کروکا ایمانداری ٹی تینا دشمن تون مون مقابل جنگ کننگ اُرے ۔۔

کنا سنگتاک اینو ای تینا بقاء نا فرض ءِ پورو کننگ کہ روان اُٹ ۔

ہرا ہر اسہ راجی سپاہی نا فرض مریک و کنے دا ہم یخین ءِ کہ کنا مرگ آن پد دا تُوفک نا سُم تے زنگ خلپرو۔۔۔۔۔

کسر شون آک

ذمہ دار آک نُمے آن ننا بھازا اومیت آک گنڈوک ءُ۔

ہرا عظیم آمسخت کن نُم قربانی تننگ اُرے کنے ہمو عمل آ فخرے ۔۔

ولے اینو اسے طالب علم، سنگت، و اسے ہمفکر نا حیثیت ئٹ نُم تون ہمکلام اُٹ کہ اینو ہرا وڑ استاد اسلم و اونا سنگت آ تا گچینا قربانی نا عیوض ئٹ اینو ننا جدوجہد اسہ گچینو کُنڈ ئصے آ سرسہبی کن مون مُستی روان ءِ اودے اندن ایمانداری ٹی برجاء تخرے۔

ای دا ہیت تون ہم امنائی کیوہ کہ سوگو اسہ جاہ مننگ کہ بھازآ سختی و سوریک مونا بریرہ وخت ہم لگیک ولے کنے یخین ءِ کہ کنا ہمفکر آ سنگتاک بلوچ راجی تاغت ءِ اسہ جاہ کننگ کن  مُچا جہان ءِ دا باور تننگے کہ بلوچ راج اس جاہ ءِ اسہ مسخت و اواری تون محاذ ءِ سھنبالنگ کن تیار ءِ۔۔۔

کنا راج نا ورناک!

ہرا وخت آن ای شعور نا تلہ غا گام تخاٹ ای خناٹ کہ کنا راج تون بھاز بے دادی مسونے ہڑدے اسہ نہ اسہ ویل اس بِننگ کہ رسینگانے۔

ای وخت و حالیت تون اوار اوار زند نا شیف بڑزی ءِ پُہہ مسُٹ گُڑا سوچ خلکُٹ کہ ننے ظلم ئنا برخلاف ہر وڑ و ڈول ئٹ تیار مروئی ءِ انتئے کہ ننے تینا بولی، ننگ و ناموس، عزت و وطن نا ہر اسہ گڑا نا رکھننگ کن ہروخت تیار مروئی ءِ و ہر ناممکن ءِ ممکن جوڑ کروئی ءِ۔

انتئے کہ ہراتم ارادہ آک بسون مسُر تو ناممکن نا ہچو سوج ئس ودی مننگ کپک ۔

کنا راج نا ورناک !

تحریک ٹی ہرا کاریمے نُم کننگ کیرے بس ہمو کاریم ءِ کبو دا الّمی اف کہ نم توفک ارفبو مش آ روان مبو انتئے کہ  دشمن تون مقابلہ کننگ کہ ہزار آ وڑ و ڈول آک اریر۔

شاعر تینا شاعری ئٹ، فنکار تینا فنکاری ئٹ، ادیب تینا قلم ئٹ ہر اسٹ تینا طریقہ ٹی دا حق ءِ پورو کننگ کیک، انتئے کہ داسہ عمل آن بیدس ننتون پین ہچس اف۔

ننے ہر اسہ گڑا ٹی زندہ سلوئی ءِ آکاش ئٹ، آب و ہوا ئٹ، منہاج، میر احمد، میرل نا شعر تیٹی، برزکوہی، سفرخان، بابل و ڈاکٹر جلال نا تحریر آ تیٹ۔

ماہرنگ، مہلب و سمی نا بروکا وخت ئٹ ، قاضی نا شاعری ٹی، تہاری تیان پد بروکا رژن ئٹ، لُمہ یاسمین نا گواڑخ آ تیٹ، ہر اسہ گڑا ٹی ننے زندہ سلوئی ءِ۔

کنا راج نا ورناک !

