پن ئٹ فدائی چیف بلال نا
مخوکا چہرہ ئے زیبا بلالی
فدا مہردار ئنا چلتن تو شالی
وتاخی مہر ئتو گواڑخ کنا بس
وتن نے آ اسٹ لَکّھٹ مثالی
خنا دُنیا پدا ریلے اُشا دَک
کرے لمہ دا مارُل نا دَمالی
زرابے نا سفر تا یار سنگت
دُراخا مُولِکو زغگے نہالی
بہ دلوش چیدہ غاک سینگار مسُّر
وفا نازٹ ننا رشتہ رَسَالی
دلوش
افسانہ | ایردست آ چاگڑد
نوشت: زائم بلوچ
دی بلوچستان پوسٹ
ننا ایردست آ چاگڑد ئٹ غلامی نا زند تینا انتہا غا ئس۔ ہر نیمہ غا فوجی چیک پوسٹ آک ننے اندا غلامی نا شغان ءِ تِننگ کن آباد کننگاسُر۔ ننا اُرا تا زی آ فوجی تا ڈرون آک چرخ کریرا ہراڑان خلق مُچ خلیس ئنا گواچی ئس۔ مخلوق نا مِلی تیٹی خلیس انداخہ جہی ئس کہ اوفک شام ئنا تینا حویلی ٹی ہم پیشن مننگ کتورا ۔ فوجیک ہرا وخت خواہوسُر او اُرا تیا جلہو کریرا، مخلوق نا مال آتیان دزی کریرا، اوفتا چُنا تے بیدے اسہ قانود ئسے آن تینتو دریرا بند کریرا ننکہ کُل آن بھلا شغان اندا ئس کہ دا فوجیک کُل پیشن نا بروکو ئسر ہرافتہ نا نسل درست ئس نا بولی، نا قوم نئے کہ مذہب ولے اندا فوجیک ننا اُرا تیٹی بسورا ننا زالبول آتا پُچ آتے تار تار کریرا ہنارہ ۔ ننا جند ئنا ڈغارا ننکہ ہچس سلوک الو، نن تینا اُرا تیٹی اندن بند ئسون دنکہ قیدی اس قید ئٹ بند مرے ۔
زند ئنا اندا خرین آ دیک برجاہ ئسر، دیگر نا وخت آ ای ہڑدے تینا بانسری ءِ ارفیسہ خلق ئنا پاناد ئنا بُٹ آتئے ہناٹہ۔ ہمو دے ہم ای بانسری نا توار ئٹ ساز آتا سرگم تہ تہٹی دڑوک ئسوٹ کہ خلق ئنا نیمہ غان ترند ءُ توار ئس مَس ہرا یکدم کنے بانسری نا سُر آتیان پیشن کَشا۔ ای خلق ئنا نیمہ غا چَک ءِ ہڑساٹ تو چنا تہ گوازی جاہ نہ نیمہ غان بھلو دنز ئس ارفنگ ئس تینے۔ دا توار ئنا ترندی انداخہ زیات ئس کہ ہرانہ ژونگہ کنا خف تیٹی پناسُس ۔ دا توارے کنا مِلی ہچ ارفنگ الو ای اندا سوب آن بے جارات ئسوٹ ۔ ای حیران و ہبکہ بُٹ آ سلوک دسکان دنز ءِ اُرنگ ئسوٹ ۔ گڑاس ساعت آن گُڈ خلق ئٹ چیہانٹ و پرادس بش مس ۔ ای تینا ہوش ءِ تینتو کرسہ زوت ئس تینا بانسری ءِ ارفیٹ و خلق ئنا نیمہ غا مون کریٹ ، خلق آ سر مننگ تون اُراٹ کہ چنا تہ گوازی جا غا بِدر آ فوجیک تینا ڈرون آتیٹ حملہ کریسر ہراڑان کُل چناک چُنڈ چنڈ تموک ئسر ۔
بھاز ئنا جوْن آک درست متورہ، بھاز آتا سُوک ہڈ آتیان جتا ئسر۔ ہرکس تینا چنا ءِ پَٹنگ ئٹ اختہ ئس۔ دا چنا تیٹ اسٹ کنا ایلم ہم ئس کہ ہرادے نن بیرہ اونا بدن نا نشانی سے آن درست کرین ۔ دا ہمو ساعت ئس کہ دنو ساعت ای تینا زند ئٹی اسہ جاہ ئس ہم خنتوسُٹ۔ خلقی تہ چیہانٹ و پراد آک آسمان ءِ تل کننگ ئسر ننکہ ہچس سلوک الو۔ ہر اُرا ءِ دا خاخر تینا پلویڑ ئٹ الکُوسس ۔ خلق ئنا مارمد آن گڑاس بیداری کرین قبرستان نا نیمہ غا گور خُتنگ کن ہنان ۔ گِڑاس کفن نا بست و بند اکن ایلو خلق آتا نیمہ غا مون کریر ۔ گڑاس تہ پھل آتا جوْن تا ٹُکر تے مُچ کننگ آ لگار ۔ شام ئنا آذان وختی مسوسس ۔ روشنائی اندر ئس ۔ نن طوبے نا روشنائی آ قبرستان آ قبر آتے خُتنگ ئسون کہ ننا زی آ فوجی تہ مُسے ڈرون بسر سلیسر ۔
ننا اُست آتیٹ لار زیات ئس، نن تینا ہوش ءِ اوفتون کتون تینا کاریم ءِ مستی دننگ کن ترندی کرین۔ خفتن نا وخت آک ئسر ، نن ہفت قبر خُتاسن کہ انداڑتون فوجی تہ پنچ لاری قبرستان آ بسر و ننے پلویڑ کریر۔ فوجیک بننگ تون ننے آ لَٹ آتیٹ تمار و جوان ننے خلکر۔ او اندا پاریر ہنار کہ شام ئنا تارمئی آن گُڈ کس ءِ پیشن مننگ نا موکل اَف دا ننا قانود ءِ۔ ننے خلق ئنا پیر و کماش آک دریر اُرا تیا او چنا تہ دفن کننگ ءِ سہب اکن ہلار۔ نن او شام مُچ سما تینا پھل آتا جوْن آتا رہی آ زونڈوک ئسون خلقٹ شام مُچ مودہ و پراد ئس ۔ ساف اسکان نیاڑی تہ گُٹ آک چَٹ ہناسُر ۔ ساف تمننگ تون نن بھازی ہنان قبرستان آ پیشیم اسکان کُل بیست و سئے قبر ءِ تیار کرین ۔ پیشیم نا نماز آن گُڈ جنازہ مس و نن بیست و سئے پھل آتون اوار تینا زند ئنا کُل خوشی و مراد آتے مِش تیٹی یک یک آ دفن کرین ۔ خلقیک مُچ پراد و مودہ کرسہ ولدا خلق ئنا نیمہ غا روان مسر و ہرکس تینا کونٹ ءِ جِک کننگ نا بست و بند ئٹ لگا ۔ ننا اُرا ٹی مودہ و پراد آک ئسر ، نن کُل اُراہیک اسٹ ایلو تون مون پہ مون مننگ کن تیار الئون ۔
اسہ نیمہ غان بے تُغی و ایلو نیمہ غان دمدری کنے چَٹ کریسس ۔ ای تینا جون ءِ سُبّک کننگ کن ساعت ئس تینا مِشن نا تہارا کوٹی نا نیمہ غا مون کریٹ ۔ سر مننگ تون ای تہارا کوٹی نا درگہ ءِ ملاٹ تو تہارا کوٹی نا روشندان آن روشنائی نا برانز اک برسہ کوٹی ٹی تخوک میز ئنا زی آ تمسہ ئسر کہ ہرانہ زی آ اسہ بانسری ، گڑاس گُلاب نا بارونو پَن و الجزائری قلمکار فرانزز فینن نا کتاب ( سامراج کی موت ) تخوک ئس ۔ دا ندارہ ءِ خننگ آن گُڈ کنا ہجوز ئٹ ئٹ ملاسی ئس بش مَس ۔ ای پین بے جارات مسوٹ ۔ ای نیم سماء غا بندغ تینا کاٹم ءِ سرجہ غا تخاٹ ولے کنا مِلی ہچ کنتو بتوکہ ۔ کنا جون دمدر ئس ہراٹی پین ہچ تاغت الئو ولے کنا مِلی ہچ ٹمبہ مننگ الئو ۔ ای بے جارات ئسوٹ اندن دنکہ زندان آتیٹی بند اسہ ورناس مرے ۔ ای تینا بے جارات آ جون ءِ بیرم آن ارفیسہ خلق ئنا نیمہ غا ہننگ نہ سَلہ الکُٹ تو کنا مِلی کنے آ اندن زوراک ئس کہ ہرا کنے مُچی آ ہننگ کن اِلتوکہ ۔ ای تینا ہجوز ئنا نلاسی ءِ ٹمبہ تننگ کن میز آ تخوک بانسری و کتاب ءِ ارفیٹ ءُ خلق ئنا قبلہ نیمہ غا بُٹ آتیکن سر الکُٹ ۔
خلق ئٹ چیہانٹ آتا کوکار ئس ، قضا دیگری نا وخت ئس ، آسمان خیسن تفیسس ۔ اندن خیسن دنکہ درو ڈغار چناہ تہ دتر تیان خیسن ئس ۔ بُٹ آتیا سر مننگ تون کنے شام ئنا آذان ہلک ۔ ای نماز خواننگ ان گُڈ بانسری ئٹ تینا تہہ نا دڑد و ارمان تے توار تننگ ءِ بناء کریٹ ۔ کنا جون مچٹ سبک مَس ، ای نیم سمائی نا حالیت ئٹ ہمو بُٹ آ تنگان ہناسُٹ ۔ ہراتم کنا خنک مَلنگار تو طوبے پاش کرسہ کنا چَٹ زی آ ئس ۔ ای ساعت ئس طوبے نا رژن ءِ اُرسہ اوڑتون ہمکلام مننگ نا کوشست کریٹ، ولے او کنتو تینا باہ ءِ ملتو۔ او بیرہ تینا پاروکا ہیت آتے تینا سیاہی تیٹی کشاسس دنکہ اسہ آرٹسٹ ئس اسہ بے توارو عکس اسیٹی بھلو تواری ءُ قصہ ئس بیان کہ ۔ ای طوبے نا رژن ئنا کمک ئٹ کتاب ءِ ملاٹ ءُ خواننگ ءِ بناء کریٹ ۔
ای وختس الجزائری تہ غلامی نا قصہ غاتے کتاب ئنا اولی پن ءِ خواننگ ئسوٹ تو کنے اندن لگاکہ کہ بلکہ فینن اینو آن سد آ سال آتیان مُست دا کتاب ءِ نن بلوچ باتیک تیکن لکھانے۔ ہرا وڑ فینن الجزائری تا زی آ فرانسیسی استعمار آتا نفسیاتی قوضہ ءِ بیان کریکہ ٹِک ہمون ننا ڈغارا ہم ہمو چال آک ساڑی ئسر۔ اگہ چنکو فرق ئس اوفتہ او ننا نیام ئٹ ئس تو او بیرہ ڈغاری راستی تا ئس ۔ دا کتاب ءِ خواننگ آن کنا تہہ نا ملاسی ٹمبہ مننگ ئس، کنے اندن لگاکہ کہ دا کتاب کنے کنا راجی جیڑہ تہ بابت سرپدی ایتک ، ای طوبے نا رژن ئنا کمک ئٹ دا کتاب ءِ خوانسہ اسوٹ۔ کتاب ئنا نیمہ ئس ای الجزائری تا مزاحمت و راجی جدوجہد ئنا باب آ سر مننگ اسوٹ۔ ای ہمو نیاڑی تا جنزے آزادی ئٹ بشخ ہلنگ نا باب آتیا سر مننگ اسوٹ کہ ہرا نیاڑیک اسہ وخت ئس انداخہ نفسیاتی نزور کننگاسر کہ اوفک تینے سفید فام استعمار آتا مون آ بندغ تصور کتورا ۔
