بلوچستان نا جتاء ضلع تیٹ سم کاری نا مُسہ جتاء تدینی تیٹ اِرا زالبول نا خون کننگا اندن کوئٹہ ٹی مار باوہ نا خون ءِ کرے۔

شابیتی حوال تا رد ئٹ تدوکا دے کوئٹہ نا علاقہ شاہ زمان روڈ آ گمانی رد ئٹ اَرغ اُرا ٹی پترینگسہ سم کاری ئٹ تینا زائیفہ ءِ کسفے و نرا۔ بست و بندی کوالخواک خون نا سوب ءِ اُرائی جیڑہ پارینے۔

ایلو پارہ غا بلوچستان نا ضلع قلات ئٹ مروک اسہ تدینی سیٹی محمد رمضان پنی ءُ بندغ ئس سم کاری کریسہ زالبول ءِ کسفے و جاگہ آن نرا۔

تدینی نا حوال ءِ بننگ تون پولیس جاگہ آ سر مریسہ جون ءِ اسپتال آ سر کرے ہراڑے الّمی کارروائی آن گڈ جون خاہوت نا دو ٹی تننگا۔

قلات تدینی نا سوب آک داسکان مونا بتنو۔

یاتی مرے بلوچستان ئٹ اُرائی وے ٹہی و ننگ نا پِن آ زالبول تا خون نا تدینیک ہر وخت رپورٹ مسنو اندن پن کروک تدینی تیٹ قانود نافذ کروک ادارہ غاک ڈوہدار بندغ تیان بھاز کم ءِ عدالت ئٹ ہیسنو۔

حساب و کچ نا رد ئٹ پاکستان ٹی ہر سال ہزار آن زیات زالبول تا خون مریک ہرافتیٹ بھاز آتا ننگ نا پن آ خون کننگک۔

ایلو پارہ غا تدوکا دے تھانہ خروٹ آباد نا ہند آتیٹ سعید الرحمان ولد حاجی محمد حسن سم کاری کریسہ تینا باوہ ءِ کسفیسس۔ پولیس ڈوہدار مار ءِ دزگیر کرینے۔

بلوچستان نا ضلع پنجگور آن سال آتیان مُست بیگواہ مروک مُسہ بندغ آجو مریسہ تینا اُرا تے سر مسر۔

آجو مروک آ بندغ آتیٹ فیصل دوست، باسط و ناصر اوار ءُ۔

آجو مروک آتیان باسط و فیصل ءِ اسہ سال ئس مست اندن ناصر ءِ اِرا سال مست زوراکی ئٹ بیگواہ کننگاسس۔

پن کروک بندغ تا یلہ مننگ ءِ وائس فار بلوچ مسنگ پرسنز و خاہوت آک پک کرینو۔

یاتی مرے بلوچستان ئٹ زوراکی نا بیگواہی تا تدینیک اسہ بھلو ویل ئسے ءُ۔ اندن بیگواہ بندغ تے سی ٹی ڈی نا دو آن دروغ نا مونتس ئٹ خون کننگ نا تدینیک ہم رپورٹ مریسہ کیرہ۔

ہر بندغ وخت وخت گڑا، پِن یا ایلو شابیتی حوال تے گیرام کیک، خاص وڑ ئٹ ہموتم ہراتم زند بھاز اختہ مرے۔

ایہن تو وخت ئسے نا زی آ دُن مننگ خُلیس نا ہیت ئس اف ولے ہر وخت دن مننگ یاد داشت نا نزوری نا اشارہ مننگ کیک۔

یاد داشت نا نزوری ٹی جینز آک ہم کڑد ایسری ایترہ ولے خوراک و زند نا ڈول ہم دا باروٹ اہم ءِ۔

اگہ نم تینا یاد داشت ءِ جوان کننگ خواہرے گڑا منہ ارزان ءُ طریقہ شیف ئٹ نوشتہ ءُ:

*بورہ ءِ کم کاریم ئٹ ہتنگ*

بورہ ءِ زیات کاریم ئٹ اتنگ آن کہی طبی ویل آتون اوار دماخ ہم نزور مریک۔

پٹ و پول آن پاش مریک کہ بورہ ءِ زیات کاریم ئٹ ہتنگ یاد داشت ءِ نزور، و دماغی حجم ئٹ کمبوتی نا سوب جوڑ مریک، خاص وڑ ئٹ دماخ نا ہمو بشخ بھاز زیمی مریک ہرا چنکو وخت ئسیکن یات آتے رکھیک۔

اسہ پٹ و پول اسیٹ دا پاننگانے کہ ہنین ءُ شربت بھاز کُننگ آن یاد داشت نزور مریک، اندن بورہ نا کم کُننگ آن یاد داشت تون اوار ایلو جانجوڑی ہم جوان مریک۔

*مچھی نا تیل ہم کمکار*

مچھی نا تیل اومیگا تھری فیٹی ایسڈز و ڈی ایچ اے ایسڈ آن پُر مریک ہرا جانجوڑی کن گچین مریرہ۔

پٹ و پول کروک رپورٹ آتیان پاش مریک کہ مچھی و مچھی نا تیل ءِ کاریم ئٹ ہتنگ یاد داشت ءِ جوان کیک خاص وڑ ئٹ پیر انگا بندغ آتیٹ۔

*مراقبہ*

ہڑدے مراقبہ کننگ ہم جانجوڑی کن سواد مند مننگ کیک۔

مراقبہ آن ٹیشن ئٹ کمبوتی بریک، بلڈ پریشر کم مریک اندن یاد داشت ہم جوان مریک۔

پٹ و پول کروک رپورٹ آتیان سماء تمانے کہ مراقبہ آن ہر سن ئنا بندغ آتیٹ چنکا وخت نا یاد داشت جوان مریک۔

*جانجوڑ آ جون نا وزن*

جون نا وزن ءِ جانجوڑی اسکان تخنگ جون تون اوار ذہن کن ہم گچین ءِ۔

کہی پٹ و پول کروک رپورٹ آتیان پاش مسنے کہ ہولُنی آن دماخی نزوری نا بیم ودیک۔

ہولنی آن یاد داشت تون تفوک آ جینز آتیٹ بدلی بریک ہراڑان یاد داشت آ منفی زیم آک تمیرہ۔

ہولنی آن انسولین نا مزاحمت و ورم کونا ویل آتون ہم مون تروئی تمک و دا ہڑتوما دماخ کن نسخانی ءُ۔

ہولنی ءِ الزائمر ناجوڑی تون ہم تفرہ، دا دماخی ناجوڑی آن یاد داشت و دماخی کاریم تیا بھاز خراب ءُ زیم تمک۔

*تُغ نا پورو کننگ*

تغ نا کمبوتی ءِ ہم یاد داشت نا نزوری تون تفرہ۔

تغ یاد داشت ءِ سوگو کننگ ئٹ اہم ءُ کڑد ئس ایسری ایتک و پٹ و پول آن پاش مسنے کہ تغ نا کمبوتی آن یاد داشت آ منفی زیم تمک۔

اسہ پٹ و پول اسیٹ پاننگانے کہ تغ نا کمبوتی نا گواچی مروک بندغ آک یاد داشت نا آزموندہ تیٹ جوان کاریم کننگ نا درشانی کپسہ۔

اندا سوب ءِ کہ جانجوڑی چاہندار تا کنڈ آن ورنا آ بندغ آتے 7 آن 9 گھنٹہ تغ نا سلاہ تننگک۔

*دماخی تربیت*

دماخی گیم تا گوازی کننگ یاد داشت ءِ جوان کننگ نا اسہ گچین ءُ وڑ ئسے۔

کراس ورڈ یا یاد داشت کن، جوان انگا موبائل ایپس آتیان ہم یاد داشت ءِ جوان جوڑ کننگ مریک۔

اسہ پٹ و پول اسیٹ پاننگانے کہ دماخی گیم تا گوازی تیان بندغ آتا یاد داشت جوان مریک۔

