باجوڑ وت کش تراک ئٹ کہوک آتا کچ 54 اندن ٹپی مروک آتا کچ 83 مس۔

ڈسٹرک ہیلتھ آفیسر تراک نا پین مسہ ٹپی تا ساہ تننگ ءِ پک کرسہ پارے کہ 90 آن گیشتر ٹپی مروک آتا درمان جتاء اسپتال تیٹی مننگءِ، 38 جون چاہنداری آن گڈ خاہوت آک تینتون دریر و ہرا جون تا چاہنداری متنے او اسپتال ٹی تخوک ءُ۔

ڈسٹرکٹ پولیس آفیسر نذیر خان نا پاننگ ءِ کہ باجوڑ تراک آن گڈ مسہ مشکوک ءُ بندغ دزگیر ئٹ الکنن۔

آئی جی خیبرپختونخوا اختر حیات پارے کہ ورکرز کنونشن ئٹ وت کش تراک والا ہند آن شاہدی مچ کرینن ہراتے ڈی این اے کن رادہکرینن، ہمو ہند نا جیو فینسنگ ءِ ہم کرینن۔

آئی جی خیبرپختونخوا پارے کہ  بمب ڈسپوزل یونٹ تراک نا ہند آن پڑزہ دوئی کرینے، تراک نا ہند و دامون ایمون آن سی سی ٹی ویفوٹیج ہم دوئی کننگانے ہرافتا پٹ و پول برجاء ءِ۔

او مستی پارے کہ انسد دہشتگردی ٹیم تدینی نا ہند آ پٹ و پول ئٹ آختہ ءِ، تدینی ٹی تُد تنظیم و وت کش جلہوکار نا پیدواری ءِ کننگ ان،امیت ءِ زوت ئس پٹ و پول ئٹ گامگیچ مرو۔

پاکستان ئٹ امریکی سفارت خانہ اتوار نا نن اسہ بیان ئسے ٹی تراک ئٹی جانی نسخان آتا خاہوت آتون است اسونی نا درشانی کرے۔

بیان ئٹ پانگا: نن تشدد نا دا گندہ غا کاریم نا سخت مذمت ءِ کینہ، ہرانا سوب آن بے ڈوہ آ جان تا نسخان مس و پین کہیی بندغ تےنسخان رسینگا۔

سفارت خانہ تینا بیان ئٹ پارے کہ پر امن و جمہوری چاگڑد ئٹی دہشت گرد آتا دا وڑ نا کاروائی تا ہچو ہند ئس اف۔نن دا سخت انگاوخت ئٹ پاکستان نا الس تون سلوک ان۔

بیان ئٹ مستی پانگا: ‘ نن دہشت گردی نا برخلاف جنگ و تینا شاری تا رکھ کن پاکستان نا کوشست آتا مخ تفی ءِ کننگ آ تینا گمان ءِپک کینہ۔

دا تدینی آ ہراڑے حکومتی واک دار تا مذمتی بیان بس، ہموڑے اوغانستان ٹی طالبان حکومت و پاکستان ئٹ تحریک طالبان پاکستان (ٹیٹی پی) ہم مذمت کریر۔

ٹی ٹی پی نا ترجمان محمد خراسانی میڈیا غا شینک کروک اسہ بیان ئسے ٹی پارے کہ تنظیم دا تراک نا سخت مذمت ءِ کرسا کہکوکاتیکن دعا کننگ ءِ۔

بیان نا رد ئٹ: ‘ تحریک طالبان پاکستان شہید و ٹپی تا خاہوت، ذمہ وار و جمعیت علمائے اسلام نا سروک و باسک آتون اوار ڈکھ ئنا داوخت آ اسہ وڑ اوار ءِ۔‘

اوغانستان حکومت نا بنجائی ترجمان ذبیح اللہ مجاہد ام ٹوئٹر آ تینا بیان ئٹ پارے: ‘ امارت اسلامیہ خیبرپختونخوا باجوڑ ایجنسی ٹیتراک نا مذمت ءِ کیک۔‘

او زہمی خاہوت آتون اوار تعزیت نا درشانی کرسا مستی پارے: ‘ دا وڑ ئنا ڈوہداری ہچ وڑ ہم جائز اف۔‘

