بلوچ لبریشن آرمی نا ترجمان جیئند بلوچ میڈیا غا شینک کروک اسہ بیان اسیٹی پارینے کہ ننا سرمچار آک کیچ نا علاقہ زامران ئٹ سادیم نا ہند آ قوضہ گیر پاکستانی لشکر نا اسہ چیک پوسٹ ئسے جلہو ٹی ٹک کریر۔

ترجمان پارے کہ سرمچار آک پوسکنا سلہہ تیٹ جلہو کریسہ اِرا دژمن کارندہ ءِ مرک ئنا گواچی کریر و وختس کہ کم آن کم مسہ کارندہ ٹپی کریر۔

او مستی پارے کہ بلوچ لبریشن آرمی دا جلہو نا ذمہ واری ءِ ارفک۔ آجوہ وطن نا دوئی مننگ اسکان ننا کاروائیک برجاء مرور۔

بلوچ لبریشن آرمی نا جند ندر زالبول جلہو کار ءِ اینو تربت ئٹ گڈی ہند کننگا۔

تربت ئٹ پاکستانی لشکر نا اسہ خاص ءُ قافلہ سے جند ندر جلہو ئٹ ٹک کروک بلوچ لبریشن آرمی نا زالبول جلہو کار سمعیہ قلندرانی نا گڈیکو نماز دشتی بازار نا قبرستان ئٹ خواننگا۔

گڈیکو نماز ءِ آل پارٹیز کیچ نا مسکوہی کنوینر و جمیعت علماء اسلام نا صوبائی نائب امیر خالد ولید سیفی خوانا۔

گڈیکو نماز ئٹ جماعت اسلامی کیچ نا امیر و آل پارٹیز کیچ نا کنوینر غلام یاسین بلوچ، پیپلز پارٹی نا راہشون حاجی قدیر احمد، تربت سول سوسائٹی نا کنوینر گلزار دوست تون اوار شاری تا بھلو کچ اس اوار مس۔

خیال ئٹ مرے کہ ہفتہ نا نیمروچ آ چاکر اعظم چوک تربت ئٹ اسہ زالبول بمبار اس پاکستانی ڈھکوک ادارہ تا اسہ قافلہ سے ٹک کریسس۔

جلہو نا ذمہ واری ءِ بلوچ آجوئی دوست سلہہ بند گل بی ایل اے ارفیسہ پارے کہ دا جلہو ءِ بی ایل اے مجید بریگیڈ نا جند ندر سمعیہ قلندرانی بلوچ سر تسنے۔

بی ایل اے نا کنڈ آن شینک مروک بیان ئٹ گل ئنا ترجمان جیئند بلوچ پارے کہ دا جند ندری جلہو ءِ مجید بریگیڈ نا شیرزال زالبول جند ندر شہید سمعیہ قلندرانی بلوچ عرف سمو بنت عبید قلندرانی سر تسنے و او رضاکارانہ دروشم ئٹ مجید بریگیڈ ئٹ تینا خذمت آتے مونا ایس اینو دژمن آ سرسہب جند ندری جلہو کریسہ بلوچ دیہاڑ ئٹ زندہ سلیس۔

بیان نا ردئٹ بیست و پنچ سالی سمعیہ قلندرانی نا تعلقداری صحافت نا پیشہ آن ئس، او پنچ سال اسکان بلوچ لبریشن آرمی نا میڈیا ونگ ئٹ خذمت سر تریسہ کرے و دا نیام ئٹ بی ایل اے نا میڈیا ونگ ءِ سوگوْ و پر اثر جوڑ کننگ ئٹ اسہ اہم ءُ کڑد اس سر تس۔

یاتی مرے بی ایل اے مجید بریگیڈ نا دا ارٹمیکو زالبول ءِ ہرا جند ندری جلہو کرینے داڑان مالو کیچ آن تعلقداری تخوک شاری بلوچ کنفیوشس انسٹی ٹیوٹ نا چینی باسک آتے کراچی یونیورسٹی ٹی ٹک کریسس۔

