قلات ایجوکیشن کمیٹی نا پارہ غان ڈاکٹر فاروق بلوچ و عبدالواحد کھیتران نا کتاب آتا مون پاشی نا دود ئنا رِدئٹ اسہ دے ئی مجلساس ہڈ تننگا۔ مجلس ئٹ ادیب و زانتکار آک تران کریر۔

قلات ایجوکیشن کمیٹی نا پارہ غان ڈاکٹر فاروق بلوچ نا کتاب “بلوچ و بلوچستان قدیم مؤرخین کے نظر میں” و عبد الواحد کھیتران  ناکتاب “رند و لاشار عہد کی نامور شخصیات” نا مون پاشی نا رِدئٹ اسہ دے ئی مجلس اس ایلمنٹری کالج قلات ئٹ ہڈ تننگا۔

مجلس نا گچین آ مہمان ڈاکٹر فاروق بلوچ ئس، ہمرا داری کروک مہمان تیٹ عبدالواحد کھیتران ئس و صدارت ایلمنٹری کالج نا پرنسپلثناء اللہ ثناء کرے۔ کتاب آتیا قلات آن تعلقدار ادیب محمد حنیف قلاتی، یوسف عجب، فیصل آغا و جعفر قمبرانی شابیتی تون چمشانکشاغار۔

مجلس ئٹ قلات آن ادیب، چاگڑدی باسک و علم دوست خوانندہ غاک بھلو کچ اسیٹ بشخ ہلکر۔ مجلس نا شونکار ظہور بلوچ ئس۔

مجلس ئٹ عبدالواحد کھیتران، ڈاکٹر فاروق بلوچ، ثناءاللہ ثناء، ڈاکٹر مقدم بلوچ، علی احمد بلوچ، اللہ بخش لہڑی، پروفیسر ڈاکٹر محمدصدیق نیچاری و ایلوفک تران کریسہ پاریر کہ بلوچ راج ئنا دیہاڑ بھاز متکن ءِ و ہزار آ سال تیا تالان ءِ۔ دا ہزار آ سال تا دیہاڑ ئٹ داراج اندنو مشاہیر ودی کرے ہرافتا کڑد و عمل نا سوب آن اینو بلوچ راج ءِ نہ بیرہ ایشیائی بلکن تیوہ غا جہان ئٹ شرف تون اوننگک۔

اوفک پاریر بلوچ راج داکان مالو اسہ شابیت ءُ ڈیہہ اسیٹ جتا قبیلہ غاتا دروشم ئٹ آبات ئس۔ اوفک پاریر کہ دا شخصیت آک ءُ کہ ہراناسوب دیہاڑ جوڑ مریک اگہ دیہاڑ آن شخصیت آتا کڑد ءِ کشنگہ گڑا دیہاڑ نا ہند ایسر مریک بلکن دیہاڑ نا جند ایسر مریک۔

بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ ننا سرمچار آک استو قلات شار آن خڑک گراڑی ناعلاقہ ئٹ مڈی دروک اسہ گاڑی ئسے سلہہ بند جلہو ئٹ ٹک کریر ہرا نا سوب گاڑی ءِ نسخان رسینگا۔

ترجمان پارے کہ بی ایل اے نا سرمچار آک پن کروک گاڑی نا ڈرائیور و کلینڈر ءِ خبڑدار کننگ آن گڈ یلہ کریر اندن گاڑی نا ٹیر آتے وانجن ءِ سم کاری کریسہ بھس کریر۔

اونا ودیک پاننگ ئس کہ نن پاش پانہ کہ بلوچستان آن مڈی دننگ نا کس ءِ موکل تفرون۔ کوزہ گیر پاکستان نا لشکر و سرکاری کمپنیتون اوار لٹ و پل پراجیکٹ آتیٹ اوار مروک کمپنیک بلوچ راجی مڈی تا لٹ و پل ءِ یلہ کیر نہ گڑا اوفتے ترند جلہو تتون مون تروئی تمو۔

