بلوچستان نا صنعتی شار حب چوکی نا علاقہ سرجانی ٹاؤن عبداللہ غازی گوٹھ ئٹی جھر آتیان برمتہ مروک ورنا نا جون خننگا۔

پولیس نا رد ئٹ خون مروک ورنا ءِ برمتہ کرسا نادرست ءُ ہند ئسے آ دننگاسس، ہراڑے بےدادی کرسا پدان سم خلسا اودے خون کننگانے و ڈوہدار آک جون ءِ خسیسہ نرانو۔

جون ئنا رہی آن شناختی کارڈ آن اونا چاہنداری 25 سالی محمد نسیم ولد در محمد نا پنا مسنے۔ خون مروک بلوچستان نا علاقہ حب چوکی آن اسہ کلو میٹر اس مونی اشوک پیٹرول پمپ نا خڑک ئنا رہینگوک اس ئس۔

ورنا نا الہ مڷ الطاف حسین پرئویٹ ٹی وی چینل ئسے آ تران کرسا پارے کہ محمد نسیم محنت کروک و اِرا چُنا نا باوہ ئس۔ او اِرا تُو مُست بلوچستان نا علاقہ ضلع جعفر آباد ڈیرہ اللہ یار نا ہندی اسہ زالبول ئسے تون کورٹ میرج کریسس۔

او پارے کہ محمد نسیم یک اگست نا نن آن بیگواہ ئس۔ شام 4 بجہ آ علاقہ نا اسہ ہوٹل ئسے آ تولوک مسس، اوکان گڈ اودے 4 آن 5 بندغ اسہ گاڑی اسیٹی برمتہ کرسا دریسر۔ یک اگست آ نن ئنا 10 بجہ غا محمد نسیم نا باوہ در محمد اوڑتون حوال کننگ ئس، اوکان گڈ اونا فون ہم بند مس۔

او پارے کہ ای وختس کہ محمد نسیم نا اُراغا ہناٹ تو سما تما کہ در محمد و محمد نسیم نا تومکا زائیفہ و چنا تے منَہ بندغ اُراغان برمتہ کرینو۔

او پارے کہ نسیم نا خون ئنا حوال ءِ ہم ننے اونا زائیفہ نا باوہ ہرادے او نرفیسس، فون کرسا تسس کہ نسیم نا جون جھر آتیٹ تموک ءِ ہنبو ہفبو تہ، ہراکان گڈ نن بسُن جون ءِ درین۔

او ودیک پارے کہ نسیم ہرا نیاڑی تون برام کریسس اونا باوہ، ایلم و الہ فون کرسا اودے کسفنگ نا تڑی تسُرہ۔

او بڑزیکو کوالخواہ تیان خواست کرسا پارے کہ نسیم نا تومکا زائیفہ، تومکا چنا و اونا باوہ در محمد رکھوک آجو کننگر۔ دن مف کہ اوفتے ہم خون کننگے۔

ہندی پولیس تدینی نا بابت ئٹ پٹ و پول کننگ ءِ کہ نسیم ءِ ہراڑے خون کننگاسس تاکہ ہمو علاقہ ٹی کیس درج مرے و گیشتر گمان ارے کہ خون ئنا مقدمہ بلوچستان نا حب تھانہ ٹی درج کننگو۔

ایران ئٹ تدوکا 48 گھنٹہ نا نیام ئٹ نشہ نا دوبہ ٹی 11 بلوچ ءِ پاہو تننگانے۔

میڈیا رپورٹس آتا ردئٹ ناروے ئٹ ٹہیفوک ایران ہیومن رائٹس (آئی ایچ آر) پارینے کہ کوالخواک نہہ ایرانی بلوچ و ہمسایہ ڈیہہ اوغانستان آن تعلقداری تخوک اِرا بلوچ شاری تے پاہو تسر۔

