تدوکا دے تیٹ زیارت ٹی دروغ نا مونتس ٹی مُست آن پاکستانی لشکر نا دزگیری ٹی مروک بندغ آتا خون ئنا برخلاف اینو خاہوت آتا کنڈ آن مروکا برانز آ پولیس جلہو کرسہ برانز کروکا تیا سخت لٹ کُٹ و آنسوں گیس فائر کرسہ چُنا و زالبول تے ٹپی کرے۔

لٹ کُٹ و آنسوں گیس ئنا شیلنگ نا سوب آن وی بی ایم پی نا کمک کماش ماما قدیر تون اوار کہی زالبول و چُنا تا حالیت خراب مس۔

سوشل میڈیا غا وائرل مروکا ویڈیو تیٹ پولیس خاہوت آ تیا بےدادی و آنسوں گیس فائر کننگ آ خننگ مریک و اسہ وائرل ءُ عکس ئسے ٹی بیگواہ کفایت اللہ نا زائیفہ کِرن نا ٹپی مروکا دو آن دتر وہینگ آ خننگ مریک۔

خاہوت آتا پاننگ ءِ کہ ہرا وڑ زیارت ئٹی مُست آن دزگیری ٹی مروک بیگواہ غا بندغ آتے خون کننگانے ننے خلیس ءِ کہ ننا اخس کہ بندغ دا وختا فورسز آتا دزگیری ٹی ءُ اوفتتون ہم اندن مرو۔

اوفتا پاننگ ئس کہ زیارت ٹی دروغ نا مونتس ٹی خون مروک انجینئر ظہیر نا ایڑ اوڑ کن برانز کننگ ئس و دا تو آ عئید ئنا دے ہم اونا ایڑ عظمٰی برانز ئٹی اوار ئس کہ اودے انصاف تننگ مرے و اونا ایلم ءِ پاش کننگ مرے ولے داسا اونا ایلم نا جشوک جون اودے تننگا۔

یاتی مرے کہ دوانزدہ و سینزدہ جولائی نا نیامیکو نن بلوچ جنگجوک پاکستانی لشکر نا اسہ حاضر سروس کرنل ئسے ہمو وختا برمتہ کریر ہرا وخت او تینا خاہوت تون بلوچستان نا علاقہ زیارت نا کنڈ آ سفر کننگ ئس۔ و دا نا زمہ واری ءِ بلوچ لبریشن آرمی ارفے۔

پاکستانی لشکر کرنل لئیق نا برمتہ نا برخلاف پن کروک علاقہ ٹی بھلو کچ ئسے ٹی آپریشن بناء کرے و پاکستانی لشکر نا حوالکاری شعبہ آئی ایس پی آر دا آپریشن ئٹ نوہ بندغ خلنگ نا دعوی کرے ولے بی ایل اے آئی ایس پی آر نا دا دعووں ءِ رد کرسہ پارے کہ خلنگ مروکا بندغ آتا بی ایل اے تون ہچو تعلقداری اس اف و بی ایل اے نا ترجمان تینا بیان ئٹ پاکستانی لشکر نا دا دعویٰ ءِ اسہ پروپگنڈہ اس پارے ہرا نا مسخت بلوچستان ئٹی تینا بے سہبی ءِ ڈھکنگ ءِ۔

بی ایل اے نا ترجمان نا پاننگ ئس کہ پاکستانی لشکر نا آپریشن آن بیدس ہم بلوچ سرمچار آک سر سہبی ئٹ تینا مشن ءِ ایسری تسر و ارزانی ئٹ اوکان پیشتمنگ ئٹی سر سہب مسر۔ تینا بے سہبی ءِ ڈھکنگ کن پاکستانی فوج مننگ کروک بیگواہ غا بلوچ آتے شہید کرسہ اوفتے بلوچ سرمچار ظاہر کننگ نا کوشست کننگ ءِ۔

داسکان زیارت ٹی دروغ نا مونتس ٹی شہید مروکا بندغ آ تیان ہفت بندغ نا چاہنداری مسنے ہرا مُست آن فورسز آتا دزگیری ٹی ئسر و اوفتا پنک ہم بیگواہ غا بندغ آتا لسٹ ئٹ اریر، ہرا نا پک ءِ بلوچستان حکومت نا مشیر برائے داخلہ ضیاء لانگو ہم تدوکا دے کوئٹہ پریس کلب ٹی پریس کانفرنس ٹی کرے۔

