برجاء تُوہ پاکستانی لشکر نا دو آن زوراکی ئٹ بیگواہ مروک ورنا نا بےدادی نا گواچی مروک جون خننگانے۔
شابیتی حوال تا رد ئٹ تدوکا دے تیٹ 23 دسمبر آ آواران نا علاقہ کولواہ آن پاکستانی لشکر نا دو آن بیگواہ مروک ورنا نا سم کاریکروک جون خننگانے۔
خننگوک جوْن ئنا چاہنداری عمران بابو نا پن ئٹ مسنے۔
ذرائع تا رد ئٹ پن کروک بندغ ءِ پاکستانی لشکر دزگیر کریسہ بیگواہ کریسس ہرا نا پک ءِ اونا خاہوت کریسس۔ اندن اینو اونا بےدادی ناگواچی مروک جون خننگانے۔
بلوچستان نا ضلع کیچ نا علاقہ گومازی ٹی تدوکا دے نہنگ ڈور ئنا سیلابی دیر ئٹ اِرا سالی مسڑ اس وہیسہ بیگواہ مس اندن جتاءتدینی تیٹ 36 بند ٹپی مسر۔
ہندی ذرائع تا رد ئٹ برام آن بننگ وخت آ اسہ پک اپ گاڑی ئسے نہنگ ڈور ئنا سیلابی دیر درے۔
ذرائع تا رد ئٹ گاڑی ٹی سوار زالبول و چنا تون اوار غٹ بندغ آتے سختی ئٹ رکھنگا ولے اسہ اِرا سالی مسڑ ئسے دیر وہیفسہ درے۔
مسڑ نا چاہنداری عثمان نا مسڑ امیرہ ہند دازن نا پن ئٹ مسنے ہرانا پٹنگ برجاء ءِ۔
سئے شمبے نا دے شش گھنٹہ نا ترند پِر ئنا سوب آن چنکا بھلا جھل تیٹ ترند ءُ چول بس و سیلابی دیرک بسوسر۔
ایلو پارہ غا استو ننکان کوئٹہ آن کراچی ہنوک کوچ ولی خان بائی پاس آ پر ئنا سوب آن چپی مس، تدینی ٹی زالبول و چنا تون اوار 15 نا کچ مسافر آک ٹپی مسر۔
داکان مالو تدوکا دے چمن ئٹی بلوچ خان ہوٹل آن خڑک تدینی ٹی لنڈی کاریز آن تعلقداری تخوک 4 بندغ ٹپی مسر ہرافتیٹ چنا ہم اوارئس۔
اندن مکران کوسٹل ہائی وے آ کراچی ہنوک آ گاڑی سنگل نا ہند آ شکست نا گواچی مس ہرا نا سوب آن اسہ زالبول سعدیہ بیران اندن17 بندغ ٹپی مسر، ٹپی آتیٹ زالبول و چناک ہم اوار ءُ۔
بلوچستان ئٹ تحریک طالبان پاکستان نا گامک
ٹی بی پی تیدری
زارین بلوچ
تحریک طالبان پاکستان (ٹی ٹی پی) تینا راجی حوالکاری میڈیا غا اسہ بیان اس شینک کریسہ پڑو کرینے کہ بلوچستان نا مکران علاقہآن “مجاہدین” تا اسہ کُڑدہ اس تحریک طالبان پاکستان ئٹ اوار مسونے و اونا مسخت تون وفاداری نا پڑو کرینے۔ مزار بلوچ پنینادرست بندغ نا کماشی ئٹ، دا کُڑدہ اسہ مرغنو پن ابو منصور عاصم مفتی نور ولی محسود حفظہ اللہ نا دو آ تحریک تون وفاداری نابیعت ہلکنے۔ ٹی ٹی پی تینا چِر ئٹ اوار مروک جنگول آتے موارکی تس و پارے کہ او بلوچستان ئٹ ٹی ٹی پی ءِ شابیتی بشخور۔
تحریک طالبان پاکستان، افغانستان و پاکستان ئٹ کاریم کروک جتا اسلامی عسکریت پسند کُڑدہ تا اسہ سیخا گل ئسے، ہرا بلوچستانئٹ تینا شابیتی ءِ ودفنگ ءِ و طاغت دوئی کننگ نا کوشست ئٹی ءِ۔ ٹی ٹی پی پاکستانی ریاست ءِ بلوچ اُلس آ ظلم، اوفتا مڈی تا لُٹ و پُل،بلوچ سیاسی باسک آتا بیدس پام برمتہ و خوْن و بلوچستان ئٹ عسکریت پسندی آ نغدکاری کرینے۔
گل ہمدڑدی نا درشانی کرینے و بلوچ “آجوئی خواہوک” سلاء بند گل تا پارہ غا سنگتی نا دو مریفینے۔ اسہ متکنو بتل ئسے کہ “کنادژمن نا دژمن کنا سنگت ءِ۔” و اندن گمان مریک کہ ٹی ٹی پی بلوچستان ئٹ پوسکنو سنگت جوڑ کننگ نا کوشست ئٹی ءِ۔
سیکولر بلوچستان و انتہاء پسندی ٹی ودکی
تینا صدی تا مُتکن آ تاریخ نا وخت آ، بلوچستان اسُل مذہبی انتہا پسندی و بے سگی نا بُندر متنے۔ بلوچ اسہ کثیر النسل قوم ئسے ہراجتا پس منظر آن تعلقداری تخوکا بندغ آتیا ساڑی ءِ، جتا دیوتا تا عبادت کیرہ، و جتا بولی تیٹ ہیت کیرہ۔ وا ہم دا مخلوق نسل آتوناوڑدئی ئٹ رہینگتہ و اسٹ ایلو نا دود ربیدہ نا شرف ءِ تخیرہ۔ بلوچ تینا سیکولر دود آ فخر کیک۔
ولے تدوکا منَہ دہائی آن بلوچستان نا سیکولر ماحول زیمی مننگ ءِ۔ مذہبی بنیاد پرست، فرقہ وارانہ بےدادی و نفرت انگیز ڈوہداری تیاتدستاویزی ودکی مسنے۔ دا رجحان بیستمی صدی نا نیم اخیر ئٹ بناء مس ولے 2001 ئٹی اوغانستان آ امریکہ نا جلہو آن پد داٹیترندی بس۔
بلوچستان ئٹ مذہبی انتہا پسندی نا اصل سوب ءِ پُہہ مننگ کن المی ءِ کہ اودے نا گمان آ ودنگ نا وڑ آ پُہہ مفس بلکہ کیہی دہائی تیٹبُڑز ہنوکا رجحان نا وڑ آ ہُننگ مرے۔
