ہار و نوکاپ نا سوب آن بجلی نا ٹاور آک تمانو اندن فائبر آپٹک کیبل آتے دیر درینے ہرا نا سوب آن بلوچستان نا جتا شار تیٹ بجلی وانٹرنیٹ نا نیستی ءِ۔

ترجمان کیسکو نا رد ئٹ ٹاور آتا تمنگ آن خضدار ٹرانسمیشن لائن آن بجلی نا سپلائی بند مسنے، ہراڑان بلوچستان نا 27 گرڈاسٹیشنآتے بجلی تننگ بند ءِ، و کیسکو نا سسٹم ئٹ 700 میگاواٹ برقی نیستی ارے۔

ترجمان کیسکو نا پاننگ ءِ کہ 220 کے وی سبی کوئٹہ و 132 کے وی سبی کوئٹہ ٹرانسمیشن لائن آن بجلی تننگ نا عمل فلحال بند ءِ،بحالی کن بولان نا علاقہ پیر غیب آن ڈھاڑر اسکان پیڑرولنگ بناء کننگانے ولے زمینی کسر تا بند مننگ آن پیٹرولنگ و بجلی نا بحالی ٹیہڑاند آ تون مون تننگ ءُ۔

ترجمان نا پاننگ ئس کہ کوئٹہ شار ءِ متبادل زرائع تیان بجلی تننگ ئٹی ءُ، ولے 220 کے وی دادو خضدار ٹرانسمیشن لائن آن بجلی ناسپلائی بند ءِ ہرا نا سوب آن خضدار، قلات، سوراب، مستونگ، نوشکی، چاغی و خاران نا ضلع آتے بجلی رسینگ اف و بجلی نا بحالیکن منَہ ہفتہ لگو۔

اندن بلوچستان ئٹ مُسہ فائبر آپٹک کیبل تیان اِرا کیبل ءِ کہی ہند آتیان دیر درینے ہرا نا سوب آن جتا شار تیٹ انٹرنیٹ نا نیستی ءِ۔

پی ٹی سی ایل لینڈلائن و انٹرنیٹ سروس صوبہ نا منَہ ضلع آ تیٹ بحال کننگانے ولے 80 درسد ضلع آ تیٹ انٹرنیٹ سروس بند ءِ۔

پی ٹی سی ایل نا جے ایم ٹیکنیکل شوکت خواجہ خیل نا پاننگ ءِ کہ مسٹمیکو کیبل ہم مستونگ نا ہند آن پناسس ہرا نا سوب آن کوئٹہٹی انٹرنیٹ نا نیستی ودی مسوسس ولے کیبل ءِ جوڑ کننگا ہرا نا سوب آن شار ئٹ انٹرنیٹ بحال مس ولے انٹرنیٹ و لینڈلائن سروس آتاتیوہ بحالی ٹی وخت لگو۔

صحافی لالہ فہیم بلوچ نا بیگواہی نا ایف آئی آر چار دے آن گڈ پریڈی تھانہ ٹی کننگا۔ بیگواہ فہیم بلوچ نا کزن ام حبیبہ ایڈوکیٹ نامدعیت ئٹی ایف آئی آر کننگا۔

دو شمبے نا دے سہب ئنا صحافی، شینکار، قلم کار، سیاسی اور بندغی حق آتا سروک آتا بھلو کچ اس کراچی ٹی پریڈی تھانہ ٹی ایفآئی آر کننگ کن بسر۔

تھانہ ٹی ایف آئی آر کروکا تیٹ لالہ فہیم بلوچ نا ایلم کریم جان بلوچ و کزن ام حبیبہ بلوچ ایڈوکیٹ، بلوچ یکجہتی کمیٹی کراچی ناآرگنائزر آمنہ بلوچ، بندغی حق آتا سروک قاضی خضر، پروین ناز، شینکار جمیل امام، سرفراز بلوچ و ایلو سیاسی و چاگڑدی باسکآک اوار ئسر۔

یاتی مرے کہ کراچی نا علاقہ اردو بازار آن  26 اگست 2022 نا شام علم وادب پبلشرز نا دکان آن لالہ فہیم بلوچ ءِ قانود نافذ کروکاکارندہ آک تینتو اوار دریسر۔ ہراکان گڈ دا تدینی نا سی سی ٹی وی فوٹیج ہم مونا بس۔ فوٹیج ئٹ خننگ مریک کہ سندھ پولیس و منَہسادہ پُچ بینوکو کارندہ اودے علم وادب نا دفتر آن دننگ ءُ۔

