غلام محمد بلوچ نا زند و سیاست

نوشت: ساجد بلوچ | مٹ: کامریڈ وفا بلوچ

دی بلوچستان پوسٹ

غلام محمد بلوچ راج دوست سیاست نا اسہ سیانڑا و سوبر ءُ سیاسی لیڈر اس ئس۔ اونا سیاسی کڑد نا وخت 1974، ہرا وخت آ اواسکول نا خوانندہ اس ئس، آن الیس تے 2009  ہرا وخت آ اودے پاکستان نا ایف سی فوجیک بیگواہ کریر و منہ دے آن گڈ شہید کریسہاونا جوْن ءِ بٹیر۔

واجہ تینا اندا سی و پنچ سال نا سیاسی کڑد اٹ بلوچ راجی سیاست نا اسہ سوچ و فکر ئسے نا پابند مس ہمو سوچ بلوچ قوم وبلوچستان نا آجوئی نا مزل ئس۔ او بلوچ راجی سیاست اٹ تینا قوم کن سیانڑا و سرپندار ءُ خواجہ ئسے نا دروشم اٹ دا فکر ءِ ودی کرےکہ بلوچ قوم ءِ اسہ آجو راج اس دو برے ہراٹی رنگ، ذات، قبیلہ و مذہب نا ہچو فرق اس مف۔ اندا سوچ و خیال اینو بلوچ نیشنل موومنٹنا راہبند ءِ، ہرا کہ 2004 اٹ سیاسی پارٹی اس جوڑ مس۔

واجہ غلام محمد بلوچ اسہ غریب خاہوت ئسے ٹی 1959 اٹ خلق مند، ہرا نا سیم آک ایران نا کوزہ کروک بلوچستان تون تفوک ءُ، اٹودی مس۔ اونا پیرہ، ہرا نا پن واجہ غا تخنگا، تینا خلق اٹ اسپ بھلو زمیندار اس ئس۔ ولے ہرا وخت کہ غلام محمد ودی مس تو اونا باوہمحمد ایوب وختی آن تینا پیرہ ئی آ ڈغار تے سودا کریسس۔ اندا سوب آن اونا چنکی عزت و شرف اٹ تدینگا۔ وخت و سال آتا تدینگنگاٹ اوفتا مال و مڈی کم مریسہ ہنا۔ ہرا وخت آ او ورنا ئس تو اسکول آن گڈ اسہ چاہ والو اسٹال ئسے ٹی کاریم کریکہ تینا اسکول ناخڑچہ ءِ پُورو کننگ کن۔

1974 اٹ ہرا وخت کہ بلوچ راجی سیاست نا پنی آ راہشون شہید فدا بلوچ، ہرادے 2 مئی 1988 ٹی تربت اٹ شہید کریر، مند ہائیاسکول ٹی خوانفنگ ءِ بنا کرے ہموڑے غلام محمد بلوچ اسہ خوانندہ اس ئس۔ شہید فدا بلوچ نا راج دوست سیاست نا فلسفہ غان متاثرمریسہ شہید غلام محمد بلوچ بلوچ خوانندہ گَل (ہراکہ خوانندہ غاتا ٹولی اس 1969 ٹی جوڑ مس) اٹ اوار مریسہ اسہ باسک اس جوڑمس. ہمو سال آ واجہ اندا گَل نا مند بینٹ نا سیکرٹری جنرل جوڑ مس۔

واجہ نا بھلا ایلم محمد یوسف ءِ ہمو وخت آ قطر اٹ نوکری ئس رسینگا ہراکہ تینا خاہوت نا مالی حالیت ءِ جُوان کرے۔ واجہ غلام محمدبلوچ ہرا وخت کہ مند آن میٹرک کرے تو پین گیشتر خواننگ کن کراچی آ ہنا۔ 1980 ٹی ایس ایم کالج کراچی ٹی داخلہ الک ہراڑے تیناسیاسی کڑد ءِ بی ایس او نا اسہ چسپان ءُ باسک ئسے نا دروشم اٹ برجا تخا۔ 1983 ٹی بی ایس او کراچی زون نا جنرل سیکرٹریجوڑ مس۔ اسہ سال ئسے آن گڈ 1984 ٹی صوبہ سندھ نا سیکرٹری جنرل جوڑ مس۔

1984 ٹی ایس ایم کالج آن گریجویشن کننگ آن گڈ بلوچستان یونیورسٹی آن بلوچی ٹی ماسٹرز کرے۔

واجہ بھاز زوت بی ایس او نا راہشون تیٹی اوار مریسہ ہنا۔ 1986 ٹی گَل نا سینٹرل جونیئر کمک کماش جوڑ مس۔ 1988 اٹ سینٹرلجنرل سیکرٹری جوڑ مس ہرا وخت آ سیاسی راہشون فدا احمد ءِ شہید کننگا۔

1990 اٹ بی ایس او نا کماش جوڑ مس۔ تینا چسپان انگا کاریم و کڑد آن بی ایس او نا کماش مننگ آن گڈ اینو اسکان چیئرمین نا پناٹ پِنی ءِ۔

بی ایس او نا کماشی نا اِرا سال ایسر کننگان پد 1992/93 ٹی بلوچستان نیشنل موومنٹ اٹ اوار مس۔ دا ہمو وخت ئس کہ بلوچ راجدوستی نا تلہ فدا نا شہادت آن پد بھاز سخت مس۔ کہی راج دوست ٹولیک داڑے اسکان کہ بی این ایم ہرا کہ شہید فدا بلوچ نا خڑک ئناسنگت آتا پارٹی ئس پاکستان نا پارلیمانی سیاست اٹ اوار مس۔ اوفتا اندا سوچ ئس کہ نن پارلیمنٹ نا کمک اٹ میڈیا نا کمک اٹبلوچستان نا آجوئی نا توار ءِ بڑز کین۔

ولے ہمو وخت آ اسہ چنکو گروپ اس شہید غلام محمد تون اوار پاکستان نا پارلیمنٹ اٹ اوار مننگ نا برخلاف مس اوفتا کوشست و جہداندا ئس کہ پاکستان نا زوراکی اٹ کوزہ گیری ءِ پاش کننگے۔ ولدا اوفک الس اٹ اندا کوزہ گیری نا برخلاف چاہنداری تالان کریر۔

اندا وخت آ واجہ غلام محمد بلوچ بی این ایم نا بنجاہی کمک کماش جوڑ مس۔ وخت تدینگسہ کرے بی این ایم اٹ گروپ جوڑ مس۔آخرکار، خوانندہ گَل نا اسہ گروپ اس ہرانا راہشونی ءِ ڈاکٹر اللہ نذر بلوچ، ہرا کہ واجہ غلام محمد نا خڑک ئنا سنگت و اینو اسہگوریلا ئسے نا دروشم اٹ بلوچستان نا آجوئی کن جنگ کننگ ءِ، 2001 ٹی اوار مریسہ کریر۔ ڈاکٹر اللہ نذر بلوچ ہمے وخت آن خوانندہگَل نا راہشونی ءِ کریکہ اینو پگہ سلہہ بند مریسہ توفک نا کمک اٹ بلوچستان نا آجوئی نا جنگ ءِ برجا تخانے۔

