خضدار ٹی سیو اسٹوڈنٹس فیوچر نا سالانہ چاہنداری مجلس “داخلہ و اسکالرشپس” نا پن ئٹ اڈ تننگ مس، ہرا ٹی استاد، تعلیم دوست شخصیت آ تتون اوار زالبول و نرینہ خوانندہ آک بھلو کچ ئسیٹ اوار مسر۔

مجلس ئٹ بلوچ چاگڑد و خاص وڑ ئٹ ورنا تپہ ٹی بے جاراتی، فریشانی و خودکشی نا ودوکا تدینی و اوفتا کسر شونی، سائیکالوجیکل کیریئر کاؤنسلنگ، خواننگ جاہ تیٹ داخلہ پالیسی، داخلہ نا وڑ و ڈول، پوسکنا لائخی کورس آتا خواست و سواد، جتا شعبہ آتا اہمیت و خواست و بلوچستان نا خوانندہ آ تیکن جتا اسکالرشپ و دا بابت ئٹ تنظیم نا مثبت کڑدار آ شابیتی گپ و تران کننگا۔

مجلس ٹی اسٹیج نا ذمہ واری تے بنجائی کمیٹی باسک محسن بلوچ و انعام بلوچ ایسری تسر، و تلاوت کلام پاک نا شرف تنظیم نا باسک بانک یاسمین بلوچ دوئی کرے۔

مجلس تون تران کرسہ مسکوہی کماش فضل بلوچ پارے کہ ایس ایس ایف اسٹ ءُ دنو تلہ ئسے ہرا خوانندہ آتا سواد آ تیکن گچین کروک ءِ و تینا وڑ ئنا دا اولیکو تنظیم ءِ ہرا اُست و جان ئٹ ایجوکیشنل پِڑ آ کاریم کننگ ءِ و ہرا نا سر سہبی ءِ خنیسہ ایلو تلہ غاک ہم تنظیمی موقف تون امنائی کننگ ءُ۔

مسکوہی کماش نعمان بلوچ خوانندہ آ تیٹ ودوکا بے جاراتی، فریشانی و خودکشی نا تدینی تیا تران کرسہ پارے کہ بروقت کیریئر کاؤنسلنگ مفننگ، جتا شعبہ، داخلہ پالیسی نا بابت ئٹ چاہنداری نہ مننگ، معاشی پدماندگی و ایلو سوب آتا رد ئٹ خوانندہ آک نفسیاتی ناجوڑی تا گواچی مریسہ خودکشی نا ڈول ءُ گام ارفِرہ، ایس ایس ایف خوانندہ آتے دا سختی تیان کشنگ و چاہنداری تننگ کن تینا کمک تینٹ نا پالیسی آ عملاً کوشست کننگ ءِ، لمّہ باوہ و استاد آ تیان ہم خواست ءِ کہ او دا بابت ئٹ تینا کڑد ءِ ایسری تریسہ خوانندہ آتے نفسیاتی دباو نا گواچی مننگ آن رکھیر و اسہ گچینو چاگڑد ئسے نا جوڑ کننگ ٹی تنظیم نا ہم کوپہ تینا کڑد ءِ ایسری ایتر۔

جنرل سیکریٹری شمس بلوچ تعلیم نا اہمیت آ گپ کرے و مجلس تون ایم فل اسکالر ڈاکٹر ادریس بلوچ سائیکالوجیکل کیریئر کاؤنسلنگ آ تران کرسہ پارے کہ خوانندہ آک جتا سوب آتا رد ئٹ تینا پگہ و کیرئیر نا گچین کننگ ئٹی باز ہڑاند آتا گواچی مرسہ نفسیاتی حساب آ ہم شل مریرہ۔

مجلس ئٹ پینلسٹس جنرل سیکریٹری شمس بلوچ، ایجوکیشنل سیکریٹری سلیم بلوچ و ترجمان شفیع بلوچ اوار ئسر و ماڈریٹر نا ذمہ واری تے مسکوہی ڈپٹی جنرل سیکریٹری فیاض بلوچ ایسری تس، پینلسٹ آک خوانندہ تپہ کن تنظیم نا خواست اہمیت و افادیت، تنظیم نا پوسکنا لائبریری نا فوائد، غیر نصابی و فنی علم نا اہمیت و ایلو سرحال تیا شابیتی ئٹ تران کریر۔

داخلہ و اسکالرشپس، پوسکنا ہنر مند کورس، جتا شعبہ بشمول میڈیکل سائنسز، انجینئرنگ سائنسز، سوشل سائنسز ، لاء، جتا ڈپلومہ و ڈیجیٹل کورس آتا بابت ئٹ تنظیم نا باسک آصف بلوچ، بانک کائنات بلوچ، مسکوہی کمک کماش نعمان بلوچ و مجلس سیکریٹری عرفان بلوچ شابیتی ئٹ خوانندہ آتے چاہندارہ تسر۔

ایسر ئٹ تنظیم نا کماش نعیم بلوچ تران کریسہ پارے کہ ایس ایس ایف تینا کمک تینٹ خوانندہ آتے علمی حوالہ ئٹ آگاہی تننگ تون اوار خواننگ جاہ تیٹ داخلہ پالیسی، اسکالرشپس دوئی کننگ، پوسکنا ہنرمند کوسسز، فنی و غیر نصابی علم و کتابی کلچر ءِ لس کننگ ئٹ تینا کڑد ءِ ایسری تننگ ءِ۔

مجلس نا ایسر ئٹ تنظیم نا نیمہ غان مہمان و تنظیم نا باسک آتے اعزازی ٹیکی ٹی کتاب تننگ مس و خوانندہ آتا سوج آتا ورندی تننگ آن بیدس اوفتے باور کرفنگ مس او ہرا وخت خواہر علمی بابت ئٹ رہنمائی کن تنظیم نا نمائندہ آتیان کمک ہلنگ کیرہ۔

لمّہ و لمّہ وطن

نوشت: درناز رحیم

آواران نا ٹاک دے نیمروچ، آسمان نا مونا جھمر نا اسہ اسہ شینک سمندر ئٹ مچھی نا ڈول تار کننگ ئسر۔ باسُنی نا ہُب ئٹی ہر کنڈ آ زیست ئنا چُپی تالان ئس۔ بیست یا بیست و دو اُرا غا ساڑی چنکو خلق اس، غٹ دا وختا تینا اُرا تیٹ زند ئنا سختی و سوری تتون آختہ ئسر۔ خلق آن زرس مُستی مُلک آ تیٹ بزغر آک تینا کاریم تیٹ آختہ ئسر۔ خلق ئٹ اسہ کوٹی آ ساڑی پرائمری سکول اس ہم ئس ہرانا اسہ ماشٹر اس ئس و آخریکو کلاس ءِ چُھٹی تریسہ او ہم تینا خلق آ روان مسس۔

