خضدار آن زوراکی ئٹ بیگواہی ںا گواچی جاوید بلوچ آجو کننگا۔
پاکستانی فورسز کارندہ آتا دوتیان دزگیر کننگ آن گڈ بیگواہ جاوید بلوچ ولد بشیر احمد یلہ کننگانے اونا آجو کننگ نا پک بلوچستان ٹی بیگواہ بندغ آتا تنظیم وائس فار بلوچ مسنگ پرسنز کرینے ۔
یات مرے کہ جاوید بلوچ ءِ تدوکا تُو 4 مئی آ خضدار بولان کالونی ٹی اونا دکان آن پاکستانی فورسز دزگیر کریسہ تینتون اوار دریر ہراڑان گڈ او بیگواہ کننگاسس ۔
جاوید بلوچ نا آجو کننگ کن بلوچ طلباء تنظیم آتا پارہ غان برانز ہم ہڈ تننگاسس ۔
بلوچستان نا ضلع نوشکی ٹی سلہہ بند بندغ آک پاکستانی لشکر نا اسہ پوسٹ ئسے جلہو ئٹ ٹک کرینو۔
جلہو درو ننکان زرین جنگل نا ہند آ بنجاہی کسر نا خڑک آ ٹہیفوک فورسز آتا پوسٹ آ کننگا۔ درو سہب ئنا پاکستانی لشکر نا بھلو کچ اس پن کروک ہند آ سر مریسہ علاقہ ءِ گھیرہ کرے۔
علاقائی احوالکار تا ردئٹ جلہو نا وخت ترند سم کاری نا توار بِننگ ئٹ بس۔ واہم کوالخواک دائسکان نسخان تا بابت ہچو شابیتی حوال اس تتنو۔
پن کروک جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی نا ترجمان جیئند بلوچ ارفینے۔
جیئند بلوچ میڈیا ٹی شینک کروک بیان اسیٹ پارے کہ ننا سرمچار آک نوشکی ٹی زرین جنگل نا ہند آ کوزہ گیر پاکستانی لشکر نا پوسٹ ءِ درو ننکان پوسکنا سلہہ تیٹ ٹک کریر۔
ترجمان پارے کہ جلہو ٹی اسہ دژمن کارندہ اس جاگہ غا مرگ ئنا گواچی مس اندن اوفتے پین جانی و مالی نسخان ہم ارفوئی تما۔
گڈ سر ئٹ او پارے کہ بلوچ لبریشن آرمی دا جلہو نا ذمہ واری ءِ ارفک و دا ارادہ ءِ دریفک کہ کوزہ گیر لشکر نا پورو پیشتمنگ اسکان ننا کاروائیک برجاء مرور۔
بیگواہ بلوچ خوانندہ راہشون ذاکر مجید نا مرغنا بیگواہی و یلہ مننگ نا بابت کوئٹہ پریس کلب ئٹ سیمینار اس اڈ تننگا ہرا ٹی جتاء فکر ئنا بندغ تیتون اوار بھلو کچ اسیٹ ورنا و بیگواہ بندغ تا خاہوت آک اوار مسر۔ سیمینار ئٹ بیگواہ ذاکر مجید نا لُمہ ہم اوار مس و ساڑی مروک آک تران کریر۔
تران کروک آک پاریر کہ ذاکر مجید اسہ خوانندہ راہشون و بلوچستان ئٹ تیوہ غاتیان زیات چاہنگوک آ راہشون تیٹ حساب مریک۔ او اسہ سیاسی باسک ئسے نا دروشم ئٹ بلوچستان نا کنڈ کنڈ ئٹ ہنیسہ الس ءِ چاہنداری تسکہ و اوفتا حق و ریاستی ناانصافی تا بابت شعور تالان کریکہ ولے بد بختی آن اودے تدوک 14 سال آن زندان ئٹ بند کننگانے و اودے بے بندغی اذیت تننگک۔ ذاکر نا بابت دائسکان ریاستی ادارہ غاک چپ ءُ۔ ذاکر نا لُمہ و ہیڑ گودی فرزانہ تدوکا 14 سال آتیان اونا یلہ مننگ کن جہد کننگ ءُ ولے ریاستی ادارہ غاک ذاکر نا بابت معلومداری تننگ ئٹ بے سہب ءُ۔
