بے ڈس آ بندغ آک
نوشتہ کار: جعفر قمبرانی
دی بلوچستان پوسٹ
بندغ نا چنکو گڑاس خن تا مون آن زرس چھپ مرے گڑا اسہ بھلو بے جاراتی اس تالان مریک و بندغ ہر ساعت دانگ اینگ چک خلیسہ تینا گِڑا ءِ مارِک۔ بندغ نا تہہ آن اسہ توار اس اودے ہبکہ کیک ہرا نا سوب آن تغ پرینگک، است لڑزیسہ کیک و تلف آک خید ئٹ چُڑیسہ لغوشت مریرہ یعنہ بندغ نا دوٹی ہچڑہ اس مفک بیدس ہمو بے جارات کروک آ کسر اوننگ آن۔
دا چک خلوک آ بندغ نا تہہ ئنا بےجاراتی و انتظار نا احساس بیرہ ہمو بندغ ءِ مننگ کیک ہرانا تینا اسہ گڑاس اوڑان ہندن بے ڈس مسونے۔
ای ہندا سوچ ئنا تہٹی ڈب ہناٹ ءُ سفا گُرجینگاٹ، ای ماراٹ کہ گڑا تو بھاز چنک مریک، اونا مٹ ہم ودی مننگ کیک، اسہ گڑا ئسے نا بے ڈس مننگ اگہ داخس فریشان کیک گڑا ہمو بندغ آتا انت ہرافتا خاہوت آن اسہ زیبلو پھل آنبارو ورنا اس یا نازُرک ءُ شیرزال اس بے ڈس مریک؟
ہموفتا بے جاراتی ءِ مارِنگ کن ای وخت اس پدی چک خلکوٹ گڑا کنے سما تما کہ دا تو بھاز بھلو بھیم بش کروک ءُ اسہ بے جاراتی ئسے ہرا بندغ نا تہان دڑد آتا زراب آتے بش کیک۔ اسہ بندغ ئسے نا اُرا نا باتی اس، یا کہ ہمو باتی ہرا کل آن ود شعور تخاکہ، اُرا نا کل ءِ سامباکا، ہیر، لمّہ ہمسایہ و ڈیہہ ئنا حق ءِ نئے بیرہ پہہ مسکہ بلکن دافتیکن سیال ءِ خیسن ءُ خن ہم شان تننگ کریکہ، دے اس ہمو بندغ بے ڈس مرے گڑا اونا پد آن سلوک آ مخلوق اخدر عذاب ئٹ مرو۔
انت اوفتا است روغزینگ آن پد تینا بیگواہ غا ایلم/ہیڑ ءِ ماریسہ سِٹپرو؟
ای ٹک خلیوہ کہ خدیجہ نا اُرا ٹی داوخت انت حالیت اس مرو کہ اوفتا خاہوت نا اسہ گچین خوانندہ اس اینو زوراکی ئٹ اوفتیان جتا تہارمہ انگا کوٹی تیٹی تموک ءِ۔
ای ماریوہ کہ انت ئسے کن خضدار نا ہیڑ سعدیہ و سائرہ دڑد آن پُر ءُ لوز نوشتہ کیرہ و تینا است ئنا چیہانٹ ءِ لووز آتا دروشم ئٹ تہو ئٹ بال ایترہ۔
انت اوفتا چیہانٹ ننا کر انگا خف تیا تمک مگہ؟
کنا است آن ہموتم اسل بھاز ژدغہ مریک ہراتم کنا است آ نیول آن بیگواہ مروک آ ہیڑ حسینہ، کراچی نا شکیلہ نصیر، ہیڑو آ ماہ جبین نا بیگواہی و حب چوکی آن نسرین، حیرنساء، حانی، و ایلو تیوہ غا بلوچستان آن عائشہ، فرزانہ، رحیمہ، ہاجرہ بریرہ۔ ای ٹک خلیوہ نن امر بلوچیت نا دعوی کینہ؟ امر ننا ننگ آک، ننا ہیڑک پنچ دیری تا دوٹی ننا خن آن اندر تموک ءُ۔ انت ننا دیہاڑی ننگ ئنا دعویٰ غاک دروغ ءُ یا گڑا نن بے جیرت مسونن؟ انت نن تینا باوہ پیرہی آ شین ءِ گیرام تو کتنون؟
انت ننے تینا ہمو لائخ انگا ایلم تا یات بفک ہرافتا خیسنو خن و باسن ءُ جوزہ ئسرہ؟ انت نن احساس پنی آ گڑا غان ہرک مسونن و تینا ذاتی زند ئٹی ڈب ہلوک کل ءِ گیرام کرینن؟ یخینن نن تینا یانزدہ ہزار سالی آ دیہاڑ ءِ گیرام کرینن۔ ایلم ہیڑ تا بے ڈسی و ننا چھپی ننا جیرت و ہمت نا زیہا بھلو سوج ئسے۔ ننا مارشت آتا بے حِس مننگ نا داکان بھلو نشانی انت مرو۔
سیال اگہ بے ڈس کننگ ءِ ننا نزوری و تینا طاغت جوڑ کرینے گڑا نن اونا نزوری تے پٹنگ کپنہ۔ مگہ نن کاٹم شیفی ٹی زیبا خننگنہ؟ گہ اخا، گڑا ببو اوار مرین، کاٹم تے جک کریسہ تینا بیگواہ غا ایلم و ہیڑ تے پٹن و سیال آتا ٹارچر سیل آتیان کشن۔ ببو سوشل میڈیا ءِ بکار کیک۔ ببو تین تہہ ئنا بھیم ءِ ایسر کریسہ جیرت و جوزہ تون مون مستی روان مرین و سیال ءِ تینا ڈیہہ آن مڑیسہ بے ڈس کین۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