ایسر ئٹ او پارے کہ بلوچ لبریشن آرمی دا جلہو نا ذمہ واری ءِ ارفک۔ نن مڈی دروک گاڑی ڈرائیور و مالک آتیا پاش کینہ کہ او دا کاریمتے یلہ کیر نہ گڑا تینا جانی و مالی نسخان نا او تینٹ ذمہ وار مرور۔

بلوچ اسٹوڈنٹس کونسل لاہور نا پارہ غان بلوچستان ٹی زوراکی ئٹ بیگواہی تیٹ ودکی و بیگواہ بندغ آتا یلہ کپرینگ نا بر خلاف لاہورٹی لبرٹی چوک آ دپ درشانی کننگا–

دا دپ درشانی ٹی بلوچ خوانندہ آتون اوار ایلو بندغ آک ہم اوار مسر اندن دپ درشانی ٹی اوار بندغ آک دو تیٹ پاکستانی لشکر نا دوآن زوراکی ئٹ بیگواہ مروک بلوچ خوانندہ آتا عکس ارفیسر–

برانز کروک آتا دا وخت پاننگ اس بلوچستان ٹی برجاہ مرغن زوراکی ئٹ بیگواہی نا لڑ ٹی اسہ وار واپس ودکی کننگانے تدوکا گڑاس دےئٹی بلوچستان نا جتا علاقہ آتیٹ داسکان ٹولی تیٹ خوانندہ  آک و زند ئنا ایلو شعبہ آتیان تعلق تخوک بندغ آک  بیگواہی نا گواچی ءُ واسٹ نا بابت ہم اوفتا ارا والا تے حوال رسینگتنے او ہراڑکن ءُ و ہرا گناہ ٹی ادارہ آک اوفتے دزگیر کرینو–

او پاریر لاہور ٹی تولوک بندغ آک ننے اریر و اندازہ کیر و تینا سوج کن ورندی پٹیر کہ بلوچ نا ویل انت ءِ، ننے آن پنجاب نا ہندی تا پارہغان ہر وخت دا سوج آک کننگانو داسا نن داڑے  ہر ایلو دے تینا خوانندہ سنگت آتا یلہ کننگ کن برینا برانز کینا گڑا داسا نمے اندازہمرے کہ ننا ویل انت ءِ–

لاہور برانز کروک خوانندہ آک دا وخت بیگواہ جاوید بلوچ، مرتضیٰ زہری و بلوچستان یونیورسٹی آن زوراکی ئٹ بیگواہی نا گواچی مروکسہیل و فصیح بلوچ تون اوار ایلو زوراکی ئٹ بیگواہ خوانندہ آتا یلہ کننگ نا خواست کریر–

برانز کروک خوانندہ آتا پاننگ اس نن بھازی بنگونن کہ پارہ  بلوچ آتے اوفتا سردار آک مونی ہننگ کن ہلیپسہ ولے نن داڑے خننگ ان کہننے تعلیمی ادارہ آتیان ارفیسہ کہی سال تکین بیگواہ کروک سردار اف بلکن اٹک، گجرات، فیصل آباد تون اوار پنجاب نا جتا علاقہآتیان بلوچستان آ بروک ایف سی کارندہ آکو ننا اسکول آتے چھاؤنی جوڑ کننگ و تعلیمی ادارہ آتے کیمپ جوڑ کروک آ سردار اف بلکنفورسز ادارہ ءُ–

خوانندہ آتا دا وخت آ پین پاننگ اس کہ بلوچستان ٹی برجاہ نا انصافی ءِ توریسہ بلوچ خوانندہ آتیا خلیس نا سیخا ایسر کننگ وبیگواہ بندغ تا یلہ کننگ و انصاف نا خواست آتے  یخینی کیر حکومت عدلیہ و بندغی حق آتا ادارہ تینا کڑد ءِ ایسر کیر–

