بلوچستان نا ضلع قلات و مستونگ ئٹ سم کاری تا ارا جتا تدینی تیٹ ارا بندغ مرگ ئنا گواچی مسونو۔

شابیتی حوال تا ردئٹ قلات نا علاقہ منگچر جوہان کراس بازار ٹی تدوکا نن کم و ود ہشت و نیم بجہ آ نا درست سلہہ بند بندغ آک سم کاری کریسہ اسہ بندغ ئسے کسفیر۔

لیویز کارندہ آتا ردئٹ پن کروک بندغ گنوک ئس ئسک ہرا کیہی سال آتیان جوہان کراس نا بازار ٹی تھڑہ آتیا ہندی ئس۔ لیویز فورس ہند آ سر مریسہ جون ءِ ہسپتال آ درے۔

ایلو پارہ غان معلومداری ءِ کہ مستونگ نا علاقہ درینگڑھ ٹی یوسف ولد شیر محمد پنی ءُ بندغ ئسے ارا نا خڑک دُز آک توننگ نا کوشست کریر ہراڑان او موٹر سائیکل آ مروک دز آتون جنگ کرے، ہمو وخت دز آک اودا سم کاری کریر۔

سم کاری نا سوب پن کروک بندغ ٹپی مس واہم ہسپتال ٹی او ٹپی مننگ آن کسک اندن دز آک تینا موٹرسائیکل ءِ ہمو جاہ آ الیسہ کہوک آ بندغ نا موٹرسائیکل ءِ ارفیر و نرنگ ئٹ سرسہب مسر۔

تیونس نا اسہ جزیرہ ئسے آن خڑک وطن یلہ کروک آتیان پُر اسہ کشتی ئسے نا ٹُبنگ آن چار بندغ مرگ ئنا گواچی مسر و کم و ود 51 بندغ بیگواہ ءُ۔ دا سال ئٹ تیونس نا دریاب آ ٹُبیسہ مرگ ئنا گواچی مروک بے وطن آتا نہہ سد آن زیات جونک کشنگانو۔

تیونس نا اسہ عدالتی کارندہ اس درو احوال تروک ادارہ ‘رائٹرز’ءِ پارے کہ ڈیہہ ئنا جزیرہ کرکنہ غان خڑک وطن یلہ کروک آتا اسہ جاز ئسے نا ٹُبنگ آن کم آن کم چار وطن یلہ کروک مرگ ئنا گواچی و 51 بیگواہ مسر۔ کارندہ نا ردئٹ دا کشتی ٹی سوار غٹ ئنا تعلقداری افریقہ نا سب صحارا آن ئس۔

برجاء سال قطبی افریقی ڈیہہ تیونس ہمپ و لڈ کروک آتا بھلو کچ ئسے تون مون تسنے، ہراڑے دائسکان سب صحارا افریقہ غان اطالوی دریاب آتا پارہ غا ہنوک وطن یلہ کروک آتا کشتی تا ٹُبنگ کون آ درزن آ بھیم بش کروک تدینیک مسنو۔

اسہ ہفتہ اس مالو تیونس نا وزیر داخلہ کامل فقی پاریسس کہ برجاء سال جولائی نا ایسر اسکان تیونس نا دریاب آ 900 آن زیات وطن یلہ کروک ٹبیسہ مرگ ئنا گواچی مسنو۔ دا قطبی افریقی ڈیہہ وطن یلہ کروک آتا بھلو کچ ئسے تون مون تسنے، ہرا داکان تینے غریبی آن رکھنگ کن یورپ آ ہننگ نا کوشست کیرہ۔

تیونس نا نیشنل گارڈ نا ترجمان حسیم الدین جبالی نا پاننگ ئس کہ دا سال ئٹ دائسکان کیہی کارروائی تیٹ 34 ہزار آن زیات بندغ تے رکھنگانے۔

