ریکوڈک بل آ سیاسی چِک و تاڑ
دی بلوچستان پوسٹ – تیدری
حکمران سیوت ئٹ اوار سیاسی جماعت آک شرئی ریکوڈک بل آ مُخ تے تینا تفینو، انتیکہ پاکستان حکومت پیشن ملکی کان کنی کمپنی ءِ 10 بلین ڈالر نا تننگ آن بچنگ کن اسہ کسر اس کشسنگ کن ترندی تون کوشست کننگو۔ پاکستان نا سیاسی حالیت نازرک ءِ انتیکہ اولیکو وار اقتدار ئٹ ساڑی جماعت آتا سیوت پاکستان ڈیموکریٹک موومنٹ (PDM) ئٹ تَل آک پاش مسر ہرا ریکوڈک کان کنی نا منصوبہ نا رِدئٹ اِرا الّمی سیوتیک بنجائی کابینہ نا مجلس ئٹ بشخ ہلتور۔
پاکستان نا سروزیر، شہباز شریف اسہ مجلس ئسے نا صدارت ءِ کرے ہراٹی اِرا الّمی سیوتیک، بلوچستان نیشنل پارٹی مینگل و جمعیت علمائے اسلام برانز کریسہ مجلس ئٹ بشخ ہلتور۔ ہڑتوما جماعت آک تینا ساڑی مننگ ءِ پاش کننگ کن مجلس ئٹ بشخ ہلکر۔ پاکستانی سینٹ دو شمبے نا دے پیشن ملکی سرمایہ کاری (پروموشن اینڈ پروٹیکشن) بل 2022 نا موْکلی ءِ تس، ہراڑان ریکوڈک کانڑ پٹنگ نا منصوبہ نا موْکلی تننگا۔ واہم، دا بل ترند مونتس تا گواچی ءِ۔ دانا نغد کار آک نہ بیرہ اپوزیشن بلکن حکمران سیوت نا چِر ئٹ ہم اریر۔
چِک و تاڑی سیاسی حالیت
اسلام آباد و کوئٹہ نا سیاسی حالیت تدوک اِرا ہفتہ غان باسن ءِ۔ حالیت نا ترندی ءِ ماریسہ شہباز شریف تینا سیوتی تے باور کریفنگ کن بنجائی کابینہ نا مجلس ءِ خوائفنگ نا فیصلہ ءِ کرے کہ شرئی بل ئٹ بدلی کن زوت پارلیمنٹ ئٹ ہتنگو۔ ہڑتوما سیوتیک داڑان مُست کہ سر وزیر آ تینا ہیت ءِ سرکروسر مجلس اٹ اوار متور ولے ولدا مجلس اٹ بشخ ہلکر۔
بی این پی-مینگل و جے یو آئی-ف نا خیال ءِ کہ ریکوڈک بل، ہرا چاغی ئٹ مائننگ پروجیکٹ ءِ اسیکہ وا ہتو۔ بلوچستان نا مخلوق ءِ اوفتا حق آتیان دو خالی کیک۔ ہڑتوما جماعت آک پاریر کہ بل ئنا مسودہ و مونا ہتنگ آن مُست اوفتیتون صلہ کننگ متئو و باوری ہلنگتنے۔
کابینہ مجلس ئٹ ہڑتوما جماعت آک جتا جتا اوڑدئی کریر ہراڑے اوفک سیوت ءِ یلہ کننگ نا ٹِک آ پام کریر۔
وزیر حوالکار مریم اورنگزیب پارے کہ کابینہ سیوتی جماعت آتا بیم ءِ مُر کننگ و اوفتا باوری ءِ ہلنگ کن اسہ کمیٹی اس ہڈ تسونے۔ او کابینہ مجلس آن گڈ بیان ئٹ پارے کہ “کابینہ کمیٹی سیوتی جماعت آتا راہشون تیتون ہیت کرو، اوفتا باوری ہلو و اوفتا بیم ءِ مُر کننگ مرو۔ اسہ بدلی بِل اس زوت صلہ آن گڈ پارلیمنٹ ئٹ مونا ہتنگو۔”
