اے غازی وطن نا نمے یات کینہ
شغان ء لغوری نا ہر وخت سہینہ
ہراتم کہ خمپن نما ڈس نشان ء
الشوک ہبک کہ سفا مش مرینہ
بلہ جل او پٹوک ولایت نما پد
اگہ پائے کس راست گڑا نن چڑینہ
یزیدی آ دوراٹ فرعون ام شلے سم
ننے آ مرے حیف گر تولوک کہینہ
مزاحمت نا سیخا اے جل آفتاب نا
دا دیگر نا جنگ ءاٹ اوار نن مرینہ
گوریچ بلوچ
بلوچستان نا ضلع خضدار نا علاقہ وڈھ ئٹی برجاء قبائلی چک و تاڑ نا برخلاف بلوچستان نیشل پارٹی (مینگل) نا کنڈ آن اینو جتا علاقہآتیٹ برانز کننگا۔
کوئٹہ تون اوار بلوچستان نا جتا علاقہ آتیٹ بی این پی نا باسک آک کسر تے بند کریسہ ٹریفک ءِ بند کریر ہرا نا سوب آن کیہی اُلاخ آککسر نا تومکا کنڈ آ تیا کیہی گھنٹہ اسکان گھٹ مسر۔
جتا شار تیٹ بی این پی نا باسک آک روڈ آتیا پیشتمار و جتا ہند آتیا پارٹی راہشونک ہم برانز ئٹ اوار مسر، باسک آک کسر تیا ٹئیرہُشیسہ برانز کریر ہراڑان مسافر و ناجوڑ آتے باز فریشانی مس۔
بی این پی مینگل نا کنڈ آن تدوکا ہفتہ وڈھ ئٹی برجاء چک و تاڑ نا برخلاف بلوچستان ٹی پہیہ جام ہڑتال نا پڑو کننگاسس۔
بلوچستان نیشنل پارٹی نا کنڈ آن شنگ مروک پڑو نا رد ئٹ وڈھ و ایب کیب ئٹی ڈیتھ اسکواڈ نا سرکاری مخ تفی و سڑدار اختر جانمینگل نا برخلاف چم بازی تا برخلاف تیوہ بلوچستان ٹی بھلا کسر تے بند کریسہ برانز کننگا ہرا نا سوب آن تیوہ بلوچستان ٹی دا وختآ ٹریفک نا ہن و بر تیوہ بند کننگا۔
بی این پی نا باسک آک کوئٹہ و ایب کیب ئٹ مُسہ جاگہ غا بھلا کسر تے بند کریر و کچلاک، قلعہ سیف اللہ، ہرنائی، نوشکی، خاران،دالبندین، پنجگور، تربت، گوادر، حب، آواران، خضدار، سوراب، بسیمہ، قلات، منگچر، مستونگ، سبی، ڈیرہ مراد جمالی، بارکھان و ایلوعلاقہ آتیٹ برانز کریسہ کسر تے بند کننگا۔
یاتی مرے کہ تدوکا تو بلوچستان نا ضلع خضدار نا تحصیل وڈھ، ہرا بی این پی مینگل نا راہشون و بنجائی وزیر سڑدار اختر مینگل ناباوہ پیرہ ئی علاقہ ءِ، ٹی اونا و بلوچستان ٹی ڈیتھ اسکواڈ نا سروک شفیق مینگل نا نیام ئٹ اسٹ ایلو نا برخلاف مورچہ بندی نا حوالمونا بس۔
بلوچستان نیشنل پارٹی نا کنڈ آن پریس کانفرنس ٹی دا دوبہ خلنگا کہ وڈھ ئٹی برجاء ٹارگٹ کلنگ و شاری تیان بھتہ ہلنگ ٹی شفیقمینگل و اونا کارندہ آک تُد ءُ و ہرکس بھتہ تتو اودے شفیق مینگل نا پاننگ آ خون کننگک و دننگا تدینی تا گواچی زیات واپاریک مسنو۔
