وطن تون رازداری 

نوشت: شکیل سمالی 

دی بلوچستان پوسٹ 

مش تا سیخا ٹی کمب آتا شیف آ تولوک چار انگا یار آک اسٹ ایلو تون بشخندہ کچاری ٹی لگوک ئسر۔ سُمل خیری ئٹ تینا خید آتے سفاء کرسہ امیر جان آ ہکل کرے  امیر جان نی پار رازداری انت ئسے؟

امیر جان سمل نا ہیت ئنا ایسر مننگ تون پارے سمل جان کنا گمان پاہک دا وخت آ بندغ آن زیات مشک رازدار ءُ۔

سمل نا نظر امیر جان نا جوڑ تیا ئس و امیر جان نا جوڑ تے اُننگ ئس کہ ہراتم ہیت ءِ ایسر کیک و ہیت ئنا چٹنگ تون دا وار امیر سوج کرے او امر؟

امیر جان! ہندن کہ مرید تینا شئیر ئسے ٹی پاہک “مشکو رازدار سنگت تہو ءِ ننا”

ہربوئی ٹی چانڑدہ نا نن ئٹ طوبے چیچلو کننگ ئس اینگان ہربوئی نا یخ، خاخر آ تخوکا جڷ خلوکا چادان، سنگت آتا مجلس ام چس ئٹ ئس کنے ہندنو جارات ئس مارشت مننگ ئس ای پاریٹ چیہانٹ ئس خلسہ اسہ پوسکنو زند ئسے ٹی کاو تینا ازبہ ازبہ ءِ چپی راستی کیو تینا بند بند ءِ چونڈو دا وطن نا و خدا نا جوڑوک فطرت نا زیبائی ٹی ڈب الیو۔ ولے ایلو کنڈ آ امیر جان مون ءِ کرنچ کرسہ اسہ وار ولدا سمل نا سوج ئنا ورندی نا تننگ ءِ بناء کرے سمل  چلتن نا تلار آتا دروشم ئٹ ترڈوکا آہو تا نیام ئٹ ہمو خرما تا اودیم مروک انگا توار ءِ رازداری، بولان ئٹی آفتاب نا خن تا خیسنی ءِ رازداری، پارود ئٹ پھلین نا فلسفہ ءِ رازداری، شور ئٹی شہداد و احسان نا بشخندہ ءِ رازداری۔

سمل دا وار خیرو آن ارفے خیرو نی انت پاسہ رازداری نا باروٹ؟

خیرو سمل نا سوج ءِ پامداری ئٹ بننگ ئس سوج ئنا ایسر مننگ تو خیرو ہیت کننگ ءِ بناء کرے کہ وطن نا ہر ہمو بوچ رازداری نا چیدہ ءِ ہرانا خڑک آن ساہ صدخئیک گدرینگرہ ولے او مخبری کپک، اے بولان ئٹ کچاری ہڈ تروکا پریک وطن نا رازدار ءُ، تلار آتا ترڈوکا گڈ آک رازدار ءُ، ٹہفوک زیباء غا چیدہ تا زی آ تولوکا چوٹول آک رازدار ءُ، ڈغار آن پیشتموکا چشمہ غاک و چکل تیان وہوکا دیرک رازدار ءُ، شوان نا لیلڑی رازدار ءِ، شہید آتے نازیفوکا ہمو ہنینا توار رازدار ءِ، گواڑخ تا پن آ شئیر تفوکا شاعر رحمان رازدار ءِ ہمو خیسن خنی تا گڈیکو سم رازدار ءِ خیرو اندا ہیت آتے تون تینا ہیت آتے ایسر کرے و سنگت آتا پارہ غا ہرا۔