اوفک پاریر کہ زوراکی نا بیگواہی ہرا اسہ بے بندغی عمل ئسے۔ جہانی و ملکی قانود ئٹ اسہ بندغ ئسے زوراکی ئٹ بیگواہ کننگ بھاز بھلو ڈوہ ئسے۔ بلکن بلوچستان جہان نا ہمو اسٹ انگا ڈیہہ ءِ ہراڑے قانود نا رکھوک آک قانود ءِ لتاڑیرہ۔ سکیورٹی فورسز آتا پارہ غان تدوکا بیست سال ئٹ ہزار آتا کچ ئٹی بلوچ ورنا تے زوراکی ئٹ بیگواہی نا گواچی کننگا، کیہی جشوک جونک خسنگار، ہزار آ ورناک کیہی سال آتیان زندان تیٹ اذیت آتون مون تننگ ءُ۔ زوراکی نا بیگواہی تا دا بھیم بش کروک آ لڑ دے پہ دے آن ودیسہ ءِ و اینو دا ٹی ترندی خننگک۔ بلوچ خوانندہ و معصوم بلوچ ورنا تے بیدس اسہ ڈوہ ئسے آن برمتہ کریسہ زوراکی ئٹ بیگواہی نا گواچی کننگک۔
تران کروک آک پاریر کہ زوراکی نا بیگواہی تا دا عمل نہ بیرہ زوراکی ئٹ بیگواہ بندغ تے اسکان ءِ بلکن دا عمل آن تیوہ ءُ اسہ خاہوت اس اشتماعی بے دادی تا گواچی مریک۔ بلوچستان نا ہزار آ خاہوت آک دا وخت تینا دوستخواہ تا یلہ مننگ کن اُننگ ءُ۔ کیہی لُمہ غاک سال آتیان تینا مار تا یلہ مننگ کن سڑک آتیا درپدر خڑینک شولنگ ءُ۔ کیہی اُرا تا اسٹ انگا ذمہ وار آک بیگواہ ءُ و بلوچ خاہوت آک ذہنی و مالی سختی تا گواچی ءُ۔ ریاستی ادارہ تا پارہ غان زوراکی نا بیگواہی تے سیاسی اسپر ئسے نا دروشم ئٹ کاریم ئٹ ہتنگک۔ دا عمل آن تیوہ غا چاگڑد ئٹ اسہ بھیم اس تالان مسنے۔ ہیت کروک آ توار تے دا بے بندغی عمل نا وسیلہ ئٹ چپ کرفنگک۔ و ولدا بیگواہ بندغ تا خاہوت آتے اسہ وڑ ئسے نا ہم قانودی حق تننگپک۔
ساڑی مروک آک پاریر کہ ذاکر مجید تون اوار کیہی بلوچ خوانندہ غاک تدوکا دہ سال آن زوراکی ئٹ بیگواہ ءُ و بے دادی تون مون تننگ ءُ۔ ذاکر مجید بلوچستان ئٹ بلوچ خوانندہ راہشون مننگ تون اوار بلوچ راج اکن اسہ سوگوْ ءُ توار اس ہم ئس ہرادے چپ کرفنگ کن ریاستی ادارہ غاک ذاکر مجید ءِ تدوکا 14 سال آن زوراکی ئٹ بیگواہ کریسہ اودے ازیت تننگ ءُ۔ ذاکر مجید نا زوراکی نا بیگواہی ءِ 14 سال پوروْ مسنے۔ ذاکر مجید نا لُمہ 14 آن تینا جغر نا ٹکر نا یلہ مننگ کن درپدر ءِ۔