تدوکا دے وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجہتی کمیٹی، بلوچ وومن فورم، بی ایس او و بی ایس او پجار نا اسہ اوڑدئی مجلس اس وائس فار بلوچ مسنگ پرسنز نا کماش نصر اللہ بلوچ نا سروکی ٹی اڈ تننگا۔

مجلس ٹی اوڑدئی ئٹ فیصلہ کننگا کہ سیکورٹی فورسز آتا کنڈ آن بیگواہ غا بندغ آتے شہید کرسہ جون تے خسنگ نا برخلاف 21 جولائی آ 12 بجہ غا کوئٹہ پریس کلب نا مونا برانز کننگو۔

وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجہتی کمیٹی، بلوچ وومن فورم، بی ایس او و بی ایس او پجار نا اسہ اوڑدئی مجلس اس وائس فار بلوچ مسنگ پرسنز نا کماش نصر اللہ بلوچ نا سروکی ٹی اڈ تننگا۔

مجلس ئٹ منَہ دے مُست سیکیورٹی فورسز آتا کنڈ آن بیگواہ مروک بلوچ آتے جعلی مقابلہ ٹی خلنگ نا مذمت کریسہ پاننگا کہ ریاست نا کنڈ آن بیگواہ مروکا بندغ آتے دہشت گرد پاریسہ اوفتے شہید کننگانے، حالانکہ دا غٹ بندغ آک زوراکی ئٹ بیگواہ مسوسر دا غٹ ئنا زوراکی نا بیگواہی تا شاہدی وائس فار بلوچ مسنگ پرسنز نا رہا ارے۔

اوفتا پاننگ ئس کہ مروئی دُن ئس کہ ریاست و اونا ادارہ آک بیگواہ مروکا بندغ آتا جیڑہ ءِ سوبری ئٹ ہُریر و دادے سوبری ئٹ ایسر کننگ نا کوشست کیر ولے حکومتی ادارہ آتا سوبری نا دا حال ءِ کہ بیگواہ غا بندغ آتے آجو کننگ نا جاگہ غا اوفتے جعلی مقابلہ ٹی شہید کریسہ اوفتا جون تے خسیرہ۔

مجلس نا ایسر ئٹ اوڑدئی ئٹ فیصلہ کننگا کہ سیکورٹی فورسز آتا نیمہ غان بیگواہ غا بندغ آتے شہید کریسہ جون تے خسنگ نا برخلاف پگہ یعنی 21 جولائی آ 12 بجہ غا کوئٹہ پریس کلب نا مونا برانز کننگو، اندا رد ئٹ غٹ بندغ آتیان خواست کننگانے کہ او دا برانز ئٹ اوار مریر۔

یاتی مرے کہ پاکستانی فوج 15جولائی آ بلوچستان نا علاقہ زیارت ئٹی آزادی دوست تنظیم تون تفوک نوہ بندغ ءِ خلنگ نا دعویٰ کریسس ہرا کہ پدان دروغ اس ثابت مس۔

خون مروکا تیان داسکان پنچ بندغ نا چاہنداری مسنے ہرافتے جتا وخت ئٹ جتا علاقہ آ تیان پاکستانی فوج زوراکی ئٹ بیگواہ کریسس۔

شہید مروکا تیٹ شمس ساتکزئی ءِ پنچ سال مُست، شہزاد ولد خدابخش دہوار ءِ برجاء سال 4 جون، انجینئر ظہیر احمد ءِ 7 اکتوبر 2021، سالم ولد کریم بخش ءِ 18 اپریل 2022، ڈاکٹر مختیار احمد ولد عبدالحئ ءِ 11 آ پاکستانی فوج زوراکی ئٹ بیگواہ کریسس۔

بلوچستان نا اِرا جتاء ضلع آتیٹ مُسہ جوْن خننگانو۔

شابیت حوال آتا ردئٹ بلوچستان نا ضلع دالبندین آن ضلعی بست و بند اسہ بندغ ئسے نا جون ءِ دوئی کریسہ چاہنداری کِن ڈی ایچ کیوآ درے ۔

ضلع بست و بند نا ردئٹ جون شار نا خُڑکا گیاوان ئسے آن خننگانے ہرانا چاہنداری دالبندین نا رہینگوک محمد رمضان ولد محمد مرادآن مسُنے ۔

