بلوچستان نا ضلع نوشکی آن زوراکی ئٹ بیگواہ مروک ورنا اس آجو مسنے اندن بلوچستان نا بنجائی شار کوئٹہ آن پاکستانی لشکراسہ ورنا ئسے دزگیر کریسہ نادرست جاگہ آ درینے۔

ٹی بی پی حوالکار نا رد ئٹ نوشکی آن 24 ستمبر 2020 آ زوراکی ئٹ بیگواہ مروک شاہد ولد حاجی شریف بادینی آجو مسنے۔ شاہدبادینی ءِ فرنٹیئر کور و سادہ پُچ بینوک کارندہ غاک نوشکی نا علاقہ کیشنگی آن زوراکی ئٹ بیگواہ کریسر۔

ایلو پارہ غا تدوکا دے شام نا نماز آن گڈ پاکستانی لشکر ولی جیٹ کلی سردہ سریاب کوئٹہ نا ہند آن اسہ بندغ ئسے دزگیر کریسہنادرست جاگہ ئسے درینت۔ دزگیری آن گڈ بیگواہ مروک بندغ نا چاہنداری محمد یاسر نا پن ئٹ مسنے۔

حوال تا رد ئٹ پن کروک بندغ ءِ پاکستانی لشکر اُرا نا مونا پرچون نا دکان آن دزگیر کرینے۔

یاتی مرے بلوچستان ئٹ زوراکی نا بیگواہی تا تدینیک ہڑدے مونا بریرہ، برجاء ہفتہ ٹی بلوچستان نا جتاء علاقہ تیان زوراکی نا بیگواہیتا تدینیک رپورٹ مسنو۔

بلوچستان ٹی زوراکی نا بیگواہی تا تدینیک برجاء ءُ۔ تدوکا دے تیٹ ہراڑے جتاء علاقہ آتیان اِرا بندغ آجو کننگانو ہموڑے زوراکی ئٹبیگواہی تا تدینیک ہم رپورٹ مسونو۔ 

خضدار و نوشکی آن گڈ کوئٹہ آن اسہ ورنا ئسے نا زوراکی ئٹ بیگواہی نا تدینی رپورٹ مسونے۔ 

ٹی بی پی ءِ دوئی مروک حوال تا رد ئٹ سبزل روڈ کلی بنگلزئی نا رہینگوک ورنا برکت ولد محمد عارف بنگلزئی ءِ 27 ستمبر 2022 نا نناونا اُرا آن زوراکی ئٹ بیگواہ کننگانے ہرانا باروٹ دائسکان ہچو حوال ئس رسینگتنے۔ 

علاقئی بندغ آتا پاننگ ءِ کہ پاکستانی فورسز فرنٹیئر کور و سادہ پُچ بینوک کارندہ آتا بھلو کچ ئس اُلاخ آتیٹ رسینگیسہ علاقہ ءِ گھیرہکریر و پِن کروک ورنا ءِ تینتون اوار دریر۔

یاتی مرے کہ تدوکا دے تیٹ بلوچ بیگواہ بندغ آتا خاہوت آک وفاقی وزیر رانا ثناءاللہ نا باوری کننگ آ کوئٹہ ریڈ زون ٹی تینا برانز ءِ ایسرکریسُر ہراڑے برانز کروک آتے کمیٹی باوری کرفے کہ زوراکی نا بیگواہی تا توننگ کن گام ارفنگو اندن برانز کروک آتا پارہ غان تروکبیگواہ بندغ آتا پن تا لڑ آ گام ارفیسہ بندغ آتے آجو کننگو۔ 

پِن کروک فہرست آن داسکان اسہ بندغ ئس آجو مسونے واہم دانا زی آ گیشتر گام ارفنگتنے۔