اوفک تینے قدرت نا نیمہ غان غلام ودی کننگ نا قول آ عمل تخارہ، ولے ہمو نیاڑیک ہراتم تینا نرخ ءِ پو مننگ ان گڈ جنزے آجوئی ئٹ تینا کڑدار ءِ ادا کریرا ۔ دا ہمو ساعت ئس کہ کنا مِلی ئٹ اولی وار مزاحمت نا خیال ودی مننگ ئس ۔ کنے اندن لگنگ ئس کہ نن تینا چنا تیکن خڑینک خلنگ نا جاگہ انتئے مزاحمت کپن ۔ نن فوجی تہ خلاف انتئے اسٹ مفن ۔ اسٹ اسٹ آ کہنگ ان جوان ءِ نن اسہ مسخت اسیکن مون بڑزی ئٹ کہن ۔ خیر ای دا خیال آتیان پیشن مرسہ کتاب ءِ مستی خواننگ بناء کریٹ ۔ ای الجزائری تا جدوجہدے پین گیشتر خواننگ اسوٹ ، کنا تہہ نا ملاسی ٹمبہ مرسہ ئس ہراڑان ای جارات خننگ اسوٹ ۔
ای دا کتاب ئنا تہٹی گُم و گار اسوٹ کہ مدان مدان کنا خن تیان کتاب آ نقش لوظ آک اندر مرسہ کریر ۔ ای کاٹم ءِ بُڑزا کریٹ تو کنتو مون پہ مون ہنکینی نا مَش نا ٹُل اتئے طوبے نا گروشک آک الئور ۔ ای کاٹم ءِ بُڑزا کرسہ آسمان نا نیمہ غا اُراٹ تو طوبے ءِ ماگم ہلسہ ئس ہرانہ رژن مدان مدان آ ایسر مرسہ ئس ۔ ای دم ئس دا ندارہ ءِ سیل کننگ ئسوٹ کہ خلق ئنا نیمہ غان توفک آتیٹ سُم خلنگ ئنا توار مس۔ ای گوڑینگ تون تینا کتاب و بانسری ءِ ارفسہ خلق ئنا نیمہ غا روان مسوٹ۔ خلق آ سر مننگ تون خناٹ کہ خلقیک کُل تینا اُرا تیان تینا بُن پیراہی آ توفک آتے کشیسہ اوفتا نل آتے آسمان آ تریسہ سُم خلسہ ءُ ۔ ای ہموڑا سلوک مارمد آن سوج کریٹ کہ “ خیرٹ خلقیک مون آسمان اکن توفک ترسہ سُم خلسہ ءُ؟“ تو اسٹ ورندی ترسہ پارے کہ دا ننا بن پیرہ ئی آ دود آک ءُ کہ ہراتم آسمان آ طوبے ءِ ماگم الکُنے تو اوفک ماگم ءِ مُر مڑنگ کن ترندو توار بش کرینو ، اندن داسہ ہم ماگم ءِ مڑنگ کن دا سُم کاری مرسہ ءِ ۔
ای سوج کرسہ مارمد آن پاریٹ کہ ننا بُن پیرہ غاک ڈغار ئنا زی آ ہم آفت آتے اِلتنو اوفتے ہم مِڑنگ کن ہر حال اسکان جہد کرینو ۔ ننا توفک آک درو ہرانگ ئسر کہ ہراتم بِدر آ فوجیک قبرستان آ ننے دتر چُر کریر ۔ ننا بیست و سئے پھل ءِ ٹول آن کِشکار۔۔ دا سوج آن پد ہچو ورندی ئس بتئو۔۔۔ مارمد کُل تینا کسر ءِ ارفیسہ پیر انگا تہ نیمہ غا پیشن مس۔۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
دُن اراڑے ننا حوصلک پنرہ
رُستم ءِ دور ئتو سینہ نن تِسّونُن
بزدل ءِ اُست، نن بے جغر تے جغر
بے دماغ ئے عَقَل کور ئے خَن تِسّونن
نی ننے تِسّونُس مکر، چم، تارمئی
نن نُمے روشنی علم و فن تِسُونُن
نن ضمیر ٹوہِسہ ساقیآ بسّونُن
درس ءِ غیرت، خودی دے ؤ نَن تِسّونُن
ساقیٓ جی
بلوچستان عظیم انگا شاعر آتا اسہ جہان ئسے
نوشت: عرفان بلوچ
دی بلوچستان پوسٹ
شاعری فطری اظہار نا پن ءِ کہ شاعری نا وسیلہ ٹی بندغ تینا داخلی وخارجی دڑد، احساس و جوزہ و خوشی تا اظہار ءِ کیک ایلو پارہ غا اُرس تو شاعر مدامی فطرت ءِ نازیفک کہ شاعر فطرت نا پیداوار و شاعری اسہ فطری عمل ئسے۔ ایہُن ہم شاعری کن جمالیات المی ءِ۔ ہندا تو آرٹ ءِ۔ اگہ دا مفک تو شاعری یا ادبی شہ پارہ و عام ہیت ٹی فرق سلپک۔ شاعری مریک ہم تشبیع، استعارہ و اشارہ ٹی ہیت کننگ اٹ ولے شاعر تون اسہ صحتمند ءُ ملی اس مریک او پوہ مریک ہمو دڑدے اوتون خیال آتا خزانہ اس تالان ءِ و چاگڑد نا عکاسی ءِ کیک الُس ءِ غور، فکر و عمل نا کنڈا نظریاتی جوڑ کیک۔
شاعر نا کڑد تینٹ پاش مریک ننا مونا بریک ولے بدبختی دادے کہ نن اونا دا پاشنگا کڑد آن انتئے بے سما ان ؟ مگہ شاعر آتا پین اسہ جہان ئس ارے گڑا نن او جہان آن انتے بے سما ان؟ مگہ ننا دامون ایمون ئٹ شاعر ارے اگہ ارے گڑا نن اوفتیان انتئے بے سما اُن ؟ ایہن شاعر تو تینا تخلیقی لائخی تیان پاش انگا فکر پاننگک، ہمو فکر ہرا ننا مونا اسہ خاص ءُ یا مدامی ءُ اسہ مارشت نا بڈ اس مریک۔