چار شمبے نا دے کابینہ نا مجلس آن مالو بی این پی مینگل نا سرکماش اختر مینگل اسلام آباد ئٹ سروزیر شہباز شریف تون اوڑدئی کرے۔ اختر مینگل گمانی وڑئٹ سروزیر ءِ پارے کہ ٹیکسیشن، کانڑ پٹنگ و مڈی تا حق بنجاء ءِ تننگ آن سروزیر وزیر بلوچستان، قدوس بزنجو تون اونا “لانک” آن بیدس ہچس سلتو۔
ریکوڈک ٹائم لائن
ریکوڈک مائن اسہ منصوبہ بند کان کنی نا منصوبہ ئسے، ہرا بلوچستان نا علاقہ چاغی نا ریکوڈک خلق ٹی ءِ۔ دا جہان ئٹ خیسُن و مِس ئنا کُل آن بھلا کوڑ آتیان اسٹ ءِ، ہراٹی اسہ گمان ئسے نا رد ئٹ 5.9 بلین ٹن مِس ئنا مڈی و 0.41 فیصد درجہ بندی تون اوار 41.5 اونس خیسن ارے۔
1993 ئٹی، آسٹریا نا کان کنی کمپنی بی ایچ پی بلٹن و بلوچستان حکومت ریکوڈک ئٹی خیسن و مِس ئنا مڈی تے پٹنگ و کان کنی کن اسہ معاہدہ ئسے آ دستخط کریر، ہرادے چاغی ہلز ایکسپلوریشن جوائنٹ وینچر ایگریمنٹ (CHEJVA) پاننگک۔ CHEJVA نا رد ئٹ، کمپنی دا کان ءِ تیار کرو و اونا 75% ہولڈنگز نا خواجہ مرو، و بلوچستان حکومت 25% زیاتی رائلٹی تننگ تون اوار ایلو 25% نا خواجہ مرو۔
2000 ئٹی، بی ایچ پی تینا ذمہ واری تے اسہ پین کمپنی سے تس، ہرادے دوارہ 2006 ٹی ٹیتھیان کاپر کمپنی (TCC) دوئی کرے۔ اندا سال، CHEJVA ءِ بلوچستان ہائی کورٹ ئٹی چیلنج کننگا، ہرادے ایسر کننگا۔ 2011 ٹی، ٹی سی سی بلوچستان حکومت تون مائننگ لیز نا خواست کرے، ہرادے معاہدہ نا منہ ٹِک آتیا جیڑہ آتیا ایسر کننگا۔
ٹی سی سی 2011 ٹی دا جیڑہ ءِ جہانی بینک آ درے، ہراٹی بلوچستان حکومت نا کنڈ آن ریکوڈک ٹی کان کنی کننگ نا موْکل تننگ آن نمن مننگ آن گڈ 11.43 بلین ڈالر نا نسخان نا ڈنڈ نا خواست کننگا۔ کمپنی دلیل تس کہ او مالو آن 220 ملین ڈالر نا سرمایہ کاری کرینے۔
پاکستان نا سپریم کورٹ بلوچستان ہائی کورٹ نا فیصلہ ءِ اِرا گنا کرے و CHEJVA ءِ دا بنداو آ کالعدم پارے کہ بلوچستان حکومت معاہدہ آ دستخط کریسہ تینا قانودی سیم آتیان مُستی ہنانے۔ 2017 ٹی، ورلڈ بینک ٹربیونل فیصلہ کرے کہ پاکستان لیز ئٹی ودکی آن بے قانودی وڑ ئٹ نمن مریسہ معاہدہ آن چپ ہنانے و او ڈنڈ تننگ نا ذمہ وار ءِ۔ 2019 ٹی، ٹریبونل TCC ءِ 5.97 بلین ڈالر تس۔
پاکستانی حکومت ٹی سی سی تون تران کرے و عدالت آن پیشن اسہ معاہدہ ئسے آ دستخط کرے ہراڑان اوفتے ریکوڈک پراجیکٹ ءِ تیار کننگ نا حق تننگا۔ Antofagasta پاکستانی شیئر ہولڈر آتا کنڈ آن تننگوکا 900 ملین ڈالر نا بدل آ دا منصوبہ آن دو کشنگ نا فیصلہ کرے۔ تعمیر نو نا منصوبہ نا رد ئٹ بیرک گولڈ بنجائی و بلوچستان حکومت آتا و مُسہ سرکاری کمپنی تتون 50 درسد شریکدار مرو۔