اندن تراک نا ذمہ واری ءِ داعش ارفینے۔

زوراکی ئٹ بیگواہ کبیر بلوچ نا لمہ پارینے کہ ظم و زوراکی و بندغی شرف ءِ لتاڑنگ نا اسہ کچ اس مریک ولے پاکستان ئٹ بے بندغی وڑ ڈول و اشتماعی سزا نا ہچو کچ اس اف بلکن داڑے ریاستہ ادارہ غاک مخلوق نا بے شرفی ءِ کریسہ اوفتا خڑینک و خسّکہ آتیان چس ہلیرہ و بے وس لمہ و ہیڑ تے سڑک آتیا پریات کریسہ خننگ آن اوفتا جغر ءِ پدینی رسینگک۔

کبیر بلوچ نا لمہ پارے کہ ای دا دڑد و ڈکھ ءِ پانزدہ سال آن سگنگ اُٹ، کنا مار نا زوراکی ئٹ بیگواہی ءِ پانزدہ سال مننگ ءِ۔

او پارے کہ 27 مارچ 2009 آ خضدار سیشن کورٹ نا کیب آن بنجائی کسر آن کنا مار کبیر بلوچ ءی اونا سنگت مشتاق بلوچ و عطاء اللہ بلوچ تون اواری زوراکی ئٹ بیگواہ کننگا و دا پانزدہ سال ئٹ ای عدالت، کمیشن، جے آئی ٹی تیتون اوار انصاف نا ہر درغ آ ہناٹ ولے ہچو جاغہ اس بیدس اُست کٹہی، بے انصافی و بے شرفی آن ننے ہچس رسینگتئو، دا تیوہ غا ادارہ غاک مظلوم آتے انصاف تننگ کن آخہ بلکن ظالم ءِ رکھنگ کن جوڑ کننگانو و ظالم دا ادارہ غاتے تینا ظلم و بے انصافی تے شابیتی تننگ کن کاریم اٹ ہتیک۔

او پارے کہ ای چاوہ کنا مار بے قصور ءِ و اگہ او ڈوہدار مروس گڑا دا پانزدہ سال ئٹ اونا ڈوہ ءِ پک کریسہ تینا ٹہیفوک اسہ عدالت اسیٹ مونا ہتیسہ تینا پاکستانی راہبند نا رِدئٹ اوفتے سزا تننگوس۔

او پارے کہ داڑان پاش مریک کہ ننا چُناک نا گناہ و اوفتیتون زوراکی ئٹ بیگواہ کریسہ بے دادی نا گواچی کروک آک گناہ گار و ڈوہدار ءُ۔

بیگواہ کبیر بلوچ نا لمہ پارے کہ دا پانزدہ سال ئٹ ای پاکستان تیوہ غا ادارہ غاتیان ہلیس سیاستدان و احوالکار آتے وار وار تینا مار نا یلہ کرفنگ و انصاف تننگ کن کُوک تسوٹ ولے کس ننا توار آ پام کتئو اگہ کنا توار شرفدار جہان، راج و بندغی حق آتیکن توار ارفوک آتے اسکان سر مریک گڑا ای اسہ بے وس و بے توار لمہ اس خواست کیوہ کہ ای زند ئنا ایسری بشخ آ سر مسونٹ دا کنے آ رحم کننگ مرے و کنا مار و اونا سنگت آتے یلہ کرفنگ مرے کہ ای کہنگ آن مُست اسہ وار تینا مار نا دیدار ءِ کننگ کیو۔

بلوچستان نا شار نوشکی و زامران ئٹ بلوچ سلہہ بند گل بلوچ لبریشن آرمی نا جُلہو تیٹ “ڈیتھ اسکواڈ” و پاکستانی لشکر ءِ ٹِک کننگا۔ سُم کاری ئٹ نوشکی نا ہندی بابو حمید مرگ ئنا گواچی مس اندن اسہ فوجی کارندہ ئسے نا مرگ ئنا حوال ءِ۔

درو بیگہ تون نوشکی بس اڈہ ئٹ موٹر سائیکل آ سوار نادرست سلہہ بند بندغاک بابو حمید ماندائی ءِ سُم کاری کریسہ مرگ ئنا گواچی کریر، دا وخت شفقت پنی اسہ پین بندغ اس ہم سُم تا گواچی مس۔ جُلہو کروک آ بے ڈس کنڈ ئسے آ سرسہبی تون پیش تمار۔