نُم کنکن ہتم نا مثل اُرے ، انتئے کہ ہتم نا مُد کُل مُد آ تیان زیبدار مریک، کوہسارک، چُر و چھیلاک، چکل و چشمہ آک، و دامان تیٹی گوڑیفوک ءُ زیباو ندارہ غاک رسینگرہ، پُھلاک ردیرہ، درختاک خرُن مریرہ، اندا سوب آن کنے پُھل و بہار بھاز دوست ءُ۔

دافتیان بیدس مچا کائنات کنکن بے پورو ءِ۔

و ارٹمیکو ہیت کنا راج ئنا ورناک بس ایسر ٹی دا پاننگ خواوہ کہ دا جہد ءِ تینا پُہہ مبو انتئے کہ ہر گڑا نُما مون ئٹی ءِ کہ نن جنگی حالیت ئٹی اُن، ننے آ ظُلم نا قیامت ءِ ہرا نا مقابلہ ءِ نن بیرہ مزاحمت ئٹ کننگ کینہ۔

ننا جنگ دا بیرہ پِن ئنا الحاق نا خلاف ءِ، غلامی و دا مظلومیت آن آجوئی کن ءِ، و ننا جہد بلوچ راج نا مچا آجوئی، خود مختاری، او حق خودرادیت، بندغ و بندغی، لکھنگ خواننگ، شاعری، فن و فنکار، رنگ و نسل و برابری نا بست و بند اکن ءِ۔

ایسر ئٹ بشیر زیب نا لوز آتے ارفنگ ئٹ پاوہ کہ ہرا المناکی تیان اینو بلوچ راج گدرینگنگ ءِ او اسل بے برم مننگ کپسہ بس نُما بشخ ہلنگ الم ءِ نُما بشخ ہلنگ اسہ عظیم ءُ جذبہ، سوچ، مستقل مزاجی دا جہد نا اسہ عظیم ءُ کاریم اس مرو۔

بقول شیر دل غئیب ” ای نے رخصت پاپرہ انتئے کہ نی کنا وجود نا بشخ اُس” ۔

تل مس تہاری چُٹا ہنا نن ولدا برینہ۔۔۔۔

گوادر یونیورسٹی لاہور، درشانی نا خواستگار

ٹی بی پی تیدری

نوشت: زارین بلوچ

گوڑیفوک ڈول پاکستان نا بنجائی اسمبلی نا سلہ تروک قرار داد، ہراٹی پنجاب نا دارالحکومت لاہور ئٹ پاک چائنہ گوادر یونیورسٹی نا ٹہیفنگ نا موْکل تننگانے۔ دا گام زیات مخلوق ءِ گوڑیفینے و چاگڑدی حوالکاری تلہ غا پبی شرہ اس بش کرینے، انتیکہ یونیورسٹی نا پِن تو بلوچستان نا دریابی شار گوادر تون تفوک ءِ، ولے اودے ٹہیفوئی لاہور ئٹی ءِ۔ دا بل ئنا موْکلی پاکستانی ریاست نا فیصلہ کننگ و پامداری تیا بھازا بندغ آتے سوج ارفنگ آ بیوس کرینے۔ بل ئنا موْکلی تروک قانود ٹہیفوک آک اُلسی سوختئی، ڈکھ و نغد کاری ءِ بش کریسہ دا گچین کننگ کن ہچو دلیل اس ہم تتنو۔

حوال چاگڑدی حوالکاری تلہ غا تُرندی تون تالان مسونے، بلوچستان تون اوار گچین وڑئٹ مکران نا مخلوق گوادر نا جاگہ غا لاہور ئٹ گوادر یونیورسٹی نا ٹہیفنگ ءِ منافقت پن کرینو۔ دا تدینی ملک ئٹ چوٹ پامداری و مڈی تا بے انصاف ونڈ کننگ نا پین زیات درشانی ءِ کرینے۔