اینو 08 جون آ ذاکر مجید نا زوراکی ئٹ بیگواہی نا بابت اسہ سیمینار اس اڈ تننگا ہرا ٹی جتاء فکر آتیان تعلقداری تخوک بندغ آک اوار مسر و زوراکی نا بیگواہی تا دا بے بندغی و بے قانودی عمل ءِ ایسر کننگ نا خواست کریر۔ سیمینار ئٹ ایڈووکیٹ عمران بلوچ، بیگواہ ذاکر مجید نا لُمہ، ایڈووکیٹ شاہ زیب، پروفیسر لالا منیر، بیگواہ آصف و رشید نا ایڑ سائرہ بلوچ تون اوار ایلو بیگواہ بندغ تا خاہوت آک تران کریر و ذاکر تون اوار غٹ بیگواہ بلوچ بندی تا یلہ کننگ نا خواست کریر۔
کوزہ مروک دے کہی کرک نا فلسطینی شار رملہ ئٹ اسرائیلی لشکر نا چھاپہ غان گڈ جھڑپ آک بناء مسر۔
اسرائیلی لشکر پارینے کہ اوفک پنچ شمبے نا سہب سہار تون اسہ جلہو کار ئسے نا اُرا ءِ بھس کننگ کن رملہ ئٹ کارروائی کریر۔
احوال تروک ادارہ روئٹرز ءِ اسہ خن خنوک شاہد اس پارے کہ فلسطینی اتھارٹی نا سیاسی بنجاہ رملہ ئٹ فوجی قافلہ پیہا و ہمو وخت کیہی فلسطینیک ہم ہموڑے مُچ مسر۔
خن خنوک شاہد آتا ردئٹ گڑاس فلسطینی ورنا اسرائیلی فوجی تے خل ئٹ خلکر، ہرا نا ورندی ٹی اوفک سم کاری کریر و سٹن گرنیڈ و آنسو گیس ہم کاریم ئٹ ایسر۔
فلسطین نا وزارت جانجوڑی نا پاننگ ءِ کہ کم آن کم شش بندغ ءِ جانجوڑی کمک کن اسپتال آ ہتنگانے، ہرافتیان مُسہ بندغ سم لگنگ آن ٹپی مسنو۔
اسرائیلی لشکر پارینے کہ اوفتا فوجیک رملہ ئٹ ‘ہمو دہشت گرد نا اُرا ءِ بھس کننگ کن کاروائی کریر ہرا تدوکا نومبر یروشلم ئٹ بمب جلہو کریسس۔’
ہمو اِرا تراک ئٹ اسہ اسرائیلی کینیڈین ورنا تون اوار اِرا بندغ مرگ ئنا گواچی و 14 ٹپی مسوسر۔ پولیس پاریسس کہ دا دیسی ٹہیفوک بمب آتا تراک ئسر ہرا شار آن پیشن اسہ بس اسٹاپ ئسے آ کڈ کننگاسر۔
فلسطینی صدر محمود عباس نا فتح پارٹی نا باسک عبدالفتاح دولا پارینے کہ جنگجو تا اُرا تے بھس کننگ اسہ اشتماعی سزا ئسے ہرا جنگی ڈوہ تیٹ بریک۔
اسرائیل پارینے کہ ڈوہدار تا اُرا تے بھس کننگ نا پالیسی سزا تننگ و مننگ کروک جلہو کار تے توننگ کن ءِ۔
خیال ئٹ مرے کہ اسرائیل ئٹ سر وزیر نیتن یاہو نا حکومت آن گڈ تدوکا اسہ سال ئسے نا وخت ئٹ دے کہی کرک ئٹ بے دادی تیٹ ودکی بسنے۔ اسرائیل فلسطینی تا پارہ غان تینا شار تیٹ مروک جلہو تا ورندی ٹی فوجی چھاپہ تیٹ ودکی ایسنے۔
فلسطین نا وزارت جانجوڑی نا پاننگ ءِ کہ اسرائیل نا دو آن جنوری آن دائسکان کم آن کم 158 فلسطینی شاری کسکنو۔
اسرائیل نا وزارت خارجہ پارینے کہ اندا وخت ئٹ فلسطینی تا جلہو تیٹ 28 اسرائیلی و اِرا پیشن ملکی بندغ کسکنو۔
انت دیہاڑ ئٹ وختس گچین دور اس گدرینگانے؟
نوشت: ڈاکٹر مبارک علی
مٹ: عتیق آسکوہ بلوچ
