حوال تا رد ئٹ بلوچستان نا دریابی شار گوادر و ضلع کیچ ئنا بنجائی شار تربت آن اِرا بندغ زوراکی ئٹ بیگواہ کننگانو۔

شابیتی حوال تا رد ئٹ بلوچستان نا دریابی شار گوادر آن پاکستانی فورسز آک اسہ بندغ ئسے زوراکی ئٹ بیگواہی نا گواچی کرسہ نا درست ءُ ہند ئسے آ دریر۔

حوال آتا رد ئٹ دریابی شار گوادر نا علاقہ کلانچی پاڈہ غان پاکستانی فورسز آک ساجد ولد خالد پنی ءُ بندغ ئسے دزگیر کرسہ بیگواہ کریر۔

حوالکار نا رد ئٹ پن کروک بندغ بنداوہی دشت مونڈی نا ہندی سے، ہرا دا وخت آ تینا باوہ پیرئی علاقہ غان ہمپ و لڈ کرسہ گوادر ئٹ ہندی ئس۔

ایلو کنڈ آن بلوچی بولی نا نوشتکار سکی ساوڑ تربت آن بیگواہ کننگانے۔ سخی بخش پن کروک سکی ساوڑ بلوچی بولی نا شاعر و نوشتکار ئسے۔

سخی بخش بلوچ نا تعلقداری بلوچستان نا ضلع خضدار نا علاقہ نال گریشہ غان ءِ۔ حوال تا رد ئٹ درو اُرا غان پیشتمنگ آن گڈ بیگواہ مسس، ہرانا دائسکان ہچو حوال ئس اف۔

یاتی مرے کہ اود بلوچی بولی ٹی بندغ آتے خوانفیکہ، بھلو کچ ئسے ٹی ہندنو خوانندہ ءُ ہرافک بلوچی “سیاھگ راست نبیسگ” سکی ساوڑ آن ہیل کرینو۔

سخی بخش نا خاہوت پک کرسہ پارے کہ نن سکی ساوڑ نا بیگواہ مننگ نا حوال ءِ پولیس ءِ تسنن۔ اوفک کوالخواہ تان خواست کریر کہ سکی ساوڑ نا یلہ مننگ ئٹ تینا کڑد ءِ سر تیر۔

بلوچستان نا بنجاہی شار کوئٹہ ئٹ ایئر پورٹ روڈ آ عالمو چوک آن خڑک سم کاری آن سپریم کورٹ نا وکیل کسک۔

کسفنگوک وکیل نا چاہنداری رازق شر نا پن آن مسنے۔ سم کاری نا تدینی آن گڈ وکیل نا جون ءِ سول اسپتال آ دننگا۔

سپریم کورٹ نا وکیل آ خونی جلہو آن گڈ پولیس جاگہ غا سر مریسہ شاہدی مُچ کرے۔

پولیس نا پاننگ ءِ کہ تدینی نا غٹ پہلو تیان پٹ و پول کریسہ دوبہ دار تے قانود نا چر ئٹ ہتنگو۔

سم کاری آن خون مروک وکیل نا تعلقداری نصیر آباد آن ءِ، تدینی آ بلوچستان بار کونسل عدالتی کارروائی تیان بائیکاٹ نا پڑو کریسہ خونی تے دزگیر کننگ نا خواست کرے۔

اوغانستان نا صوبہ بدخشان نا بنجائی ہند فیض آباد ٹی اسہ خودکش بمب جلہو ئسے ٹی پن کروک صوبہ نا گورنر تون اوار اِرا بندغکھسکر۔

فیض آباد نا ہندی حوال کار آک پک کرینو کہ 6 جون آ صوبہ بدخشان نا بنجائی ہند فیض آباد ٹی سوب ئنا 8:15 نا وختا کار بمبجلہو ٹی بیرانی مسنے۔

بدخشان نا احوالکاری و دود ربیدہ ئی ڈائریکٹر معاذ الدین احمدی پارینے کہ جلہو نا ہدف صوبہ بدخشان نا نائب و گورنر مولوی نثاراحمد احمدی نا گاڑی ئس۔

