بلوچستان نا بنجائی شار شال ئٹی بلوچ سیاسی باسک آتا زوراکی نا بیگواہی تا برخلاف وائس فار بلوچ مسنگ پرسنز نا پریس کلب نامونا برانزی کیمپ اینو 4889 می دے ہم برجاء ئس۔

دا وخت آ بی ایس او نا سینئر وائس چیئرمین محمد اشرف بلوچ، جنرل سیکریٹری ماما عظیم بلوچ و ایلو کیمپ آ بریسہ خاہوت آتوناواری نا درشانی کریر۔

تنظیم نا کمک کماش ماما قدیر بلوچ پارے کہ بلوچستان آ پاکستان تینا لڑزوکا کوزہ گیریت ءِ دو آن دننگ ءِ، بلوچ وطن آ برجاء جمہوری،سیاسی جہد ءِ الس ئنا مخ تفی دوئی ءِ، نوآبادیاتی ساکھ ئنا حالیت و تیوہ بلوچستان ئٹ سیاسی شعوری کاریم تیٹ ودکی ہراڑےریاستی راج نا مونا چیلنج آتا سوب آن او معاشی بد حالی و سخت توانائی نیستی تون مون تننگ ءُ۔

او پارے کہ اینو بلوچ زالبول آک تینا ایلم تیکن اولیکو چِر ئٹ سلوک ءُ و دا جہد ءِ سوگو کننگ ءُ۔

ماما قدیر بلوچ پارے کہ بلوچ خوانندہ و سیاسی باسک آک بلوچ زالبول تا جہد ئٹ اوفتون اوار مریر ہرا تینا بندغ آتے ریاستی اذیت گاہتیان کشنگ کن جہد کننگ ءُ۔

بلوچستان نا ضلع کیچ و گوادر نا نیامیکو علاقہ سائیجی و دڑامب ئٹ فوجی آپریشن مسٹمیکو دے ہم برجا ءِ، برجا فوجی آپریشن ئٹپیادہ فوجی ٹولی تیان بیدس گن شپ ہیلی کاپٹر و ڈرون طیارہ غاک ہم بشخ ہلنگ ءُ۔

داڑان بیدس دشت نا کہی علاقہ تیٹ فوجی کارندہ تا سخت چیکنگ ہم برجا ءِ، ہرافتیٹ زرین بگ، ملایانی نگور، چاتی بند، دروار،گورپاگ بشولی، گومازی، تگاد گور، مک سر اوار ءُ۔

برجا آپریشن ئٹ داسکان ہچو جانی نسخان یا دزگیری نا حوال رسینگتنے۔

یاتی مرے کہ پن کروک فوجی آپریشن نا بناء ہموتم کننگا ہراتم گوادر نا علاقہ ٹی بلوچستان لبریشن فرنٹ اسہ جلہو اسیٹ فورسزکارندہ تے مرگ ئنا گواچی کریسہ اوفتا سلاء تے قوضہ کریسس۔

بلوچستان لبریشن فرنٹ نا رد ئٹ سرمچار آک گوادر نا علاقہ کنڈا سول ٹی پاکستانی لشکر نا راشن دروک ٹرک آتا قافلہ آ بھلا سلاءتیٹ جلہو کریر ہراڑان ٹرک ئٹی سوار مُسہ فوجی کارندہ مرگ ئنا گواچی مسر۔ اوفتا سلاء تے دوئی کننگ آن گڈ سرمچار آک دژمن فوجئنا ٹرک ءِ خاخر تسر۔ دا قافلہ ٹی اوار اسہ پین گاڑی سے ہم ٹک کننگا ہرا ٹی سوار مُسہ کارندہ مرگ ئنا گواچی مسر و ڈرائیور ٹپیحالیت ٹی نرّنگ ئٹ سرسہب مس۔

پن کروک جلہو و آپریشن نا باروٹ پاکستانی لشکر داسکان ہچو ہیت ئس مونا ہتنے، واہم یاتی مرے کہ برجا منہ وخت آن بلوچستان ٹیپاکستانی لشکر آ مروک جلہو آتیٹ اسہ کنڈ آ ہراڑے فوجی کارندہ غاک مرگ ئنا گواچی مریرہ ہرافتا پک اوفتا خاہوت و علاقہ نا بندغ آتاکنڈ آن کننگک اندن پاکستانی لشکر نا شعبہ تعلقات عامہ نا ہیت مونا بفک۔