سمل خیرو نا پارہ غا ہرسہ پارے یار خیرو نی تو بلا بش کننگ اس۔ انداڑتون ایلو پارہ غان میرو  ہکل کرسہ پارے او سمل۔ سمل چک ءِ میرو نا پارہ غا ہڑسا و چاشن ءُ توار ئسے ئٹ پارے جی میرل، میرل سوج کرے سمل مش ئنا خیر ئٹ رہینگوکا گدان والا باگھیا تتون ڈک کنگنس؟

سمل مون ءِ تینا کرنچ کرسہ میرو ءِ پارے امر ڈک؟

میرو خار آن پر ءُ توار ئسے ئٹ پارے یار اوڑدئی کرینس تون تا؟

سمل مون ئنا کوس تے ملسہ بشخندہ ئٹ پارے میرو ہندن پار یار نم ہم ہندنو ڈوکھیا ءُ لوز پارے، و مستی پارے نہ یار ای ڈک کنتنٹ گدانی تتون۔

میرو سمل نا پام ءِ تینا پارہ غا کننگ کن پارے سمل ای اسہ دے ہناٹ ہمو گدانی تتون گدان نا کماش کنے بخیرٹ کرسہ پار ورنا ایت حوال ءِ۔

ای کماش ءِ حوال تننگ ءِ بناء کریٹ کماش حوال خیر ءِ نن ہندن سنگت آتون پیشتمان پیری سے کن مش تا پارہ غا کان دیخس روح ننا خازہ مرے و جاراتی مرین۔ ای حوال ئٹی ئسٹ کہ پیرہ ہیت ئٹ نیام تما پارے ورنا بشخس دا پڑچ آ توڷ گڑا حوال ایت ای کماش تون اوار پڑچ آ توسٹ خوا غان اتوکا دیر تے کش کریٹ و ولدا حوال تننگ ءِ بناء کریٹ گڑا کماش سنگتاک ایمون نا خیر آ دیری ءُ کمب ئسے نا ماس آ تینا جاگہ ءِ جوڑ کریر و ای ہندن نما گدان نا کنڈ آ بسٹ۔ ای حوال ءِ چٹفسہ کماش نا دوٹی السہ گڈ سر ئٹ پاریٹ پین حوال خیر ءِ۔

حوال چٹنگ تون کماش کنا دو آن بُک ئس الک و پارے ورنا خدا خوش و دراخ کے نمے۔

ای اسہ نظر ئس کماش نا گیمرینگوکا مون آ شاغاٹ و ہرفیٹ کماش نی مونجا اس ایت حوال ءِ۔

کماش لڑونج آ خیری ءِ پدی کوپہ غا خسا و ڈغار آ تخوکا پیالہ ءِ ہرفے چاء نا گلم ئس النگ آن گڈ حوال تننگ ءِ بناء کرے، مارکو حوال خیر ءِ اندا پرک مسر  مولا نا کرم ٹی آبادی تا جار زیات مس ہتم نا مد بس نن جھالاوان آن ہمپ لڈ کرین، بسن ساروان آ نما پاسو نا مش تا خیر ئٹ منہ دے گدریفین ہربوئی لٹ آن ارا خرما نا ڈس رسینگا ننے تومکا خرماک ہاڑی ئسر، و دا بنگن دا امے کان اندانگ برسہ باگھیا تا مال تے پلویڑ ئٹ کرینو۔ ہندن اسہ دے شوان الشسہ بسک ای پاریٹ خیر ءِ مارکو انتئے دن دم کشتہ اُس؟ مارکو کنے پارے پیرہ جان خرماک ننا مال آ جلہو کریر ارا میڷ ءِ لخ آن پرغار ای مچھٹ مر ئسٹ ہموکان پیرامپ کریٹ تا و پدی مش ئنا کنڈ آ ہنار۔ پیرہ حوال ءِ ایسر کننگ تون چک ءِ کنا پاسو آ ہڑسسہ پارے ورنا پین حوال خیر ءِ نم بڑ ٹاک مسنرے۔