بلوچستان نا ضلع کیچ آن پاکستانی فورسز اسہ بندغ ئسے زوراکی ئٹ بیگوائی آن گڈ بے ڈس ءُ ہند ئسے آ سر کرینے۔

زوراکی ئٹ بیگوائی نا گواچی مروکا بندغ نا چاہنداری شکور ولد نور جان نا پن ئٹ مسنے ہرا تمپ نا علاقہ پل آباد کسانو نا ہندی سے۔

احوالکار تا پاننگ ءِ کہ پاکستانی لشکر 25 جون آ ننکان چھاپہ خلیسہ پن کروک بندغ ءِ دزگیر کرے ہراڑان گڈ او بیگواہ ءِ۔

بلوچستان نا ضلع ہرنائی آن رسینگوک حوال تا ردئٹ درے ننکان ہرنائی، روڈ منگی نا ہند آ نادرست سلہہ بند بندغ آک کسر ءِ بند کریسہ بیست ئنا کچ کوئلہ دروک گاڑی تے ہشار و سم کاری کریسہ اوفتے نسخان تسر۔

حوال تا ردئٹ سلہہ بند بندغ آک پنجاب نا علاقہ رحیم یار خان نا ہندی اسہ بندغ ئسے ہم دزگیر کرینو۔ خن خنوک شاہد آتا ردئٹ گاڑی تے سم کاری کننگ آن گڈ بھن تننگانے۔

پن کروک جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی ارفینے۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ ننا سرمچار آک درے ننکان ہرنائی ٹی مڈی دروکا گاڈی تے بھس کریر و ڈپٹی کمشنر نا مچی ءِ ٹک کریر اندن اسہ شکبر ءُ بندغ ئسے دزگیر کریر۔

ترجمان پارے کہ بی ایل اے نا سرمچار آک ملخدو دیگر نا وخت ہرنائی آن خڑک زیارت نا علاقہ منگی ڈیم نا ہند آ بنجائی سڑک آ کسر ءِ بند کریر، سرمچار آک دا وخت آ پاکستانی صوبہ پنجاب، رحیم یار خان نا ہندی اسہ شکبر ءُ بندغ ئس دزگیر کریر ہراڑان سونج رونج برجاء ءِ۔

او پارے کہ سرمچار آک بنجائی سڑک ءِ درے ننکان تیوہ بند کریر اندن مڈی دروکو بیست نا کچ گاڈی تے خاخر و سم کاری کریسہ بھس کریر۔

جیئند بلوچ پارے کہ انداڑتون سرمچار آتا اسہ ٹولی ئس ہمو علاقہ غان انوکا ڈپٹی کمشنر ہرنائی محمد عارف زرکون نا مچی ءِ سلہہ بند جلہو ئٹ ٹک کریر۔

او مستی پارے کہ بی ایل اے درشان کرینے کہ کوزہ گیر لشکر نا کمکاری ٹی اوار آ بندغ آک تینا جانی و مالی نسخان تا ذمہ وار تینٹ مرور۔ گڈیکو وار نن یکم جون 2023 آ بیان ئٹ پاش کریسن کہ کوئلہ کانڑ ٹھیکیدار و مزور آک کوزہ گیر لشکر کن مخبری، راشن فراوان کننگ و واٹر سپلائی نصب کریسہ آسراتی فراوان کننگ آن مر مریر۔

گڈ سر ئٹ او پارے کہ بلوچ لبریشن آرمی دا جلہو تا ذمہ واری ءِ ارفک۔ کوزہ گیر پاکستان و اوڑتون اوار مروک آتیا ننا جلہوک برجاء مرور۔

سمعیہ قلندرانی دیر ئس؟

ٹی بی پی تیدری

24 جون، 2023ء، ہفتہ نا دے، بلوچستان نا شار تربت ٹی اسہ بھلو و غیرمعمولی ءُ تدینی اس مس، ہرا تیوہ علاقہ ٹی ہڑدڑ ودی کرے۔ بلوچ لبریشن آرمی نا مجید بریگیڈ نا ارٹمیکو زالبول جندندر پاکستانی لشکر نا اسہ کاروان ئسے ٹک کرے۔
 