بلوچستان تاریخی وڑ آ اسہ سیکولر ءُ علاقہ سے ولے اوٹی 1970 نا دہائی نا نیام ئٹ بدلی بناء مس۔ بلوچستان نا سیم آک اوغانستانتون گنڈوک ءُ، و اوغان مجاہد آتے پاکستان نا کنڈ آن علاقہ ٹی رکھوک پناہ گاہ تننگا، دا اوغان حکومت آتا کنڈ آن بلوچ قوم پرست آتیکنخلکُن روشت نا ردعمل ءِ۔
اندن کہ بلوچ صحافی، ساجد حسین، ہرا 2020 ئٹی پر سرار حالیت آتیٹ سویڈن ئٹ کسک، او دی ڈپلومیٹ ءِ انٹرویو تریسہ وضاحتکرے کہ: “جنرل ضیاء الحق نا دور ئٹ (1977-88) ٹی مذہبی انتہا پسندی پاکستان ئٹ بس، بلوچستان ضیاء نا پالیسی تیان بازخراب زیمی متو۔ بلکہ زہم شال یا بلوچستان نا ایلو جاگہ غا تیا اوغان باہوٹی تا بننگ آن مس۔ بلوچستان نا پشتون لٹ آن ہلیس سبیاسکان، مذہبی عناصر یا باز مخصوص، مجاہدین عناصر آک تینا جہاد نا جوزہ آتے ہیسُر۔
بلوچستان نا قطبی علاقہ آتیان بیدس اوغان مہاجر آک سیم ئنا خُڑک ئنا علاقہ آتیٹ ہم پیہار، ہراڑان علاقہ آک مذہبی انتہا پسندی ناگواچی مسر۔
ساجد حسین نا رد ئٹ، مذہبی انتہا پسندی اول ٹی کیچ ئنا علاقہ ٹی خننگا، اوکان پد چاغی و نوشکی ٹی۔ بنداوی وڑ ئٹ، دا گامگیجآک علاقہ آتیٹ شیعہ مذہب نا مقابلہ کننگ آ پام تسر۔ پان شیعہ ازم نا دا خیال ءِ کہ ایران بلوچستان ئٹ شیعہ اسلام ءِ تالان کننگ ءِ، وسنی (سلفی) سلاء بند تنظیم آتا خیال ءِ کہ دا نا مقابلہ ءِ کننگ نا اسٹ انگا کسر شیعہ ہزارہ تے خون کننگ ءِ، ہرا زیارت کن ایران آکارہ۔ ساجد حسین وضاحت کرے کہ ایرانی بلوچ آتا قوم پرستی ٹی مذہبی ٹولی ہم ارے، انتئے کہ بلوچ برادری گیشتر سنی ءِ ہرا شیعہایران ئٹ رہینگرہ۔ سیم ئنا دا پار ہم تینا ہم وطن آتیان چپ، ایران ئٹ بلوچ ہرا تینا حق کن جنگ کننگ ءُ او سیکولر افس۔ او کم و وداسلام پسند ءُ۔ سیم ئنا خڑک ئنا علاقہ آتیٹ کیہی سنی ٹولیک کاریم کننگ ءُ، و او ایران ئٹ کیہی وار جلہو کرینو و تہران دا جلہو آتاذمہ وار پاکستان، امریکہ و سعودی عرب ءِ پائک۔
جنرل ضیاء نا حکمرانی نا بلوچ چاگڑد آ شاید ہچو زہم تمتو، ولے دا بلوچستان نا سیاست کن تباہ کن ثابت مس ، انتئے کہ او تینا دورحکومت ئٹی مذہبی جماعت آتا حوصلہ افزائی و مخ تفی ءِ کرے۔ اسہ بلوچ نوشتکار، نعمت گچکی دی ڈپلومیٹ ءِ اسہ انٹرویو سے ٹیپارے کہ: “ضیاء نا دور ئٹی، بلوچستان ئٹی، اولیکو وار ایلو فرقہ، خاص وڑ ئٹ ذکری بلوچ آتا برخلاف جتا نظریہ آتا سرپرستی کننگا۔ ہر سال مذہبی علماء “ختم نبوت” کون آ پروگرام آتیکن تربت آ ہنارہ۔
او ودیک پارے کہ، “بنیادی وڑ ئٹ، دادے گچین کاری چم آتیکن کاریم اٹ ہتنگا انتئے کہ بلوچستان نا مکران ڈویژن ئٹ قوم پرست آککَٹنگ ئسر۔ اندا خاطر آن اسلام آباد نا سیاسی جماعت و حکومت نا خیال ئس کہ قوم پرست ذکری تا مخ تفی ٹی کٹنگ ئسر۔
تو ذکری نا بلوچ تون تعلقداری ءِ ایسر کریسہ بلوچ قوم پرست آتا طاغت ءِ نزور کننگ مرے تاکہ قوم پرست آتے نسخان مرے۔ او دنکریسہ کریر و او اسہ حد اسکان تینا نیام ئٹ دا تعلقداری ءِ پرغنگ ئٹ سرسہب مسر۔ او مسلمان تے ذکری فرقہ آتے ہم رشوت تسر ولےدا چنکو وخت ئسے کن ئس۔
ضیاء 1988 ٹی کذیت کرے ولے اونا پالیسیک برجاء سلیسر۔ مُلاک ذکری کارڈ ءِ کاریم ئٹ ہتنگ بناء کریر و برادری ءِ تنگ کننگ بناءکریر۔1990 نا دہائی ٹی، ذکری تے ظلم و زیاتی و مذہبی بنیاد پرستی نا غضب تون مون تروئی تما۔ ولے انتہا پسند آتے او ہچبررسینگتو انت کہ او خواہارہ انتئے مکران ڈویژن، ہراڑے ذکری تا آبادی ءِ او اوفتا مذہبی ہند آک اوڑے ساڑی ءُ، روایتی وڑ آ سیکولر علاقہءُ ہراڑے بلوچستان نا ایلو علاقہ آتا نسبت خواندگی نا شرح زیات ءِ۔
پاکستان نا مونتس بغاوت نا چم
پاکستانی ریاست بلوچ راج دوست و “آجوئی خواہوک” ٹولی تون مون تننگ کن بلوچستان ئٹ اسلامی تنظیم تا اُست بڈی و تالانی ہمکرے۔ دا حکمت عملی نا کڑمبو ایسری پیشتمانو۔ او بلوچستان ئٹ دینی بے سگی و فرقہ وارانہ جیڑہ تا مُد اس بش کرینے۔ دا حکمتعملی پاکستانی ریاست کن ہم شاید سوادی مف، انتئے کہ مذہبی ٹولیک تینا توفک آتا مون تے پدا تینا خواجہ تا پارہ غا ہڑسانو۔