ای بے جاراتی ئٹ سوج کریٹ کماش ولدا نم امر کریرے ہمو خرما تا؟

پیرہ بشخندہ غا مون ءِ ولدا کوس ترسہ پارے مارکوک امیل کشی کریر جک مسر پاریر کانہ خلینہ تا ای مارکو تے الاخوت کریٹ بے شرف کریٹ پاریٹ تا دا ناپیدوار ءُ ساہدار ءُ، دافتے خلنگ جوان افک، دا ساہدار تے خدا دفر تفرو ننا کھرا۔

ای کماش نا پامدار آ ہیت آتے بنسہ عجب ءُ خوشی ئس مارشت کریٹ و پاریٹ کماش بھاز جوان کرینس، اگہ اینو ننا ہر بندغ نا وڑ دن احساسی مروسس ننا تیوہ مشک وڑ وڑ ئنا چک، گڈک، خزم و ایلو ساہدار تا پلویڑ ئٹ مسرہ۔

کنا ہیت آتا ایسر مننگ تون کماش ترندو ہکل ئس کرسہ کوک ئٹ پارے خلق ئنا باتی آ مہمان کہ ارغ اتبو سی و پاڷ کبو اتبو۔

میرو سمل نا کوپہ غا دو ءِ تخا و پارے سمل ای پاوہ ہمو کماش نا مجلس و حوال خرما تون رازدار ءِ۔

سمل پارے جاہی میرو وطن تون رازداری ہندادے،،، ہنداڑتون سمل بش مس و سنگت آتے پارت کرے بشہ بو یاراک دا مش آن اے مش آ سیخا امپنگ ءِ و اوندائی تمنگ ءِ کانبو خلق آ کنا کماش پارے اینو طوبے ءِ ماگیر ہلیک ایلو اِرا استار شیف بریرہ، اینو نا نن بھاز کبین ءِ۔

چُنکی نا سانگ

افسانہ 

نوشت: سعدیہ بلوچ 

دی بلوچستان پوسٹ

اُرا نا کل بندغ آک اینو بھاز خوئش ءُ۔ چنک بھلن، نرینہ و نیاڑی کل خوئشی آن پُچ آتیٹی جاہ مفسہ۔ شہداد نا ایڑک مہمان تے بخیرٹ کننگ ٹی لگوک ءُ۔ خوئشی آن اوفتا نک ڈغار آ لگپسہ۔ کسس تا چلم شاغنگ ءِ تو کسس تا مہمان تے دیر تننگ ئٹی ءِ کس مہمان تے چاہ تننگ ٹی اختہ ءِ۔ ساعت اس مریک اوفک مہمان تے اِرغ تننگ آن دُو ہورک کرینو شہداد نا لمہ پیٹی نا باء ءِ ملانے منہ نیاڑی ءِ ملخڑ کن ہلوکا پُچ، سہت، رزان و ایلو گڑاتے نشان تننگ ئٹی ءِ۔ تو ایلو کوٹھی ٹی مسنک دیر و دھکڑ آتا خوئشی نا ہالو خلنگ ئٹی ءُ۔ ایمون نا حویلی خوئشی نا رنگ آتیٹی رنگوک ءِ۔ حویلی نا نیام ئٹ دھولی آ نا لِخ ئٹی دھول شاغوکے و دھول خلنگ ئٹی ءِ۔