یاتی مرے دا بل نا موْکلی نا وڑ ڈول بھاز شرہ ئی ءِ، اجلاس نا وختا چُنک اسہ گھنٹہ ئٹ 29 بل نا موْکلی تننگا، ہراڑے حکمران سیوت نا بیرہ 15 باسک ساڑی ئسر، و اپوزیشن نا ہچو ہم باسک اس ساڑی اَلو۔ دا بل آتیان 24 پوسکنو یونیورسٹی و تعلیمی ادارہ غاتا ٹہیفنگ نا بابت ئسر، ہرافتیٹ پاک چائنہ گوادر یونیورسٹی ہم اوار ءِ۔ پین گوڑیفوک آ ہیت دادے کہ دافتیان زیات بل آتے بیدس جانچ یا تفوک کمیٹی تے رادہ کننگ آ موْکلی تننگا۔

زند ئنا جتاء تلہ غاتیان تعلق تخوک بندغ و ٹولیک دا قرار داد نا موکلی نا فیصلہ آ بد دننگ و خُلیس نا درشانی کریر۔ گوادر نا ہندی باسک آک دا ہیت ئنا درشانی کریر کہ لاہور ٹی یونیورسٹی نا جوڑ کننگ ننا علاقہ تون تیوہ نا انصافی ئسے و دا دلیل ءِ تسر کہ چین پاکستان اقتصادی راہداری نا بناء مننگ آن ہلیس اینو اسکان او ہچو سواد خنتنو۔ جتاء باسک و تعلیمی چاہندار آک گوادر و بلوچستان نا گیشتر علاقہ آتیٹ مالو آن بد حال آ تعلیمی بست و بند آ ہم خلیس نا درشانی کریر۔

بلوچ بندغی حق آتا باسک ڈاکٹر ماہرنگ بلوچ شرہ ئی بل نا بنجائی اسمبلی آن موکلی آ ردعمل تریسہ ریاست ءِ دیمروی نا پن آ بلوچستان نا مڈی تا لٹ و پل کننگ آ ترند نغد کاری نا گواچی کرے۔

چاگڑدی احوالکاری تا سائیٹ آ اسہ ٹویٹ اسیٹ اونا پاننگ ئس کہ ریاستی بست و بند نا کمکار آک بلوچستان نا مڈی تے لٹیسہ پنجاب نا خذمت ءِ کننگ کن کاریم کیرہ۔ اونا پاننگ ئس کہ ننا پجار بحران نا گواچی ءِ۔ بیرہ پن ئنا دیمروی نا پن آ بلوچ مڈی تا ناجائز لٹ و پل نا برخلاف جہد ءِ برجاء تخنگ بھاز المی ءِ۔

زرگزرانی چاہندار و آئی ایم ایف کن کاریم کروک نیاڑی مریم ضیاء بلوچ مڈی تا انصاف تون بشخنگ آ زور تس و سوج کرے کہ گوادر ٹی یونیورسٹی انتئے جوڑ مننگ اف اگہ اودے فنڈ تننگاسس۔

نیشنل پارٹی نا کماش و پاکستان نا سینٹ نا باسک طاہر بزنجو ڈیہہ تا نیام آ تعلیمی مُری ءِ مون آ تخیسہ گوادر ئٹ یونیورسٹی نا جوڑ کننگ آ زور تس۔

مسکوہی ایم این اے و نیشنل ڈیموکریٹک موومنٹ نا راہشون  بشریٰ گوہر گوادر ئٹ یونیورسٹی جوڑ کننگ نا جاہ لاہور ئٹ یونیورسٹی جوڑ کننگ نا فیصلہ غا سوج ارفے۔

ماہر اقتصادیات عزیر یونس تینا رد عمل ئٹ پاش لوز آتیٹی پارے کہ دا قانود سازی آن گڈ ریاست ءِ دا سوج کروئی اف کہ “بلوچ بغاوت انتئے کننگ ءِ؟”