*ریفائن کاربوہائیڈریٹس ءِ کن کاریم ئٹ اتبو*

بھلو کچ اسیٹ ریفائن کاربوہائیڈریٹس، دنکہ کیک، کوکیز، پیہن آ برنج و پیہن آ ڈبل روٹی تا بھلو وخت اسسکان کاریم ئٹ اتنگ یاد داشت ءِ نسخان رسیفنگ کیک۔

ننا جون اوفتیٹ ساڑی کاربوہائیڈریٹس آتے بھاز زو ہضم کیک ہراڑان بلڈ شوگر نا کچ ودیک۔

پٹ و پول کروک رپورٹ آتیان پاش مسنے کہ ریفائن کاربوہائیڈریٹس اوار آ خوراک آک دماخی نزوری و ڈیمینشیا نا بیم ءِ ودیفرہ۔

*وٹامن ڈی نا کچ آ نظر تخبو*

وٹامن ڈی جون کن بھاز اہم ءِ و اونا کمبوتی آن کہی ناجوڑی تا بیم ودیک۔

اسہ پٹ و پول اسیٹ پاننگانے کہ وٹامن ڈی نا کمبوتی نا گواچی مروک بندغ آتا یاد داشت نزور مننگ کیک۔

وٹامن ڈی نا کمبوتی ءِ ڈیمینشیا کونا ناجوڑی تون ہم تفرہ۔

*ورزش کبو*

ورزش جون نا و ذہن نا جانجوڑی ہڑتوما تیکن جوان ءِ۔

جانجوڑی پٹ و پول آن پاش مسنے کہ جون نا کاریمک دماخ کن فائدہ مند مریرہ و اوفتیان ہر سن نا بندغ تا یاد داشت آک جوان مریرہ۔

کہی پٹ و پول کروک رپورٹ آتیٹ دا ہم پاننگانے کہ ورزش آن دماخ ئٹ اندن انگا پروٹین تا کچ ودک ہرا دماخی جانجوڑی کن اہم مریرہ۔

نیمہ وہی ئٹ ورزش کننگ نا عادت آن بروک آ زند ئٹ ڈیمینشیا نا بیم ہم کم مریک۔

*جانجوڑی کن فائدہ مند خوراک نا گچین کاری*

ورم کش خوراک آتا کاریم ئٹ ہتنگ ہم یاد داشت ءِ جوان کننگ ئٹ کمک ایتک۔

دا اینٹی آکسائیڈنٹس فروٹ، سوزی و چاہ وغیرہ تیان جون ءِ دوئی مریرہ۔

اسہ پٹ و پول اسیٹ پاننگانے کہ ہرا بندغ آک فروٹ و سوزی بھاز کنیرہ اوفتیٹ دماخی نزوری و ڈیمینشیا نا بیم کم مریک۔

*زاڑچوبہ ہم جوان ءِ*

زاڑچوبہ ٹی ساڑی اسہ جز Curcumin ہرا جون نا تہٹی پولی فینولز پنی آ اینٹی آکسائیڈنٹ نا وڑ ئٹ کاریم کیک۔

دا ورم کش جز ئس مریک و پٹ و پول ئٹ پاش مسنے کہ Curcumin آن دماخ ئٹ تکسیدی تناؤ و ورم ئٹ کمبوتی بریک و اندن انگا زاری آ مواد آتا اشتماع کم مریک ہرا یاد داشت ءِ نزور کننگ نا سوب جوڑ مریرہ۔

*کوکو پاؤڈر*

کوکو پاؤڈر آن جون ءِ طاغتور اینٹی آکسائیڈنٹس flavonoids دوئی مریک و پٹ و پول آن پاش مسنے کہ flavonoids دماخ کن زیات فائدہ مند اینٹی آکسائیڈنٹس ءُ۔

دافتیان دتر نا رغ تا بست و بند جوان مریک و دماخ نا ہمو بشخ آتیٹ دتر نا ہن و بر ودیک ہرا یاد داشت کن جوان مریرہ۔

اسہ پٹ و پول اسیٹ پاننگانے کہ ہرا بندغ تے ڈارک چاکلیٹ کُننگ نا عادت مریک او یاد داشت نا آزموندہ ئٹ ایلو بندغ آتیان جوان کاریم کننگ نا درشانی کیرہ۔