بنجاہ نا سیوتی و اپوزیشن آن بے پامی
ساڑی حکومت ایف آئی بل 2022 نا صلہ ءِ مونا ہیس ہرادے پاکستان نا عدالت عظمیٰ قانودی و راست پارے۔ پاکستانی سینیٹ دو شمبے نا دے دا بل ئنا موْکلی تس، ہراڑان ریکوڈک ٹی کان کنی نا منصوبہ نا بحالی نا کسر ساف مس۔ واہم، دا بل ءِ اسلام آباد و شال ہڑتوما تیٹ تینا مخالف آک رسینگار۔
10 دسمبر آ، بلوچستان اسمبلی اِرا قرارداد منظور کرے، ہرافتیٹ ریکوڈک پراجیکٹ ٹی ٹیکس ئنا منہ اختیار بنجائی حکومت ءِ تننگا، ہراڑان اپوزیشن جماعت آک سخت سوختہ مسر۔ حزب اختلاف نا جماعت آک دا قرارداد نا برخلاف برانز برجاہ تخوک ءُ، اوفتا پاننگ ءِ کہ اونا منظوری آن حکومت ریکوڈک منصوبہ ءِ پاکستان ءِ بہا کرینے۔
سروزیر بلوچستان قدوس بزنجو نا پاننگ ءِ کہ او قرارداد آ مونی ہننگ آن مُست اپوزیشن جماعت آتے باور ئٹ ایسوسر، اپوزیشن دا دعویٰ آن نمن مسنے۔
چار شمبے نا دے بلوچستان اسمبلی نا کوکار نا مجلس ئٹ، اپوزیشن اسمبلی باسک آک حکومت آ “نن ئنا تارمئی ٹی قرارداد پاس کننگ” آ نغد کاری کریر۔ بی این پی مینگل نا اکبر خان مینگل پارے کہ بلوچستان آن راہبندی اختیار آتے بنجاہ ءِ تننگ قابل مذمت عمل ئسے۔ او پارے کہ بلوچستان نا بندغ آتے بنجائی مڈی تا حق و کوالخواہی اف، اوفتا کم از کم تینا مڈی تیا تو حق مرے۔
جے یو آئی-ف نا قانود ساز آک ہم قرارداد آتیا نغد کاری کریر و پاریر کہ دافتا موْکلی آن بلوچستان ءِ ہژدہمیکو ترمیم نا رد ئٹ رسینگوک کوالخواہی تیان پد بٹنگانے۔
ایوان ئٹ کورم پورو مفننگ نا سوب آن اسمبلی نا کارروائی 16 دسمبر اسکان پد کننگا۔
اندن، چار شمبے نا دے، بنجائی کابینہ نا مجلس نا بائیکاٹ آن اسہ سے پد، بی این پی نا سروک اختر مینگل اوڑدئی حکومت ءِ النگ نا بابت ئٹ ایسری فیصلہ کننگ کن تینا پارٹی نا سینٹرل ایگزیکٹو کمیٹی نا مجلس ءِ خواہفنگ نا فیصلہ کرے۔ مینگل پارےکہ بنجائی حکومت سینیٹ و قومی اسمبلی ٹی منظور مروکا بل آتیا اوفتا پارٹی ءِ باور ئٹ ہتنگ متنے۔
سروزیر بلوچستان نا ہیت
اسمبلی نا توار توار آن گڈ سروزیر میڈیا تون ہیت کریسہ پارے کہ اونا حکومت دا منصوبہ ءِ بحال کننگ کن بھاز خواری کرینے۔ او پارے کہ دا منصوبہ آن بلوچستان نا خلقت ءِ سواد رسینگو، چنکا چنکا سیاسی ویل تا سوب آن داٹی ہڑاند شاغنگپ۔