بلوچ لبریشن آرمی (بی ایل اے )، بلوچستان نا آجوئی نا جہد ئٹی متحرک سلہہ بند تنظیم، دمدستی تون جلہو نا ذمہ واری ءِ ارفے و پارے کہ مجید بریگیڈ نا زالبول جندندر سمعیہ قلندرانی بلوچ دا جلہو ءِ کرینے۔

مجید بریگیڈ بی ایل اے  نا ہمو خاص یونٹ ءِ ہرا جند ندر جلہو تیٹ گشاد تخک۔
 
بی ایل اے نا ترجمان جیئند بلوچ دا ہم پارے کہ جلہو پاکستان نا ڈھکوک ادارہ تا بڑزکو کوالخواہ سے دروکو فوجی کاروان ئسے آ کننگانے، ہرا تربت ایئر پورٹ آن انٹر سروسز انٹیلیجنس ہیڈکوارٹر آ ہِننگ ئس۔
 
بنداوی رپورٹ نا رد ئٹ، کاروان آ جلہو بھاز ترند ئس و جلہو ٹی کاروان ءِ بھاز نسخان مسنے۔ ولے، پاکستانی قانود نافذ کروکا ادارہ آک، پاکستانی لشکر نا کارندہ آتون اوار علاقہ ءِ دمدستی سیل کریسر۔ ہرانا سوب آن نسخان و کہوکا تا جوانیکا اندازہ کننگ متنے۔
 
کوالخواہ تا کنڈ آن میڈیا ءِ تروکا بنداوی رپورٹ نا رد ئٹ، ہفتہ نا دے تربت نا چاکر اعظم چوک آ اسہ زالبول اس فوجی کاروان آ خودکش جلہو کرے۔
 
کوالخواہ تا رد ئٹ پولیس نا اُلاخ ہم جلہو نا پلویڑ ٹی بسنے، ہرا نا سوب آن اسہ پولیس کارندہ اس مرگ ئنا گواچی و اسہ زالبول کانسٹیبل ئسے تون اوار اِرا کارندہ ٹپی مسنو۔ واہم، ہندی میڈیا پارینے کہ مُستی جلہو نا شابیت حوال بروئی ءُ۔
 
بی ایل اے نا ترجمان جیئند بلوچ بنداوی رپورٹ آن نمن مس و پارے کہ نہ تو خڑک پولیس نا اُلاخ و نئے اوٹی سوار پولیس کارندہ آتے ٹک کننگاسس۔ او پارے کہ پاکستانی لشکر پولیس گاڑی آ جلہو کرینے۔ ہرا جلہو نا وخت کسر نا ایلو کنڈ آ ہِننگ ئس۔
 
اسہ دے آن گڈ، ہندی پولیس کارندہ آک ہم پک کریر کہ جلہو آن گڈ فوجی کارندہ آک تینا مون سم کاری کریر ہرا نا سوب آن پولیس کارندہ آک مرگ ئنا گواچی و ٹپی مسنو۔
 
سمعیہ بلوچ نا زند
 
سمعیہ قلندرانی بلوچ عرف سمّو، 17 اگست 1997 آ بلوچستان نا ضلع خضدار نا خلق توتک ٹی قلندرانی قبیلہ نا اسہ اُرا سیٹی ودی مس۔

2011 ء نا فروری ٹی، ہراتم توتک ئٹ فوجی آپریشن نا وخت کیہی اُرا تا بندغ تے بیگواہ کننگاسس، اوفتا خاہوت ہم پاکستانی ریاست نا بےدادی نا گواچی مس۔

واہم، توتک آپریشن نا کیہی سال آن گڈ، 18 سال نا سن ئٹی سمعیہ بلوچ لبریشن آرمی ٹی اوار مننگ نا فیصلہ کرے۔