بلوچ اسٹوڈنٹس ایکشن کمیٹی نا کنڈ آن اسلامیہ یونیورسٹی بہاولپور نا خوانندہ آتون ہمکوپئی نا درشانی کننگ کن دپدرشانی کننگا ہراٹی خوانندہ آتون اوار جتاء تپہ تا بندغ آک بھلو کچ اسیٹ اوار مسر۔

برانز ئٹ تران کروک آتا پاننگ ئس کہ تدوکا منہ وخت آن پنجاب تون اوار ایلو صوبہ آتیٹ خوانوک بلوچ آتا تعلیمی چرجوئی ٹی اسہ چمئسے نا وڑ ہڑاند بش کننگک۔ پنجاب نا گیشتر ادارہ آتیٹ تخنگوک نشست آتے ہر وار ایسر کننگک و خوانندہ آتیان فیس خوائنگک ہرابلوچ آتے خواننگ آن مُر تخنگ نا اسہ چم ئسے۔

اوفک پاریر کہ داڑان بیدس پنجاب ئٹ خوانندہ غاک خُلیس تون مون تننگ ءُ و اوفتے جامعہ تا تہٹی پروفائلنگ نا گواچی کننگک۔ دا وڑ ناحالیت آک خوانندہ تے ذہنی بے دادی نا گواچی کرینو ہرافتا سوب آن خوانندہ تا تعلیمی چرجوئی زیمی مننگ ءِ۔ حکومت حالیت آتاسختی ءِ اریسہ و پنجاب ئٹ خوانوک خوانندہ تا خواست آتے سوبری ئٹ ہلیسہ اوفتیا گام ارفہ۔

تنظیم نا نمائندہ غاک تران کریسہ پاریر کہ اختیار دار آک بہاولپور یونیورسٹی نا خوانندہ تا خواست آتیا گام ارفیسہ زوت اوفتا ویل آتےایسر کیر۔ اگہ جامعہ بست و بند و حکومت اندن خوانندہ تا خواست آتیا پامدار متور گڑا بلوچ اسٹوڈنٹس ایکشن کمیٹی اسہ خوانندہتنظیم ئسے نا رِدئٹ خوانندہ آتون اوار ترند برانز کرو۔

کابل پولیس نا رد ئٹ اوغانستان نا بنجائی شار کابل ئٹ مروک آ تراک آن 19 بندغ بیران اندن کہیک ٹپی مسنو۔ بیران و ٹپی مروک آتیٹبھلا کچ خوانندہ آتا ءِ۔

دا تراک شار نا دے کیہلینگ دشت برچی نا علاقہ ٹی ٹہیفوک تعلیمی ادارہ ‘کاج’ ئٹ مسنے۔

دا تعلیمی ادارہ نا اوغدیدار آک پارینو کہ خوانندہ غاک یونیورسٹی نا پریکٹس امتحان ئٹ ساڑی ئسر ہراتم تراک مس۔

یاتی مرے کہ دا علاقہ ٹی رہینگوک گیشتر بندغ آتا تعلقداری اقلیتی ہزارہ برادری آن ءِ ہرافتے داکان مُست ہم کہی وار جلہو آتیٹ ٹککننگانے۔

ہندی ٹی وی و راجی حوالکاری میڈیا آ شینک مروک فوٹیج ئٹ خڑک نا اسپتال نا ندارہ غاک خننگرہ ہراڑے جونک ڈغار آ تالان ءُ۔  ہندیمیڈیا ٹی بھس مروک کلاس تیٹ مش نا ڈھیر چَپی تموک میز و کرسیک ہم خننگرہ۔

اسہ اسپتال ئسے ٹی تینا ہیڑ ءِ پٹنگ کن بروک ءُ زالبول ئس حوال شینک کروک ادارہ اے ایف پی ءِ پارے کہ “او داڑے ننے رسینگتو، اونوزدہ سال نا ئسے۔”