یونانی شاعر ہیسوڈ دیہاڑ ئٹ گچین دور نا تصور ءِ مونا ایسوسس۔ دادے او خیسن نا ازباب تون ہم دروشم پاریکہ ہرادے ہچبر زنگ لگپک و تینا گواچن دروشم ئٹ مریک۔ انت دیہاڑ ئٹ وختس گچین دور اس گدرینگانے؟
گچین دور آن، ہیسوڈ (Hesiod) 650قبل مسیح نا مراد گدرینگوک وخت نا اسہ اندنو دور اس ئس، ہراٹی بندغ امن ایمنی و خوشحالی تون زند کریکہ ولے اندن تہذیب ئٹ دیمروی مس، گچین زمانہ مُر مریسہ ہنا و بندغ نا اشتماعی شعور ئٹ اونا یات آک سلیسر و وخت گدرینگ تون اوار اوار زمانہ نا واپس ہتنگ نا اُست خواہیک ہم ودیسہ کریر۔
یورپی نیامئی عہد ئٹ مسیحی جہان ئٹ دا خیال ءِ شابیتی رسینگا کہ جنگ یا باغ عدن اندا جہان ئٹ ئس ہرا حضرت آدم و امّا حوا نا پیشن مننگ آن گڈ اودیم مس۔ امریکئی محقق و نوشتہ کار مارگریٹ تھومسن جنت نا دیہاڑ(History of Paradise) اٹ ‘مہمات’ آتا درشانی ءِ کرینے ہرافتیٹ جنت عرض ئنا پٹ و پول نا کوشست کننگاسس۔ نشخ آتا کمک ئٹ دا بے ڈس مروک جنت ءِ وختس دے ٹکی نیامئی ئٹ، وختس افریقہ ئٹ و وختس جاندمی امریکہ ئٹ پٹنگا، ولے بے سہبی مس۔
اطالوی سوداگر و ‘مہم جو’ مارکو پولو چین آ ہنیسہ کسر ئٹ اسماعیلی راہشون حسن الصباح نا مفروضہ جنت نا کپی تا ہیت ءِ کرینے۔ اندا مفروضہ غا عبدل حلیم شرر 1926ء ئٹ تینا ناول فردوس بریں ءِ نوشتہ کرینے۔ داڑان گمان مریک کہ بندغ ءِ گچین دور و جنت عرض نا اُست خواہی مسونے۔ ہراڑے او جنگ آتیان مُر چاگڑدی جنجال آتیان دو خلاسی خنیسہ گل و بال زند اس گدریفنگ کیر۔
گچین زمانہ نا است خواہی ہمو وخت ترندی تون زیات مس ہراتم ایشیا و افریقہ نا ملک آک یورپی سامراج نا دو کیرغ بسر۔ یورپی ملک آک اوفتے غیرمہذب و بار بیرین پاریر۔ اوفتیتون مون تریسہ ہراتم دا ملک آک بے سہبی خنار گڑا اوفتا باوری ہم ژدغہ مس و دافک کمبوتی گمان ئنا گواچی مسر۔ گڑا تینا آزاتی نا جہد اکن اوفتے اسہ اندنو نظریہ ئسے نا خواست ئس ہرا اوفتے ہمت و باوری ایتوس۔
دا حالیت آتیٹی اوفک گچین گدرینگوک وخت ئٹ گچین زمانہ ءِ پٹار۔ مثیال کن ہندوستان ئٹ آریا چاگڑد، ہندو مہاسبہ و ہندتوا تینا دیہاڑ ئٹ وید نا زمانہ ءِ گچین پارے۔ گاندھی جی رام راجیہ ءِ گچین زمانہ نا دروشم تون مونا ایس۔ ہندو ‘انتہا پسند’ مورخ آک تینا دیہاڑ ءِ ‘مبالغہ آمیزی’ تون ٹہیفسہ دیہاڑ نوشتہ کننگ نا بنماسی اصول آتیان مون ءِ ہڑسار۔ مثیال کن اوفتا دعویٰ ءِ کہ ریگ وید جیالوجی نا بنائی زمانہ ئٹ نوشتہ کننگانے۔ اُڑن کھٹولہ آن مراد اوفک جہاز ءِ ہلیرہ و دا ہم دعویٰ کیرہ کہ گنیش دیوتا ءِ ہاتھی نا سُنٹ پلاسٹک سرجری نا کمک ئٹ خلنگاسس۔ سیاسٹ ئٹ دا جتا زمانہ غاتے ٹہیفسہ گچین و لس ئٹ قومیت نا جوزہ ودی کننگک۔