او پارے کہ پیشن نا سرمایہ کاری بلوچستان نا ویل تا درمان ءِ و ریکوڈک منصوبہ نا دا مسخت نا کنڈ آ اسہ اہم گام ئسے۔ اندن راج دوست آک و بلوچ شاری تا بھازیک قدوس بزنجو تون شرہ کریر۔ اوفتا پاننگ ئس کہ دا اولیکو وار اف کہ ںنجائی حکومت بلوچستان نا قدرتی مڈی تا بدلہ ٹی دیمروئی و شونداری نا سوغند ارفنگے، ولے “بلوچستان ہر وخت آنبار غریب و ماندہ ءِ۔”
اپوزیشن نا پیشن مخ تفی
دا وخت آ متحدہ قومی موومنٹ (ایم کیو ایم) نا سروک الطاف حسین ہم اپوزیشن قانود ساز آتون اوار مس۔ او اسہ بیان اسیٹ پارے کہ ریکوڈک بل پاکستان ءِ پرغنگ آنبار ءِ ہرا ترند مذمت نا لائخ ءِ۔
او پارے کہ سینٹ اسہ بل ئس منظور کریسہ بلوچستان نا حق آتے بنجاہ ءِ تس۔ ایم کیو ایم نا سروک پارے کہ بلوچستان ءِ ‘صوبہ’ آن ایسر کریسہ کالونی نا پن تننگے۔
او پارے کہ سپریم کورٹ آف پاکستان ایف آئی بل 2022 نا منظوری تریسہ ہمو معصوم بلوچ آتا ٹپ آتیا بے چٹ تسنے، ہرافتا ودشتی حق آ ہر وخت داڑیلی کننگانے۔ او پارے کہ دا زوراکی ئسے، و ای دا کُبین آ پاس ئٹ بلوچستان نا خلقت تون اوار سلوک اُٹ۔
خنتے آن چپ کروک آ گڑا
دا غٹ ڈرامہ نا وخت سپریم کورٹ بار ایسوسی ایشن نا مسکوہی کماش امان اللہ کنرانی بلوچستان نا سیاست خنتے آن چپ کروک ولے کل آن اہم گڑا یعنی شورش نا کنڈ آ پام تس۔ امان اللہ کنرانی ریکوڈک آ سپریم کورٹ نا فیصلہ ءِ “نا اومیت و خُلیس” نا پن تس۔ او 10 دسمبر آ اسہ میڈیا بیان اسیٹ پارے کہ پاکستان نا سپریم کورٹ (ایس سی) نا جسٹس منیر نا رد فیصلہ ہنوک وخت ئٹ دے ٹکی پاکستان بنگلہ دیش نا یکہ مننگ نا کسر تے ملاسس، و ریکوڈک آ سپریم کورٹ نا ساڑی فیصلہ بلوچستان ٹی برجاء “مزاحمتی جنز” ءِ کمک ترو، ہرانا بروک وخت ئٹ ترند ءُ نتیجہ پیشتمنگ کیرہ۔
او پارے کہ ملک نا سپریم کورٹ تیوہ تاریخ ئٹ متنازعہ کڑد ئس ایسری تریسہ بسنے۔ ریکوڈک منصوبہ آ عدالت نا فیصلہ تعصب آن پُر و نا انصافی ئسے۔
“26 اگست 2006 آ نواب اکبر بگٹی ءِ تراتانی نا مَش تا تہٹی ٹک کننگا و دا سرپد مسکہ کہ صوبہ ٹی امن ہتنگانے ولے تدوکا اِرا دہائی نا تاریخ پائک کہ نن امن آن بھاز مُر ان۔” امان اللہ کنرانی خبڑدار کرے کہ بلوچستان مالو آن بھس کاری نا پلویڑ ٹی ءِ و ملک ئٹ جوانو توار مفننگ آن دانا ویل آتے ڈھکنگ مریک ولے خاخر لگیسہ کرو ہرا نا زراب آک ملک ءِ تینا پلویڑ ئٹ ہلنگ کیرہ۔