پولیس کارندہ آک تدینی تا سوب نا باروٹ مُستی سر وسوج کننگ ءُ ۔

حوال آتا ردئٹ بلوچستان نا ضلع خضدار نا سول ہسپتال ٹی اسہ نیاڑی و اسہ نرینہ ئسے نا جون ہتنگانے ہرافتا چاہنداری دائسکانمونا بتنے ۔

بست و بند نا ردئٹ جون آک مُسہ دے مُتکُن ءُ و اوفتیا ٹپ نا نشان آک ءُ ہرافتان پاش مریک کہ پِن کروک بندغ آتے کسفنگانے، جون آتےچاہنداری کِن اسپتال ٹی تخنگانے ۔

اندا وخت دارالحکومت کوئٹہ ٹی نا درست بندغ آک سُم کاری کریسہ اسہ بندغ ئسے مرگ نا گواچی و ارٹمیکو ءِ ٹپی کریر ۔

پولیس نا ردئٹ سُم کاری نا تدینی کوئٹہ نا علاقہ نواں کلی ٹی مس ہراڑے برجاء سندھی پشتون چک و تاڑ نا سوب آن نا درست بندغ آکگمانی رد ئٹ سندھی مننگ نا شک ٹی اسہ بندغ ئسے مرگ نا گواچی کریر و نرار۔

پولیس نا ردئٹ کسفنگوک پِن کروک بندغ بختیار آباد سبی نا رہینگوک و مغیری بلوچ ئسے و سندھی ہیت کیک ۔ پولیس  تدینی نا ایفآئی آر نوشتہ کریسہ پارے کہ ڈوہدار تا پٹ و پول بناء کننگانے ۔

تدوکا دے تیئٹ پاکستانی آرمی نا کرنل ءِ برمتہ و مرگ ئنا گواچی کننگ آن گُڈ بلوچستان ٹی سیکورٹی افسران آتے سیکورٹی ترند کننگنا پنت شینک کننگانے ۔

کاؤنٹر ٹیررزم ڈپارٹمنٹ پامداری پنت ٹی صوبائی پولیس بست و بند ءِ پارینے کہ بلوچ لبریشن آرمی نا پارہ غان کاریم کروک فورسزافسر آتے  برمتہ کننگ نا منصوبہ بندی کننگ نا پاش خُلیس ساڑی ءِ ۔

کاؤنٹر ٹیررزم ڈپارٹمنٹ نا پارہ غان افسر آتے پنت ٹی پاننگانے کہ بلوچ لبریشن آرمی نا باسک آک کرنل لئیق بیگ نا ڈول کاروائی کننگکیک ل، سی ٹی ڈی و خاص کہ فوجی افسر غیر معمولی بیداری کریسہ سیکورٹی تا زیات بست و بند کیر ۔

ایلو پارہ غان انٹیلجنس ادارہ آک بلوچستان ٹی بروکا مَنہ دے ءِ بھاز حساس پارینو اندن غُٹ آرمی کیمپ و ہیڈ کوارٹرز تا رکھ ءِ سختکننگانے ۔

یاتی مرے کہ دوانزہ جولائی آ پاکستانی لشکر نا اسہ کرنل ئسے زیارت نا علاقہ ورچوم آن برمتہ کننگ آن گُڈ مرگ نا گواچی کننگا، پِنکروک کرنل نا برمتہ و مرگ نا گواچی کننگ نا ذمہ واری بلوچ لبریشن آرمی ارفے ۔ بیان ٹی تنظیم نا ترجمان جیئند بلوچ نا پاننگ ئس کہپاکستان نا کرنل لئیق ءِ اونا ڈو تیا بلوچ عدالت مرگ ئنا سزا تس۔

جیئند بلوچ تینا بیان ئٹ پاریسس کہ کرنل لئیق ءِ بی ایل اے نا اسپیشل فورس اسپیشل ٹیکنیکل آپریشنز اسکواڈ اسہ انٹیلیجنس آپریشننا وخت آ دوانزدہ جولائی آ دزگیر کننگا ۔

کرنل لئیق برمتہ و مرگ نا گواچی کننگ آن گُڈ زیارت تون اوار خُڑکنا علاقہ آتیٹ فورسز کارندہ آتا پارہ غان زمینی و فضائی فوجیآپریشن نا ہم حوال ءِ ۔