2004 اٹ واجہ غلام محمد بلوچ تینا ٹولی اس جوڑ کریسہ پارلیمنٹ پرست آتے مات تس۔ اندا نا سوب آن بی این ایم اِرا ونڈ مس، بلوچنیشنل موومنٹ ہرانا کماشی ءِ واجہ غلام محمد بلوچ کریکہ و ایلو نیشنل پارٹی ہرانا کماشی ءِ ڈاکٹر عبدالحئی بلوچ کریکہ۔

ہمو وخت آ مچا بلوچستان اٹ گوریلا جنگ برجا ئس۔ واجہ غلام محمد نا خلق مند اسکان دا جنگ سر مسوسس۔ 2005 اٹ واجہ غلاممحمد نا ٹولی ءِ بلوچ سیاسی راہشون نواب اکبر خان بگٹی و نواب خیر بخش مری نا سیاسی کمک دُو بس۔

آجوئی نا جنگ ئنا ترند مننگ آن پاکستان نا فوجیک و ایجنسیک بلوچ راہشون تے کسر آن مُر کننگ ءِ بنا کریر۔ اولیکو وار 2005 اٹڈاکٹر اللہ نذر بلوچ ءِ اونا پنچ بی ایس او نا سنگت آتیتون کراچی آن بیگواہ کریر۔ اسہ سال اس اودے ٹارچر سیل آتیٹی بند کننگا۔ ولداجیل آ ایسُر تے۔ 2006 اٹ الس نا ترند انگا برانز آتا سوب آن ڈاکٹر اللہ نذر جیل آن آجو مس۔ واجہ غلام محمد بلوچ ءِ 2006 اٹ اسہدیوان ئسے آن گڈ لیاری کراچی آن بیگواہ کریر۔ اودے ہم اندن اسہ سال اس ٹارچر سیل آتیٹی بند کریسہ ذہنی و جسمانی ٹارچرکننگا۔ ولدا 2007 اٹ اودے تربت جیل آ ایسر ہراکان او ضمانت آ آجو مس۔

زندان تیٹی خلنگ و بجلی نا کرنٹ تننگ نا سوب آن واجہ غلام محمد بلوچ بھاز نزور مس۔ بِننگ تے انداخہ نزور مس کہ وخت وخت جیباٹ موبائل نا توار ءِ ہم بنتوکہ۔ اونا متکنا سنگت ڈاکٹر اللہ نذر و ایلو سنگتاک اودے سَلاہ سوج تسر کہ سلہہ بند آ جنگ اٹ اوار مر داوڑ کسر تیا برانز کننگ آن دشمن ارزانی اٹ نے ٹک کیک۔  ولے او منیتو اونا سوچ اندا ئس کہ بیدس الس نا سیاسی چاہنداری و اوارمننگ آن آجوئی نا جہد سرسہب مننگ کپک۔ زندان تیان آجو مننگ آن پد ولدا تینا سیاسی کارکڑد ءِ برجا تخا۔ اونا جہد و کڑد پنیمریسہ کرے۔ غریب ءُ ہنکین ئسے آن تعلقداری تخنگ آن بیدس اونا جہد ریاست نا ہمو ہیت و گپ آتے رد کرے کہ بلوچ راج دوستی ناسیاست ءِ گڑاس نواب و سردار آتا کمک اٹ مونی اتنگنگ ءِ۔

2008 اٹ اسہ وار ولدا واجہ غلام محمد کراچی آن دزگیر کننگا۔ ولے ہمو وخت آ اونا سیاسی سنگت و باسک آک پولیس اسٹیشن نامون آ ترند برانز کریر و اختیاردار آتے بیوس کریر و اسہ دے ئسے ٹی واجہ آجو مس۔

2 فروری 2009 اٹ امریکہ نا بندغ ذس UNHCR نا سینئر باسک جان سلوکی ءِ اسہ بلوچ سلہہ بند ٹولی اس شال آن بیگواہ کرے۔بلوچ ٹولی نا مسخت اندا ئس کہ UN و US پاکستان آ زور شاغر تاکہ بلوچ راہشون آتا خُون و بیگواہ کننگ ایسر مرے۔ اقوام متحدہجان سلوکی ءِ آجو کننگ کن نواب خیر بخش مری و غلام محمد بلوچ نا کمک ءِ دوئی کرے۔ ہڑتوما بلوچ راہشونک انسانیت نا بنداو آ جانسلوکی نا آجو کننگ نا خواست ءِ کریر۔

بلوچ راہشون آتا خواست آن پد بلوچ سلہہ بند ٹولی جان سلوکی ءِ آجو کرے۔ غلام محمد ءِ اونا اِرا کامریڈ تون اوار 3 اپریل 2009 ٹیکچکول علی ایڈووکیٹ نا چیمبر آن بیگواہ کننگا۔

غلام محمد بلوچ و اونا سنگت آتا جشوک جونک 9 اپریل 2009 آ مرگاپ نا مَش، ہرا کہ تربت آن چانڑدہ کلومیٹر مُر ءِ، تیان خننگار۔

بلوچ راہشون آتا شہادت آن بلوچستان نا جنگ بھاز ترند مس۔ واجہ غلام محمد بلوچ نا منوکاک سرکار نا جاگہ و ادارہ غاتے ہشار وپاکستان نا بیرک ءِ سرکاری ماڑی تیان کشار۔

نوآبادیاتی نفسیات

(گڈیکو بشخ)

