فلپائن نا کوالخواک پارینو کہ ملک ئٹ اسہ دے ئٹ اِرا فضائی تدینی مسونو۔ اسہ تدینی ٹی اِرا فوجی پائلٹ کسکر اندن اسہ پرائیویٹ جہاز اس ہم بیگواہ مسونے۔

فرانسیسی حوال تروک ادارہ اے ایف پی نا رِدئٹ کمکار کارندہ غاک پاریر کہ سئے شمبے نا دے بیگواہ مروک طیارہ ءِ پٹنگ ئسر ہراٹی شش بندغ سوار ئسر۔

بتان صوبہ نا پولیس کوالخواہ کرنل رومل ویلاسکو نا پاننگے کہ چار شمبے نا دے فوجی طیارہ مارشیٹی ایس ایف 260 ہیل کاری بال ئنا وختا منیلا نا رہی آ برنج نا اسہ کشت و کشار اسیٹ تما ہراٹی پائلٹ تون اوار فضائیہ نا اسہ پین کارندہ اس مرگ ئنا گواچی مس۔

کرنل رومل ویلاسکو تدینی ہند ئنا اوننگ آن گڈ پارے ‘کس زندہ بچتنے و کہوک کارندہ غاتا جوْنک خننگانو۔’

فضائیہ ترجمان کرنل کونسولو کاستیلو حوالکار آتے پارے کہ تدینی نا سوب آتیکن پٹ و پول برجاءِ۔

جون 2021 ئٹ ہیلی کاری نا وختا ایس 70 آئی نا تمنگ آن گڈ فوج تینا بلیک ہاک آتا کُڑدہ ءِ منہ وخت اکن تلہ غا سلفے۔ دا تدینی ٹی شش بندغ مرگ ئنا گواچی مسوسر۔

فلپائن نا ‘سول ایوی ایشن اتھارٹی’ پارینے کہ ملک ئٹ قطبی مشی علاقہ ئٹ اسہ سیسا طیارہ اس تینا مِزل آ سر مننگ کتنے۔

ہوا بازی نا شعبہ نا ترجمان ایرک اپولونیو نا پاننگے کہ بیگواہ مروک طیارہ کوایان ایئرپورٹ آ بال کریسس ہرادے سیرا میدر نا اسہ مشی علاقہ ئسے آن گدرینگوئی ئس۔

سول ایوی ایشن اتھارٹی نا رِدئٹ ‘بال کننگ آن چار منٹ گڈ طیارہ نا حوال ایئر ٹریفک کنٹرول آن پنا۔ دا سی منٹ ئنا بال اس ئس۔’

او پارے کہ چار شمبے آ خراب مُد ئنا سوب آن پٹ و پول و کمکاری کاریم تے توننگانے۔

بلوچستان ئٹ گیس پین شش بندغ نا ساہ ءِ ہلک۔ بیست و چار گھنٹہ ٹی گیس ئنا چار جتاء تدینی تیٹ دئے بندغ بیران مسر۔

یخ ئنا مُد ئٹی ہر سال نا وڑ دا سال ہم گیس بلوچستان نا یخ انگا علاقہ تا بندغ آتیکن ساہ ہلوک اس ثابت مس، ہڑدے نا گیس تدینی وتراک آتیٹ دائسکان درزن آ بندغ آک بیران مسنو۔

شابیتی حوال تا رد ئٹ کوئٹہ نا کیب ئنا علاقہ خروٹ آباد نا بادیزئی ٹاؤن ئٹی ٹہیفوک اُرا ئسے ٹی سہب ئنا مالو گیس ہننگ نا سوب آنترند ءُ تراک اس مس ہرا نا سوب آن اُرا تیوہ بھس مس۔

خروٹ آباد گیس ہننگ نا سوب آن مروک تراک ئٹ اُرا ٹی ساڑی چار چنا بیران اندن اِرا زالبول بھاز ٹپی مسر۔ ٹپی آ زالبول تے دارودرمان کن زو بی ایم سی اسپتال کوئٹہ غا دننگا۔

دانگا کوئٹہ ٹی سبزل روڈ آ اُرا ئسے ٹی گیس ہننگ نا سوب دم بند مننگ آن پولیس سب انسپیکٹر کسک۔

کوئٹہ نا جتاء علاقہ تیٹ بیست و چار گھنٹہ ٹی دئے بندغ گیس ہننگ و تراک آتیان دم تسنو، تدوکا دے کوئٹہ جان محمد روڈ آ گیس ہننگنا سوب آن دم بند مننگ آن باوہ چار چنا تون اوار بیران اندن سریاب ئٹ ہم گیس ہننگ نا سوب آن ورنا اس بیران مسوسس۔