بلوچ لبریشن آرمی نا ردئٹ، سمعیہ نا بی ایل اے ٹی اوار مننگ اسہ خاص ءُ تدینی ئسے نا سوب آن متوسس، بلکن پاننگک کہ دا اسہ شعوری و سرپندار ءُ فیصلہ اس ئس، دا فیصلہ اونا بلوچستان نا حالیت آتا خوڑتی ئٹ سرپندی، راجی شعور نا سوگوْی و سوگو سوچ و فکر نا سوب ئس۔

سمعیہ بھاز خوانوک اس ئس، اونا تعلقداری صحافت نا پیشہ آن ئس، او پنچ سال اسکان بلوچ لبریشن آرمی نا میڈیا ونگ ئٹ خذمت سر تریسہ کرے و دا نیام ئٹ بی ایل اے میڈیا ونگ ءِ سوگوْ و پر اثر جوڑ کننگ ٹی تینا ہنر و ذہنی لائخی تے زیات کاریم ئٹ ہیس۔

اونا ذاتی زند ہم بلوچ تحریک تون زیات تفوک ئس۔ او جند ندر ریحان بلوچ نا دِشتار ئس، ہرا 2018 ٹی دالبندین نا خڑک آ چینی انجینئر آتیا جند ندری جلہو کریسس، و بی ایل اے نا راہشون، جنرل اسلم بلوچ نا ملخڑ ئس۔

بی ایل اے نا ترجمان نا ردئٹ، سمعیہ 21 سال نا سن ئٹی مجید بریگیڈ کن رضاکارانہ دروشم ئٹ اواری نا فیصلہ کریسس و دا فیصلہ آ سلوک مس، و او ہفتہ نا دے سرسہب جند ندری جلہو کریسہ بلوچ دیہاڑ ئٹ ساندہی کن زندہ مس۔

سمعیہ بلوچ نا دا گام اودے بلوچ مزاحمت نا اسہ عظیم و وے گیرام مروکو کڑدار اس جوڑ کرینے، ہرا بلوچستان نا آجوئی نا جہد ٹی اسہ پنی ءُ مقام ئس دوئی کرے۔

بلوچستان نا سلہہ بند مزاحمت ٹی زالبول تا بدل مروک آ کڑد

بلوچستان نا سلہہ بند مزاحمت نا دیہاڑ ٹی اسہ جتا ءُ بدلی اس مونا بننگ ءِ، اسہ وخت اس ئس ہراتم زالبول آک راجی تحریک ٹی بیرہ حمایتی کڑد سر تسرہ، ولے داسا زالبول آک نرینہ آتا روایتی کڑدار تیٹ گام تخنگ ءُ۔ سمعیہ بلوچ نا پارہ غان کروک آ جند ندری جلہو، بلوچستان نا جہد آجوئی نا اسہ اہم ءُ مرحلہ ئسے، ہرا نہ بیرہ تنازعہ نا ترندی ءِ پاش کیک بلکن سلہہ بند مزاحمت ٹی زالبول تا ودوک آ کڑدار ءِ ہم پاش کیک۔

تدوکا سال اپریل ٹی بی ایل اے نا مجید بریگیڈ نا اولیکو نیاڑی جند ندر، شاری بلوچ، کراچی یونیورسٹی ٹی چینی شاری تیا اسہ جلہو اس کرے، او وخت، بھاز آ بندغ آک شاری نا دا عمل ءِ بلوچ تحریک آجوئی ٹی اسہ وار اس مونا بروک ءُ تدینی اس سرپد ئسر۔ ولے، سمعیہ بلوچ نا برجاء جلہو پاش کرے کہ دا گمان رد ئس۔

بلوچ لبریشن آرمی نا ترجمان جیئند بلوچ تینا بیان ئٹ پک کرینے کہ داسا کیہی زالبول آک مجید بریگیڈ نا بشخ ءُ، ہرا جند ندری جلہو تیکن تیار ءُ۔

“کوزہ گیر پاکستان و اونا ہمکوپہ چین، بلوچستان نا آجوئی ءِ منیسہ زو بلوچستان آن پیشتمر، نہ گڑا بی ایل اے نا ترند جلہو تیکن تیار مریر۔”