‘کاج ٹیوشن سینٹر’ اسہ پرائیویٹ کالج ئسے ہراڑے نرینہ و زالبول ہڑتوماتے خوانفنگک۔ تدوکا سال اگست ٹی طالبان نا اقتدار ئٹ بننگآن گڈ ملک ئٹ مسنتا بھاز آ اسکول آک بند ءُ ولے منہ پرائیوٹ اسکول ملوک ءُ۔

داسکان ہچو ٹولی ئس دا تراک نا ذمہ واری ءِ ارفتنے۔

ہزارہ برادری بھلو وخت سے آن شدت پسند تنظیم دولت اسلامیہ و طالبان ہڑتوما تا کنڈ آن مروک آ ظلم و زوراکی تون مون تننگ ءِ۔ ہزارہبرادری ٹی بھاز آ بندغ آک شیعہ مسلمان ءُ۔

دولت اسلامیہ و طالبان دا ہڑتوما ٹولیک سنی اسلام ءِ منیرہ۔

ہزارہ اوغانستان ئٹ مسٹمی بھلا نسلی اقلیت ءِ۔

طالبان وزارت داخلہ نا ترجمان دا تراک نا مذمت کریسہ پارے کہ سکیورٹی ٹولیک تراک نا جاگہ آ ساڑی ءُ۔

ترجمان عبدالنافی ٹاکور پارے کہ معصوم بندغ آتیا جلہو آک دژمن نا بے بندغی رویہ و اونا اخلاقی معیار نا کمبوتی ءِ پاش کیرہ۔

امریکہ نا کنڈ آن ہم دا جلہو نا سخت لوز آتیٹ مذمت کننگانے۔

اوغانستان ئٹ امریکی مشن چارج ڈی افیئرز، کیرن ڈیکر اسہ ٹوئیٹ اسیٹی پارینے کہ “امتحان تروک آ خوانندہ تیان پُر انگا کوٹی ءِ ٹککننگ گندہ ءُ کاریم ئسے۔ خوانندہ آتے بیدس خلیس آن خواننگ نا حق دوئی مرے۔”

طالبان تدوکا سال اگست ئٹ اوغانستان ٹی اقتدار ئٹ بسوسس و اوفتا پاننگ ءِ کہ نن ملک ئٹ سوگوی اتنگ نا کوشست کننگ اُن۔

واہم ملک ئٹ اوفتا حریف ٹولی و پن ئنا شدت پسند تنظیم دولت اسلامیہ نا جلہوک برجاء ءُ۔

دشت برچی نا علاقہ ٹی اسکول و اسپتال آتے ہر وخت جلہو نا گواچی کننگانے۔

تدوکا سال طالبان نا اقتدار ئٹ بننگ آن مالو دشت برچی ٹی مسنتا اسہ اسکول ئسے آ بمب جلہو مسوسس ہرا ٹی کم و ود 85 بندغبیران و کہیک ٹپی مسوسر، ہرافتیٹ بھلا کچ خوانندہ تا ئس۔

بلوچستان نا متکنا ربیدگ ءِ درشان کننگ کن کوئٹہ ٹی مہر گڑھ نا پِن آن میوزیم جوڑ کننگانے بلوچستان نا متکنا تہذیب و راجی زند وزند ءِ رکھ کننگ کن سریاب روڈ آ مہر گڑھ میوزیم جوڑ کننگا ۔

داٹی ہفتمیکو صدی آن ہژدہ میکو صدی نا نیام ئٹ بلوچستان نا تاریخی ہند مہر گڑھ آن چاہندار کننگانے۔ دا ماڑی ٹی متکنا نوادرات،زمغ، توفک آک و قرآنی نسخہ آتے تخنگانے۔ میوزیم ٹی تخوک عکس آک ہم متکنا بلوچستان نا ربیدگ ءِ درشان کیرہ۔ وزیراعلیٰبلوچستان پُوسکنا میوزیم نا بناء ءِ کرے ۔