لمّہ ماہ جان تینا کوٹی نا باء آ تولوک ئس۔ دو ٹی کشیدہ خن تیا ہولُن ءُ چشمک اس و خُش آن تہ کشیدہ نا دسک آک تالان ئسر۔ کوٹی ٹی بَڑزی سے آ جھوکہ ہانی نا دو ٹی کتاب اس ئس و باز خوڑتی ئٹ کتاب ءِ خواننگ ئس۔ ہانی پنچمی کلاس ئٹ خواناکہ و تینا کلاس نا لائخ آ چُنا ئس۔

دے پوسکُن ہڑسینگ ئس تینے و کوٹی نا مونا چنکو اڈ اس ئس ہراڑے درو نا ودی مروکا دغر تینا لمّہ نا خُش آن خاچوک ئس۔ ایلو مال تے کُھریا خوافنگ کن دریسس۔ خلق ئنا گیشتری مالک یا تو اندن یلہ ئسر یا کھُریا خوافنگ کن دریکہ و شام نماز نا وختا ہیسکہ تا۔

زیست ئنا چُپی ءِ پرغِسہ موٹر سائکل ئسے نا توار مس، اندن گمان مسکہ موٹر سائکل لمّہ ماہ جان نا اُرانا نیمہ غا بننگ ءِ، ہانی کتاب ءِ تخیسہ زو زو بش مس کہ اُرے دیر بننگ ءِ۔ ہانی درغ آ سلیسہ پیشن اُرا، موٹر سائکل خُڑک کریسس و موٹر سائکل آ دودا ئس۔ ہانی نا چہرہ نا تاثر آک اسہ دم بدل مسُر۔ و گُڑینگوکا توار تون لمّہ ءِ پارے “ لمّہ ایلم دودا ءِ”۔ ضعیف آ چہرہ غا پیری نا کوسک ایہُن ئسر وا دا حوال آن پیشانی آ کوسک گیشتر مسر۔ اُست نا درپہ غا اسہ وار بے ڈول شیف بڑز مسر ولے ہچ پاتو۔ ہانی انگہ ہُننگ ئس کہ لمّہ امر کیک ولے لہجہ ٹی ہچ وڑ ئنا سختی ہتنگ آن بیدس لمّہ ہانی ءِ پارے “ہِن مُہہ آ تہ و ہیمون نا کوٹی ٹی در تہ، حوال کر تہ انتئے بسونے، اودے ای پاریسُٹ کنا زندی ٹی دا اُراغا مون کپ؟”

“ ننا خننگ کن بروئے لمّہ، مگہ نا اُست پاپک تینا چُنا ءِ خننگ کن، مگہ نی زہیری افیس ایلم کن؟ ” ہانی نا خنک غُل غُل کریر۔

“ ای پارینُٹ اودے ای اونا لمّہ افٹ او کنا مار اف۔ ہن پار تہ کائے داکان۔ کنا اُرا ٹی اوڑکن جاگہ اف، او کنا اُرا نا پارہ غا مون کپ ” لمّہ کشیدہ ءِ لوتھ ئٹ شاغسہ بش مس۔ نظر نا چشمک ءِ خن تیان دڑفے و برونک آ تخا وا بس تینا جاگہ غا توس۔ او تینا لمئی آ مہر ءِ امر اُست ئٹ کھڈ کریسس ہانی اسُل سرپند مننگ الو۔

لمّہ و ہانی ہیت کننگ ئسر کہ موٹر سائکل سر مس و ایمون نا کوٹی نا مونا سلیس۔ ہانی گُد ءِ جوڑ کرسہ دودا نا مونا ہِنا، دودا ءِ بخیر کرسہ کوٹی ٹی تولنگ نا پارے۔ دودا چُنکا ہیڑ ئنا کاٹُم آ مہر ئٹ دو ءِ تخیسہ سوج کرے “لمّہ اندا کوٹی ٹی ءِ؟” ہانی مون ءِ شیف کرے و سرغ ئٹ آخہ ٹی ورندی تس۔ دودا پوہ مس کہ لمّہ ایلو کوٹی ٹی مرو و دا ہم پوہ مس کہ لمّہ اودے بخیر کننگ خواہپک۔ دودا ہمو کوٹی نا نیمہ غا مون کرے ہراڑے لمّہ ئس ولے ہانی توار کرے “لمّہ پارے کہ نی واپس ہِن ایلم، او نے خننگ خواہپک، لمّہ نا لمئی آ مہر نے کن ایسر مسونے؟” ہانی نا توار کبین مس کس پائے تینا خڑینک آتے زور ئٹ توننگ ئس ولے دودا پدی چک خلتو ہانی ءِ ہُرتو۔

کوٹی نا باہ آ دودا سلیس ولے تہٹی ہنتو، لمّہ بَڑزی آ جھوکہ خلوک تولوک ئس، “مگہ اندن ارزانی ئٹ لمّہ و چنا نا رشتہ ایسر مریک؟ نی کنے تینا مار کپہ تینا اُرا ٹی جاگہ تفہ ولے ای داخس وخت آن پد بسونُٹ کنے انداخس موکل ایت کہ ای جَھٹ اس نا رہا تولو، نتّا باسُن آ کنے واپس ہننگ نا پاسہ لمّہ؟“

“ گواچنی دن ارزانی ئٹ لمّہ و چنا نا رشتہ ایسر مفک۔ نی کنا چنا اُس، دا گواچنی ءِ قدرت ہم مٹ کننگ کپک۔ ای نے نوہ تو پڈ ئٹ تخانُٹ، تینا بدن نا دتر تسونُٹ و ودی کرینُٹ۔ ہمر کہ کنا ایلو چناک کنے دوست ءُ نی ہم کنے دوست اُس۔ ولے دودا، نا کسر کنے و نے اسٹ ایلو آن باز مُر کرینے و دا ہیت ءِ نی ہم چاسہ۔ نی وختس لکھ مرادی آ لمئی ڈغار نا مننگ کپیسہ گُڑا نی کنا امر مننگ کیسہ۔ سال تا پند کنا و نا نیام ئٹ ارے و نے ہم سما ءِ دُن ارزانی ئٹ نی دا پند ءِ ایسر کننگ کپیسہ۔” لمّہ تینا اُست ءِ سوگو کرسہ ہانی نا خڑینکی خن تیٹ ہُرا، ہرا ڈن آ سلوک لمّہ نا ہیت آتے بِننگ ئس۔ ہانی نا خڑینک آک اونا اُست ءِ کپ کننگ ئسر ولے لمّہ تینے ڈڈ توریسوس۔