پاننگک کہ وطن یلہ کروک آتے دروک دن انگا کیہی کشتیک تیونس نا جاندمی شار اسفیکس آن رادہ مریرہ و دافتا مسخت ہر وڑ ئٹ یورپ اسکان سر مننگ مریک۔

داڑان مالو اطالوی حکومت پاریسس کہ دا سال 80,000 آن زیات اندنو باہوٹ پٹوک بندغ بحیرہ روم آن تدیسہ اونا دریاب آ سر مسنو۔ ہرافتیان بھاز آتا تعلقداری تیونس و لیبیا غان ءِ۔

نواب شاہ، ہزارا ایکسپریس نا دہ بوگی پٹڑی آن شیف تمار، 22 بندغ مرگ ئنا گواچی، 50 بندغ ٹپی مسونو ۔

کراچی آن ایبٹ آباد آ ہنوک ٹرین ٹی 1100 آن زیات مسافر ئسر ٹرین سندھ نا شار نواب شاہ سرہاری ریلوے اسٹیشن نا ہند آ شکستنا گواچی مس ۔

ریلوے کوالخواہ تا ردئٹ شکست نا حالیت ٹی منہ بوگیک پٹڑی آن شیف تمار و منَٹ ئس چپی مسر ریلوے نا عملہ و ہندی بندغ آک کمکیکاروائی تیٹ اختہ ءُ ، 15 جون تے کشیسہ ہندی اسپتال آتیٹ ایمرجنسی نافذ کننگانے ۔

اوفتا پاننگ ءِ کہ ریلیف ٹرین روہڑی و کوٹری اسٹیشن آن رادہ کننگانے ، ریلوے ٹریک ءِ زوت آن زوت یلہ کننگ کن کاریم کیر ۔

ریلوے کوالخواہ نا پاننگ ئس کہ کراچی آن دائسکان ٹرین آتا پیشتمنگ ہڑدے آنبار ءِ ، واہم ٹرین آتا اوقات کار ٹی بدلی ہترنگ نا امکانساڑی ءِ ۔

کوالخواہ تا گیشتر پاننگ ئس کہ ٹرین نا اکنامی کلاس ٹی 1 ہزار مسافر و اے سی کلاس ٹی 130 بندغ بکنگ کریسر

یک شمبے نا دے تربت نا علاقہ کلگ ٹی ڈور ئٹ غسل کریسہ  ہفت چنک سن مسڑ مرگ ئنا گواچی مسر ۔

پولیس نا ردئٹ یک شمبے آ شام نا 5 بجہ نا وخت تربت نا علاقہ کلگ ٹی 10 آن 17 سال نا 7 مسڑک ٹبیسہ دم تسر ۔

مرگ ئنا گواچی مروک آتا چاہنداری فضا بنت زبیر ، فائزہ بنت  سلیم ، ماہ تاب بنت کریم ، دردانہ بنت نعیم ، بشرہ بنت غلام ، شیرینبنت ناصر ، ماہزیب بنت اشرف نا پن آن مسونے ۔

ہندی بندغ آک تینا کمک تینٹ جون تے ڈور آن کشیسہ ہسپتال آ  دریر  ہراڑے المی کاروائی کننگ آن گڈ جون تے خاہوت نا حوالہ کننگا ۔

بلوچستان نا دریابی شار گوادر و پنجگور آن پاکستانی فورسز آک ارا بندغ ءِ دزگیر ئٹ ہلسہ بے ڈس ءُ ہند ئسے آ درینو۔

گوادر آن بے گواہ مروکا بندغ نا چاہنداری نثار ولد کریم بخش تمپ کلاھو نا ہندی وختس کہ پنجگور آن بے گواہ مروکا ورنا نا چاہنداریاشرف ولد حاجی اسماعیل نا پن ئٹ مسنے۔