خیال ئٹ مرے کہ کوئٹہ ٹی یخ آتا مد ئٹ ہر وخت گیس پُر کننگ و گیس ہننگ آن درزن آ بندغ آک تینا ساہ تیان دو ارفیرہ۔ گیس ہننگ نابنداوی سوب آتیٹ سوئی گیس نا کنڈ آن گیس ئنا ہن بر پاننگک اندن بندغ آتا کنڈ آن احتیاطی وڑ تیٹ بے پامی ہم دا سوب آتیٹ اوار ءِ۔

ایلو پارہ غا کوئٹہ تون اوار بلوچستان نا جتاء علاقہ تیٹ برننگ سینٹر و میڈیکل آسراتی تا مفننگ ہم شاری تیکن ساہ ہلوک ثابت مننگ ءُواہم بھلو کچ اسیٹ تدینی تا مننگ آن بیدس ہچو سرکاری کاروائی اس مونا بتنے۔

کوئٹہ نا بندغ آتا رد ئٹ بیگہ آن گیس ئنا ہن بر بناء مریک و نن ئنا 12 غا سختی ئٹ بریک، ہرا نا پریشر نہ مننگ نا برابر مریک انداسوب آن دن انگا تدینیک ہر وخت مونا بریرہ۔

ایران ئٹ مہسا امینی نا خون ئنا بر خلاف برانز آتیا کریک ڈاؤن نا وخت آ ایرانی کوالخواک تدوکا اِرا دے ئٹی 3 زالبول صحافی دزگیر کریر۔

اصلاح پسند اخبار اعتماد تہران صحافتی یونین نا حوالہ ءِ تریسہ پارے کہ تدوکا 48 گھنٹہ ٹی کم آن کم 3 زالبول صحافی، ملیکہ ہاشمی، سیدہ شفیع، و مہرنوش زاری ءِ تہران ئٹ دزگیر کننگانے۔

اخبار رپورٹ کرے کہ ہر مُسہ زالبول صحافی تے ایون جیل آ دننگانے ہراڑے برانز آتا وخت آ دزگیر مروک آتیان کیہی شاری تے تخنگک۔

ہندی میڈیا نا رد ئٹ سیدہ شفیع فری لانس صحافی و ناول نگار ئسے اندن مہرنوش زاری جتاء اصلاحی پیپر آتیکن نوشتہ کیک و ملیکہ ہاشمی شہر پِنی ءُ آوٹ لیٹ ئسے کن کاریم کیک۔

اسہ اندازہ ئسے نا رد ئٹ 4 توہ مالو ملک ئٹ بناء مروک بے ایمنی آن گڈ کم و ود 80 صحافی دزگیر کننگانو۔

یاتی مرے کہ تدوکا سال ستمبر ئٹ 22 سالی مہسا امینی اخلاقی پولیس نا دزگیر ئٹ دم تسوسس۔

اخلاقی پولیس حجاب کپننگ نا سوب آن اودے دزگیر کریسس، دا پولیس ایران ئٹ سخت قانود ٹہیفک ہرافتا رد ئٹ زالبول تیکن تینا پژہ تے ڈھکنگ و السی ہند آتیا شابیت ءُ پُچ بیننگ الّمی مریک، پولیس نا دزگیر ئٹ زالبول نا کہنگ آن گڈ تیوہ ملک ئٹ برانز آتا لڑ بناء مسوسس ہرا داسکان برجاء ءِ اندن ایران برانز آتے توننگ کن ترند گامگیج کرینے۔

کوالخواہ تا پاننگ ءِ برانز آتا وخت آ سیکورٹی فورسز آتا باسک آتون اوار کیہی بندغ آک کسکنو و ہزار آتے دزگیر کننگانے اندن دا برانز آتے اوفک اسلامی جمہوریہ نا ‘دژمن’ آتا کنڈ آن کرفوک غاو پن کیرہ۔

بلوچ لبریشن آرمی نا ترجمان جیئند بلوچ شینک کروک بیان اسیٹ پارینے کہ بی ایل اے نا سرمچار آک بولان ئٹ دزگیر کوزہ گیر پاکستانی فوج و ڈھکوک ادارہ غاتا اِرا کارندہ ءِ بلوچ راجی عدالت نا فیصلہ نا رِدئٹ مرک ئنا سزا تسونو۔