بلوچ آجوئی دوست ٹولیک بھلو وخت ئسے آن چین پاکستانی اقتصاد راہداری نا بر خلافی ءِ کرینو، و دا اقتصادی راہداری ءِ اوفک بلوچستان نا مڈی تے لٹ و پل کننگ کن ” سامراجی” ڈٹ بندی گوندرہ۔ آجوئی دوست ٹولیک میگا انفراسٹرکچر ڈٹ بندی تے لٹ و پل و بلوچستان نا سواد آتیکن نسخان تکرہ، و اسٹیبلشمنٹ آ دوبہ خلیرہ کہ اوفک ہندی آباتی تے اسہ خاص ءُ سواد ئس فراوان کننگ آن بیدس اوفتا مڈی تا لٹ و پل کننگ ءُ۔ اندا لٹ و پل ڈٹ بندی تا رد عمل ئٹ اوفک بلوچستان و داکان پیشن چینی سواد و بنداوی ڈھانچہ تا ڈٹ بندی تیا جلہو تا کمک ءِ الکنو۔

پاش وڑ ئٹ بلوچ لبریشن آرمی نا مجید بریگیڈ دا جلہو تیٹ کل آتیان مونا مسنے۔ اپریل 2022 ئٹ اسہ جند ندر جلہو اسیٹ مجید بریگیڈ جامعہ کراچی نا کنفیوشس انسٹی ٹیوٹ نا پروفیسر آتے ٹک کرے، ہرانا سوب مُسہ چینی تعلیمی چاہندار تیتون اوار چار بندغ مرگ ئنا گواچی مسر۔ دا جلہو آن چین پاکستان نا تعلقداریک بھاز زیمی مسر، ہراڑان چینی کوالخواہ تیٹ چینی شاری تے رکھ تننگ نا پاکستانی لائخی تا بابت بے باوری ودی مس ہرانا سوب چین پاکستان نا غٹ کنفیوشس انسٹی ٹیوٹ آتیان تینا تعلیمی چاہندار تے واپس خواہفے۔

آجوئی دوست بلوچ ٹولیک و سیاسی جماعت آک بھلو وخت ئسے آن پارلیمانی سیاست نا برخلاف اسہ سوگوْ ءُ ہیت اس برجاء تخانو، آجوئی دوست آک دا ہیت آ زور ایترہ کہ پارلیمان پرست سیاست دانک بلوچستان نا لٹ و پل ءِ جائز پن کریسہ بیرہ پنجاب نا مفاد آتا خذمت ءِ کیرہ۔ ہراڑے برجاء قانود سازی اوفتا دلیل آتے پک کیک۔ راجی اسمبلی ٹی بلوچستان نا قانود ساز آتا پاش ساڑی مننگ آن پد ہم لاہور ئٹ گوادر نا پن آ یونیورسٹی نا ٹہیفنگ نا موکل تروک آ بل ءِ بھاز ترندی ئٹ منظور کننگا۔ دا پیش رفت جاچ ہلوک آتا نیام ئٹ بھیم تے ودی کرینے، ہرا بلوچ پارلیمنٹیرینز آتا تینا بندغ تا مفاد آتے رکھنگ نا لائخی تیا ہور ارفنگ ءُ، انتئے کہ اوفک بلوچستان نا مڈی تے پنجاب ئٹ یونیورسٹی تا ٹہیفنگ نا پارہ غا ہڑسنگ آن توننگ کتور۔

یاتی مرے، پارلیمنٹ نا بلوچ باسک آک داسہ سخت ءُ وخت اسیٹی ءُ، انتئے کہ اوفتے بلوچستان نا بندغ تا حق و سواد آتا رکھنگ کن تینا لائخی تے پاش کروئی ءِ، و اندا بنداو آ او تدوک وخت ئٹ ہم پارلیمنٹ نا بشخ جوڑ مریسہ کرینو۔