درو، بلوچ لبریشن آرمی تینا میڈیا چینل آ اسہ ویڈیو اس شینک کرینے ہرا ٹی مجید بریگیڈ نا کیہی زالبول باسک آک یونیفارم و جند ندر جیکٹ بینوک خننگرہ۔

دا ویڈیو ٹی، سمعیہ اردو بولی ٹی تینا گڈیکو کلہو ءِ تسنے۔ او پائک کہ اسہ امیر ءُ ڈغار ئسے نا خواجہ مننگ آن بیدس بلوچ آتے خواننگ آن مُر تخنگانے و اوفتا ورناک تینا زند ءِ ریاستی زندان تیٹ گدریفنگ ءُ۔ او پارے کہ اوفتا عمل بیرہ اندن انگا قربانی تا بناء کننگ ءِ و اودے یخین ءِ کہ او حق ئنا کسر آٹے، و او بلوچ راج آن جہد ئٹ اوار مننگ نا خواست کرے۔

دود نا وڑ ئٹ، بلوچستان نا آجوئی نا تحریک ئٹ زالبول تا کڑد مُخ تفی کروک یا علامتی مسنے، اندن فعال جنگی کڑد بھلو حد ئسے اسکان ناممکن سرپد مسنے۔ واہم، سمعیہ و شاری بلوچ نا جلہو آک دا دود آتے پرغانو، و دا پاش کرینو کہ زالبول آک تنیا دا جہد ئنا بشخ افس بلکن سلہہ بند مزاحمت ئٹ مرکزی کڑد سر تننگ ءُ۔

السی رد عمل

سمعیہ بلوچ نا جلہو آن گڈ، چاگڑدی احوالکاری تلہ غا السی ردعمل نا جاچ ءِ ہلیسہ دا پاننگ مریک کہ بلوچ الس اونا شہادت ءِ مثبت و حوصلئی دروشم ئٹ ہلکنے۔ دا ردعمل خاص وڑ ئٹ ٹویٹر آ پاش مس، ہراڑے ہیش ٹیگ SumaiyaTheLegend# منہ گھنٹہ ٹی ٹاپ ٹرینڈ ئٹ اوار مس۔ دا ہیش ٹیگ بلوچستان نا تحریک آجوئی نا باسک و مُخ تفی کروک آتا کنڈ آن بناء کننگا، ہرافک دادے کاریم ئٹ ہتیسہ سمعیہ بلوچ ءِ دروت ندر تسر۔

زیات پامدار انگا ہیت دادے کہ دا ہیش ٹیگ بیرہ سلہہ بند تحریک تون مُخ تفی کروک آتے اسکان الو، بلکن دا جتاء نظریاتی ٹولی تا بندغ تے ہم زیمی کرے۔ مخلوق سمعیہ بلوچ نا دلیری و قربانی ءِ سفت کریر۔

بلوچ زالبول آک فرنٹ لائن آ

بلوچستان ئٹ برجاء تنازعہ نا پڑ ئٹ، زالبول تا اوار مننگ چرجوئی ئٹ ودنگ ءِ، دا بدلی نا دروشم شاری بلوچ و سمعیہ بلوچ نا دلیر آ جلہو تیٹ خننگک۔ اوفتا اوار مننگ ہندی دود آتے سُرفینے تخانے و دا جہد ئٹ جنسی کڑدار تیکن پوسکن پجار نا در ءِ ملانے۔

دا بدلی بلوچستان نا جہد آجوئی نا مُستی کسر ءِ زیمی کننگ نا لائخی تخک۔ زالبول تا سلہہ بند تحریک ئٹ اوار مننگ، جہد ءِ پوسکنو ساہ و تاغت اس تننگ کیک۔ ولے ارٹمیکو پارہ غا، دا برجاء سیاسی منظرنامہ ءِ گیشتر غنجل ہم جوڑ کننگ کیک۔

تربت نا تدینی بلوچستان نا جہد آجوئی نا دیہاڑ ئٹ پوسکنو درغ ئسے نا بناء کرینے۔ دا تدینی نا شابیت آ زیمک دائسکان تیوہ وڑ ئٹ پاش مننگ کتنو۔