ایلو پارہ غان درے ننکان زامران نا علاقہ عبدوئی ئٹ سلہہ بند بندغاک پاکستانی لشکر نا پوسٹ آ جُلہو کریر ہرانا سوب اسہ کارندہ اس مرگ ئنا گواچی مس۔

بلوچستان ئٹ آزاتی کن جہد کروک بلوچ سلہہ بند گل بلوچ لبریشن آرمی دا ہڑتوما جلہو تا ذمہ واری ءِ ارفے۔

بی ایل اے نا ترجمان جیئند بلوچ بیان ئٹ پارے کہ بابو حمید پِن کروک سمیع 2019 ئٹ بلوچ آزاتی پسند آتے ریفسہ دزگیر کرفنگ آن گڈ پاکستانی لشکر نا مونا سلہہ بٹیسس۔ دا بندغ نوشکی نا جتا علاقہ بٹو، ریکو، دو سئے، منجرو و احمد وال و ایلو ہند آتیا دژمن نا کمک ئٹ ڈیتھ اسکواڈز نا مُخ تفی کننگ ئس۔

ترجمان پارے کہ دژمن کارندہ بابو حمید کوزہ گیر لشکر نا ہمرئی تون نوشکی شار و ایب کیب ئٹ بلوچ ورنا تا زوراکی ئٹ بیگواہی و اُرا تیا چھاپہ غاتیٹ اوار ئس و جون 2022 ئٹ نوشکے نا علاقہ مخبلی ئٹ ڈرون جلہو آن گڈ دشمن نا مُستی بننگ ئٹ دا کارندہ کمکار ئس۔

او مُستی پارے کہ بابو حمید نوشکی و خاران نا علاقہ دو سئے، ہژدہ خول، مخبلی و لجے ئٹ فوجی لشکر کشی تیٹ کوزہ گیر لشکر نا پاش کمک کروک مسونے۔

جیئند بلوچ پارے کہ بابو حمید پِن کروک سمیع’ راجی غداری کننگ آ بی ایل اے نا “ٹِک کروک لڑ” ئٹ ئس ہرادے مرگ ئنا گواچی کریسہ ایسری تننگا۔

بلوچ لبریشن آرمی زامران ئٹ پاکستانی لشکر نا پوسٹ آ جلہو نا ذمہ واری ءِ ہم ارفے۔ جیئند بلوچ بیان ئٹ پارے کہ درے ننکان کوزہ گیر پاکستانی لشکر آ بی ایل اے نا سرمچار آک پوسکنا سلہہ تیٹ جُلہو کریر ہراڑان اسہ کارندہ وحید اللہ ہند آ مرگ ئنا گواچی و کم آن کم اِرا کارندہ ٹپی مسر۔

او مُستی پارے کہ جلہو آن گڈ درو سُہب ئتون کوزہ گیر لشکر نا اسہ ہیلی کاپٹر اس تینا کہوک کارندہ نا جوْن و ٹپی تے دننگ کن پِن کروک ہند آ بس۔

جیئںد بلوچ ایسر ئٹ پارے کہ بلوچ لبریشن آرمی پَک گمان کیک کہ کوزہ گیر لشکر و اونا کمکار آتیا تُرندی تون ننا جُلہوک برجاء مرور۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارے کہ بی ایل اے نا سرمچار آک تربت و پنجگور ئٹ ارا جتاءجتاء جلہو ئٹ قوضہ گیر پاکستانی لشکر نا کارندہ تون اوار ارا کارندہ ءِ مرگ ئنا گواچی و ارٹ ٹپی کریر۔

ترجمان پارے کہ بی ایل اے نا سرمچار آک 27 جولائی 2023 نا نن تربت ئٹ گمشاد ہوٹل نا خڑک آ اسہ سلہہ بند جلہو اسیٹی قوضہگیر پاکستان نا پنجاب نا ہندی کارندہ غلام پاسین ءِ کھسفیر۔ پن کروک آ بندغ بھلو وخت ئسے آن دروشم بدل کرسہ قوضہ گیر کن مخبرنا وڑ کاریم کننگ ئس۔

او مستی پارے کہ بلوچ لبریشن آرمی تربت شار و دامون ایمون نا ہوٹل و ہندی کوارٹر خواجہ تے خبردار کیک کہ اوفک دا وڑ ئنا بندغ تےجاگہ فراوان کننگ آن مر مرے آخہ گڑا تینا جانی و مالی نسخان آتا ذمہ وار تینٹ مرور۔