دا گروپ اسہ رپورٹ اسیٹ پارے کہ جولائی ٹی تیوہ ایران ئٹ 61 بندغ ءِ پاہو تننگا اندن ایران ئٹ جتا مقدمہ تیٹ دزگیر مروک بندغ تا سزائے مرگ ئٹ ودکی کننگانے ہرانا سوب دا سال ملک ئٹ 423 بندغ ءِ پاہو تننگانے۔

30 جولائی آن یکم اگست اسکان صوبہ سیستان، بلوچستان نا بنجاہی شار زاہدان نا بنجاہی جیل ئٹ نشہ نا دوبہ تیٹ ہشت بلوچ ءِ پاہو تننگانے۔ اسہ پین بلوچ بندغ ئسے اندا وڑ نا دوبہ تیٹ 31 جولائی آ دے ٹکی صوبہ خراسان نا شار بیرجند نا اسہ جیل اسیٹ پاہو تننگا۔

گیشتر پاننگانے کہ 30 سالی محمد ارباب و 32 سالی اسد اللہ امینی ءِ 30 و 31 جولائی آ سیستان بلوچستان نا زابل جیل ئٹ ڈھکوک ڈول ئٹ پاہو تننگا۔

بندغی حق آتا گل آک دوبہ خلیرہ کہ ایرانی کوالخواک 22 سالی مہسا امینی نا مرگ آن گڈ تدوکا سال ستمبر ئٹ بناء مروک برانزی تحریک نا ردئٹ تیوہ غا آباتی ٹی بھیم و خُلیس تالان کننگ کن سزائے مرگ ءِ اسہ ازباب ئسے نا ڈول کاریم ئٹ ہتنگ ءُ۔

ایرانی نژاد کرد زالبول ءِ ایران نا زالبول آتیکن سخت ٹہیفوک پوشاک نا قانود آتا برخلافی کننگ نا دوبہ ٹی دزگیر کننگاسس و مُسہ دے آن گڈ او دزگیر ئٹ کسکوسس۔

خاران شار آن خوانندہ کاشف ایجباڑی ولد قاری عنایت پاکستانی ڈھکوک ادارہ تا دو آن زوراکی ئٹ بے گواہ۔

بلوچستان نا شار خاران آن پاکستانی ڈھکوک ادارہ غاک اسہ ورنا ئسے زوراکی ئٹ دزگیر کننگ آن گڈ بے ڈس ءُ ہند ئسے آ دریر۔ بے گواہ مروکا ورنا نا چاہنداری خاران نوروز آباد روڈ نا ہندی خوانندہ کاشف ایجباڑی ولد قاری عنایت اللہ نا پن ئٹ مسونے۔

کاشف ایجباڑی خاران نا پنی آ زرکار وڈیرہ عبداللہ ایجباڑی نا نواسہ ءِ۔

ہندی حوال کار تا رد ئٹ تدینی اولی اگست آ خُفتن نا وخت آ مونا بس ہراتم پاکستانی ڈھکوک ادارہ تا کارندہ غاک کیہی گاڑی تیٹی ہمو ورنا نا پد رند ءِ کریر و حافظ جمال ناصر مدرسہ نا خڑک آ اودے برمتہ کریسہ بے گواہ کریر۔

ضلع چاغی نا علاقہ دالبندین آن خڑک کسر شکست ئٹ پرتگالی سیاح اس مرگ ئنا گواچی مس۔

بلوچستان نا ضلع چاغی ٹی دالبندین آن خڑک بھیم بش کروک تدینی ٹی اسہ پرتگالی سیاح اس مرگ ئنا گواچی مس۔ سرکاری احوالکار آک پک کرینو کہ بلوچستان نا بنجاہی شار کوئٹہ ءِ تفتان تون گنڈوک آر سی ٹی کسر (N-40) آ ایرانی ساختہ زمیاد گاڑی نا دک ئٹ بریسہ مونو میگوئل ولاؤ کاسٹانہیرا پنی ءُ پرتگالی سیاح اس مرگ ئنا گواچی مس۔