علم وادب پبلشرز پاکستان ئٹ اسہ پنی ءُ شینکاری ادارہ ئسے ہراڑے بلوچی و اردو ادب و بولی آ پٹ و پول نا کتاب آک شینک مریرہ۔

لالا فہیم نا بنیاتی تعلقداری بلوچستان نا ضلع پنجگور نا علاقہ وشبود آن ءِ۔ او علم و ادب پبلشنگ ہاؤس نا مینیجر ءِ و صدائےبلوچستان ڈاٹ کام و مُسہ توئی گدان پنجگور نا ایڈیٹر ہم ارے۔

لالا فہیم نا آجوئی نا بابت ئٹ فہیم نا خاہوت تون صحافی، شینکار، سیاسی و بندغی حق آتا سروک آک صلہ کریر۔ لالا فہیم نا آجوئینا بابت ئٹ پریس کانفرنس تون اوار برانز کننگ آ ہم غور کریر و عدالت آ ہِننگ نا ہم فیصلہ کریر۔

قطبی دے ٹکی بلوچستان نا کہی علاقہ آتیٹ پِر تا لڑ بند مسنے ولے پشین نا علاقہ توبہ کاکڑی ٹی 2 ڈیم ئنا پِننگ آن مُسہ بندغ بیرانمسنو۔

لیویز کنٹرول نا رد ئٹ پشین نا شیفینکو علاقہ آ تیان اِرا بندغ نا جونک خننگانو، مُسٹمیکو ءِ پٹنگ ئٹی ءُ۔ دانگان چمن نا مَشی آ علاقہ آتاکسر تا بھس مننگ آن خلق آتا زمینی حوال شار تیان پِنانے۔

لیویز کنٹرول نا رد ئٹ توبہ اچکزئی ٹی تدوکا نن کدنی نا 3 ڈیم پِننگ آن علاقہ آتے دیر درینے، توبہ اچکزئی ٹی دوبندی، کدنی، فراخی،اغبرگ، تاشرباط ئٹی ڈغار نا کہی ایکڑ آ ساڑی باغ آک ہم زیمی مسنو، پول و کسک ہم پنانو ہرا نا سوب آن ایلو علاقہ آتیان زمینیحوال پِنانے۔

لیویز کنٹرول نا پاننگ ءِ کہ کوئٹہ زیارت نا کسر آ 4 پول و 7 جاگہ غا کسر تا پِننگ آن زیارت نا تیوہ ڈیہہ تون 3 دے ءِ زمینی حوال پِنانے،داڑان بیدس زیارت نا ایب کیب ئنا کہی اُرا تے دیر درینے، زیارت کالج و فٹبال اسٹیڈیم ءِ ہم نسخان مسنے۔

لیویز کنٹرول نا رد ئٹ پرانا چمن، توزی و ایلو خلقی آ علاقہ آ تیٹ دیر ئنا قدرتی چشمہ و کاریز سسٹم آک بھس مسنو، کوئٹہ کراچی،کوئٹہ بولان، جیکب آباد نا بھلا کسر کہی ہند آ تیان پِننگ نا سوب آن بند ءُ و دھانا سر ئٹی کوئٹہ ڈی آئی خان، فورٹ منرو ٹی کوئٹہ ڈیجی خان آ کسر بند ءِ۔

ایلو نیمہ غان محکمہ داخلہ حکومت بلوچستان نا پاننگ نا رد ئٹ ولی تنگی ڈیم ئنا پِننگ نا بابت ئٹ دروغ ءُ حوال تننگ آ پٹ و پول بناءکننگانے۔

انکوائری کمیٹی نا چیئرمین ڈی آئی جی پولیس ( ٹیلی )، ڈائریکٹر آپریشنز لیویز فورس و ایڈیشنل سیکرٹری سوئم محکمہ داخلہ اوار ءُ،کمیٹی جتا کنٹرول روم آتیان ڈیم ئنا پِننگ نا دروغ آ حوال نا سوب، گواچنی آن چپ حوال تننگ نا زمہ وار آتا نشاندہی کرو۔ کمیٹی ہفتدے ئنا تہٹی تینا رپورٹ ءِ حکومت نا مونا ہتو۔