مسلمانک ہم تینا دیہاڑ ئٹ کہی گچین زمانہ ٹہیفرہ۔ اولیکو گچین زمانہ خلافت راشدہ نا ئس ہرادے مثالی پاننگک۔ ارٹمیکو زمانہ عباسی دور حکومت ئس ہراٹی مسلمان تا فتوحات و اوفتا علمی و ادبی کارنامہ غاک ءُ۔ مسٹمیکو ہندوستان ئٹ مغل حکومت ءِ سرپد مریرہ، ہرا 1000 سال اسکان ہندو تیا حکومت کریسس و چارمیکو خلافت عثمایہ نا، ہرانا ایسری اولیکو جہانی بھلا جنگ آن گڈ مس۔
ہراتم ہم اسہ راج اسیٹی گچین زمانہ نا پٹنگ مریک گڑا اوڑتون اوار اودے تدوک وخت آن اسیکہ وا ساڑی وخت اٹ ہتنگ کن زندہ کننگ تحریک بش مریک، کہ گچین تدوک وخت و گچین زمانہ ءِ واپس ہتیسہ اسیکہ وا بے ڈس مروک عظمت ءِ دوئی کننگ مرے۔ زندہ کننگ نا تحریک نا سوب چاگڑد بروک وخت نا جاگہ غا تدینگوک وخت نا تہارمئی تیٹ گم مریک۔
شبلی نعمانی نا مسلمان تے دا پنت تس کہ اوفتا دیمروی پدی ہننگ ئٹی ءِ۔ داخہ در پدی ہنبو کہ تدوک وخت ئنا گچین زمانہ اسکان سر مبو۔ زندہ کننگ نا تحریک دنکہ تدوک وخت ئنا خیال، افکار و دود آتے پورو و شابیت سرپد مریک اندا سوب اونا پوسکنا فکر آتا ہچو گنجائشت اس مفک۔ دا نظریہ نا رِدئٹ دیہاڑ پیہہ آنبار پیری کیک و تینے اسیکہ وا ہتیک، و دیمروی نا نظریہ ئٹ دیہاڑ تچک آ کسر یعنی اسہ لیک اسیٹ سُریک۔
گچین آ تدوک وخت نا است خواہی ئٹ ایشائی ملک آتیتون یورپی ملک آک ہم اوار ءُ۔ مثیال کن اہل یونان تینا گچین تدوک وخت سقراط، افلاطون، ارسطو و ہمو کرن ئنا ڈرامہ نگار آتیٹ پٹیسہ تینا دیہاڑ ءِ شرفدار جوڑ کننگ نا کوشست کیرہ۔ اٹلی ئٹ ہراتم موسولینی اقتدار ئٹ بس گڑا او متکنا رومی سلطنت ءِ اسیکہ وا ہتنگ نا کوشست کرے۔ نہ بیرہ رومی کرن نا دیہاڑ ءِ راج دوستی نا چمشانک تون نوشتہ کننگا بلکن او فتوحات آتا کمکی ئٹ اونا متکنا شرف و معتبری ءِ عملی دروشم ئٹ ہتنگ خواہس، ولے اٹلی ءِ ایتھوپیا ئٹ بے سہبی تون مون تروئی تما و او بھاز خواری اسیتون لیبیا و صومالیہ ئٹ تینا کوزہ ءِ کننگ کرے۔ رومی سلطنت نا زندہ کننگ نا تغ پورہ مننگ کتو۔
جرمنی ئٹ ہم مفکر و مورخ آک جرمن آریا زنک نا متکنا گچینی تے واپس ہتنگ کن نازی دور حکومت ئٹ کہی گام تے ارفیر۔ آریا زنک نا پاکیزگی کن یہودی تیتون برام و اوڑدئی تے ایسر کننگ نا کوشست آک مسر و دا پالیسی ءِ ہم مُستی دننگا کہ اوفتا جرمنی آن بِسٹ ایسری مرے کہ جرمن زنک پاک مریسہ متکنا عظمت و شرف ءِ دوئی کے۔