حوال تا ردئٹ 28 سالی کہوک آ سیاح تون پاسپورٹ نمبر CD233459 ئس و او سیل و سواتی ویزہ غا ئس۔ تفتان آن کوئٹہ نا کسر ئٹ سفر کننگ وخت آ اوڑتون اِرا جرمن شاری ٹونی پینکراز لنڈر و نکواس لینگ ہم تد ئسر، ہرا موٹر سائیکل آ سفر کننگ ئسر اندن لیویز فورس ہم اوفتا رکھنگ کن ساڑی ئس۔ شکست ئٹ گاڑی ڈرائیور و کلینڈر ہم ٹپی مسر۔

تدینی آن گڈ کوالخواک مونو میگوئل ولاؤ کاسٹانہیرا ءِ دمدستی دالبندین نا پرنس فہد ہسپتال آ دریر واہم جانجوڑی کوشست آتیان بیدس ہسپتال نا ڈاکٹر آک اودے کہوک گوندار اندن ٹپی ڈرائیور و کلینڈر ءِ جانجوڑی کمک تننگا و اوکان گڈ لیویز فورس اوفتے سر و سوج کن دزگیر کرے۔

سرکاری احوالکار آک یکم و 2 اگست 2023 آ تفتان ئٹ پی آئی بی، ایف آئی اے گیٹ نا وسیلہ ئٹ سیاح تا پاکستان ئٹ بننگ ءِ پک کرینو۔ کوالخواک تدینی نا پٹ و پول کننگ ءُ۔

کوئٹہ ئٹ سم کاری نا اسہ تدینی اسیٹ مسکوہی سر وزیر بلوچستان نواب اسلم رئیسانی نا ایلم نا مار نوابزادہ ہارون رئیسانی و اونا سکیورٹی کارندہ تون اوار مُسہ بندغ مرگ ئنا گواچی و مُسٹ ٹپی مسر۔

ڈائریکٹر جنرل فوڈ اتھارٹی بلوچستان نعیم بازئی اردو نیوز ءِ پارے کہ نوابزادہ رئیسانی بلوچستان فوڈ اتھارٹی ٹی ڈپٹی ڈائریکٹر ئس۔ اودے سرکاری ڈیوٹی نا وخت کسفنگا۔

ایس پی سریاب ضیاء مندوخیل نا ردئٹ تدینی استو ننکان کوئٹہ نا علاقہ سریاب روڈ آ اسہ بس ٹرمینل ئسے آن خڑک مونا بس ہراڑے نوابزادہ ہارون رئیسانی فوڈ اتھارٹی افسر نا دروشم ئٹ چھاپہ خلنگ کن بسوسس۔ او جوس و کُنوکو گڑا بہا کروک دکان تا جاچ ءِ ہلنگ ئس۔

او پارے کہ ہارون رئیسانی بس ٹرمینل آن خڑک اسہ دکاندار ئسے ڈنڈ کرے گڑا ہموڑے ساڑی بس ٹرمینل نا خواجہ نا مار میر برامداد لہڑی تون اوفتا بد رد مس۔

ڈی جی فوڈ اتھارٹی نعیم بازئی نا ردئٹ نوابزادہ ہارون رئیسانی ءِ کار سرکار ئٹ مداخلت کننگ وخت آ توننگا ہرانا سوب بد رد مس۔ ہارون رئیسانی تون اوار اسہ سرکاری رکھوک کارندہ اس ہم ئس۔ ہڑتوم آتے سرکاری ڈیوٹی نا وخت ٹک کننگا۔

بلوچستان پولیس ترجمان نا ردئٹ بد رد کننگ وخت آ برامداد لہڑی ہارون رئیسانی ءِ چپانٹ اس خلک ہرانا سوب اونا سلہہ بند بندغ برامداد ءِ سم اس خلک۔ اوکان گڈ برامداد نا سیال آک ڈپٹی ڈائریکٹر فوڈ و اونا رکھوک لیویز کارندہ ءِ کسفیر۔

