یک شمبے نا دے لاہور و اسلام آباد ئٹ بلوچ یکجہتی کمیٹی، اندن نوشکی ٹی بلوچ اسٹوڈنٹس آرگنائزیشن پجار نا سروکی ٹی ملتان نشتر اسپتال آن نادرست جون تا خننگ و بلوچستان ئٹ سی ٹی ڈی نا کنڈ آن برجاء دروغ نا مونتس و زوراکی ئٹ بیگواہی تا بر خلاف برانز کننگا۔
برانز تیٹ نرینہ و زالبول آک اوار اسر ہرافک دو تیٹ بیگواہ بندغ تا عکس آتے و پلے کارڈ ارفیسہ بلوچ نسل کشی نا بر خلاف نعرہ خلکر۔
برانزیک ملتان ئٹ نشتر اسپتال آن خننگوک آ جوْن تے بیگواہ بندغ تا جون پاریسہ اوفتا ڈی این اے و داڑکن آزات پٹ و پول کروک کمیشن ئس جوڑ کریسہ اصل گواچن تے مونا ہتنگ نا خواست کریر۔
برانزیک پاریر کہ لس بلوچ آتا خون وہنگ ءِ، اگہ نن دادے اقوام متحدہ نا قانود نا نظر ئٹ اُرن گڑا دا نسل کشی ٹی بریک ولے افسوز کہ اقوام متحدہ و بندغی تون اُست خواہی تخوک غٹ ادارہ غاک بلوچ نسل کشی آ چُپ ءُ۔ بلوچستان ئٹ ریاستی بے دادی، ظلم و زوراکی چرجوئی ئٹ برجا ءِ ہرا نا سوب آن بلوچستان نا ڈغار اسہ مقتل گاہ ئس جوڑ مسونے۔
اوفتا پاننگ ئس کہ جوْن تا خسنگ ئٹ راج آک ایسر مفسہ اندا سوب آن دا لڑ بند کننگ مرے۔ ریاست ہراتم راہبند ءِ لتاڑنگ آ بس گڑا او ریاست ئٹ امن و جارات بفک، بیدس آئین سیاسی باسک آتے بیگواہ کننگ و اوفتے دروغ نا مونتس ئٹ خوْن کننگ راہبند نا برخلاف ءِ۔ اوفک پاریر کہ سی ٹی ڈی ءِ راہبند لتاڑنگ و خلنگ بٹنگ نا ادارہ ئس جوڑ کننگانے ہرا منفی ءُ گام ئسے۔
برانزی تا پاننگ ئس کہ جنرل مشرف ہرا خاخر ءِ بلوچستان ئٹ لگفیسس او خاخر ءِ دروغ نا مونتس تا وڑ ئٹ ترند کننگ نا کوشست مننگ ءِ ہرا مذمت نا لائخ ءِ۔ خوْن مروک ورنا تا دتر نا حساب ءِ دیر آن ہلین ہمو بنجائی وزیر و بنجائی کوالخواہ تیان ہرا خاہوت آتا تولوک برانز ئٹ بریسہ سوغند کریر کہ داسا جوْنک رسینگوفس یا دا دروغ آ اسمبلی آن ہرا تیوہ وڑ ئٹ حکومت نا بشخ ئسے ہراڑے ہچو اپوزیشن ئس اف اوفتا پن ئنا جوڈیشل کمیشن ہرانگ ہنا۔
برانزی تا پاننگ ئس کہ تدوکا اِرا دہائی آن جتاء چم تیٹ بلوچ آتا لس خوْن کننگک ننے خُلیس ءِ کہ نشتر اسپتال نا چھت آن رسینگوک نادرست جونک بلوچ بیگواہ بندغ تا مننگ کیرہ اندا سوب آن ننا خواست ءِ کہ اوفتا چاہنداری ءِ عمل ئٹ ہتیسہ دا نا پد ئٹ اوار انگا غٹ بندغ تا بر خلاف قانودی کارروائی کننگے۔ بلوچ لس خون تا دا اولی تدینی اف داڑان مالو ہم 2014 ٹی خضدار نا علاقہ توتک ئٹ اشتماعی قبر آتیان 169 بیگواہ بندغ نا جوْنک رسینگاسر ہرافتا اینو اسکان نہ چاہنداری مس و نئے کہ او لس خون تیٹ اوار انگا ڈوہدار تے عدالت ئٹ ہتنگا بلکن اوفتا دو تے گیشتر سوگوْ کننگا۔
برانزی تا پاننگ ئس کہ تدوکا اِرا دہائی آن جتاء وڑ ئٹ نہ بیرہ بلوچ آتے خلیفنگک، بلکن چرجوئی ئٹ بلوچ آک نسل کشی تون ہم مون تننگ ءُ۔ سی ٹی ڈی نا کنڈ آن بیگواہ بندغ تے دروغ نا مونتس تیٹ خون کننگ بیم بش کروک ءُ کاریم ئسے داڑان مالو ہم زیارت ٹی 9 دزگیر مروک بلوچ آتے خون کریسہ سلاء بند بندغ درشان کننگا ہرا کہ اسہ دروغ ئسے آن بیدس پین ہچ ئس اف دا باروٹ برانز نا زور ٹی بریسہ حکومت جوڈیشل کمیشن ہم اڈ تسوسس ولے اونا انکوائری و ڈوہدار سکیورٹی کارندہ تے ہچو سزا ئس رسینگتو اندن دا کاریم دوارہ ترندی ئٹ مننگ ءِ۔
اوفک ودیک پاریر کہ اندا تُو اکتوبر ٹی مستونگ، نوشکی و ڈیرہ مراد جمالی ٹی دروغ نا مونتس تا پن آ چمکاری کریسہ 13 بندغ نا جونک خسنگانو و نن دا پوہ مرینہ کہ اگہ دا لس خون تا بر خلاف توار ارفنگتو گڑا بلوچ راج نا نسل کشی اندا وڑ برجاء مرو۔
برانزی تا پاننگ ئس کہ نن غٹ بندغی حق آتا ادارہ تیان خواست کینہ کہ اوفک دا معاملہ آ سوبری ئٹ پامدار مریر و بلوچستان ءِ دا وڑ بے وارث الپس ہرا وڑ نشتر اسپتال ئٹ جون تے بے وارث ہلنگانے۔
