پاکستان و اوغانستان نا نیامیکو طورخم سیم آ ہڑتوما ملک آتا فورسز تا نیام ئٹ جھڑپ مسنے ہراڑان گڈ کسر ءِ ہن و بر اکن بندکننگانے۔

سم کاری نا لڑ استو ننکان بناء مریسہ اینو سہب اسکان برجاء مس۔ طورخم ئٹ کاریم سر تروک اسہ بینک کارندہ اس پِن ءِ پاش کپننگنا شرط آ امریکی حوال شینک کروک وائس آف امریکہ ءِ پارے کہ پاکستانی لشکر و اوغان طالبان تا نیام ئٹ دو شمبے نا سہب ہم سمکاری مسنے ہراڑان گڈ پاکستان نا ہد آتیٹ کاریمک بند ءُ۔

پاکستان نا ضلع خیبر سیم ئنا خلق لنڈی کوتل آن تعلقداری تخوک صحافی مہراب آفریدی وائس آف امریکہ ءِ پارے کہ طالبان آک دارودرمان کن پاکستان آ بروک ناجوڑ آتا بابت پالیسی نا بدلی آ دوست بفننگ نا درشانی کریسر ہراڑان گڈ او طورخم سیم ءِ بند کرینو۔

پاکستان سیم آ مروک حالیت آتا خراب مننگ نا بابت دائسکان ہچو بیان اس شینک کتنے واہم مہراب آفریدی نا رد ئٹ پاکستانیکوالخواک اوغانستان نا طالبان اوغدیدار آتون گپ و تران بناء کننگ نا کوشست کننگ ءُ۔

اوغانستان نا اسہ طالبان اوغدیدار مولوی صدیق اللہ سیم ئنا کسر ءِ بند کننگ نا پک کریسہ وائس آف امریکہ ءِ پارینے کہ پاکستان ہنو بر خاص وڑ ئٹ ناجوڑ آتا دارو درمان نا بارو ئٹ پالیسی ءِ بدل کرینے ہرا نا سوب آن سیم ءِ بند کننگانے۔

ہنوک وخت ئٹ طورخم سیم اتون اوار چمن سیم آ ہم ہڑتوما ملک آتا فورسز تا نیام ئٹ جھڑپ آک مسنو ہرافتا سوب آن کیہی دے تےاسکان سیم ءِ بند کننگانے۔

کراچی و پنجگو آن ارا بندغ نا  بیگواہ و برمتہ کننگ اندن کوئٹہ آن پاکستانی فورسز کارندہ آتا دوتیان زوراکی ئٹ بیگواہی نا گواچی ارابندغ نا آجو کننگ نا حوال ءِ۔

دوشمبے نا دے یحییٰ سلام ولد سلام سکنہ خدا بادان ءِ حاجی نصیر مسجد نا خڑک سرف گاڑی ٹی مروک سلاء بند بندغ آک بے دادیکریسہ تینتون دریر و بیگواہ کریر ۔

یاتی مرے کہ تدوکا تُو پنجگور ٹی دا حالیت نا مسٹمی تدینی ءِ کہ سلاء بند آک  بندغ آتے بیگواہ کننگ ءُ۔

علاقائی ذرائع تا ردئٹ دا زوراکی ئٹ بیگواہی تیٹ پاکستانی لشکر نا ہڈ تروک سلاء بندغ جھتہ آک اوار ءُ۔

ارٹمی پارہ غان کراچی آن حوال آکو کہ پاکستانی لشکر کراچی نا علاقہ گلشن مزدور آن اورنگ زیب ولد ماسٹر سراج سکنہ پَنجْگُورسوردو ءِ  ہفت فروری نا نن نا چار بجہ آ اُرا غا چھاپہ خلیسہ دزگیر کریر نا درست ہند آ دریر ۔