نوشت: رفیق جعفر | مٹ: حفصہ بلوچ

دی بلوچستان پوسٹ

داڑان بیدس کوزہ گیر محکوم مخلوق ئٹ ساڑی نسلی، قبیلہ، ذات پات، بولی و مذہب نا فرخ آن فائدہ ارفنگ نا کوشست ءِ کیک۔ تاکہ اوتینا سوختئی نا درشانی ءِ اسٹ ایلو آ کیر و کوزہ گیر تینا فائدہ غاتے ارفیسہ کے۔ کوزہ گیر کوزہ مروکا مخلوق ءِ نہار نا نظر ئٹ اُریک۔او اوفتا رسم و دود آتے کم تکک۔ اندا سوب آن بھاز آ بندغ آتا تہٹی احساس کمبوتی ودی مریک۔ دا مخلوق تینے آن دا وڑو سوج کننگکن بیوس مریک۔ کہ “ای دیر اٹ؟“، “کنا دود و ربیدگ انت ءِ؟“، “کنا تاریخ انت ءِ؟“، دا بندغ آک آھیری و نزوری نا احساس آتے مرکننگ کن جتا وڑ تے کاریم ئٹ ہتیرہ۔ داڑے فینن اسہ اہم وڑ ئسے نا نیمہ غا پام تسونے ہرا کہ شار ئنا مخلوق ئٹ زیات خننگک۔ او وڑدادے کہ کوزہ مروکا مخلوق نفسیاتی حد آ دا محسوس کننگ ءِ بنا کیک کہ او تینٹ کوزہ گیر ءِ۔ او کوزہ گیر آتا بولی و لہجہ ئٹ ہیتکننگ نا کوشست کیک۔ اوفتا وڑو پوشاک بیننگ نا وڑ ڈول، رسم و دود آتے تینا کننگ نا کوشست ءِ کیک۔ داڑتون اوار او تینا دود و ربیدگ،بولی پچ و پوشاک آتے ہلیک۔ اندا وڑ ئٹ کوزہ مروکا بندغ تینے کوزہ گیر آن بھاز خڑک بلکن اوڑتون بریبر تکک۔ داسہ اوفتے نزوری وآھیری نا احساس تنک کپک۔ داسہ اوفتے دا سوج آک ہم تنک کپسہ کہ اوفتا دود و ربیدگ انت ءِ؟ اوفتا تاریخ انت ءِ؟ و پین پین۔ داسہاوفتا خڑکا اوفتا دود و ربیدگ تاریخ و بولی کوزہ گیر آتا دود و ربیدگ، تاریخ و بولی ءِ۔ دا وڑ ئنا ذہن ءِ فینن کوزہ مروکا ذہن (Colonial Mentality) پاہک۔  دا ذہنیت نا گواچی مروک بندغ آک تینا ڈیہہ ئنا مخلوق ءِ ہم ہمو نظر ئٹ اُریرہ ہرا نظر ئٹ کوزہ گیر اُریک۔  یعنی اوتینا مخلوق ءِ ہم جاہل گندہ، بےایمان سست و بےواک تکرہ۔ او تینے اوفتیان جتا کننگ نا کوشست ءِ کیرہ۔ او تینا سیالی تے ہم منیپسہ۔او تینے تہذیب دار لکھوک خوانوکو شار ئنا بندغ تکرہ۔ فینن ذہنی ناجوڑ و کوزہ گیر ذہنیت نا درشانی ءِ بھاز وڑ تیٹ خنا۔ دا ذہنیت نادرشانی بھازی ناجوڑ آتا تغ تیان مسکہ۔

دنکہ اسہ سیاہ فام ناجوڑ اس تغ ئٹ خنا کہ او اسُل پیہن مسونے۔ انتئے کہ او بندغ آتے کوزہ گیر تینے آن بھاز خڑک تکک ہرافک اوناتہذیب و دود و ربیدگ ءِ تینا کیرہ۔ تو نوآبادی ذہنیت نا گواچی مروکا بندغ آتے نفسیاتی جارات رسینگک کہ او کوزہ گیر آتیان نزور افساو نہار افس بلکن بندغ ءُ۔ فینن دا ہیت ءِ خوڑتی ئٹ اُرا کہ دا ذہنیت کوزہ مروکا ڈیہہ تا دانشور تپہ ئٹ ہم خننگک۔ ولے بھاز آ نوشتکارآتیکن دا فریشانی منہ وخت ئنا مریک۔ او ہمو نفسیاتی جاگہ غان گدرینگسہ اسہ ہندنو جاگہ ئسے آ سر مریرہ ہراڑے اوفتے احساسمریک کہ اوفتا ڈیہہ ئنا مخلوق تون ظلم مننگ ءِ۔ داسہ او تینے نفسیاتی حد اسکان کوزہ گیر تون اوار کننگ نا جاگہ غا تینا ڈیہہ ومخلوق تون اوار کیرہ۔ داسہ کوزہ گیر آتا بولی اوفتا جوڑتے ہشنگ ءِ بنا کیک۔ اوفتا پوشاک اوفتا تہذیب و دود و ربیدگ علم و ادب اوفتےظلم ئنا چیدہ نظر بریک۔ داسہ اوفتے الس نا ہر ہیت جوان لگک۔ چاہے اوفتا بولی مرے پوشاک مرے یا جنگ و جیڑہ غاک مریر۔ دانشورتینے مخلوق آنبار جوڑ کننگ نا کوشست کیرہ۔ اوفتا بولی و پوشاک ءِ تیناہی کیک۔ ولے دا بیرہ نشان تس عمل اس مریک۔ انتئے کہدانشور نا بولی سوچ خلنگ نا وڑ کل الس آن جتا مریرہ۔ دا دانشور نا ذہنی ارتقاء نا انتہاء پسندانہ گام مریک۔ انتئے کہ مالو ہراڑے اوالس نا ہر گڑا ءِ گندہ سرپد مسکہ داسہ ہمو مخلوق نا ہر ہیت جوان لگک تا۔ ولے فینن پارے کہ دا گام بھاز المی ءِ۔ دانشور کن المی ءِ کہاو کوزہ گیر نا ہر گڑا ءِ تینا نفس آن پیشن کشے۔ و اوفتا جاگہ غا مخلوق نا وڑ و ڈول تے تیناہی کے۔

دا نفسیاتی مرحلہ ٹی دانشور تینا متکنا تاریخ و دود و ربیدگ ءِ، ہرادے کہ کوزہ گیر بہوشی و غیر مہذب پن کریسس، جوان محسوسکننگ ءِ بناء کیک۔ ولے دا جوان محسوس کننگ ہم کوزہ گیر نا نظریہ تا برخلاف ردعمل اس مریک۔ ہندا خاطران دا سوچ ہم انتہا پسندانہمریک۔ دا سوچ ءِ فینن اسہ مثیل ئسے ئٹ پاش کرینے۔ کہ یورپ نا کوزہ گیر آک ہراتم عرب ملک آتیا کوزہ کریر۔ تو اوفک عرب آتیٹی داسوچ ءِ تالان کریر کہ عرب آتا دود و ربیدگ و اوفتا مذہب اسلام تیوہ غاتیان غیر تہذیب و پدماندہ ءُ۔ دافتا ردعمل ئٹ عرب دانشور آک دانظریہ ءِ مون آ ایسر کہ عرب مسلم دود و ربیدگ بھاز بڑز و جوان مسونے۔ او تینا دا نظریہ ءِ ثابت کننگ کہ متکنا عربی کتاب و مکالہغاتا پٹ و پول ءِ بنا کریر۔ دا نظریہ نا سوب آن عرب دانشور آتا سوچ غنجل مس۔ انتئے کہ عرب ڈیہہ تا دود و ربیدگ اسٹ الو۔ اندا سوبآن عرب دانشور آک مسلم دود و ربیدگ نا تصور ءِ ثابت کننگ کتور۔ تینا پٹ و پول و عقلی سوچ آتیان گڈ عرب دانشور آک دا ہیت آ سرمسر کہ اسہ ڈیہہ ئسے نا ہزار سال متکنا وخت ئنا جاگہ غا اونا دود و ربیدگ نا اونا ساڑی ڈغار و معاشی حالیت آتون زیات تعلقداریارے۔ دا پوسکنا شعور نا بنداو آ راجی دود و ربیدگ نا نظریہ ودی مس ہرا کہ سہی نظریہ ئس۔

