موْن آ چادر
نوشت: درناز رحیم
دی بلوچستان پوسٹ
دامون ہیمون چنکو چنکو بھُٹ ئسر ہرافتا نیام ئٹی اسہ چنکو خلق ئس اس۔ بُھٹ آتیٹ و ڈغار ئٹ ردوکا بوچ و بئے و بارُنا جھل ئٹ جور ئنا رخت آک تینا گُلابی آ پُھل آتون دا ندارہ ءِ پین زیبدار کریسر۔ تہو کشاکہ تو اندن گمان مسکہ کہ تہو ءِ تینا چھول آتیٹ مہر و مابت تُد ءِ و دا تہو ٹی دم ہلوکا نا روح ئٹی اندا مہر و مابت جَہی مرِسا زند ئنا بارث ئٹ اونا سوچ و فکر ءِ پوسکنو کسر شان تسکہ۔
اندا خلق ئنا اسہ اُرا سے نا کوٹی ٹی زیبل آدینک مونا تولوک اس و تینا پالُن آ پُیہ غا تے گیسو کننگ اس۔ اونا مُہن آ جہان نا غٹ زیبا غا رنگ آک و خؤشیک ساف پاش اسر۔ او تینا ہنینا توار ئٹ سوت خلنگ اس۔ زیبل اندن بے خیالی ٹی مون ءِ بُڑزا کرے درغ آن ڈن ہُرا۔ ڈن آ ہُننگائی تو اسیکہ ہپائنگا وا اشتاف اشتاف گھیسو ءِ تفے و گُد ءِ کاٹُم آ کرے۔ زیبل لالا ءِ گیٹ آن تیز گھامی ئٹ بَننگ آ خنا۔ لالا ہم سدھا اندا کوٹی آ بننگ اس ہراڑے زیبل اسک۔ ایسکان لالا کوٹی ءِ سر مس زیبل سندوخ ئٹ چادر ءِ پٹِنگ اس۔ “ یا خُدا، دا چادر ءِ ہم داسا گُم مروئی اس۔” زیبل اُست ئٹ پارے۔
لالا کوٹی نا درغ ءِ سر مننگائی تو تیز ءُ نظر اس زیبل آ شاغا و کوٹی ٹی دانگ اینگ ہُرا، کوٹی ٹی بیدس زیبل آن کس الو، “ ارادو دا مخلوق، ارانگ گُم ءُ، نی تیار مسوس یا آخہ۔ داخس ہُرے کننگ، اللہ نمے ہدایت کے دنو پھدینو کاریم ئسے نُما۔ ایلم نا برام ءِ، ہزار کاریمک تخوک ءُ۔ اراتم ہِنورے خلق ءِ بٹگ کن، پھلمے یا کودے۔“
“ بس لالا تیار اُن داسا کانہ۔” زیبل مدا مدا پارے و لالا کوٹی آن پیشتما۔زیبل نا دم راست مس۔ اوفتا خاہوت ئٹی کُل آن تُرند طب آ لالا اس۔ خاہوت نا نرینہ نیاڑی، چُنک بھلن کُل اونا باز ادب ءِ کریرہ ولے اوڑان خُلیسُرہ ہم۔ زیبل تومکا ایلم تیان چنکا و اسٹ انگا ایڑ اس و لالا آن مچے زیات خُلیسکہ۔ لالا آن چُنکا فرہاد اس ہرا علاقہ ٹی دوانزدہ پاس کننگ آن گڈ شال آ ہناسس، مُستی خواننگ کن۔ او چُنک اسر ہرا وخت اوفتا باوہ روڈ شکست ئسے ٹی جہان ءِ الاسس و اِرا سال مُست اوفتا لمّہ ہم اُست ئنا ناجوڑی نا سوب آن کذیت کریسس۔ زیبل و فرہاد اسٹ ایلو آن باز خُڑک اسر۔ فرہاد ہراتم شار آن بسکہ زیبل کہ کیہی کتاب آتا ٹیکی ہیسکہ۔ زیبل میٹرک ٹی اس و سیاست، تاریخ، فلسفہ، و ادبیات نا بابت ئٹ کبین کبینو کتاب خواناکہ۔ دا اوڑا فرہاد نا زہم اس۔