بی این پی مینگل نا دوبہ ءِ کہ ریاستی ادارہ آک شفیق مینگل و اونا کارندہ آتے دوارہ بلوچستان ٹی منظم کریسہ بلوچ سیاسی باسکآتا برخلاف کاریم ئٹ ہتنگ خواہرہ ہمر کہ مُست کیہی سال اسکان کریر۔
ایلو کنڈ آن شفیق مینگل نا گمانی ڈیتھ اسکواڈ نا باسک آک تدوکا دے تیٹ کوئٹہ پریس کلب ٹی پریس کانفرنس کریسہ پاریر کہ بی اینپی مینگل نا دوبہ آک راست افس و اختر مینگل شار ئٹ امن و ایمنی ءِ خراب کریسہ تینا حکومت و سڑداری ءِ برجاء تخنگ خواہک۔
بلوچستان نا ضلع کیچ نا علاقہ کولواہ ئٹ ایف سی نا قافلہ غا مروک جُلہو ئٹ اسہ میجر و اسہ سپاہی اس مرگ ئنا گواچی، و اِرٹ ٹپی مسر۔
کوالخوا تا رِدئٹ تراک آن گڈ خڑک ئنا مش تیان نادرست جلہوکار آک سُم کاری ءِ بناء کریر ہرانا سوب جانی نسخان آک مسر۔
داکان مُست بلوچستان نا ضلع شیرانی ئٹ نادرست سلہہ بند بندغ آتا چیک پوسٹ آ جلہو اٹ اسہ ایف سی و مسہ پولیس کارندہ مرگ ئنا گواچی مسر، و اسہ جلہو کار اس ہم خلنگا۔
تدینی نا برخلاف قبائلی راہشونک قاسم خان شیرانی نا راہشونی ئٹ علاقئیک برانز کریسہ ڈیرہ اسماعیل خان کسر ءِ بند کرینو ہرانا سوب گاڑی تا مرغن چِر اس لگانے۔
برانز ئٹ پولیس کارندہ غاتا مخلوق ہم اوار ءِ ہرافک جوْن تیتون اوار تولوک برانز کننگ ءُ۔
جلہو نا گواچی مروک کارندہ غاتیٹ سب انسپکٹر بہادر خان، کانسٹیبل باز خان و کانسٹیبل محمد افضل اوار ءُ۔ اندن ایف سی کارندہ نا چاہنداری ثناء اللہ نا پِن آن مسونے، جلہو ئٹ ایف سی حوالدار محمد حسین ٹپی مس۔
شیرانی ئٹ پولیس و ایف سی آ جلہو تا ذمہ واری تحریک طالبان پاکستان ارفے و کیچ جلہو نا ذمہ واری ءِ بلوچستان لبریشن فرنٹ ارفینے۔
بلوچستان لبریشن فرنٹ نا ترجمان میجر گہرام بلوچ میڈیا غا شینک بیان ئٹی پارے کہ بی ایل ایف نا سرمچار آک ضلع کیچ، کولواہ نا علاقہ بلور و سگک نا نیام ئٹ قوضہ گیر لشکر نا ہفت موٹر سائیکل تیا تالان قافلہ غا جلہو کریر۔ قافلہ ئٹ اوار اِرا موٹر سائیکل ترند جلہو نا دک ئٹ بسر اندن ایلو موٹر سائیکل تے ام ٹک کننگا، ہراڑان اوفتیا سوار 6 بندغ ہمو ہند آ مرگ ئنا گواچی مسر و کہیک ٹپی مسر۔
ترجمان پارے مرگ ئنا گواچی مروکا تیٹی ثاقب پنی ءُ اسہ میجر ئس ام اوار ءِ۔
داکان مست ہفتہ نا دے ضلع کیچ نا بنجائی شار تربت نا ہند جوسک ئٹ نادرست بندغ آک فورسز پوسٹ آ بمب جلہو اس کریر۔
پولیس نا رد ئٹ نادرست بندغ آک ایف سی 168 ونگ نا پوسٹ آ چغلی بمب اس خسار ہرا ترند تراک ئٹ ترخا۔
پن کروک جلہو نا ذمہ واری ءِ ہم بی ایل ایف ارفے۔