یاتی مرے کہ پِن کروک بندغ ءِ  داکان مالو 2 جون 2020 ٹی کراچی آن فورسز کارندہ آک دزگیر کریر ہشت تُو اسکان توننگ آن گُڈ یلہکریسُر و داسا اسہ وار اودے زوراکی ئٹ بیگواہی نا گواچی کننگا ۔

ہمو وخت کوئٹہ آن مرغنو عرضہ  ئسے اسکان فورسز کارندہ آتا دوتیان محمد ریاض و محمد اعظم آجو کننگار ۔

زوراکی ئٹ بیگواہی تا برخلاف سرگرم تنظیم وائس فار بلوچ مسنگ پرسنز نا ردئٹ بیگواہ محمد ریاض ولد فقیر محمد نیچاری آجومسونو ۔

یات مرے کہ محمد ریاض و محمد اعظم ءِ  21 نومبر 2017 ٹی کوئٹہ آن بیگواہ کننگاسس ۔

ایرانی عدالت پین اِرا بلوچ ورنا ءِ مرگ ئنا سزا بِنفینے۔ حوال تا رد ئٹ پاہو نا سزا مروک آتیٹ پنی آ بلوچ خلقی شئر پاروک ملا کمالانہوت ئنا مار منصور ہوت اتون اوار پین اِرا ورنا ءُ۔

یاتی مرے کہ تدوکا سال اکتوبر ئٹ برانز نا وخت آ ایرانی فورسز آتا دو آن بلوچستان نا دریابی شار چابہار آن دزگیر مروک پنی آ شئرپاروک ملا کمالان ہوت ئنا اسہ مار منصور ہوت و لال محمد نا مار نظام الدین ءِ زاہدان ئٹ ایرانی عدالت پاہو تننگ نا حکم تسنے۔

ورنا تا پاہو نا حکم ئنا بر خلاف بلوچ سیاسی کڑدہ غاک راجی حوالکاری میڈیا ایکٹوسٹس و بندغی حق آتا ادارہ غاک ڈکھ و سوختی نادرشانی کرینو۔

خیال ئٹ مرے بندغی حق آتا باسک آک بھلو وخت ئسے آن دا ہیت آ خُلیس نا درشانی کریسہ کرینو کہ ایران ئٹ مرگ ئنا سزا تننگ ئٹیایران نا نسلی و مذہبی اقلیت آتے ٹک کننگک۔ دا نا رد ئٹ قطب دے کہی ٹی کرد آتے اندن جاندم دے کہی ٹی عرب نسل نا بندغ آتے وجاندم دے ٹکی ٹی بلوچ ءِ نسل خاص وڑ ئٹ ٹک کننگک۔

بلوچستان نا بنجائی شار کوئٹہ آن زوراکی ئٹ بیگواہی نا گواچی عبدالقدوس بنگلزئی نا لُمہ حکومت و بندغی حق آتا ادارہ تیان بیگواہمار ءِ مونا ہتنگ کن کمک کننگ نا خواست کرینے۔

بیگواہ عبدالقدوس بنگلزئی نا لُمہ نا رد ئٹ اونا مار ءِ تدوکا سال 16 دسمبر آ کوئٹہ سردار منیر جان روڈ آن سی ٹی ڈی دزگیر کننگ آنگڈ زوراکی ئٹ بیگواہی نا گواچی کرے، لُمہ پارے کہ مار ئنا زوراکی ئٹ بیگواہی نا سوب آن بھاز اذیت ئٹی اُن۔

عبدالقدوس بنگلزئی نا لُمہ نا پاننگ ئس کہ او داسا پیر و منڈ ءِ مار پیری نا کنا اسٹ انگا کمک ءِ اودے ارا قانود و ارا ڈوہ ئٹ بیگواہکننگانے اگہ اوڑا دوبہ اس ارے گڑا عدالت ئٹ ہتیسہ ننے انصاف نا موقع تننگ مرے۔