مذہبی گل آک بلوچستان ئٹ کہی جلہو تے کرینو، ہرافتیٹ کل آن بیم تروک سراج رئیسانی نا خون ئس، ہرا بلوچستان عوامی پارٹی آنتعلقداری تخوک پاکستانی لشکر نا مُخ تف سیاست دان اس ئس۔ رئیسانی 2018 ٹی مستونگ ئٹ اسہ ریلی سے نا وخت خودکش جلہواسیٹ خلنگاسس، ہراڑے پین 149 بندغ کسکسر و 186 ٹپی مسوسر۔ کہوک آتا کچ بیم تروک ئس، جلہو ئٹ جتاء خاہوت آک ایسرمسوسر۔ منہ اُرا تیٹ نماز جنازہ تا خواننگ کن اسہ نرینہ اس الو۔
دولت اسلامیہ، ہرادے داعش ہم پاننگک، دا تنظیم سراج رئیسانی نا فوج اتون تعلقداری نا باروٹ پاریسہ دا جلہو نا ذمہ واری ءِ ارفے۔ داٹولی اوغانستان نا سیم اتون تفوک بلوچستان نا علاقہ تیٹ کاریم کیک و دہشت گردی تیٹ اوار ءِ۔ اسلامی تنظیم کل آن زیات بیدس سلاءبند شاری و شیعہ ہزارہ تے ٹک کرینے۔ رئیسانی نا خون اولی وار ئس ہراتم او اسہ اہم سیاست دان و اسہ اہم فوج اتون مُخ تفی کروکئسے ٹک کرے۔
بلوچستان ئٹ مذہبی لس خون شورش نا مُرغن و برجاء تاریخ و بلوچستان نا بندغ آتے اوفتا مڈی تیسکان سر مننگ آن نمن کننگ آپاکستانی کوالخواہ تا برخلاف سوختئی تون ہم تفوک ءِ۔ مذہبی و فرقہ وارانہ بےدادی ٹی برجاء ودکی پاکستان نا کنڈ آن انسداد بغاوتنا مسخت آتیکن مذہبی انتہا پسندی ءِ کاریم ئٹ ہتنگ نا سیدھا نتیجہ ءِ۔
بلوچستان پاکستان نا برخلاف شورش نا پنچ چول خنانے، اندن پوسکنا چول 2004 ئٹ بناء مسوسس۔ شورش، ہرا مالو مَش تیٹ ئس،داسا بلوچستان نا شاری علاقہ تیسکان سر مسنے۔ بلوچ “آجوئی دوست” ٹولیک تینے سوگو و وڑ وڑ ئٹ جوڑ کریر، و تیوہ بلوچستان ئٹتینا زیم ءِ تالان کریر، ہرا پاکستانی ریاست کن شورش ءِ ایسر کننگ بھاز سخت جوڑ کرینے۔
“آجوئی دوست” آتا جوزہ تیٹ ہموتم ترندی بس ہراتم فوج پنی آ بلوچ راہشون نواب اکبر خان بگٹی ءِ شہید کرے۔ پاکستان نا سیکیورٹیاسٹیبلشمنٹ بلوچستان ئٹ مذہبی بنیاد پرستی ءِ تالان کننگ و بلوچ باغی تے کچ ئٹ و تنیا کننگ کن طالبان، لشکر جھنگوی و لشکرطیبہ کونا اسلامی ٹولی تے کاریم ئٹ ہتیسہ ورندی تس ولے دا حکمت عملی بےسہب مس انتئے کہ اسہ وار ہراتم دا تنظیم آک طاغتدوئی کریر گڑا دافک تینا حکمران تے بےجارات کننگے بناء کریر۔
پاکستانی ریاست شدت پسند ٹولی تا منہ راہشون ءِ خلیسہ بیر ہلک، ہرا بیرہ جہادی تا گیشتر سلاء بند کیڈر ءِ ودی کرے۔ پاکستانیریاست دا دروہ ٹی ءِ کہ او دا ٹولی تے کنٹرول کننگ کیک ولے برجاء حالیت جتا پائک۔
پاکستانی فوج اتون دیخہ بھاز بلوچ سپاہی و افسر ارے، اندا سوب آن اودے بغاوت نا برخلاف کارروائی تیکن سراج رئیسانی آنبار انگاہندی پراکسی تا بھاز خواست مریک۔ سلاء بند و ڈھکوک ایجنسیک بلوچ باغی تون مون تننگ کہ “ڈیتھ اسکواڈز” جوڑ کننگ کن پنی آڈوہدار بندغ، ملیشیا نا راہشون، نشہ بہا کروک و جاگیردار تے بھرتی کرینو۔ دا “ڈیتھ اسکواڈز” آک بلوچ باسک و خوانندہ راہشون تا“زوراکی نا بیگواہی“، خون، برمتہ کریسہ زر خوائنگ، نشہ بہا کننگ و سلاء بند داڑیلی تیٹ اوار مننگ کن ملامت ءُ۔ تینا خذمت آتا بدلہٹی، دا ٹولی فوج ئنا کنڈ آن بھلو زر اس دوئی کیک و انت خوائے کننگ کہ یلہ غا دو آن کننگ کیک۔
اندنو اسہ ملیشیا سروک اس شفیق مینگل ءِ، ہرا وخت ئنا ملامت آ سلاء بند، فوج و ڈھکوک ادارہ تا خڑک ئنا اسہ سنگت ئسے۔ بلوچراج دوست آک شفیق مینگل ءِ بلوچ باسک، باغی و بلوچستان نا ہزارہ شیعہ برادری نا برخلاف بےدادی کارروائی تا ذمہ وار کیرہ۔
شفیق مینگل آ بےکچ شاری تا خون و بلوچستان ئٹ فوج مخالف جوزہ تے توننگ کن سیکیورٹی فورسز آتون کاریم کننگ نا دوبہ ءِ۔ اوڑابلوچستان ئٹ برمتہ کننگ و پیسہ خوائنگ نا اسکیم چلفنگ و بھتہ خوری نا کارروائی تا ہم دوبہ ارے، و اود دا کل کاریم تے اسہ دیندارمسلمان نا شخصیت ءِ برجاء تخیسہ کننگ ءِ۔
بلوچ باغی تون مون تننگ کن بلوچستان ئٹ انتہا پسندی نا دود ءِ تالان کننگ کن سیکیورٹی اسٹیبلشمنٹ نا حکمت عملی ٹی شفیقمینگل بیرہ اسہ پیادہ ئسے۔ بھاز وڑ ئٹ، بلوچستان ئٹی انتہا پسندی ٹی چائسہ ودکی کننگک۔ دادے چائسہ تیار کننگک و گیشتر ودنگکہ الینگک۔ دانا سوب آن بلوچستان نا بندغ آتیا خرابو زیم تمانے، دنکہ بندغی حق آتا ترند لتاڑنگ، شیعہ ہزارہ نسل کشی، و بے سگینا ودوکا دود۔ دا تحریک طالبان پاکستان، اسلامک اسٹیٹ و ایلو جتاء ٹولی تے ہم حوصلہ تسنے کہ او بلوچستان ئٹ تینا دو تے تالانکننگ کیر و بلوچ برادری آن جنگجو بھرتی کیر۔