احمدی نا رد ئٹ دا تدینی ٹی اِرا بندغ بیران و شش پین ٹپی مسنو ہرافتیٹ مولوی نثار احمد احمدی و صوبہ بدخشان نا گورنر ہم اوار ءِ۔

بدخشان انفارمیشن اینڈ کلچر نا ڈائریکٹر نا پاننگ ئس کہ ٹپی مروکا تے اسپتال آ سر کننگانے و انٹیلی جنس و انٹیلی جنس ادارہ تاکنڈ آن ودیک پٹ و پول برجاء ءِ۔

بلوچ خوانندہ سروک ذاکر مجید بلوچ نا لمّہ پارینے کہ کنا مار ءِ 8 جون 2009 آ زوراکی ئٹ بیگواہ کننگا، ہرا داسکان بیگواہ ءِ۔

او پارے کہ ‏اندا توہ 8 جون آ کوئٹہ ٹی سیمینار اس مرو و کراچی پریس کلب نا مون آ اسہ دے ئی برانزی کیمپ اس خاؤت نا کنڈ آن اڈتننگو ہرا ٹی اوڑدئی کن خوانندہ آتون اوار غٹ فکری تپہ آتیان خواست کیوہ۔

یات مرے کہ ذاکر مجید نا زوراکی نا بیگواہی ءِ 14 سال پورو مننگ ءِ و ذاکر مجید نا زوراکی نا بیگواہی نا دے “8 جون” آ بلوچ مسنگپرسنز ڈے ٹہفنگانے۔ دا دے ءِ غٹ بیگواہ بلوچ آتا پن آ کننگانے۔

وائس فار بلوچ مسسنگ پرسنز ذاکر مجید نا لمّہ نا خواست آ دا برانز نا مخ تفی ءِ کرے و وی بی ایم پی نا جنرل سیکرٹری سمی دینبلوچ کراچی ٹی رہینگوک غٹ فکری تپہ آتا بندغ، بندغ دوست، بندغی حق آتا باسک، سیاسی و چاگڑدی باسک آتیان دا برانز ئٹ اوارمننگ نا خواست کرے، تاکہ او برانز ئٹ بشخ ہلیسہ ذاکر مجید نا آجوئی کن توار بڑز کیر۔

بلوچی اکیڈمی نا مسکوہی کماش ماہ تاک  بلوچی نا ایڈیٹر عبدالواحد بندیگ ناجوڑی سے آن  کذیت کرے ۔

ایماندار نا نماز جنازہ اینو سہب 10:00 بجہ غا کلی صاحبزادہ نوشکی ٹی خواننگو و قبر کننگ باوہ پیرہ ئی قبرستان ٹی مرو۔ ایماندار نا فاتحہ خوانی باوہ پیرہ ئی خلق ئٹ مرو۔

عبدالواحد بندیگ آزاد جمالدینی نا مرک آن گڈ اونا توہی میگزین بلوچی نا شینگ کاری ءِ کرے دا رسالہ تیوہ جہان ٹی پنی مس۔ او جتاء جتاء سرحال تا کہیی مضامین نوشتہ کرے بھلو وخت ئسے اسکان بلوچی اکیڈمی نا کماش مس۔

بلوچستان نا ضلع خضدار نا علاقہ زہری ءِ پاکستانی لشکر گھیرہ ٹی ہلیسہ شش بندغ ءِ زوراکی ئٹ بیگواہ کرے، علاقہ ئٹ احوالکاری نظام بند کننگا۔

اینو سہب سہار تون زہری نا جتاء علاقہ نورگامہ، بلبل، چشمہ، تراسانی، مشک و ایب کیب ءِ پاکستانی لشکر گھیرہ کرینے۔