عبدالقدوس بنگلزئی نا لُمہ بیگواہ مار ءِ مونا ہتنگ و اونا رکھوک یلہ مننگ کن حکومت و بندغی حق آتا ادارہ تیان کڑد سر تننگ نا خواستکرینے۔

بھارت نا پِنی شاعر و نغمہ نگار جاوید اختر نا پاننگ ءِ  کہ جیل اسہ زیباؤ جا ئس اف ولے فیض نا شاعری تے خواننگ آن اُست پائکجیل آ کاؤ۔

لاہور ٹی فیض فیسٹیول ئٹ بھارت آن بروک جاوید اختر نا پاننگ ءِ  کہ لاہور و امرتسر نا مُری 30 کلو میٹر ءِ ولے و ہڑتومکا مُلک آتیٹ لاعلمی گوڑیفوک ءِ، لاہور ٹی تولوک مسِن تے سما اف  کہ منَہ پنجابی ہندو ہم اریر، دُن ایڑے ہم ارے ۔

جاوید اختر نا پاننگ ئس کہ مواصلات آتا بند مننگ ہڑتومکا کنڈان ءِ بلکن نما پارہ غا زرس زیات ءِ ، نن مہدی حسن و نصرت نا بھلومجلس کرین، نُما پارہ غا گُڑا لتا منگیشکر نا ہِچو مجلس ئس متو۔

اونا پاننگ ئس  کہ لاہور ٹی بھلو بندغ ءُ ، داڑے دیوان کمال مریک، آئندہ پدا خوائیفیر گڑا اسہ ہفتہ کِن خوائیفِر ، مُسہ دے ٹی کناکاریمک مفسہ ۔

بھارتی شاعر نا پاننگ ئس کہ لاہور ٹی بندغ آک دوست بریسہ کیرہ کہ پدا ہِننگ نا وخت مریک ، فیض شاعر ٹی چانڑدہی والا خوبیارے، چانڑدہی ہراڑے تَمے ندارہ ءِ زیبا کیک ۔

اونا گیشتر پاننگ ئس کہ پاکستان و بھارت ٹی اندُنو بندغ اریر ہرا امن خوارہ ، الس آ فرض جوڑ مریک کہ اسٹیبلشمنٹ آ زُور تخِر ، ننکوشست کینہ ولے اسہ اندُنو تدینی ئس تیوہ کاریم تیا دیر شاغِک ۔

جاوید اختر دا ہم پارے کہ بر صغیر نا تاریخ ہزار آ سال آ تالان ءِ، مُستنا تاریخ نا سوب دا جاغہ نا بندغ آتا شعور ہم زیات ءِ ، نقشہ ءِارفر اُریر ، ملک تنیا مونا ہمپک، ڈیہہ آک مونا کارہ، او مابت مابت ئس اف ہراٹی سنگتی مف ۔

نیشنل ڈیموکریٹک موومنٹ نا چیئرمین و راجی اسمبلی نا باسک محسن داوڑ درو کوئٹہ پریس کلب نا دورہ نا وخت سینئر صحافی تونہیت کریسہ پارے کہ پی ڈی ایم ءِ ہرا مسخت کن جوڑ کرین او اقتدار ئٹ بننگ آن گڈ کسکنے۔

دا وخت آ پارٹی نا بنجائی سیکرٹری جنرل مزمل شاہ، بلوچستان نا صدر احمد جان، بنجائی کمیٹی نا باسک ہارون بازئی، بلوچستاننا جنرل سیکرٹری اسفند یار خان کاکڑ، ملک بہار، رحمت وطن پال، عنایت شاہ تون اوار ایلوفک ساڑی ئسر۔