وزیر اعلیٰ نا پاننگ ئس کہ میوزیم نا جوڑ کننگ نا مسخت بلوچستان نا ہزار آ سالہ تا تاریخ نا رکھ کننگ تون اوار درشان کننگ ءِ۔میوزیم ءِ جہانی معیار نا جوڑ کننگ کن خرابی تے اریسہ اوفتے مُر کرون ۔

حکومتی وزیر آتا پاننگ ئس کہ کہ بلوچستان نا گیشتر علاقہ آتیٹ ہم زُوت ئٹ میوزیم جوڑ کننگو۔

بلوچ راج دوست راہشون و عوامی ورکرز پارٹی نا صدر مستی خان کزیت کرے۔ خاہوتی حوال تا رد ئٹ یوسف مستی خان ناجوڑی آن گڈاینو سہب نا 6 بجہ آ کذیت کرینے۔

بزرگ بلوچ سیاسی راہشون، عوامی ورکرز پارٹی نا صدر یوسف مستی خان 16 جولائی 1948 آ سندھ نا شار کراچی ٹی ودیمسوسس۔ او تینا بنائی خواننگ ءِ کراچی نا اِرا اسکول آن دوئی کرے۔ ودیک ہشتمی جماعت اسکان او برن ہال اسکول ایبٹ آباد آندوئی کرے۔ مُسہ سال آن گڈ او پدا بس و کراچی گرامر اسکول و سینٹ پیٹرک ہائی اسکول، کراچی ٹی ودیک خوانا۔

او منہ وخت سندھ آرٹس کالج، کراچی ٹی خوانا و 1968 ٹی گورنمنٹ نیشنل کالج کراچی آن بی اے نا ڈگری ءِ الک۔

پنجاب نا شار بہاولپور ئٹ اسلامیہ یونیورسٹی ٹی خوانوک بلوچ خوانندہ غاک تدوکا مُسہ دے آن برانز ئٹ تولوک ءُ، خوانندہ غاک پاریرکہ برانز نا سوب آن ننا 9 سنگت ءِ یونیورسٹی بست و بند کشانے۔

اسلامیہ یونیورسٹی نا مونا بلوچستان نا خاص انگا نشست آتا بحالی کن برانز ئٹ تولوک بلوچ خوانندہ غاک پارینو کہ خواست آتا پورومننگ اسکان برانز نا لڑ برجاء مرو۔

بلوچ خوانندہ تا پاننگ ئس کہ ہراتم آن نن تینا خواست آتا حق اکن برانز ئٹ توسنن جامعہ نا کنڈ آن جتاء وڑ ئٹ ننے تڑی تننگک۔ جامعہنا پاننگ آ ڈسٹرکٹ نا جتاء فورسز آک خوانندہ تا ہاسٹل آتیٹ چھاپہ خلیسہ اوفتے جسمانی و ذہنی اذیت نا گواچی کرینو، اوفتا عکسآتے ہلکنو، خوانندہ تا فون تے پُلانو و فون کوڈ آتا ملنگ آ ہم اوفتے بیوس کرینو۔

تدوکا دے پریس کانفرنس کریسہ بلوچ خوانندہ تا پاننگ ئس کہ بلوچستان ئٹ تعلیمی ادارہ تا حالیت خراب ءِ ہرانا سوب بلوچ خوانندہغاک پنجاب آ بریرہ ولے بد بختی آن داڑے بلوچ خوانندہ غاک ہڑدے برانز آتیٹ خننگرہ ہرا جامعہ تا اسہ چم ئسے کہ بلوچ خوانندہ تےخواننگ نا پڑ آن مُر تخنگ مرے و اوفتے ویل آتیٹ گِریسہ برانز آتیٹ آختہ کننگ مرے تانکہ او تینا خواننگ نا سفر ءِ جارات ئٹ برجاءتخنگ کپس۔

بلوچ خوانندہ تا پاننگ ئس کہ ننا خواست آتیان اسٹ دا ہم ارے کہ ہراسمنٹ و پروفائلنگ نا لڑ ءِ ایسر کننگ مرے۔