دا ہیت ذکر ئنا لائخ ءِ کہ بلوچستان ئٹ تدوکا اِرا دہائی آن آجوئی نا جنز برجاء ءِ۔ ہرا کہ 1948 آن گڈ پنچمیکو و مُرغنا شورش ءِ، ہرا بلوچستان نا پاکستان تون اواری نا سال ءِ، اودے بلوچ آجوئی دوست ٹولیک تینا ڈغار آ “بے قانودی و زوراکی ئٹ قوضہ” پن کیرہ۔
امان اللہ کنرانی نا خُلیس آک گواچن آن مُر افس، انتئے کہ بلوچ آجوئی دوست سلاء بند ٹولی تا اسہ کل آن سلوک آ ہیت دادے کہ پاکستانی ریاست بیرہ اوفتا قدرتی مڈی تے لٹ و پل کننگ ءِ و ہستمند آ بلوچستان و اونا الس ءِ غریب و نیست تخانے۔ زند نا بنداوی آسراتیک و بلوچستان دا دعویٰ تا درشانی ءِ کیرہ۔ خواننگ، سڑک، دارو درمان نا آسراتی تیان ہلیس پوریا و بنداوی ڈھانچہ اسکان خطہ غریبی و کوالخواہ تا بے پامی ءِ پاش کیک۔
اندن بلوچ سلاء بند ٹولیک پیشن ملکی سرمایہ کار و ملک آتے خبڑدار کریسہ بسنو کہ او بلوچستان ئٹ “لٹ و پل نا منصوبہ آتیٹ” پاکستان تون ہمکوپہ مفس۔ دا ٹولیک تیوہ بلوچستان ئٹ تدوکا اِرا دہائی آن سی پیک و ایلو منصوبہ تیا بھلو کچ اسیٹ جلہو ہم کننگ ءُ۔
مارچ نا توہ ئٹ، بلوچ راجی آجوئی سنگر (BRAS) ہرا کہ کہی بلوچ سلاء بند ٹولی تا سیوتی تنظیم ءِ، خاص وڑ ئٹ بیرک گولڈ کارپوریشن ءِ تڑی تسوسس کہ او ریکوڈک آن “مُر مرے۔” تنظیم اسہ بیان اسیٹ پارے کہ ” نن بیرک گولڈ کارپوریشن تون کوزہ گیر پاکستان نا گپ و تران آن تیوہ نمن کینہ، و نن بلوچ ڈغار و او نا مڈی تا رکھ اکن ایسری گام اسکان ہنون۔”
سرگڑدانی آ
ریکوڈک نا ماملہ پاکستان ءِ سرگڑدانی آ ایسنے۔ اگہ طاغتور بنجاہ و سپریم کورٹ تینا فیصلہ ءِ پدا ہلیر و بلوچستان نا ویل آتیا پام تریسہ تاریخ اس جوڑ کیر گڑا ملک ءِ کم و ود 10 ارب ڈالر نا نسخان ارفوئی تمو۔ و ارٹمیکو دروشم ٹی، حکمران ٹولی تینا اِرا ہمکوپہ تے گوہنگ تون اوار “آجوئی نا جنز ءِ لمبہ تننگ کیک۔”
بلوچستان نا سیاسی ٹولیک، خاص وڑ ئٹ پارلیمنٹ ئٹ تولوک راج دوست ٹولی، بلوچستان نیشنل پارٹی کن ہم حالیت ڈکھیا ءِ۔ اگہ بی این پی نا خواست آک مننگتور گڑا او برجاء حکومت ٹی اسہ سوگوْ مخ تفی ئس و تینا سوگوْ پوزیشن ءِ یلہ کرو۔ ولے اگہ پارٹی بنجاہ تون گپ و تران کیک گڑا او دوارہ بلوچستان نا بندغ آتیٹ تینا سوگوْ جاگہ ءِ گم کرو و اودے بنیات پرست و “آجوئی دوست” آتا کنڈ آن ترند نغدکاری تون مون تروئی تمو۔