تدوکا دے تیٹ ضلع کیچ ئٹ اندا وڑ نا تدینیک مونا بسنو ہراڑے مرگ ئنا گواچی مروک کارندہ تا پک ءِ اوفتا خاہوت و علاقہ نا بندغ آککرینو اندن پاکستانی لشکر نا ہیت مونا بتنے۔

سینیٹ نا جوڑ کروک کمیٹی پیٹرولیم ءِ بریفنگ تریسہ وزارت نا کوالخواک پاریر کہ جتا گیس کمپنی تے حکومت ءِ 795 ارب روپئی تروئیئس ہرافتیان مُسہ نیم سد ارب روپئی رسینگانے۔

کمیٹی مجلس ئٹ وزیر پیٹرولیم نا چرجوئی ئٹ ساڑی مفننگ آ  کمیٹی سوختئی نا درشانی کرے۔ چیئرمین کمیٹی پارے  کہ اگہ بروکامجلس ئٹ بنجائی وزیر ساڑی متو تو اونا برخلاف چیئرمین سینیٹ ءِ پارون۔

دو شمبے نا دے سینیٹ نا پیٹرولیم کن اڈ تروک کمیٹی نا مجلس چیئرمین کمیٹی کہدہ بابر نا سروکی ٹی اڈ تننگا۔ مجلس بناء مننگ تونکمیٹی باسک و پی ٹی آئی نا سروک سینیٹر فدا محمد پارے کہ مجلس ئٹ فیصلہ مسس کہ اگہ بنجائی وزیر ساڑی متو تو مجلس مفروہرا نا ورندی ٹی چیئرمین کمیٹی پارے کہ ای پاریسٹ کہ اگہ وزیر یا سیکرٹری بتوس تو مجلس مفرو ولے بنجائی سیکرٹری اینو بسنے۔

مجلس ءِ بریفنگ تریسہ وزارت نا کوالخواک پاریر کہ جتا گیس کمپنی تے حکومت نا ہفت سد ارب روپئی تروئی ءِ ہرافتیان مُسہ نیم سدارب رسینگانے و 448 ارب روپئی داسکان ہلوئی ءِ۔

کمیٹی باسک محن عزیز دا حساب ءِ رد پارے و مجلس ءِ بریفنگ تریسہ پاننگا کہ خضدار ئٹ ہم گیس خننگانے ولے اوڑے سکیورٹی وایمنی نا ویل ارے ہراڑا ہندی سروک اختر مینگل تون صلہ کننگا۔

اختر مینگل نا پاننگ ئس کہ اوڑے ہندی بندغ آتے بھرتی کریسہ اسہ فورس اس جوڑ کننگ مرے ہرا ٹی سکیورٹی ادارہ تا ہچو عمل دخلاس مف۔

چیئرمین کمیٹی پارے کہ پاکستان کھرب آ روپئی تے ایلو ڈیہہ تیان گیس ہتنگ آ خرچ کیک ولے ہندی گیس ءِ کارمرز کریسہ نن قومی مڈیءِ بچفنگ کینہ۔ دا جیڑہ ءِ مجلس آن پیشن اوار ایسر کینہ۔

ڈسٹرکٹ ہیلتھ کمیونیکیشن سپورٹ آفیسر تاج محمد سنجرانی تینا چنک سن مسڑ تون اوار روڈ شکست ئٹ بیران مس۔

حوال تا رد ئٹ تاج محمد سنجرانی تینا خاہوت تون اوار دالبندین آن نوکنڈی آ ہننگ ئس کہ گزن نا علاقہ ٹی اوفتا کار زامیاد گاڑی سےتون ڈک لگا۔

تدینی ٹی تاج محمد سنجرانی و اونا چنک سن مسڑ بیران مسر و اونا اُرا گودی ٹپی مس۔

ایلو کنڈ آن میونسپل کمیٹی سوراب آن پاکستان پیپلز پارٹی نا باسک کن پن مروک اومیت وار ماسٹر ظہور احمد ریکی شسکت ئٹ ٹپیمس۔

حوال تا رد ئٹ ماسٹر ظہور احمد ریکی نا اُلاخ خاہوت تون اوار شال آن سوراب آ بننگ نا وخت آ قلات نا ہند آ شکست نا گواچی مس۔

