بلوچ زالبول ماہل بلوچ نا زوراکی ئٹ بیگواہی و دوبہ و بارکھان تدینی نا برخلاف بلوچستان تون اوار جتاء علاقہ تیٹ برانز آتا لڑ برجاء ءِ۔ برانزیک تدینی ٹی اوار مروک صوبائی وزیر نا دزگیری نا خواست کننگ ءُ۔
بلوچ زالبول نا زوراکی ئٹ بیگواہی و خون تا برخلاف اینو بلوچ یکجہتی کمیٹی ڈیرہ غازی خان نا کنڈ آن کالج چوک ڈیرہ غازی خان نا ہند آ برانز کننگا۔
اندا وڑ بلوچ یکجہتی کمیٹی اسلام آباد نا کنڈ آن ہم تدینی تا برخلاف نیشنل پریس کلب اسلام آباد آن اسہ دپدرشانی اس کشنگا۔
ڈیرہ غازی خان ئٹ برانزی تا پاننگ ئس کہ سرکار نا سروکی ٹی بلوچستان نا سردار آک بلوچ الس آ ظلم کننگ ءُ پن کروک سردار کیتھران تون اوار بلوچستان نا ایلو علاقہ تیٹ سرکار نا دو ئنا سیخا ٹی نجی جیل جوڑ کننگانے ہراڑے لس بلوچ نا لٹ و پل مریک و سرکاری ادارہ غاک دا سردار آتون ہمکوپہ ءُ و داسا ہم درزن آ غریب بلوچ آک سردار تا نجی جیل آتیٹ قیذ ءُ۔
اوفک پاریر کہ ارٹمیکو پارہ غا پاکستانی لشکر نا کارندہ غاک کوئٹہ ئٹی ماہل ءِ اونا چنا تون اوار زوراکی ئٹ بیگواہ کریسہ بے دادی نا گواچی کریر و اوکان گڈ اوڑا دوبہ خلکر۔ دا وڑ ئنا بیدس قانودی گامک بلوچ زالبول آتون بھلو وخت ئسے مننگ ءُ۔
پاکستان نا بنجائی شار اسلام آباد ئٹ برانزیک بلوچ زالبول ماہل بلوچ آ خلوک دروغ مقدمہ و دزگیری نا مذمت کریسہ اودے شرف ئٹ زو یلہ کننگ نا خواست کریر۔
اوفک پاریر کہ بلوچ زالبول آک ریاستی بے دادی نا گواچی و بے رکھوک ءُ۔ بیگواہ بلوچ بندغ آتا خاہوت آتے خُلیفنگ کن دا وڑ ئنا کاریم کننگک۔
داڑے بلوچستان نا شار، تربت، حب، خضدار و صحبت پور ئٹ عبدالرحمن کیتھران نا زیاتی تا برخلاف برانز کننگا۔
مری اتحاد و آل پارٹیز کیچ نا سروکی ٹی شہید گدا چوک آ برانز کننگا، برانزیک سردار عبدالرحمن کیتھران نا زو دزگیری و خان محمد مری نا خاہوت نا ایلو چنا تا رکھوک یلہ کننگ نا خواست کریر۔
بارکھان تدینی ءِ اِرا دے مسونے دائسکان سرکاری تلہ غا ہچ وڑ ئسے نا پیش رفت و خونی تا دزگیری نا ہچو عمل اس مونا بتنے۔ ایلو پارہ غا خون مروک بندغ آتا خاہوت جوْن آتون کوئٹہ سروزیر سیکرٹریٹ نا مونا تولوک برانز کننگ ءِ۔
بارکھان تدینی نا برخلاف خاہوت درو جوْن تے دریسہ کوئٹہ ءِ سر مسوسس ہراڑے تولوک برانز نا لڑ اینو ارٹمیکو دے ہم برجاء مس۔ کوئٹہ برانز ئٹ تولوک خاہوت نا پاننگ ئس کہ ہراتم اسکان سردار کیتھران ءِ حکومت آن کشیسہ دزگیر کننگتو تولوک برانز برجاء مرو اندن بارکھان شار ئٹ ہم شاریک درو آن تولوک برانز کننگ ءُ و تدینی ٹی اوار مروک سردار نا دزگیری نا خواست کننگ ءُ۔
تدینی نا برخلاف بلوچستان نا صنعتی شار حب ئٹ ہم شاری تا کنڈ آن دپدرشانی کننگا ہرا ٹی جتاء فکر ئنا بندغ آک اوار مسر۔ داڑے تونسہ ئٹی ہم برانز کننگانے۔
یاتی مرے کہ درو بارکھان نا علاقہ حاجی کوٹ آن مُسہ جوْن خننگاسر ہراڑے ہر مُسہ جوْن ئنا چاہنداری کوہلو نا ہندی خان محمد نا زائیفہ گراناز، اونا اِرا مار محمد نواز و عبدالقادر نا پن ئٹ مسوسس۔ خاہوت نا رد ئٹ پن کروک بندغ آک صوبائی وزیر سردار عبدالرحمن کیتھران نا نجی جیل ئٹ تینا 5 سیال آتون اوار قیذ ئسر۔
جوْن تا خننگ آن گڈ بلوچستان ئٹ برانز آتا لڑ بناء مسونے برانزیک عبدالرحمن کیتھران نا حکومت آن کشنگ و زوت دزگیری نا خواست کننگ ءُ اندن سردار عبدالرحمن نا قیذ ئٹ ساڑی خان محمد مری نا ایلو چنا و سیال آتا یلہ مننگ نا خواست کننگ ءُ۔