پاکستانی ظلم و زوراکی آن ہمپ و لڈ کروک ہزار آ بلوچ آک دا وخت اوغانستان نا جتاء علاقہ تیٹ باہوٹی زند گدریفنگ ءُ ہرافتے آ ہروختجلہو ہم مریسہ کیک و دا جلہو تا سوب دا وخت اسکان کہی بلوچ باہوٹیک کسفنگانو اندن بلوچ و پشتون سروک آک دا جلہو تا دوبہ ءِپاکستانی ڈھکوک ادارہ تیا خلیرہ۔

پوسکنا حوال تا رد ئٹ اوغانستان نا جاندمی صوبہ کندھار آن طالبان حکومت نا کارندہ آک اِرا شک بر ءُ بندغ دزگیر کرینو ہرا بلوچباہوٹی تا اُرا تیٹ ہنیسہ تینے طالبان پرینو۔

اسہ حکومتی کارندہ ئس اِرا بندغ نا دزگیری ءِ پک کریسہ پارے کہ دوبہ دار آک سر و سوج نا وخت آ منانو کہ اوفتے پاکستانی ڈھکوکادارہ تا کنڈ آن زر تریسہ بلوچ باہوٹی تے ٹک کننگ نا کاریم تننگانے و داڑتون اوار گمانی ڈوہدار آک کندھار ئٹ ٹہیفوک پاکستانیقونصل خانہ نا کارندہ نا ہم پاریر ہرا بلوچ باہوٹی تا اُرا تا حوال ءِ اوفتے تسوسس۔

یاتی مرے کہ تُو ئس مالو اوغانستان نا بلوچ اکثریتی صوبہ نیمروز ئٹ اسہ بلوچ باہوٹی ئسے اونا اُرا نا مونا سم کاری کریسہ خونکننگاسس۔

اندن تدوکا تُو اسپین بولدک آن ہم طالبان کارندہ آک پاکستانی ڈکوک ادارہ تا پنچ باسکی ٹولی ئسے دزگیر کریسر ہرافتے چمن ٹیتربیت تریسہ بلوچ باہوٹی تیا جلہو نا کاریم تننگاسس۔

بلوچستان نا ضلع ہرنائی ٹی فوج ئنا اسہ ہیلی کاپٹر اس آپریشن نا وخت آ تمیسہ بھس مس، ہرا ٹی اِرا پائلٹ تون اوار شش فوجی کارندہ مرگ ئنا گواچی مسر۔

پاکستانی لشکر نا شعبہ تعلقات عامہ (آئی ایس پی آر) نا رد ئٹ یک شمبے نا نن لشکر نا اسہ ہیلی کاپٹر اس فلائنگ مشن اسیٹ ہرنائی ٹی فنی خرابی نا سوب آن تمیسہ بھس مس۔

ہیلی کاپٹر انت مشن ئسے آ ئس و اونا بھس مننگ نا اخس وخت آن پد اوڑے فوج ئنا کارندہ آک سر مسر دا بارو ئٹ آئی ایس پی آر شابیتی حوال شنگ کتنے۔ ایلو نیمہ غان بلوچ لبریشن آرمی دا ہیلی کاپٹر ءِ بھس کننگ ءِ منانے۔

آئی ایس پی آر نا رد ئٹ ہیلی کاپٹر ئٹ پائلٹ میجر محمد منیب افضل، پائلٹ میجر خرم شہزاد، نائیک جلیل، صوبیدار عبدالواحد، سپاہی محمد عمران و سپاہی شعیب سوار ئسر۔

برجاء سال بلوچستان ئٹ پاکستانی لشکر نا ہیلی کاپٹر نا تمنگ نا دا ارٹمی تدینی ءِ۔

داکان مُست تدوکا تو اگست ئٹ نوکاپ آن زیمی تیکن لسبیلہ ٹی ریلیف آپریشن ئٹ اختہ ہیلی کاپٹر بھس مسس۔