بی اے کننگ آن گڈ فرہاد نا سانگ اونا الّہ نا مسڑ نازل تون مسس۔ تومکا تا اُراک اسہ خلق ئٹ و اسٹ ایلو آن خڑک اسر، بس منَہ گام ئنا فرخ اس اُرا تیٹ۔ دا سانگ ئٹ تومکا تا رزا اس، تومکا اسٹ ایلو ءِ چُنکی آن دوست کریرہ۔ سانگ ءِ اِرا سال گدرینگاسس و دا اِرا سال ئٹ فرہاد ایم اے ہم کریسس۔ فرہاد ایم اے کننگ آن گڈ داسا علاقہ غا بننگ ئس۔ علاقہ نا سکول ئٹ اودے ماشٹر نا نوکری رسینگاسس۔ لالا اودے ساندہ پاریکہ کہ دوارہ علاقہ غا بر و پینتین نوکری کپہ۔ ولے او پاریکہ کہ او چائے ہراڑے مرے اونا ذمہ واری تینا ڈیہہ ئنا باتی تا خذمت کننگ ءِ۔ ولے داسا اودے تینا علاقہ ٹی نوکری رسینگاسس۔ توہ اس مُست او دا حوال ءِ لالا ءِ تسس و لالا ہم گل و بال ئس کہ داسا ایلم بریک علاقہ غا و دوارہ ہنپک، و اونا برام نا ہم تیاری تے بناء کریسس۔
زیبل زو زو چمپل آتے بینا و بھلو بھلو گام ارفِسا ایلو کوٹی ٹی ہِنا، دُری و سنجد تولوک خوش گپی تیٹ اختہ ئسر۔ زیبل پیہنگائی تو توار کرے “بشبو زو کبو لالا خنا نمے اندن مجلس کننگ آ جوان جوڑو نمے۔”
دُری اندن راست مس “ ابوو لالا بس اندن زو ؟ ہلہ مُلک آ الو ؟”
زیبل زو زو ورندی تس “ ہئو ہئو لالا بسنے۔” دُری و سنجد اونا تاتہ نا مسنک اسر و اونا خڑک انگا ایڑکوک ہم۔ دُری زو زو چادر ءِ بینا، سنجد ہم بوٹ آتے بینا، ہر مُسٹ تا تیز تیز گھام ہرفِسا حویلی آن پیشتمار۔ زرس مُستی ہِننگ آن گڈ ہر مُسٹ ٹاکو خلِسا مجلس بناء کریر۔ زیبل ہڑتوما تے مخِفسا تینٹ ہم ٹہک تننگ اس۔
زیبل، سنجد و دُری اسٹ اسٹ آ خلق ئنا غٹ اُرا تے بٹنگار۔ خلق اس ہم داخسو الو، زیات آن زیات پانزدہ اُرا ئسر و غُٹ اسٹ ایلو تون سیال ئسر۔ گِڑاس خُڑک، اندن کہ الّہ، تاتہ، الّہ نا چُنا، تاتہ نا چُنا، تو گُڑا سے تون سیالی مچے سستہ اس۔ دیگر آن پد بٹنگ کن پیشتموکا زیبل، دُری و سنجد شام نماز آ اُرا غا واپس بسر۔ شام ئنا اِرغ کُننگ آن گڈ غُٹ خاچار۔ چنکو خلق ئس اس، شار تو الو کہ بھومب آن بار نن درست مخلوق تولے و دے درست خاچِہ۔
سہب ئنا مالو کُل بش مسر، نیاڑیک اُرا نا کاریم و اِرغ بیدیر آن فارغ مسر۔ تینا سینگار آن ہورک مرِسا مہمان تیکن خن کسر آ اسُر۔ مدا مدا غٹ مہمانک ہم بسر۔ مہمان تے چاہ دیر تننگ آن گڈ نیاڑی تا چلم نا کٹہ کٹہ بناء اس۔ منَہ گام ئنا مُری آ ایلو حویلی ٹی نازل اسہ کوٹی سیٹی تولوک جَن ئنا انتظار ءِ کننگ اس۔ اینو او بھاز خوش اس۔ اونا اُست ئنا مراد پورو مننگ اس۔ ہرا بندغ ءِ چُنکی آن دوست تخاسس او داسا اونا زند ئنا ہمسفر مننگ اس۔ اونا بادامی آ رنگ اینو پین زیبا لگنگ اس، مون رنگ ئنا چادر ئس کاٹُم آ شاغوک اس ہراڑا رنگ رنگی ءُ ستارہ خلوک اس۔ دا چادر فرہاد نا تروک ئس اس، نازل تینا پوسکنا زند ئنا بناء ٹی فرہاد نا تروکا ٹیکی ءِ کاٹم آ کننگ خواہسکہ و دا چادر ئٹ او بھاز زیبا ہم خننگاکہ۔