بلوچستان ہمو ڈغار ءِ ہرا بدبختی ئٹ نن پان کہ سال آتیان پد ہم کوزہ گیر آتا گواچی مسنے۔ دانا الُس تینا زند ئنا ہر مُستی ہنوک کاریم تیان دو سلوک مسننے شاعر اندا دیمری کاریم تا مفننگ نا سوب آتیان شاعری تے تخلیق و تجرباتی صلاحیت آتے کاریم ئٹ ہتنگ و اسہ بے وس و مسکین ءُ الس ئسے نا بے آسراتی و جنجال آ زند ءِ درشان کننگ کن الس ئنا مونا آدینک نا وڑ مونا ہتسٹ مسونے۔
انتئے کہ شاعر راج ئنا ہمو ٹولی ءِ ہرا بھاز حساس مریک ہرانا چاہنداری ءِ لس بندغ سرپد مننگ کپک۔ ایلو شاعر ہرا کیفیت آن گدارک ہمو کیفیت ءِ تینا شعر تا سرحال جوڑیسہ تینا دڑد وغم خوشی تا اظہار ءِ کیک۔
آن بلوچستان ہمو سرزمین مسونے ہرا بھلو کچ اسیٹ تینا خمب ئٹ شاعر بلُن کرینے۔ او شاعر آتا شاعری نا دروشم ننا مونا پاش ءِ ہراتا مسخت راجی آجوئی کن مسونے و تینا مچا زند ءِ اندا آجوئی نا پن اکن بشخ کرینو نن تینت تینے اندا شعر آتا جہان ئٹ اورین گڑا اسہ پر فکر ءُ کسر اسیٹ روان مرون شعوری و مستقل مزاجی ئٹ۔
ایہن تو شاعر نا بولی مارشت آتا اسہ مچی ئس مریک انتئے کہ او جمالیات نا زی آن نن پان کہ اندا جمالیات نا حساب ئٹ وطن نا زیبائی درشان مننگ تون اوار اوار اسہ کڑمب ءُ گمان ئسے ودی کیک و ننے سر کیک، اندا کڑمب آ گمان ننے بجائے جوزہ آتیان مثبت عملی پڑ ئسے آ سر کیک۔
اندن کہ بلوچستان ئٹ بلوچ راج ئنا چندی بولیک دا وخت ساڑی اریر بلوچی و براہوئی زبان ئنا شاعر آک دا مسونو مرحوم بابا مبارک قاضی، کفایت کرار، عطا شاد و صباء دشتیاری، غمخوار حیات آن بارنگا شاعر آک ننا بلوچ راجی آجوئی کن تینا زند و زند ئنا مسخت ءِ راج ئنا بزگی، لاچاری و بے وسی آ زند اکن بشخ کریسُر۔ دننگا شاعر آتا شاعری تیٹی چندی ندارہ غاک اسہ جاگہ ساڑی ءُ اوتا شاعری تیٹی دڑد ارے تو خوشی ہم ارے، پنت ارے تو گلہ وغاؤ ہم ارے، مہر ارے بے مہری نا شکوہ ہم ارے، راج راجداری راج نا باتیک ڈیہہ و ڈغار وطن نا مَش جل ڈاک و پَٹ شیکان و شاشان چلتن و بولان تیوہ بلوچستان نا ندارہ مریک۔
دافتا شاعری آن دا گمان مریکک کہ دا شاعر آک راجداری مخلوق نا رویہ غا مروکا شاعریک دا کلہو ایترہ کہ بیرہ زلف و رخسار نا شاعر افس بلکہ تینا مخلوق تینا چاگڑد ءِ ہم ہوشان دتنو۔ دا ہیت ہم حقیقت ءِ کہ شاعر تینے آن بیدس کل ئنا دڑدے تینا اُست آ سہک۔ ہر گڑا ءِ محسوس کیک۔ او کس آ ظلم ءِ برداشت کپک۔ او کُل ئنا غم ءِ تینا غم سمجھک۔ شاعر تو دُنیا جہان نا غمک گون مریرہ۔ او ہر چنکا گپ ءِ محسوس کیک۔ فریشان مریک ہرکس نا غم تو شریک دار مریک اندا سوب آن مدام شاعر غم آن خلاص مفک۔
اگہ نن بلوچستان نا دا شاعر آتا شعر تا جاچ ءِ ہلین ننے ہر موضوع آ دا شعر آتیٹ زیبلا وطن نا دا بیوسی تون تینا بیوسی ءِ ہمگرنچ کرسہ کرینو و داڑے تینا دیار و ڈیھ ٹی داسا حالیت ءِ خنسہ تینے و تینا وطن ءِ غیر نا باہوٹ ٹی سمجھانو ءُ۔ ہندا سوب آن نن پان کہ بلوچستان شاعر آتا اسہ جہان ئس پاننگ گیک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
غمخوار نا سیخا
نوشت: زائم بلوچ
دی بلوچستان پوسٹ
ای وختس تینا تہارا کوٹی ئٹ تموک تینا زند ئنا ہمو دے تے یات کیوا کہ ہرادے تیٹی ای بالی آ چُک آنبار آسمان اسکان بال کریٹہ و بسوٹہ ۔ کنا اُست آ ہمو ساعت آک بریرا کہ ہرا وخت ای تینا فکری آ سنگت آتون مزاحمت نا ترند آ کوکار ئٹ اوار ئسوٹ ۔ کنا ملی ٹی یکدم ہمو ندارہ غاک جوڑ مریرا کہ ہرا ندارہ غاک شال ئنا سڑک آتئے خاخری آ آہڑ و گوریچی آ یخ آتیٹ گدرینگاسر ۔ ای ہمو دے تے یات کرسہ پدا زند ئنا چس ءِ ہلیسہ اندن خیالی ءُ جہان ئسے ٹی کاوہ کہ ہرا جہان ئٹ بیرہ کنا ہمو یاداشت آکو کہ ہرافک مزاحمتی تلہ غا کنا سنگت، دوست خواہ و استاد آتون اوار گدرینگاسُر ولے دا کیفیت ئٹ ای گیشتر مننگ کپرا، کنے یکدم تہارا کوٹی نا مہونی تینا نیمہ غا چِکک و ولدا غلامی نا ہمو احساس کنا استٹ برسہ کنے دا خیالی آ جہان آن پیشن کیک۔ ای زوت ئس دا جہان آن پیشن مریوا و پدا ہمو تہارا کوٹی کنا کُل جہان جوڑ مریک کہ ہرا کوٹی کنے کنا مزاحمت کننگ نا خطا ئٹ رسینگانے ۔ ای دا کوٹی نا تہٹی زند کپرہ بلکہ بیرہ زند ئنا دے تے گدریفیوا ۔