محسن داوڑ پارے کہ حکمران آتا ملک و راج ءِ ویل آتا پلویڑ آن کشنگ کن ہچو سوبر ءُ گام گیج اس نظر بفک و نئے کہ اوفتون اسہمعاشی پالیسی اس ارے ہرا نا سوب آن آئی ایم ایف و ایلو مالیاتی ادارہ غاک سوگوْ شرط آتیا پاکستان ءِ وام تننگ ءُ و سنگت ملک آکہم کمک ءِ آئی ایم ایف معاہدہ تون تفنگ ءُ۔ پنجاب و خیبر پختونخواہ اسمبلی تا گچین کاری تیٹ اُرے کننگ بیدس آئینی ءِ ملک و ادارہتے آئینی وڑ ئٹ چلفیسہ ویل آتا ایسری یخینی جوڑ مننگ کیک۔

او پارے کہ پی ڈی ایم ہراتم وجود ئٹ بسوسس گڑا ننتون حوالکاری کننگا و پاننگاسس کہ داڑکن اسہ چارٹر اس جوڑ کریسہ اِرا تُو ئٹگچین کاری تے کرون ولے دن مننگ کتو انتئے کہ برجاء حالیت بھاز بے یخینی ءِ و سیاسی و معاشی حالیت آک بدل مننگ ءُ 2 صوبہ تااسمبلیک پِنانو۔ حکومت نا گچین کاری تا تاریخ نا پڑو ءِ کپننگ آن ایلو سیاسی ٹولی تے سوب رسینگنگ ءِ ہرا بیم بش کروک، بیدسجمہوری و بیدس آئینی ڈول ئسے ننے آئین آ عمل کروئی تمو نہ کہ ایلوفتا فیصلہ و عمل ءِ سوب جوڑ کریسہ رد ءُ کاریم کین، ہرا وڑضمنی و اِرا صوبہ تیٹ گچین کاری تا بابت حالیت آتے جوڑ کننگ ءُ۔

محسن داوڑ پین پارے کہ آئی ایم ایف ملک ءِ سخت انگا شرط آتیا وام تننگ کن مائیکرو مینجمنٹ نا تلہ غا بریسہ شرط خلنگ ءِ ملک ئناڈیفالٹ مننگ نا خُلیس ءِ اگہ دن مس گڑا حالیت آک پین خراب مرور و آئی ایم ایف و ایلو جہانی ادارہ تے گیشتر تینا منشاء ءِ کننگ ناموقع رسینگو، دا وخت غریب آ الس ءِ اِرا وخت ئنا اِرغ بکار ءِ اوفتے ایلو ہیت آتون کاریم اف۔

بلوچستان نا بنجائی شار کوئٹہ ٹی بلوچ نیاڑی ماہل بلوچ نا زوراکی ئٹ بیگواہی و اوکان گُڈ دروغ مقدمہ آتیٹ درزگیری پاش کننگ نابرخلاف سریاب روڈ کسٹم چوک آ برانز برجاء ءِ  ۔ ہرانا سوب آن ٹریفک نا ہِن و بر بند ءِ  ۔ 

یک شمبے نا دے نیاڑیک ، چُنا و سْیاسی باسک آتا بھلو کچ ئس ڈگری کالج سریاب نا مونا اوار مریسہ برانز ءِ  ہڈ تِسُر  ۔ ہراٹی دزگیرماہل بلوچ نا چُنک سَن چُناک ہم اوار ءُ ۔ 

دوتیٹ ماہل بلوچ نا عکس آتے و پلے کارڈ ارفیسہ نرینہ و نیاڑی ماہل بلوچ آ دروغ مقدمہ نا درج کننگ نا مذمت کریسہ پاریر کہ داکانمالو سی ٹی ڈی کہی دُنو مقدمہ آتیٹ بندغ آتے نامزد کرینو ولے او دروغ ثابت مسونو ۔ 