اوفتا اُلاخ قلات نا ہند آ اسہ ٹرالر ئسے تون ڈک لگا ہرا ٹی ماسٹر ظہور احمد ٹپی مس۔ اودے بنداوی جانجوڑی کمک تننگ آن گڈ ودیکجانجوڑی کن کوئٹہ آ رادہ کننگا۔

حوال تا رد ئٹ لورالائی نا علاقہ ٹی پشتونخوا میپ نا راہشون سردار اشرف خان کاکڑ آ خونی جلہو کننگا، جلہو آن گڈ سردار اشرفخان کاکڑ ہسپتال آ سر کننگا ہراڑے ٹپی حالیت ئٹ ساہ تس۔

ویل آن گڈ بھلو کچ اسیٹ پارٹی باسک و راہشون آک اسپتال نا پیشن آ مچ مسر، پشتونخوا میپ نا راہشون آک و باسک آک خون ئنامذمت و ویل ئنا ڈوہدار آتے دمدستی دزگیری کننگ نا خواست ءِ کریر۔

لورالائی ویل ئٹی پشتونخوا میپ نا راہشون سردار اشرف خان کاکڑ نا ڈرائیور ہم ٹپی مسنے۔ پولیس جہلو کروک آتا پٹ و پول ءِ بناءکرینے۔

حوال تا رد ئٹ ایران ہمسایہ ملک آتون اقتصادی سفارت کاری ءِ تالان کننگ کن خاص ءُ گام ارفے۔

ایرانی سفارت خانہ نا ترجمان نا رد ئٹ ایران گچین سوداگری معاہدہ یا پریفر نشل ٹریڈ ایگریمنٹ ( پی ٹی اے ) نا رد ئٹ پاکستان توننوشت تیوہ گڑا تا ہتنگ آ رکھ ءِ ایسر کرے۔

گیشتر حوال تا رد ئٹ پاکستان و ایران  پی ٹی اے معاہدہ آ مارچ 2004 ٹی دستخط کریسر و بنجائی کابینہ پریفرنشل ٹریڈ ایگریمنٹنا مئی 2005 ئٹی شابیتی ءِ کریسس اندن ستمبر 2006 ئٹی پاکستان ایران گچین سوداگری معاہدہ فعال کننگاسس۔

اوغانستان نا بنجائی شار کابل نا علاقہ شار نو ٹی اسہ ہوٹل ئسے آ جلہو مس ۔

کابل آن رسینگوک آ حوال تا ردئٹ جلہو ہرا ہوٹل آ مس اوٹی چینی سرمایہ کار آک رہینگارہ۔

تالبان داسکان دا جلہو نا بارو ئٹ ہچو ہیت کتنے ۔ داڑان بیدس دا جلہو ئٹ جانی نسخان نا بارو ئٹ ہم ہچو حوال رسینگتنے ۔

حوال تِروک ادارہ روئٹرز نا پاننگ ءِ کہ جلہو شار نو نا گیسٹ ہاؤس ٹی مسنے ہراڑے چینی سرمایہ کار آک رہینگارہ۔

یاتی مرے کہ کابل ٹی چینی سفیر وانگ یو تالبان حکومت ءِ پاریسس کہ او چینی سفارت خانہ نا سیکورٹی آ زیات پام ایتِر ۔

وانگ یو دا خواست ءِ درو طالبان حکومت نا نائب وزیر خارجہ شیر محمد عباس ستانکزئی تون اوڑدئی نا وخت آ کریسس۔

تدوکا دے تیٹ کابل ٹی پاکستانی سفارت خانہ ٹی سُم کاری نا سوب آن پاکستان نا ناظم الامور نا اسہ گھاٹ اس ٹپی مسس ولے سفیررکھوک ئس۔

داکان مُست کابل ئٹی روسی سفارت خانہ نا مونا تراک ئسے ٹی اِرا روسی سفارت کار خلنگ مسوسر۔

تالبان حکومت نا وزارت خارجہ نا پاننگ ءِ کہ ستانکزئی چینی سفیر ءِ باور کرفینے کہ اوغانستان نا سرزمین ہچو ڈیہہ ئسے نا برخلافکاریم ئٹ ہتنگ مفرو۔

جاندمی افریقی ڈیہہ زیمبیا ٹی اسہ کسر ئسے نا کرک آ بیست و ہفت بندغ نا جونک خننگانو۔ جون تا بارو ئٹ گمان ارے کہ دا بندغ آتاتعلقداری ایتھوپیا آن ءِ۔