ترجمان پارے کہ اسہ پین کاروائی اسیٹی درو سہب ئنا بی ایل اے نا سرمچار آک پنجگور نا علاقہ چتکان ئٹ قوضہ گیر پاکستانیلشکر نا بنجائی کیمپ نا رکھوک چوکی تے گرینڈ لانچرز ئٹ کیہی گولہ خلیسہ ٹک کریر۔ جلہو نا سوب اسہ دژمن کارندہ ئس مرگ ئناگواچی و ود کم ارٹ ٹپی مسر۔

او پارے کہ بلوچ لبریشن آرمی دا ہڑتوما جلہو تا ذمہ واری ءِ ارفک و دا پک گمان ءِ کیک کہ قوضہ گیر لشکر و اونا مخ تف تا ترندی توناوار ننا جلہوک برجاء مرور۔

ارٹمیکو جہانی جنگ آن پد ئنا اہم انگا جرمن ادیب آتیان اسہ پِن و کیہی پنی آ ناول آتا نوشتکار مارٹن والرز 96 نا سن ئٹی کذیت کرے۔ او ہائنرش بوئل، گنٹر گراس و زیگفریڈ لینس نا وڑنگا پنی آ چاہندار آتا وئی ناس ئس۔

اونا کیہی نوشت و سرحال آتا زی آ اسہ کتاب اس مارچ 2021ء ئٹ اونا 94 میکو ودہ دے آن منہ دے مست شینک مسوسس، ہرانا سرحال sprachlaub یا ‘بولی نا پَن’ ئسک۔ تینا دا تصنیف ئٹ والرز مونی خننگوک تینا مرگ نا باروٹ بھاز شاعری وڑ ئٹ نوشتہ کریسس، “ای تینے رکھنگ افٹ۔ ای داسا ہم بھاز سوچ خلیوہ و تینا گڈیکو نن اسکان زندہ مننگ خوائوہ۔”

مارٹن والرز بیست میکو کرن نا جرمن ادبی منظرنامہ غا بھاز بھلو بندغ سرپند مننگوک ہائنرش بوئل، گنٹر گراس و زیگفریڈ لینس نا وڑنگا چاہندار آتا وئی ناس ئس و اونا مرگ جمعہ 28 جولائی نا دے ئکن 96 نا سن ئٹ مس۔

والرز کن زند ئنا معنہ ئس، نوشتہ کننگ۔ تینا دا گمان نا زی آ اود تینا کذیت اسکان سلوک ئس۔ او بھاز خواری کش ادیب و بھاز پنی ءُ بیرہ نوشتکار اس آخہ بلکن اسہ وڑ تخلیقی وخت آتیان گدرینگوک ءُ بندغ اس ہم ئس۔ اود کیہی ناول، چندی افسانہ و ڈرامہ ہم نوشتہ کریسس و او تینا پد ئٹ اخس ادبی تخلیق ہلانے ہنانے، ادبی نغدکار آک اوفتے اسہ ‘گچینو میرات’ اس پارہ۔ او جرمن چاگڑد ئٹ چاگڑدی سرحال آتا زی آ مروکا شرہ تیٹی ہم است ئٹ بشخ ہلککہ۔

بنا اسہ صحافی ئسے نا دروشم اٹ

مارٹن والرز بیست و چار مارچ 1927 ئٹ جاندومی جرمن صوبہ باویریا نا اسہ چنکو چنکو علاقہ واسربرگ ٹی ودی مسوسس۔ دا اسہ چنکو ولے بھاز زیباؤ خلق ئسے، ہراکہ جھیل کونسٹانس نا کرّک ئٹی ءِ۔ اونا لمہ باوہ کوئلہ نا تجارت کروکو ہندنو کیتھولک مسیحی ئسر، ہرافتا تینا اسہ مسافر تیکن بھیٹک اس ہم ئسک۔

ارٹمیکو جہانی جنگ نا گڈیکو دے تیٹی مارٹن والرز گڑاس وخت ئکن جرمن فوجی نا ردئٹ ہم خذمت کرے۔ جنگ آن پد اود 1946ء ئٹ ریگنزبرگ ٹی ادب، فلسفہ و دیہاڑ ءِ خواننگ بنا کریسس۔ والرز تینا نودربری نا ہندا وخت ئٹ جوڑ مروک جرمن ریڈیو ایس ڈی آر کن کاریم کننگ بنا کریسس و اوڑتون اوار او دا ریڈیو کن ڈرامہ ہم نوشتہ کریکہ۔