آئی ایس پی آر نا رد ئٹ ہیلی کاپٹر مننگ کروک فنی خرابی تا سوب آن تماسس ولے دا نا ہم بھس کننگ نا ذمہ واری ءِ بلوچ سلاء بند تنظیم “براس” ارفے۔ دا تدینی ٹی کور کمانڈر کوئٹہ لیفٹننٹ جنرل سرفراز تون اوار شش لشکری افسر مرگ ئنا گواچی مسوسر۔

ہیلی کاپٹر نا تمنگ نا ارٹمی تدینی ضلع ہرنائی ٹی مسنے۔ ہرا اسہ جنگ زدہ ءُ علاقہ ئسے۔ ہرنائی ٹی داکان مُست ہم بلوچ سلاء بند تنظیم و سیکیورٹی فورسز آتا نیام ئٹ جھڑپ مسنے۔

اِرا تو مُست جولائی ٹی زیارت و ہرنائی نا مش تا لڑ ئٹی فوج ئنا ڈیفنس ہاؤسنگ اتھارٹی (ڈی ایچ اے) تون تفوک افسر لیفٹننٹ کرنل لیئق مرزا بیگ و اونا سیال ءِ ہم برمتہ کننگا۔ پدان اوفتا جونک خننگار۔ دا تدینی نا ذمہ واری ءِ بلوچ سلاء بند تنظیم ’بلوچ لیبریشن آرمی‘ (بی ایل اے) ارفے۔

دا تدینی آن پد سیکیورٹی فورسز آک کارروائی کریسہ ڈی ایچ اے نا افسر لیفٹننٹ کرنل لیئق بیگ مرزا و اونا کزن نا خون ئٹ تُد نو بندغ ءِ خلنگ نا دعویٰ کریر۔

خلنگ مروک نو بندغ نا چاہنداری مننگ آن گڈ پاش مس کہ او بیگواہ ءُ بندغ ئسر ہرا نا برخلاف بیگواہ آ بندغ آتا خاہوت آک کوئٹہ ریڈ زون آ پنجاہ دے اسکان تولوک برانز ہم کریر۔

تدوکا دے تیٹ بلوچستان نا پولیس نا محکمۂ انسدادِ دہشت گردی (سی ٹی ڈی) نا ڈپٹی انسپکٹرجنرل (ڈی آئی جی) اسہ اعلامیہ اس شنگ کریسس ہرا ٹی دا خلیس نا درشانی کننگاسس کہ سلاء بند تنظیم آتا کنڈ آن تخریبی کارروائی مننگ کیک ہرا ٹی سرکاری افسر آتے برمتہ کننگ نا مننگ کروک تدینیک مننگ کیرہ۔

ضلع ہرنائی ٹی سیکیورٹی آ ساڑی لیویز فورس نا بھلو افسر اس وائس آف امریکہ ءِ تینا پِن ءِ پاش کپننگ نا شڑت آ پارے کہ یک شمبے و دو شمبے نا نیامیکو نن ئنا 12 بجہ آ اوفتے حوال رسینگا کہ فوج ئنا اسہ ہیلی کاپٹر اس تمیسہ بھس مسنے۔

لیویز فورس نا افسر فون آ تران کریسہ ودیک پارے کہ کھوسٹ ئٹ شین لیزہ نا علاقہ ٹی ہندی بندغ آک پاریر کہ ننکان اسہ ہیلی کاپٹر اس مش ئنا ہیپار خننگا و منَہ ساعت آن گڈ اسہ تراک ئسے نا توار بننگا و موڷ بش مس۔

ہندی بندغ آتا پاننگ ءِ ہیلی کاپٹر نا بھس مننگ آن گڈ علاقہ ٹی بھلو کچ اسیٹ سیکیورٹی کارندہ آک گشت کننگ ءُ۔