ولے اسہ گواچنی اس پاش وڑ ئٹ درشان ءِ؛ دا ڈیہہ ئٹ بلوچ زالبول تا سلہہ بند جہد ئٹ اوار مننگ نا دور یخین ئٹ بناء مسنے۔ سمعیہ بلوچ نا جند ندری جلہو نا وسیلہ ئٹ، ہرا دا وڑ نا ایلو جلہو تا حیثیت تخک، بلوچ زالبول تا فرنٹ لائن آ اوار مننگ ءِ داسہ گیشتر one-of incident پاریسہ خن تیان چپ کننگ یا کشنگ مننگ کپک۔

ضلع خاران ٹی سیندک پروجیکٹ کن مڈی دروکا ٹرالر تے نا درست ءُ بندغ ٹک کریر۔

حوالکار تا رد ئٹ تدینی خاران گواش روڈ ئنا خڑک قصاب خانہ نا خڑک آ مس ہراڑے نا درست آ بندغ آک گاڈی تیا ترندسم کاری کریر۔تدینی آن گڈ فورسز آتا بھلو کچ ئس علاقہ ءِ گھیرہ کریسہ سخت چیکنگ بناء کرے۔

سیندک پروجیکٹ نا گاڑی تیا جلہو نا ذمہ واری ءِ بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک تینا بیان ئٹارفے۔ داڑتون اوار جھاؤ ٹی موبائل ٹاور ءِ ہم ٹک کننگ نا ذمہ واری ءِ بی ایل ایف ارفے۔

ترجمان تینا بیان ئٹ پارے کہ ننا سرمچار آک 26 جون ئنا نن خاران ٹی گواش وڈھ نا خڑک استحصالی منصوبہ سیندک پروجیکٹ ناگاڑی تیا جلہو کریر، ڈرائیور تے بلوچ مننگ نا سوب آن وارننگ تریسہ یلہ کننگا۔

او پارے کہ دا اُلاخ آک کراچی آن سیندک پروجیکٹ کن مشینری و پین مڈی دننگ اسر، ہرا خاران سی پیک لِنک روڈ آن مریسہ کارہ۔

میجر گہرام بلوچ تینا بیان ئٹ پارے کہ دا جلہو چین و ایلو ڈیہہ تتون اوار غٹ سرمایہ کار آتیکن اسہ وارننگ ئسے بلوچستان اسہ جنگزدہ و کوزہ مروکو ڈیہہ ئسے ہراڑے بلوچ قوم تینا آجوئی نا جنگ کننگ ءِ نن خبڑدار کینہ کہ بلوچ قوم نا مرضی و منشا آن بیدس داڑےہچو منصوبہ و کس ئنا سرمایہ رکھوک مفرو۔

ترجمان تینا بیان ئٹ آواران نا علاقہ جھاؤ ٹی 26 جون آ سرمچار آتا کنڈ آن جھل جھاؤ سوڑ ٹی عطا محمدمیتگ ٹی پاکستان نا موبائلکمپنی یوفون نا ٹاور و غٹ مشینری تے بھس کننگ نا ذمہ واری ءِ ہم ارفے۔

 ترجمان نا پاننگ ئس کہ بی ایل ایف دا جلہو تا ذمہ واری ءِ ارفک و بلوچستان نا آجوئی اسکان کوزہ گیر پاکستانی لشکر و دننگااستحصالی منصوبہ آک ننا نشانہ غا مرور۔

بلوچ لبریشن آرمی تینا آفیشل ٹیلی گرام چینل “ہکل” آ 24 جون آ بلوچستان نا ضلع کیچ ئنا بنجائی شار تربت ئٹی پاکستان لشکر نا خاص انگا کاروان آ جند ندر جلہو کروک سمعیہ قلندرانی نا ویڈیو کلہو ءِ شنگ کرینے۔