اونا چار مہ کنڈ آن چاپ خلوکا نرینہ غاتا قطار دھول نا لٹ تون تاڑی تا ٹڑک ٹڑکارہ ءِ۔ دھول خلوکا و چاپ خلوکا تا پیشانی آن خید آک وہنگ ئٹی ءُ ولے چاپ ئنا جوش ٹی اوفتے دمدرینگ نا سماء تمنگ اف۔ دھول خلوکا و چاپ خلوک آتیان ہر اسٹ دا گوازی ٹی اسٹ  ایلو ءِ کھٹنگ نا کوشست ئٹی ءِ۔ ہندا حویلی نا اسہ کوٹھی ئسے ٹی شہداد ہنامی آ دُو تتون پوسکنو پچ بینوک تولوک ءِ۔ اونا دامون ایمون ئٹ گڑاس اونا یونیورسٹی نا سنگت و گڑاس خلق نا ورناک تولوک ءُ۔ اوفتا نیام ئٹی شئیر خلوکا فنکار آک تولوک ءُ اسٹ نا دو ٹی دھمبورہ ءِ ایلو نا دو ٹی سرونز ءِ، اسٹ اوفتا نیام ئٹی تولوک تینا ہنینا توار ئٹ شئیر پاننگ ئٹی ءِ، ساز و توار نا دا ہنینا مجلس ٹی تولوکا ہر بندغ جہان نا غم و ڈکھ آتیان بے سماء خوئشی نا رنگ آتیٹی گم ءِ۔۔ شئیر نا گچین آ ٹپہ غاتیا ورناک واہ واہ کریسہ ءُ اسہ گین آ جیب آتیان پیسہ کشیسہ و خسنگ ئٹی ءُ، ہر کنڈ آ خوئشی و شادمانی نا زیبا غا رنگ آکو۔ چُنک بھلن کل پوسکنو پُچ بینوک ءُ کل اسٹ ایلو تون مسخرہ کننگ ئٹی ءُ، ہر اسٹ نا جوڑ تیان بشخندہ نا پُھل زِرنگ ءِ۔

ولے دا کل ئنا نیام ئٹی اسہ بندغ اس بے کچ مونجا ءِ اونا دا مونجائی ءِ ہر بندغ سرپد مفک۔ انتئے کہ او ہم پوسکنو پچ بینانے او ہم ہر اسٹ تون بشخندہ ئٹ ہیت کننگ ءِ، ولے دا بشخندہ ہمو بندغ آتیکن ئس ہرا باء ئنا باٹغ ئٹ بشخندہ ءِ تو خنیرہ ولے است ئٹی لگوکا خاخر ءِ خنپسہ، خوڑت ہروکا بندغ آک است ئنا حال ءِ مون آن ہُننگ آ ہم چارہ۔ او است ئٹی لگوکا خاخر نا توے خن تا کھڈ آتیٹی ڈھکوک آ خڑینک آتیان محسوس کیرہ۔ ہمر کہ دے ئنا باسنی آن نازرک پھل آک ریزینگرہ اندن است ئٹی لگوکا خاخر نا تّو مون ئنا پھل ءِ ریزیفک اندن کیک دُنکہ خاخر نا جھڷ خلوکا نہال مرے۔

پارہ کہ مون اسہ کتاب ئسے ہرا نا زی آ است ئنا ہر اسہ ہیت، ہر اسہ راز نوشتہ ءِ اگہ کسس خواننگ چائے تا، ولے اینو نا دا وخت ئٹی دیر تون داخس وخت ارے کہ ایلوفتا مون ئنا کتاب آ نوشتہ کروک است ئنا ہیت آتے خوانے۔ اینو تو ہر اسٹ تینا حال ٹی تینتون اختہ ءِ۔ دیر تون داخس ہمت ارے کہ ایلو نا ڈکھ و دڑد آتا باریم ءِ  تینا کاٹم آ ارفے۔ گراناز تون ہم ہندا حال ئس۔ اونا جوڑ تیا بشخندہ ءِ تو ہر کس خناکہ ولے اونا است ئنا ٹھپ آتے کس خنتوکہ، اونا بدن آ پوسکنا پچ آک ہر کس ءِ نظر بسرہ ولے اونا است ٹی لگوکا خاخر کس ءِ نظر بتوکہ۔ اونا بدن آ گروشک تروکا سہت آتے ہرکس خناکہ ولے اونا سینہ غان بش مروکا موڷ ءِ کس خنتوکہ۔ گراناز ہم تینا ڈکھ و دڑد ءِ تینا غم و فریشانی نا طوفان ءِ تنیا تینٹ سگنگ ئٹی ئس۔ است ئٹی خاخر لگنگ ئٹی ئس  ظاہری او ہم برام نا دا خوئشی تیٹی اوار ئس۔