لیویز افسر نا رد ئٹ یک شمبے نا نن ہرنائی ٹی زردالو نا ہند آ اسہ ٹرک اس خراب مسس، ہراڑان پد اوڑے ٹریفک جام مسس و کیہئ اُلاخ آک گٹ مسوسر۔

اوفتا پاننگ ئس کہ حوال رسینگانے کہ ٹریفک جام نا وخت آ مش تیان سلاء بند بندغ بسوسر و کار اسیٹ سوار اِرا بندغ نا شناختی کارڈ آتے اُراسر۔ منَہ بندغ آتا پاننگ ءِ کہ اوفتے برمتہ کننگانے ولے سرکار نا کنڈ آن دا حوال پک کننگتنے۔

ایلو پارہ غان ٹی بی پی ذرائع آک پک کریر کہ بی ایل اے نا سرمچار آک روڈ ءِ تفیسہ گاڑی تے پٹنگ بنا کریسر۔ اندن کولا دروک ٹرک آتے ہم ٹک کننگا۔

ہرنائی ٹی ہیلی کاپٹر نا تمنگ آن مرگ ئنا گواچی مروکا کارندہ آتا جون تے کوئٹہ ٹی کمبائنڈ ملٹری اسپتال (سی ایم ایچ) آ سر کننگا، پدان اوفتا نمازِ جنازہ ہم خواننگا ہرا ٹی بھلا کوالخواک اوار مسر۔

ایلو کنڈ آن بلوچ سلاء بند تنظیم بلوچ لبریشن آرمی (بی ایل اے) فوج ئنا ہیلی کاپٹر ءِ بھس کننگ ءِ قبول کرینے۔

بی ایل اے نا ترجمان جیئند بلوچ ذرائع ابلاغ نا نمائندہ تے ای میل کریسہ تینا بیان ئٹ پارے کہ بی ایل اے نا سرمچار آک ہرنائی نا علاقہ زردآلو نا خڑک کارروائی ٹی پاکستان نا اِرا سیکیورٹی کارندہ تے دزگیر کرینو۔

بی ایل اے نا رد ئٹ ہرا وخت دا ہڑتوما سیکیورٹی کارندہ آتے دزگیر کننگا پاکستان نا فوج ئنا ہیلی کاپٹر ہموڑے سر مس۔ بی ایل اے نا سرمچار آک ہرنائی ٹی کھوسٹ ئنا خڑک ہیلی کاپٹر ءِ بھس کریر۔

بلوچستان نا علاقہ ڈیرہ بگٹی ٹی ملیریا دین ئنا دروشم ہلکنے۔ دئے دے ٹی چُنا تون اوار 9 بندغ بیران و تیوہ ضلع نا سرکاری وپرائویٹ، چُنکا بھلا کُل اسپتال آک ناجوڑ آتیان پُر مسنو و دارو تا ہم نیستی ودی مسنے۔

حوال تا رد ئٹ ہار و نوکاپ آن گڈ شاری تا ویل آک کم مننگ نا جاگہ غا پین ودنگ ءُ۔

تیوہ ضلع ٹی دئے دے ٹی چار چُنا تون اوار کم آن کم نو بندغ بیران مسنو و کیہی بندغ آتے ترند ہڷ ہم کننگ ءِ۔

تروک حوال تا رد ئٹ ناجوڑ آتا سرکاری و پرائوٹ اسپتال آتیٹ داخل مننگ نا سوب آن اسپتال آتیٹ داسا جاگہ ہم اف۔

سینئر ڈاکٹر و مسکوہی میڈیکل سپرنٹنڈنٹ ڈی ایچ کیو اسپتال ڈیرہ بگٹی ڈاکٹر ستیش کمار نا رد ئٹ ملیریا آن زیمی مروک آ کیہیناجوڑ آک ہڑدے اسپتال آ بریرہ ہرا نا سوب آن ہڷ ئنا دارو تا ہم نیستی ودی مسنے۔ ہڷ ئنا دارو تا گیشتری مارکیٹ آن غیب مسنے۔