تدینی نا پٹ و پول ءِ کروک اسہ پولیس کارندہ اس پِن پاش کپننگ نا شڑط آ پارے کہ خن خنوک شاہد آک پولیس ءِ پارینو کہ دکان آن انڈین ساختہ پان پراگ رسینگاسس ہرانا سوب ہارون رئیسانی اوفتے 15 سد روپئی ڈنڈ کرے۔

او پارے کہ بس ٹرمینل نا خواجہ غاک اثر دار بندغ ءُ ہرافک کرایہ غا تروک تینا دکان تیٹ فوڈ اتھارٹی نا کارروائی آ بے وڑنگ نا درشانی کریر۔

ایس پی سریاب نا ردئٹ بد رد کننگ آن ہیت جنگ اسکان سر مس۔ دا وخت ئٹ نوابزادہ ہارون رئیسانی نا سرکاری رکھوک لیویز کارندہ و بس ٹرمینل نا خواجہ و اوفتا محافظ آتا نیام ئٹ سم کاری مس ہرانا سوب مُسہ بندغ نا مرک مس۔ کہوک آتیٹ نوابزادہ ہارون رئیسانی، اونا رکھوک کارندہ لعل محمد سومرو اندن ایلو ٹولی نا میر برامداد لہڑی اوار ءِ۔

برامداد لہڑی بس ٹرمینل نا خواجہ پِنی آ ٹرانسپورٹر قبائلی راہشون میر فیروز لہڑی نا نواسہ و بلوچستان نا تیوہ غاتیان بھلا ٹرانسپورٹ کمپنی سدابہار نا خواجہ دولت لہڑی نا مار ئس۔

نوابزادہ ہارون رئیسانی مسکوہی سر وزیر بلوچستان نواب اسلم رئیسانی و مسکوہی سینیٹر نوابزادہ لشکری رئیسانی نا ایلم نا مار اندن نوابزادہ اسد اللہ نا بھلا مار ئس۔ او منہ وخت مُست بلوچستان ہاکی ایسوسی ایشن نا صدر ہم گچین مسوسس۔

ایس پی سریاب نا ردئٹ دا اسہ قبائلی دژمنی یا ڈغار نا جیڑہ اس اف بلکن ہند آ بد رد کننگ نا سوب آن مروک جنگ ئنا نتیجہ ءِ۔ او پارے کہ دا دائسکان سماء اف کہ سم کاری اول ہرا کنڈ آن مس۔ سی سی ٹی وی فوٹیجز دوئی کریسہ تدینی نا پٹ و پول بناء کننگانے۔

پولیس نا ردئٹ سم کاری نا سوب مُسہ کسری ہم ٹپی مسر ہرافتے ہسپتال آ دننگانے۔

تدینی آن گڈ علاقہ نا حالیت آک خراب خننگرہ۔ حوال رسینگنگ تون نوابزادہ لشکری رئیسانی ہم ہسپتال آ سر مس۔ پولیس نا پاننگ ءِ کہ اِرا اثر دار خاہوت آتا نیام ئٹ جنگ آن گڈ قبائلی جنگ ئنا خُلیس نا سوب ہمو جاگہ و ہسپتال ئٹ پولیس نا بھلو کچ اس سلفنگانے۔

بلوچستان ئٹی بشام نا پِر تا سوب آن مروکا بیرانی تا لڑ برجاء ءِ، بلوچستان ئٹی پِر تا سوب آن مروکا تدینی تیٹ بیران مروکا بندغ تا کچ14 مس۔

بلوچستان ئٹی بشام نا پِر تیان مروکا نسخان آتا باروئٹ محکمہ پی ڈی ایم اے نا رپورٹ نا رد ئٹ لورالائی ٹی اِرا چُنا نا نوکاپ ئٹ ٹُبنگآن پد بلوچستان ئٹی بشام نا پِر تیان بیرانی تا کچ 14 مس۔

پی ڈی ایم اے نا رپورٹ نا رد ئٹ لورالائی ٹی 3، ژوب و نصیر آباد ئٹی 2 بندغ کسکنو، آواران، قلعہ سیف اللہ، خضدار، ڈیرہ بگٹی،پشین، کیچ و جھل مگسی ٹی پِر تا سوب آن اسہ اسہ بندغ بیران مسنو۔