 چنکا خلق آن جہانی پِڑ نا سرحال آتے اسکان

مارٹن والرز نا ناول آتیٹی کیہی کسہ و کڑدار تا ایب کیب جاندومی جرمن نا خلقی یا نیمہ خلقی علاقہ آتا ندارہ ءِ و ہندا وڑ اود تینا کڑدار نگاری ٹی ارٹمیکو جہانی جنگ آن پد ئنا ونڈ مروک جرمن ریاست ئٹ دے کہی ہلنگ بشخ نا جرمن چاگڑد نا رویہ و گمان آتے نوشتہ کرے۔ اونا نوشتہ مروک کتاب آک ہمو منافقت نا درشانی ءِ ہم کیرہ، ہرا او وخت نا قدامت پسند نیام تپہ ٹی ساڑی ئسر۔

مارٹن والرز نا نوشت آتیٹی کیہی ہندنو سرحال دو بریک، ہرافتا کڑدار آک تو جرمن نا چنکو خلق ئسے ٹی ساڑی مریرہ ولے دا سرحال آک جہانی پِڑ نا مریرہ۔ والرز نا خڑک نوشتہ کننگ ہندن ئس ، دنکہ اود مونی مرسا ‘جہان ءِ دو ٹی ہلوک مرے’۔ داڑ اسکان کہ اود اسہ وار تینا انٹرویو اسیٹی پاریسس، “ای نوشتہ کیوہ، ہندا سوب آن کنا وجود ارے۔’

جرمن نا دا بے مٹ پنی آ ادیب کن بے سہبی اسہ ہندنو بھلو سرحال اس ئس، ہرا اونا چندی ناول آتیٹ اسہ بنجاہی سرحال ئسے نا رد ئٹ مونا بریک۔ اسہ وار اود انٹرویو اسیٹی پاریسس کہ جہان نا گیشتر بھلا ادب شکست کنوک و کھٹفوکا بندغ تا باروٹ ءِ، “بندغ آک کھٹنگ نا جاگہ غا ہراتم کھٹفنگ مریرہ، گڑا اوفک و اوفتا کسہ غاک زیات اُست خوش مریرہ۔”

والرز نا اولیکو ناول نا شینک کاری

مارٹن والرز ہنداخس بھاز نوشتہ کروکو نوشتکار اس ئس کہ وخت وخت ہر سال اونا کتاب اس مونا بسکہ۔ اونا اولیکو ناول 1957ء ٹی شینک مسوسس، ہرانا جرمن ٹائٹل Ehen in philippsburg ئس، و ہرانا مسہ سال آن پد انگریزی ئٹ مٹ The Gadarene Club نا سرحال ئٹ شینک مسوسس۔ دا ناول ارٹمیکو جہانی جنگ آن پد ئنا دے کہی ہلنگ جرمن چاگڑد نا اسہ ہندنو وخت ئسے ٹی نوشتہ مروک شغانی پورٹریٹ اس پاننگک، ہراتم تدوکا جرمن ریاست ‘اقتصادی معجزہ’ نا وخت آن گدرینگ ئس۔

1957ء ٹی اولیکو ناول آن پد مارٹن والرز پین ہم چندی ناول نوشتہ کرے، ہرافتیٹی اونا پنی آ ناول و بیسٹ سیلر تخلیق Ein fliehendes pferd (اسہ نرّوکو ہُلی اس) ہم اوار ءِ، ہرا 1978ء ئٹ شینک مسوسس۔ رند اٹ ہندا ناول انگریزی ئٹ A Runaway Horse نا سرحال ئٹ شینک مسوسس۔ 2002ء ئٹ اونا اسہ ناول Tod eines Kritikers شینک مسوسس، ہرانا انگریزی ئٹ مٹ Death of a critic یا ‘اسہ نغدکار ئسے نا مرگ’ نا پن ئٹ چھاپ مس۔ دا ناول زرس شرہ ئی )متنازعہ( دا خاطران ہم مسوسس کہ دا سوب آن مارٹن والرز نا زی آ بھلو کچ ئسے ئٹ نغد کننگاسس کہ اود داٹی نغدکار آتا کڑدار نگاری نا وخت یہودی دژمنی نا ڈوہ دار مسوسس۔