فرہاد نا اُراغان جن پیشتما داسا نازل نا اُرا نا کنڈ آ بننگ اس۔ نیاڑی تا ہالو و چاپ ئنا توار تیوہ غا خلق ئٹ تالان اس۔ دا توار نازل نا اُرا اسکان ہم بننگ اس۔ نازل نا اُست ئنا درکہ غاک تیز مننگ اسر۔ مدا مدا توار خڑک بننگ اس۔۔۔ جن داسا اُرا نا درغ آ سر مس و اُرا نا نیاڑیک جن ءِ بخیرٹ کریر۔ غٹ نیاڑیک ہمو کوٹی آ ہنار ہراڑے نازل تولوک اوفتیکن خن کسر آ اس۔
“ کنا گودی، اینو نا دے مونو چادر ئس انتئے بینانُس، مگہ نے سما اف۔۔۔” دا آئی ہنیفہ اس۔ اونا ہیت پورو الّو کہ پین اسٹ ئس مخِسا توار کرے، “ دا چادر نازل نا سانگ ئنا پُچ آتیٹ اس کنے یات ءِ۔ بھازی آن نازل ءِ دا چادر بھاز دوست ءِ۔” غٹ نیاڑیک ٹاکو خلِسا نازل ءِ ہُننگ اسر، نازل ہم بشخندہ کریسہ مون ءِ شیف کرے۔ آئی ہنیفہ مُستی ہیت ئس کننگ کن گیگ کرے ولے نیاڑیک وار تتوس تہ، و تینا مخَہ مسخرہ ءِ بناء کریر، اِرا نیاڑی کھلہ ءِ خلنگ بناء کریر۔ چاہ چلم آن گڈ غٹ تینا اُرا تینا رادہ مسر۔
اندا شام فرہاد ہم شار آن بس۔ اینو زیبل تون اوار غٹ خاہوت خوشی آن پُچ آتیٹ جاگہ متوکہ، زیبل نا نک تو ڈغار آ لگنگ الوس۔ اینو بھاز وخت آن پد او غٹ فرہاد تون اوار دُن تولوک کچاری کننگ اسر۔ شام ئنا دیچا اَرا وخت اسکان غٹ توسر کچاری کریر۔
ایلو دے دُزی ہنام و مُسٹمیکو دے پھاشی ہنام مس۔ دا مُسہ دے تومکا اُرا تیٹ دھول ءَ چاپ، سوت ءَ ہالو و خوشی تا ندارہ اس۔ چھارمیکو دے دعوت و جَن، و شام ئنا نکاح اس۔ پھاشی ہنام نا شام خیر ئٹ گدرینگا، دھول ءَ دھمال نا سوب آن غٹ ہُرے آ خاچار۔ سُہب ئنا بانگ مننگ اس کہ زیبل نا خف تیا توار ئس تما، زیبل سما کرے ولے تُغی تُغی اس۔ زرس خن تے دانگ اینگ ہڑسا کُل بشانہ آتیٹ خاچوک اسر۔ زیبل ہم دوارہ خن تے تَر کرے و تُنگان ہنا۔