دا کُل غلامی نا ہمو زنگ آکو کہ ہرافک کنے دا تہارا کوٹی نا گواچی کرینو۔ ننا چاگڑد ہم اندا غلامی نا زنجیر ئٹ تفوکے کہ ہرانہ تہٹی ہر ہمو بندغ کہ ہرا کاٹم ءِ بڑزا کیک گُڑا او مرگ ئنا گواچی کننگک۔ ننا دا پر خون آ چاگڑد ئٹ جوانو حوال ایہن اف کہ ہرافتے مون آ تچسہ نن تینا ضمیرے مطمئن کین، دا چاگڑد ئٹ ہڑدے ڈیھ نا باتی تہ بیگواہی، خلینگ و کسفنگ نا حوال آتا گمان ننا ملی ٹی جوڑے۔ ننا ہر شام اندا گڑتی ئٹ اودیم مریک کہ نوائے دا نہاراک ننے بیگواہ کرسہ زندان تہ گواچی کپس۔ دا گڑاتی ٹی تُنگان ہننگ آن پد چواختس نن سُہب ئنا تینے بیرم آ ولدا نہ خننہ تو ننا اُستان شُکر ئنا وِرد اس پیشن مریک ۔
تہارا کوٹی ئٹ خرینہ زند ئنا اسہ پین شام ئس گڑتی ئٹ اودیم مسوسُس۔ ای تینا بیرم آ ساڑی شُکر کشیسہ ئسوٹ۔ ای ہڑدے آنبار موبائل ءِ ارفیسہ رسانکدار ئنا حوال آتے ہلنگ کن گروپ ئسے آ ہناٹ تو کُل آن اولی حوال پروفیسر غمخوار حیات صاحب نا ئس کہ ہراٹی لکھوک ئس ” بدبخت آ نوشکے نا ہند اسیٹ براہوئی ادب نا غمخوار و بامڑد خواجہ غمخوار حیات ءِ ریاستی ڈیتھ اسکواڈ نا بندغاک سُم خلیسہ ننے آن آخوبتی جتا کرینو ” ۔ رسانکدار ئٹ دا حوال ءِ خننگ ان گُڈ کنا جون ہبّکہ مس و کنا ملی یچ تفے ۔ ای ہچ دا حوال ءِ جذب کننگ الوٹہ ۔ دا حوال ءِ بِننگ تون کنا کیفیت چَٹ بدل مس، ای ولدا ہمو خیالی آ جہانٹ تینے ریفنگ کن ہناٹ۔ کنے اندن لگاکہ کہ ای بلکہ تُغ ٹی اُٹ و تینا جون ئنا دمدری نا سوب آن دنو تُغ خنسہ اُٹ ۔ ای تینے تینٹ آسرہ ترسہ ریفیسہ ئسوٹ، کنا گمان ئٹ اندا خیال بریسہ ئس کہ ہرا بندغ نا ذکر گیشتر نا دوی آ مرے گڑا ہمو بندغ نا تُغ تیٹ گیشتر بریک ۔ ای ہم اِستو نا شام غمخوار ئنا کتاب “زندان ” ءِ خوانیسہ تنگان ہناست بلکہ اندا سوب ان ای غمخوار نا بابت دنو تُغ خننگُٹ ۔
ولے دا کُل گمان آک کنا ہمو خیالی آ جہان ئنا ئسر کہ ہرافتیٹی راستی الئو بلکہ راستی اندا ئس کہ ہرا کنے رسانکدار ئنا حوال آتیٹ خننگ ئٹ برسہ ئس ۔ آؤ راستی اندا ئس کہ ادب نا غمخوار ننے آن آخوبتی جتا مسوسس۔ دا حوال ءِ جذب کننگ آن گُڈ کنا کیفیت چٹ پین ئس ۔ ای ولدا ہمو تہارا کوٹی نا تہٹی تموک بے جارات ئسوٹ ۔ نہ کنتو لوز آک بسورا کہ ای گڑاس نوشت کننگ کروسُٹ، نہ کنا خڑینک آک بسورہ کہ ای تینا تہہ نا لارہ ءِ کشوسُٹ، و نئے کہ ای دُن آزاد ئسوٹ کہ ای اصل قاتل آتیک گڑاس لکھنگ و شینک کننگ کروسٹ ۔
ای پدا ہمو تہارا کوٹی ئٹ تینتو تینٹ ہم کلام مسوٹ ۔ ای تینے آن تینٹ سوج کریٹہ و تینا سوج آتا تینٹ ورندی ءِ تسوٹہ ۔ کنا حالیت ولدا ہمو ئس ، ای ولدا ہمو ساعت آتے یات کرسہ ئسوٹ کہ ہرا ساعت آک کنا و غمخوار ئنا اواری ئٹ گدرینگاسُر۔ کنا اُست آ ہمو دیوان آک برسہ ئسر کہ ہرا تیٹ ای و کنا سنگتاک غمخوار ئنا نوشت ” راہشون امر مرے ” آ اسٹیڈی سرکل ہڈ تسوسُن و غمخوار ننا دیوان ئٹ مہمان ئس ۔ کنا ملی ئٹ ہمو مجلس نا عکس اک جوڑ ئسر کہ ہرا مجلس ئٹ غمخوار شال ئنا ہند ئٹ ننکن استاد صباء دشتیاری نا ادبی و سنگت ذاکر مجید ئنا سیاسی آ جدوجہد ئنا بابت گپ و تران کریکہ ۔ کالج نا ہمو چمنی کہ ہراٹی نن گڑاس سنگت دیوان کرینہ ہراٹی بشخ الوکو پین اسہ ہم استاد اس الئو بیرہ غمخوار ئس ہرا ننے سیاسی عمل ءِ برجاہ تخنگ کن ہمت تسکہ ۔ نن وختس خلیس ئنا گواچی مروسن و تینا کاریم تیان چَپ تموسن گڑا غمخوار ئس کہ ہرا ننے ولدا ہمت تسکہ ، ننے ولدا کسر تے رماغاکہ و ننا جوزہ غاتے زبان تسکہ ۔ ای اندا خیال آتیٹ گم ہمو یاداشت آتے یات کرسہ ئسوٹ کہ ہرافتیٹ غمخوار نا کمک ننتون اوار ئس ۔ ای اندا کیفیت ئٹ ئسوٹ کہ کنا موبائل آ میسج اس بس ۔ ای اتفاقاً اِستو نا شام تینا سنگت ئسے کن غمخوار ئنا غزل ئس رائی کریسُٹ ۔ اونا ورندی ءِ ترسہ اینو سہب ئنا غمخوار نا مرگ آن گڈ ہمو سنگت لکھاسس کہ غمخوار ہنا ننے آن ۔ ای دا میسج ءِ خنسہ تینا است ئنا لارہ تے کشینگ کن و سنگت تون تینا است ئنا ارمان تے بناء کریٹ و تینا جون ءِ سُبک کننگ کن گڑاس خڑینک خلکُٹ ولے او سنگت کنا ارمان تے خنسہ کنے تسلی تننگ کن پئے ” زندگی اندن ءِ پھل ” ۔ کنے سنگت نا دا ہیت ہچبر دوست بتئو ای یکدم اودے ورندی تریسہ پاریٹ کہ دا زندگی اف ، بلکہ دا غلامی ءِ کہ ننے آن دُنو دُر پُلسہ درسہ ءِ ۔ دا ہمو زوراک ءِ کہ ہرا ننے آن ننا بامڑد آتے پُلسہ ءِ ۔۔ او سنگت ہچو ورندی ئس تتّو ۔۔ ای ساعت ئس ودار کننگ آن گُڈ ولدا ہمو تہارا کوٹی ئٹ تینا خیالی آ جہانٹ نَت تخاٹ ۔۔
کنا گمان ئٹ پدا ہمو یات آک، ہمو ساعت آک برسہ ءُ کہ ہرافتیٹ ننکونہ نابود آتے کسر شان ترسہ غمخوار مستی دریکہ ۔ نن تینا سیاسی گَل آتیٹ براہوئی بولی و ادب نا بابت بھازا کاریم آتا ذمہ واری ءِ ارفینہ ننا اُست جم ئس کہ ننتو کمک اکن غمخوار ارے ، ہرانہ سیخا ٹی مدام نن تینا کاریم آتے سرجم کرینہ ، ولے اینو ہمو سیخا ءِ ننا زی آن دا زوراک آک ایسر کریر و ننے پدا غلامی نا شغانے خلکر ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
مودہ ماتم، عمل و بے عملی
نوشتکار: جعفر قمبرانی
بلوچستان ئٹ زانتکار آتا کسفنگ
سائیکالوجی نا اسہ تھوری ئسے نا رد ئٹ ہرا بندغ عمل کننگ کپک او گڑا تینا است ئنا لارہ ءِ چھاپ، رقص، چیہانٹ، مودہ ماتم یا ٹاکو تننگ یا گڑا خڑینک خلنگ ئٹ کشک۔
دا ہیت ئٹ مگہ شک اس ارے کہ ننے آن ہرکس نا است ئٹی اسہ بھلو لارہ ئسے؟ ننے آن ہرکس نا است آ اسہ خیسنو بھلو پوغ اس تخوکے و تینا بیر ءِ ہلنگ کن تیوہ غا زند بے جارات اُن۔ دا بےجاراتی ءِ وختس رقص ئسے ٹی گوہنگ نا کوشست کینہ و وختس سوشل میڈیا نا اسہ پوسٹ ئسے نا وسیلہ ئٹ دانگ اینگ کننگ نا کوشست کینہ۔ انت دا وڑٹ مگہ ننا بیر ہلنگ مریک؟ انت مگہ ننا بندغ آتا کہنگ کسفنگ ایسر مریک؟ انت بلوچ زنک ایسری دا “نوحہ خوانی” ئٹ چٹ گٹکار مریسہ ایسر مریک۔
یخینن اخا۔
اینو براھوائی ادب نا گچین آ شاعر، نوشتکار پر وہ پروفیسر غمخوار حیات نا ٹارگٹ مننگ آ سوشل میڈیا غا بھاز بھلو نوحہ خوانی، مودہ وماتم اس بش کہ اللہ و امان۔
انت دا مودہ مگہ اولیکو وار مننگ ئٹی ءِ؟ انت غمخوار مگہ اولیکو بندغ ئسک؟ نئے، بلکن ہر وار اسہ بلوچ و بلوچ راج دوست اس سیال ئنا سم تا گواچی مریک و نن ہندن مودہ تریسہ پدی تینا زند ئنا ہڑدُڑ اتیٹی لگینہ۔
انت مگہ ننے آ فرخ تمک؟ انت مگہ حالیت آک مٹ مریرہ؟
انت نن تینا بے عملی ءِ دا “نوحہ خوانی” و مودہ پِراد ئٹ ڈکھنگ کینہ؟
اگہ اؤ، گڑا تینا سینہ ٹی لگنگوک آ سم ئنا انتظار کبو و تینا است ئنا لارہ ءِ شولنگ کن سوشل میڈیا غا فیک اکاونٹ جوڑبو، ناچ و رقص ئنا دیوان ہڈ ایتبو و مادہ تننگ کن خڑینک مُچ کریسہ کبو۔
سوشل میڈیا غا اسٹ اس لکھاسس “پروفیسر غمخوار حیات نا ہننگ آن براھوائی ادب چوری مس” کنا است آن توار پیش تمیسہ کرے کہ انت ننا ادب، دیہاڑ و ننا بروکا پدریچ مگہ ہموتم چوری متؤسر کہ ہراتم آن نن عمل و بے علمی نا کش مہ کش ئٹی تموک مودہ کننگ بنا کرین!!!