 مارٹن والرز ءِ 1998ء ئٹ جرمنی ٹی کتابی صنعت نا امن داد ہم تننگاسس۔ داڑان مست اودے 1981ء ئٹ جرمن بولی و ادب نا پنی آ گیورگ بیوشنز پرائز ہم تننگاسس و 2015ء ئٹ اودے اونا تیوہ غا عمر نا ادبی کاریم تا رِدئٹ انٹرنیشنل فریڈرش نطشے پرائز ئٹ ہم شرف تننگاسس۔

سفر زند و شاعری

نوشت: نزار قبانی | مَٹ: عتیق آسکوہ بلوچ

دوانزدہمیکو بشخ

لوز آتیٹ جہان ءِ کٹنگ

ہرا وخت ای شئر لکھگ بناء کریٹ ہمو وخت آن خاخر نا دُزنگ کنا دوست آ وخت تیری مسونے۔ ای پرومیتھیوس نا ڈول آسمانی خاخر دزیتوٹ، دا سوب کہ آسمان کنکن ہچبر اہم متنے۔ کنے تو زمینی خاخر تون اُست خواہی ءِ۔ بندغ تا وجدان و اوفتا لباس ئٹ خاخر رژنا کننگ کنا جنون ءِ۔ کنا ایمان ءِ کہ شاعری بارن آ جنگل ئٹ ماچس نا تیلی لگفنگ نا عمل ءِ۔ جنگل ہرا خاخری مرے گڑا پین زیات زیبا مریک۔ ہراتم اونا تیوہ غا ٹولک شمع دان نا دروشم ءِ تینا کیرہ۔ اندا سوب دورنمات نا قول ءِ کہ “شاعری لوز آتا کمک ئٹ جہان ءِ کٹنگ ءِ۔”

تسخیر یعنی تینا دوتیٹ ہلنگ آن بیدس شئر نا ہچو ساڑی  گری اس اف۔ داڑے کٹنگ آن مراد ہمو چُک ءِ چِیرنگ ہرانا دامون ایمون لوز آک، تدوک زمانہ تون اوار، افکار و جوزہ غاتا دام ٹہیفرہ، یعنی شاعری ءِ عادت و ہڑدے ئی گڑا ئسے آن کشیسہ گوڑیفوک جہان اٹ ہتوئی ءِ۔ شاعر نا عظمت نا گمان اونا گوڑیفنگ نا قدرت آن کننگ مریک۔ گوڑیفنگ لس شاعری نا نمونہ آتیان، ہرا وخت گدرینگ تون بنائی قانود نا ہند دوئی کیرہ، کاٹم ءِ شیف کننگ آ ودی مفک، بلکن دا تو اوفتیان بغاوت کننگ، اوفتے نمن کننگ و رخصت کننگ آن ودی مریک۔

شاعری اسہ ودار کروک اسیکن اُروک مفک بلکن دا بیدس ودار کروک نا ودار ءِ۔ دا اسہ بروک ئسے نا اندنو سوغند ئسے ہرا پورو مفک، و اندنو بروک ئسے ہرادے بروئی اف۔ شاعری پیدل ہنوک کسر آ اف، کہ اوتو جوڑ کننگانے اندا خاطر آن، نہ دا ضوئی اشارہ تا رند ئٹ ہنوک ءِ۔ دانا مُستی گام خلنگ تو نادرست، وجدانی و سختی تیان پُر کسر آ مریک۔

کنا خیال ئٹ شاعری اسہ انقلابی عمل ئسے ہرانا چم ٹہیفنگ و ہتنگ اسہ بلا بش کروک بندغ اس کیک، و دا بندغ جاگہ نہ جاگہ اس جہانی دروشم ئٹ تغیر خوائک۔ اگہ شاعری زمین نا تل تیٹ ترندی و جہان و بندغ نا نشخ ئٹ بدلی ودی کننگ کپک گڑا اونا ہچو قدر و نہاد اس اف۔ ای شاعری ہمودے سرپد مریوہ ہرا سُروک مریک، یعنی سلوک بولی، سلوک کتاب، و گڑا تا سلوک دیہاڑی ہل وتس ئٹ اسہ برجاء سرُینگ ئس۔