فینن پاہک کہ دانشور دا انتہا پسند آ مزل آ تدیسہ اسہ پین جاگہ ئسے آ سر مریک۔ داسہ او الس ءِ شرف تریسہ اوفتا وڑ و ڈول تےتیناہی کننگ نا جاگہ غا اوفتے بیدار کیک دا ہمو وخت مریک ہراتم دانشور مخلوق ئٹ کاہک و اوفتا زند ءِ خڑک آن اُریک۔ داسہ اودے داہیت ئنا درک لگک کہ مخلوق بناء آن سرپد ءِ کہ کوزہ گیر ءِ بیرہ بے دادی ئٹ ہی ڈیہہ آن پیشن کشنگ مریک۔ و مخلوق ئٹ کوزہ گیر ءِپیشن کشنگ نا اُست خواہی ہم خننگک۔ دانشور الس آن بھاز آ ہیت آتے ہیل کیک۔ او اُریک کہ الس تینا است ئنا ہیت ءِ ڈھکیپک انتمحسوس کیک یا ٹک خلیک اوفتا زو درشانی ءِ کیک۔ ولے دانشور تینا اُست ئنا ہیت آتے ڈھکیک یا بھاز سوچ و ٹک خلنگ آن گڈ ہیت کیک۔دا وڑ ءِ دانشور کوزہ گیر آن ہیل کروک مریک۔ و کوزہ گیر آن خود غرضی ءِ ہم ہیل کیک۔ اول تینا سواد ءِ اُریک ولدا ایلو نا۔ ہندا سوب آندانشور خود غرض مریک۔ ولے خلق آتیٹ او کاہک خنک کہ مخلوق ئٹ سیوتی و اواری ئٹ کاریم کننگ نا جوزہ ارے۔ مدان مدان آ دانشورمخلوق نا سوچنگ و کاریم کننگ نا وڑ تے ہیل کیک۔ داسہ او تینا جوان انگا کڑد ءِ سرپد مریک۔ یعنی مخلوق تون اوار کوزہ گیر نابرخلاف سلہہ بند جہد ئٹ اوار مننگ، و الس نا بے دادی ءِ سیاسی تنظیم اس تننگ و باشعور جوڑ کننگ و مخلوق ءِ دا احساس تننگ کہانت اس ارے اوفتا سوب آن ءِ، ڈیہہ ئنا دیمروی و زوال اوفتا دوٹی ءِ۔ و مخلوق ئٹ دا لائخی ارے کہ او ملک ءِ تینٹ چلفنگ کیرہ و جوانوڑ ئٹ چلفنگ کیرہ۔

فینن پارے کہ نوآبادیاتی بست وبند ئٹ ہرا بندغ آک کوزہ گیر نا جسمانی و نفسیاتی بے دادی نا گواچی مریرہ۔ اوفتیٹ کیہیک ذہنیناجوڑ مریرہ۔ ولے فینن نا خڑک آ دا ناجوڑ آتے کلینک یا ذہنی اسپتال ئٹ دارو درمان کننگ نا ہچ سواد اف۔ انتئے کہ اسپتال آن پیشنہمو بے داد آ چاگڑد ءِ ہرا ذہنی ناجوڑی تے ودی کیک۔ اندا سوب آن ذہنی ناجوڑی تے ایسر کننگ کن المی ءِ کہ نوآبادیاتی نظام ءِ ایسرکننگ مرے۔ داڑے نفسیات نا چاہندار ناجوڑا ءِ اندنو وڑ پائے ہرافتیا عمل کریسہ او تینے و نوآبادیاتی نظام ءِ بدل کننگ کے۔ ہراتم بندغآک اسہ نظام ئسے بدل کننگ نا کوشست کیرہ گڑا او تینے ہم بدل کیرہ۔ دا ہڑتوما کاریمک اوار برجاء مریرہ۔ فینن دا گواچن ءِ تینا داپارایپار نا آزموندہ تیان ہیل کرے۔

1952ء ئٹ الجزائر نا مخلوق فرانس نا کوزہ گیری نا برخلاف سلہہ بند جہد ءِ بنا کریر۔ 1954ء آن گڈ الجزائر نا ڈوہ تیٹ، خاص وڑ ئٹتین پہ تین نا جنگ و جیڑہ غاک خلنگ بٹنگ آک ہنار آخیر کریر۔ دانا سوب اسُل پاش ئس۔ ہمو سوختئی ہرادے مالو بندغ آک اسٹ ایلو نابرخلاف کاریم ئٹ ایسرہ داسہ اونا مون دژمن یعنی نوآبادکار تا پارہ غا مسوسس۔ کیہی سال آتا تین پہ تین نا دژمنیک منہ دے ئٹیچٹار۔ جادو، ناچ، کسہ، بخت آ باور و ہر گڑا ءِ خدا غا الینگ نا عقیدہ و کاریمک چُٹیسہ کریر، قبیلہ و علاقہ غاتا جنگ آک ایسر مسر۔مخلوق ئٹ احساس نزوری و آھیری نا احساس آک، ہرافتے نفسیات نا چاہندار آک کیہی سال تیان دارو درمان کننگ نا بےسہب کوشستکننگ ئسر، انقلابی جہد ئٹ بدل مسر و بندغ آک دلیر مسر۔ اوفتیٹی خوداری و تینے آ باور کننگ ودی مس۔ داسہ اوفتیان دا احساسایسر مس کہ او بندغ افس و کوزہ گیر آن نزور ءُ۔ انتئے کہ او داسہ کوزہ گیر تون سلہہ بند جنگ کننگ ئسر۔ او دا بریبری نا مون تساس ئس۔ داسہ اوفتے اسہ راہشون ئسے نا گرج الو۔ اوفک تینا فیصلہ تے تینٹ کننگ نا لائخ مسوسر۔ فینن پارے کہ بیرہ سلہہ بند جہدئٹ کوزہ گیری نظام نا دروغ بندغ آتا نزوری و آھیری نا احساس آک ایسر مننگ کیرہ۔ فینن پارے کہ انقلابی جہد کل آن جوان انگانفسیاتی دارو درمان ءِ۔ اوخنا کہ انقلابی جہد ئٹ خاہوتی سیالیک ہم بدل مسر۔ باوہ نا حاکمی آ سختی کم مس۔ نیاڑی تا اَرغ و لُمہ باوہباو غان خلیس ہم ایسر مریسہ کرے۔ ہرا وڑ چاگڑد ئٹ بریبری نا سیالیک بنا مسر اندا وڑ خاہوٹ ئٹ ہم برابری بنا مس۔