دا وخت برانز کروک آک بھلو کچ ئسیٹ کسٹم چوک آ برانز تریسہ ءُ  ۔ 

برانز کروک آتا پاننگ ءِ  کہ ریاست بلوچستان ٹی بنگلہ دیش نا تاریخ ءِ  پدا ہتنگو ۔ وار وار بلوچ نیاڑی تا برخلاف اندا وڑ نا عمل کریسہاو نیاڑی تے خُلیفنگ نا کوشست کننگ ءُ  ۔ 

بلوچ یکجہتی کمیٹی کوئٹہ نا راہشون آتا پاننگ ءِ  کہ ماہل آ خلوک دوبہ آتے پدا ہلیسہ اودے زُوت ئس آجو کیر نہ تو برانز نا لڑ ءِ  وسعتتِننگو ۔ 

زوراکی ئٹ بیگواہی تا برخلاف سر گرم تنظیم وائس فار بلوچ مسنگ پرسنز نا چیئرمین نصراللہ بلوچ نا پاننگ ءِ  کہ بلوچستان ٹی سیٹی ڈی نا کاروائیک شکبر مننگ ءُ  ۔ 

او ہیومن رائٹس کمیشن پاکستان آن خواست کرے کہ او ماہل بلوچ آ خلوگ دوبہ آتا حوالہ ئٹ اسہ فیکٹ فائنڈنگ مشن ہڈ ایتِر و تُدینینا باروٹ پٹ و پول کریسہ غیر جانبدار رپورٹ برجاء کیر و حکومت آن دا تدینی نا حوالہ آن پارلیمانی کمیٹی جوڑ کننگ نا خواست ہمکینہ ۔

توتک آن دزگیر کننگ آن گُڈ بیگواہ کروک بندغ آک دائسکان مونا بتنو ۔

سال تا سال خاہوت آک ہُروک ءُ عدالت آک و کمیٹیک انصاف تِننگ آن دو خالی ءُ دا پاننگ ئس کہ توتک آن زوراکی ئٹ بیگواہی تا گواچی پیرنگا محمد رحیم قلندرانی نا نواسہ آتا ہرا تدوکا دوآنزدہ سال آتیان تینا پیرہ و بیگواہ سْیال آتیکن ہُروک ءُ ۔

توتک ٹی پاکستانی فورسز کارندہ آتا پارہ غان سال 2011 ٹی لشکری آپریشن ءِ اینو دوآنزدہ سال پورَو مس فورسز کارندہ آک آپریشن نا نیام ئٹ توتک آن درزن آ بندغ آتے دزگیر کننگ آن گُڈ بیگواہ کریسس اندن فورسز کارندہ آک آپریشن نا وخت اِرا ورنا ءِ ہم بیران کریسُر ۔

توتک آپریشن ءِ 12 سال پورَو مننگ آ اینو بلوچ سوشل میڈیا ایکٹویسٹ “بی ایس ایم اے ” نا پارہ غان سوشل میڈیا ہیت کروک ویب سائیٹ ٹوئٹر آ کیمپئن ہم چلفنگ ءُ اندن تُدوکا نن ، بیگواہ قلندرانی خاہوت نا عزیز ، صحافیک و سْیاسی باسک آتا ٹوئٹر اسپیس ہم ہڈ تننگا ۔

دا موقع آ ہیت و گپ کریسہ بیگواہ محمد رحیم نا نواسہ ماہ نور بلوچ نا پاننگ ئس کہ دوست آتا زوراکی ئٹ بیگواہی تا برخلاف ہراتم او عدالت و کمیشنز آتا مونا ہِنار گُڑا اوتے ریاستی ادارہ آتا پارہ غان دھمکی تِننگا اوتے کیس آتے ایسر کننگ و چُپ کننگ کِن زور تخار ولے غُٹ کوشست و بےوسی تیان باوجود ننا شنوائی کننگتو و نا ہی ننے اینو اسکان پاریر کہ ننا دوست آک ارانگ او و ہرا حالیت ٹی ءُ ۔