بلوچ لبریشن آرمی نا کنڈ آن شنگ مروک دا شش منٹ نا ویڈیو ٹی سمعیہ قلندرانی نا جلہو آن مُست بلوچ قوم نا پنا کلہو و بلوچ لبریشن آرمی مجید برگیڈ نا زالبول ٹولی ءِ شان تننگانے۔

ٹولی ٹی شان تروک سلہہ بند زالبولک بلوچ لبریشن آرمی نا فدائی یونٹ نا خاص یونیفارم بینوک ءُ و پن کروک زالبول تے جند ندر جیکٹ ہم بینوک ءِ۔

ویڈیو نا بناء ٹی تربت ٹی لشکری کاروان آ جند ندر جلہو کروک زالبول ءِ بلوچ لبریشن آرمی مجید بریگیڈ نا یونیفارم بینوک شان تننگانے ہراڑے او تینا ہیت ءِ بناء کریسہ پائک کہ زند کُل ءِ دوست ءِ ولے زند مسخت، وطن و قوم آن وَد اف و ہرا وخت ہیت وطن نا بریک تو ننے تینا ذاتی زند، عیش و آرام، کُل ءِ الوئی تمک انتئے کہ نن غلام اُن و ہرا غلام مریرہ اوفتا ہچو زند اس مفک۔

ویڈیو کلہو ٹی سمعیہ قلندرانی ودیک پائک کہ ننے غٹ ءِ سیوتی ئٹ غلامی نا زمزیر تے پرغوئی ءِ دا ظلم ئنا برخلاف توار بڑز کروئی ءِ اینو ای بش مسونٹ ای خواوہ کہ پگہ کنا ہزار آ ہیڑک بش مریر و تینا دشمن ءِ دا شان ایتر کہ بلوچ قوم اسہ دلیر ءُ قوم ئسے او تینا مسخت آن ہچبر پدی مفرو۔

بلوچ قوم نا پنا تینا کلہو ٹی سمعیہ قلندرانی نا پاننگ ئس کہ ننتو داکان بیدس(جنگ آن بیدس) پین ہچ کسر اف اینو ننا قوم ہرا حالیت ٹی ءِ ننا ہیڑ لمّہ غاک غٹ ننا مون آٹو داڑان بیدس ہم تینا باروئٹ سوچِن، تینا ذات ئنا باروئٹ گڑتی کین، زند ئنا عیش و آرام نا باروئٹ گڑتی کین تو دا بے ضمیری اس مرو، دا ہمو شہید آتون نا انصافی مرو ہرا ننے آن مُست لمّہ وطن کن تینا ساہ تے ندر کرینو۔

او پائک کہ اینو ننا مونا اخس مثیل ارے داکان بیدس ہم نن دا مسخت ٹی مچِہ مونا ہِننگ آن گڈ پانہ کہ ننا انداخس اسکان ئس داکان زیات قربانی تننگ کپنہ، آخہ کنا ہیڑ ایلمک دا قربانی افس، دا ہچ افس، دا تو بناء ءِ ننے مونی باز قربانی تروئی ءِ اگہ ننتو مچٹ ہم گڑاس رہینگے تو اودے ہم ننے ندر کروئی ءِ ہمو وخت اسکان قربانی تروئی ہرا وخت اسکان کہ بلوچ قوم اسہ آزات و خود مختار ءُ قوم اس جوڑ مفک۔

اونا پاننگ ئس کہ ننے تینا دشمن ءِ شان تروئی ءِ کہ بلوچ قوم نا مسنک دلیر ءُ تینا حق کن سلینگ کیرہ، جنگ کننگ کیرہ و تینا دشمن تون مون پہ مون مریسہ دشمن ءِ خن شان تننگ کیرہ اینو ای تینے تینا وطن کن ندر کننگ اُٹ ای اومیت کیوہ کہ پگہ نمے آن کس مونا برو و تینے قومی مسخت کن و ندر کننگ کن مونا ہتو انتئے کہ دا جنگ ئسے و جنگ ننے آن قربانی خواہک۔