بیدس اسہ پاش ءُ دلیل ئسے آن لاہور ئٹ گوادر نا پن آن اسہ یونیورسٹی اس ٹہفنگ بلوچ الس نا کنڈ آن ماروک آ خن تیان چپ مننگ و بیگانئی نا احساس ءِ پین ترند کرینے۔ دا ڈیہہ تا نیام ئٹ دیمروی و موقع آتیٹ چرجوئی ئٹ مُری نا اسہ پاش ءُ یات اس ہم ترفیسہ کرو، ہراڑان بلوچستان نا مخلوق ءِ دا فریم ورک ئٹ تینا جاگہ غا سوج نشان اس خننگ کن رسینگک۔

بلوچستان نا ضلع پنجگور و کیچ نا سیمی علاقہ ئٹ اسہ بمب تراک اسیٹ یونین کونسل چیئرمین تون اوار ہفت بندغ مرگ ئنا گواچی مسر۔

کوالخوا تا رِدئٹ دا بندغ آک گاڑی ٹی سوار ئسر، ہرافتے ہمو وخت ٹِک کننگا ہراتم اوفک دو شمبے نا بیگہ تون برام ئسے آ ہننگ ئسر۔

وزیر داخلہ بلوچستان ضیاء اللہ لانگو تراک ئٹ ہفت بندغ نا کہنگ نا پَک ءِ کریسہ پارے کہ کہوک آتیٹ یونین کونسل بالگتر نا چیئرمین اسحاق بالگتری و اونا ہفت ہمراہ اوار ءُ۔

اسہ ہندی لیویز اوغدیدار اس پِن ءِ ڈھکنگ نا شڑط آ پارے کہ تراک پنجگور آن کم و وَد 140 کلومیٹر مُر ضلع کیچ تون اوار پنجگور نا علاقہ بالگتر ئٹ مس۔

او پارے کہ کہوک آک اسہ سرف گاڑی اسیٹ سوار ئسر و برام ئسے نا مجلس ئٹ اوار مننگ کن ہننگ ئسر، کسر ئٹ بالگتر نا علاقہ ردے توک نا ہند آ کسر آ کڈ دیسی بمب ئٹ اوفتا گاڑی ءِ ٹِک کننگا۔ تراک آن گاڑی تیوہ بُھس مس۔

پنجگور و کیچ نا علاقہ غاتیٹ داکان مُست ہم پاکستانی لشکر و اوفتا مُخ تفی دوئی کروک کُڑدہ غاتیا کیہی جُلہوک مسونو۔

کہوک ایلو شش بندغ آتا چاہنداری ابراہیم ولد بدل، نظام عرف بدل ولد وجداد، فدا حسین ولد مومن، سرفراز ولد بندو، سفر خان ولد حیدر و محمد قاسم نا پن تیان مسونے۔

دافتیٹ محمد قاسم پنجگور نا علاقہ پروم و ایلو تیوہ غاک بالگتر نا ہندی ئسر۔

لیویز اوغدیدار نا رِدئٹ کہوک آتیٹ اوار اسحاق بالگتری نا باوہ یعقوب بالگتری و اونا 10 سنگت ءِ ہم ستمبر 2014 ئٹ اندا علاقہ ئٹ کسفنگاسس۔ دا جلہو نا ذمہ واری ءِ بلوچستان لبریشن فرنٹ ارفیسس۔

کوالخواک دا جلہو ئٹ ہم اندا تنظیم نا دو مننگ نا گمان نا درشانی کننگ ءُ۔

اسہ پین تدینی اسیٹ ضلع کیچ نا بنجاء تربت ئٹ سنگانی سر نا ہند آ کراچی نا ہندی سفیان ءِ سُم کاری کریسہ کسفنگا۔ کہوک بندغ  نا تربت ئٹ پُچ رنگ کننگ نا دکان اس ئس۔ تربت پولیس نا رِدئٹ دا ٹِک کننگ نا تدینی ئسے۔