رپورٹ ئٹی پاننگا کہ پِر تیان بلوچستان ئٹی 332 اُرا بھس و 334 تیوہ بھس مسنو۔ داڑان بیدس 8 کلو میٹر روڈ پنانو و 320 سولرپلیٹ ءِ نسخان رسینگانے۔

وخت کشاسہ گر دلاسا نا

مچٹ اوغانہ یار ماسا نا

نناسد سالی آ وفا ام کسک

ایکا ڈکال بس تاسا نا

یات ئٹی نئے کہ مندر اٹ نےآن

نئے کہ گیرام کیوہ خاصا نا

منظر اٹ یار نا درک افک

سوچ ئٹی دید ئے وار پاسا نا

کپسہ پاش خنک نا انتئے

خنک تر مسو خن ملاسانا

دسک ئسے کنتو نا تروکو یار

رغ ئسے کس پئے کناساہ نا

دا امے مست ئنا کنا غم کو

دا کنا شاعری کو داسانا

کوئٹہ پریس کلب نا مون آ وائس فار مسنگ پرسنز نا زوراکی ئٹ بے گواہی تا برخلاف برانزی کیمپ 5124 می دے برجاء مس۔

درو بی ایس او پجار نا سینئر وائس چیرمین بابل ملک بلوچ، یونٹ سیکرٹری اللہ گل بلوچ و فہیم بلوچ خاہوت آتون اواری نا درشانیکریر۔

دا وخت آ تنظیم نا وائس چیرمین ماما قدیر بلوچ پارے کہ ایہن تو ہڑدے مقبوضہ بلوچستان ٹی تولوک برانز آتا لڑ برجاء ءِ۔

او پارے کہ کوزہ مروکا راج کن جارات آسودئی بیرہ چُنا تا یلہ مننگ نا دے ٹک مننگ تون اوار بریک ولے دلیر آ بلوچ لمہ ہیڑ تا اینو تیناچناء تا شہادت و زوراکی نا بیگواہی تیان دیخس ام اُست ہسونی افس۔

او پارے کہ روچہ نا توہ مرے یا ائید مرے ننا لمہ غاک کسر تیا برانز کرسہ خنگور و بے گواہ بندغ تا برانزی کیمپ ئٹ ساڑی جہان ءِپاکستان نا ظلم و زوراکی آن سرپد کننگ ئٹ کُل آن مُستی ءُ۔

او پارے کہ دا شعور نا جوزہ بلوچ راج ئٹ قربانی تننگ نا عمل ءِ شابیت تسنے و اندا ہمت اینو ریاست کن بھس کاری نا سوب مننگ ءِ۔

ماما قدیر بلوچ پارے کہ 2001 آن برجاء پر امن جہد ئٹ بلوچ راج کن ہر توہ ہر دے ہر ساعت دنکہ دتر چُر بدحالیت مسنے۔

بلوچستان نا بنجائی شار کوئٹہ ٹی تدوکا بیست و چار ساعت ئٹی ٹارگٹ کلنگ نا تدینی تیٹ مُسہ پولیس کارندہ کسکنو۔

اسہ تدینی اینو سہب ئنا اسپنی روڑ آ مس ہراڑے سلہہ بند بندغ آک سم کاری کرسا اسہ پولیس کارندہ سے کسفیر ہرا نا چاہنداریمحمد جواد نا پن آ مسنے۔

خیال مرے کہ درو پولیو مہم نا وخت آ نادرست آ سلہہ بند بندغ آک سم کاری کرسا اِرا پولیس کارندہ ءِ کسفیر۔

کہکوک آ ہر مُسہ پولیس اہلکارندہ نا تعلقداری ہزارہ برادری آن ءِ۔

واہم پولیس اہلکارندہ آتا خون ئنا سوب داسکان سما تمتنے، نئے کہ جلہو تا ذمہ واری ءِ کس ہرفینے۔