زیمبین پولیس نا پاننگ ئس کہ بنجائی شار نا خڑک ئنا علاقہ ٹی اسہ کشت و کشاری ڈغار ئسے ٹی کسر نا کرک آ بیست و ہفت بندغنا جونک خننگانو ہرافتا بابت ئٹ گمان مریک کہ او ایتھوپیا نا شاری ءُ۔

پولیس نا رد ئٹ جون تا خڑک آ باز خراب حالیت ٹی اسہ زندہ ءُ بندغ اس ہم مسنے ہرادے دمدستی جانجوڑی کمک کن اسپتال آ رادہکننگانے ولے اونا حالیت باز نہ گیگ ءِ۔

پولیس نا پاننگ ءِ کہ غٹ بیران مروکا نرینہ ءُ و اوفتا سن بیست آن سی و ہشت نا نیام ئٹ ءِ۔ گمان ارے کہ غٹ بندغ آک بین، ملاسی ونزوری نا سوب آن کسکنو۔

بلوچستان نا ضلع کیچ نا شار تربت ٹی پاکستانی لشکر نا چوکی آ چغلی بمب ئٹ جلہو کننگانے۔ اندن جلہو آن گڈ ایف سی شار نا غٹہن و بر نا کسر تے بند کریسہ سخت پٹنگ ءِ بناء کرینے۔

حوال تا رد ئٹ نادرست آ بندغ آک شار نا تہٹی تعلیمی چوک آ ٹہیفوک ایف سی نا چوکی آ چغلی بمب ئٹ جلہو کریر ہرا ترند ءُ تراکاسیٹ ترخا۔

خن خنوک شاہد آتا رد ئٹ تراک آن چیک پوسٹ ءِ نسخان رسینگانے اندن ایف سی کسر تیا ہن و بر ءِ بند کریسہ پٹنگ ءِ بناء کرینے۔

علاقئی مخلوق نا ردئٹ فورس ءِ جانی نسخان رسینگانے ولے دا بابت کوالخواک داسکان ہچ پاتنو۔

چمن نا علاقہ ڈیورنڈ لائن آ اوغان فورسز و پاکستانی لشکر نا نیام ئٹ جھڑپ مسنے۔ دا وخت اسکان رسینگوک آ حوال تا رد ئٹ جھڑپئٹی ہفت بندغ بیران و سی ئنا کچ ٹپی مسنو۔

پاکستانی کوالخواک دوبہ خلکنو کہ جھڑپ اوغان فورسز آتا کنڈ آن السی آبادی تیا گولہ باری آن گڈ بناء مسنے ولے اوغان کوالخواہ تاکنڈ آن داسکان ہچو بیان مونا بتنے۔

راجی حوالکاری میڈیا آ ٹپی مروک و ڈغار آ تموک جون تا عکس آک تالان ءُ، و ہندی حوال تا رد ئٹ گیشتر اوغان فورسز آتا کارندہ آک ہمتدینی نا ہند آ ہِننگ آ خننگ مسنو۔

سول اسپتال چمن ئٹی دا وخت اسکان ہفت جون و بیست و چار ٹپی سر کننگانے، و خلیس نا درشانی مننگ ءِ کہ ٹپی و بیران مروکا تاکچ زیات مننگ کیک۔

گڈیکو حوال تا رد ئٹ سُم کاری نا لڑ داسکان برجاء ءِ و ہڑتوم آ کنڈ آن حالیت نہ گیگ ءِ و مخلوق ئٹ خلیس و بیم تالان مسنے۔

خیال مرے کہ تدوکا تو نومبر نا سینزدہ تاریخ آ اوغان سیم آن نادرست آ سلاء بند بندغ آتا سُم کاری آن پاکستانی لشکر نا اسہ کارندہاس مرگ ئنا گواچی و اِرٹ ٹپی مسوسر۔

تدوکا تو مروکا تدینی نا بابت ئٹ پاکستانی کوالخواک دوبہ خلکسر کہ پاکستانی لشکر آ اوغان طالبان نا کارندہ آک جلہو کریسر ولےاوغان کوالخواہ تا رد ئٹ جلہو کار آک تالبان الوسر و اوفتے پٹَنگ برجاء ءِ۔