طالبان و داعش
بلوچستان اسُل مذہبی فرقہ واریت نا خلق متنے و غٹ مذہب تیکن و اقلیت آتیکن پرامن مسنے۔ ولے اوغانستان ئٹ جنگ و طالبان نا اقتدارئٹ بننگ آن گڈ بلوچستان مذہبی بےدادی نا پڑ جوڑ مسنے۔ کہی بندغ آک بلوچستان ئٹ مذہبی انتہا پسندی نا بیم تروک رجحان ءِ مونیودفنگ ءُ، ولے اسٹ نا تہ تعلقداری بلوچستان نا قطبی علاقہ، خاص وڑ ئٹ ژوب آن ءِ، ہرانا سیمک مسکوہی بنجاہ نا بست و بندی قبائلیعلاقہ (فاٹا) تون تفنگرہ۔ فاٹا ٹی پاکستانی فوج نا جلہو و غضب آن گڈ، ٹی ٹی پی و ایلو اسلامی تنظیم آک بلوچستان ئٹ مُر اسکانپیہار و اوڑے دوارہ سوگو مننگ ءِ بناء کریر۔ ہرا نا نتیجہ ٹی، بلوچستان نا بنجائی شار کوئٹہ و ایلو شار تیٹ بیم تروک جلہو مسنے۔دانا اسہ مثیل اگست 2016 ٹی کوئٹہ سول اسپتال ئٹ مروک بمب جلہو ءِ ، ہرا ٹی 70 آن زیات بندغ کسکر، ہرافتیٹ بھازی وکیل آکاسر۔
داکان گڈ پولیس ٹریننگ کالج آ اسہ پین جلہو اس مس ہرا ٹی 60 کیڈٹس خلنگار۔ ٹی ٹی پی آن یکہ مروک ٹولی جماعت الاحرار، ہراداعش تون خڑک تعلقداری تخک، ہڑتوما جلہو آتا ذمہ واری ءِ ارفے۔
بروک آ تُوہ خضدار ئٹ شاہ نورانی نا صوفی مزار آ دہشت گردی نا اسہ پین کارروائی اس مس، ہراڑے 50 آن زیات زیارت کروک آککسکر۔ دا جلہو نا ذمہ واری ءِ داعش ارفیسس۔
مُسہ تُوہ نا وخت ئٹ بلوچستان ئٹی داعش نا سلاء بند و اوڑتون تعلقداری تخوک بندغ آتا دا مسٹمیکو جلہو ئس، اسہ اندنو کاریم اسہرا تیوہ خطہ ءِ گوڑیفے۔ بلوچستان دا حد اسکان مذہبی بنیاد پرستی ءِ اسُل سرپد متوسس، و بےدادی ٹی ناگمان ودکی بیم تروک ئس۔
بلوچستان ئٹ اسلامک اسٹیٹ نا جلہو آتا اسہ بھلا کچ، طالبان نا مننگ و بلوچستان ئٹ ٹی ٹی پی نا دا وخت بھرتی مہم پاکستان نابےسہب انسداد بغاوت نا حکمت عملی نا نتیجہ ءِ۔
مونی انت مننگ کیک ؟
بلوچ “آجوئی خواہوک” ٹولیک نہ تو ٹی ٹی پی نا مُخ تفی ءِ کیرہ و نئے کہ پاش شرہ کیرہ۔ اوفک طالبان نا کنڈ آن سیوتی نا صلہ ناورندی ءِ تتور، کم و ود اُلسی تلہ آ تو آخہ۔ آجوئی خواہوک ٹولیک داسکان ٹی ٹی پی نا کنڈ آن بلوچ برادری نا باسک آتا بھرتی آ ہچوخیال ئسے نا درشانی کتنو ولے دا تکنگ بیدس گواچن پسندی اس مفرو کہ بلوچ سلاء بند ٹولیک ہرا کہ حد آن زیات سیکولر ءُ– ودوکامذہبی بنیاد پرستی و فرقہ وارانہ کارروائی تا برخلاف مریر، ہرانا مطلب دادے کہ او ٹی ٹی پی نا بلوچستان ئٹ تینے سوگوْ کننگ نا ہمبرخلاف مریر۔
معاملہ انت کہ مرے، اسہ ہیت اس پاش ءِ کہ اگہ ٹی ٹی پی ءِ بلوچستان ئٹ باہوٹ رسینگک، گڑا دا ایلو اسلامی تنظیم آتے تینے ٹہیفنگو طاغت دوئی کننگ نا حوصلہ ترو۔ داڑان نہ بیرہ بلوچ کاز آن پام ہڑسینگو بلکن بلوچستان نا سیلوکر ماحول ءِ ہم بھاز نسخان رسینگو۔مذہبی بنیاد پرستی تیوہ جہان نا چاگڑد آتے بھس کرینے و دا دنو بخت اس اف ہرادے بلوچ آک سگنگ کیر و اوفک یخینی وڑ ئٹ خواپسہکہ بلوچستان اسہ پین اوغانستان اس جوڑ مرے۔
تربت آن پاکستانی لشکر چھاپہ نا وخت آ چار ورنا ءِ دزگیر کننگ آن گڈ بیگواہ کرے۔
ہندی ذرائع تا رد ئٹ استو پاکستانی لشکر تربت نا علاقہ گوکدان ئٹ جتاء اُرا تیا چھاپہ خلیسہ چار ورنا ءِ بیگواہ کرے، ورنا تا خاہوتآک تدینی نا پک کرینو۔
پن کروک بندغ تا چاہنداری مرزا ولد برکت، بلال ولد حاجی عبدالعزیر، عبدالرازق ولد محمد جان و محمد حنیف ولد غلام جان نا پن تیٹمسنے اندن گوکدان آن محمد حنیف دادو پنی ءُ ورنا اس مالو آن دزگیر ءِ۔
اِرا دے مالو تربت نا علاقہ آبسر یعقوب خلق آن مُسہ ورنا سید جان، شہزاد و جہانزیب ءِ زوراکی آن بیگواہ کننگا ہرافتا باروٹ داسکانہچو معلومداری اس رسینگتنے۔
اوکان مالو گوکدان ئٹ ہفتہ نا نن غٹ دکان و پٹرول پمپ آتے فورسز زور ئٹ بند کرفیسس۔ ہرانا سوب آن پوریائی بندغ آتے ہڑاند آتونمون تروئی تما اندن علاقہ ٹی خوراک نا نیستی ودی مسوسس۔