یاتی مرے دا جلہوک اندنو وخت ئسے آ مسونو کہ نو دے مُست تربت شار ئٹ پاکستانی ادارہ تا اسہ خاص ءُ قافلہ اسیٹی بلوچ لبریشن آرمی نا مجید برگیڈ نا فدائی اس جلہو اٹ ٹِک کرے۔
دا جلہو ءِ بی ایل اے – مجید برگیڈ نا ارٹمیکو زالبول فدائی سمعیہ قلندرانی بلوچ کرے۔ جلہو اٹ پاکستانی ڈھکوک ادارہ آئی ایس آئی نا سیکٹر کمانڈ ءِ ٹِک کننگ نا احوال آک ءُ و جلہو اٹ کم آن کم اِرا آفسر نا مرگ ئنا گواچی مننگ و ٹپی مننگ نا ہم حوال آک مون آ بسونو۔
Breaking news | Monitoring
CCTV footage of Baloch Liberation Army – Majeed Brigade’s female “Fidayee” Sumaiya Qalandarani carrying out the attack on Pakistani military’s secretive agencies in #Turbat city of district Kech on 24th June 2023 pic.twitter.com/16Gm9aleSO
— Bahot باہوٹ (@Bahot_Baluch) July 1, 2023
رسینگوکا حوال تا رد ئٹ چاغی ٹی اوغان باہوٹی کیمپ ئٹی اسہ مسڑ ئسے غیرت نا پن آ کسفنگانے۔
شابیتی حوال تا رد ئٹ مسڑ ءِ کسفوکا اونا جند ئنا ایلم مسنے ہرا غیرت نا پن آ تینا ہیڑ ءِ کسفینے۔
لیویز نا رد ئٹ اوغان باہوٹی کیمپ گردی جنگل ٹی درو اسہ مسڑ ئسے کسفنگانے، اودے کسفنگ ٹی اونا جند ئنا ایلم سید محمد ولدباچا خان نا دو مننگ نا گمان ارے۔
مسڑ نا ایلم ءِ دزگیر کریسہ چاغی تھانہ ٹی بندی کننگانے و ودیک پٹ و پول برجاء ءِ۔
حوال تا رد ئٹ لیویز فورس نا ٹولی اڈ تریسہ لیویز نا کنڈ آن چھاپہ مننگ ءِ۔اسسٹنٹ کمشنر دالبندین نا رد ئٹ زوت پٹ و پول پورو کننگو۔
ایلو پارہ غان علاقائی حوال تا ردئٹ تدینی آن گڈ علاقائی جرگہ تولسہ مسڑ نا خوْنی ءِ بخشنگ نا فیصلہ تسوسس ولے احوالکاری تلہغا توار توار آن گڈ لیویز کاروائی آ بیوس مس۔
فدائی جلہوک و ریاستی بیانیہ
ٹی بی پی سرگپ
بلوچ راجی جنز آجوئی تینا تاریخی چرجوئی تون برجاء ءِ و برجاء انسرجنسی نا مہکش خیر بخش مری تحریک ءِ آغا عبدالکریم نا بغاوت نا چرجوئی پن کریکہ۔ ہفتاد سال ئٹ بلوچ راجی آجوئی نا کیہی شیفی بڑزی تیان تدیسہ تینا چرجوئی ءِ برجاء تخنگ ئٹ سرسہب مسنے و برجاء انسرجنسی تدوکا شورش آتیان زیات سوگوْ دروشم ئٹ برجاء ءِ۔
ریاست پاکستان ہفتاد سال آن بلوچ راجی جنز ءِ منہ بندغ یا خاص ءُ ٹولی ئسے نا ویل پاریسہ انسرجنسی نا وجود آن نمن ءِ۔ بیست و یکمیکو کرن تون اوار جنز آجوئی نا بناء ءِ جسٹس نواز مری نا خون و خیر بخش مری نا دزگیری تون گنڈنگ نا کوشست کننگا۔ جہد آجوئی ءِ ایسر کننگ ٹی بے سہب مننگ آن گڈ فوجی ڈکٹیٹر جنرل پرویز مشرف بلوچ راجی جنگ ءِ مُسہ سردار تون گنڈیسہ پاریسس کہ “نن اوفتے اندنو جاگہ سے آن خلون کہ اوفتے سماء ہم تمپرو” ہرا نا ورندی ٹی نواب خیر بخش مری پارے کہ ریاست ءِ ہم سماء مرے کہ نن ہفتاد نا بلوچ افن و ریاست ءِ ہمو بولی ٹی ورندی تننگو۔