“ لمّہ نا اُست اندن سخت مسونے کہ تینا حقی آ مار آن ہم مونے ہڑسانُس؟ ” ہانی دودا نا پد ئٹ سلوک ئس و ہزار ارمان ئٹ لمّہ غان سوج کننگ ئس۔ دودا لمّہ نا دا ہیت آتے کہی وار بنگوسس اودے اینو ہم لمّہ آن اندا ہیت آتا اومیت ئس، اندا سوب آن او چُپ سلیسس۔

“ ہئو کنا اُست سخت ءِ و تینا ہم اُست ءِ بھلن کہ۔ اگہ ای دا ہیت آن شرمندہ اُٹ کہ کنا پڈ آن وطن نا غدار اس ودی مسونے تو دا ہیت کنا مون ءِ بڑزا کننگ کن بس ءِ کہ کنا پڈ آن وطن نا اِرا فرزند و وطن نا رکھوک ہم ودی مسُنو۔ دودا وطن نا غدار مس دا ہیت کنا اُست ءِ کپ کیک، ای نن تیٹ پھُر انگا تُغ آن سما کیوہ و اندا جیڑوہ کہ دودا امر دُن مس، کنا دتر اس دنو الو، کنا پال٘ اس دنو الو گُڑا اخر انتئے دودا لغور مس۔ ولے کنا اُست مطمئین مریک وختس ای دا جیڑوہ کہ کنا ایلو مل٘، شازیب وطن نا رکھ ءِ کننگ ءِ و زباد جان وطن کن شہید مسنے، دا ہیت کنا مون ءِ بڑزا کیک۔ دودا ٹی اگہ دنو جغر الو کہ او وطن نا رکھ کن توفک ہرفیکہ تو کم اس کم چُپ کریکہ اُرا ٹی توسکہ ولے او انداخس لغور مس کہ ہنا تینا ایلم نا خونی تتون ہم کوپہ مس، وطن غدار مس۔ نی ہم تینے آ فخر کر کہ نی شازیب و زباد جان نا ہیڑ اُس۔”

“ کنا کسر اخس رد مرے، ای اخس کہ خراب مریو ولے ای نا مار اُٹ نی کنا لمّہ اُس، نی امر کنے ٹی و شازیب و زباد جان ٹی فرخ کننگ کیسہ، بیرہ دا خاطر آن کہ ننا کسر آک اسٹ افس؟ اسہ لمّہ اس امر تینا چنا تیٹی فرخ کننگ کیک؟ نا مہر آ کنا ہموخس حق ارے اخس شازیب و زباد جان نا ارے” دودا انگہ درغ آ سلوک ئس۔ لمّہ اودے انداخس صلہ خلتوکہ کہ او کوٹی ٹی برے تولے۔

“ لمّہ چنا تیٹ فرخ کپک، غٹ چُنا تیکن اونا اُست ئٹ اسہ وڑ مہر مریک، ولے نی امر دُنو اومیت کننگ کیسہ کہ ای وطن نا غدار و وطن نا فرزند آ تیٹ فرخ کپر؟ امر دنو اومیت کننگ کیسہ کہ ای حق و باطل ئٹ فرخ کپر؟ زباد جان نا خونی تتون تولوک اوفتیان زر کنوک و زباد جان ہرا کہ ڈغار کن ندر مس، امر فرخ کپر ای نمے ٹی۔ نی تو ڈغار کن ندر مننگ مُر تینا ایلم نا ہم دتر ءِ اِرا روپئی کن بہا کریس۔ ” سال ئسے آن گڈ او دودا ءِ خننگ ئس و اودے دنو ہیت کننگ ئس۔ لمّہ نا اُست آن دا وختا پاک انگا رب آن بیدس کس ءِ ہم سما الو۔ اسہ لمّہ اس امر لمّہ وطن کن تینا دتر تون مون پہ مون مریک دا گڑا نا گمان ہم بھازی آن کس ءِ مفرو۔

“ زباد جان نا خونی اسہ بندغ اس اف اسہ ریاست ئسے لمّہ، و کسس اسہ ریاست ئسے آن امر بیر ہلنگ کیک؟” دودا اسُل پوہ مننگ الو کہ او لمّہ ءِ انت پائے کہ لمّہ نا اُست خلکن مرے۔

ولے لمّہ اسُل اُست ءِ خل کریسس و المّی اس کہ او تینا اُست ءِ خل کریکہ۔ “ اندا تو ننا بد بختی ءِ کہ خونی اگہ نزور اس مرے اوڑان نن ہفت پشت اسکان ہم بیر ہلینہ، ولے اگہ خونی ڈن آن بروکو ظالم، قوضہ گیر ءُ ریاست اس و تاغت ور اس مرے نن اودے اندن ارزانی ئٹ بشخنہ کہ او تاغت ور ءِ اوڑا ننا وس چلپک و اوڑا ننا ایلم، ایڑ، لمّہ و چنا تا خون معاف ءِ؟

دودا دا غٹ ہیت آتے اولیکو وار بِننگ الو، ہمو وخت آن کہ او دژمن نا ہم کوپہ جوڑ مسس لمّہ اوڑان مون ءِ ہڑساسس و دا لمّہ کن ہم ارزان الو ولے او دژمن آن زر کنوک ئسے نا حوصلہ ءِ بڑز کننگ کتوکہ۔ دودا سال ئسے آن گڈ اندا سرپند مریسہ بسوسس کہ نوا لمّہ نا اُست خُلکن مرے ولے لمّہ نا اُست ہمو وڑ سخت ئس اوڑکن۔

دودا بے اومیت مرسہ پدی مس و اسہ وار پدا ہانی نا کاٹُم آ دو ءِ تخیسہ اودے مہر تس، و تینا موٹر سائکل آ سوار مرسہ تینا بے اومیتی تون روان مس۔ لمّہ مُدامی نا ڈول اینو ہم دو تے بڑز کریسہ خُدا آن دعا کرے کہ او دودا ءِ حق ئنا کسر آ بننگ نا ہمت ایتے، و اگہ دُن متو اونا مرگ اونا جند ئنا ایلم تا دو آن مرو و دودا مُدامی کن اسہ غدار اس پاننگو۔ لمّہ کن دا دڑد ءِ سگنگ ارزان مفرو کہ اونا مل٘ اسہ غدار ئسے نا پن ئٹ چاننگے و اسہ غدار ئسے نا موت ئٹ کہے۔