دا جلہو نا ذمہ واری ءِ بلوچ لبریشن آرمی ارفے۔ ترجمان جیئند بلوچ بیان ئٹ پارے کہ سفیان ولد عبدالحمید گوادر ئٹ دشمن فوج کن پیسہ کن مخبری کننگ آن گڈ تربت آ بسوسس و کیہی دے آن تینے اسہ ہندی کوارٹر اسیٹ ڈھکاسس ہراڑے بی ایل اے نا سرمچار آخ پیہسہ اودے ٹِک کریر۔

جیئںد بلوچ پین پارے کہ قلات نا علاقہ منگچر ئٹ جوہان کراس نا ہند آ بی ایل اے نا سرمچار آک سُم کاری کریسہ تینے گنوک نا دروشم ئٹ ڈھکوک پاکستان فوج و ڈھکوک ایجنسی تا کارندہ ئسے ٹِک کریسہ مرگ ئنا گواچی کریر۔

مرثیہ ئس حوال ئٹ بارگ و دل جان نا

تغ ہلک تہاری ءِ ، آوانسہ خاچنگ ءِ
دے ٹک ئنا ساعتءِ دے کاٹمے کشنگءِ
توبے نا اپوکءِ دا ، تینے ٹی ہشنگنگء
استار ئسنا مرک ئٹ رژنائیءِ بشخنگءِ

سرسہب آ اُمیت آتا سنگتءِ خنا مش تیان
شیفی او نظر شاغا قسمتءِ خنا مش تیان

خوش رنگ تواراکو چُک آتا سرونز دُوٹی
پھل آ کو بہارا کو چُک آ تا سرونز دُو ٹی
ہستین ندارا کو چُک آ تا سرونز دُو ٹی
گُلشن ٹی خماراکو چُک آتا سرونز دُو ٹی

بند آک ملنگنگ او آفسرک تہو خمب ئٹ
وختاتا کلہو کاراک اینو و درو خمب ئٹ

ہیروفیء چار پاسء اِڑز آتا گروک آکو
ٹپی و منہ قصہ ، خوشیءِ سہوک آکو
درویش اِرا ڈیھ نا ، ابدال و گنوک آکو
ہم گام تہاری نا ، مجلس آ مخوک آکو

بختاک جشنگارک زند مرکءِ خنا اینو
اُستاک ہُشنگارک زند مرک ءِ خنا اینو

پند خلسہ کسر تیٹی کلّی و سِلاہ دُوٹی
تیدار ئنا خید آ تا سوغند و وفا دُو ٹی
وجدان ئنا حالتٹ ہلک اونا خدا دُو ٹی
ماخولی آ بارگ نا پھل انگا ضیاء دُوٹی

گُڈیکو تینا دے تا چنجِک نا رہا تُوسر
دم کشتہ و خواری تا نت خلکو پدا تُوسر

مُد مستءِ اینو شوخا شکراتے کدام ایتک
زمزیر ئنا لتاڑ ئٹ ، تاریخ ءِ لغام ایتک
دا مَش تے نمازی آ اُستاد و امام ایتک
سَرک آتیٹی ڈوہک تہ،پیمانہ و جام ایتک

لپ آتیٹ سینگار ءِ ، حنّام ءِ تراسانی
ذگر انگا دتر سرمہ ، خن شامءِ تراسانی

جاٹہ و امیل ئٹ تا تیراک حسابی او
جنگی آ دا میل ئٹ تا تیراک حسابی او
پھل آکو سہیل ئٹ تا تیراک حسابی او
ہر سِیم وحویل ئٹ تا تیراک حسابی او

ٹِک ،خال و نگاراکو ،سینگارے وطن اینو
پٹّنگ ءِ تینا خن تے ہینارے وطن اینو

احوال ہنا سر مس لونڈنگا مڈول آتے
بے کاٹما جون آتے،بیدود آ اصول آتے
مارشتی آ کوکارے سرغُٹنّگا شُول آتے
پلویڑ ئٹی وختاتا گواچی آ رسول آتے