احوالکار آک ٹی بی پی ءِ پاریر کہ فورسز آک جتاء اُرا تیا چھاپہ خلنگ ءُ، دا وخت ئٹ پاکستانی لشکر شش بندغ ءِ دزگیر کریسہ نادرست جاگہ غا درینے ہرافتیان اسٹ نا چاہنداری گل محمد نا مار یاسر ہند بلبل نا پن آن مسونے۔

احوالکار آک پاریر کہ علاقہ ئٹ انٹرنیٹ تون اوار موبائل نیٹورک آتے بند کننگانے اندن دا بابت ضلعی کوالخواہ تا ہیت دائسکان مونا بتنے۔

بلوچ لبریشن آرمی نا ترجمان جیئند بلوچ میڈیا غا شینک کروک تینا بیان ئٹ پارے کہ ننا سرمچار آک ہرنائی ٹی کوزہ گیر پاکستانیلشکر نا کمکی گاڑی ءِ بمب جلہو ئٹ ٹک کریر۔

ترجمان پارے کہ سرمچار آک چپرلیٹ نا ہند آ دشمن لشکر نا پوسٹ آ دیر سر کروکا ٹریکٹر ٹینکر ءِ بمب جلہو ئٹ ٹک کریر ہرا نا بھرم ٹیٹریکٹر ءِ باز نسخان رسینگا و اوٹی سوار کمکار آک ٹپی مسر۔

ایسر ئٹ اود پارے کہ بلوچ لبریشن آرمی دا جلہو نا ذمہ واری ءِ ارفک و کوزہ گیر لشکر ءِ ہر وڑ ئنا مڈی سر کروکا بندغ آک ننا نشانہ غامرور۔

دکی ٹی نا درست آ بندغ آتا سُم کاری آن کوئلہ کانڑ نا اسہ مزور اس بیران مس۔

پولیس نا رد ئٹ یک شمبے نا دے دکی نا علاقہ راغہ کول ہند آ نا درست آ سلہہ بند بندغ آتا سم کاری آن اسہ مزور اس بیران مس۔

پولیس جون ءِ دوئی مریسہ ہسپتال آ سر کرے، ودیک کاروائی برجاء ءِ۔

سفر زند و شاعری

نوشت: نزار قبانی | مَٹ: عتیق آسکوہ بلوچ

چارمیکو بشخ

گل آتیٹ ودشت

دمشق نا متکنا اُرا تیان اسہ اُرا اسیٹی 21 مارچ 1923ء آ ہراتم ای ودی مسوٹ گڑا ڈغار ہم او وخت تینا ودی مننگ نا ایسری ساہت آتیٹ ئس۔ ہتم تینا خرّن آ لباس ءِ نشان تس نا تیاری تیٹ ئس۔ ڈغار و کنا لمہ اسہ وخت آ پڈ پُر مسوسر؛ و ہڑتوما تا چنا خننگ ہم اسہ وخت آ مسوسس۔

ای گوڑینگیوہ کہ انت دا بیرہ قسمتی گڑاس ئس یا کنا ودی مننگ دنو مُد اسیٹ مرے ہراتم ڈغار جانکش آ مرے و درخت آک تینا متکنا لباس ءِ کشیسہ چغل تننگ آ مریر؟ انت کنکن دا ہیت نوشتہ کننگاسس کہ کنے مارچ ئنا تُوہ ئنا ڈول مروئی ءِ ہرا ایسری و بدلی تا تُوہ ءِ؟ ہرا ہیت ءِ ای چاوہ او دادے کہ ہرا دے ای ودی مسوٹ، قدرت تینا انقلاب ءِ سیڷ ئنا مُد آ پرمان کننگ ئس و کشت و کشار، بئے بوچ، پُھل و چُک آتیان اندا خواہنگ ئس کہ او تیوہ غاک ہم زمین آ دا انقلاب ئٹ اوڑتون اوڑدہ مریر۔