بلوچ بیگواہ تا خاہوت آک بیان شینک کریسہ پاریر کہ 30 اگست تیوہ جہان ئٹ زوراکی نا بیگواہی تیان زیمی مروکا بندغ آتا دے ءِ. دادے ءِ بیگواہ آ بندغ آتا پِنا کننگ نا مسخت اندادے کہ زوراکی نا بیگواہی تیان زیمی مروکا بندغ آتا ڈکھ، دڑد، اذیت آتے جہان نا موناپاش کننگ مرے تاکہ تیوہ جہان ءِ سما تمے کہ او بندغ آک ہرا خالیت و سختی تیان گدرینگرہ۔

اوفتا پاننگ ئس کہ اندن دا ڈیہہ ٹی ایلو قوم آتتون اوار بلوچ آک ہم کہی سال تیان زوراکی نا بیگواہی تا گواچی مریسہ ءُ۔ بیگواہ مروکابندغ اتتون اوار اوفتا خاہوت آک ہم جتا وڑ ئنا ذہنی و بدنی سختی، دڑد و اذیت آن گدرینگیسہ ءُ۔ نن ہم اسہ چرجوئی اسیٹ تینا بندغآتا آجوئی کن غٹ رہبندی و قانودی کسر تے کاریم ئٹ ایسونن ولے داسکان ہزار آ تا کچ ننا بندغ آک زوراکی نا بیگواہی تا گواچی ءُ۔

تینا بیان نا ایسر ئٹ اوفتا پاننگ ئس کہ تدوکا 38 دے آن نن تینا بندغ آتا آجوئی کن کوئٹہ نا خاص ہند، وزیر اعلیٰ، گورنر و چیفجسٹس نا ماڑی تا مونا تولوک برانز کننگ اُن ولے مجال ءِ اختیار دار تون اوار حکومتی نمائندہ آتے بوڈ اس کُنے و نئے اوفتے ننا ڈکھ دڑدئنا پرواہ ءِ۔ نن تینا برانز ءِ برجاء تخیسہ 30 اگست آ زوراکی نا بیگواہی تیان زیمی مروکا بندغ آتا جہانی دے ئنا موقع آ تولوک برانز ناہند آ اسہ سیمینار اس ہڈ ایتون ہرا ٹی سیاستدان، قانود دان، صحافی و چاہندار آ تون اوار جتا فکری تپہ آتا بندغ آک تینا خیال آتادرشانی کرور۔

جمعہ نا دے پنی آ اردو بازار کراچی آن پاکستانی لشکر نا کارندہ غاک علم و ادب پبلشرز نا منیجر ءِ دزگیر کریسہ تینتون دریر ہراکان گڈ اونا بابت ہچو حوال اس رسینگتنے۔

شابیتی حوال تا ردئٹ کراچی نا علاقہ اردو بازار آن جمعہ نا دیگر وخت آ علم و ادب پبلشرز نا منیجر لالہ فہیم بلوچ ءِ پاکستانی ڈھکوک ادارہ و فورسز کارندہ غاک چاہنداری کننگ آن گڈ تینتون دریر۔ خن خنوک شاہد آتا ردئٹ سندھ پولیس و سادہ پُچ آتیتون کارندہ غاک سر و سوج و چاہنداری کننگ آن گڈ دکان ءِ بند کرفسہ اودے تینتون دریر۔

علم و ادب پبلشرز پاکستان نا پِڑ آ اسہ پنی ءُ شینکار ئسے ہرا بلوچی ادب و ایلو بولی تیٹ پٹ و پولی کتاب شینک کیک۔

تدینی نا برخلاف جتا تپہ نا بندغ آک سوختئی تون خُلیس نا درشانی کرینو۔ نیشنل ڈیموکریٹک پارٹی تدینی نا مذمت کریسہ پارینے کہ لالہ فہیم اسہ علم دوست بندغ ئسے ہرا بلوچی ادب و صحافت نا خوانندہ ئسے، اونا دُن بیدس قانود دزگیری نا مذمت کینہ و اودے زوت آجو کننگ مرے۔