ولے فینن دا ہیت ءِ ہم ذہن ئٹ تخا کہ نوآبادیاتی ڈیہہ تیٹ الس نا سلہہ بند جہد ئنا ایسری آن مست بیرہ پِن ئنا ” راہشونک” کوزہ گیرتون گپ و تران کیرہ و راجی “آجوئی” دوئی کیرہ۔ دا آجوئی نا مسخت بیرہ دا مریک کہ کوزہ گیر کائے و اونا جاگہ ءِ بیرہ پن ئناراہشونک ہلیر۔ دا راہشونک جاگیر دار، نیم سرمایہ دار تپہ نا کوالخوائی ءِ کیرہ۔ دافک مخلوق تون ہمو وڑ کیرہ امر کہ کوزہ گیر کریکہ۔او کوزہ گیر نا تہذیب، بولی، دود و ربیدگ، علم و ادب ءِ برجا تخیرہ۔ اندا راہشونک کوزہ گیر نا اقتصادی، فوجی، پولیس و سول سروسنا نظام ءِ برجاء تخیرہ۔ و کوزہ گیر ڈیہہ ئنا حکومت کروک آتون اقتصادی، فوجی و ثقافتی سیالی ہم برجا تخک۔ داسہ کوزہ گیر اندافتاکمک ئٹ مخلوق آ بلواسطہ حکومت کیک۔ ہرا وڑ کوزہ گیر مخلوق ئٹ مذہبی، قبائلی و پین تعصب تالان کریسہ حکومت کریکہ۔ اندا وڑ داراہشونک ہم بندغ آتے تین پہ تین تون جنگ کرفیسہ حکومت کیرہ۔ دا “ہندی نوآبادکار” آک ہم الس ءِ اندا ہیل ایترہ کہ اوفتا بخت ہموراہشون تا دوٹی ءِ۔ و مخلوق نزور ءِ و حکومت کننگ نا لائخ اف۔ بندغ آک ہم دا خیال ءِ تیناہی کیرہ و دا سوچ خلیرہ کہ دا کل ویل آک داسوب ودی مننگو انتئے کہ ننے جوانو راہشون رسینگتو، ہراتم ننے جوانو راہشون اس رسینگا گڑا ڈیہہ ئنا حالیت آک جوان مرور۔ مخلوقدا سرپد مریک کہ او تینٹ تینا ملک ئنا حالیت آتے جوان کننگ کپسہ۔ فینن پاہک کہ دا وڑ انگا حالیت آتیان جان ءِ چٹفنگ کن السحکمران تپہ نا برخلاف ہمو وڑ ئنا سلہہ بند جہد اس کے ہرا وڑ کوزہ گیر آتا برخلاف کریسس۔ و ہراتم اسکان او ملک ئنا مہار ءِ تینادوٹی کتنو تینا حالیت آتے جوان کننگ کپسہ۔

بلوچستان نا دریابی  شار گوادر ٹی نا درست بندغ آک غلہ دروک ٹرالر آتے  بمب جلہو ئٹ ٹک کریر ۔

شابیت حوال تا ردئٹ گوادر شار ٹی نیا آباد نا ہند آ نا درست بندغ آک ٹرالر آتے  ہمو وخت بمب جلہو ئٹ ٹک کریر ہرا وخت او گوادرپورٹ آن غلہ تخیسہ ہِننگ ئسر ۔

ذرائع نا پاننگ ءِ کہ جلہو ٹی ٹرالر آتے  نسخان مس اندن جلہو آن گڈ فورسز کارندہ آک پن کروک علاقہ ءِ پلویڑ کرینو ۔

یاتی مرے کہ بلوچستان ٹی دا وڑ نا تدینیک اسہ اسہ وخت رپورٹ مریسہ مسونو ہرافتا ذمہ واری تے بلوچ آزاتی دوست سلاء بند تنظیمآک ارفیسہ کرینو واہم اینو نا مروک جلہو تے دائسکان اسٹ ئس ہم ارفتنے ۔

ضلع خیبر ٹی پاکستانی فورسز کارندہ آتا گاڑی آ تراک  نا سوب آن  3 کارندہ مرگ نا گواچی و اندن 7 کارندہ ٹپی مسونو ۔

شابیت حوال تا ردئٹ ضلع خیبر ٹی باڑہ نا علاقہ ملک دین خیل ٹی فورسز کارندہ آتا گاڑی آ تراک اوٹی سوار صوبیدار تون اوار 3 کارندہ مرگ نا گواچی اندن 7 بندغ ٹپی مسونو و گاڑی تیوہ وڑ ئٹ بھس مسونے۔

تراک ٹی ٹپی مروک گیشتر کارندہ آتا مرگ نا گواچی مننگ نا خلیس ءِ۔

ایلو پارہ غان تحریک طالبان پاکستان ( ٹی ٹی  پی ) جلہو نا ذمہ واری ءِ  ارفینے ۔

بلوچ اسٹوڈنٹس آرگنائزیشن آزات نا بنجاہی ترجمان میڈیا غا شینک کروک تینا اسہ بیان ئسے ٹی پارے کہ بی ایس او آزات نا ششمیکوسینٹرل کمیٹی اجلاس چیئرمین ابرم بلوچ نا کماشی ٹی اڈ تننگا۔ اجلاس ٹی سیکریٹری رپورٹ، تنقیدی نشست، آئین سازی، تنظیمیویل و بروکا کاریم تا ایجنڈا نا زی آ شرہ مس۔ سینٹرل کمیٹی اجلاس نا بنا ءِ بلوچستان نا شہید آتا یات ئٹ اِرا منٹ نا چپی تون مس۔اجلاس ئٹ تنظیم نا گچین کروک ایجنڈا غاتا زی آ سینٹرل کمیٹی نا باسک آتا نیام ئٹ شابیتی و سیر ءُ شرہ ئس مس۔