دا تیوہ غاک تو ڈغار نا شیف آن مننگ ئسر، سلیس اونا زی ئنا ہیت گڑا داڑے فرانسیسی کوزہ گیری نا برخلاف تحریکِ مزاحمت شامی خلق آتیان ہلیس شار و نیامئی چُنک شار تے اسکان تالان مننگ ئس۔ چُنک شار شاغور، ہراڑے نن ہندی ئسون، مزاحمت نا بنجاء آتیان اسہ سوگوْ ہند اس ئس۔ دا دمشقی چنک شار تا راہشون تیٹ سوداگر، صنعت و ہنر کاری تون تفوک مخلوق و دکان خواجہ غاک اوار ئسر۔ دا بندغ آک تینا دکان و اُرا تیان راجی تحریک نا مالی کمک ءِ ہم کننگ ئسر و اونا راہشونی ءِ ہم۔ کنا باوہ، توفیق قبانی، اندا بندغ آتیان اسٹ اس ئس و ننا اُرا ہم اندن انگا اُرا تیان اسٹ ئس۔

ای اُرا نا شابیت دے ٹکی برآمدہ ئٹ تولیسوٹہ و بھاز اُست خواہی و چنائی دوستی تون شامی سیاسی راہشون تا ہیت آتے بنگوٹہ۔ ننا اُرا نا حویلی ئٹ سلیسہ سیاسی راہشونک ہزار آتا مُچی تون تران کریرہ، فرانسیسی کوزہ نا برخلاف اُلس آن مزاحمت نا خواست کریرہ و آجوئی دوئی کننگ کن اوفتے انقلاب نا سبخ تسورہ۔ دا سیاسی جلسہ غاک مئذنۃ الشحم نا چُنک شار ئٹ ننا اُرا نا بند درغ تا تہٹی ہڈ تننگارہ۔ نن ہم درغ تا پد آن ڈھکوک گڑا نہ گڑاس بنگونہ ولے زیات سرپد متونہ۔

1930ء نا دہ یک ئٹ ای داخہ در سرپدی تختوٹہ کہ داڑے مروک ہیت آتے جُوانی ئٹ یات تخنگ کروسٹ۔ ولے ہراتم ای ساف نا پاس آتیٹ سینیگال نا توفک و نیزہ بند سپاہی تے تینا اُرا ئٹ پیہنگ آ خناٹ و اوفتے تینا باوہ ءِ )تدمر ئٹ ٹہیفوک( ریگستانی جیل آ دننگ کن ہلیسہ تینتون بکتربند گاڑی ئٹ دریسہ خناٹ گڑا ای سرپد مسوٹ کہ کنا باوہ داسہ مٹھائی جوڑ کننگ نا جاگہ غا پین کاریم اس کرو، دا وخت اسکان تو او آزاتی کن کاریم تیٹ گٹ ئس۔

او دے تیٹ کنا باوہ مٹھائی و انقلاب نا تیاری تیٹ لگوک مسکہ و ای اونا دا کاریم آن بھاز زہمی مسوٹہ۔ ای گوڑینگاٹہ کہ او امر ہنینی و خرینی و سختی نا کاریم ءِ اوار کیک۔ دا ہیت کنے دا سوب آن یات بریک کہ اِرا کاریمی کنا باوہ نا شخصیت اٹ ئس او کنے ٹی و کنا شاعری ٹی بھاز پاش حالیت تون بسونے۔ گڑا کنا رومانی شاعری مخلوق نا پارہ غا سفر کن کنا پاسپورٹ جوڑ مس، یعنی ہمو پاسپورٹ آتیان اسٹ ہرافتے ای کاریم اٹ ہتیوہ۔ فطری ڈول ئٹ ای بھاز آ شار تا اسہ مسافر ئسے اُٹ۔ ہراتم اسہ پاسپورٹ آن کنا اُست پُر مریک گڑا ای اودے چغل ایتوا و اونا جاگہ غا تینا جیب آن، پوسکنو پنہ و پوسکن ویزہ والا، ارٹمیکو پاسپورٹ ءِ کشیوہ۔ سفری کاغد کنکن ہچبر داخہ دا گچین الّمی متنے اخہ در تینے ٹی تینٹ سفر۔