نیشنل پارٹی نا سروک جان محمد بلیدی پارینے کہ فہیم اسہ ادبی و عملی بندغ ئسے و شینکاری نا کاریم اٹ مسونے۔ لالہ فہیم ءِ زوراکی ئٹ بیگواہ کننگ افسوسناک و قابل مذمت ءِ۔ زوت آجو کننگ مرے۔

یاتی مرے بلوچستان ئٹ زوراکی ئٹ بیگواہی تا ویل کل آتیان بھلا ویل ءِ۔ کہی ہزار بندغ آک بیگواہ ءُ و ہزار آتا کچ بندغ آتا بیگواہی آن گڈ جشوک جوْنک خننگانو ہرافتیٹ زیات خوانندہ ءُ۔ اندن ادیب و صحافی تا جوْنک ہم خننگانو۔

ایلو پارہ غان کوئٹہ نا ریڈ زون ئٹ گورنر نا ماڑی نا مونا سی و ہشت دے آن بلوچ بیگواہ تا خاہوت آتا برانز برجاء ءِ ہرافک زیارت آپریشن و دروغ نا مونتس نا جوڈیشل کمیشن تون اوار ایلو خواست آتیکن برانز کننگ ءُ۔

کوئٹہ ٹی اِرا دے آن برجاء ترند پر تا سوب آن شار ئنا گیشتر علاقے آتے دیر درینے، کچہ آ اُراک تمیسہ بھس مسنو۔

شابیتی حوال تا رد ئٹ کوئٹہ ٹی اِرا دے اسکان اسہ وڑ ترند پر مننگ نا سوب آن اوڑک، دے کہی بائی پاس، ہزارہ ٹاؤن، پشتو باغ،اسپنی روڈ، رئیسانی روڈ، بروری روڈ، سبزل روڈ، سریاب روڈ، نواں کلی، سرہ خلہ، سرہ غڑگئی، چشمہ اچوزئی، سمال آباد، تون اوارپین کہی علاقہ آتے ارب فلڈنگ نا سوب آن نوکاپ نا دیر درے۔

نوکاپ نا دیر اُرا تیٹ بننگ نا سوب آن بندغ آتے سخت ہڑاند آتون مون تروئی تما اندن سمال آباد، کلی اصرا، تون اوار کہی علاقہ آتاآباتی تے رکھوک جاگہ غا تیا و پی ڈی ایم اے نا دفتر آ رادہ کننگا و شار ئنا جتا علاقہ آ تیٹ کچہ انگا اُراک تمیسہ بھس مسر۔

کوئٹہ ٹی ہار ئنا سوب آن نماز جمعہ نا وختا کہی علاقہ آ تیٹ مسجد آ تیٹ ہم نوکاپ نا دیر بس ہرا نا سوب آن نمازی تے ہڑاند آ تونمون تروئی تما۔

ایلو نیمہ غان ترند پر تا سوب آن کوئٹہ و بارکھان ئٹی 9 بندغ ٹپی مسر۔ ٹراما سینٹر سول اسپتال کوئٹہ نا ایم ڈی ڈاکٹر یاسر نا رد ئٹتدوکا نن پر تا سوب آن سول ہسپتال ئٹی کوئٹہ آن ہشت و بارکھان آن اسہ ناجوڑ ئسے ہتنگ مس۔ ٹپی مروکا تیان کہی بندغ نا حالیتباز خراب پاننگک۔

سعودی عرب ٹی چُنک سنی ٹی ناول نگار جوڑ مننگ نا شرف اسہ دوانزدہ سالی مسڑ غنیٰ خلیل القریبی ءِ رسینگا۔ اونا اولیکو ناول’دیڈیزرٹ روڈ‘ داسا مارکیٹ ئٹی ساڑی ءِ۔ غنا نا پاننگ ءِ کہ او ناول نگاری ٹی جہانی ریکارڈ جوڑ کننگ خواہک۔

’العربیہ ڈاٹ نیٹ‘ تون ہیت کریسہ غنا نا پاننگ ئس کہ کنے اولیکو ناول ءِ لکھنگ نا خیال ہمو وخت آ بس ہرا وخت آ کنا سن یانزدہ سالئس و ای دا ناول ءِ انگریزی بولی ٹی ’ The Dessert Road‘ نا سرحال آ نوشتہ کریٹ۔

