حوال تا رد ئٹ پنجگور گریڈ اسٹیشن نا خُڑک سی پیک روٹ آ بلوچستان نا ضلع پنجگور ئٹ پاکستانی لشکر آ تراک اس مس۔
تراک ئٹ فورسز آتے جانی و مالی نسخان مس۔ و جلہو نا ذمہ واری ءِ بلوچ سلہہ بند تنظیم بلوچ لبریشن آرمی ارفے۔
تراک آن گڈ فورسز تا بھلو ٹولی اس پن کروک ہند آ سر مس۔
پاکستانی لشکر آ جلہو نا ذمہ واری ءِ آزادی خواہوک سلہہ بند تنظیم بلوچ لبریشن آرمی ارفے۔
بلوچ لبریشن آرمی نا ترجمان جیئند بلوچ میڈیا آ شینگ کروک تینا بیان ئٹ پارے کہ اینو پنجگور ٹی سی پیک روٹ نا خڑک شاہو کہن ٹیکوزہ گیر پاکستانی لشکر نا کاروان ٹی اوار اسہ اُلاخ ئسے آئی ای ڈی جلہو ئٹ ٹک کرین۔
ترجمان پارے کہ تراک ئٹ دشمن نا اِرا کارندہ مرگ ئنا گواچی و کم آن کم مُسٹ ٹپی مسر و اوفتا گاڑی ءِ ہم نسخان مس۔
او پارے کہ بلوچ لبریشن آرمی دا جلہو نا ذمہ واری ءِ ارفک و بلوچستان آن پاکستانی لشکر نا تیوہ پیشتمنگ اسکان ننا کاروائیک برجاءمرور۔
ایلو کنڈ آن ضلع کیچ ئنا بنجائی شار تربت نا ہند گوگدان ئٹ سلہہ بند بندغ آک کریش پلانٹ ءِ جلہو ئٹ ٹک کریر۔
جلہو ئٹ اوڑے ساڑی لاری و مشینری تے سم کاری کرسہ ٹک کننگا۔
حوال تا رد ئٹ سلہہ بند بندغ آک ہموڑے ساڑی کل بندغ آتے اسہ جاہ کرسہ تڑی آن گڈ ہلار ہنار، دا وخت ہچ وڑ ئنا جانی نسخان ئسےنا حوال رسینگتنے۔
بلوچ سلہہ بند گل بلوچستان لبریشن فرنٹ مند ئٹ پاکستانی لشکر پوسکن ٹہیفنگوک کیمپ آ جلہو نا ذمہ واری ارفے۔
بی ایل ایف نا ترجمان میجر گہرام بیان اٹ پارے کہ سرمچار آک کیچ، مند ئٹ مبارک چات نا ہند آ پاکستانی لشکر نا پوسکن ٹہیفوککیمپ ئسے جلہو اٹ ٹِک کریر۔
او مُستی پارے کہ جلہو ئٹ اسہ ٹرک اس، ٹینٹ و ایلو مشین تے بُھس کننگا و کیمپ ئنا دیوال تے دڑیفنگا و مزورکار تے پامدار کننگ آنگڈ یلہ کننگا۔