پاکستان لشکر نا شعبہ تعلقات عامہ آئی ایس پی آر آپریشن ئٹ پنچ بندغ ءِ کسفنگ نا دعویٰ کرینے اندن اسہ کارندہ نا مرگ نا گواچیکننگ نا ہم پک کننگانے۔

چار شمبے نا دے بلوچستان نا ضلع آواران نا تحصیل مشکے ٹی بندغ آتا بھلو کچ اس کسر تیا پیشتمیسہ برانز کریر۔

دی بلوچستان پوسٹ نیوز ڈیسک ءِ رسینگوک آ حوال تا ردئٹ مشکے ویلفیئر ایسوسی ایشن نا پارہ غان مشکے ٹی بنیاتی آسراتی تا وےتننگ نا برخلاف برانز نا پڑو کننگا، الس کسر تیا پیشتمیسہ تینا خواست آتا حق ئٹی برانز کرے و حکومت وخت آن علاقہ نا بنیاتیآسراتی تا ویل آتے ایسر کننگ نا خواست کرے۔

برانز کروک آک انٹرنیٹ نا وے تننگ، منشیات نا ایسر کننگ و تعلیمی نیستی نا ڈول انگا اہم آ ویل آتے روشن کریر۔

برانز کروک آتا پاننگ ءِ کہ نن دا پوسکنا ٹیکنالوجی و ڈیجیٹل وخت ٹی انٹرنیٹ نا وڑ ءُ آسراتی آن محروم اُن دا پُوسکنا دور ٹی انٹرنیٹآکسیجن نا وڑ بکار جوڑ مسُنے، بیست و یکمی کرن ئٹی جہان انٹرنیٹ نا زریعت ئٹ اسہ گلوبل ویلج ئسے ٹی بدل مسُنے ولے افسوز ناہیت ئسے کہ مشکے نا بندغ آک داسکان انٹرنیٹ نا ڈول انگا آسراتی تیان پد تموک ءُ ۔

اوفتا پاننگ ئس کہ خوانندہ آتتون اوار کاروباری بندغ آک ہم زیات زیمی مسُنو انتئے کہ پُوسکنا وخت ئٹی زیات کاروبار انٹرنیٹ آنلائن وواٹساپ نا زریعت ئٹ کننگک ولے نن مشکے نا بندغ آک جہان آن سد سال پد اُن، نہ بجلی نہ روڈ نہ اسپتال نہ انٹرنیٹ نا آسراتی، اینوپگہ جہانی پِڑ ئٹی دا غٹ گِڑاک بندغ نا بنیاتی حق آتیٹ حساب مریرہ۔ انتئے نن بندغ آتیٹ حساب افن کہ ہر وار ننے ریفیرہ داسا ننپین چُپ مروفن ننے ننا حق آک بکار ءُ۔

برانز کروک آتا پاننگ ءِ کہ مشکے و آواران اینو ہم مُست ئنا دور ئٹ مونا بننگ ءِ و بندغ آتے بنیاتی آسراتی وے تننگ نا سوب آن بندغیزِند زیات سختی تا گواچی ءِ۔

بلوچستان نا اِرا جتا آ ضلع غا تیٹ مروک جتا حالیت نا شکست و تدینی تیٹ شش بندغ مرگ ئنا گواچی اندن دہ ٹپی مسُر۔

تدینیک بلوچستان نا علاقہ چمن و ڈیرہ بگٹی ٹی مسُر لیویز نا ردئٹ چمن نا علاقہ کوئٹہ چمب کسر آ شیلا باغ نا ہند آ اُلاخ اس تدینی نا گواچی مس۔

لیویز کارندہ آتا ردئٹ ترندی ئٹ ہِننگ نا سوب آن اُلاخ کڈ ئٹ تما ہراڑان 5 بندغ مرگ ئنا گواچی و 10 ٹپی مسُر، ٹپی مروک و جون تے اسپتال آ سر کننگا، داسکان ٹپی و بیران مروک آتا چاہنداری پاش کننگتنے۔

ایلو پارہ غان ڈیرہ بگٹی ٹی ڈکوخ ڈیم ئٹی اسہ ورناس ٹُبیسہ مرگ نا گواچی مس ہرانا چاہنداری احمد ولد استاد بامی بگٹی نا پِن آن مسُنے۔