غنا نا پاننگ ئس کہ دا پڑ آ بننگ کن اودے غٹ آن زیات اونا باوہ حوصلہ تس۔ ناول نا بناء و کڑدار آتا سیم ئنا گچین کننگ، خیال آتےریکارڈ کننگ و کاغد آ شابیتی ئٹ بیان کننگ نا عمل آ کاریم کننگ کبین ئس۔ اندا سوب آن کنے دا کن اسہ سال اس لگا۔ اخیر دا ناولپنچ باب ئٹی ایسر مس۔

اونا پاننگ ئس کہ مطالعہ نا باریم و اولیکو درجہ دوئی کننگ کن دا است خواہی آن بیدس اودے تینا استاد اسریٰ حمدان الصحبی نا مختفی و کمک رسینگا۔

اونا پاننگ ئس کہ ای لکھنگ و درشانی نا لائخی ءِ مونی دننگ کن کاغد و قلم کاریم ئٹ ہتنگ خواوہ۔

غنا نا ودیک پاننگ ئس کہ جہانی اسکول آ تیٹ انگریزی نا مطالعہ اودے دا بولی ٹی نوشتہ کننگ نا لائخ جوڑ کرے۔ اونا پاننگ ئس کہ اوعربی، انگریزی و جاپانی کتاب آتے ہم خواننگ و ہُننگ دوست تخک۔

اونا پاننگ ئس کہ ڈیزرٹ روڈ نا سرحال دا ناول کن غٹ آن زیات جوان ئس۔ او گرافکس و پدا اسہ خاص ڈرائنگ اس کارمرز کرے، ہرااونا نظریہ آتے باز زیبداری ئٹ تھیٹرک ڈرائنگ ٹی مٹ کرے۔

او پارے کہ ای چُنک و مرغن ءُ ناول و کسہ نوشتہ کریسہ گنیز ورلڈ انسائیکلوپیڈیا ٹی تینا ریکارڈ ءِ جوڑ کننگ خواوہ۔

غنا نا باوہ خلیل القریبی، العربیہ ڈاٹ نیٹ ءِ پارے کہ او تینا مسڑ ءِ ہمو وخت مطالعہ کننگ نا کنڈ آ پام تس ہرا وخت اونا سن ہفت سالئس۔ اونا پاننگ ئس کہ غنا نا سوج آ تیان اونا علم دوئی کننگ نا بابت ئٹ شوق و تجسس نا گمان مسکہ۔ اونا اندا شوق اونا سرسہبینا ذریعہ جوڑ مس۔

بلوچستان نا ضلع ہرنائی ٹی چانڑدہ اگست آ پاکستانی فورسز آتا سم کاری آن ورنا خالق داد نا خون و کم سن چُنا تتون اوار کہیبندغ آک ٹپی مسر ہراڑان گڈ ہندی مخلوق برانز بناء کرے ہرا دئے دے گدرینگ آن پد ہم برجاء ءِ۔

اینو برانز کروک آک تینا برانز ءِ شابیتی تریسہ خانوزئی نا خُڑک آ زیارت کراس ءِ بند کریر، ہرا نا سوب آن کوئٹہ و ژوب آ ہِن و بر سلیسو کسر نا ہڑتوما کنڈ آن اُلاخ آتا مرغن کشک لگا۔ برانز کروک آک تدینی نا بابت ئٹ عدالتی کمیشن جوڑ کننگ و فورسز آتے علاقہ آنکشنگ نا خواست کننگ ءُ۔

ایلو نیمہ غان حکومت بلوچستان نا پاننگ ءِ کہ تولوک برانز نا خواست آتا بابت ئٹ وزارت داخلہ نا کنڈ آن اسہ کمیٹی اس جوڑ کننگانے۔

اسسٹنٹ کمشنر کریزات تون گپ و تران آن گڈ اُلاخ آتا ہِن و بر کن کسر ملنگا ولے برانز کروک آک زیارت کراس نا رہا عارضی کیمپخلکنو۔ 

یاتی مرے کہ ہرنائی نا علاقہ خوست ئٹی 14 اگست آ سیکیورٹی فورسز آتا برخلاف برانز نا وختا عوامی نیشنل پارٹی نا اسہ باسکخالق داد فورسز آتا سم کاری آن بیران و اسہ چُنا سے تون اوار 7 بندغ ٹپی مسوسر۔