گچین زمانہ و زندہ کننگ نا تحریک آتے ہچبر سرسہبی دو بتئو ولے بے سہبی آن گڈ ہم ماندہ چاگڑد ئٹ دا است خواہی ساندہ سلوک مس کہ او تینا حالیت آن اُست کٹہ مریسہ تینا دیہاڑ ءِ واپس ہتنگ خوارہ۔
گچین وڑئٹ دا است خواہی نا سوب سیاست دان و حاکم آک اوفتے وار وار یخین ایترہ کہ او تدوک وخت ئنا گچین زمانہ ءِ واپس ہتور ہرا اوفتا تیوہ ویل آتا ایسری مرو۔ ہراتم اسکان گچین دور نا تصور و گچین تدوک وخت ئنا خیال سلوک مرو، او وخت اسکان مخلوق گمراہی نا تہارمئی تیٹ مریسہ ماندہ مرو و دا مفروضہ آن سواد ارفیسہ سیاست دان و دینی راہشونک تینا ہند ءِ برجاء تخور۔
دیہاڑ نا خواننگ دا پک کیک کہ دائسکان ہچ ءُ عہد اسیٹ ہم گچین تدوک وخت ئنا زندہ مننگ متنے و گچین دور ئنا تصور ساندہ اسہ تغ اس مسونے، انتیکہ گچین زمانہ ہچبر ہم دیہاڑ اٹ متنے۔ دا مورخ و داشمند آک ءُ ہرافک اسہ زمانہ ئسے گچین جوڑ کیرہ و کس ءِ ماندہ، اگہ دا گواچن ءِ سرپد مننگ مرے گڑا دا ایسری آ سرمننگ کینہ کہ گچین زمانہ تدوک وخت اٹ آخہ بلکن بروک وخت ئٹی ءِ و ہرانا ٹہیفنگ کن چاگڑد ءِ قربانی تروئی تمو و متکن بے سواد دود و ادارہ غاتیان دو خلاسی کروئی تمو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
چین، پاکستان و ایران نا نیام ئٹ چار شمبے نا دے بیجنگ ٹی اوڑدئی ئٹ انسداد دہشت گردی نا ویل آ شابیتی ہیت و تران کننگا۔ داگامگیج ءِ علاقہ ٹی اسہ پوسکنو صف بندی سے نا کنڈ آ بھلو گام اس پاننگک۔
دا بابت ئٹ پاکستانی دفتر خارجہ و چین ئنا وزارت خارجہ نا کنڈ آن بیان ہم مونا بسنے ہرا دا اوڑدئی ءِ پک کرینو۔
پاکستانی دفتر خارجہ نا کنڈ آن شنگ مروک بیان ئٹی پاننگانے کہ بیجنگ ٹی ہفت جون آ انسداد دہشت گردی و سکیورٹی نا زی آڈائریکٹرز جنرل نا سطح آ پاکستان، چین و ایران نا اولیکو مُسہ فریقی مشاورتی میٹنگ مس۔
بیان ئٹی پاننگا کہ ہر مُسہ ڈیہہ تا وفد آک علاقہ ٹی سکیورٹی نا حالیت و خاص وڑ ئٹ دہشت گردی نا سوب آن ودی مروک بیم آشابیتی ئٹ تران کریر۔۔
بیان ئٹ ودیک پاننگا کہ ”اوڑدئی مشاورت آن گڈ دہشت گردی تون مون تننگ و سکیورٹی نا بابت ئٹ مُسہ فریقی مشاورت ءِ ادارہ نادروشم تننگ نا فیصلہ ہم کننگا، ہرا نا رد و بند ولدا ٹہفنگو۔‘‘