شہداد نا باوہ نا توار مس کہ جن ئتون بروکا نیاڑی تے پابو لاری تیٹی سوار مریر۔ جن ئنا راہی مننگ تون نیاڑی تیٹی تھاڑ و پتاڑ اس تما۔ کسس تینا برخہ ءِ زو زو تفیسہ، کسس تینا چُناتے دوٹی ہلیسہ لاری تیٹی سوار مسر۔ گراناز ہم سوار مس و تینا چناتے ہم سوار کرے اونا اِرا چنا ئسر اسٹ تا مار اس ئس و ایلو تا مسڑ اس، جن لاری تیٹی روان مس۔ کسر ئٹ جن ئتون بروکا نیاڑیک لاری ٹی مخنگ و مسخرہ ہالو خلنگ ئٹی مشغول ئسر ولے گراناز دا کل آن بے سما و بے خیال ئس۔ او تینا است آتا چمن تا بربادی نا تینا اُراغا نا گمان آ تموک اودے ہشوکا گروک نا، تینا بروکا بد نصیبی، بد قسمتی نا دے تا تینا چنا تا بروکا پھگہ نا بارو ئٹ سوچ خلنگ ئٹی ئس کہ لاری سلیس، اسہ ترند ءُ توار اس بس کہ دڑنگبو۔ گراناز ہجم کریسہ مون ءِ بڑزا کرے جن برامی نا خلق ءِ رسینگاسس۔ کل دڑنگار دئیرہ و دھکڑ آک مسر ہلو تا شنکارہ ٹی برامی ءِ پچ بیرفنگا۔ ایلو کنڈ آن نرینہ غاتا پارہ غا دھول چاپ مس، ساز و شئیر نا محفل آک لگار۔

آخر نکاح نا وخت بس مُلا نکاح ءِ خوانا دعا مس مجلس ٹی تولوک آ غٹ بندغ آک شہداد ءِ اونا ایلم تے و باوہ ءِ تہ موارک بادی تسر، ہندن نیاڑیک شہداد نا ایڑ تے و اونا لمہ ءِ پوسکنا ملخڑ نا موارک بادی تسر۔ داسا خاچنگ نا وخت بس برامی تے کوٹھی ءِ سر کریر۔ برامی  نا خوئشی و کاریم تیان دے مچ نا ہلمہ و کوکارہ غاتیان کل دمدرینگاسر۔ ہر کس ءِ ہراڑے کاٹم ءِ تخنگ نا جاگہ اس رسینگا ہموڑے بِٹے تینے۔ کل تغ ئنا ہنینا خُمب ئٹی جہان نا غم و گڑتی تیان بے خبر تموک ئسر۔ ولے گراناز ءِ تغ بتوکہ۔ او دا پالو ایلو پالو مننگ ئٹی ئس۔ بے تاغتی آن وار اس بش مسکہ چنا تا تینا مون ٹی ہُراکہ تو خنتیان تہ خڑینکاک مون شیف کریرہ۔ ہڑسینگاکہ پدا خاچاکہ۔ تغ و آرام اوڑان اندن مُر ہناسر کہ دنکہ جون آن روح پیشتمے مُر کائے۔ آخر اودے تغ امر بروسس اینو اونا زند ئنا ہستی و است آتا چراغ، اونا آسودئی و شرحالی نا آسرہ اونا ارِغ شہداد اوڑان پلنگاسس، اینو شہداد اونا جہان آن مر مہناز نا زلف آتا پدینی و سیخا ٹی تینا زند ءِ تیر کننگ نا فیصلہ ءِ کریسس۔