جنرل مشرف نا حاکمیت آن گڈ پاکستان نا مسکوہی صدر آصف زرداری بلوچ آتیتون گپ و تران نا درشانی کرے، اوفتیا شست سال آن مروک ظلم و بے دادی تیا بشخنداری کرے و پیپلز پارٹی ‘آغاز حقوق بلوچستان’ پڑو کرے ولے آزاتی نا جنز ءِ ایسر کننگ ئٹ بے سُہب مننگ آن گڈ شرم الشیخ سمٹ ئٹ بلوچ جُنز ءِ انڈیا تون گنڈنگ نا کوشست کننگا۔ ہراڑان گڈ ہزار آ بندغ تے زوراکی ئٹ بیگواہ کننگا و سد آتا جشوک جونک سڑک آتا کرک مَش و گیاوان تیٹ خسنگار۔
بلوچ جنز ئٹ جند ندری جلہو تا بناء اِرا ہزار یانزدہ ئٹ درویش بلوچ نا کوئٹہ ئٹ شفیق مینگل آ جلہو آن مس ولے اِرا ہزار ہژدہ ئٹ ریحان بلوچ نا دالبندین ئٹ چینی انجینئر تیا جند ندری جلہو آن گڈ بی ایل اے مجید بریگیڈ پاکستان و چین ئنا مفاد آتیا بھلو جلہو کرے۔ شاری بلوچ، جنز آجوئی نا اولیکو زالبول جند ندر ئس ولے سمعیہ بلوچ نا جند ندری جلہو آن گڈ اولیکو وار مجید بریگیڈ زالبول فدائی تا عکس آتے شینک کرینے ہراڑان گمان کننگ مریک کہ مجید بریگیڈ ئٹ زالبول تا بھلو کچ اس اوار ءِ۔
شاری بلوچ نا جند ندری جلہو آن گڈ ریاست اودے ذہنی ناجوڑ اس گوندنگ نا کوشست کریسس و سمعیہ بلوچ نا عمل ءِ توتک ئٹ اونا خاہوت نا بندغ تے زوراکی ئٹ بیگواہ و شہید کننگ نا رد عمل پن کننگک ولے بلوچ انسرجنسی نا تاریخ آن واخب دانشور آک چرجوئی ئٹ درشانی کریسہ بسنو کہ بلوچ انسرجنسی، آجوئی کن شعوری بنداو آ بناء کننگانے و بلوچ گل آتا تحریکی فیصلہ غاک ادارہ جاتی بنداو آ کننگرہ۔
بلوچ آجوئی دوست ٹولیک و گل آک بلوچ راجی آجوئی نا جنز ءِ اِرا دہائی آن سوگوْ دروشم ئٹ برجاء تخانو و ریاست کن ممکن اف کہ او بلوچ انسرجنسی نا وجود آن نمن مریسہ تاغت نا زور آ انسرجنسی ءِ ایسر کننگ کے۔ اگہ ریاست نا بے دادی نا زور آ بلوچ راجی جنگ ءِ ایسر کننگ نا کوشست آک برجاء مسر گڑا دا پاننگ رد مفرو کہ بلوچ سلہہ بندغ گل آتا جلہو تا ترندی ٹی ہم ودکی مرو۔
بھارتی ریاست مہاراشٹرا ٹی بس ئٹ خاخر لگنگ آن 25 بندغ بیران و 8 بندغ ٹپی مسر۔
پیشن ملکی حوال تروک ادارہ ‘رائٹرز’ بھارتی اے این آئی نیوز ایجنسی نا بابت پارے کہ بس یاوتمال آن پونے آ ہننگ ئس، ہرا ٹی 32 بندغ سوار ئسر۔