جھٹ ئس گدرینگاسس کہ زیبل ءِ تینا کاٹم آ اسہ کبینو گڑا سے نا مارشت مس، ہرا نا سوب آن اونا کاٹُم ئٹ دڑد ئنا چھول اس بناء مرِسا اونا مڈول نا تہٹی مِلی اسکان سر مس۔ و ہجم کرِسا بش مس ولے ہچ پُہہ مننگ کتو کہ اوڑتو انتس مس۔ اونا ہر پنچ حِس کاریم کننگ الوس۔ مدا مدا او زرس سار کرے تو تینا دامون ہیمون ئٹ وردی بینوک توفک دو ٹی اسہ لشکر ئس خنا، زرس پین ہوش آ بس تو پُہہ مس کہ اندا فوجی تیان اسٹ اونا کاٹم آ نَت ءِ تخاسس۔ ولے او دا سرپند مننگ الو کہ دا لشکر اوفتا اُراٹی انت کننگ ءِ۔ او زو زو اس تینا گُد ءِ کاٹم آ کرے و بش مس سلیس، اُرا نا غٹ بندغ آک ہم سما کریسر۔ لالا ہم تینا جاگہ غان بش مسس، لالا نا زائیفہ تینا تومکا چُنا تے تومکا بغل ئٹ کرِسا تولوک اس۔ چُناک گوڑینگوک تینے لمّہ نا بغل ئٹ ڈکاسر۔ فرہاد کوٹی ٹی خاچوک اس اودے سما الو کہ پیشن آ انت مننگ ءِ۔
فوجی تتون اوار اسہ مول ءُ بندغ ئس ہم اس۔ فوجی تیان اسٹ توفک دوٹی لالا نا نیمہ غا ہُرا، لالا ہم پُہہ مننگ الو کہ آخر انت مننگ ءِ۔ او ہمو فوجی نا کنڈ آ بس، و اردو ئٹ سوج کرے “ انت ئسے سر، ننا اُرا ٹی دا وخت آ دا لشکر انت کننگ ءِ۔” فوجی ہم اردو ٹی ورندی تس “ بس داسا سما تمک نمے کہ نن داڑے انت کننگ اُن۔” و انداخس پاننگ ان گڈ مول انگا بندغ ءِ اشارہ ئٹ توار کرے۔ و خڑک بس تو فوجی سوج کرے، “ اندادے ؟”۔ مول انگا بندغ ورندی تس، “ آخہ سر، دا اف۔” فوجی لالا آ ہُرا و پارے، “ فرہاد نا انت مریک ؟” لالا نا نتا ساہ یلہ کرے، و اودے گمان مس کہ او داسا ایسا ڈغار آ تمک۔ “ کنا ایلم ءِ۔ ” فوجی زرس لالا نا خن تیٹ ہُرا وا پارے “ ارادے فرہاد۔۔۔” فوجی مُستی ہم گڑاس پاننگ اس ولے اونا ہیت ئنا پورو مننگ آن مُست فوجی تیان اسٹ توار کرے، “ سر دادے فرہاد۔” چار فوجی فرہاد ءِ ہلکوسر و کوٹی آن کشنگ اسر، فرہاد نا کُوس کشوک اس۔ فوجی تیان مُسٹ اونا دو تیٹ و اسٹ پُیہ غا تے ہلکسس۔ مول انگا بندغ ہم پک کرِسا پارے، “جی ہئو سر، اندادے۔”
دا ندارہ تیوہ خاہوت کن قیامت آن کم الو۔ اوفتا خن تا دید، و سالونک ءِ فوجیک گِر کرِسا دننگ اسر۔ لالا بھلو بھلو گام ہرفِسا فرہاد ءِ دزگیر کروکا فوجی تے سر مس، “انتئے دننگ اُرے کنا ایلم ءِ، آخر او انت کرینے، فرہاد ءِ انتسے کن دزگیر کننگ اُرے داخس تو ننے پابو داخس چاننگ تو ننا حق ءِ۔” ولے کس اونا ہیت ءِ بِننگ الو۔ زیبل ہم اوفتا رہا سر مرِسا فوجی تے دِکہ تننگ بناء کرے و گُٹ ئنا پُھر ئٹ پارے، “ کنا ایلم ہچ کتنے، آخر ہرانگ دننگ اُرے کنا ایلم ءِ۔” او فوجی تے دِکہ ترِسا فرہاد نا سینہ غا لچا۔ فوجی تیان اسٹ اونا دو ٹی ہلِسا فرہاد آن مُر کرِسا چغل تس۔ دا ندارہ فرہاد نا اُست ئٹ خاخر بش کرے، اونا خنک سوختئی آن خیسن مسر و رستر آن بار جلہو کرِسا فوجی نا زنچخ ئٹ ہلک، “ کنا ایڑ ءِ دوارہ دو خلکُس لخ ءِ نا خلوٹ انداڑے کھڈ کروٹ نے۔” لالا زیبل ءِ بش کرے ولے زیبل توروئی الو، و دا فوجی تا دو آن تینا ایلم ءِ کشنگ خواہسکہ، ولے لالا اونا دو ٹی ہلک تورے۔