ہانی نا خن تیٹ کہی سوج آک ئسر ہرافتے لمّہ خننگ ئس، اونا سن داخس الو کہ او دا غٹ گڑا تے پوہ مسکہ، ولے او داخس وخت ئٹ دا پوہ مسوسس کہ لمّہ نا مہر لمّہ ڈغار کن ءِ و لمّہ نا مہر لمّہ ڈغار نا رکھوک آ مل٘ آ تیکن چائے او اونا پڈ آن ودی مفس ہم، لمّہ نا مہر ہچ بر لمّہ ڈغار نا غدار آ تیکن اف، چائے او اونا پڈ آن ودی مرے۔

بلوچستان نا ضلع چاغی اٹ نوکاپ نا دیر ئٹ اسہ خاہوت نا مُسہ چنا بیران مسر۔ ہرافتا جوْنک اینو دوئی کننگار۔

حوال تا ردئٹ چاغی نا علاقہ دشت گوران ئٹ اسہ خاہوت نا مسہ مسڑ چُنا حفیظہ، نائلہ و عاصمہ پِر نا دیر آن پُر کھڈ اٹ ڈوبینگار۔

لیویز فورس چُنا تا جوْن تے کشیسہ خاہوت ءِ تس۔ کوالخوا تا ردئٹ روڈ جوڑ کروک ٹھیکیدار آک ریتی کشیسہ بھلا کھڈ آتے ہلاسر ہرا پِر ئنا دیر آن پُر مسر۔

ایلو پارہ غان واپڈا کارندہ زاہد امام دالبندین ئٹ کاریم نا وختا بجلی نا تمبہ آن تمیسہ بھاز زیات ٹپی مسونے ہرادے بدحالیت ئٹ کوئٹہ دننگا۔

قدیم طرز ئنا جدید خیال

نوشت: عمران فریق

دی بلوچستان پوسٹ

امریکی مفکر رالف والڈو ایمرسنؔ پائک:
”ہراتم اسہ پوسکنو کتاب اس پنی مریک تو ای تینا خواننگ کن متکنو (مست ئنا) کتاب اس ارفیوہ“۔ اونا دا ہیت آن اولیکو ہرا گڑا ننے دو بریک او متکنا کتاب آتا اہمیت ءِ‘ یعنی ہمو ادب نا بنائی وخت ئنا ادب‘ اوفتا روایتی شاعری و نثر نا گچین انگا معیار۔ ارٹمیکو دا گڑا کہ تینے تینا ادب نا روتہ غاتون ہم گرنچ تخنگ۔ مسٹمیکو ہیت دا اخذ مننگ کیک کہ داڑے پوسکنا کتاب آن نن بیرہ پوسکنا شاعرے سرپند مننگ کپنہ‘ انتیکن ہراڑے اسہ پوسکنو نوشتہ کار ئسے نا کتاب اس چھاپ مریک ہرادے ادب ٹی بلو وخت اس متنے تو اوڑتون اوار دا پوسکنا کتاب اسہ ہندنو نوشتہ کار ئسے نا ہم مننگ کیک‘ ہرادے ادب نا بھلو خبرہ اس مرے‘ ہرا اسہ بھلو عمر اس ریاضت کرینے‘ ہرا دا بھلا وخت آن پد داسہ تینا کتاب ءِ مونا ایسونے۔ داسہ دا تو گواچن ئسے کہ ہر خوانوک کہ او متکنو قاری اس مرے یا پوسکنو تینے زیات پوسکنا کتاب آ بٹک‘ او ہندا خوانوک آمبار بھاز آ نوشتہ کار آک ہم (خاص کر اینو نا وخت نا) گیشتر پوسکنا کتاب آتا مطالعہ ے کیرہ‘ ہرا نا چندی فائدہ غاک مرور ولے اسہ تاوان اس دا ارے کہ او تینا روایتی ادب آن‘ تینا کلاسیکل شاعر و ادیب آتیان و متکنا شاعری تیان بے خبر سلیرہ۔

اینو نا دا وخت ئٹی ہراڑے ایلو ادب آتیٹی ہرا وڑ نا پوسکنو شاعری مننگے تو یقینن او بھلا ادب آتا اثر براہوئی ادب نا ذی آ ہم مر سہ ءِ‘ او نن خننگ اُن اینو براہوئی ادب ٹی ننے پوسکنا شاعری نا رنگاک بھلو کچ ئسے اٹ دو بننگو‘ ہرا اینو نا پوسکنا دور نا حساب اٹ براہوئی ادب کن جوانو گڑاسے ولے ہندہ پوسکنا شاعری نا شوق و کاوشت آتیٹی نن تینا متکنا شاعری تیان زیات مُر ہم مرسہ اُن۔ ایلو دو آ اینو جدید دور نا شاعر تیٹی گڑاس ہندنو شاعر ہم ساڑی ءُ ہرافتا شاعری تے خواننگ آن ننے تینا متکنا شاعری نا رنگ آک‘ یعنی زند و جہان نا ویل آک‘ زندگی نا عقیدہ غاتا ترجمانیک‘ عشق و شعور نا گپ آک‘ انسانیت نا تھیم آک ‘مست ئنا علامت آک دو بریرہ‘ ہندہ شاعر آتیٹی اس پن اس غمخوارؔ حیات نا ءِ۔

غمخوارؔ حیات نا شاعری آ ہیت کننگ آن مست ای داڑے دا گپ ءِ کننگ خواوہ کہ پوسکنا شعری تحریک آتے مونا تخسہ اگہ نن پوسکنا (جہانی) شاعری نا تجزیہ ءِ الین تو ننے سما تمک کہ دافتیٹی چندی اسٹریم آک اوارو‘ گڑاس تا اسہ ایلو آن بھاز خڑک ءُ و گڑاس جتا ءُ‘ طاک ءُ۔ او دا کل ذیل آتیٹی ننے فکر و احساس نا چندی ڈایمنشن آک ملرہ‘ ہرافتیٹی پوسکنا اسلوب‘ پوسکنا سرحال آک‘ پوسکنا ہیت‘ پوسکنا لوزآک‘ اوفتا ترکیب آک‘ ہرا کم و زیات مرسہ کرینو (او دافتے مروئی ہم ہندنے کہ ہندا گڑا تو ادب نا طبعیت و مزاج ءِ)۔