بلڈھانہ نا ضلع کلکٹر ڈاکٹر ایچ پی تمموڈ اے این آئی ءِ پارے کہ تدینی ٹی 25 بندغ کسکنو، ہرافتا چاہنداری مننگ ءِ۔ او گیشتر پارے کہ ڈی این اے نا ذریعت ئٹ چاہنداری آن گڈ جونک خاہوت آتا دوٹی تننگور۔
بھارتی سر وزیر نریندر مودی اسہ بیان اسیٹ پارے کہ بلڈھانہ ٹی بھیم بش کروک تدینی آ اُست ہسون مس، کنا دعاک کہوک آ بندغ تا خاہوت آتیتون اوار ءُ۔ اونا پاننگ ئس کہ ہندی بست و بند زیمی تے کمک کننگ ءِ۔
خیال ئٹ مرے کہ 2 جنوری 2023 آ بھارت نا ریاست اوڈیسا نا ضلع بالاسور ئٹ مسافر ریل تا تدینی ٹی 50 بندغ کسکسر و 300 بندغ ٹپی مسوسر۔
برطانوی حوال تروک ادارہ ‘رائٹرز’ نا رپورٹ نا ردئٹ اوڈیسا نا ضلع بالاسور ئٹ مسافر ریل پٹڑی آن دڑیسہ مال گاڑی تون ڈک لگاسس، ہرا نا سوب آن مرک آک مسر اندن ٹپی آتے اسپتال آ دننگاسس۔ دے کہی بنگال نا چیف سیکریٹری ایچ کے ڈیویڈی صحافی تے پاریسس ریل ئنا ڈک لگنگ ‘گندہ ءُ تدینی’ ئسے۔
اینو بلوچستان نا بنجائی شار کوئٹہ ٹی تھانہ غا مروک چغلی بمب جلہو ٹی اسہ کارندہ ئس ٹپی مس۔
سلہہ بند موٹر سائکل سوار آک سول لائن تھانہ غا چغلی بمب ئس خسار۔ ہرانا سوب آن اسہ کارندہ ئس ٹپی مس۔
ٹپی آ کارندہ ءِ کیب ئنا اسپتال آ سر کریسہ فورسز شار ئنا تہہ و پیشن نا کسر تیا چیکنگ ءِ بناء کرینے۔
پن کروک جلہو نا ذمہ واری ءِ یونائیٹڈ بلوچ آرمی نا ترجمان مزار ارفیسہ پارے کہ ہفتہ نا دے دوانزہ چل منٹ آ ننا سرمچار آک کوئٹہ ئٹ سول لائن تھانہ غا چغلی بمب اسیٹ جلہو کریر جلہو ئٹ اسہ کارندہ اس مرگ ئنا گواچی اندن اِرا کارندہ بھاز ٹپی مسر۔
ترجمان پارے کہ نن پاش کننگ خوائنہ کہ 27 جون آ کوئٹہ شار ئٹ پولیس کارندہ تے ٹک کننگ نا ننا کارروائی نا ذمہ واری ءِ اسہ بیرہ پِن ئنا مذہبی ٹولی اس اسہ دروغ حوال ئسے نا ذریعت ئٹ ارفیسس ہرانا نن مذمت ءِ کینہ و او مذہبی ٹولی ءِ خبڑدار کینہ کہ او دن انگا کاریم تے یلہ کے۔
ترجمان گیشتر پارے کہ ننا جلہوک آزات بلوچستان نا دوئی مننگ اسکان برجاء مرور۔
بلوچ لبریشن آرمی نا ترجمان جیئند بلوچ میڈیا ٹی شینک کروک تینا بیان اسیٹی پارینے کہ بی ایل اے نا سرمچار آک مستونگ و مارگٹ ئٹ ارا جتا جتا جلہو تیٹی قوضہ گیر پاکستانی لشکر ءِ ٹک کریر، جلہو تیٹی اسہ دژمن کارندہ ئس مرگ ئنا گواچی و مسٹ ٹپی مسر۔
جیئند بلوچ نا بیان نا رد ئٹ بی ایل اے نا سرمچار آک درو ننکان مستونگ نا علاقہ تلخہ کاوی ٹی قوضہ گیر پاکستانی لشکر نا اسہ پوسٹ ئسے پوسکنا سلہہ تیٹ ٹک کریر ہراٹی اسہ دژمن کارندہ ئس ہند آ مرگ ئنا گواچی مس وختس کہ دژمن ءِ پین جانی و مالی نسخان تون مون تروئی تما۔
