ضلع کیچ ئنا بنجائی شار تربت نا علاقہ آبسر آسکانی بازار آن استو ننکان بیگواہ مروک ہڑتمکا زالبولک آجو مریسہ اُرا ءِ رسینگار۔
حوالکار تا ردئٹ تربت آبسر نا علاقہ آسکانی بازار آن استو ننکان بیگواہ مروک ہڑتمکا نیاڑیک آجو مسنو۔
یات مرے کہ درے نن تربت نا علاقہ آبسر آسکانی بازار آن ارا زالبول حلیمہ بنت گہرام و نور خاتون زوجہ گہرام ءِ نن نیمہ غا پاکستانیفورسز کارندہ آک بیگواہ کریسر۔
بلوچستان نا ضلع خضدار نا علاقہ وہیر ایریا ٹی کار چپی مس ہرانا سوب آن پنچ بندغ ٹپی مسنو۔
ڈپٹی کمشنر خضدار ہند آ رسینگیسہ ٹپی مروک آتے ریسکیو کریسہ ہسپتال آ رادہ کرے۔
ہمو وخت نوشکی ٹی ارا گاڑی ئٹ دک لگنگ آن 3 بندغ ٹپی مسنو۔
حوالکار تا ردئٹ نوشکی مل ایریا فیلڈر و ٹوڈی کار ئٹ بیم تروک شکست آتا سوب ٹی مسہ بندغ ٹپی مسنو ہرافتے نوشکی ہسپتال آدننگانے۔
بلوچستان نا ضلع کیچ آن حوال آکو کہ تدوکا نن پاکستانی فورسز کارندہ آک چھاپہ خلیسہ ارا نیاڑی ءِ زوراکی ئٹ بیگواہی نا گواچیکریسہ نا درست ہند آ دریر۔
شابیتی حوال تا ردئٹ درے نن تُربَت نا علاقہ آسکانی بازار ٹی چھاپہ خلیسہ ارا زالبول تے زوراکی ئٹ بیگواہی تا گواچی کریسہ بیگواہکریر ۔
بیگواہ کروک آ تومکا لمہ مسڑ ءُ ہرافتا چاہنداری حلیمہ ولد گہرام و نور خاتون زوجہ گہرام نا پن آن مسنے ۔
ذرائع تا ردئٹ ہڑتمکا لمہ و مسڑ ءِ درے نن فورسز کارندہ آک یک بجہ آ چھاپہ خلیسہ دزگیر کریر ہراڑان گڈ ہڑتمکا تا باروئٹ دائسکانہچ حوال رسینگتنے۔
ڈاکٹر دین محمد نا زوراکی ئٹ بیگواہی نا چانڑدہ سال
ٹی بی پی سرگپ
ڈاکٹر دین محمد بلوچ اسہ سیاسی باسک اس ئس، غیر پارلیمانی و آزادی پسند سیاست ٹی چیئرمین غلام محمد نا سنگت و بلوچ نیشنل موومنٹ نا سنٹرل کمیٹی نا باسک ئس و بلوچ قومی حق آتا جہد تون تفوک ئس۔ پاکستان نا لشکری ادارہ آک مشرف نا فوجی آمریت آن اینو نا جمہوری دور اسکان بلوچ قومی حق ئنا تحریک تون تفوک ہزار آ باسک آتے زوراکی ئٹ بیگواہ کرینو، ہرا کیہی سال تیان لشکری ادارہ آتا دزگیری ئٹی ءُ، اوفتیان اسٹ ڈاکٹر دین محمد بلوچ ہم ارے ہرادے 28 جون 2009 ٹی ننکان خضدار نا علاقہ اورناچ ئٹی اسپتال آن ڈیوٹی نا وختا بیگواہ کننگا۔
ڈاکٹر دین محمد بلوچ نا زوراکی نا بیگواہی ءِ چانڑدہ سال پورو مسنے و اونا مسنک چانڑدہ سال آن پاکستان نا پارلیمنٹ، عدلیہ، سیاسی و بندغی حق آتا ادارہ آتیان تینا باوہ نا آجوئی نا خواست کننگ ءُ۔ سمی دین محمد ماما قدیر و فرزانہ مجید تون شال آن کراچی و کراچی آن اسلام آباد اسکان پیادہ لانگ مارچ کرے۔ کراچی، کوئٹہ و اسلام آباد ٹی ڈاکٹر دین محمد بلوچ تون اوار ہزار آ بیگواہ مروک بندغ آتا آجوئی کن تولوک برانز کرینو۔ اسہ دہائی آن زیات وخت گدرینگانے ولے تینا باوہ نا آجوئی کن مہلب و سمی دین محمد نا جہد برجاء ءِ۔