فوجیک چار پنچی ئٹ فرہاد ءِ گِر کرِسا گاڑی ٹی چغل تسر و تیوہ حویلی و پیشن آ تالان فوجیک گاڑی تیٹ سوار مسر، و راہی مسر۔ اوفتا پد ئٹ گاڑی تا لوڑ، اسہ خاہوت ئسے نا خوشی تا جنازہ و کھلہ ٹی تولوک تینا جَن کن خن کسر آ اسہ مسڑ ئسے نا ارمانک اسر۔ سہب ئنا ساف تون دا حوال تیوہ شار ئٹ تالان مس۔ لالا بیدس انتظار آن شاموئی شام پولیس تھانہ غا ہناسس فرہاد نا بارو ئٹ سوج کننگ کن و داسکان واپس بتویسس۔ او بس اسہ وار فون کریسس پاریسس کہ پولیس پاننگ ءِ فرہاد ننتو اف۔ سیال عزیر آک غٹ نازل استا اُراٹی مُچ مسوسر، زیبل و لالا نا چُناک ہم شام ئنا لالا نا تھانہ غا ہِننگ آن گڈ ہموڑے بسوسر۔ زیبل و نازل خاخر اُست ئٹ کوٹی ٹی چُپ تولوک اسر، تومکا ہچ ہیت کننگ الوس، و تومکا تون اسٹ ایلو ءِ تسلی تننگ کن ہچ لوز الو۔ نازل یاسین دو ٹی بس ہوغِسا اس و یاسین خوانِسا اس۔ زیبل تومکا کاٹم ءِ گوڈ آتیا خلکسس و بے توار ہوغنگ اس۔
ایلو کوٹی ٹی غٹ نیاڑیک مُچ وظیفہ و دعا کننگ اسر۔ ہر اسٹ اسہ مُلا سے نا وظیفہ نا پاریسہ اومیت تننگ اس کہ خُدا غا یخین تخبو، خُدا مہربان ءُ ذات ئسے، لالا ہنانے تھانہ غا فرہاد ءِ ہتو برو۔ اندا تسلی نا تران آک برجاء اسر کہ چُناس رُمبیسہ کوٹی ٹی پیہا و نیاڑی تے حوال تس، “لالا بس، کاکا نور جان نا گاڑی ٹی تینا اُرا نا کنڈ آ ہِننگ اس۔” چُنا زیبل و نازل ءِ مالو حوال تسس، نیاڑیک کوٹی آن پیشتمار تو زیبل درغ آن رُمبِسا پیشتمنگ اس۔ نیاڑی تا ٹولی ہم بھلو بھلو گام ارفیسہ اونا رند ئٹ اوفتا اُرا نا کنڈ آ رادہ مس۔
زیبل رُمبِسا حویلی نا درغ آن پیہا، اندن کہ او پیہا کس پارو اونا روح ءِ اونا بدن آن گڑاس چکا، او اسہ وار ہموڑے درغ آ سلیس، اونا خنک پھاؤڑینگوک اسر، مدا مدا بدن ئٹ تہ لڑزہ ئس تما، و اندا لڑزہ تون اوار اونا نتا ساہ یلہ کرے، اونا بدن شل مس و ہموڑے درغ آ گوڈ آک تہ لگار، تومکا دو تا پنجہ غا تے ڈغار ئٹ خلک، اسہ ہِکہ سے تون اوار اونا خن تیان خڑینک آک یلہ مسر۔ اونا مون آ لالا پین چار بندغ تون اوار فرہاد نا دتر چُر آ جون ءِ پلنگ ئسے آ تخنگ اس۔ فرہاد نا تیوہ بدن دتر ٹی اسٹ اس۔ اونا بھلا پُیہ غا تیان ہم دتر نا اسہ اسہ پھُڑینک تمنگ اس۔ اودے کُوس بینوک الو، زیبل نا خن تا مون آن اسہ ندارہ ئس گدرینگا، چار فوجی استو فرہاد ءِ دننگ اسر، فرہاد ءِ کُوس لخ ئٹ الو۔ او اخس بیوس اس، او تینا ایلم ءِ بچفنگ کتو۔ زیبل نا خن تیان بے توار خڑینک آک وہنگ اسر۔
