بلوچ یکجہتی کمیٹی گوادر نا سروکی ٹی بیگواہ بندغ تا یلہ مننگ کن برانز کننگا۔
برانز ئٹ پاکستانی لشکر نا دو آن بیگواہ عظیم دوست بلوچ، بولان کریم، نسیم بلوچ و ایلو بیگواہ بندغ تا خاہوت آتون اوار جتا سیاسی پارٹی تا ہندی راہشون تیان بیدس زالبول و چنا تا بھلو کچ ئس اوار اس۔
برانزی تا پاننگ ئس کہ بلوچ تینا ڈغار و ڈیہہ ئنا خواجہ ءِ اسہ اندنو ڈغار ئس ہرا مال و مڈی تیان پُر مننگ آن بیدس بلوچ تینا ڈغار آ بزگی نا گواچی ءِ۔ خوانندہ ورناک بیگواہ کننگرہ و اوفتا جشوک جون تا خسنگ برجا ءِ اگہ اوفتیا دوبہ ئس ارے گڑا عدالت ئٹ ہتنگ مریر۔
تران کروک آتا پاننگ ئس کہ بلوچستان ئٹ ریاستی ظلم و زوراکی تیان بلوچستان نا شاریک ذہنی ناجوڑ مسنو بیگواہ بندغ تا چناک اسکول آ ہننگ نا جاگہ غا تینا دوستخواہ تا یلہ مننگ کن برانز آتیٹ اوار ءُ ریاست دا سرپد مرے کہ بلوچ تینا دوستخواہ تا زوراکی ئٹ بیگواہی تیا چُپ مفرو۔
تران کروک آک پاریر کہ ریاست ڈوہدار ءِ ہرا بندغ تے سال آتیان بیگواہ کیک اگہ دا بندغ آک ڈوہدار ءُ گڑا اوفتے عدالت ئٹ ہتنگے دا وڑ بیگواہ کریسہ اودیم کننگ ڈوہ ئسے و دا ڈوہ ریاست نا کنڈ آن مننگ ءِ۔
دا وخت آ برانزی تون اوار بلوچ چنا ئس ریاستی ادارہ تیان سوج کرے کہ مگنہ بھلن مننگ آن گڈ اودے ہم بیگواہ کننگو۔
برانز ئٹ ساڑی بیگواہ عظیم دوست نا ہیڑ رخسانہ دوست پارے کہ کنا ایلم نا بیگواہی ءِ ہفت سال آن زیات مسنے، نن ہڑدے سڑک آتیا پیشتمسہ انصاف نا خواست کینہ ولے داخس برانز تیان بیدس اختیاردار و بیگواہ کروک آتیا ہچو زیم ئس تمیپک۔
رخسانہ دوست پارے کہ ننا خواست ساندہ اندا مسنے کہ ایلم ءِ یلہ کننگ مرے، نن وار وار اندا خواست ءِ کننگ اُن کہ اگہ او ڈوہدار ءِ گڑا عدالت ئٹ ہتیسہ اونا ڈوہ ءِ پاش کبو واہم عدالت آک شاری تے انصاف تننگ ئٹ بےسہب ءُ۔
بیگواہ بندغ تا خاہوت آتا پاننگ ئس کہ پاکستان نا راہبند ئٹ ہر گڑا درشان ءِ کہ اگہ کسس ڈوہدار ءِ گڑا عدالت اودے سزا ایتک ولے ننا ورنا تے بیدس عدالت و قانود سال آتیان بیگواہ کننگ آن گڈ خون کریسہ اوفتا جونک خسنگرہ۔
گوادر برانزی تا پاننگ ئس کہ بلوچستان خیسن و ایلو مڈی تون اوار اوار جوْن ہم ترکفنگ ءِ داڑان مالو خضدار و پنجگور آن کہی جوْنک رسینگار اندا وڑ کوئٹہ نا دشت قبرستان ئٹ قبر آتیان اسہ علاقہ ئس ٹہیفنگا داسا پنجاب نا اسپتال آتیان ہم بیگواہ بندغ تا جوْنک خننگ ءُ دا کل ئٹی ریاستی ادارہ غاک اوار ءُ۔
برانزی تا ودیک پاننگ ئس کہ دا غٹ ناانصافی تا بر خلاف بلوچستان نا شاریک سڑک آتیا پیشتمسہ برانز کیرہ تو ایلو دے اوفتے ہم زوراکی ئٹ بیگواہ کننگک البتہ داسا بلوچ آک دا بے دادی آن بیزار مریسہ ترندی ئٹ تینا توار ءِ بڑز کرور۔
دا وخت آ ایلو تران کروک آک ہم بلوچستان ئٹ پاکستانی لشکر نا دو آن بیگواہ بندغ تا یلہ مننگ نا خواست کریسہ پاریر کہ پاکستان نا اختیاردار آک اخس کہ زوراکی نا بیگواہی تے مرغن کرور اندن دا اوفتے کن ویل ودی کرو انتئے کہ بلوچستان نا شاریک تینا دوستخواہ تا زوراکی ئٹ بیگواہی آ اسُل چُپی ءِ دوئی کروفس۔