نثار نا خاہوت اونا زوراکی ئٹ بے گواہی ءِ پک کرسہ دی بلوچستان پوسٹ ءِ پارینے کہ نثار ءِ فورسز آک گدرینگوکا ہفتہ 31 جولائی نا دےگوادر نا علاقہ روئل نا کیب آن دزگیر ئٹ الکنع ہرا دائسکان بے گواہ ءِ۔

خاہوت بندغی حق آتا ادارہ تان خواست کرسہ پارینے کہ نثار نا رکھوک یلہ مننگ ئٹ تینا کڑد ءِ سر ایتبو۔

ایلو پارہ غان پنجگور آن بے گواہ مروکا اشرف نا باروٹ پاننگو کہ او مشکے نا علاقہ نوکجو نا ہندی ئسے ہرادے فورسز آک مسہ اگستآ پنجگور بازار آ ہننگ نا وخت آ دزگیر ئٹ ہلکنو۔

یاتی مرے کہ اشرف ءِ داکان مست فورسز آک 2020 ئٹ ام دزگیر کریسر اودے ہمو وخت اسہ سال ئس بے گواہ تخنگ آن گڈ یلہکنگاسک وختس کہ داسا اسہ وار پین اودے دزگیر کننگانے۔

اسلام آباد نا ہندی عدالت آن توشہ خانہ کیس نا فیصلہ بننگ آن گڈ پولیس زمان پارک آن مسکوہی سر وزیر عمران خان ءِ دزگیر کرینے۔ پاکستان تحریک انصاف عمران خان نا دزگیری ءِ پک کرے۔

اینو اسلام آباد نا ہندی عدالت توشہ خانہ کیس نا فیصلہ ءِ بنفسہ مسکوہی سر وزیر عمران خان ءِ کرپٹ پریکٹسز نا ڈوہدار پن کرینے۔

سیشن کورٹ نا ایڈیشنل جج ہمایوں دلاور چیئرمین پی ٹی آئی ءِ مُسہ سال کیز و اسہ لکھ ڈنڈ ئنا سزا بنفینے۔ عدالت مسکوہی سر وزیر عمران خان ءِ پنچ سال اسکان نااہل کرے و آئی جی اسلام آباد ءِ عمران خان ءِ دمدستی دزگیر کننگ نا پرمان تس۔

پی ٹی آئی راہشون شاہ محمود قریشی ہندی ٹی وی تون ہیت کریسہ پارے کہ داسہ عدالت نا فیصلہ بسنے و دا وخت ئٹ پولیس زمان پارک سر مسنے۔ او پارے کہ فیصلہ نا بابت اوفک بڑزکو عدلیہ آن خواست کرور۔

او پارے کہ عمران خان ءِ دزگیر کننگانے۔

بلوچ اسٹوڈنٹس ایکشن کمیٹی نا بنجائی ترجمان تینا شینک کروک بیان ئٹ پارینے کہ جامعہ کراچی مسن تا ہاسٹل ئٹ بلوچ خوانندہ تے بھیم نا گواچی کننگ، ہاسٹل ئٹ انفرا اسٹرکچر نا بد حالی و یونیورسٹی بست و بند نا آمرانہ رویہ بھیم بش کروک ءِ ہرانا نن پبی مذمت ءِ کینہ، بست و بند نا پارہ غان خوانندہ تا ویل آتے سوبری ئٹ ایسر کننگ نا جاہ اوفتے جتاء جتاء وسیلہ تیٹ خُلیفنگ ہڑدے نا وڑ جوڑ مسنے۔

او پارینے کہ جامعہ کراچی مسن تا ہاسٹل ویل آتا بنجاہ ئس جوڑ مسنے انفرا اسٹرکچر نا بد حالی، گیس و بجلی نا تفننگ واش روم و کوٹی تا چت آتا تمنگ دا تیوہ ویل آتے سوبری ئٹ ایسر کننگ نا جاہ بست و بند خوانندہ تے جتاء جتاء چم تیٹ بھیم نا گواچی کریسہ چرجوئی ئٹ اوفتے چپ کرفنگ نا کوشست کننگ ءِ۔