اجلاس آن گپ و تران کریسہ بنجاہی کماش ابرم بلوچ پارے کہ وخت و حالیت آتا خواست آک ساندہ بدل مریسہ کیرہ و ہراتم اسہ راجئس جنگ ئنا حالیت ئٹی مرے گڑا اوفتے کن ہر اسہ ساہت بھاز خواست تخک۔ اینو بلوچ ورنا و خاص کر بی ایس او آزات نا باسک آتاذمہ غا ہرا ذمہ واریک جوڑ مریرہ او بھاز سوبر ءُ ذمہ واری ءُ، ہراڑے اوفتے اسہ پارہ غان کوزہ گیر دژمن نا بے دادی و زوراکی تیتونمون تس ءِ و اندن اوفتا کوپہ آتیا راجی آجوئی نا جہد ءِ تالان کننگ و فعال کننگ نا ہم ذمہ واریک اریر۔ ہر راج ئٹی ورنا تا تپہ مخ ہڈ ئناحیثیت ءِ تخک و پاکستان تدوکا کہی سال آتیان بلوچ راج ئنا مخ ئنا ہڈ آ جہلوکار ءِ و اودے نزور و ایسر کننگ نا کوشست ٹی ءِ ہراناسوب بی ایس او آزات نا باسک آک ساندہ ریاستی بے دادی نا پلویڑ ئٹ مسنو ولے چاہندار و باعلم بلوچ ورناک بی ایس او آزات نا تلہءِسوگوْ و ترند کریسہ کوزہ گیر ءِ ساف پارینو کہ بلوچ ورناک غلامی نا زند ءِ اسّل ام منپرور۔

کماش ابرم بلوچ مون مستی ہیت کریسہ پارے کہ بلوچ ورنا تے غیرسیاسی کننگ و اوفتے بلوچ راج اکن غلامی رد ئٹ بے سما کننگ کنکوزہ گیر دا وخت جتا جتاؤ چم کاریم ئٹ ہتنگ ءِ و دا لڑ ئٹی ہندی ایجنٹ آتے زیات فعال کریسہ تیوہ بلوچستان ئٹ تالان کننگانے۔ و انداوڑ ارٹمیکو پارہ غان بلوچ ورنا تیٹی راجی چاہنداری و بیداری ءِ خنیسہ دژمن نا لشکر تیوہ بلوچستان ئٹ ورنا تا بیگواہی و اوفتے دروغنا مونتس تیٹی خلنگ نا عمل ٹی ترندی ہسونے و بلوچ ورنا تے کوزہ گیر نا پارہ غان سی ٹی ڈی نا وڑ انگا دہشتگرد فورس ئنا جوڑنگ ہمبلوچ ورنا تا تہٹی خُلیس ودی کننگ نا اسہ کوشست ئسے۔ بلوچ نیاڑی تا سیاسی و فکری بنیات ئٹ شعوری و انقلابی عمل ٹی بشخہلنگ نا خُلیس آن داسا تیوہ بلوچستان ئٹ نیاڑی تے ٹک کننگ ءِ ۔ و اسہ پارہ غان جبر و ایلو پارہ غان جتا جتاؤ چم کریسہ الس وخاص کر ورنا تا تہٹی راجی تحریک نا بابت بدگمانی ودی کننگ نا کوشست مننگ ءِ ہرافتیان سما مریسہ اوفتیتون مون تننگ نا بکارارے۔ اسہ پارہ غان دشمن تینا تاغت و چم آتیٹ بلوچ راجی جہد نا برخلاف عمل ٹی اختہ ءِ تو ایلو پارہ غان ردِ انقلابی تاغت آک ہم دےپہ دے کاٹم ارفیسہ راجی جہد و تحریک تون تفوک تنظیم و جہدکار آتا برخلاف پروپیگنڈہ نا عمل ٹی بشخ جوڑ مسنو۔ بی ایس او آزاتنا انقلابی کیڈرز آتا ذمہ واری ءِ کہ اوفک الس و ورنا تا تہٹی کوزہ گیر نا سافٹ حکمت عملی و رد انقلابی بندغ آتے پاش کریسہ جہدآجوئی ءِ سوگوْ کننگ ٹی تینا بنیاتی کڑدار ءِ پین فعالی وڑ ئٹ مونا ہتیر۔

تیوہ غا ٹِک آتا زی آ شرہ آن پد بنجاہی کونسل سیشن نا وخت پوروْ مننگ تون سینٹرل کمیٹی بی ایس او آزات نا بیست و سئے میکوبنجاہی کونسل سیشن بیاد لمہ وطن بانک کریمہ و شہدائے آجوئی و پن آ بلوچ اسیران آتا اندا تو چاسکہ اپریل ئٹ اڈ تننگ نا فیصلہکننگا۔

کماش ابرم بلوچ کونسل سیشن کن گچین مروکا کونسلر آتے پنت تریسہ پارے کہ اوفک تنظیم نا غٹ آن بھلا اجلاس ٹی اوار مننگ کنبننگ ءُ ہندا خاتران او تنظیمی کاریم تے سوگوْ و ترند کننگ کن بنجاہی کونسل ٹی تیوہ وڑ ئٹ تیاری تون اوار ساڑی مریر۔

مرگاپ تدینی: بلوچ راہشون تا خون ئنا چانڑدہ سال

ٹی بی پی سرگپ

چانڑدہ سال مالو مُسہ اپریل اِرا ہزار نو آ تربت ئٹ بلوچستان اسمبلی نا مسکوہی اپوزیشن راہشون کچکول علی ایڈووکیٹ نا چیمبر آنبلوچ نیشنل موومنٹ نا کماش غلام محمد بلوچ، بی این ایم راہشون و بلوچ نیشنل فرنٹ نا سیکرٹری جنرل لالا منیر بلوچ و بلوچ ریپبلکنپارٹی نا ڈپٹی سیکرٹری جنرل شیر محمد بلوچ ءِ زوراکی ئٹ بیگواہ کننگا و نو اپریل آ تربت آن منہ کلو میٹر مُر مرگاپ نا ہند آن اوفتاجشوک جوْنک رسینگار۔

پیپلز پارٹی نا حکومت نا وخت ئٹ بلوچ راہشون تا زوراکی نا بیگواہی و خون تتون اوار آجوئی نا جہد ئتون تفوک راہشون و باسک آتازوراکی ئٹ بیگواہی تا لڑ بنا مس و پدان اوفتا جشوک جوْنک گیاوان و سڑک آتا کرّک آتیان خننگسہ کریر۔ پاکستان ئٹ حکومت آک بدلمسر ولے بلوچستان نا حالیت آتیٹ جُوانی نا جاگہ غا خرابی بریسہ کرے و بلوچ آجوئی نا تحریک تون تفوک سیاسی ٹولی و ادارہ تاکاریم تیا زوراکی ئٹ رکھ خلنگا، ہرا نا چرجوئی دائسکان جتا دروشم تیٹ برجاء ءِ۔

پاکستان ئٹ سیاسی ٹولیک اپوزیشن ئٹ مریرہ گڑا بلوچ آجوئی نا جہد ئتون تفوک ادارہ تون گپ و تران نا خیال ءِ پاش کیرہ و بلوچ راجآ مروک ظلم و زیاتی تے منیرہ۔

اِرا ہزار ہشت ئٹ پیپلز پارٹی اقتدار دوئی کننگ آن مالو بلوچستان ئٹ اکبر بگٹی و کیہی بلوچ آتا خون، ڈیرہ بگٹی و کوہستان مری ٹیفوجی آپریشن و ہزار آ بندغ تا زوراکی ئٹ بیگواہی ءِ جنرل پرویز مشرف نا سروکی ٹی فوجی آمریت تون تفیسس۔