دکاندار تا رد ئٹ ہفتہ نا نن فورسز کارندہ غاک دکاندار تیا بےدادی کریسہ دکان و پیٹرول پمپ آتے بند کرفیر۔ ہرا نا سوب آن ننا لکھ آتانسخان مسنے و میڈیکل اسٹور تا بند مننگ آن ناجوڑ آتا ڈکھیائی تیٹ ودکی مس۔
ہندی بندغ تا رد ئٹ پن کروک دے آ فورسز آتیا جلہو آن گڈ فورسز آتا بھلو کچ اس خلقت ءِ گھیرہ کریسہ بندغ آتیا بےدادی کرے وکاروبار تے بند کرفے۔
پن کروک تدینی فورسز آتیا اسہ ترند ءُ جلہو ئسے آن گڈ مونا بسنے ہراڑے گوکدان ئٹ بلوچ لبریشن آرمی نا اسہ جلہو اسیٹ پاکستانیلشکر نا کم و ود ہفت کارندہ مرگ ئنا گواچی و ٹپی مسوسر۔
داکان بیدس کیچ نا علاقہ تجابان ئٹ ہم فورسز آتا بر خلاف ہندی بندغ آک برانز کریر۔ برانزی تا پاننگ ئس کہ سلاء بند بندغ آکپاکستانی لشکر نا پوسٹ ءِ ٹک کریر ہرا نا ردعمل ٹی فورسز آک لس خلقت آ مارٹر گولہ خلکر و ترند سم کاری کریر، سم کاری نا پلویڑئٹ بننگ آن اسہ زالبول اس ٹپی مس۔
ہندی بندغ آک علاقہ آن فورسز نا پیشتمنگ نا خواست کریر اندن پن کروک علاقہ ٹی داڑان مالو ہم دا وڑ ئنا تدینیک مونا بسنو۔
تدوکا دے تجابان ئٹ برانز کروک و ضلعی بست و بند نا نیامٹ معاہدہ مسوسس کہ چانڑدہ دے نا تہٹی فرنٹیئر کور کیمپ ءِ پین جاگہسے آ دننگو۔
بلوچستان نا دریابی شار گوادر ئٹ اینو مسٹمیکو دے ہم حالیت آک خراب ءُ، الس و سیکورٹی فورسز آک بھاز جاگہ تیا مون پہ مون ءُ،علاقہ تیٹ انٹرنیٹ و ایلو موبائل سروس آک داسکان بند ءُ اندن کہی علاقہ تیٹ بجلی نا بند مننگ نا ہم حوال آک اریر۔
تدوکا دے تیٹ فورسز آتا کنڈ آن حق دو تحریک نا تولوک برانز آ جلہو و راہشون تا دزگیری نا برخلاف زالبول، چنا و نرینہ تا بھلو کچ اساینو مسٹمیکو دے سڑک آتیا برانز کننگ ءِ۔
شار و ایلو خڑک ئنا علاقہ تیٹ پوریائی و سرکاری ادارہ غاک بند ءُ۔
چاگڑدی حوالکاری تا ویب سائٹ آ جتاء ویڈیو تیٹ خننگ مریک کہ گوادر شار نا آسمان ئٹ جاگہ جاگہ آ موڷ خننگک اندن فورسز آکبرانزی تیا شیلنگ و ہوائی سم کاری کریسہ خننگرہ۔
گوادر شار آن بیدس اورماڑہ و مکران کوسٹل ہائی وے آ برانز کروک و فورسز آتا نیامٹ منہ منہ ساعت ئٹ جھڑپ آتا لڑ ہم برجا ءِ اندنبھاز ہند آتیا فورسز برانزی تے یکہ کننگ کن ترند سم کاری و شیلنگ کننگ ءِ۔
گوادر آن تعلقداری تخوک ہندی صحافی نا رد ئٹ شہید لالہ حمید چوک، جی ٹی گیٹ، ملا موسی موڈ، بلال مسجد و پدی زر ئٹ فورسزآتا بھلو کچ اس سلوک ءِ اندن برانزیک سڑک آتیا ساڑی ءُ۔
شار ئٹ انٹرنیٹ و فون سروس نا بند مننگ نا سوب آن وخت آ معلومداری تیسکان سر مننگ ئٹ ہڑاند آتون مون تروئی تمک۔
اورماڑہ آن سر مروک حوال تا رد ئٹ شار اینو مسٹمیکو دے ہم بند ءِ۔ برانز کروک آتیا فورسز نا بےدادی آن اسہ بندغ دوست محمد ولددو شمبے بیران مسنے۔ واہم بست و بند نا کنڈ آن دا ہیت ئنا پک متنے۔
ہندی صحافی نا رد ئٹ شار و زیرو پوائنٹ آن ویڈیو و عکس ہلیسہ او تربت یا لسبیلہ آ ہنیسہ تینا ادارہ تیا رادہ کیرہ۔
حق دو تحریک نا رد ئٹ گوادر ٹی فورسز آک باسک آتا اُرا تیٹ پیہسہ مڈی تے نسخان تننگ ءُ۔
اوفتا رد ئٹ دزگیر مروک راہشون واجہ حسین واڈیلا و ایلوفک داسکان بیگواہ ءُ و اوفک برانز ءِ برجا تخنگ نا پڑو کرینو۔
بلوچستان نا بنجائی شار کوئٹہ، مستونگ و پشین ئٹ مُسہ سم کاری نا تدینی تیٹ زالبول ئسے تون اوار 8 بندغ بیران مسنو۔
سئے شمبے نا دے بلوچستان نا بنجائی شار کوئٹہ نا علاقہ ائیر پورٹ آ سم کاری آن اسہ بندغ ئس کسک۔
ریسکیو ذرائع تا رد ئٹ ائیرپورٹ روڈ آ کلی الماس ئٹ سم کاری آن عزت اللہ ولد رحمت اللہ ہند بلیلی جاگہ آ دم تسنے۔
ہرا نا جون ءِ الّمی کاروائی آن گڈ خاہوت ءِ تننگانے و دا باروٹ گیشتر کاروائی مننگے۔ واہم خون ئنا سوب آک سماء تمتنو۔
ایلو پارہ غا حوالکار آک ٹی بی پی ءِ پاریر کہ مستونگ نا علاقہ کلی پدہ ٹی اسہ اُرا اسیٹ سم کاری نا تدینی ٹی مُسہ بندغ بیرانمسنو ہرافتیٹ اسہ زالبول ئس و اِرا نرینہ اوار ءُ۔
گمانی رد ئٹ تدینی ننگ نا پن آ مسنے اندن گیشتر کاروائی پولیس کننگ ءِ۔ کوالخواک داسکان دا باروٹ شابیتی حوال مونا ہتنو۔
اندن پشین ئٹ تدوکا دے مروکا سم کاری نا سوب آن ٹپی مروک آتیان پین اِرا بندغ دم تسر۔