اندن چین ئنا وزارت خارجہ نا کنڈ آن ہم بیان شنگ کننگانے ہرا ٹی پاننگانے کہ ہر مُسہ ڈیہہ تا کنڈ آن علاقہ ٹی دہشت گردی نا حالیتتون مون تننگ نا بابت ئٹ تینا آزموندہ آتے مونا ہتنگا و دا ویل آ مستقل بنداو آ اوڑدئی نا فیصلہ ہم کننگا۔
پاکستانی دفتر خارجہ نا بیان نا رد ئٹ پاکستانی وزارت خارجہ ٹی انسداد دہشت گردی نا ڈائریکٹر جنرل عبدالحمید، عوامی جمہوریہچین ئنا وزارت خارجہ ٹی خارجہ سلامتی امور نا شعبہ نا ڈائریکٹر جنرل بائی تیان و اسلامی جمہوریہ ایران نا وزارت خارجہ ٹی وزیرخارجہ نا معاون سید رسول موسوی تینا تینا ڈیہہ تا وفد آتا راہشونی ءِ کریر۔ عبدالحمید و سید موسوی چین ئنا معاون وزیر خارجہنونگ رونگ تون ہم اوڑدئی کرے۔
یاتی مرے کہ تدوکا توہ پاکستان اسلام آباد ٹی چین و اوغانستان تون مُسہ فریقی ہیت و تران کننگاسس۔
مئی ٹی مروکا دا مُسہ فریقی اوڑدئی ٹی وزیر خارجہ بلاول بھٹو زرداری، اونا چینی ہم منصب چن گانگ و اوغانستان نا عبوری وزیرخارجہ مولوی امیر خان متقی تینا ڈیہہ تا نمائندگی کریر۔
ہر مُسہ سروک آک سیاسی حوالکاری، انسداد دہشت گردی، تجارت و ہن و بر تون اوار جتا ویل آتیا تینا خیال آتا درشانی کریر۔
افغانستان نا صوبہ بدخشان ٹی پنچ شمبے 8 جون نا سہب 10 بجکے 50 منٹ آ فیض آباد شار ٹی نبوی مسجد نا ہند آ تراک مس ۔
دا تراک بدخشان نا ڈپٹی گورنر مولوی نثار احمد نا جنازہ نا ہند آ مس ہرا دوشمبے 6 جون آ اسہ تراک اسیٹ مرگ نا گواچی مسوسس ۔
افغان میڈیا نا ردئٹ تراک نا ہدف بغلان پولیس نا مسکوہی سروک مولوی سیف اللہ ئس۔ بدخشاں نا انفارمیشن اینڈ کلچر نا سروک معیزالدین احمدی تراک نا پک ءِ کریسہ پارے کہ تراک ئٹ مولوی سیف اللہ ہم مرگ ئنا گواچی مسونے ۔
یاتی مرے کہ ارا دے مالو بدخشاں صوبہ ڈپٹی گورنر مولوی نثار احمد اسہ بمب تراک اسیٹ مرگ نا گواچی مسس ۔
بلوچستان نا ضلع خضدار آن نا درست بندغ آک اسہ زالبول ئسے بے گواہ کریر، تدینی نا برخلاف ہندی بندغ آک برانز ئٹ بنجائی سڑک ءِ بند کرینو۔
برانزیک کوئٹہ کراچی بنجائی سڑک ءِ عوامی ہوٹل نا خڑک آ ہن و بر کن بند کرینو۔ برانزیک برمتہ مروک زالبول نا یلہ مننگ اسکان سڑک ءِ بند کننگ نا تڑی تسر۔
حوال آتا رد ئٹ نا درست بندغ آک خضدار آن اسہ اُرا سے آن اسہ زالبول ئسے بے گواہ کرینو واہم بے گواہ مروک زالبول و برمتہ کروکا تا چاہنداری دائسکان متنے۔