سفر زند و شاعری

نوشت: نزار قبانی | مَٹ: عتیق آسکوہ بلوچ

سینزدہمیکو بشخ

کنا کِلیت آک

کنا شاعری نا کِلیت آک جادوئی کِلیت افس؛ دا کلیت آک نہ کنا کُفت آتیتون تفوک ءُ نہ بالشست نا شیف آن تخوک۔ کنا تہہ ئنا جہانک ملوک ریگستان ءُ، سیر سوات کن اُلسی باغ، ہراڑے نن و دے ہر وخت ہرکس بننگ کیک۔ کنا شاعری نا کلیت آک تینٹ کنا شئر آک ءُ۔ بیرہ کنا نظم آتیان ہمو دروشم ٹہینگک ہرا کنتون ہم دروشم ءِ۔ کنا شینک کروک کتاب آک کنا گواچنی پروانہِ سفر ءُ۔

کنا شاعری نا مُسہ کلیت ءُ؛ چُنکی، انقلاب و جنون۔ چُنکی ئٹ آن کنا مطلب ہمو تیوہ غاک ہراٹی معصومیت، شابیتی و تینٹ کاریم مرے۔ چُنا و شاعر اِرا اندنو جادوگر ءُ ہرا کائنات ءِ بے وزن وانگڑی گیند ئٹ بدل کننگ آ قدرت تخیرہ۔ انقلاب آن کنا مطلب ربیدگی، نفسیاتی و دیہاڑی دود آتیٹ لڑزہ، تَل و پرغنگ ودی کننگ ءِ، ہمو دود آک ہرا ہڑدے ئی گڑا جوڑ مسونو یا ہرافک قانود نا دروشم دوئی کرینو۔ جنون آن مراد عقل ئنا متکنا گھڑیال ءِ ہزبہ ہزبہ کننگ و دا پرمانِ قراقوشیہ آ ترند شرہ کنگ ہرا ننا ودی مننگ آن مُست ننے آ تخنگرہ۔

شاعر اکن تیوہ غاتیان زیات بھیم بش کروک ہیت ایمنی و جارات نا گوند آن لچنگ و ایب کیب نا گڑا تیان اُست جم مریسہ تولنگ ءِ۔ ہرا شاعر جہان تون مونتس نا لڑزہ بش کننگ تون واخب اف او اُرائی ساہدار اسیٹ بدل مریک، اندنو ساہدار اس ہرانا مزاحمتی و مونتس نا ازبہ غاک کشنگانو۔ کنے چنکی آن دیہاڑ و کسہ غاتیون مونتس ئٹ خوشی مریک۔

ای ہچبر دا پارہ غا پامدار متئوٹ کہ ذکر ئنا کُڑدہ ئٹ اسہ درویش اس جوڑ مریو یا گڑا ہمو چُنا ہرا کلیسا نا کڑدہ ئٹ سلوک باگل پاننگے۔ ہزار آ دروشم و توار تا نیامٹ کنے ساندہ تینا دروشم و تینا توار نا پٹ و پول مسونے۔ ایلوفتا ہور و اوفتا نشان تے وام ہلنگ ءِ ای ہچبر تینا کاریم کتوٹ۔ ای ساندہ اندا خواہسوٹ کہ  تینا ہور تیٹ نوشت کیو و کاغذ آ تینا گچین آ ہور تا نشان تے ہلیو۔ ای اسہ ہم شاعر ئسے نا کالا کاغذ کاپی اس مننگ آن ساندہ نمن مسونٹ۔ جہان اٹ اسہ متنبی، اسہ ورڈز ورتھ، اسہ والیری و اسہ پابلو نرودا ئسے۔ بازار ئٹ دا تخلیق کار آتا پِن آن بروک ارٹمیکو نسخہ، گواچن اٹ دروغ نسخہ ئسے۔