بلوچستان نا دریابی شار گْوادر نا تحصیل پسنی آن جون اس دوئی کننگا ۔

شابیتی حوال تا ردئٹ جون نا چاہنداری ابراہیم نا پن آن مسونے ہرا رحمان فش کمپنی نا مینجر ئس، ہرا استو اُرا آن پیشتماسس۔

پولیس کارندہ آک جون ءِ تینتون دریسہ گیشتر پٹ و پول کننگو۔ واہم دائسکان تدینی نا سوب آک مونا بتنو۔

بلوچستان نا دارالحکومت کوئٹہ ئٹ ہسپتال ئٹ داخل کانگو وائرس نا زالبول ناجوڑ کذیت کرے۔

ہسپتال کوالخواہ تا ردئٹ زالبول ناجوڑ نا تعلقداری اوغانستان آن ئس ہرا منہ وخت اکن کچلاک ئٹ ہندی ئس۔

دا بابت ہسپتال بست و بندی کوالخواہ تا پاننگ ءِ کہ برجاء سال کانگو وائرس آن کذیت کروک ناجوڑ تا کچ چار مسونے۔

کوالخواہ تا پاننگ ءِ کہ فاطمہ جناح ہسپتال ئٹ کانگو وائرس نا مُسہ پک ناجوڑ داخل ءُ۔

فاطمہ جناح ہسپتال نا کوالخواہ تا رِدئٹ برجاء سال دائسکان کانگو وائرس نا پانزدہ کیس نوشت مسونو۔

بلوچستان نا ضلع آواران آن پاکستانی فورسز کارندہ آک تدوکا دے ارا ایلم ءِ زوراکی ئٹ بیگواہی نا گواچی کریسہ نا درست ہند آ دریر۔

ہڑتوما ایلم تا چاہنداری سراج و مہران  نا پن آن مسونے ۔

بلوچ نیشنل موومنٹ نا بندغی حق آتا ادارہ پانک نا ردئٹ ہڑتوما ایلم تے ارا دے مالو گیشکور ملٹری کیمپ آ خوائفیسر ۔ اوکان گڈ اوفتاباروٹ ہچو حوال  رسینگتنے۔

ہڑتوما بندغ آک گیشکور نا ہندی ءُ ، اندن ایلم تیان سراج ءِ داکان مالو ہم ارا سال اسکان برمتہ کننگاسس و ارا سال آن گڈ آجو مسس وداسا اسیکہ وا زوراکی ئٹ بیگواہی تا گواچی مسونے ۔

زوراکی ئٹ بیگواہ کروک ایلم تیان مہران متحدہ عرب امارات ٹی مزوری کریکہ ، چھٹی تے تدیفنگ کن بلوچستان آ پدا بسوسس۔

ایلو پارہ غان بلوچستان نا ضلع خضدار نا ہندی مرتضیٰ زہری اسہ وار پین زوراکی ئٹ بیگواہ کننگانے ۔

خاہوتی ذرائع تا ردئٹ اودے تدوکا دے پاکستانی فورسز کارندہ سی ٹی ڈی و ڈھکوک ادارہ آک زوراکی ئٹ بیگواہ کریر ۔

یات مرے کہ مرتضیٰ زہری داکان مالو 2010 ، 2021 و 2015 ٹی ہم زوراکی ئٹ بیگواہی تا گواچی مسس ۔ اندن اسہ وار پین بیگواہکننگانے ۔

بلوچستان ٹی زوراکی ئٹ بیگواہی تا تدینیک اسیکہ وا ترند مننگ ءُ۔ خضدار آن تدوکا سال 2023 ٹی زوراکی ئٹ بیگواہی تا 10 تدینیرپورٹ مسونو ہرافتیٹ زیات کچ خوانندہ آتا ءِ  ۔