او پارے کہ بی ایل اے نا سرمچار آک تدوکا دے تیٹ بولان نا علاقہ ببرکچ و بادرا ئٹ بی ایل اے نا “انٹیلجنس ونگ” نا حوال تا رِدئٹ چھاپہ خلیسہ اِرا بندغ ولی ولد غازی خان مری و گلاب شاہ ولد سلیم شاہ ءِ دزگیر کریسر۔

“پِن کروک دزگیر بندغ آک سر و سوج نا وختا تینا ڈو تے منار۔ گلاب شاہ منا کہ تدوکا سال نومبر ئٹ مروک فوج کشی تون اوار بولان و ایب کیب نا علاقہ غاتیٹ مروک ایلو لشکر کشی تیٹ دشن لشکر کن کسر اوننگ تون اوار سرمچار آتا اُرا و کسر تا حوالکاری ءِ کریسہ کرینے۔”

“اندن ولی خان منا کہ او تدوک بھلو وخت ئسے آن دشمن لشکر نا کارندہ نا ڈول ئٹ کاریم کریسہ کرینے، ہرافتیٹ لشکر کشی ئٹ کمک تون اوار دشمن ءِ خوراک و ایلو خواست نا گڑا تا سرکننگ ئٹ اوار مسونے۔ او منا کہ دانا بدل ئٹ اودے دشمن فوج کن سنگر و کیمپ ٹہیفنگ نا ٹھیکہ تننگا۔”

“ولی خان منا کہ سبی و ایب کیب ئٹ بلوچ آتا زوراکی نا بیگواہی تیٹ ہم او دشمن فوج نا کمک ءِ کریسہ کرینے اندن کوزہ گیر فوج نا پاننگ آ سلاء بند ٹولی ہم ٹہفینے۔”

بی ایل اے ترجمان جیئند بلوچ پارے کہ پِن کروک ہڑتوما بندغ آتے راجی غداری کننگ آ بلوچ راجی عدالت اوفتے مرک ئنا سزا بنیفے۔ ہراڑا اینو بی ایل اے نا سم کاری کُڑدہ عمل کرے۔ ترجمان پارے کہ دا بندغ آتیتون اوار اسہ پین بندغ اس ہم دزگیر ئس، ڈو پک نہ مننگ نا سوب آن، بلوچ راجی عدالت اودے شرف ئتون یلہ کرے۔

جیئند بلوچ پارے بی ایل اے پِن کروک ہڑتوما بندغ تے مرگ ئنا گواچی کننگ نا ذمہ واری ءِ ارفک۔ بلوچ لبریشن آرمی دا ہیت ءِ کل آ درشان کیک کہ کوزہ گیر لشکر نا کمکار آتے ہچو حالیت اسیٹ بشخنگ مفرو و دا نیٹورک تون تفوک ایلو بندغ آتے ہم زو اوفتا ایسری ہند آ سر کننگو۔

حکومتی فائل آتیٹ پاننگانے کہ تجابان ئٹی زیبائی ئٹ ٹہیفوک، اسہ فعال ءُ اسکول اس ارے، ہراٹی پوسکنا غٹ آسراتیک اریر ہرافتا کہ اسہ پرائمری اسکول ئسے نا خوانندہ تے گرج مریک۔ ولے گواچن ئٹ، نہ جوان وڑ ئٹ جوڑ کروک ماڑی اس ارے و نئے کہ پن کروک آسراتی تیان اسٹ ارے۔ اوڑے بیرہ اسہ گدان ئسے ہراڑے ہڑدے منہ درزن خوانندہ علم دوئی کننگ کن مُچ مریرہ۔

دی بلوچستان پوسٹ ءِ سماء تمانے کہ دنو بھاز اسکول کاغد آتیٹ ساڑی ءُ ولے گواچن ئٹ آخہ۔ سرکاری فائل آتیان سماء تمک کہ دا اسکول آک کاریم کننگ ءُ و جوان وڑ ئٹ جوڑ ءُ، ولے گواچن ئٹ، اوفتا وجود ہی اف۔ دا اسکول آتا تفنگ و کاریم کن خاص فنڈ آک جادوئی وڑ ئٹ اودیم مسنو۔

اندنو اسہ “گھوسٹ اسکول” قاسم آباد ئٹ ٹہیفوک ءِ ہراڑے خوانندہ غاک ڈغار آ تولیسہ تینا استاد آتا بننگ کہ ہُریرہ۔ اسکول اسہ گدان ئسے ٹی ءِ، و اوڑے ہچو بلیک بورڈ، فرنیچر، کتاب، واٹر کولر یا ایلو آسراتیک افس ہرافتا اسہ پرائمری اسکول اسیٹ اومیت کننگک۔