لیویز ذرائع تا رد ئٹ پین اِرا ٹپی نا کذیت آن گڈ دا تدینی ٹی کہوک آتا کچ چار مس۔
لیویز ذرائع تا پاننگ ءِ کہ تدوکا دے اُرائی جیڑہ آ اسہ بندغ ئس سم کاری کریسہ تینا حقی آ ایلم تون اوار 4 بندغ ءِ ٹپی کریسس۔
لیویز ذرائع تا پین پاننگ ءِ کہ سم کاری نا سوب آن 2 بندغ درو بیران مسوسر۔
تدینی آن گڈ علاقہ نا بندغ آک دوبہ دار ءِ ہلیسہ بےدادی نا گواچی کریسر۔ لیویز نا رد ئٹ دوبہ دار ءِ ٹپی حالیت ٹی دزگیر کریسہ کوئٹہآ سر کننگانے۔
مسخت نا گڑتی
ارٹمیکو بشخ
نوشت: نوید احمد
دی بلوچستان پوسٹ
زند! سَلیسُنے، ہر کُنڈ آ بے پایان و چّپی ئسے، مَش تا بُڑزی سوگوی نا دلیل ءِ، اسُل اندا مَشتے آنبار زند ہم ہَڈ کرینے، اسہ ہند آ، چُپیانداخس مُرغن ءِ کہ کُٹنگ اف، سلیم دشت ئسے ٹی سلوک تینا کَلک آتیا پُدین و تہو محسوس کَننگ ءِ، تہو ٹِی عطری و زباد ئسے، چُنکوچُنا اس پیہن و جوڑہ سیٹی، چُنائی آ بشخندہ تون سلیم نا دو ءِ ہلک مونی راہی مس، چنا مون اٹ ءِ سلیم اونا رند اٹ ءِ، سلیم کوشستکیک ہیت ئس کَننگ نا ولے بارنا دوی خشک انگا با ٹی تا کاریم ءِ اِلانے، ذہن ئٹ سوج ئسے، ولے دُوی آ بَننگ اَف، چنا نا دو آن سلیم دو ءِتینا کشنگ ہم کپک، گام ہم اندن تخنگرہ دُنکہ چنا خوائک، چُپی دا دشت ئٹ اندن تالان ءِ کہ خفتیٹی تہو مدان و توار ئسے پِنک، سلیم ناذہن ئٹ گڑاس ارے گام تیا تہ اونا وس اف، چُنا نا رَند ءِ اِلنگ خوائک ولے اِلنگ کپک، چُنا نا دو ءِ اِلنگ خوائک ولے اِلنگ کپک، وخت ہم بھازمَدان ءِ سلیم دم درینگانے ولے پاننگ ہم کپک، مسلسل ءُ سفر ئسے، اندن لگک بیست و چار سال نا ءِ سلیم اندن سفر کنگے، مُسلسل،سَلنگ نا پِن اف، مزل نا ڈس اف، دشت ءِ رِیک آکو او پند ءِ، چنا ہَڈ کرے تو سَلیم مُقابل خَنک تلار آتا شم تیان بھلو جل ئس وَہنگ ءِ، داجَل بندغ آتا بدن نا خوائش آتے وہفنگے، جَل ئنا مونا پیر و بندغ ئس، پیہن و ریش ئسے تا، لٹ ءِ تینا جَل اٹ خلیسہ وار وار پائک “رہبریدلیل نا ءِ، زند شعور نا ءِ، رہبری دلیل نا ءِ زند شعور نا ءِ“۔ سلیم نا خنک دا ندارہ ءِ خنیسہ زندہ مننگ اسر کہ، چنا معصوم آ خن تتوسلیم آن سوج کرے۔ زند انت ئسے؟ اندا سوج تون اوار چُنا دو ءِ تا اِلا انداڑ تو سلیم تُغ آن اندنو ہجم ئس کرے کہ کس پائے اودے کسئس کرنٹ تس گھڑی آ ہریک سوب ئنا ساف آتا ٹیم ءِ گِلاس ئس دِیر ئنا کننگ و کھڑکی آن پڑدہ تے مُر کرے سلیم داسہ تینتو ہیت خواپک،او دا تُغ ءِ یات کَنگے، پیرینگا درویش نا ہیت آن بیدس پین اچ ئس یات بفک تہ۔ او اندا گمان اٹی ءِ کہ پِیرنگا زند نا تعریف ءِ کرے، بدن ناخوائش آک بندغ ءِ ڈُوبیفرہ اٹکلی آ فیصلہ آک مرگ ءِ ہم بےسہب کیرہ۔ اندان سوچ کریسہ پین سوج ئسے نا آمد مس، داسہ تینے آنسوج کیک کہ کَنتون انتئے دُن مَننگے، قدرت مہرباں ءِ کنے آ یا گُڑا بھاز ظالم ءِ۔ موبائل نا گھنٹی لگا یونیورسٹی نا ٹیم داخل ءِ استو نامعیب تون محفل اونا استا بس۔ بھاز ہُرے آن پد اینو سلیم نا اُست خوائک کہ یونیورسٹی آ کاو۔۔۔ امو بستہ مُتکن آ جوڑہ مری وال نتتیٹی یونیورسٹی کن راہی مس خواجہ۔۔۔ اینو ہم لیکچر “اخلاقیات” آٹے انت ئس صحیح و انت ئس غلط ءِ ۔
سوج ہندن اڑینگانے، مَلنگسہ ءِ سلیم نا دماغ ئٹی۔ سر بس کلاس نا تہٹی، بورڈ آ نوشتہ کرے، انصاف، جوانی (ورچو) و پرہیز گاری۔ دالوظ آک سلیم کن تو بھلن اسُر، ولے سر دافتے آ تینا تیار کروکا لیکچر ءِ تِس۔ تدوکا وار آن بار سلیم نا دماغ اٹ اِچ ئس بتو لیکچر آن۔ولے اینو ہمت کرے سوج ئسے نا، سر ءِ سوج کیک،
“مگہ جوانی ہر سماج نا تینا مریک؟ “
سر بے ساختہ جواب تس، او! سلیم پدا سوج کیک تا۔
“گڑا “قدرت” انت ئسے؟ انتئے ہر جاگہ یکتا ءِ ؟مگہ بندغ ءِ صحیح و غلط نا شعور قدرت آن بتنے؟ مگہ قدرتی ویل آتیان بَچنگ کن بندغ آاخلاقی ءُ زمہ واری افس؟ سائنس امر ایسری راستکی نا دعویٰ ءِ کیک؟“
دا سوج تون سلیم نا جند ہم گڑتی سیٹی ڈُوبینگا! سر ئتون ورندی اف! کلاس آن پین طالب ئس توار کرے، پارے
“گڑا کس ننے خلیک جوان کیک، نن خلینہ تہ بدلہ ٹی تو نن ہم جوان کینہ، گڑا صحیح و غلط نا انت اوغنگ ہرکس تینا ہند آ صحیح ءِ۔!”