ریکوڈک و بیرک گولڈ کارپوریشن

ٹی بی پی سرگپ

سال اِرا ہزار و بیست و دو ئٹ بلوچستان حکومت و کینیڈین کمپنی بیرک گولڈ کارپوریشن نا ریکوڈک آ معاہدہ مس، ہرانا بیست و پنچ درسد حصہ بلوچستان حکومت ءِ رسینگوئی ئس، و بیست و پنچ در سد پاکستان نا بنجائی حکومت و پنجا در سد سرمایہ خلوک (بیرکگولڈ کارپوریشن) نا بشخ ئسر ہرانا رِدئٹ بلوچستان حکومت ریکوڈک کانڑ ءِ بیرک گولڈ کارپوریشن نا دوٹی تسونے۔

ریکوڈک مائن کانڑ پٹنگ نا منصوبہ ئسے، ہرا بلوچستان نا ضلع چاغی نا علاقہ ریکوڈک ئٹ ءِ و دا جہان نا خیسن و مِس ئنا تیوہ غاتیانبھلا کوڑ آتیان اسٹ ءِ۔ بلوچستان ئٹ راج دوست جماعت، سیاسی و سلہہ بند آجوئی خواہوک گل و جماعت آک ریکوڈک، سی پیک،سیندک کوْن آ منصوبہ غاتے لٹ و پُلی منصوبہ پِن کیرہ۔

کینیڈا ئٹ بیرک گولڈ کارپوریشن نا ونڈ تخوک آتا مجلس نا وختا بندغی حق آتا باسک لطیف جوہر بلوچ کارپوریشن نا چیف ایگزیکٹومارک برسٹو تون تینا بھیم ئنا درشانی ءِ کرے کہ بیرک گولڈ کارپوریشن ہندی مخلوق نا مرضی آن بیدس پاکستانی حکومت و فوج نااست خواہی تا بنماس آ معاہدہ کرینے ہرا بلوچستان ئٹ پین فوجی کارروائی و ہندی مخلوق تون بے بندغی حالیت نا سوب مرو ولے بیرکگولڈ کارپوریشن نا سی ای او اونا بھیم ءِ مُر کننگ نا جاگہ غا راستکی تے دروغ پاریسہ پارے کہ او بیرک گولڈ کارپوریشن و بلوچستانحکومت نا نیامٹ معاہدہ نا رِدئٹ دروغ تڑنگ ءِ۔

بلوچستان نا بد آ حالیت آتا سوب آن جہانی کمپنیک، چین و ایلو ملک آک بلوچستان ئٹ ارب آ ڈالر تا منصوبہ تا بابت رکھ ئنا رِدئت بھیمئنا درشانی کرینو و بلوچ سلہہ بند گل آتا سیوت بلوچ راجی آجوئی سنگر (براس) ہم خدو تینا بیان اٹ بیرک گولڈ کارپوریشن ءِ دامعاہدہ نا بابت پامدار کریسس و اندن بلوچ سلہہ بند گل آک پیشن ملکی سرمایہ کار و ملک آتے پامدار کریسہ کرینو کہ او بلوچستانئٹ لٹ و پُلی منصوبہ آتیٹ پاکستان تون کمک کپس۔

بلوچ راج نا بھیم ءِ مُر کننگ آن بیدس و مون پہ مون بلوچ راج نا نمائندہ ادارہ غاتا رضا آن بیدس بلوچستان نا جنگی حالیت آتیٹ دامنصوبہ غاتے پورو کننگ سخت مرو۔ بیرک گولڈ کارپوریشن تون اوار جہانی کمپنیک و ملک آک بلوچ راج نا خُلیس ءِ مُر کننگ کن گھامارفنگ و مون پہ مون ہیت کننگ کن گھام ارفر کہ دا منصوبہ غاک دتر وہیفنگ نا جاگہ غا دیمروی نا وسیلہ مریر۔

بلوچستان نا ضلع خضدار آن پاکستانی فورسز کارندہ آک اسہ بندغ ئسے زوراکی ئٹ بیگواہی تا گواچی کریسہ نا درست ہند آ دریر ۔