تجابان لٹریری اسکول نا نمائندہ غاک دی بلوچستان پوسٹ ءِ پاریر کہ کیچ نا علاقہ سنگ آباد ئٹ ٹہیفوک اِرا سرکاری اسکول، اسہ بوائز ہائی اسکول و اسہ گرلز پرائمری اسکول ہم آسراتی تا کمبوتی نا گواچی ءُ۔ ہڑتوما اسکول آتیٹ سائنس لیبارٹری، امتحانی ہال، مناسب کلاس روم و واش روم اف۔

سنگ آباد قاسم بازار نا علاقہ ٹی اسہ پین اسکول اس ٹہیفوک ءِ ہرا سرکاری فائل آتیٹ ساڑی ءِ ولے گواچن ئٹ اف۔ اوڑے ہچو اسکول ئسے نا ماڑی اف بلکن اسہ چنکو گدان ئسے ہرادے ہندی بندغ آک تینا کمک ئٹ جوڑ کرینو تاکن اوفتا چناک سیخا ٹی تولیسہ گڑاس خواننگ کیر۔

تجابان لٹریری سوسائٹی نا پاننگ ءِ کہ حکومت دا “گھوسٹ اسکول” آتا نوٹس ہلے۔ چنا تا خواننگ کن خاص فنڈز آتیٹ دروہ کننگک۔ اوفتا خواست ءِ کہ حکومت دادے ایسر کے۔

سوسائٹی نا نمائندہ تا پین پاننگ ئس کہ بھاز آ ہیڈ ماسٹر، پرنسپلز و استاد آک تینا سیاسی ہیت آتا سوب آن سختی تا گواچی مننگ ءُ۔ اوفتا پاننگ ئس کہ حکومت دانا ہم نوٹس ہلے۔ اسکول آک بروکا نسل آتے تعلیم تننگ کن ءُ، سیاسی اسکور پوروْ کننگ کن افس۔ اوفک ضلع کیچ نا تعلیمی افسر آتیان ہم خواست کریر کہ او دا تعلیم دژمن ایجنڈہ تیٹ گِرینگپس۔

تجابان لٹریری سوسائٹی خبڑدار کرینے کہ اگہ دا خواست آک مننگتور گڑا برانز اکن نن سڑک آتیا پیشتمون۔

بلوچ اسٹوڈنٹس الائنس نا تربت یونیورسٹی ٹی سمسٹر فیس تیٹ ودکی نا برخلاف برانز برجاء ءِ۔ خوانندہ غاک پنچمیکو دے یونیورسٹینا مونا دپدرشانی و برانز کریر۔

اسٹوڈنٹس الائنس تربت نا کنڈ آن یونیورسٹی بست و بند نا کنڈ آن سمسٹر، داخلہ و ٹرانسپورٹ فیس تیٹ ودکی نا برخلاف برانز کننگو۔

تدوکا دے وائس چانسلر و آل پارٹیز کیچ نا نمائندہ غاک خوانندہ آتون اوڑدہی کریسہ اوفتے مارچ اسکان فیس جمع نہ کننگ و اوکان گڈیونیورسٹی بست و بند ءِ فیس تیٹ ودکی نا بارو ئٹ فیصلہ کننگ نا اختیار تریسہ برانز ءِ ایسر کننگ نا پڑو کریر واہم برانزی خوانندہغاک یونیورسٹی بست و بند تون گپ و تران نا حوال ءِ تینا ویب سائٹ آ شینک کننگ اسکان برانزی کیمپ ءِ ایسر کپننگ آ زور تریسہ برانزءِ برجاء تخنگ نا پڑو کرینو۔

خوانندہ راہشونک دوبہ خلکنو کہ بست و بند گپ و تران نا کمک ئٹ ویل ءِ ایسر کننگ نا جاگہ غا وخت ہلنگ ءِ اندا سوب آن گپ و تران ناحوال ءِ تینا ویب سائٹ آ شینک کننگ افن۔

اوفک پاریر کہ او دروہ ٹی بننگ نا جاگہ غا فیس تیٹ ودکی نا فیصلہ ءِ ہلنگ اسکان برانز ءِ برجاء تخور۔