داسہ اصل سوج داکان مونا بریک کہ اگہ نن براہوئی شاعر تے اُرین و دا فیصلہ ءِ کننگ خوان کہ ہرا شاعر شعری تحریک نا ہرا پہلو آن تعلق تخک تو ننتون ہچو ورندی اس اف‘ انتیکن اینو اسکان براہوئی شاعر آتا (او خاص متکنا‘ ہرا چندی کتابات آ خواجہ ءُ) شاعری تا ذی آسرجمی اٹ گپ متنے۔ اسہ نقاد اس جوان یا خراب ہچو شاعر ئسے نا کل شاعری تا تجزیہ ءِ التنے‘ ہچو شاعر ئسے آ داسکان کاریم متنے۔ و کنا جند بھلو وخت ئسے آن ہندا سوچ ئٹی اٹ کہ داگڑ ءِ تینے آن بنا کیو و سعی وڑٹ دادے مونا دیو‘ تاکہ ننے کم از کم دا معلوم مرے کہ ننا ہرا شاعر ہرا بشخ ئٹی بریک۔ اگہ او روایتی شاعری کیک تو روایتی شاعری نا گچینی و نزوریک انت ءُ؟ اگہ او پوسکنا دور نا شاعر ئسے تو جدیدیت نا ہرا پہلو ٹی اونا پن بریک؟ او دانا ہرا بھلا فائدہ ءِ او دا مرو کہ ننے اسہ وار جدیدیت نا کل پہلو تے مونا ہتوئی مریک و دا گڑ ءِ ہم پاش کروئی مریک کہ پوسکنا شاعری اگہ روایتی شاعری آن جوانے تو ہرا حساب اٹ؟ انتیکن اسہ دو آ اگہ پریگمیٹک شاعری جدیدیت نا بشخ ٹی بریک تو ایلو دو آ تحلیل نفسی‘ جسمانی و جنسی سرحال آک ہم بریرہ۔

براہوئی ادب ٹی ہرا جدید شاعری مننگ ءِ اودے مونا تخسہ اگہ ہیت کیو تو ننا ماسہ ننا جدید شاعری روایتی شاعری آن بیرہ اِِرا گڑا ٹی جتا پاننگک۔ اینونا ہرا شاعرآک جدید شاعری نا پنا نوشتہ کننگو اوفک بیرہ ہندا اِرا پوائنٹ نا ذی آ زور تخسہ لکھنگو‘ اَسٹ ”سہل ممتنع“ ایلو ”ابہام آن مری“۔

داسہ اگہ نن اولیکو پوائنٹ آ گونڈ ہیت کین تو براہوئی شاعری ھیا او متکنا دور نا شاعری مرے یا پوسکنا‘ ننے کل گچین آ شاعرآتا ماسہ سہل ممتنع نا شاعریک دو بریرہ تو دا گڑ ءِ دا وخت آ زیات چیڑ تننگ مناسب اف ولے ایلو پوائنٹ کہ ابہام آن مری ہرا ننا ماسہ جدید شاعری نا اسہ بھلو رنگ اس پاننگک یا سمجھنگک‘ دا نا بحث مغرب نا جدید شاعری نا وخت آن بنا مریک‘ ہرانا ذی آ ای مچے تفصیل اٹ ہیت کننگ خواوہ کہ دا غمخوارؔ حیات نا شاعری نا اسہ اہم ءُ جز ئسے۔

غمخوارؔ حیات نا شاعری اگہ ایلو براہوئی شاعر آتیان گڑاس وڑ اٹ جتا ءِ تو اوفتیٹی اولیکو گڑا ”ابہام“ نا زیات استعمال ءِ۔ غمخوارؔ نا غزل آک مریر یا نظم آک ننے اوفتیٹی ابہام دو بریک۔ ابہام شاعری نا ہمو صنعت ءِ ہرانا باروٹ ہر وخت بحث مرسہ کرینے‘ اسہ ٹولی اس دادے شاعری نا جمالیاتی اصول پائک تو ایلو ٹولی شاعرنا خیال نا نیم پختگی‘ شاعری نا غلط ءُ وڑ و ڈول اس سرپند مریک۔ ولے اگہ نن ہڑتوما ٹولی تا نقطہ نظر آتے ہرن ولدہ سوچ خلین تو نن آسانی اٹ دا فیصلہ ءِ کننگ کینہ کہ ”ابہام“ ہرادے شاعری نا روح پاننگانے تو بلکل سعی پاننگانے۔ داسہ ای دا بحث اٹی انپرہ کہ ابہام آن ہرا بندغ آک اختلاف تخرہ او انت پارہ انتیکن ای ابہام نا حق ئٹی اٹ او کنا ماسہ ہرا سوال کل آن زیات اہمیت تخک او دادے کہ ”ابہام نا خواست انتئے تمک؟“ انتیکن بنیادی سوج ہندادے۔ اگہ نن ابہام نا تاریخ آ ہرن تو دا کل آن مست روسی ادب نا زیب مسونے‘ ہراڑان پد ایلو ادب آتیٹی کاریم اٹ ہتنگ مرسہ کرینے۔ دانا روسی ادب ٹی اول و زیات کاریم اٹ ہتنگ مننگ نا سوب دا اس کہ ہراتم روس ٹی زار نا عہد اسکہ تو نوشتہ کار آک حکمران آتا ظلم و جبرنا خلاف پاش ہیت کننگ کتورہ ہرانا سوب آن او اشارہ و ابہام نا کمک ءِ ہلکر‘ تاکہ تینا ہیت ءِ‘ اُست آتا لارے‘ جوزہ و مارشت آتے بیان کننگ کیر۔ زار نا عہد آن چھپ‘ پد یا مست نن ہر دور نا تاریخ ٹی دا گڑ ءِ خننہ کہ اشارہ و ابہام کاریم اٹ ہتنگانے۔

ہندن غمخوارؔ حیات نا نہ بیرہ شاعری بلکہ افسانہ غاتیٹی ہراڑے ننے ابہام نا کاریم اٹ ہتنگ رسینگک اونا سوب و مسخت ہم ہندادے۔ نن کل دا گڑا غان واخب اُن کہ اینو نن ہرا حالیت و دے تیان تدینگن‘ بیدس ابہام آن تینا ہیت ءِ کننگ ہچو وڑ ئسے اٹ آسان اف۔

ای تو دا پاوہ کہ ابہام اگہ ایلو ادب آتیٹی جمالیاتی ءُ خواست ئسے گڑا ننکن بنماسی ءُ خواست ئسے۔ ولدا ہرا وڑ کہ غمخوار حیات نا شاعری ءِ کہ داٹی رومانیت‘ انقلاب‘ مزاحمت‘ ندارہ کشی‘ خطابت ساڑی ءِ تو اوڑکن ابہام نا مننگ حسن ئتون اوار خواست ئسے ہم۔ دافتون اوار فنکار ئسے نا تینا ہندنو ڈکھ و ویل‘ ارمان و اُستخوائی‘ نفسیاتی پریشانی‘ ذہنی سرگڑدانی‘ جنسیاتی پریشانی‘ پین چندی ویل آک مریرہ ہرافتے او کس آ پاش کننگ خواپک تو ابہام اٹ کاریم ہلیک۔
ابہام نا استعمال کننگ ہراڑے شاعری نا زیبائی ءِ ودفک ہموڑے اگہ ابہام سعی وڑٹ استعمال کننگتو تو شاعری ءِ بے زیب ہم کیک۔