خاہوت نا گیشتر پاننگ ئس کہ بلوچستان تون اوار پیشن مُمالک ٹی رہینگوک بلوچ سْیاسی باسک آک توتک آن زوراکی ئٹ بیگواہ اوتا پیرہ محمد رحیم تون اوار گیشتر پانزدہ بندغ نا رکھ آجو کننگ عالمی ادارہ آتان کڑدار ادا کننگ نا خواست کیر اندن بلوچستان ٹی ساڑی سْیاسی و بندغی حق آتا تنظیم آک دا باروٹ اوتا توار جوڑ متوس ۔

یاتی مرے کہ خضدار ٹی 18 فروری 2011 آ پاکستانی فورسز کارندہ آک توتک نا خلق ءِ چارما کُنڈان گھیرہ ٹی ہلکُر اُرا اِرا ءِ پٹار ، کہی گھنٹہ آتیان برجاء مروک آپریشن ٹی خلق نا غُٹ بندغ آتے اسہ جا آ اوار کریسہ فورسز کارندہ آک اوتے دزگیر ٹی ہلکُر نا درست ہند آ دریر اوکان گُڈ اوتیٹ کہی بندغ آک آجو مسُر ولے 82 سالہ محمد رحیم خان قلندرانی و اونا خاہوت نا گیشتر 16 بندغ آجو کننگتوس ۔

اندن پِن کروک علاقہ توتک مژی آن اشعماعی قبر آک رسینگار او اشتعماعی قبر آتا نشانی 2014 ٹی اسہ کُھریا ئس کریسس ، او قبر آتیان اسہ سد شست و نو جون دوئی کننگا ، ہراتا حالیت انداخس در خراب ئس کہ بھاز آتا بیرہ ہڈ آک رہینگوک ئسُر ۔ او جون آتیان بیرہ اِرٹ چاننگار ہراتا تعلق بلوچستان نا علاقہ آواران آن ئسک ۔

توتک آن بیگواہ بندغ آتا آجو کننگ کِن عالمی بندغی حق آتا ادارہ ایمنسٹی انٹرنیشنل ءِ ہم اسہ تواری خواست ئس برجاء کننگاسس اندن خاہوت آتا پارہ آن جتاء وخت آتیٹ مظاہرہ کننگانے ولے دائسکان پِن کروک بندغ آک آجو کننگتوس ۔

کاؤنٹر ٹیررازم ڈیپارٹمنٹ نا ترجمان دعویٰ کرینے کہ سی ٹی ڈی کوئٹہ آن بلوچستان لبریشن فرنٹ نا اسہ زالبول ئسے دزگیر کریسہخود کش جیکٹ اس خنانے۔

سی ٹی ڈی کوئٹہ نا ترجمان دعویٰ کرینے کہ فورسز آک کوئٹہ نا علاقہ سیٹلائٹ ٹاؤن لیڈیز پارک آن خڑک کارروائی کریسہ بی ایل ایفنا اسہ زالبول خودکش بمبار ماہل بلوچ ءِ دزگیر کرینے۔ سی ٹی ڈی ترجمان نا رد ئٹ فورسز آتا کاروائی ٹی زالبول خودکش بمبار آن چارکلو کُبین ءُ بارودی جیکٹ اس ہم کوزہ ئٹی ہلنگانے۔

یاتی مرے استو 11 بجہ نا وخت بلوچستان نا بنجائی شار کوئٹہ آن پاکستانی لشکر اسہ زالبول ماھل بلوچ ءِ اُرا غان اونا چنا تون اواردزگیر کننگ آن گڈ نادرست جاگہ آ دریسس۔ خن خنوک شاہد آتا رد ئٹ دزگیر کننگ نا وخت فورسز آک اودے بھاز بے دادی نا گواچی ہمکریسر اندن سہب ئنا چنا تے یلہ کننگا ولے زالبول بیگواہ ءِ۔