تینا ویڈیو کلہو ئٹی سمعیہ قلندرانی نا بلوچستان آن زوراکی نا بیگواہی تا باروئٹ پاننگ ئس کہ اینو ننا ایلمک بیگواہ مننگ ءُ ہیڑ لمّہ غاک کسر تیا در پہ در تولوک ءُ اوفتے ہچو جاگہ اس اف نہ اُراس ارے ننا بندغ آتون گچینو تعلیم اف داخس امیر ءُ ڈیہہ ئسے نا خواجہ مننگ آن بیدس اینو نن اراڑے سلوک اُن۔

او پارے کہ ریاست بلوچ الس ءِ تعلیم آن اندا سوب آن پد بٹینے تاکہ او تینا دشمن ءِ پُہہ مفس ولے بلوچ قوم تینا دشمن ءِ چائک نن چانہ کہ دشمن تون امر مون تروئی ءِ بلوچ قوم تون قومی آجوئی کن اسٹ انگا کسر جنگ ئنا کسر ءِ ننے غلامی آن آجو کننگ کن پین کس بفرو نئے کہ پین کس ءِ ننا غلامی آ رحم برو، ہنت کروئی ءِ ننے تینا وس ئٹ کروئی ءِ۔

تینا کلہو ٹی بی ایل اے مجید بریگیڈ نا جند ندر جلہو کار سمعیہ بلوچ ودیک پائک کہ کنا دا کلہو ہرا وخت کنا قوم ءِ رسینگو او وخت اسکان ای اوفتتون اوار مفروٹ ولے کنے یخین ءِ قومی آجوئی نا دا جنگ تینا مزل نا کنڈ آ گام خلو دادے بلوچ الس مونا درو۔

ویڈیو کلہو نا ایسر ئٹ سمعیہ قلندرانی پائک کہ دشمن اگہ اینو ننے آن زیات تاغت تخک ولے ننے ٹی جوزہ ارے نن حق ئنا کسر آ ہِننگ اُن و اسہ دے تینا دشمن ءِ بے سہب کرون۔

بلوچستان نا ضلع خاران آن حوال ارے کہ پاکستانی لشکر اسہ بندغ ئسے زوراکی ئٹ بیگواہ کریسہ بے ڈس ءُ جاگہ سے آ درینے۔

بیگواہ مروک بندغ نا چاہنداری اسد اللہ ولد کمال خان سیاپاد نا پن آ مسنے۔

علاقہ آن رسینگوک حوال تا رد ئٹ اینو پیرا ملٹری فورس (ایف سی) نا کارندہ آک خاران آن پن کروک بندغ ءِ دزگیر کرینو۔

حوال تروکا تا پاننگ ءِ کہ اسد اللہ مزوری کیک و تینا اُرا نا کھٹیا کروکا اسٹ انگا بندغ ءِ۔

رَکھ ئَکن ڈیھ ئنا نی فدائی کریس
بخت ئے دشمن تا جَور آ تبائی کریس
جوژ تِسوس ہُشاس جمجلائی کریس
جْوانو پیغام ئَس دشمن کِہ رائی کریس
سد سلام ئے نے گودی سمعیہ بلوچ

بیرِفیس تینے شورہ ءُ خاخر ٹی نی
لکھاس تینا پِن ئے راج دفتر ٹِی نی
خوف ئس شاغاس لغور آتا لشکر ٹی نی
بے سَما غا بروک ئے سمائی کریس
سد سلام ئے نے گودی سمعیہ بلوچ

مِہر مابت وفا کھل نے آ ختم
سَگ صبر حوصلہ کھل نے آ ختم
جوزہ ہمت مَڑا کھل نے آ ختم
زیبَل آ خاک ئتو دلرُبائی کریس
سد سلام ئے نی گودی سمعیہ بلوچ

رند ئے ہرفیس پُھل آ ریحان نا کنا
سرمچار آ دلیر آ جَوان نا کنا
خن تے بُڑزا کریس کارَوان نا کنا
یعنی چاکر کِہ پین روشِنائی کریس
سد سلام ئے نے گودی سمعیہ بلوچ

چاکر زہری