1940ء ئٹ اندا ہیت کنا شاعری نا فکری اساس ئس۔ کنا باوری  ئس کہ ننا ہشتاد در سد نظم آک مُرغنی، شابیتی و بیرفنگ ئٹ اسہ ایلو تون ہم رنگ ءُ۔ ہشتاد در سد شاعر فوٹو کاپی نقل ءُ، اندنو نقل ہرا اصل نا مون ئٹ بے کار کاغذ ءُ۔ اندا پامداری تون ای مدرسہ ثانویہ نا سنگت آتیتون اوار ہو وخت ئنا بھلا شامی شاعر آتا نظم آتے بنگوٹہ۔ اوفک تینا نظم آتے شامی جامعہ نا منبر آ مونا ایسرہ، یا گڑا راجی دے و یاتگاری وخت آ قبرستان، الباب الصغیر، و الدحداح نا دیوال تیا نوشت دا نظم آک ننے خواننگ کن رسینگارہ۔ ای ماراٹہ کہ عربی شاعری اسہ ہند ئسے بریسہ سلیسنے۔

ننا بیستمیکو صدی نا شاعری اولیکو صدی یا ارٹمیکو یا دہمیکو صدی نا شاعری آن جتا اف۔ بلاغت نا سانچہ غاک اسہ دو آن ایلو دو، و اسہ خواجہ  آن ایلو خواجہ ءِ سرمریسہ کرینو۔ ہراڑاسکان دا سانچہ غاتا ساڑی حالیت نا معاملہ ءِ، او اسہ ڈول ءِ۔ عربی نظم بیستمیکو صدی اسکان اندن مس، اسہ وخت آ حجازی لباس بینوک و قاہرہ، بیروت، بغداد و دمشق نا ہوٹل آتیٹ وسکی نا جام آن چس ہلیسہ۔ اونا لباس و کڑدار ئٹ بھیم بش کروک شرہ ساڑی مس، داڑاسکان کہ امیر الشعرا شوقی، متنبی نا بوٹ بینوک، شانزے لیزے پیرس ئٹ پیری کریکہ، غرناطہ ئٹ بے وطنی نا وختا ہسپانوی شراب کنگکہ، و متکنا مصر ئنا یات ئٹ بُحتُری نا خڑینک وہیفیکہ۔ نن شار آ ہنپ کرین ولے صحرائی میخ آک ننا تہہ کڑمبی ئٹ خلوک مسر۔ نن پیہن پُھلی، بنفشہ فرنگی و گارڈینیا نا پُھل آتیتون واخب مسون ولے مشک بید و عرار نا زباد ننا پِف تیٹ ساڑی مس۔ نن گچین آ محل و سائس ماڑی تیٹ ہندی مسون ولے نن تینتون تینا خاچوک ہند ئٹ ہُچ و خزم ارفین بسون۔

عربی نظم تینا ذات ئٹ تُرند شیزوفرینیا نا گواچی مروک مس۔ ہراتم ای نشاۃِ ثانیہ نا شاعر آتے خواناٹہ گڑا ای ماراٹہ کہ ای اسہ دروشم بدل کروک مجلس اسیٹی اُٹ، و ہر شاعر جاغہ ئسے آن ہلوک دروشم اس تینے آ شاغانے ہرا اودے دوست ءِ۔ اسٹ ابوفراس نا زمغ ءِ وام ہلوک ءِ، ایلو عنترہ نا ہُلی، و مسٹمیکو ابنِ رومی نا عبا۔ دروشم بدل کروک مجلس نا نیامٹ، ای گوڑینگوک مسوٹہ، حالانکہ ای اسہ پبی ءُ ورنا اس ئسوٹ، کہ دا مخلوق تینا گواچنی دروشم نا درشانی و تینا اصل بولی ئٹ کلام انتکن کپسہ؟ انتکن دا بندغاک ایلوفتا بولی و ایلوفتا زمانہ ءِ وام ہلوک ءُ؟ دا جشنِ کارنیوال ئٹ، ہراٹی اسٹ نا خف ایلو نا بامس آن و اسٹ نا کاٹم ایلو نا کوپہ ءِ درست کننگ مننگ کتوکہ، ای ورنائی نا جوزہ ئٹ فیصلہ کریٹ کہ ای دا جشنِ طرب نا قانود آتے بدل کیوہ و دانا بست و بند ءِ بے بالوٹ۔ بھاز سادئی تون، ای دا ہال ئٹ تینا فطری دروشم و ہڑدے ئی پُچ آتے بینوک پیہاٹ۔ کنا دوٹی کنا اولیکو شاعری نا کتاب قالت لی سمراء )سراء کنتون پارے( ئس۔ ہرا پارہ غا توار بش مس۔ جشنِ طرب نا خنک کنا کشنگ نا خواست کریر۔ دافتیان اسٹ پارے، پیشن نا پیہوک ئسے، ایلو پارے، بیدس ٹکٹ پیہانے، مسٹمیکو پارے، ولدِ حرام ئسے، دا ننا خاہوٹی لڑ ئٹ کس ئتون ہم ہم رنگ اَلور۔ گواچنی ای دا لڑ آن تعلقدار کس اسیتون ہم ہم دروشمی تختوٹہ، و نہ ای اوفتو ہم دروشم مننگ خواہسوٹہ۔