بلوچستان لبریشن فرنٹ نا ترجمان میجر گہرام بلوچ میڈیا غا تینا اسہ شینک کروک ءُ بیان اسیٹی کیچ ئٹ پاکستانی فورسز آ جلہو نا ذمہ واری ءِ ارفے۔
میڈیا ءِ رادہ کروک تینا بیان ئٹ بی ایل ایف نا ترجمان نا پاننگ ئس کہ بلوچستان لبریشن فرنٹ نا سرمچار آک استو یانزدہ بجہ غا کیچ نا علاقہ گورکوپ جمک ئٹ پاکستانی لشکر نا کیمپ ءِ بھلا سلہہ تیٹ ٹک کریر۔
میجر گہرام بلوچ پارے کہ سرمچار آک دژمن لشکر نا کیمپ آ بھلا سلہہ تیٹ جلہو کریر و اے ون گولہ فائر کریر ہرا کیمپ ئٹ تمسہ ترخار۔
ترجمان پارے کہ جلہو نا سوب دژمن فورسز ءِ جانی و مالی نسخان ہرفوئی تما۔
او مستی پارے کہ بلوچستان لبریشن فرنٹ دا جلہو نا ذمہ واری ءِ ارفک و بلوچستان نا آجوئی اسکان دا وڑ نا جلہوک برجاء مرور۔
سعودی عرب نا بنجاہی شار ریاض ئٹ ایران نا سفارت خانہ درو دوارہ ملنگانے۔
العربیہ نیوز نا ردئٹ ہڑتوما ملک آک مارچ ئٹ چین ئنا ثالثی ٹی مروک معاہدہ نا ردئٹ سفارتی تعلقداری تے بحال کننگ آ امنائی کریسر۔
ایران نا نائب وزیر خارجہ علی رضا بیگدلی بیرک کشائی نا مجلس ئٹ تران کریسہ پارے کہ ‘نن اینو نا دے ءِ اسلامی جمہوریہ ایران و سعودی عرب نا تعلقداری تیٹ اسہ اہم ءُ دے اس سرپد مرینہ۔ ہڑتوما ڈیہہ تا نیام ئٹ کمک اسہ پوسکنو دور اسیٹ پیہنگ ءِ۔’
ایرانی وزارت خارجہ نا ترجمان ناصر کنعانی دو شمبے آ پارے کہ ‘ریاض ئٹ ایران نا سفارت خانہ، جدہ ئٹ ننا قونصلیٹ جنرل و اسلامی تعاون تنظیم ئٹ ننا دفتر باقاعدہ سئے شمبے و چار شمبے آ دوارہ ملنگور۔’
فرانسیسی احوال تروک ادارہ اے ایف پی نا ردئٹ ایران نا سعودی عرب نا بنجاہی شار ریاض ئٹ سفارت خانہ ملنگ آن ہڑتوما ڈیہہ تا نیام ئٹ مارچ ئٹی چین ئنا کمکاری ٹی مروک معاہدہ غا مہر خلنگانے۔
سعودی عرب 2016 ٹی ایران تون تعلقداری تے ہمو وخت کشکا ہراتم تہران ئٹ اونا سفارت خانہ و قطب دے کہی شار مشہد ئٹ قونصل خانہ غا ریاض نا کنڈ آن شیعہ عالم نمر النمر نا پاہو نا برخلاف مروک برانز آتا وخت جلہو کننگا۔
ایلو پارہ غا سعودی عرب دائسکان دا ہیت ءِ پک کتنے کہ او تہران ئٹ تینا سفارت خانہ ءِ اراتم ملیک یا تینا سفیر ءِ تخک۔
سال آتا شرہ آن گڈ 10 مارچ آ دے ٹک نیام ئنا اِرا بھلا ملک آک چین ئٹ مفاہمت نا گوڑیفوک معاہدہ غا دستخط کریسر۔ ہمو وخت آن سعودی عرب تہران نا سیوتی شام ئتون تعلقداری تے بحال کرے و یمن ئٹ ایمنی کن کوشست آتے ترند کرینے ہراڑے اود سال آتے اسکان ایران تون مخ تفی کروک حوثی باغی تا برخلاف فوجی سیوت نا سروکی ءِ کرینے۔