ولے غمخوارؔ حیات نا شاعری ٹی ہرا زیبائیک ابہام آن ودی مسونو او گچینیک داپنج (۵)سوب آن ءُ؛
اولیکو: او نا شاعری ٹی دنو لوز اف ہرانا معنیک خوانوکا ءِ بفس۔
ارٹمیکو: ہرا ہیت ابہام ٹی کننگانے و مکمل کننگانے‘ دن ہچ متنے کہ ابہام ہم مرے و ہیت ہم نیمہ مرے۔
مسٹمیکو: ہراڑے ہیتے برملا کروئی مسونے اوڑے رمز‘ علامت و استعارہ آن کمک ہلنگتنے۔
چارمیکو: ہرا لوز آک استعمال کننگانو اوفتا ترتیب سمجھ ئٹی بریک‘ یعنی ابہام نا سوب آن لوز آک بے ترتیب متنو۔
پنجمیکو: ہرا گڑا کنے گچین لگا او دادے کہ غمخوارؔ نا شاعری ٹی اسہ دنو ہیت اس (دا کتاب ”نوکاپ“ ئٹی) کنا نظر آن تیر متو ہرا ہندنو تجربہ اس مرے ہرا کنا یا ننا (بلوچستان نا باتی تا) تجربہ آن چھپ ءُ ہیت اس مرے۔

گڑاس مثال:
بانورے بیرفوکا جنوزان او کرے
سِلا دتر ٹی زند اسے حنامی آ گروک
٭

جہانا بشخا پورا مہرے تینا
حیات نا سرجم آ حصہ کنائے
٭

مسیحا دا مظلوم آ غمخوار ہنا
پدا آسمان آن خدا کے بریس
٭

داڑن بیدس غمخوارؔ حیات نا شاعری ننا روایتی شاعری نا رنگ آتیان پرے۔ ہراڑے اینو نا شاعر پوسکنا لہجہ ءِ تینائی کننگے‘ پوسکنو علامت استعمال کننگے‘ ہموڑے حیاتؔ نا شاعری تیان دا پاش مریک کہ او دا گڑاتا ذی آ کاوشت کننگ خواپک (ہرا اودے جتا کرینے) او ہرا نا بھلا سوب کنا ماسہ دادے کہ او نا جند براہوئی متکنا شاعری تیان باز خڑکے‘ یعنی براہوئی قدیم شاعری تے خواننگ ئتون اوار خوانفنگ۔

ہندا خوانفنگ نا سلسلہ آن دا ہیت مونا بریک کہ یا تو او براہوئی قدیم شاعرتیان متاثر ءِ ہندا سوب آن دنو رنگ ئنا شاعری کیک یا تو دا شاعری تا مطالعہ آن اونا شاعری ٹی دا رنگ آک بننگو۔

گڑاس مثال اونا شاعری تا‘ ہراٹی او متکنا علامت آتا زیات استعمال ءِ کرینے‘ او دافتون اوار اونا شاعری ٹی تشبیہہ و استعارہ نا گیشتر استعمال آک ہم ننے دو بریرہ‘ اوفتا ہم گڑاس مثال:

بہار توبے آ رنگ اس شلانے ولدا
پریس چلتن نا ذی آ دڑانے ولدا
اوارو گواڑخو پرک نا خن تا کوچہ ٹی
حیات خلق اٹی نا پن سرانے ولدا
٭

نا مہر ئنا جمر بے پامے
دا دریا دریا ہو شامے
رژن ئنا دشمنک اینو ولدا
خاخر تسونو گوربامے
٭

توبے نا درو خمب آن او پلانو استارتے
ماگمے پدا تالان چانڑدیک بے گوآو

جنگل آک ویرانو شار ئٹی نہار آکو
بندغ آک خرماو بندغیک بے گوآو
٭

”نوکاپ“ نا شاعری تے خواننگ آن پد‘ غمخوارؔ حیات نا داکان مست نا شینک مروکا شاعری تے ہرسہ‘ ای دا پاوہ کہ ایہن تو اسہ شاعر اس پریگمیٹک (حقیقت پسندانہ‘ رغاموک‘ پوہ کروکا) شاعری کیک یا ایکسپریسف ءُ (تینا ذات ئنا‘ تینا تہہ نا جہان نا درشان ءِ کروکا) شاعری کیک ولے حیاتؔ ہڑتوما ذیل آتا شاعرے و ننے اونا ماسہ دا بشخ آتا کل سرحال آک دو بریرہ۔ او کل آن زیات ہرا اونا جوانی ءِ او دادے کہ غمخوارؔ حیات ہمو نوشتہ کار آتیانے ہرا زندگی و ادب ٹی مروکا چینجنگ‘ انقلاب و ترقی تون مونا سفر کرسہ ہم تدوکا زندگی و ادب نا ویلیوز آتا احساس ءِ کیرہ۔

ایہن تو کنا اُست خوائک کہ ای غمخوارؔ حیات نا شاعری نا ایلو کل گچینا پہلو تیا ہم ہیت کیو ولے نما و ”نوکاپ“ نا نیام اٹ پین زیات اوار تمنگ ہم کنے جوان لگنگ اف‘ ہندا سوب آن تینا ہیت آتے ایسر کرسہ آخر ٹی دا پاوہ کہ ہرا پوسکنا نوشتہ کار و قاریک براہوئی شاعری نا متکنا و پوسکنا رنگ آتیان مانوس مننگ خوارہ او بائدے غمخوارؔ حیات نا شاعری تے دوئی کیر۔

داڑتون اوار یات مرے ہچو شاعر اس پوسکنا ادب ءِ ہمو وخت اسکان پوہ مننگ کپک تانک اسکان تینے متکنا ادب نا‘ اوفتا ویلیوز آتون ہم گرنچ کتنے‘ او ہندا سوب آن امرسنؔ پوسکنو کتاب ئسے نا خواننگ آن پد متکنو کتاب ئسے آ دو بٹیکا۔

گڑاس پین شعر نوکاپ آن:

رژن ئنا دشمنک اینو ولدہ
خاخر تسونو گوربامے

ننا خیال و شعرتے ٹی دڑداکو بیرہ
پین ہچ اف ننتو زبانے دا غمتا

محشر آن خڑک ہرادے پارینو
دا ہمو آخری زمانہ اے

پا ہمر تیو جواباتے چپ انگا خن تا
نا سوالاتے ٹی خلوک نا جواباک اریر

ای چاری کسر تیا زمانہ سے آن
شاہد نا گمانان خدا کے بریس

اُستان مفک نے تو اگہ مہر تو ہل تا
غمخوار دروغاتا دا سُجدہ تے زراب ایت

کس وڑتو پد نے آن نی باورکہ دلربا
یاداک نا پین کس تو سنگی کہ ہلپسا

اے کہ استارتا رند ئٹی او رژناتا سفر اوفتونے
اے کہ راہشونو راج ئسے نا سُہباتا کسر اوفتونے

اے کہ بالاترو ہڑزان بیم آن بے خلیس او
اے کہ ہمراہ و مرگ اسے تو زنداتا سفر اوفتونے

بلوچستان نا ساحلی شار گوادر ٹی دیر نا نیستی برجاء، اسہ وار پین مخلوق کسر تیا برانز کننگے۔

پنچ شمبے نا دے شار والا تا برانز کننگ آن حق دو تحریک نا راہشون مولانا ہدایت الرحمٰن، حسین واڈیلہ و ماجد حیدر ہیت کریسہ پاریر کہ نن پانہ دیر ایتبو، او یورپ و لندن ٹی دیر نا پلان جوڑ کیرہ او پارہ کہ گوادر ٹی دیر نا کمبوتی اف، ہمو افسر آک ہرا ایم پی نا دوست مریر دافتیان اسِٹ شکیل ایکسین ءِ۔

اوفتا پاننگ ءِ کہ غُٹ جماعت آک اونا بدلی کننگ نا خواست کیرہ کہ اگہ دا گوادر ٹی مس برانز کرون۔

اوفتا پاننگ ئس کہ کہدہ بابر لندن ئٹ پیری کننگ ءِ۔ عمان، دبئی لندن یا امریکہ یا کینیڈا نا سفر مریک گوادر نا بندغ آک ملاسی آن کہیر اوفتے فرخ تمپک۔

برانز کروک آتا پاننگ ءِ کہ تیوہ گوادر نا خوانندہ آک بے روزگار ءُ پیشن آن اسہ کور ئسے داڑے ذمہ واری تننگانے۔

اوفتا پاننگ ءِ کہ روزگار، دیر، بجلی و ہرا بنیاتی بکار آکو گوادر دافتیان نیست ءِ اگہ دا دیر تننگ کپسہ شرم نا جاگہ ءِ اینو ننا برانز آ اوفک دفتر تیا کُلف خلیسہ نرار ننے دا کُلف آک توننگ کپسہ نن داسا نُما دفتر تیان گُڈ جی ڈی اے و واپس ڈی سی نا دفتر نا مونا برانز کرون۔

اوفتا پاننگ ئس کہ کار سرکار ٹی مداخلت کننگ نا ننے آ مُدام دوبہ لگنگ ءِ کہ نن حق نا ہیت ءِ کینہ ولے ہرا دیر تِفس، بجلی تِفس گڑا بائدے ایف آئی آر کروئی مریک۔ عوام برانز کرے و ایف آئی آر مریک دیر خوائرے بجلی خوائرے انتئے دیر ءِ کشنگ نا خواست کیرے ۔

کوئٹہ برانز آ تولوک بیگواہ بندغ تا خاہوت آتا پاننگ ءِ کہ حکومت بلوچستان وے پامی نا درشانی کننگ ءِ۔ خاہوت آک بیگواہ دوست آتا وے یلہ کننگ نا برخلاف پھگہ آن برانز نا پڑو کرینو۔

بیگواہ بندغ آتا خاہوت آتا پاننگ ءِ کہ پر امن جہُد آن دیوان آتیٹ تولوک حکمران آتے فرخ تمپک مخوق نا آجو کننگ کِن حکمت عملی بدل کریسہ برانز آ تولوک خاہوت آک برانز کرور۔ اوفک تیوہ بلوچستان ٹی برانز نا خواست کرینو۔

برانز کروک آتیٹ بیگواہ ڈاکٹر دین محمد نا مسِڑ سمی دین، بیگواہ شبیر بلوچ نا ہیڑ سیماء بلوچ، خضدار آن تعلق تخوک سائرہ بلوچ، بیگواہ راشد حسین نا لُمہ، بیگواہ سعید احمد نا لُمہ، بلوچ باسک بیبو بلوچ تون اوار بیگواہ بندغ آتا خاہوت آک تینا ویڈیو کلہو ٹی خواست کریر کہ کوئٹہ ٹی ساڑی مروک بیگواہ بندغ آتا خاہوت آتون اوار بندغی حق آتا باسک آک پھگہ برانز ئٹ اوار مریر۔

بیگواہ بندغ آتا خاہوت آک پاریر کہ تدوکا ہفت دے آن زیات پِر کننگ نا سوب آن گورنر ہاؤس نا مونا انصاف کِن برانز کروک تولوک ءُ اسہ ہفتہ اسکان ننے بنوکو کس اف کہ ننا مُسہ خواست ءُ ننا خواست آتا عمل درآمد کننگ افس ۔

ویڈیو کُلہو ٹی سمی دین محمد بلوچ نا پاننگ ءِ کہ حکومت ءِ مُسہ خواست تننگا ہرافتیٹ گیشتر زیارت نا وڑ تدینی تا وے سَلوک و بیگواہ بندغ آتا آجو کننگ و زیارت تدینی آ جوڈیشنل انکوائری کمیٹی جوڑ کننگ نا خواست اوار ئس واہم حکومت و ریاست تدوکا سینزدہ سال آن بے پامی تینا کرینو ۔

ہم نے آج تک ریاست کو زرہ برابر بھی نقصان نہیں پہنچایا، اپنے پیاروں کی بازیابی کیلئے پرامن احتجاج میں سڑکوں پر خود کو اذیت دے کر ریاستی اداروں کو اپنی درد اور تکلیف کو سمجھانے اور احساس دلانے کی کوشش میں ان اذیتوں سے خود زخمی ہوچکے ہیں لیکن ریاست نے بے حس ہونے کا عہدکیا ہے۔ pic.twitter.com/QsRmvuGdgu

— Sammi Deen Baloch (@SammiBaluch) July 27, 2022

سمی دین بلوچ نا پاننگ ئس کہ ریاست نا دا وے انصافی نا بر خلاف ہڑ دے نن برانز کننگ آ بے وس اُن داسا زیات سخت برانز کننگ نا لڑ بناء کننگ ءُ۔