او شینک کروک بیان ئٹ پارے کہ درے ننکان جامعہ کراچی نا مسن تا ہاسٹل ئٹ بیدس موکل آن بلوچ خوانندہ تا کوٹی تیٹی وارڈن پترینگسہ اوفتیا بھلو دوبہ خلک و کوٹی تا تلاشی ءِ الیسہ خوانندہ تیا بے زیب ءُ لوز کاریم ئٹ ایس ہرا ہچ وڑ قابل قبول افس، داڑان بیدس کیہی توہ تیان ہاسٹل نا انفرا اسٹرکچر، بنداوئی آسراتی دنکہ بجلی، گیس و واش روم تا نہ مننگ و بست و بند ویل آتا بابت ہاسٹل پروسٹ آن خواست کننگ آن ابید ویل آتے سوبری ئٹ ایسر کننگ نا جاہ خوانندہ تے جتاء جتاء وسیلہ تیٹ بھیم نا گواچی کننگ ءِ تانکہ خوانندہ غاک تینا جائز خواست آتیان پدی مریر۔

او تینا بیان نا ایسر ئٹ پارے کہ بحثیت خوانندہ گَل نن یونیورسٹی نا خوانندہ تیتون اوار ہم کوپہ سلوک ان، خوانندہ تے بھیم نا گواچی کننگ و بست و بند نا آمرانہ رویہ تا مذمت ءِ کینہ، نن حکومت سندھ و یونیورسٹی بست و بند آن خواست کینہ کہ زوت آن زوت خوانندہ تا جائز خواست آتیا عمل کیر، نئے گڑا نن بست و بند نا آمرانہ رویہ تا بر خلاف آئینی و جمہوری برانز نا حق تخنہ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ ننا سرمچار آک نوشکی و کولواہ ٹی جتاء جتاء کاروائی تیٹی قوضہ گیر پاکستانی لشکر و جاسوس کیمرہ تے ٹک کریر، ہراتا سوب ارا دژمن کارندہ ٹپی و جاسوس کیمرہ بھس مس۔

ترجمان پارینے کہ بی ایل اے نا سرمچار آک استو نوشکی ٹی زرین جنگل نا ہند آ قوضہ گیر پاکستانی لشکر نا پوسٹ آ جلہو کریر، سرمچار آک گرنیڈ لانچر ئٹ کیہی گولہ تے خلکر ہرانا سوب کم و ود ارا کارندہ ٹپی مسر۔

ترجمان مستی پارے کہ ایلو پارہ غا بی ایل اے نا سرمچار آک 3 اگست 2023 نا نن کیچ نا ہند کولواہ، رودکان ئٹ گٹ ءِ کور نا ہند آ قوضہ گیر پاکستانی لشکر نا کیمپ نا خڑک آ ٹہیفنگوک جاسوس کیمرہ و اوڑتون گنڈوک بیٹری و سولر پلیٹ تے بھس کریر۔

گڈ سر ئٹ او پارے کہ بلوچ لبریشن آرمی دا ہڑتوما کاروائی تا ذمہ واری ءِ ارفک۔ آجوہ وطن نا دوئی کننگ اسکان ننا جہد برجاء مرو۔

خنس نی کنا دا عشق نا کمال ئے
وطن کن ہرس نی کنا دا دھمال ئے

جتائی ہشا نا پرک نا زبو پل
کنا نی شعر تٹی بنس بس شال ئے

اسلمی فکر نی بولانی چیدہ قل
بلوچستان نا فکر تٹی جمال ئے

گواڑخ آک دشتنا ہرتسر سائے
شعر ٹی وطن نا بنس دا خیال ئے

مفک بیاں گنوکا سارنگ کنتو ہچ
شعور عشقنا او شارُل پل مثال ئے

سارنگ بلوچ