شہداد گراناز نا اِلہ نا مار ئس، گراناز شہداد آن سال اس بھلن ئس۔ او تومکاک دائسکان بھاز چنک ئسر کہ اوفتا بلہ و پیرہ اوفتا سانگ ءِ کرفیر، ولے اوفک تینٹ سانگ نا پن آن اونا مطلب آن نا پوہ ئسر، وخت گدرینگیسہ کرے وخت ئتون اوار شہداد و گراناز ہم بھلن مسر۔ گراناز  چنکی نا مزل ءِ ایسر کرے ورنائی نا دروازہ غا گام تے تخا، او گواڑخ نا پھل اس جوڑ مس اونا بلہ و پیرہ اونا لمہ و باوہ دا پھل ءِ شہداد نا گلدان نا زیب و زینت جوڑ کننگ کن بے تامبل ئسر، میٹرک نا امتحان آن او پوسکن فارغ مس کہ اوفتا برام ءِ کریر۔ شہداد او سن ئنا حد ئٹی الو کہ اود برام نا ذمہ واری تے پورو کروسس۔ او زائیفہ ءِ خوئش تخنگ اونا آسودئی نا باریم ءِ ارفنگ نا قابل الو، او تینا زائیفہ نا کنڈا پام تننگ، اودے خوئش و آسودہ تخنگ نا ذمہ واری تیان سرپد الو۔ گراناز است نا ڈغار، ورنائی نا خواہش و جوزہ غاتا باسنی نا جوش آن مہر خلککہ دن کہ دے تیٹی ریگستانی زمین، اونا است نا دا ملاسی آ ڈغار ءِ مہر و مابت نا اسہ ہندنو جھمر ئسے نا بکار ئسک کہ ہرا انداخس اوڑا مہر ئنا پِر کے کہ اونا است ئنا ملاس انگا ڈغار سیراب مرے۔

ولے شہداد مہر و مابت نا ہمو جھمر نا نود اس الو ہرا اونا ملاس انگا است ءِ سیراب کروسس پدا ہم گراناز ورنائی نا دا خاخر ءِ تینا سینہ ٹی جاہ تسس کہ کنا ارِغ شہداد خوانو بھلن مرو۔ مدان مدان تینا ذمہ واری تے سرپد مرو، است ئنا ہینار آ ڈغار ءِ تینا مہر و مابت نا پِر ئٹ سیراب کرو، وخت گدرینگیسہ کرے گراناز نا است ٹی امیت نا چراغ روشن ئس، گراناز نا اِرا چنا مسر، شہداد ہم فارغ مننگ آن گڈ یونیورسٹی ٹی داخلہ ہلک، شش تُو مننگ ئٹی ئس کہ شہداد یونیورسٹی آن فارغ مسس و شار ٹی اودے نوکری رسینگاسس، گراناز خوئش ئس کہ داسا اونا بد قسمتی نا دیک ایسر مسر او خوئش ئس کہ اونا وخت آن ملاس انگا است ئنا ڈغار نا سیرابی نا وخت بسس۔ او گل و بال ئس کہ خوئشی تا ہتم اونا است ئنا چمن ٹی گام تے تخو، او داسا خوئشی آسودئی و مہر مابت آن پُر زند ئسے نا تغ تے خننگ ئٹی ئس۔ ولے اودے دا گِڑا نا سماء الو کہ اینو اونا بدن نا نہال ٹی ورنائی نا است آتا ہتم الو، اونا مون ئنا زیبا غا پھل غم و گڑتی تیان ریزینگاسس او تینا ارِغ نا نظر ٹی پیری نا کنڈ آ گام تے ارفنگ ٹی ئس، ایلو ہیت دا ہم ئس کہ یونیورسٹی ٹی خواننگ نا وخت ٹی شہداد ءِ مہناز پنی  ءُ تینا ہم جماعت مسڑ ئسے تون مہر مسس ولے او وخت آ او کس ئتون دا ہیت ءِ پاش کتوسس، گراناز نا است آ ہموز دے گروک اس تما ہرا دے شہداد تینا باوہ لمہ ءِ  پارے کہ ای پین برام اس کیوہ اونا ہیت آتیٹی ارادہ نا سوگوْی صاف نظر بننگ ئٹی ئس۔ زرس منع کننگ آن گڈ کل اونا ارادہ نا مونا سلاء بٹیر و راضی مسر۔