مُست بلوچ سیاسی باسک آتا زوراکی نا بیگواہیک بلوچستان و کراچی اسکان ئسر، ولے داسا خلیجی ڈیہہ تیان ہم سیاسی باسک آتے پاکستان نا دو ٹی تننگک۔ راشد بلوچ ءِ متحدہ عرب امارات پاکستان نا دو ٹی تس ولے پنچ سال گدرینگ آن پد ہم اودے عدالت نا مونا پاش کننگ متنے۔ راشد بلوچ نا لمّہ پنچ سال آن اونا آجوئی نا جہد کننگ ءِ ولے داسکان متحدہ عرب امارات و پاکستان راشد بلوچ نا باروئٹ چُپ ءُ۔
بلوچستان ٹی سمی و مہلب کوْن آ کیہی چنا تا چنکی پریس کلب و روڈ آتیا برانز کرِسا گدرینگک۔ بلوچ انسرجنسی نا وخت آ اسہ تیوہ ءُ پدریچ اس زوراکی نا بیگواہی تا گواچی مسنے ولے پاکستان نا ذمہ وار ادارہ آک تینا پالیسی تیا نظر بِٹنگ کن تیار افس و بلوچستان ٹی زوراکی نا بیگواہی تا لڑ ترندی ئٹ ودنگ ءِ۔
ہر سال نا ڈول تیوہ جہان ئٹ مسلمانک ائید نا خوشی تیٹ اختہ ءُ ولے بلوچستان ٹی زوراکی ئٹ بیگواہ مروک بندغ آتا خاہوت آک عئید ئنا دے ہم تینا بندغ آتا آجوئی کن برانز نا تیاری کننگ ءُ۔
مہلب، سمی، سائرہ، راشد و ذاکر نا لمّہ غاک و زوراکی ئٹ بیگواہ مروک بندغ آتا خاؤت آتا ائید کراچی و کوئٹہ پریس کلب نا مونا برانز کرِسا گدرینگو۔ پاکستان نا سیاسی پارٹی و بندغی حق آتا ادارہ و پاکستان آن درندی ہلوکا جہان نا قوم آتا ادارہ آتا زوراکی نا بیگواہی تیا چُپی آن بلوچستان ٹی اسہ بندغی نیستی اس ودی مسنے۔
تربت ٹی پاکستانی لشکر نا کاروان آ جند ندر جلہو کروک سمیعہ قلندرانی ٹوئٹر آ تینا گڈیکو ٹوئٹ ئٹی لکھا کہ ”کنے سما ءِ کہ ایارانگ ہِننگ اُٹ و ای حق ءِ چاوہ، و کنے او بندغ مروئی اف ہرا نی خواسہ کہ ای مریو۔”
یاتی مرے کہ سمیعہ قلندرانی آصف قلندرانی نا کزن ئس۔ آصف قلندرانی ءِ 14 سال مُست خضدار نا علاقہ توتک آن بیگواہ کننگاسس۔4 سال مُست تینا مار ئنا آجوئی نا انتظار کرِسا آصف قلندرانی نا باوہ جمعہ قلندرانی دا جہان ءِ الّا۔
اینو تربت ٹی مروکا جلہو نا ذمہ واری ءِ بلوچ لبریشن آرمی ارفے۔ تنظیم نا ترجمان جیئند بلوچ پارے کہ دا جلہو ءِ بی ایل اے مجیدبریگیڈ نا سمعیہ قلندرانی بلوچ کرینے۔
یاتی مرے کہ بی ایل اے نا مجید برئیگیڈ نا دا ارٹمیکو زالبول ءِ ہرا جند ندر جلہو کرینے، داکان مُست کیچ آن تعلقداری تخوک شاریچینی ملازم آتے ٹک کریسس۔
بلوچستان نا ضلع کیچ ئٹ زالبول جند ندر پاکستانی لشکر نا سکیورٹی ٹی سفر کروک وی آئی پی قافلہ ءِ جلہو ئٹ ٹک کرے۔
حوال تا رد ئٹ وی آئی پی قافلہ ءِ ہموتم ٹک کننگا ہراتم او تربت ائیرپورٹ آن تربت شار نا پارہ غا ہننگ ئس۔
جلہو نا دک ئٹ بریسہ اسٹ آن زیات گاڑی تے نسخان تیتون مون تروئی تمانے، اندن گاڑی تیٹ سوار کیہی کارندہ تا مرگ ئنا گواچی وٹپی مننگ نا ہم حوال آک اریر۔
اندن جلہو نا ذمہ واری ءِ بلوچ لبریشن آرمی نا ترجمان جیئند بلوچ تینا چنکو بیان اسیٹ ارفیسہ پارینے کہ دا جلہو ءِ بی ایل اے مجیدبرگیڈ نا جند ندر سمعیہ قلندرانی بلوچ سر تسنے۔
ترجمان گیشتر پارے کہ شابیتی بیان زوت شینک کننگو۔