زیبل نا پد ئٹ نیاڑی تا ٹولی ہم درغ آ سر مس۔ او فرہاد نا دتر چُر آ جون ءِ خنار و غٹ گُٹ ئنا پھُر آ ہوغنگ و فوجی تے بد دعا تننگ بناء کریر۔ جھٹ ئسے کان شار ئنا نرینہ غاک ہم مُچ مسر۔ اِرا نیاڑی زیبل نا دو تیٹ ہلِسا بش کریر ولے اونا بدن شل اس۔ اونا ایلم کن درو دا حویلی ٹی دھول چاپ و ہالو اس، دا غٹ نرینہ نیاڑیک اوفتا خوشی تیٹ اوڑدئی کن بسوسر، اینو ہم دا غت مُچ ءُ، ولے اونا ایلم نا جنازہ کن، اوفتا ڈکھ ٹی اوڑدئی کن، ماتم کن۔ اینو اونا ایلم نا نکاہ مروئی اس، اونا جن ئنا دعوت مروئی اس، اودے اسہ پوسکنو زند اس بناء کروئی اس۔ اوفتا خوشیک آسیب ئسے نا گواچی مسوسر، استو نا بروکا فوجی الوس، او نہار اسر۔ او نہار اسر؟ یا نہار ہمو ریاست ءِ ہرا نا دا رکھوک آکو ؟ زیبل نا اٹکل ہم داسا شل مننگ اس۔
جھٹ ئسے آن گڈ نازل ءِ ہم کھلہ غان کشار فرہاد نا گڈیکو دیدار کن۔ نازل ہم فرہاد نا چپیکو نیمہ غا اونا دو آ کاٹم ءِ تخوک بے توار ہوغنگ اس۔ نازل نا دو تیا فرہاد نا پِن ئنا ہنام نا خیسُنی داسکان تازہ اس۔ اونا کاٹم آ فرہاد نا ٹیکی “ ہمو مون آ چادر” اس۔ اونا خن تا مون آن اسہ ندارہ اس گدرینگا۔ سانگ ئنا مُسٹمیکو دے فرہاد شال آ ہِننگ اس، و ہِننگ آن مُست او نازل ءِ پاننگ اس، “ سانگ ئنا گِڑا تیٹ اسہ مون ءُ چادر ئسے، او کنا کُنڈ آن نے کن سانگ ئنا ٹیکی ءِ۔” او بے توار اسہ دتک ئسے نا ڈول بس فرہاد نا مون ءِ ہُننگ اس۔ اونا پیشانی، پُیہ غاک، جوڑک، کہاڈی، راستیکو خن ئنا کوک، خن آن زرس شیف بامُس نا ہد آ، بامُس نا چوٹی، و خف ئنا ماس آ ٹپ آک اسر۔ ٹپ آک تازہ اسر، و اسہ اسہ ٹپ آن دتر وہنگ اس۔ اونا سینہ، کوپہ، پِڈ و نتا سُم تا ٹپ آک اسر۔
نیاڑی تیان اسٹ ہوغِسا دو تے کاٹم ئٹ خلک و توار کرے، “ ای پاریٹ مون انگا چادر جوان اف خوشی نا وختا، کنا ہیت ءِ کس بنتو، دادے داسا ہُبو کُل، درو نا سالونک اینو دتر ئٹ اسٹ ننا مونا تخوک ءِ۔ کنے او وختا کس بنتو، دا مون آ چادر ننا رُژنا غا دے تے تہارمہ کرے، ننا خوشی تے کیدا۔” دا آئی ہنیفہ اس۔
ولے نازل فرہاد نا مون ئٹ خن خلوک برجاء اوننگ ئس، او چادر نا پلّو ءِ تینا مشت آتیٹ ہلوک ئس ہراڑا فرہاد نا بدن آن وہوک دتر نا لپ آک لگاسر۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