ترجمان پارے کہ بی ایل اے نا سرمچار آک زرغون گیس فیلڈ آن خڑک مارگٹ نا علاقہ ٹی قوضہ گیر پاکستانی لشکر نا اسہ پوسٹ ئسے آ سلہہ تیٹ جلہو کریر و گرنیڈ لانچر ئٹ کہیی گولہ تے خلکر، جلہو نا سوب ود و کم مسہ دژمن کارندہ ٹپی مسر وختس کہ اوفتے پین بھاز مالی نسخان ارفوئی تما۔
جیئند بلوچ نا مستی پاننگ ئس کہ بلوچ لبریشن آرمی دا جلہو تا ذمہ واری ءِ ارفک و دا پک گمان ءِ کیک کہ آجو وطن نا دوئی مننگ اسکان ننا کاروائیک برجاء مرور۔
پاکستانی لشکر خضدار نا اِرا ہندی اِلہ مار و اسہ پسنی نا ہندی ورنا ئسے کراچی آن دزگیر کریسہ نادرست ہند آ درینے۔
بیگواہ مروک ورنا تا چاہنداری محمود نا مار محمد ہند جعفر آباد خضدار، محمد اعظم نا مار عاصم و محمد اسلم نا مار معراج اسلم ہند پسنی ببر شور نا پن تیٹ مسنے۔
خضدار نا ہندی بیگواہ بندغ تا خاہوت نا ردئٹ ہڑتوما ورنا تے 16 جون 2023 آ فورسز آک دزگیر کریسہ بیگواہ کرینو۔
خاہوت بندغی حق آتا ادارہ تیان ہڑتوما ورنا تا یلہ کننگ کن کڑد سر تننگ نا خواست کریسہ پارے کہ ننا دوستخواہ تا رکھوک یلہ مننگ کن ننا توار جوڑ مبو، داڑان مالو کہ اُرے مرے یا خدا کپ کہ سی ٹی ڈی دروغ نا مونتس اسیٹ اوفتے نسخان ایتے۔
اوفک پاریر نن سندھ نا حکومت آن خواست کینہ کہ اوفک پولیس و رینجرز آن سوج کیر کہ ہڑتوما خوانندہ تے 15 دے تدینگ آن گڈ ہم انتئے اسہ عدالت اسیٹ مونا ہتنگتنے۔
ایلو پارہ غان پسنی نا ہندی بیگواہ مروک ورنا نا بارو ئٹ احوالکار تا پاننگ ءِ کہ پسنی ببر شور بازار نا ہندی محمد اسلم نا مار معراج اسلم ءِ یکم جون 2023 آ کراچی نا علاقہ کلفٹن آن زوراکی ئٹ بیگواہ کننگا۔
حوال تا ردئٹ معراج اسلم آپٹک انسٹی ٹیوٹ آف ٹیکنالوجی کراچی نا خوانندہ سے اندن او گلشن اسٹوڈنٹس پلازہ کراچی ٹی رہینگاکہ۔
بلوچ لبریشن آرمی نا ترجمان جیئند بلوچ میڈیا غا شینک کروک اسہ بیان اسیٹی پارینے کہ ننا سرمچار آک کیچ نا علاقہ زامران ئٹ سادیم نا ہند آ قوضہ گیر پاکستانی لشکر نا اسہ چیک پوسٹ ئسے جلہو ٹی ٹک کریر۔
ترجمان پارے کہ سرمچار آک پوسکنا سلہہ تیٹ جلہو کریسہ اِرا دژمن کارندہ ءِ مرک ئنا گواچی کریر و وختس کہ کم آن کم مسہ کارندہ ٹپی کریر۔
او مستی پارے کہ بلوچ لبریشن آرمی دا جلہو نا ذمہ واری ءِ ارفک۔ آجوہ وطن نا دوئی مننگ اسکان ننا کاروائیک برجاء مرور۔