پنچ کمو دا پنجاہ غان اولاخ آتا ژپارہ
بیمسرک و زبر زیرا خن چاخ آتا ژپارہ

ہم کوپہ غا یاراتا ، مہراتہ نمہ پاشءِ
مونٹ تا تیارو کُل قہراتہ نمہ پاشءِ
ژُونگارہ ءِ تیر آتا ، دہراتہ نمہ پاش ءِ
ارمان کو ڈغاری آ شئراتہ نمہ پاشءِ

ہرسار ایلو غُٹ ءِ ٹاکو تا کچاری آن
” ولّر تیا سر البو ، اُمیت و اواری آن “

جنگجاہ نا تیاریکو بارگ نا سلاہ سنجءِ
جوڑ آتیا بشخندہ ،خوشی و وفا سنجءِ
مسخت آرسینگوکا،دھرتی نا چُنا سنجءِ
خِزم آکو ہنر زادا ، چٹ اینو پدا سنجءِ

خاخر نا زراب آنبار ،تیرونک الیک بارگ
خن پُھلا گلاب آنبار،تیرونک الیک بارگ

آماچ ئتو ہمزان آ ، چلتن نا پِنا دلجان
تیر آتیٹ نوشتہء پن پن نا پنا دلجان
گواڑخ نا زباد آ تا ویدن نا پنا دلجان
نیمروچ، سہاری و خفتن نا پنا دلجان

ٹک تیر ئنا واری ءِ ، دا وار کبین اِنگا
اِستار تا اواری ءِ ، دا وار کبین انگا

تُوفک نا ٹکاّتیٹی مس جنگ بنا ساتَٹ
ژونگارہ ءِ تیر آتہ،ڈیھ رنگ خنا ساتٹ
سمکاری آ سازندہ تس انگ صفا ساتٹ
اِڑز آک صفا مسور ، ہر زنگ ہنا ساتٹ

خاخرتے دسوکا دا توفک تا نلی خیسن
نن تون مخوکا دا تُوفک تا نلی خیسن

بُن ہلسہ بدر کاہک تیجاریءَ دا مُد ئٹ
لڑزیسہ شہک تمک ، ہچ اف تنا سُد ئٹ
جُپارہ تِنا مونی نابودی آ خوش بُد ئٹ
جَگّنگو چڑہ کاٹم ننگ آتیکے دا شد ئٹ

دنز تسو اخہ دژمن آسمان خنا ڈیھ ءِ
حیران و ابکّہ ئس یزدان خنا ڈیھ ءِ

دے مونءِتنا ہرسا ، پلویڑٹ تہاری نا
ایمانو ہنر جوزہ ئس میڑٹ تہاری نا
رُژنائی نا زمزیرم بس ریڑٹ تہاری نا
روح بال نا وختاکو دا پیڑٹ تہاری نا

پشخارسہ دژمن تے یک یکا کریر ایپار
ہچ رحم کروئی اف پک ٹکا کریر ایپار

تیراک ہِنار کُٹّار ، سوھان آ ہنر اینو
تالان تہاری مس ہر پارہ کسر اینو
نن ونڈٹ تسُن خن، دیدہ جغر اینو
دا زندنا گڈیکو ئس چاس سفر اینو

تیراک ءِ اخیری آ کاٹم ٹی دڑ یفیرک
صد جوزہ ٹی و روحِ دن بال تریفیرک

دا روح تیا دلیرنگا آسمان خڑینک شولا
خضدار کرے شوگیر بولان خڑینک شولا
ارمانک پُھلنگارک ، ارمان خڑینک شولا
یزدان ئنا پاک انگا جانان خڑینک شولا

اللہ نا نگہ مس ئک ، یاراک اواری ءِ
دا جہد ئنا گُڈیکو مزل نا  کچاری ءِ

شاعر: منتظر بلوچ