سر پدا چُپی ٹی مُچا کلاس ءِ ہُننگے۔ لیکچر نا وخت پورو مسنے نّم تینا حاضری تے خَلبو سر طالب آتے پارے۔ حاضریک مسُر ہرکسپیشتما کلاس آن۔ داسہ سلیم تینا کروکا سوج آتیا تینٹ سوچنگ ءِ، ایلو طالب نا سوال ہم وڑا تہ۔ ہندا سوج ئٹی ایلو طالب تون مقابلمس ماندہ باشی آن پد سلیم تینا درستی راستی ءِ کرے۔ طالب آن اونا تعرف نا سوج کرے۔ ای شکیل اُٹ۔ مستونگ آن تعلقداری ءِ کنا بیایس و نا سی سی ممبر ئسے اَٹ۔ ہیت ءِ با آن تا سلیم پُلا، پائک۔ بلوچ اسٹوڈنٹس آرگنائزیشن، داسہ کنے اندازہ مس نما سوال اٹتلخی انتئے ئس۔ سلیم جان نی ہم بھاز کتاب دوست ءُ بندغ ئس لگیسہ سوج آک نما سر ئنا خف تے آن موڷ ئس کشار۔ ہڑتوماک تُرندٹاکو ئس خلکر، اسٹ ایلو ءِ چاہ ئنا سلاح آن پد رخصت کریر شکیل تینا سرکل کِن گام کَننگ ءِ سلیم لائبریری نا نیمہ غا۔
اینو موسم بھاز زیباء ءِ۔ کسری سلیم پُوشکن، خرُن آ پَن آتے آن بڑزا جمر آتے ہریسہ تینتو پائک۔ پَن ریچ اومیت آتا مُد ءِ۔ لائبریری ءِ تِروکاوخت سلیم کن کتھارسس ئسے آن کم الو۔ اخلاقیات نا سوج آ خواننگ تو متو ولے اونا ذہن اٹ بروکا سوج و شکیل نا ہیت آک بھلو خلائسے پُر کرسہ اسر۔ کنا ہیرو پین کس نا ولِن منگ کیک، پین کس نا ولن کنا ہیرو مننگ کیک۔ ولے سر داخس انتئے چُپ کرے! سلیملائبریری نا کرسی ئسے آ تولوک کتاب دوٹی سوج کرسہ ءِ۔ جوانی گندئی نا سوج سیاست کن اخس درگہ غاتے ملسہ کَننگ ءِ، داسہ تودا سوج داڑسکا بسنے کہ امر جوانی اٹ حکمرانی مَننگ کیک، کَس آ حکمرانی کننگ جوان ءِ یا غلط ءِ! قدرت بندغ ءِ دا گشادی ءِ تسنےکہ او سوج کے قدرتی آ اصول آتے سرپند مرسہ کے، ہندن بندغ اخلاقی بنداو آتیان تینکن کسر کشسہ ءِ۔ کتاب آتا جہان ئسے زیبا ءُولے کس پہُہ مرے تہ۔ سلیم ءِ دا خیال ارمان ئسے تون بس۔ او سوج کننگ ءِ بناء کرے “داخس کتاب کلچر ءِ لس کرینن داڑان پد ہم نن توجوان خوانوکو اف، ورناک کتاب آتیٹی تینے ڈکّھرہ انتئے!!! دا کتاب کلچر رجحان ودی کرے، ولے دا نا آخبت صحیح پیشتما یا غلط۔!” انداڑ تو سلیم پائے ہر عمل ءِ اونا آخبت آ ہُننگ لازم ءِ، بندغ انت سوچک عمل کیک، او عمل آن پد انت نتیجہ آک بریرہ۔ اخلاقیات نا سوجگڑاس حد اِسکا ورندی تننگا۔ سلیم تینتو مقابل شیلف آ کتاب آتا پِن تے خوانِسہ ءِ ہوش ءِ رد تروئی ءِ تا ہاسٹل نا وخت ہم داخل مسنےلائبریری ہم بند مننگ ءِ۔ سلیم لائبریری آن پیشتما داسا مدان مدان آ ہاسٹل نا نیمہ غا گام کننگ ءِ ہمو کوٹی، ہمو جہان نا تینا نیمہ غاگام کننگ ءِ ہراٹی او تینے بے قرار سمجھک۔ زند تیر مننگ ءِ سلیم داسکان تینکن کڑد ئس گچین ہم کتنے۔ اوڑ تون گڑاس سوج ءُ ، چنکوخیالی ءُ جہان ئسے تہ۔ سلیم دا فیصلہ ءِ کتنے کہ امر زندہ مروئی ءِ۔ زند ءِ تینا ڈول اٹ چلیفوئی ءِ۔ ہشت بجہ ءِ سلیم بسترہ غا تنہا ءِ ۔اندن تموک ءِ دنکہ زندہ ءُ لاش ئس مرے! گڑتی، گڑتی، بیرہ گڑتی ہندن تُغ ئٹ انا۔
(برجاء ءِ)
بلوچستان نا ضلع کیچ نا بنجائی شار تربت آن مُسہ بندغ دزگیری آن گڈ بیگواہ مسر۔
شابیتی حوال تا رد ئٹ آبسر یعقوب خلق ئٹ تدوکا دے پاکستانی لشکر مُسہ بندغ ءِ زوراکی ئٹ بیگواہ کرینے۔
ہرافتا چاہنداری سید جان، شہزاد و جہانزیب نا پن تیٹ مسنے، داسکان اوفک پاش کننگتنو۔
خاہوت آک حکومتی ادارہ تیان خواست کرینو کہ اوفتا بندغ تے پاش کننگ مرے اگہ اوفک ڈوہ اسیٹ اوار ءُ گڑا اوفتے عدالت ئٹی ہتنگے۔
بلوچستان ئٹ بیگواہ بندغ آتا ویل ایسر مفروک و بھلو ویل ئس جوڑ مسنے، بلوچ راج دوست ٹولی تا کنڈ آن بلوچستان ئٹ زوراکی نابیگواہی تیٹ پاکستانی لشکر و ڈھکوک ادارہ تا اوار مننگ نا کہی وار شاہدی ہم مونا ہتنگانے و برجاء وخت ئٹ پاکستان نا بنجائیسیاست کروک جماعت بلوچستان نیشنل پارٹی نا سرادر اختر مینگل نا سروکی ٹی اسہ کمیشن ئس اڈ تننگا ہرا بیگواہ بندغ آتا باروٹکاریم کننگے۔
یاتی مرے کہ بلوچستان ئٹ بیگواہ بندغ آتا یلہ مننگ کن کوئٹہ ٹی خاہوت آتا کنڈ آن تدوکا اسہ دہائی سے آن پرامن برانز ہم برجاء ءِ۔