کنے دا ہیت اسُل دوست بفک کہ اسہ ہم شاعر اسیتون کنا حیثیت سیامی جاڑی تا مرے۔ ادب ئٹ سیامی جاڑی تا بخت ئٹ مالو آن مرک نوشتہ کننگانے۔ دا بندغ آک کنے بد رد کریر انتیکہ ای الشفری تون ہم دروشم اَلوٹ۔، و دا سوب ہم کہ کنا کلام و پُچ آک عصری ئسر۔ ہراتم اوفتا پارہ غا دو مریفیٹ گڑا اوفک کنتون دو ہلتور انتیکہ کنا پژہ غاک گروشکی و کنا خنک خرّن ئسر۔

چِل ئنا دہ یک ئٹ دمشق نا دروشم بدل آ مجلس ئٹ فساد بش کننگ اسہ آسان ءُ کاریم اس اَلو انتیکہ اوفتا دا پروگرام کم و وَد ہزار سال آن تیار بریسہ بننگ ئس۔ ہزار سال آن دا پروگرام نا مہمانک اندا بندغاک ئسر۔ اوفتا شراب ہمو ئس و اوفتا چھاپ ئنا ڈول ہمو، اسپر ہمو و زمغ ہم ہمو۔ دا پروگرام نا مہماندار و مہمانک اوار مریسہ اسہ کمپنی اس ٹہیفیرہ ہرا دا شئری مجلس نا بست و بند ءِ کریکہ۔ دا مخلوق اونا مجلسِ ادارت ئٹ اسہ ہم پوسکنو باسک ئسے اوار کتورہ۔ دا شئر سرمایہ داری نا بھیم نا شیف ننے آ لازم مسوسس کہ نن نافرمانی و مزاحمت نا بناء ءِ کین۔

عربی شاعری قرونِ وسطیٰ نا قلعہ تا ڈول اسہ سنگی قلعہ اس ئس۔ دا قلعہ ءِ پرغنگ اسہ جنونی گڑاس ئس، بلکن دا عمل بے شرفی و کفر آن خڑک ئس۔ بھیم نا کیہی ڈول آک ئسر؛ لغوی، دیہاڑی، بلاغی، نحوی، اخلاقی و دینی۔ لوز ‘ہمزہ’ ءِ اونا کرسی آن شیف کننگ و اودے سطر آ نوشتہ کننگ نا خیال معاملہ ءِ پاہو نا چِٹ اسکان سر کریکہ۔ ہر دننگا کوشست ہرانا مسخت خلیل بند احمد فراہیدی نا شطرنج آ تالان اسہ ہم مہرہ ئسے سریفوئی مرے، او گوازی نا قانود آن پیشن مننگ نا سوب مریک، و مابت یا جنس نا سلطنت آن خڑک مننگ لجی مروک جلہو گمان کننگاکہ ہراٹی فوجی عدالت آک فیصلہ نا پرمان تے تسورہ۔