جھل مگسی ٹی سم کاری نا تدینی ئٹ مسہ بندغ بیران و ارٹ ٹپی مسونو، بیران مروک آک قبائلی جیڑہ و غیرت نا پن آ کسفنگانو ۔
شابیتی حوال تا ردئٹ اینو گنداواہ نا علاقہ سیڈ فارم نا ہند دتر وہیفوک دک ئٹ کھنجائی برادری نا ارا بندغ مرگ ئنا گواچی و ارٹ ٹپی مسونو ۔
بیران مروک آتیٹ سبزی فروش محمد عثمان کھنجائی لاشاری و محکمہ ہیلتھ نا ملازم علی اصغر کھنجائی اوار ءُ، اندن ارا بندغ سلیمان کھنجائی و قدیر حسین کھنجائی زیات ٹپی مسونے ۔
تدینی آن گڈ پولیس کارندہ آک رسینگیسہ جون و ٹپی مروک آتے ڈسٹرکٹ ہیڈ کوارٹر اسپتال گنداواہ آ دریر واہم ڈوہدار آک نرنگ ئٹ سرسہب مسر ۔
ایلو پارہ غان جھل مگسی ڈہرو مائی فقیر نا ہند اسہ بندغ ئسے کسفنگانے کسفنگوک بندغ نا چاہنداری ظفر علی ولد عبدالستار کھوسہ نا پن آن مسونے۔
جون ءِ آر ایچ سی اسپتال جھل مگسی آ دننگا۔ ذرائع تا ردئٹ پن کروک بندغ ءِ گمانی ردئٹ غیرت نا پن آ کسفنگاسس ۔
شال ئٹی مش ئنا ٹیڑ آ زو سر مننگ نا کوشست ئٹی مش تیا لگوک اس کسک، 7 گھنٹہ پٹ و پول آن گڈ اونا جون مش آن دڑفنگا۔
پی ڈی ایم اے نا ردئٹ تدینی کرخسہ نا مش تا لٹ ئٹی مس ہراڑے اِرا کوہ پیما تدوکا دے 1200 فٹ بڑز مش ئنا ٹیڑ ءِ سر مننگ کن پیشتمار، سفر ئٹ کسر ءِ الار و ٹیڑ اسکان سر مننگ کن کبین ءُ کسر اسیٹ ہنار۔
کسر ئٹ جاگہ اس مش تیا لگوک محمد شکیل نا نَت لغوشت کرے و مَش تا کریشنگ نا علاقہ ٹی درنگ ئسے ٹی تما۔
پی ڈی ایم اے کوالخواہ تا پاننگ ءِ کہ اوفتے نن ئنا یک بجہ غا حوال رسینگا ہراکان گڈ پی ڈی ایم اے نا ریسکیو فورس ہند آ سر مس و سہب ئنا ہشت بجہ اسکان سرچ آپریشن برجاء تخا۔
او پاریر کہ 7 گھنٹہ اسکان برجاء مروک سرچ آپریشن ئٹ درنگ آن اونا جوْن ءِ کشار و 400 فٹ نا بڑزی آن دڑفنگا و اسپتال آ رادہ کننگا۔
ہراڑے المی کارروائی آن گڈ جوْن ءِ وارث آتا حوالہ کننگا و ایلو کوہ پیما ءِ پولیس دزگیر کریسہ سر و سوج کن درے۔
بلوچستان نا علاقہ سبی ٹی باسُنی آن اسہ بندغ اس بیران، پین 12 بندغ نا حالیت خراب مس۔
ایم ایس سول ہسپتال سبی ڈاکٹر رفیق مستوئی نا رد ئٹ باز باسُنی و لوار نا سوب آن کیہی بندغ آتا حالیت خراب مسنے۔
ہیٹ ویو نا سوب آن 12 بندغ ءِ سول اسپتال سبی آ ہتنگانے ہرافتیان اسہ بندغ کسکنے و ایلو زیمی مروکا تے جانجوڑی کمک آن گڈڈسچارج کننگانے۔
محکمہ مُد ئنا رد ئٹ بلوچستان نا کیہئ علاقہ آک دا وخت ترند باسُنی نا پلویڑ ٹی ءُ۔
ضلع چاغی نا تحصیل نوکنڈی اینو ڈیہہ ئنا غٹ آن باسُن آ شار ءِ، زیات آن زیات درجہ حرارت 49 ڈگری سینٹی گریڈ ریکارڈ مسنے، وسبی ٹی درجہ حرارت 46 ڈگری سینٹی گریڈ رکارڈ مسنے۔
ضلع کیچ نا علاقہ ٹی درو دیگر آ مروک سم کاری نا اسہ تدینی اسیٹی اسہ بندغ ئس بیران مسنے۔
سم کاری نا تدینی ضلع کیچ نا علاقہ گلی بلیدہ نا ہند آ مسونے۔
بیران مروکا ورنا نا چاہنداری شاہ میر ولد محمد کریم نا پن ئٹ مسونے۔ واہم تدینی نا سوب آک داسکان سما تمتور۔