اینو مکران میڈیکل کالج نا خوانندہ غاک اسٹوڈنٹس الائنس تربت نا برانزی کیمپ ئٹ اوار مریسہ اوفتون ہمکوپئی نا درشانی کریر۔

بلوچستان نا بنجائی شار کوئٹہ آن تدوکا دے نادرست سلاء بند گاڑی سوار آک ہندی صحافی ءِ بیگواہ کریسہ نادرست جاگہ آ دریر۔

بیگواہ کروک صحافی نا چاہنداری حماد علی نا پِن ئٹ مسنے ہرادے انڈسٹریل تھانہ نا ہند آتیٹ اُرا نا مون آن بیگواہ کننگا۔

خن خنوک بندغ آتا رد ئٹ سلاء بند مول کروک بندغ آک مونو رنگ ئنا گاڑی ئسے ٹی اسر اندن خن خنوک آتا دعویٰ ءِ کہ گاڑی ٹی پولیسکارندہ آک ہم سوار مسنے۔

واہم کوالخواہ تا ہیت دائسکان دا بارو ئٹ مونا بتنے۔

بلوچستان نا ضلع پنجگور آن پولیس کارندہ آک اسہ جون ئس دوئی کریسہ اسپتال آ دریر۔

شابیتی حوال تا رد ئٹ پنجگور آن پولیس اسہ بندغ ئسے نا جون ءِ دوئی کریسہ ٹیچنگ اسپتال آ درے، ہراڑے اونا چاہنداری خلیل احمدولد علی احمد ہند تار آفس نا پِن آن مس۔

پولیس کارندہ آتا رد ئٹ پِن کروک بندغ  نشہ نا عادتی ئس، واہم کہنگ نا بارو ئٹ میڈیکل رپورٹ بننگ آن گُڈ گڑاس پاننگ مریک۔

بلوچستان ئٹ زوراکی نا بیگواہی تا برخلاف کاریم کروک گل وائس فار بلوچ مسنگ پرسنز نا راہشون آک پاکستان کن جرمن سفیر توناوڑدہی کریسہ بلوچستان ئٹ زوراکی نا بیگواہی تا بارو ئٹ معلومداری تسر۔

گل ئنا کماش نصراللہ بلوچ نا رد ئٹ دا اوڑدہی ٹی بلوچستان ئٹ زوراکی نا بیگواہی و بندغی حق آتا لتاڑنگ آ شابیتی ہیت و گپ مس۔

اندن اوڑدہی ٹی بیگواہ بندغ آتا خاہوت آک ہم اوار اسر۔

خیال ئٹ مرے کہ بلوچستان ئٹ زوراکی نا بیگواہی تا ویل بیم بش کروک حالیت اس ہلکنے۔

بلوچ راج دوست پارٹی و بندغی حق آتا گل آک بلوچ سیاسی باسک و خوانندہ تا زوراکی ئٹ بیگواہی نا ذمہ وار پاکستانی  سیکورٹیفورسز و ڈھکوک ادارہ تے پارہ۔

بلوچستان نا بنجائی شار کوئٹہ آن ورنا ءُ مسڑ ئسے نا جون خننگانے ہرا تدوکا دے تیٹ قلات آن کوئٹہ غا بسوسس۔

شابیتی حوال تا رد ئٹ قلات آن اسہ ہفتہ اس مالو کوئٹہ غا بروک مسڑ نا جون اُرا آن خننگانے، تدینی نا بارو ئٹ پولیس نا پاننگ ءِ کہسریاب پولیس ءِ حوال رسینگاسس کہ سریاب روڈ روڈ منیر مینگل پھاٹک آن خڑک اُرا ٹی مسڑ نا جون تموک ءِ ہراڑا پولیس جون ءِ دوئیمریسہ اسپتال آ سر کرے ہراڑے پوسٹ مارٹم آن گڈ جون خاہوت ءِ تننگا۔

پولیس ذرائع تا رد ئٹ مسڑ قلات نا ہندی ئسے ہرا اسہ ہفتہ اس مالو تینا سنگت تون کوئٹہ غا بسوسس و تینا سنگت نا اُرا ٹی رہینگاکہ۔

جون ئنا خڑک آن زاری ءُ دارو نا بوتل اس ہم رسینگانے خاہوت نا پاننگ آ مقدمہ درج کریسہ دوبہ دار نا دزگیری کن چھاپہ خلنگک۔

پولیس نا پاننگ ءِ کہ پوسٹ مارٹم رپورٹ نا بننگ آن گڈ اصل گواچنیک مونا برور۔