دو شمبے نا دے بلوچستان نا صنعتی شار حب ئٹی بلوچ بندغی حق آتا باسک راشد حسین بلوچ نا زوراکی ئٹ بیگواہ مننگ نا چار سالپورو مننگ آ برانز کننگا۔
برانز ئٹ بیگواہ آ بندغ آتا خاہوت آک، بلوچ خوانندہ آتون اوار نیشنل پارٹی و بی ایس او پچار نا باسک آک اوار مسر۔
اوار مروکاک دو تیٹ راشد حسین نا زوراکی ئٹ بیگواہی نا برخلاف پوسٹر و پلے کارڈ ارفیسہ شار ئنا کسر تیا نعرہ خلنگ آن گڈ لسبیلہپریس کلب نا مونا مچ مریسہ برانز کریر۔
دا وخت آ بیگواہ راشد حسین نا لمّہ، ایلم نا مسڑ ماہ زیب، بلوچ وائس فار مِسنگ پرسنز نا سمی دین محمد، بلوچ یکجتی کمیٹی نا آمنہبلوچ، نیشنل پارٹی نا واحد رحیم، ایڈوکیٹ نواز برفت و بیگواہ اسلم بلوچ نا لمّہ و ایلوفک تران کریسہ پاریر کہ بلوچستان ئٹ زوراکی نابیگواہی تا لڑ ءِ توننگ مرے۔
او پاریر کہ اینو آن چار سال مست راشد حسین ءِ متحدہ عرب امارت آن بیگواہ کریسہ شش تو آن پد بے قانودی پاکستان نا دو ٹیتننگا۔ نن داسکان انصاف کن ہروک اُن۔ متحدہ عرب امارات تون اوار پاکستان ننا ایلم ءِ قانودی و بندغی حق تننگ اف۔
او ودیک پارے کہ تدوکا چار سال آن نن کراچی و کوئٹہ پریس کلب آتا مونا برانز تون اوار عدالت آتیا ہم ہنانُن ولے ہچو گامگیج متنے بلکہبیگواہ غا بندغ آتیکن جوڑ مروک کمیشن ئٹ راشد نا لمّہ تون اوار ایلو بیگواہ آ بندغ آتا خاہوت آتا بےشرفی کننگک۔
اوار مروکاک پاریر کہ راشد حسین بلوچ 26 دسمبر 2018 آ متحدہ عرب امارات آن ہمونگان نا ڈھکوک ادارہ آتا دو آن اونا سیال آتامونا دزگیر کریسہ بیگواہ کننگاسس۔ راشد حسین بندغی حق آتا باسک ئسے اودے متحدہ عرب امارات نا ڈھکوک ادارہ آک پاکستانحکومت نا پاننگ آ زوراکی ئٹ بیگواہ کریر و شش تو اسکان بے ڈس ءُ جاگہ سے آ تخنگ آن پد قانودی وڑ ئٹ پاکستان نا دو ٹی تسرہراڑے او داسکان بیگواہ ءِ۔
ماہ زیب نا پاننگ ئس کہ اقوام متحدہ نا باہوٹی تیکن ادارہ تون اوار ایلو جہانی ادارہ آتے راشد حسین نا کیس ءِ رادہ کرینن، ایمنسٹیانٹرنیشنل متحدہ امارات نا پن آ اسہ دمدستی خواست اس ہم شنگ کریسس ولے اونا ہچو ورندی تننگ متو۔
او پارے کہ جہانی ادارہ آتا راشد حسین نا کیس ئنا بابت ئٹ چُپی کیہی سوج آتے ودی کننگ ءِ بلکہ اوفتا کارکردگی آن بندغ آکمایوس مننگ ءُ۔
او پارے کہ اقوام متحدہ بلوچستان ئٹ سیاسی و چاگڑدی شعبہ آتیان تعلقداری تخوکا بندغ آتون اوار ایلو بندغ آتا زوراکی نا بیگواہیتا نوٹس ہلیسہ تینا فرض ءِ ایسری ایتے۔
برانز ئٹ اوار مروکا تا پاننگ ئس کہ ریاست راشد آ ہرا دوبہ آتے خلکنے اوفتے چار سال آن ثابت کننگ کتنے۔ راشد ءِ عدالت آتیٹ ہتیسہسزا تننگ مرے اگہ ریاست ءِ تینا عدالت آتیا باور اف تو دا عدالت آتا تماشہ ءِ بند کننگ مرے۔
راشد حسین نا بیگواہی ءِ چار سال پورو مننگ آ اینو چاگڑدی حوالکاری ویب سائٹ ٹوئٹر آ #SaveRashidHussain نا ہیش ٹیگ توناوار چاہنداری مہم ہم چلیفنگا۔
اوغانستان نا صوبہ بدخشان ئٹ مروکا بمب تراک ئٹ صوبائی پولیس نا کماش خلنگا۔
صوبہ بدخشان نا بنجائی ہند فیض آباد ئٹ اینو سہب ئنا ہشت بجہ نا وخت آ بمب تراک ئٹ صوبائی پولیس کماش تون اوار مُسہ بندغخلنگار و چار ئنا ٹپی مننگ نا حوال ہم ارے۔
ہندی حوال تا رد ئٹ صوبہ کن طالبان نا پولیس کماش مولوی عبدالحق ابو عمر اسہ تراک ئسے ٹی خلنگانے۔ دا تراک اینو سہب ئنا ہشتنیم بجہ نا وخت آ فیض آباد شار ئٹ طالبان نا سیکورٹی کمانڈر نا اُرا نا مونا مسنے۔
خیال مرے کہ تدوکا سال طالبان نا کابل آ کوزہ آن پد طالبان و اونا سیوتی تیا اسہ وڑ جلہو مننگ ءِ ہرافتیان گیشتری نا ذمہ واری ءِداعش خراسان ارفیسہ بسنے۔
طالبان نا کابل آ کوزہ آن پد طالبان آ کہی وار جلہو مسنے، ہرافتٹ طالبان نا مخ تفی ءِ کروک اسکالر و ایلو فکری تپہ آتا بندغ آکخلنگانو، وا ہم طالبان حکومت آن پد دا اولیکو بڑزکو عہدیدار ءِ ہرا بمب تراک ئٹ خلنگانے۔