پاکستان پیپلز پارٹی نا راہشونک بلوچستان ئٹ امنائی گپ و تران ءِ بنا کننگ نا درشانی کریرہ و “آغاز حقوق بلوچستان پیکج” نا پڑوکریسہ دا پاننگا کہ بلوچستان نا الس ءِ آئینی، سیاسی و زرگزرانی حق آک دوئی مرور، پیپلز پارٹی نا دور ئٹ بلوچ آتے اوفتا حق آکدوئی متور ولے بلوچ راہشون تا خون و سیاسی باسک آتا زوراکی ئٹ بیگواہی آن گڈ جشوک جوْن تا رسینگ نا لڑ اوفتا دور حکومت ئٹبنا مس ہرا تحریک انصاف و مسلم لیگ ئنا دور حکومت ئٹ ہم بس کننگ نا پِن ءِ ہلنگ اف۔

پاکستان نا جتا حکومت و اسٹیبلشمنٹ بلوچ راج ئتون امنائی گپ و تران نا درشانی ءِ چرجوئی ئٹ کننگ ءُ ولے راہشون تا خون و زوراکیئٹ بیگواہی و بلوچستان ئٹ سیاست آ رکھ خلنگ ئٹ اوفک امنائی گپ و تران نا کسر تے بند کننگ ءُ۔ پاکستان نا حکومتی تاغت آتےداسہ سرپد مروئی ءِ کہ اوفک تاغت نا زور آ یا بے دادی ئٹ بلوچ راجی آجوئی نا تحریک ءِ ایسر کننگ کپسہ و بلوچ ویل ءِ ایسر کننگ کنسوبری ئٹ اوفتے گپ و تران کروئی تمو۔

ننا دروشم، ننا جنگ، ننا راستی

منتظر بلوچ

دی بلوچستان پوسٹ

جہانی شیف بُڑزی بیانیہ غاتیٹ غُٹ آن زیات پنی جرمن چاہندار و فلاسفر کارل مارکس نا ءِ، ہرا تیوہ غا مخلوق ءِ اِرا جاگہ غا بشخانے؛اسٹ مزور ایلو سرمایہ دار۔ اوفتا نظریہ نا منّوگِر آک جہان نا کُل جیڑہ غاتے اندا چشمک ئٹ ہُریرہ، ہندا سوب آن بھاز جاگہ او ردی ناگواچی مریرہ و ایلو غُٹ پالو تیان خن ڈھکرہ۔ دا ہیت ئٹ بھلو راستی ئسے کہ جہان ٹی مخلوق نا اسے بھلو کچ ئس ہندا نظام نا پلویڑئٹی ءِ ولے تیوہ غا جہان اف۔ انقلابِ فرانس آن گُڈ یورپ ئٹ جاگیرداری تینا ایسری نا پِڑا سر مس، اوکان مون ئنا گام سرمایہ داری نائسکہ ہراڑے مہار کارخانہ مالک آتا دوٹی ئسکہ، اوفک مزور تا خید و خواری تیان زردار مریسہ ہنار۔

کارل مارکس تینا معاشی تھیوری ٹی ہندا گپ ءِ پارے کہ جہان ءِ نن اِرا جاگہ غا بشخن تو اسٹ سرمایہ داراک مریرہ ایلو مزورک۔ اوفتاپاننگ اندا ئس کہ ہراڑے ہم زور و نزور نا جنگ ءِ اوفتا بنیات اندادے ہئو اسے دے ئس مزورتا راج تیوہ جہان آ مرو ولے اگہ نن زرس دیہاڑنا پنّہ غاتے شِنن تو دا راستی ام پاش ءُ دروشم ئسے ٹی مون آ بریک کہ دا بٹائی آن بیدس ام زور و نزور نا نیام ئٹ سیالی نا چندیدروشمک اریر۔ دا ندارہ و رنگاک قوضہ کروک و قوضہ مروکا مخلوق نا نیام ئٹ زیات خننگرہ، دافتے بیرہ تدینی نا پِن تننگ مفک انتئےکہ تاریخ نا نسخل نا دستہ ءِ قوضہ گیر شعوری وڑٹ دُوٹی کیک، محکوم آ قوم آتے نُسک، دا سفر ئٹ گام گام آ کوٹور آنبار غُت ہنوکاتادی تا قصہ غاک ردینک پاننگ مفسہ۔

اندنو گڑاس راستی تا درشان ءِ افریقہ نا چاہنداراک تینا نوشت آتیٹ مونا ایسونو، دافتیٹ اسے  پِنی ءُ چاہندار ئس فرانز فینن نا پِنٹچاننگک۔ فرانز فینن نا پاننگ دا ئس کہ افریقہ و یورپ ئٹ زور و نزور نسلی موْن مننگ یا پیہنی تون گنڈوک ءِ۔ فینن تینا پی ایچ ڈیتھیسسز  “Black Skin،White masks” ئٹ سیاہ فام نیاڑی تون انگریز نرینہ غاتا و سیاہ فام نرینہ تو پیہن آ انگریز نیاڑی تاسیالی ءِ کالونیل سائیکالوجی نا پیراڈائم ئٹ مونا اتیک۔ او پاہک کہ موننگا نسل ئنا کُل آن بھلا خواہشت ہندا مریک کہ او ام پیہن ئنگادروشم ئٹ برے، اگہ جند تہ مننگ کپک تو پیہن رنگ و نسل ئنا اسیتون سانگ بندی کے تانکہ او شرف نا نظر ئٹ ہُننگے ، حالانکہ او داگِڑائے چارہ کہ پیہن آ نسل موننگا نیاڑی تون سانگ بندی کپک بلکہ قوضہ گیریت نا زمانہ ٹی افریقی نیاڑی تے تینا چوکری جوڑ کریرہپدا اوفتے تینتو خاچفیرہ (سیکس کریرہ)۔

فرانز فینن کتاب نا ارٹمیکو سبخ ئٹ لکھک “Mayotte loves a white man to whom she submits in everything.