اؤ گواچنی ننا ادب چوری ءِ، دیہاڑ بیبالوک و راج بزہ ءِ ولے اینو آن اخا ہفتاد سال ناسے کہ نن چھپ کرینن توسنن۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
سلہہ بند ڈیتھ اسکواڈ آتا کارندہ غاک اودے اونا اُرا نا خڑک آ سم کاری کرسا خلکر۔
بلوچستان نا ضلع نوشکے آن حوال تا ردئٹ نوشکے کلی مینگل نا ہند ئٹ حکومتی مخ تف سلہہ بند ٹولی ”ڈیتھ اسکواڈ“ آتا سم کاری نا سوب آن براہوئی بولی نا پنی آ شاعر، نوشتکار و دانشور پروفیسر غمخوار حیات بیران مس۔
غمخوار حیات براہوئی افسانہ نگار، مٹ کار، شاعر و انشائیہ نگار اس ئس ہرا جتا ادب نا صنف آتیٹ خذمت سر تسوسس و بیست کتاب نوشتہ کرینے، او راسکوہ ادبی دیوان و اوتان کلچر اکیڈمی نا جوڑ کروک آ بندغ آتیان ئس۔
گورنمنٹ بوائز ڈگری کالج نوشکے ٹی اسسٹنٹ پروفیسر نا دروشم ئٹ فرض سر تروکا محمد خان عرف غمخوار حیات اینو تینا اُرا نا خڑک آ کلی مینگل ئٹ پاکستانی مخ تف ڈیتھ اسکواڈ آتا سم کاری آن بیران مس۔
غمخوار حیات نا خون آ جتا سیاسی، چاگڑدی، نوشتکار، شاعر و غمخوار حیات نا خوانوک آک بھاز غم و افسوز نا درشانی کننگ ءُ۔
اوفتا پاننگ ءِ کہ غمخوار حیات نا شہادت آن نہ بیرہ براہوئی ادب بلکہ علم و دانش نا کڑدہ غاتے ہم بھاز نسخان رسینگانے۔
اندا ردئٹ بلوچ اسٹوڈنٹس ایکشن کمیٹی تینا اسہ بیان اسیٹی پارینے کہ بلوچستان ئٹ استاد، شاعر، سیاسی جہدکار، نوشتکار، خوانندہ، و صحافی تیتون اوار جتا فکر ئنا پرامن بندغ آک ہرا قلم و کتاب نا وسیلہ ئٹ علم تالان کننگ نا کوشست ئٹی مسنو، ساندہ ظلم ئنا گواچی مرسا کرینو۔
بیان ئٹ پین پاننگا کہ بلوچ چاگڑد اسہ اندنو وخت ئسے آن گدرینگنگ ءِ ہراڑے پرامن و قلم نا بولی ءِ ہم سگنگپک، ننا ہر ہمو بندغ ہرا سوچ خلیک و چاگڑد نا جوانی کن جہد کیک اودے خُلیفنگک و تڑی تننگک یا پدا بے دڑدی ئٹ کسفسا اونا توار ءِ چپ کرفنگک۔ ولے ہمو طاغت آک تپسہ کہ علم و سوچ اسہ توفک ئسے نا سم آن ایسر مفک بلکہ گشیتر سوگو و طاغتور مرسا کیک۔
”پروفیسر غمخوار حیات براہوئی بولی نا اسہ استاد، ادیب و دانشور اس ئس ہرا تینا قلم نا وسیلہ ئٹ نہ بیرہ براہوئی ادب و بولی ءِ شونداری تننگ ئٹ جہد کرے بلکہ تینا چاگڑد ئٹ علم ءِ تالان کننگ کن کوشست کرے ہرا اسہ گواچن ءُ استاد ئسے نا آدینک ءِ۔ اودے سوچ خلنگ، نوشتہ کننگ، خوانفنگ، لمئی بولی ءِ شونداری تننگ و خوانندہ غاتے علمی کسر آ شاغنگ نا سزا تننگا ہرا سوچ خلنگ و علم دوئی کننگ آ رکھ خلنگ نا بے سہب ءُ کوشست ئسے۔ اونا براہوئی ادب ئٹ کاریم اسہ مسیحا ئسے آنبار ءِ ہرا لمئی بولی ءِ شونداری تننگ ئٹ تینا راجی کڑد ءِ سر تس۔ اسہ پرامن و علم دوست استاد ئسے نا دا وڑ بے دڑدی ئٹ خون بلوچستان نا تیوہ علمی سرکل آ اسہ جلہو ئسے۔“
بلوچستان نا استاد و دانشور آک ساندہ جلہو تا پلویڑ ئٹ برسا کرینو ہراڑے حکومتی مخ تف ٹولیک بلوچ آتا کیہی استاد آتے بے دڑدی ئٹ کسفسا اوفتا سوچ و توار ءِ شیف شاغنگ نا بے سہب ءُ کوشست کرینو۔ استاد صباء دشتیاری آن ہلیس غمخوار حیات اسکان ہمو علمی کاروان ءِ ہرادے علم نا ڈیوا روشن کننگ نا سزا تننگا، پروفیسر صباء نا سریاب ئٹ و غمخوار حیات نا نوشکے ٹی شہادت بلوچ راج نا فکری سوچ آ جلہو ءُ۔ دا علم ئنا ہمو مسافر آک ئسر ہرافک چپی نا جاگہ غا نوشتہ کننگ، سوچ خلنگ و علم تالان کننگ ءِ اہمیت تسر، اینو اوفتان بار انگا علم دوست استاد آتا سوب آن بلوچستان ئٹ علم نا ڈیوا روشن ءِ۔ اوفتان بار انگا استاد آتے ٹک کننگ نہ بیرہ بھلو ڈوہدار ءُ عمل ئسے بلکہ بندغی سوچ ءِ کسفنگ نا برابر ءِ۔“
ترجمان پارے کہ نن پروفیسر غمخوار حیات نا بے دڑدی ئٹ خون ءِ نہ بیرہ شیف خلینہ بلکہ غٹ استاد آتیان خواست کینہ کہ دن انگا بھلا ڈوہدار آ عمل نا برخلاف بش مریر و جوانو ردعمل اس شان ایتر تاکہ علم آ رکھ خلنگ نا دا ڈوہدار آ کوشست آک بے سہب مریر۔ و ذمہ وار آ ادارہ غاتیان خواست کینہ کہ دا ڈوہدار آتے سزا تننگ ئٹ تینا کڑد ءِ سر ایتر۔
اندن بلوچ اسٹوڈنٹس آرگنائزیشن پروفیسر غمخوار حیات نا خون آ ردعمل بیان اس ترسا پارے کہ براہوئی بولی نا پنی آ شاعر، استاد غمخوار حیات نا نوشکے ٹی سلہہ بند بندغ آتا سم کاری آن شہادت بلوچستان نا علمی، ادبی و فکری وجود آ اسہ پین بھلو ٹپ ئسے۔ دن انگا قلم نا خواجہ غاک ہرا تینا لوز آتا وسیلہ ئٹ بندغی ڈکھ، راجی مارشت و چاگڑدی دڑد ءِ زبان ایترہ، اوفتا چپی بیرہ اسہ بندغ ئسے نا نسخان مفک بلکہ تیوہ غا فکری منظرنامہ نا ماتن مریک۔