ہندی بندغ آتا رد ئٹ برانز نا وختا ایف سی نا سم کاری آن دا تدینی مونا بس ولے ایف سی دا دوبہ آتے سختی ئٹ رد کرے ہراڑان گڈ15 اگست آ ہرنائی نا مخلوق خوست ئٹی ایف سی نا کیمپ ئنا مونا تولوک برانز بناء کریر ہرا داسکان برجاء ءِ۔

حوال تا رد ئٹ یورپی یونین ہار و نوکاپ آن زیمی مروکا خاہوت آتے بندغی کمک تننگ کن پاکستان ءِ 7 کروڑ 60 لکھ روپئی تننگ نا پڑوکرینے۔

اسلام آباد ئٹ یورپی یونین نا مشن نا شینک مروک بیان ئٹی پاننگانے کہ دا کمک صوبہ بلوچستان ئٹ جھل مگسی و لسبیلہ نا کُل آنزیات زیمی مروکا ضلع آ تیٹ زیات زیمی مروکا خاہوت آتا دمدستی خواست آتے پورو کننگ آ پام ایتو۔

پاکستان ئٹ یورپی یونین نا بندغی ہمدڑدی نا پروگرام آتا نگرانی کروک طہینی تھمناگوڈا نا پاننگ ئس کہ بیم بش کروک ہار پاکستانئٹ بھس کاری نا اسہ کسہ اس اِلانے، ہرا نا سوب آن باز آ بندغ آتے تینا اُرا، معاش و مڈی تا نسخان تون مون تروئی تمانے۔

اونا پاننگ ئس کہ یورپی یونین نا مالی کمک دا سخت انگا وخت ئٹی غٹ آن زیات نزور آ بندغ آتا کمک کن کاریم کرو۔یورپی یونین ناودیک پاننگ ئس کہ دا کمک جہانی ریسکیو کمیٹی نا ہم المی کمک نا رسیفنگ کن کاریم کرو۔

بیان ئٹ پاننگا کہ دا ٹی نوکاپ آن زیمی مروکا خاہوت آتا دمدستی خواست آتے ایسر کننگ و کمک کن نقد رقم تننگ، و ہار آن پد نوکاپنا دیر ئنا سوب آن تالان مروکا ناجوڑی تیا ہم پام ایتیسہ بنیاتی جانجوڑی نا بابت ئٹ خذمت آک ہم اوار ءُ۔

اوفتا پاننگ ئس کہ دا پروگرام زالبول، کم سن مسڑ و چُنا تا ڈول انگا نزور آ بندغ آتے نفسیاتی کمک ہم ایتو۔

بیان ئٹ ودیک پاننگا کہ یورپی کمیشن نا یورپی سول پروٹیکشن اینڈ ہیومینٹیرین ایڈ آپریشنز (ای سی ایچ او) نا کمک ئٹ یورپی یونیننا فنڈنگ اونا چُنک ہد اسکان رسپانس میکانزم نا ذریعت ئٹ تننگ مننگ ئٹی ءِ۔

ای سی ایچ او نا چُنک ہد ئنا ریسپانس فنڈ اسہ جہانی وڑ و ڈول ئسے ہرا قدرتی و بندغی ودی کروک آفت آتیان زیمی مروکا ملک آ تیٹبندغی کمک کن 5 لکھ یورو اسکان دمدستی فنڈنگ نا موکل ایتک۔

حوال تا رد ئٹ تحصیل نال ئٹی ڈکھیائی ءُ اسہ کسر ویل ئسے ٹی اسہ زالبول اس بیران اندن پین ہشت زالبول و چُنا ٹپی مسنو۔

ٹپی مروکا تے اسپتال آ سر کننگانے ہرافتیان اِرا زالبول و اسہ نرینہ اس باز ٹپی ءُ۔

شابیتی حوال تا رد ئٹ نال آن گریشہ آ ہنوکا پک اپ ڈرائیور نا وس آن پیشتمیسہ کھڈ ئسے ٹی تما، ہرا نا سوب آن زالبول اس بیران وایلو زالبول و چُنا تتون اوار ہشت بندغ ٹپی مسر۔

ٹپی آتے سول ہسپتال نال آ سر کننگا ہراڑے اوفتا جانجوڑی کمک برجاء ءِ و زیات ٹپی مروکا تے سول ہسپتال خضدار آ رادہ کننگ ءُ۔