بیگواہ مروک بندغ نا چاہنداری عنایت زہری ولد فیض محمد زہری سکنہ زہری نا پن آن مسونے ۔

ذرائع تا ردئٹ پن کروک ورنا ءِ فورسز کارندہ آک دو مئی آ خضدار نا علاقہ اللہ والا چوک آن اونا دکان آ چھاپہ خلیسہ دزگیر کریرہراڑے او کاریم کیک ۔

ذرائع تا ردئٹ فورسز نا کارندہ آک دکان آ ساڑی مروک تیوہ بندغ آتا شناختی کارڈ آتے چیک کریر و عنایت اللہ ءِ  چاہندار کننگ آن گڈاونا خنتیا پُچ ئس تفیسہ ویگو گاڑی ٹی شاغار تینتون اوار دریر ۔

پاش مرے کہ بلوچستان ٹی زوراکی ئٹ بیگواہی تا تدینی تیٹ اسہ وار پین ترندی خننگ ءُ۔ خضدار آن تدوکا سال 2023 ٹی زوراکی ئٹبیگواہی تا 10 تدینی رپورٹ مسونو ہرافتیٹ بھاز کچ خوانندہ آتا ءِ۔

تدوکا تو خضدار آن دزگیر کننگ آن گڈ بیگواہ کروک آتیٹ جاوید بلوچ ولد بشیر احمد سکنہ خضدار، بشیر احمد ولد تاج محمد سمالانیو اونا چنکا ایلم اوار ءِ  جاوید ولد بشیر تدوکا دے خضدار آن تینا دکان آن بیگواہ مس۔

ہنوکا سال اپریل نا تو ٹی خضدار آن زوراکی ئٹ بیگواہی تا ہرا حوال آک دی بلوچستان پوسٹ ءِ دوئی مسونو دافتیٹ شہزاد رئیسانی ،جلیل بلوچ ، ابرار جتک ، جاوید زہری ولد میر حسن زہری ، علی حسن زہری ولد غلام نبی زہری اوار ئسر ۔

داکان مالو مارچ ٹی زوراکی ئٹ بیگواہی تا گواچی مروک خالد ولد محمد حسن ، آصف ولد عبداللہ اوار ءُ  ۔

بلوچستان نا صنعتی شار حب چوکی ٹی سم کاری نا ارا جتاء تدینی تیٹ اسہ بندغ اس مرگ نا گواچی و اسٹ ٹپی مسونے ۔

پولیس کارندہ آتا ردئٹ پنچ شمبے نا نیامیکو نن کوئٹہ کراچی کسر آ بھوانی شاہ پیٹرول پمپ نا خڑک آ سم کاری نا تدینی اٹ سم لگنگآن 29 سالی فرمان علی ولد محمد ارشاد ہند آ مرگ نا گواچی مس ۔

جون ءِ اسپتال آ دننگان گڈ کاروائی کننگ آن پد جون ءِ خاہوت ءِ تننگا۔ اندن سم کاری نا ارٹمیکو تدینی دارو ہوٹل نا خڑک آ مس ۔ ہراڑےدُزی نا تدینی نا وختا مونتس آ دُز آتا سم کاری کننگ آن امان اللہ ولد نظام پنی بندغ ئس دُو ٹی سم لگنگ آن ٹپی مس۔

ٹپی کروک بندغ ءِ زوت ئٹ اسپتال آ دننگا و مستی علاج کن کراچی آ دننگانے ۔

بلوچستان نا ضلع مستونگ ٹی گروک نا تمنگ آن مسہ بندغ مرگ نا گواچی مسونو ۔

شابیتی حوال تا ردئٹ مستونگ نا علاقہ لکپاس نا خڑک گروک نا تمنگ آن مسہ بندغ مرگ نا گواچی مسونو ۔

جون آتے نواب غوث بخش اسپتال آ دننگانے ۔ یاتی مرے کہ مستونگ و ایب کیب ٹی ہورہ گروک تون اوار پر برجاء ءِ۔