ترجمان پارے کہ شہید شاعر ہمو حساس و شعور تخوکا توار آتیٹ اوار ئس ہرافک براہوئی بولی، بلوچ تہذیب و بندغی مارشت آتے تینا قلم نا وسیلہ ئٹ معنہ تسر، اونا شاعری بیرہ لوز آتا شون الو بلکہ پدماندئی، امیت، مزاحمت و زند ئنا ڈکھ آتا فکری درشانی ئس۔ او اسہ استاد ئسے نا دروشم ئٹ ورنا غا زنک ءِ بیرہ تعلیم تتو بلکہ شعور، سوج و چاگڑدی ہمگرنچی نا مارشت ہم تس۔
بیان ئٹ پاننگا کہ بلوچستان وختی آن تعلیمی نیستی، فکری جمود و بے رکھوک کون آ ویل آتا گواچی ءِ، دن انگا وخت ئٹ ادیب، شاعر و علمی بندغ آتا خون اسہ بھیم بش کروکو حالیت ئسے نا شاہدی ایتک۔ ہمو چاگڑد آک ہراڑے کتاب، قلم و فکر ئتون تفوک بندغ آک رکھوک مفس ہموڑے اشتماعی شعور مدان مدان آ زوال نا گواچی مریک، علم نا خواجہ غاک چاگڑد نا ہمو ڈیواک مریرہ ہرا تارمہ غا وخت آتیٹ ہم امیت، ہیت و گپ و فکری باسنی ءِ زندہ تخرہ۔ بی ایس او نا بنجاہی ترجمان خواست کرے کہ تدینی نا صاف پٹ و پول کرسا ذمہ وار آ بندغ آتے قانود نا مونا ہتنگہ و بلوچستان ئٹ علمی، ادبی و خوانفوکا بندغ آتا رکھ اکن سوبر ءُ گامگیج کننگہ۔
تینا مزّل کہ دُن رائی روانُن نن بروکا ساف ئنا خاتر
اُمیت آجوئی ناچیدہ نشانُن نن بروکا ساف ئنا خاتر
نن اُن ڈسّ آسراتی روشنی گوربام ئنا سنگت
تینا گُڈّی سُم ءِ تینکے تخانن نن بروکا ساف ئنا خاتر
اسُل چُرتے تہ نی خلپہ اَلون بیرے نما اَلّم
چٹکو چُست ہم تکڑہ جوانن نن بروکاساف ئنا خاتر
ہزارآ دڑد ءُ ویل آتے سغان کنگُن بروکا زنک ئکن تینا
زرابی سُم تےسینہ غا سہانُن نن بروکا ساف ئنا خاتر
تلاری مش تیٹی پیدل سفر برجا تہاری تیٹ
کلاشن کوپہ غا بڈے گلانُن نن بروکا ساف ئنا خاتر
کرک استے تینا بھلّن کنا آئی برون خلقا نن ہم الّم
اگر کہ نن نمے آن مُر اِنانن نن بروکا ساف ئنا خاتر
جوانی زندگانی کُل ننے دوست اسُرہ الیاس
دتر تیٹی ولے کاٹم مَشانُن نن بروکا ساف ئنا خاتر
شاعر: سنگت الیاس
نظم
اے گنوک آتا وطن۔۔ نے انت پاؤ
نا دا دیوانک نے آ اندن فدا ءُ
رژن ئسے آ دنکہ پروانس مرے
دنکہ مَست ءُ سیسو ئس
طوبے نا پاک آ رژن اکن
گوہی کُنے
آسمان آ کائے سر خلے
طوبے نا چکاس ءِ ہلے
ولدا برے
دنکہ مَست ءُ ککہو ئس مہردار ئنا
چلتن نا خزم آتیکہ کوکار ئٹ تینا لیکو خلے
ھالو خلے
لاڈے و لیلاڈو خلے
اندنو چَٹ نا گنوکاک ۔۔۔ اے وطن
کیرا نے اندن دتر تیٹی تینا سینگار دا
دنکہ تِتلی ئس ہتم نا مُد ہٹی سینگارے مَست
گواڑخ ئس
یا سور پُل ئس
منگلی ئس
یا گلاب ئس
اخہ در سینگارے چلتن نا دَری آ
کیرا نے اندن دتر تیٹی تینا سینگار دا
آھو نا آجوئی کہ دا اندن گنوک ءُ
دنکہ سحر ءِ سینا پِرک
کیہی سال آتیان پد
ساربان آتا چراغ آ، رژن ئنا برانز آتیا تینے گنوکی ئٹ ہُشیک
فلسفہ ءِ عشق ئنا بیرہ گنوک آکو گڑاس
داکہ نا دیوانہ غاکو دافتہ کچ و کہیل اف
داکہ نا مریم، رشیدے
سمول ءِ، اونا ریحان ءِ
یاسمعیہ ءِ، یا پھل وسیم ءِ
بانڑی ءِ
آصفہ ءِ
اف عرب تیٹی دنو
نئے کہ عراقی تیٹ ارے
نئے مسونے اوغان آتو
نئے تامل آتا لشکر ئٹ دُنو رُدانے سر گنوک
داکہ نا دیوانک غاکو ۔۔ اے وطن
اف دیہاڑ ئٹ دنو پین
کس ئتو اف دُنو شین
زائم بلوچ
اے لمہ دیار
اے کنا لمہ دیار، نے کن تسر مہر ئٹی او جانے
اے کنا لمہ دیار،نے کن تینا ہر خواہش قربان کریر
اے کنا لمہ دیار، نے کن ہر شہید ناز اسیٹی زخصت مریک
اے کنا لمہ دیار،نے کن کپ جغر نا است ئنا ہم سو تخوکے
اے کنا لمہ دیار،نے کن سگے تخار امیل ئٹ اومیت جابہ ٹیٹی
اے کنا لمہ دیار نے کن گڈیکو سم تے بوسہ تسر تخار
اے لمہ دیار، نا دڑد ء تینتو خوندی کریر توسر
اے کنا لمہ دیار،نے کن سنگت،ایلم،استاد کل سدخہ مسور
اے کنا لمہ دیار، نے تن مہر ٹی دن خمب ہلکر
اے کنا لمہ دیار،اینو نی ہم عجب ناز ٹی ئس
اے کنا لمہ دیار مش اک ہلو ہالو خلیرہ
اے کنا لمہ دیار،نگارے چرخ تیرا تینا مہرواناتے کن
اے کنا لمہ دیار،اینو مش اک سینگار ء دلبراتے کن
اے لمہ دیار امر شنک مفر ای
اے لمہ دیار امر قربان مفر ایک نا سینہ غا ماران تخوکے
اے لمہ آر نی تینا نرمزار آ مارتے
زندے قربان کریر،تینا گیچینا
دو آ تخارک دم تے ہنینا
ٹاکو مخنگ ئٹ ندر مسر
جپار دنگ آ مہرو وفاتا
گوری مریو اے لمہ دا دلبراتے کن
مش یار
