کاؤنٹر ٹیررازم ڈیپارٹمنٹ تینا بےسہبی ءِ ڈھکیسہ چنا غا دروغ اتون تفوک ءُ کیس خلکنے- خاہوت
سی ٹی ڈی نا کنڈ آن مسکوہی چیف جسٹس محمد نور مسکانزئی نا خون ئنا دوبہ ٹی دزگیر پاش مروک شفقت یلانزئی و زوراکی ئٹ بیگواہ عجاب یلانزئی نا خاہوت آتا کنڈ آن خاران ئٹ برانز و دپدرشانی کننگا۔
برانزی تیٹ شفقت یلانزئی و عجاب یلانزئی نا خاہوت آتون اوار علاقہ نا سیاسی و چاگڑدی تنظیم تا باسک آک بھلو کچ اسیٹ اوار مسر۔
برانزی تا پاننگ ئس کہ سی ٹی ڈی تدوکا دے تیٹ شفقت یلانزئی ءِ مونا ہتیسہ اوڑا دروغ کیس خلک شفقت ءِ منہ دے مالو اونا پین اِرا سیال جابر یلانزئی و نجیب یلانزئی تون اوار فورسز و ڈھکوک ادارہ تا کارندہ غاک خاران آن دزگیر ئٹ ہلنگ آن گڈ بیگواہ کریسر۔
اوفک پاریر کہ شفقت یلانزئی آن گڈ اونا اسہ پین سیال عجاب یلانزئی ءِ فورسز و ڈھکوک ادارہ غاک زوراکی ئٹ بیگواہ کرینو خُلیس ءِ کہ اودے ہم اسہ دروغ کیس اسیٹ گٹ کریسہ سی ٹی ڈی نا کنڈ آن دروغ بیان شینک کننگو۔
برانزی تا پاننگ ئس کہ خاران ئٹ ہڑدے کاؤنٹر ٹیررازم ڈیپارٹمنٹ نا کنڈ آن بیدس عدالتی و قانودی کاریمک برجاء ءُ ورنا تے بیگواہ کننگک پدا اوفتیا دروغ کیس خلیسہ وختس اوفتے دروغ نا مونتس ئٹ خون کننگ تو وختس تینا بےسہبی و نالائخی ءِ ڈھکیسہ اوفتے دروغ کیس ئٹ گٹ کننگک۔
یاتی مرے کاؤنٹر ٹیررازم ڈیپارٹمنٹ تدوکا دے تیٹ خاران ئٹ مرگ ئنا گواچی مروک مسکوہی چیف جسٹس محمد نور مسکانزئی نا خون ئنا دوبہ ٹی اسہ بندغ ئسے دزگیر کننگ نا دعوی کریسس۔
سی ٹی ڈی نا رد ئٹ دزگیر مروک بندغ نا تعلقداری بلوچ آجوئی خواہوک سلاء بند تنظیم آن ءِ ہرا مسکوہی چیف جسٹس بلوچستان محمد نور مسکانزئی نا خون آن بیدس ایلو کارروائی تیٹ اوار مسنے۔ کاؤنٹر ٹیررازم ڈیپارٹمنٹ دزگیر مروک بندغ نا چاہنداری ءِ شفقت یلانزئی عرف دلاور نا پن ئٹ کریسس۔
سی ٹی ڈی نا کنڈ آن دزگیر پاش مروک شفقت یلانزئی نا باوہ تدوکا دے تینا اسہ بیان اسیٹ پاریسس کہ اونا مار ءِ 23 اکتوبر نا نن گواش روڈ خاران آن اونا ایلو سیال جابر علی یلانزئی و نجیب اللہ یلانزئی تون اوار بیگواہ کننگا ہرا نا حوالی رپورٹ ءِ درج کننگ کن نن خاران تھانہ ٹی خواست کریسن 26 اکتوبر آ مار تون اوار بیگواہ جابر یلانزئی و نجیب یلانزئی ءِ یلہ کننگا اندن شفقت یلانزئی ءِ یلہ کننگتو۔
او پارے کہ شفقت یلانزئی آ ہرا دوبہ تے خلنگانے او رد و دروغ ءُ، بیدس سوب آن خاہوت ءِ فریشان کننگک، شفقت یلانزئی اسہ معصوم ءُ مار ئسے ہرا نا سن 19 سال ءِ ہرا برجاء وخت ئٹ انٹرمیڈیٹ نا امتحان تے جواننگا نمبر تیٹ پاس کریسس۔
اونا باوہ نا پاننگ ئس کہ شفقت ہڑدے شام نا نماز نا وخت آ اُرا غا بسکہ وختس اگہ ہُرے کریکہ گڑا تیوہ خاہوت فریشان مسکہ، ای انصاف نا خواہندار اُٹ چیف جسٹس، کور کمانڈر، وزیر اعلی و ایلو کوالخواک کنے انصاف ایتر شفقت یلانزئی و اونا خاہوت ءِ وے کروک ڈوہ تا سزا تفس۔
شفقت نا باوہ ودیک پارے کہ ای غریب ءُ خاہوت ئسے آن تعلقداری تخیوہ، پرچون نا چنکو دوکان ئسے ہراڑان ڈکھیائی ئٹ دے تے گدریفوہ، شفقت داسکان چنا ئسے اوڑا دنو سوگو ءُ دوبہ خلیسہ ننے اذیت نا گواچی کننگک، ننے انصاف تننگ مرے۔