ایلو پارہ غان کوئٹہ ٹی بیگواہ بلوچ آتا آجو کننگ کن برانزی کیمپ برجاء ءِ۔ وائس فار بلوچ مسنگ پرسنز نابین برانز ءِ 4712 دے مس، جتا تپہ آن تعلق تخوک بندغ آک کیمپ آ بریسہ خاہوت آتون ہم کوپئی کریر۔

وی بی ایم پی نا راہشون ماما قدیر بلوچ ہیت کریسہ پارے کہ بلوچ قوم سما کرینے، بلوچستان نا چُنا چُنا ءِ تینا غلامی نا احساس مسُنے ہر اسٹ تُغ آن بیدار مسُنے ہر اسٹ بیگواہ بندغ آتا آجو کننگ نا توار ءِ خلیسہ ءِ و دا جہُد ئٹ دتر وہیسہ ءِ و دتر وہیسہ کرو دا عظیم بندغ آتا دتر وہیسہ کرو و دا دتر ضائع مروف دا شہید آتا دتر آن جہُد ترُند مننگ ءِ۔

ڈالر نا مونا رپئی نا قدر پین زوال نا گواچی

چار شمبے نا دے رپئی نا قدر پین زوال نا گواچی خننگسہ ءِ۔ چار شمبے نا دے سوداگری نا بناء ئٹ انٹر بینک مارکیٹ ئٹ امریکئی ڈالر اولیکو وار 237 رپئی آ ہنا سرمس۔ انٹربینک ئٹ امریکئی ڈالر سوداگری نا وخت 4 رپئی 07 پیسہ کبین مس۔ انٹربینک ئٹ ڈالر نو دے آن برجاء کبین مننگے۔

ملوک مارکیٹ ئٹ ڈالر 240.50 رپئی نا کچ آ سر مریسہ بند مس۔ نو دے ئٹ انٹربینک ئٹ امریکئی ڈالر 28 رپئی کبین مسونے۔

ہندی زر مارکیٹ ئٹ تدوک نو دے ئنا نیامٹ ڈالر نا قدر ئٹ 30 در فیصد زیات نا ودکی خننگانے۔

زرگزرانی چاہندار آتا پاننگ ءِ کہ ملک نا سیاسی حالیت و آئی ایم ایف تون معاہدہ آن گڈ ہم معاملہ آتیٹ گام ارفپننگ نا سوب آن پاکستانی زر برجاء ترندی تا گواچی ءِ۔

کوئٹہ گورنر ہاؤس نا مونا برانز آ تولوک بیگواہ جمیل احمد سرپرہ نا زائیفہ تینا ارغ نا آجوئی نا خواست کرینے۔ میڈیا تون اوار بندغی حق آتا تنظیم آتیان ہم خواست کرینے کہ ننا توار ءِ کوالخواہ تے اسکان سر کننگ ٹی کنا و کنا چُناتا کمک ءِ کیر۔

بیگواہ جمیل سرپرہ نا زائیفہ کوئٹہ ٹی برانز آن پریس کانفرنس کریسہ صحافی تے پارے کہ جمیل احمد سرپرہ ہرا اسہ سرکاری ملازم و مسکوئی گورنر بلوچستان احمد خان اچکزئی نا پی آر او ئس، 25 جولائی نا نن ننا اُرا گرین ٹاؤن سریاب روڈ کوئٹہ آن اے ٹی ایف و ایف سی نا کارندہ آک اودے دزگیر کریسہ بیگواہ کریر۔

جمیل سرپرہ نا زائیفہ میڈیا ءِ پارے کہ ای تینا ارغ نا آجوئی و تینا چُنکا بے وس آ چُنا تون اوار تیوہ ذمہ وار تپہ آ توار ارفیٹ ولے کنا ارغ دائسکان آجو کننگتنے و نئے کہ دا باروٹ ننے حوال رسینگانے کہ و ارا حالیت ٹی ءِ نن دا جِتائی و دڑد و ڈُکھ آن دا وخت گدرینگ اُن کنا ہلہ و جمیل احمد سرپرہ نا باوہ عبدالغنی تینا مار نا انتظار ئٹ دا جہان آن کذیت کرے ۔

بیگواہ جمیل احمد سرپرہ نا زائیفہ نا پاننگ ءِ کہ جمیل احمد نا لُمہ ہفت سال آن تیوہ نن دروازہ آ ہُروک مریک کہ ہراتَم کنا مار پدا برو ۔

اونا پاننگ ءِ کہ کنا اِرا چُنکو چُنا ءُ ای کوالخواہ تیان خواست کیوہ کہ کنا چُنا و کنے آ رحم کبو و جمیل احمد سرپرہ ءِ آجو کبو، زیارت تدینی آن گُڈ نن بھاز زیات فریشان اُن و ذہنی اذیت آن گدرینگ اُن ۔

بیگواہ جمیل احمد سرپرہ نا زائیفہ تینا پریس کانفرنس ٹی پارے کہ اگہ اسہ ڈوہ اس کنا ارغ کرینے گڑا اودے عدالت آتیٹ ہتبو و ہرا قانود نا ردئٹ سزا مرے کنے کنا چُنا و جمیل احمد نا لُمہ ءِ قبول ءِ ولے ہرا دڑد ئٹ نن گدرینگ اُن ننے داڑان خلاص کبو ننے ننا اُراتا خوئشی و کنا چُناتے اوفتا باوہ ءِ ایتبو ۔

تدوکاتو بلوچستان نا علاقہ ہرنائی ٹی نادرست بندغ آتا دو آن برمتہ مروک  کول کمپنی نا منیجر شیر بہادر نا جوْن خننگانے۔

شیر بہادر نا جوْن تدوکا شام بلوچستان ناعلاقہ ہرنائی آن خننگانے۔

یاتی مرے کہ پن کروک کول کمپنی نا منیجر تون اوار پین مُسہ مزورکار ءِ دوانزدہ جون آ نادرست بندغ آک شام ئنا وخت کوئٹہ نا ایب کیب نا علاقہ اسپین کاریز آن برمتہ کریسر۔

پولیس نا دا وخت پاننگ  ءِ کہ برمتہ کروک مزور کار آتیٹ اسٹ  انجینیئر و 3 کانکن اوار ءُ برمتہ مروک آتیٹ 2 نا تعلقدار چکوال،اسٹ نا صوابی و ایلو نا مظفر آباد آن ءِ۔

کولا کانڑ نا مزورکار تا برمتہ مننگ نا مقدمہ ہنہ اوڑک تھانہ ٹی نوشت کننگانے داسکان پن کروک  کول کمپنی نا مزورکار تا برمتہ کننگ و کسفینگ نا سوب آک سما تمتنو وا نہ کس ویل ئنا ذمہ واری ءِ  داسکان ارفینے۔