بلوچستان نا ضلع خضدار نا علاقہ آڑنجی ٹی اُست و پڈ آن 9 بندغ کسکنو۔

خضدار نا علاقہ آڑنجی نا ہند جھلڑ، بھورو، آڑنینجی مسجد سینڑہ، مسجد کفتاری ماس، ہراڑک تون اوار ایلو علاقہ آتیٹ اُست و پڈ ئناسوب آن چُنا زالبول تتون اوار 9 بندغ بیران مسنو۔

آڑینجی ٹی کھیرو نا علاقہ ٹی 3 بندغ، ڈھائی بدرنگ ئٹی اسٹ،سیٹھاری گھورو ٹی مُسٹ، جھلڑ ئٹی اِرا بندغ نا کہنگ نا حوالرسینگانے۔

بیران مروکا تیٹ عبدالجبار درینار زئی، عبد الکبیر عمرانی نا مسڑ، محمد عمر عمرانی نا مسڑ تون اوار پین بندغ اوار ءِ۔

آل طلباء الائنس کوہلو پبلک لائبریری آ کوزہ نا برخلاف پریس کانفرنس کرسا پارے کہ بلوچستان نا ورناک تدوکا کیہی دہائی آن چاگڑدیبے راہروی نا گواچی ءُ، بلوچستان ٹی تعلیمی ادارہ آتا نیستی نا سوب آن ورناک احساس کمتری و اُست کٹہی و بے جاراتی نا گواچیءُ۔

او پریس کانفرنس ئٹ پاریر کہ 1974 ئٹی جوڑ مروک کوہلو انٹر گرلز کالج داسکان بند ءِ ہراڑا مسکوہی صدر جنرل ریٹائرڈ پرویزمشرف نا دور ئٹی صدارتی پیکج نا رد ئٹ امنائی مسس، ہرانا کلاس آتا بناء مننگ تو مُر ئنا ہیت ئسے داسکان ماڑی ہم پورو متنے وعلاقہ ٹی سپورٹس فیسٹیول ہم اف ئنا بریبر ءِ۔

آل طلباء الائنس پریس کانفرنس کرسا پارے کہ پی ایس ڈی پی 22-2021 ٹی منظور مروک  پبلک لائبریری ہرا کہ تحصیل آفس ئٹیجوڑ مننگ ئس ہرا کہ داسا پورو مننگ ءِ، ولے داسا پوسکن گچین مروک ڈسٹرکٹ چیئرمین و واٸس چیرمین نا کنڈ آن  پبلک لائبریری ءِدفتر جوڑ کننگ نا افسوسناک فیصلہ کننگانے۔

او پاریر کہ چیئرمین و وائس چیئرمین نا دفتر ڈی سی آفس ئٹی ءِ ہرادے مسکوہی گچین مروک چیئرمین و وائس چیئرمین کاریم ئٹہتیرہ۔

زاہد اقبال نا رخصتی

نوشت: محمد عمران لہڑی

دی بلوچستان پوسٹ

کہوکا بندغ آتا چاگڑد ئٹ بندغ نا ہچو قدر اس مفک۔ اینو دا ہیت پک ءِ کہ اینو ننا چاگڑد ئٹی زندہ غاتا ہچو قدر و قیمت اس اف ولے ہرا وخت کہ ہمو بندغ کذیت کیک دا کوڑی آن رخصت کیک تو ہر اسٹ اوڑکن خڑینک شولیسہ اودے یات کیک۔

کاش اگہ نن زرس سوچن تینا زند و کڑد ئنا جاچ ءِ ہلین کہ نن تینا زند ئنا مسخت تون اوار تینا چپ و چاگڑد نا سیانڑا و لائخ آ بندغ آتے اوفتا ہمو جاگہ و عہدہ ءِ ایتن تو گڑا ننا چاگڑد شون الیک۔ ولے اینو اگہ تینا چاگڑد نا مخلوق نا کڑد و عمل نا جاچ ءِ ہلین تو ننے دا گڑا باز ارزانی اٹ دو بریک کہ ننا مخلوق تینا لائخ آ بندغ آتے اوفتا زند ئٹ ہچو قدر تفک ہرا وخت کہ اندا لائخ آ بندغ آک دا کوڑی آن رخصت کیرہ گڑا ہر اسٹ افسوز کیک، اوتے یات کیک۔