He is her lord. She asks nothing, demands nothing, except a bit of whiteness in her life”

“مئے یوٹی اسے  پیہن (انگریز) اسیتون مابت کیک، ہراڑا او تینا ہر گڑا ءِ قربان کیک، او دانا مالک مریک، دا اودے ہچ پاپک، اوڑان ہچئسے نا خواست  کپک بیدس زرس پیہنی نا۔”

دا چُنکا نوشت آن نن اسے بھلّو راستی ئسے نا پارہ غا ہننگ کینہ۔ دا راستی ہمو فرخ ئنا درشانی ءِ کیک ہرانا بنداؤ او اف ہرادے کارلمارکس پاریسس یعنی زر و مزور نا جیڑہ اف داڑے۔ داڑے ماملہ پیہنی و مؤنی نا ءِ، انگریز و افریقی نا ءِ۔ دا ونڈی نا بنیات نسلی ءِمعاشی اف۔ فینن پاہک ای اسے پین ام مؤن دروشم والو نیاڑی ئس چاوہ ہرا ہمو ناچ کننگ نا جاگہ غاتا پٹ و پول ءِ کریسس ہرافتیٹ“حبشی تا ہننگ روا الوکہ” داڑان ہندوستانی تا ہمو قصہ ذہن ئٹ بریک ہراڑے انگریز آک درگہ سے آ نوشتہ کریسُر “ہندوستانی و کُچکآتا تہٹی بننگ بند ءِ” دا تیوہ غا گپ آتیان ننا مسخت دادے کہ تاریخ نا سفر ئٹ تدوک و سلوک آ قصہ غاتے بیرہ اسے چشمک ئسے ٹیہُننگ اوفتے تنک کننگ نا بریبرے۔ جہان ٹی دین، راج، نسل و پین چندی وڑتیٹ قوضہ گیری نا بُت بڑز مریسہ ہنانے۔

ہراتم نن بلوچستان و بلوچ راج نا پِڑا نظر شاغنہ تو داڑے ام ننے آ تادی نا سوب دا اف کہ نن نزورو مزور اُن و ننا دژمن کارخانہ مالکئسے، سرمایہ دار ئسے، بلکن اسے پاش ءُ راستی ئسے کہ ننا محکوم مننگ و پنجابی نا حاکم مننگ نا سوب دادے کہ ننے آ اوفک بلوچمننگ نا سوب آن تادی  کیرہ، اوفک ننا رسم و دود آتے شیف خلیرہ، ننا تینا دروشم ءِ ہزار رنگ ایترہ کہ دافک ہمو وخت و زمان ئسے آنجاہل، واشی و بے تہذیب مسونو، اوفک ننے سبخ ایترہ کہ راستی انت ءِ، اوفک ننے پنت ایترہ کہ نما تاریخ نا ورخ آتے خوْرہ کنگنے،اوفک دا پارہ کہ اگہ نمے کس زندہ تخانے تو اوفک “نن” اُن۔ اند نیام ئٹ ننا جہد ئنا بابت ام گڑاس ہیت و گپ مریک کہ دا جیڑہ مزور وزردار نا ءِ، دا ہچو روجی ءُ جیڑہ ئس اف ولے دا راستی دے آن زیات صفا ءِ کہ ننا زی آ مروکا تادیک، اوفتا مون ءِ توننگ کن ننا جنگ بلوچ نا ءِ۔

بلوچستان نا ضلع خضدار آن پاکستانی فورسز کارندہ آک ارا بندغ ءِ  دزگیر کننگ آن گڈ نا درست ہند آ دریر۔

شابیت حوال تا ردئٹ تدوکا نن دوانزدہ بجہ نا وخت پاکستانی فورسز کارندہ آک خضدار نا علاقہ ڈی پی سی کالج نا فٹبال گراؤنڈ آنارا بندغ ءِ دزگیر کریر ۔

دزگیر کننگ آن گڈ بیگواہ مروک آتا چاہنداری شہزاد رئیسانی و جلیل نا پن تیان مسونے ۔

یاتی مرے کہ خضدار ٹی بیست و چار گھنٹہ نا نیام ئٹ دا مسٹمیکو تدینی ءِ  داکان مالو خضدار نا علاقہ سول کالونی آن پاکستانیفورسز کارندہ آک اسہ خوانندہ ئسے دزگیر کننگ آن گڈ نا درست ہند آ درینو ۔ ہرانا چاہنداری ابرار جتک آن مسونے ۔

بلوچستان نا علاقہ دالبندین ٹی انجمن تاجران نا پارہ غان شار ئٹی بورہ نا نیستی نا برخلاف شٹرڈاون ہڑتال کاروباری جاگہ آک بندکننگانو جتا سیاسی جماعت آک و سیاسی پینل آک ہم ہڑتال نا امنائی کریر۔

انجمن تاجران دعویٰ کرینے کہ ہندی سوداگر آتے بورہ اتینگ ٹی سختی تون مون تروئی تمیک اندن بورہ مافیا کانود آن چپ چاغی آناڑزانی ئٹ افغانستان آ بورہ رادہ کیک و شار ئٹی بورہ 150 رپئی اسکان سودہ مریک۔

او خواست کریر کہ بست و بند کانود آن چپ بورہ رادہ کننگ نا بر خلاف کارروائی کہ ہندی سوگوار آک بورہ  تننگ کن کڑد ایسر ایتر،  جمعہ نا دے دالبندین شار نا تیوہ چنکا بھلا مارکیٹ آک جمعہ نماز اسکان بند مرور ۔

پاکستانی فوجی نا شعبہ تعلقات عامہ ( آئی ایس پی آر ) نا ردئٹ سیکورٹی فورسز انٹیلی جنس آپریشن ٹی ہائی ویلیو ٹارگٹ گلزارامام عرف شمبے ءِ  دزگیر کننگا، گلزار امام عسکری دوست کالعدم تنظیم بلوچ نیشنل آرمی نا راہشون ءِ۔

آئی ایس پی آر نا ردئٹ بی این اے، بلوچ ریپبلکن آرمی و یونائیٹڈ بلوچ آرمی نا اواری آن وجود ئٹ بسس، بلوچ نیشنل آرمی پنجگور ونوشکی ٹی قانود ٹہیفوک ادارہ آتیا جلہو ٹی اوار ئس۔

آئی ایس پی آر نا پاننگ ئس کہ بلوچ نیشنل آرمی پاکستان ٹی درزن آ دہشتگرد آک  جلہو تا ذمہ وار ِ، گلزار امام 2018 اسکان بلوچریپبلکن آرمی ٹی براہمدغ بگٹی نا نائب ہم مسس۔

آئی ایس پی آر نا ردئٹ گلزار امام بلوچ راجی آجوئی سنگر ( براس ) نا جوڑ کننگ ئٹ ہم اہم ءُ کڑد ئس ایسری تس، او بلوچ راجیآجوئی سنگر نا آپریشنل راہشون ہم مسس، گلزار امام نا افغانستان و بھارت نا دورہ ہم ریکارڈ ئٹی ءِ ۔

آئی ایس پی آر نا پاننگ ئس کہ گلزار امام ءِ  تیوہ منصوبہ بندی تون اوار اسہ سرسہب آپریشن ئسے آن گڈ دزگیر کننگا، اونا دزگیریبی این اے  و گیشتر عسکریت دوست ٹولی تیکن بھلو دک ئسے، اونا دژمن انٹیلی جنس اینجنسی تون ہیت کننگ نا پٹ و پول کننگ برجاءءِ۔