اینو ہمو نن ئس کہ شہداد گراناز  نا دو تیان پیشتماسس، اونا امیت آتا چمن برباد مسس، اونا کل خواری و محنت آتے دیر اس دریسس، گراناز  ءِ تینا زند نا بروکا ہر اسہ دے ڈکھ، دڑد و غم آن پُر نظر بننگ ئٹی  ئسر، او سوچنگ ئٹی ئس کہ ای ہندا دے ئکن تینا ورنائی ءِ ہُشاٹ  ہندا دے تیکن ای تینے خوار و بدحال کریٹ! جہان آن اونا یخین ہناسس، جہان اودے دوزخ نا چر اس محسوس مننگ ئٹی ئس، شہداد نا دا لا پرواہی  پوغ آنبار اونا است ءِ ہُشاسس، نن گوربام مس گراناز نا است ءِ تینا بروکا دے تا خواری بے غرضی تا خیال نا غم تھڑیسہ ئس، گراناز دا ڈکھ ءِ سگنگ کتو اونا روح مُست آن بھاز ڈکھ سہاسس، اونا است ٹی پین ڈکھ و دڑد نا باریم ارفنگ نا طاغت الو گراناز نا است آ غم و گڑتی تا ہنداخس بھاز جلہو مسس کہ او اوفتے سگنگ کتو تما بے ہوش مس، ولے پدا سار آ بتو، سہب نا چنا تا پوہاڑ کننگ آ کل مُچ مسر کہ گراناز تموک ءِ۔ او ہمو تغ ٹی ہنانے کہ ہراڑان  پدا کس سما کپک، گراناز کسکس۔

گراناز نا موت اسہ قدرتی ءُ موت اس الو بلکن دا اسہ خون اس ئسک، ولے خونی دیر ءِ ؟ شہداد ءِ اونا بے وفائی ءِ ۔۔۔ نہ ۔۔۔ شہداد تو اودے کسفتوسس نئے کہ شہداد اوڑتون مابت و وفا نا وعدہ کریسس، شہداد نا تو دا حق ئس کہ او تینا ورنائی ءِ اسہ نیم وہی ءُ نیاڑی ئسے تون گدریفنگ نا جاگہ غا زند ئٹ اسہ جوانو سنگت اس گچین کے۔ تو گراناز نا موت خودکشی اس ئسک ؟ ولے نہ۔ گراناز تو زندہ مننگ خواہاکہ، او تینے امر تینٹ کسفک! است ئٹی دا سوج ودی مس کہ تو خونی دیر ءِ ؟ ہندا خیال نا بننگ تون نا گمان کنا نظر گراناز آ تما۔ اونا جوڑ تیا بشخندہ ئس۔ او ننے کل ءِ اوڑدہی کروک آتے، تیوہ چاگڑد ءِ تینا بے گناہ آ قتل کن طعنہ تننگ ئٹی ئس۔ داسا دماخ نا پڑدہ غاک ملنگار، ای اونا خونی اسکان رسینگاٹ، گراناز نا خونی ننا چاگڑد ءِ ننا سیال عزیز و اُرا نا بندغ و اونا مخلوق ءِ، ننا مُتکنا دود و ربیدگ و گراناز نا چُنکی نا سانگ و برام، اندن گراناز ہم سانگ و برام نا دود آتا گواچی مس۔