اندن زاہد اقبال نا کذیت آن ننے تینا مخلوق نا کڑد ءِ خننہ۔ ہر اسٹ زاہد نا کذیت آن افسوز کیک، لوز نوشتہ کیک، اونا شعر تے تالان کیک، اودے داسہ یات کننگ ءُ۔ کاش اگہ اندا براہوئی بولی نا شاعر ءِ نن اونا زند ئٹی اندن یات کروسن، اندن قدر تروسن ہرا وڑ کہ اینو اونا کذیت آن گڈ تننگ اُن گڑا بھازی آن اودے زند ئٹ مچے آسودئی رسینگاکہ۔

زند ئنا تہ گڑاس دے آرام ئٹ تدینگارہ، تینا زند ئٹ خوش مسکہ کہ تینا بندغ آتا کمک ءِ دوئی کریٹ۔ ولے ہمو زاہد اقبال ہرا کہ تینا زند ئٹ براہوئی بولی ءِ شاعری نا پڑ آ بھلو مڈی اس بشخا ولے ہرا وخت کے زند ئنا سختی تا دے تیٹی تینا مخلوق نا کمک نا خواستگار ئس کس اودے اُرتو۔ اینو کہ تینا زند نا سختی سوری، تنیا، نیزگاری، لنگڑی مچا سختی تے ایسر کرسہ آسودہ خاک مس تو داسہ ہر اسٹ اودے یات کیک۔

ہمو ٹولیک ہرانگ اسر ہرا کے براہوئی بولی نا پن آ سالانہ ایوارڑ الیرہ، ہرا کہ سرکاری پیسہ غاتے تینا پلّو اٹ تفیرہ، ہرا کے فنڈ آتے تینا خڑک ئنا بندغ آتیا بشخرہ، ہرا کے دا بولی نا پِن اٹ تنخواہ الیرہ۔۔۔

اوفک انتئے زاہد اقبال نا وخت آ کُور ئسر۔ انتئے سرکاری خڑچہ ٹی اونا علاج کننگتو۔ آخر نن اٹ وخت اسکان اندن زند ئٹ مرک نا گواچی مریسہ کانہ۔ زاہد تو اینو دا جہاں آن رخصت کرے ننا مخلوق نا معاشرہ غان تو باز وختی رخصت کریسس۔ او ہمو وخت دا کہوکا چاگڑد آن رخصت کرے ہرا وخت کہ اودے کمک کننگ کن زندہ ؤ بندغ دوئی بتو۔ ہرا وخت او تینا بولی نا سوداگر آتے خنا تو اونا است ئٹ اندا بس کہ داڑے لمہ بولی ہم سودا مریک گڑا زاہد کون آتا انت کمک کرور۔

براہوئی بولی نا کل کالخواتا دا ذمہ واری مریک کہ ہرا ادارہ غاک دا بولی نا پن اٹ فنڈ الیرہ، سرکاری تلو آ دانا نمائندگی ءِ کیرہ ہموفتا احتساب ءِ کیر۔

ہر ہمو ادارہ نا کار کڑد آ نظر شاغر ہرا کہ براہوئی بولی نا پن آ جوڑ مسنے۔ ایلو سرکاری پارہ غا دا بولی نا کمک کن اخس وسیلہ اریر اوتے اندا شاعر، ادیب، دانشور آتا کمک کن دوئی کیر۔ کس ءِ دا اجازت مف کہ بولی نا پن آ تینا دکانداری ءِ برجاء کے۔ بولی نا سوداگر آتا کسر تے بند کیر۔ تینا لائخ آتا کمک ءِ کیر۔ بولی نا حقی آ والی وارث آتا ہر وڑ اٹ کمک ءِ کیر۔ ہرا بولی نا شونداری کن جہد کننگ ءِ اونا سختی ٹی کمک ءِ کیر۔ اینو ہم براہوئی بولی نا باز آ شاعرک، ادیباک تینا زند نا سخت آ دے تے تدیفنگ ءُ ولے اوفتا کمک ءِ کس کپک۔

بائدے اگہ ادارہ سینا وسیلہ ئٹ سرکار آن اوفتیکن فنڈ کشیفیر۔ سالانہ لکھ آ روپیک بولی نا پن آ بریرہ ولے اوفتے دیر تینا جیب ئٹ شاغک کل ءِ سما ءِ۔ اٹومٹ نن دا وڑ چپ تولون، ننا بولی نا سوداگری مرو۔ بس داسہ مچے ہمت کین بش مرین۔ براہوئی بولی نا شونداری کن المی ءِ کہ بولی نا پن پیسہ پلوکا کرپٹ آ بندغ آتے مُر کین۔