پوسکنا حوال تا رد ئٹ حوال تا رپورٹ مننگ آن گڈ سی ٹی ڈی چاہنداری پاش کننگ آن بیدس اسہ زالبول ئسے دزگیر کننگا دعویٰکرینے۔

تدینی نا بارو ئٹ ٹوئٹ کریسہ بلوچ نیشنل موومنٹ نا سیکرٹری جنرل دلمراد بلوچ نوشتہ کرینے کہ کوئٹہ آن شہید ندیم نا جنوزان ماحلبلوچ ءِ چنا تون اوار پاکستانی لشکر دزگیر کریسہ زوراکی ئٹ بیگواہ کرے ہراڑے چنا تے تیوہ نن بے دادی نا گواچی کننگ آن گڈ سہبئنا یلہ کننگا ولے ماحل بلوچ دائسکان فوج ئنا دزگیری ئٹی ءِ۔

زالبول تا زوراکی ئٹ بیگواہی آ بلوچ کڑدہ تیٹ بھاز غم و سوختئی خننگک، زہری خاہوت نا زوراکی ئٹ بیگواہی آ تیوہ بلوچستان ئٹبرانز آتا لڑ برجاء ءِ اندن اینو اسہ پین زالبول ئسے زوراکی ئٹ دزگیر کننگانے۔ اندن بلوچ گل آتا کنڈ آن ماھل بلوچ نا زوراکی ئٹ بیگواہینا برخلاف پگہ کوئٹہ ئٹی برانز نا پڑو کننگانے۔

بلوچستان نا بنجائی شار کوئٹہ آن پاکستانی لشکر اسہ پین زالبول ئسے دزگیر کننگ آن گڈ نادرست جاگہ ئسے آ درینے۔ ہرا نا چاہنداری ماحل بلوچ نا پن ئٹ مسنے۔

بلوچ نیشنل موومنٹ نا سیکرٹری جنرل دلمراد بلوچ تدینی نا پک کریسہ چاگڑدی حوالکاری ویب سائٹ ٹوئٹر آ نوشتہ کرینے کہ کوئٹہ آن شہید ندیم نا جنوزان ماحل بلوچ ءِ چنا تون اوار پاکستانی لشکر دزگیر کریسہ زوراکی ئٹ بیگواہ کرے ہراڑے چنا تے تیوہ نن بے دادی نا گواچی کننگ آن گڈ سہب ئنا یلہ کننگا ولے ماحل بلوچ دائسکان فوج ئنا دزگیر ئٹی ءِ۔

پن کروک زالبول بلوچستان ئٹ کاریم کروک بندغی حق آتا باسک و ایچ آر سی بی نا چیئرپرسن بی بی گل بلوچ نا ملخڑ ءِ۔ حوال تا رد ئٹ پن کروک زالبول ءِ پاکستانی لشکر استو نن ئنا یانزدہ بجہ نا وخت بلوچستان یونیورسٹی آن خڑک سیٹلائیٹ ٹاؤن آن دزگیر کرینے۔

خن خنوک شاہد آتا رد ئٹ پاکستانی لشکر دزگیر کننگ نا وخت اودے بھاز بے دادی گواچی ہم کرینے۔

خیال ئٹ مرے کہ برجاء ہفتہ تیٹ دا وڑ ئنا دا ارٹمیکو تدینی ءِ داڑان مالو کوئٹہ آن فورسز آک رحیم زہری اونا لُمہ و زائیفہ ءِ ہم زوراکی ئٹ بیگواہی نا گواچی کرینو۔

زالبول تا زوراکی ئٹ بیگواہی آ بلوچ کڑدہ تیٹ بھاز غم و سوختئی خننگک، زہری خاہوت نا زوراکی ئٹ بیگواہی آ تیوہ بلوچستان ئٹ برانز آتا لڑ برجاء ءِ اندن اینو اسہ پین زالبول ئسے زوراکی ئٹ دزگیر کننگانے۔